18. காலிகவினிச்ச²யகதா²

89. ஏவம் ஸங்கி⁴கஸேனாஸனேஸு கத்தப்³ப³வினிச்ச²யம் கதே²த்வா இதா³னி சதுகாலிகவினிச்ச²யம் கதே²தும் ‘‘காலிகானிபி சத்தாரீ’’திஆதி³மாஹ. தத்த² கரணம் காரோ, கிரியா. காரோ ஏவ காலோ ர-காரஸ்ஸ ல-காரோ யதா² ‘‘மஹாஸாலோ’’தி. காலோதி சேத்த² பச்சுப்பன்னாதி³கிரியா. வுத்தஞ்ஹி –

‘‘ஆரத்³தா⁴னிட்டி²தோ பா⁴வோ, பச்சுப்பன்னோ ஸுனிட்டி²தோ;

அதீதானாக³துப்பாத³-மப்பத்தாபி⁴முகா² கிரியா’’தி.

ஏத்த² பன தஸ்ஸ தஸ்ஸ கிரியாஸங்கா²தஸ்ஸ காலஸ்ஸ பபே⁴த³பூ⁴தோ புரேப⁴த்தஏகஅஹோரத்தஸத்தாஹஜீவிகபரியந்தஸங்கா²தோ காலவிஸேஸோ அதி⁴ப்பேதோ. காலே தஸ்மிம் தஸ்மிம் காலவிஸேஸே பரிபு⁴ஞ்ஜிதப்³பா³னீதி காலிகானி. பி-ஸத்³தோ³ ஸமுச்சயத்தோ², தேன கப்பியா சதுபூ⁴மியோதி ஸமுச்சேதி. சத்தாரீதி ஸங்க்²யானித்³தே³ஸோ, தேன காலிகானி நாம சத்தாரி ஏவ ஹோந்தி, ந தீணி ந பஞ்சாதி த³ஸ்ஸேதி, இத³ம் மாதிகாபத³ஸ்ஸ அத்த²விவரணம். தத்த² உத்³தே³ஸே யம் மாதிகாயம் (வி. ஸங்க³. அட்ட². க³ந்தா²ரம்ப⁴கதா²) ‘‘காலிகானிபி சத்தாரீ’’தி ஏவம் வுத்தம், ஏத்த² ஏதஸ்மிம் மாதிகாபதே³ சத்தாரி காலிகானி வேதி³தப்³பா³னீதி யோஜனா. கதமானி தானீதி ஆஹ ‘‘யாவகாலிக’’ந்திஆதி³. யாவகாலிகம்…பே… யாவஜீவிகம் இதி இமானி வத்தூ²னி சத்தாரி காலிகானி நாமாதி அத்தோ².

இதா³னி தேஸம் வத்து²ஞ்ச விஸேஸனஞ்ச நாமலாப⁴ஹேதுஞ்ச த³ஸ்ஸேந்தோ ‘‘தத்த² புரேப⁴த்த’’ந்திஆதி³மாஹ. தத்த² தேஸு சதூஸு காலிகேஸு யம் கிஞ்சி கா²த³னீயம் போ⁴ஜனீயம் யாவகாலிகம், அட்ட²வித⁴பானம் யாமகாலிகம், ஸப்பிஆதி³பஞ்சவித⁴பே⁴ஸஜ்ஜம் ஸத்தாஹகாலிகம், ஸப்³ப³ம்பி படிக்³க³ஹிதம் யாவஜீவிகம் இதி வுச்சதீதி ஸம்ப³ந்தோ⁴. யம் கிஞ்சி கா²த³னீயபோ⁴ஜனீயந்தி ஏத்த² அதிப்³யாபிதம் பரிஹரிதும் விஸேஸனமாஹ ‘‘புரேப⁴த்த’’ந்த்யாதி³. புரேப⁴த்தம் படிக்³க³ஹேத்வா பரிபு⁴ஞ்ஜிதப்³ப³மேவ யாவகாலிகம், ந அஞ்ஞம் கா²த³னீயம் போ⁴ஜனீயந்த்யத்தோ². யாவ…பே… பரிபு⁴ஞ்ஜிதப்³ப³தோதி நாமலாப⁴ஹேதும், ஏதேன யாவ காலோ அஸ்ஸாதி யாவகாலிகந்தி வசனத்த²ம் த³ஸ்ஸேதி. அட்ட²வித⁴ம் பானந்தி ஏத்த² அப்³யாபிதம் பரிஹரிதுமாஹ ‘‘ஸத்³தி⁴ம் அனுலோமபானேஹீ’’தி. யாவ…பே… தப்³ப³தோதி நாமலாப⁴ஹேதும், ஏதேன யாமோ காலோ அஸ்ஸாதி யாமகாலிகந்தி வசனத்த²ம் த³ஸ்ஸேதி. ஸத்தாஹம் நிதே⁴தப்³ப³தோதி நாமலாப⁴ஹேதும், ஏதேன ஸத்தாஹோ காலோ அஸ்ஸாதி ஸத்தாஹகாலிகந்தி வசனத்த²ம் த³ஸ்ஸேதி. ஸப்³ப³ம்பி படிக்³க³ஹிதந்தி ஏத்த² அதிப்³யாபிதம் பரிஹரிதும் ‘‘ட²பேத்வா உத³க’’ந்த்யாஹ. யாவ…பே… பரிபு⁴ஞ்ஜிதப்³ப³தோதி நாமலாப⁴ஹேதும், தேன யாவஜீவம் காலோ அஸ்ஸாதி யாவஜீவிகந்தி வசனத்த²ம் த³ஸ்ஸேதி.

