17. மஞ்சபீடா²தி³ஸங்கி⁴கஸேனாஸனேஸுபடிபஜ்ஜிதப்³ப³வினிச்ச²யகதா²

82. ஏவம் ஸஹஸேய்யவினிச்ச²யம் கதே²த்வா இதா³னி ஸங்கி⁴கே விஹாரே ஸேய்யாஸு கத்தப்³ப³வினிச்ச²யம் கதே²தும் ‘‘விஹாரே ஸங்கி⁴கே ஸேய்ய’’ந்த்யாதி³மாஹ. தத்த² ஸமக்³க³ம் கம்மம் ஸமுபக³ச்ச²தீதி ஸங்கோ⁴, அயமேவ வசனத்தோ² ஸப்³ப³ஸங்க⁴ஸாதா⁴ரணோ. ஸங்க⁴ஸ்ஸ தி³ன்னோ ஸங்கி⁴கோ, விஹரதி ஏத்தா²தி விஹாரோ, தஸ்மிம். ஸயந்தி ஏத்தா²தி ஸேய்யா, தம். அஸந்த²ரீதி ஸந்த²ரித்வான. பக்கமனம் பக்கமோ, க³மனந்தி அத்தோ². ‘‘விஹாரே ஸங்கி⁴கே ஸேய்யம், ஸந்த²ரித்வான பக்கமோ’’தி இமஸ்ஸ உத்³தே³ஸபாட²ஸ்ஸ ஸங்கி⁴கே விஹாரே…பே… பக்கமனந்தி அத்தோ² த³ட்ட²ப்³போ³தி யோஜனா. தத்ராதி தஸ்மிம் பக்கமனே அயம் ஈதி³ஸோ மயா வுச்சமானோ வினிச்ச²யோ வேதி³தப்³போ³தி அத்தோ². கதமோ ஸோ வினிச்ச²யோதி ஆஹ ‘‘ஸங்கி⁴கே…பே… பாசித்திய’’ந்தி. அபரிக்கி²த்தஸ்ஸ உபசாரோ நாம ஸேனாஸனதோ த்³வே லேட்³டு³பாதா. பாசித்தியந்தி பட²மம் பாத³ம் அதிக்காமேந்தஸ்ஸ து³க்கடம், து³தியாதிக்கமே பாசித்தியம். கத²ம் விஞ்ஞாயதிச்சாஹ ‘‘யோ பன பி⁴க்கு²…பே… வசனதோ’’தி.

தத்த² ஸங்கி⁴கோ விஹாரோ பாகடோ, ஸேய்யா அபாகடா, ஸா கதிவிதா⁴இச்சாஹ ‘‘ஸேய்யா நாம…பே… த³ஸவிதா⁴’’தி. தத்தா²பி கதமா பி⁴ஸி, கதமா சிமிலிகாத³யோதி ஆஹ ‘‘தத்த² பி⁴ஸீதி…பே… ஏஸ நயோ பண்ணஸந்தா²ரே’’தி. தத்த² மஞ்சே அத்த²ரிதப்³பா³தி மஞ்சகபி⁴ஸி, ஏவம் இதரத்ர, வண்ணானுரக்க²ணத்த²ம் கதாதி படக²ண்டா³தீ³ஹி ஸிப்³பி³த்வா கதா. பூ⁴மியம் அத்த²ரிதப்³பா³தி சிமிலிகாய ஸதி தஸ்ஸா உபரி, அஸதி ஸுத்³த⁴பூ⁴மியம் அத்த²ரிதப்³பா³. ஸீஹத⁴ம்மாதீ³னம் பரிஹரணே ஏவ படிக்கே²போதி இமினா மஞ்சபீடா²தீ³ஸு அத்த²ரித்வா புன ஸம்ஹரித்வா ட²பனாதி³வஸேன அத்தனோ அத்தா²ய பரிஹரணமேவ ந வட்டதி, பூ⁴மத்த²ரணாதி³வஸேன பரிபோ⁴கோ³ பன அத்தனோ பரிஹரணம் ந ஹோதீதி த³ஸ்ஸேதி. க²ந்த⁴கே ஹி ‘‘அந்தோபி மஞ்சே பஞ்ஞத்தானி ஹோந்தி, ப³ஹிபி மஞ்சே பஞ்ஞத்தானி ஹோந்தீ’’தி ஏவம் அத்தனோ அத்தா²ய மஞ்சாதீ³ஸு பஞ்ஞபேத்வா பரிஹரணவத்து²ஸ்மிம் ‘‘ந, பி⁴க்க²வே, மஹாசம்மானி தா⁴ரேதப்³பா³னி ஸீஹசம்மம் ப்³யக்³க⁴சம்மம் தீ³பிசம்மம், யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 255) படிக்கே²போ கதோ, தஸ்மா வுத்தனயேனேவேத்த² அதி⁴ப்பாயோ த³ட்ட²ப்³போ³. ஸாரத்த²தீ³பனியம் (ஸாரத்த². டீ. பாசித்திய 3.112) பன ‘‘யதி³ ஏவம் ‘பரிஹரணேயேவ படிக்கே²போ’தி இத³ம் கஸ்மா வுத்தந்தி சோத³னம் கத்வா ‘அனுஜானாமி, பி⁴க்க²வே, ஸப்³ப³ம் பாஸாத³பரிபோ⁴க³’ந்தி (சூளவ. 320) வசனதோ புக்³க³லிகேபி ஸேனாஸனே ஸேனாஸனபரிபோ⁴க³வஸேன நியமிதம் ஸுவண்ணக⁴டாதி³கம் பரிபு⁴ஞ்ஜிதும் வட்டமானம்பி கேவலம் அத்தனோ ஸந்தகம் கத்வா பரிபு⁴ஞ்ஜிதும் ந வட்டதி. ஏவமித³ம் பூ⁴மத்த²ரணவஸேன பரிபு⁴ஞ்ஜிதும் வட்டமானம்பி அத்தனோ ஸந்தகம் கத்வா தம் தம் விஹாரம் ஹரித்வா பரிபு⁴ஞ்ஜிதும் ந வட்டதீதி த³ஸ்ஸனத்த²ம் பரிஹரணேயேவ படிக்கே²போ வேதி³தப்³போ³’’தி வுத்தம்.

பாவாரோ கோஜவோதி பச்சத்த²ரணத்தா²யேவ ட²பிதா உக்³க³தலோமா அத்த²ரணவிஸேஸா. ஏத்தகமேவ வுத்தந்தி அட்ட²கதா²ஸு (பாசி. அட்ட². 116) வுத்தம். ‘‘இத³ம் அட்ட²கதா²ஸு ததா²வுத்தபா⁴வத³ஸ்ஸனத்த²ம் வுத்தம், அஞ்ஞம்பி தாதி³ஸம் மஞ்சபீடே²ஸு அத்த²ரிதப்³ப³ம் அத்த²ரணமேவா’’தி தீஸுபி க³ண்டி²பதே³ஸு வுத்தம். மாதிகாட்ட²கதா²யம் (கங்கா². அட்ட². து³தியஸேனாஸனஸிக்கா²பத³வண்ணனா) பன ‘‘பச்சத்த²ரணம் நாம பாவாரோ கோஜவோ’’தி நியமேத்வா வுத்தம், தஸ்மா க³ண்டி²பதே³ஸு வுத்தம் இமினா ந ஸமேதி, ‘‘வீமம்ஸித்வா க³ஹேதப்³ப³’’ந்தி ஸாரத்த²தீ³பனியம் (ஸாரத்த². டீ. பாசித்திய 3.116) வுத்தம். வீமம்ஸிதே பன ஏவமதி⁴ப்பாயோ பஞ்ஞாயதி – மாதிகாட்ட²கதா²பி அட்ட²கதா²யேவ, தஸ்மா மஹாஅட்ட²கதா²தீ³ஸு வுத்தனயேன ‘‘பாவாரோ கோஜவோ’’தி நியமேத்வா வுத்தம், ஏவம் நியமனே ஸதிபி யதா² ‘‘லத்³தா⁴தபத்தோ ராஜகுமாரோ’’தி ஆதபத்தஸ்ஸ லத்³த⁴பா⁴வேயேவ நியமேத்வா வுத்தேபி நித³ஸ்ஸனனயவஸேன ராஜககுத⁴ப⁴ண்ட³ஸாமஞ்ஞேன ஸமானா வாலபீ³ஜனாத³யோபி வுத்தாயேவ ஹோந்தி, ஏவம் ‘‘பாவாரோ கோஜவோ’’தி நியமேத்வா வுத்தேபி நித³ஸ்ஸனனயவஸேன தேஹி மஞ்சபீடே²ஸு அத்த²ரிதப்³ப³பா⁴வஸாமஞ்ஞேன ஸமானா அஞ்ஞே அத்த²ரணாபி வுத்தாயேவ ஹோந்தி, தஸ்மா க³ண்டி²பதே³ஸு வுத்தவசனம் அட்ட²கதா²வசனஸ்ஸ படிலோமம் ந ஹோதி, அனுலோமமேவாதி த³ட்ட²ப்³ப³ம்.

இமஸ்மிம் பன டா²னே ‘‘யேன விஹாரோ காரிதோ, ஸோ விஹாரஸ்ஸாமிகோ’’தி பாட²ம் நிஸ்ஸாய ஏகச்சே வினயத⁴ரா ‘‘ஸங்கி⁴கவிஹாரஸ்ஸ வா புக்³க³லிகவிஹாரஸ்ஸ வா விஹாரதா³யகோயேவ ஸாமிகோ, ஸோயேவ இஸ்ஸரோ, தஸ்ஸ ருசியா ஏவ வஸிதும் லப⁴தி, ந ஸங்க⁴க³ணபுக்³க³லானம் ருசியா’’தி வினிச்ச²யம் கரோந்தி, ஸோ வீமம்ஸிதப்³போ³, கத²ம் அயம் பாடோ² கிமத்த²ம் ஸாதே⁴தி இஸ்ஸரத்த²ம் வா ஆபுச்சி²தப்³ப³த்த²ம் வாதி? ஏவம் வீமம்ஸிதே ‘‘பி⁴க்கு²ம்ஹி ஸதி பி⁴க்கு² ஆபுச்சி²தப்³போ³’’திஆதி³வசனதோ ஆபுச்சி²தப்³ப³த்த²மேவ ஸாதே⁴தி, ந இஸ்ஸரத்த²ந்தி விஞ்ஞாயதி.

அத² ஸியா ‘‘ஆபுச்சி²தப்³ப³த்தே² ஸித்³தே⁴ இஸ்ஸரத்தோ² ஸித்³தோ⁴யேவ ஹோதி. இஸ்ஸரபா⁴வதோயேவ ஹி ஸோ ஆபுச்சி²தப்³போ³’’தி. தத்தே²வம் வத்தப்³ப³ம் – ‘‘ஆபுச்ச²ந்தேன ச பி⁴க்கு²ம்ஹி ஸதி பி⁴க்கு² ஆபுச்சி²தப்³போ³, தஸ்மிம் அஸதி ஸாமணேரோ, தஸ்மிம் அஸதி ஆராமிகோ’’திஆதி³வசனதோ ஆயஸ்மந்தானம் மதேன பி⁴க்கு²பி ஸாமணேரோபி ஆராமிகோபி விஹாரகாரகோபி தஸ்ஸ குலே யோ கோசி புக்³க³லோபி இஸ்ஸரோதி ஆபஜ்ஜேய்ய, ஏவம் விஞ்ஞாயமானேபி பி⁴க்கு²ம்ஹி வா ஸாமணேரே வா ஆராமிகே வா ஸதி தேயேவ இஸ்ஸரா, ந விஹாரகாரகோ. தேஸு ஏகஸ்மிம்பி அஸதியேவ விஹாரகாரகோ இஸ்ஸரோ ஸியாதி. இமஸ்மிம் பன அதி⁴காரே ஸங்கி⁴கம் ஸேனாஸனம் ரக்க²ணத்தா²ய ஆபுச்சி²தப்³ப³ம்யேவ வத³தி, ந இஸ்ஸரபா⁴வதோ ஆபுச்சி²தப்³ப³ம். வுத்தஞ்ஹி அட்ட²கதா²யம் (பாசி. அட்ட². 116) ‘‘அனாபுச்ச²ம் வா க³ச்சே²ய்யாதி ஏத்த² பி⁴க்கு²ம்ஹி ஸதி பி⁴க்கு² ஆபுச்சி²தப்³போ³’’திஆதி³.

அதா²பி ஏவம் வதே³ய்ய ‘‘ந ஸகலஸ்ஸ வாக்யபாட²ஸ்ஸ அதி⁴ப்பாயத்த²ம் ஸந்தா⁴ய அம்ஹேஹி வுத்தம், அத² கோ² ‘விஹாரஸ்ஸாமிகோ’தி ஏதஸ்ஸ பத³த்த²ம்யேவ ஸந்தா⁴ய வுத்தம். கத²ம்? ஸம் ஏதஸ்ஸ அத்தீ²தி ஸாமிகோ, விஹாரஸ்ஸ ஸாமிகோ விஹாரஸ்ஸாமிகோ. ‘கோ விஹாரஸ்ஸாமிகோ நாமா’தி வுத்தே ‘யேன விஹாரோ காரிதோ, ஸோ விஹாரஸ்ஸாமிகோ நாமா’தி வத்தப்³போ³, தஸ்மா விஹாரகாரகோ தா³யகோ விஹாரஸ்ஸாமிகோ நாமாதி விஞ்ஞாயதி, ஏவம் விஞ்ஞாயமானே ஸதி ஸாமிகோ நாம ஸஸ்ஸ த⁴னஸ்ஸ இஸ்ஸரோ, தஸ்ஸ ருசியா ஏவ அஞ்ஞே லப⁴ந்தி, தஸ்மா விஹாரஸ்ஸாமிகபூ⁴தஸ்ஸ தா³யகஸ்ஸ ருசியா ஏவ பி⁴க்கூ² வஸிதும் லப⁴ந்தி, ந ஸங்க⁴க³ணபுக்³க³லானம் ருசியாதி இமமத்த²ம் ஸந்தா⁴ய வுத்த’’ந்தி. தே ஏவம் வத்தப்³பா³ – மா ஆயஸ்மந்தோ ஏவம் அவசுத்த², யதா² நாம ‘‘க⁴டிகாரோ ப்³ரஹ்மா’’தி வுத்தோ ஸோ ப்³ரஹ்மா இதா³னி க⁴டம் ந கரோதி, புரிமத்தபா⁴வே பன கரோதி, தஸ்மா ‘‘க⁴டம் கரோதீ’’தி வசனத்தே²ன ‘‘க⁴டிகாரோ’’தி நாமம் லப⁴தி. இதி புப்³பே³ லத்³த⁴னாமத்தா புப்³ப³வோஹாரவஸேன ப்³ரஹ்மபூ⁴தோபி ‘‘க⁴டிகாரோ’’இச்சேவ வுச்சதி, ஏவம் ஸோ விஹாரகாரகோ பி⁴க்கூ²னம் பரிச்சத்தகாலதோ பட்டா²ய விஹாரஸ்ஸாமிகோ ந ஹோதி வத்து²பரிச்சாக³லக்க²ணத்தா தா³னஸ்ஸ, புப்³பே³ பன அபரிச்சத்தகாலே விஹாரஸ்ஸ காரகத்தா விஹாரஸ்ஸாமிகோ நாம ஹோதி, ஸோ ஏவம் புப்³பே³ லத்³த⁴னாமத்தா புப்³ப³வோஹாரவஸேன ‘‘விஹாரஸ்ஸாமிகோ’’தி வுச்சதி, ந, பரிச்சத்தஸ்ஸ விஹாரஸ்ஸ இஸ்ஸரபா⁴வதோ. தேனேவ ஸம்மாஸம்பு³த்³தே⁴ன ‘‘விஹாரதா³யகானம் ருசியா பி⁴க்கூ² வஸந்தூ’’தி அவத்வா ஸேனாஸனபஞ்ஞாபகோ அனுஞ்ஞாதோதி த³ட்ட²ப்³போ³. ததா² ஹி வுத்தம் விமதிவினோத³னியம் (வி. வி. டீ. மஹாவக்³க³ 2.295) ‘‘தேஸம் கே³ஹானீதி ஏத்த² பி⁴க்கூ²னம் வாஸத்தா²ய கதம்பி யாவ ந தே³ந்தி, தாவ தேஸம் ஸந்தகம்யேவ ப⁴விஸ்ஸதீதி த³ட்ட²ப்³ப³’’ந்தி, தேன தி³ன்னகாலதோ பட்டா²ய தேஸம் ஸந்தகானி ந ஹோந்தீதி த³ஸ்ஸேதி. அயம் பன கதா² பாட²ஸ்ஸ ஸம்முகீ²பூ⁴தத்தா இமஸ்மிம் டா²னே கதி²தா. விஹாரவினிச்ச²யோ பன சதுபச்சயபா⁴ஜனவினிச்ச²யே (வி. ஸங்க³. அட்ட². 194 ஆத³யோ) ஆவி ப⁴விஸ்ஸதி. யோ கோசீதி ஞாதகோ வா அஞ்ஞாதகோ வா யோ கோசி. யேன மஞ்சம் பீட²ம் வா வினந்தி, தம் மஞ்சபீட²கவானம்.

83. ஸிலுச்சயலேணந்தி ஸிலுச்சயே லேணம், பப்³ப³தகு³ஹாதி அத்தோ². ‘‘ஸேனாஸனம் உபசிகாஹி கா²யித’’ந்தி இமஸ்மிம் வத்து²ஸ்மிம் பஞ்ஞத்தத்தா வத்து²அனுரூபவஸேன அட்ட²கதா²யம் உபசிகாஸங்காய அபா⁴வேன அனாபத்தி வுத்தா. வத்தக்க²ந்த⁴கே (சூளவ. 360 ஆத³யோ) க³மிகவத்தம் பஞ்ஞாபேந்தேன ‘‘ஸேனாஸனம் ஆபுச்சி²தப்³ப³’’ந்தி வுத்தத்தா கேவலம் இதிகத்தப்³ப³தாமத்தத³ஸ்ஸனத்த²ம் ‘‘ஆபுச்ச²னம் பன வத்த’’ந்தி வுத்தம், ந பன வத்தபே⁴தே³ து³க்கடந்தி த³ஸ்ஸனத்த²ம், தேனேவ அந்த⁴கட்ட²கதா²யம் ‘‘ஸேனாஸனம் ஆபுச்சி²தப்³ப³’’ந்தி ஏத்த² ‘‘யம் பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம் யத்த² உபசிகா நாரோஹந்தி, தம் அனாபுச்ச²ந்தஸ்ஸபி அனாபத்தீ’’தி வுத்தம். தஸ்மா யம் வுத்தம் க³ண்டி²பதே³ ‘‘தாதி³ஸே ஸேனாஸனே அனாபுச்சா² க³ச்ச²ந்தஸ்ஸ பாசித்தியம் நத்தி², க³மிகவத்தே ஸேனாஸனம் அனாபுச்சா² க³ச்ச²ந்தோ வத்தபே⁴தோ³ ஹோதி, தஸ்மா து³க்கடம் ஆபஜ்ஜதீ’’தி, தம் ந க³ஹேதப்³ப³ம்.

பச்சி²மஸ்ஸ ஆபோ⁴கே³ன முத்தி நத்தீ²தி தஸ்ஸ பச்ச²தோ க³ச்ச²ந்தஸ்ஸ அஞ்ஞஸ்ஸ அபா⁴வதோ வுத்தம். ஏகம் வா பேஸேத்வா ஆபுச்சி²தப்³ப³ந்தி ஏத்த² க³மனசித்தஸ்ஸ உப்பன்னட்டா²னதோ அனாபுச்சி²த்வா க³ச்ச²ந்தே து³தியபாது³த்³தா⁴ரே பாசித்தியம். மண்ட³பே வாதி ஸாகா²மண்ட³பே வா பத³ரமண்ட³பே வா. ருக்க²மூலேதி யஸ்ஸ கஸ்ஸசி ருக்க²ஸ்ஸ ஹேட்டா². பலுஜ்ஜதீதி வினஸ்ஸதி.

84. மஜ்ஜே² ஸம்கி²த்தம் பணவஸண்டா²னம் கத்வா ப³த்³த⁴ந்தி ஏரகபத்தாதீ³ஹி வேணிம் கத்வா தாய வேணியா உபோ⁴ஸு பஸ்ஸேஸு வித்த²தட்டா²னே ப³ஹும் வேடே²த்வா ததோ பட்டா²ய யாவ மஜ்ஜ²ட்டா²னம், தாவ அந்தோஆகட்³ட⁴னவஸேன வேடே²த்வா மஜ்ஜே² ஸம்கி²பித்வா தத்த² தத்த² ப³ந்தி⁴த்வா கதம். யத்த² காகா வா குலலா வா ந ஊஹத³ந்தீதி யத்த² து⁴வனிவாஸேன குலாவகே கத்வா வஸமானா ஏதே காககுலலா, அஞ்ஞே வா ஸகுணா தம் ஸேனாஸனம் ந ஊஹத³ந்தி, தாதி³ஸே ருக்க²மூலே நிக்கி²பிதும் அனுஜானாமீதி அத்தோ².

85. நவவாயிமோதி அது⁴னா ஸுத்தேன வீதகச்சே²ன பலிவேடி²தமஞ்சோ. ஓனத்³தோ⁴தி கப்பியசம்மேன ஓனத்³தோ⁴, ஸோவ ஓனத்³த⁴கோ ஸகத்தே² க-பச்சயவஸேன. தேன ஹி வஸ்ஸேன ஸீக⁴ம் ந நஸ்ஸதி. உக்கட்ட²அப்³போ⁴காஸிகோதி இத³ம் தஸ்ஸ ஸுக²படிபத்தித³ஸ்ஸனமத்தம், உக்கட்ட²ஸ்ஸாபி பன சீவரகுடி வட்டதேவ. காயானுக³திகத்தாதி பி⁴க்கு²னோ தத்தே²வ நிஸின்னபா⁴வம் தீ³பேதி, தேன ச வஸ்ஸப⁴யேன ஸயம் அஞ்ஞத்த² க³ச்ச²ந்தஸ்ஸ ஆபத்திம் த³ஸ்ஸேதி. அப்³போ⁴காஸிகானம் அதேமனத்தா²ய நியமேத்வா தா³யகேஹி தி³ன்னம்பி அத்தானம் ரக்க²ந்தேன ரக்கி²தப்³ப³மேவ. ‘‘யஸ்மா பன தா³யகேஹி தா³னகாலேயேவ ஸதஸஹஸ்ஸக்³க⁴னகம்பி கம்ப³லம் ‘பாத³புஞ்ச²னிம் கத்வா பரிபு⁴ஞ்ஜதா²’தி தி³ன்னம் ததே²வ பரிபு⁴ஞ்ஜிதும் வட்டதி, தஸ்மா இத³ம்பி மஞ்சபீடா²தி³ஸேனாஸனம் ‘அஜ்ஜோ²காஸேபி யதா²ஸுக²ம் பரிபு⁴ஞ்ஜதா²’தி தா³யகேஹி தி³ன்னம் சே, ஸப்³ப³ஸ்மிம்பி காலே அஜ்ஜோ²காஸே நிக்கி²பிதும் வட்டதீதி வத³ந்தீ’’தி ஸாரத்த²தீ³பனியம் (ஸாரத்த². டீ. பாசித்திய 3.108-110) வுத்தம். பேஸேத்வா க³ந்தப்³ப³ந்தி ஏத்த² ‘‘யோ பி⁴க்கு² இமம் டா²னம் ஆக³ந்த்வா வஸதி, தஸ்ஸ தே³தா²’’தி வத்வா பேஸேதப்³ப³ம்.

வலாஹகானம் அனுட்டி²தபா⁴வம் ஸல்லக்கே²த்வாதி இமினா கி³ம்ஹானேபி மேகே⁴ உட்டி²தே அப்³போ⁴காஸே நிக்கி²பிதும் ந வட்டதீதி தீ³பேதி. தத்ர தத்ராதி சேதியங்க³ணாதி³கே தஸ்மிம் தஸ்மிம் அப்³போ⁴காஸே நியமேத்வா நிக்கி²த்தா. மஜ்ஜ²தோ பட்டா²ய பாத³ட்டா²னாபி⁴முகா²தி யத்த² ஸமந்ததோ ஸம்மஜ்ஜித்வா அங்க³ணமஜ்ஜே² ஸப்³ப³தா³ கசவரஸ்ஸ ஸங்கட்³ட⁴னேன மஜ்ஜே² வாலிகா ஸஞ்சிதா ஹோதி, தத்த² கத்தப்³ப³விதி⁴த³ஸ்ஸனத்த²ம் வுத்தம், உச்சவத்து²பாத³ட்டா²னாபி⁴முக²ம், பி⁴த்திபாத³ட்டா²னாபி⁴முக²ம் வா வாலிகா ஹரிதப்³பா³தி அத்தோ². ‘‘யத்த² வா பன கோணேஸு வாலிகா ஸஞ்சிதா, தத்த² ததோ பட்டா²ய அபரதி³ஸாபி⁴முகா² ஹரிதப்³பா³’’தி கேசி அத்த²ம் வத³ந்தி. கேசி பன ‘‘ஸம்மட்ட²ட்டா²னஸ்ஸ பத³வலஞ்ஜேன அவிகோபனத்தா²ய ஸயம் அஸம்மட்ட²ட்டா²னே ட²த்வா அத்தனோ பாதா³பி⁴முக²ம் வாலிகா ஹரிதப்³பா³தி வுத்த’’ந்தி வத³ந்தி. தத்த² ‘‘மஜ்ஜ²தோ பட்டா²யா’’தி வசனஸ்ஸ பயோஜனம் ந தி³ஸ்ஸதி. ஸாரத்த²தீ³பனியம் பன ‘‘பாத³ட்டா²னாபி⁴முகா²தி நிஸீத³ந்தானம் பாத³ட்டா²னாபி⁴முக²ந்தி கேசி, ஸம்மஜ்ஜந்தஸ்ஸ பாத³ட்டா²னாபி⁴முக²ந்தி அபரே, ப³ஹிவாலிகாய அக³மனனிமித்தம் பாத³ட்டா²னாபி⁴முகா² ஹரிதப்³பா³தி வுத்தந்தி ஏகே’’தி வுத்தம். கசவரம் ஹத்தே²ஹி க³ஹேத்வா ப³ஹி ச²ட்³டே³தப்³ப³ந்தி இமினா ‘‘கசவரம் ச²ட்³டே³ஸ்ஸாமீ’’தி வாலிகா ந ச²ட்³டே³தப்³பா³தி தீ³பேதி.

86. கப்பம் லபி⁴த்வாதி ‘‘க³ச்சா²’’தி வுத்தவசனேன கப்பம் லபி⁴த்வா. தே²ரஸ்ஸ ஹி ஆணத்தியா க³ச்ச²ந்தஸ்ஸ அனாபத்தி. புரிமனயேனேவாதி ‘‘நிஸீதி³த்வா ஸயம் க³ச்ச²ந்தோ’’திஆதி³னா புப்³பே³ வுத்தனயேனேவ.

அஞ்ஞத்த² க³ச்ச²தீதி தம் மக்³க³ம் அதிக்கமித்வா அஞ்ஞத்த² க³ச்ச²தி. லேட்³டு³பாதுபசாரதோ ப³ஹி டி²தத்தா ‘‘பாது³த்³தா⁴ரேன காரேதப்³போ³’’தி வுத்தம், அஞ்ஞத்த² க³ச்ச²ந்தஸ்ஸ பட²மபாது³த்³தா⁴ரே து³க்கடம், து³தியபாது³த்³தா⁴ரே பாசித்தியந்தி அத்தோ². பாகதிகம் அகத்வாதி அபடிஸாமேத்வா. அந்தரஸன்னிபாதேதி அந்தரந்தரா ஸன்னிபாதே.

87. ஆவாஸிகானம்யேவ பலிபோ³தோ⁴தி ஏத்த² ஆக³ந்துகேஸு ஆக³ந்த்வா கிஞ்சி அவத்வா தத்த² நிஸின்னேஸுபி நிஸீதி³த்வா ‘‘ஆவாஸிகாயேவ உத்³த⁴ரிஸ்ஸந்தீ’’தி க³தேஸுபி ஆவாஸிகானமேவ பலிபோ³தோ⁴. மஹாபச்சரிவாதே³ பன ‘‘இத³ம் அம்ஹாக’’ந்தி வத்வாபி அவத்வாபி நிஸின்னானமேவாதி அதி⁴ப்பாயோ. மஹாஅட்ட²கதா²வாதே³ ‘‘ஆபத்தீ’’தி பாசித்தியமேவ வுத்தம். மஹாபச்சரியம் பன ஸந்த²ராபனே பாசித்தியேன ப⁴விதப்³ப³ந்தி அனாணத்தியா பஞ்ஞத்தத்தா து³க்கடம் வுத்தம். உஸ்ஸாரகோதி ஸரபா⁴ணகோ. ஸோ ஹி உத்³த⁴ம்உத்³த⁴ம் பாளிபாட²ம் ஸாரேதி பவத்தேதீதி ‘‘உஸ்ஸாரகோ’’தி வுச்சதி. ‘‘இத³ம் உஸ்ஸாரகஸ்ஸ, இத³ம் த⁴ம்மகதி²கஸ்ஸா’’தி விஸும் பஞ்ஞத்தத்தா அனாணத்தியா பஞ்ஞத்தேபி பாசித்தியேனேவ ப⁴விதப்³ப³ந்தி அதி⁴ப்பாயேன ‘‘தஸ்மிம் ஆக³ந்த்வா நிஸின்னே தஸ்ஸ பலிபோ³தோ⁴’’தி வுத்தம். கேசி பன வத³ந்தி ‘‘அனாணத்தியா பஞ்ஞத்தேபி த⁴ம்மகதி²கஸ்ஸ அனுட்டா²பனீயத்தா பாசித்தியேன ப⁴விதப்³ப³ம், ஆக³ந்துகஸ்ஸ பன பச்சா² ஆக³தேஹி வுட்³ட⁴தரேஹி உட்டா²பனீயத்தா து³க்கடம் வுத்த’’ந்தி.

88. பாத³புஞ்ச²னீ நாம ரஜ்ஜுகேஹி வா பிலோதிகாய வா பாத³புஞ்ச²னத்த²ம் கதா. ப²லகபீட²ம் நாம ப²லகமயம் பீட²ம். அத² வா ப²லகஞ்சேவ தா³ருமயபீட²ஞ்ச. தா³ருமயபீட²ந்தி ச ப²லகமயமேவ பீட²ம் வேதி³தப்³ப³ம். பாத³கட²லிகந்தி அதோ⁴தபாத³ட்டா²பனகம். அஜ்ஜோ²காஸே ரஜனம் பசித்வா …பே… படிஸாமேதப்³ப³ந்தி ஏத்த² தே²வே அஸதி ரஜனகம்மே நிட்டி²தே படிஸாமேதப்³ப³ம். ‘‘பி⁴க்கு² வா ஸாமணேரோ வா ஆராமிகோ வா லஜ்ஜீ ஹோதீதி வுத்தத்தா அலஜ்ஜிம் ஆபுச்சி²த்வா க³ந்தும் ந வட்டதீ’’தி வத³ந்தி. ஓதாபேந்தோ…பே… க³ச்ச²தீதி ஏத்த² ‘‘கிஞ்சாபி ‘ஏத்தகம் தூ³ரம் க³ந்தப்³ப³’ந்தி பரிச்சே²தோ³ நத்தி², ததா²பி லேட்³டு³பாதம் அதிக்கம்ம நாதிதூ³ரம் க³ந்தப்³ப³’’ந்தி வத³ந்தி.

இதி வினயஸங்க³ஹஸம்வண்ணனாபூ⁴தே வினயாலங்காரே

மஞ்சபீடா²தி³ஸங்கி⁴கஸேனாஸனேஸுபடிபஜ்ஜிதப்³ப³-

வினிச்ச²யகதா²லங்காரோ நாம

ஸத்தரஸமோ பரிச்சே²தோ³.