ஏத்தா²ஹ – ‘‘யோ பன பி⁴க்கு² அதி³ன்னம் முக²த்³வாரம் ஆஹாரம் ஆஹரேய்ய அஞ்ஞத்ர உத³கத³ந்தபோனா, பாசித்திய’’ந்தி (பாசி. 265) வசனதோ நனு உத³கம் அப்படிக்³க³ஹிதப்³ப³ம், அத² கஸ்மா ‘‘ட²பேத்வா உத³கம் அவஸேஸம் ஸப்³ப³ம்பி படிக்³க³ஹித’’ந்தி வுத்தந்தி? ஸச்சம், பரிஸுத்³த⁴உத³கம் அப்படிக்³க³ஹிதப்³ப³ம், கத்³த³மாதி³ஸஹிதம் பன படிக்³க³ஹேதப்³ப³ம் ஹோதி, தஸ்மா படிக்³க³ஹிதேஸு அந்தோக³த⁴பா⁴வதோ ‘‘ட²பேத்வா உத³க’’ந்தி வுத்தந்தி. ஏவமபி ‘‘ஸப்³ப³ம்பி படிக்³க³ஹித’’ந்தி இமினாவ ஸித்³த⁴ம் படிக்³க³ஹேதப்³ப³ஸ்ஸ உத³கஸ்ஸபி க³ஹணதோதி? ஸச்சம், ததா²பி உத³கபா⁴வேன ஸாமஞ்ஞதோ ‘‘ஸப்³ப³ம்பி படிக்³க³ஹித’’ந்தி ஏத்தகே வுத்தே ஏகச்சஸ்ஸ உத³கஸ்ஸ படிக்³க³ஹேதப்³ப³பா⁴வதோ உத³கம்பி யாவஜீவிகம் நாமாதி ஞாயேய்ய, ந பன உத³கம் யாவஜீவிகம் ஸுத்³த⁴ஸ்ஸ படிக்³க³ஹேதப்³பா³பா⁴வதோ, தஸ்மா இத³ம் வுத்தம் ஹோதி – ஏகச்சஸ்ஸ உத³கஸ்ஸ படிக்³க³ஹேதப்³ப³பா⁴வே ஸதிபி ஸுத்³த⁴ஸ்ஸ அப்படிக்³க³ஹிதப்³ப³த்தா தம் உத³கம் ட²பேத்வா ஸப்³ப³ம்பி படிக்³க³ஹிதம் யாவஜீவிகந்தி வுச்சதீதி.

90. மூலகமூலாதீ³னி உபதே³ஸதோயேவ வேதி³தப்³பா³னி, தானி பரியாயதோ வுச்சமானானிபி ந ஸக்கா விஞ்ஞாதும். பரியாயந்தரேன ஹி வுச்சமானே தம் தம் நாமம் அஜானந்தானம் ஸம்மோஹோயேவ ஸியா, தஸ்மா தத்த² ந கிஞ்சி வக்கா²ம. கா²த³னீயே கா²த³னீயத்த²ந்தி பூவாதி³கா²த³னீயே விஜ்ஜமானம் கா²த³னீயகிச்சம் கா²த³னீயேஹி காதப்³ப³ம் ஜிக⁴ச்சா²ஹரணஸங்கா²தம் அத்த²ம் பயோஜனம் நேவ ப²ரந்தி ந நிப்பா²தே³ந்தி. ஏகஸ்மிம் தே³ஸே ஆஹாரகிச்சம் ஸாதே⁴ந்தம் வா அஸாதே⁴ந்தம் வா அபரஸ்மிம் தே³ஸே உட்டி²தபூ⁴மிரஸாதி³பே⁴தே³ன ஆஹாரஜிக⁴ச்சா²ஹரணகிச்சம் அஸாதே⁴ந்தம்பி வா ஸம்ப⁴வேய்யாதி ஆஹ ‘‘தேஸு தேஸு ஜனபதே³ஸூ’’திஆதி³. கேசி பன ‘‘ஏகஸ்மிம் ஜனபதே³ ஆஹாரகிச்சம் ஸாதே⁴ந்தம் ஸேஸஜனபதே³ஸுபி விகாலே ந கப்பதி ஏவாதி த³ஸ்ஸனத்த²ம் இத³ம் வுத்த’’ந்திபி வத³ந்தி. பகதிஆஹாரவஸேனாதி அஞ்ஞேஹி யாவகாலிகேஹி அயோஜிதம் அத்தனோ பகதியாவ ஆஹாரகிச்சகரணவஸேன. ஸம்மோஹோயேவ ஹோதீதி அனேகத்தா²னம் நாமானம் அப்பஸித்³தா⁴னஞ்ச ஸம்ப⁴வதோ ஸம்மோஹோ ஏவ ஸியா. தேனேவேத்த² மயம்பி மூலகமூலாதீ³னம் பரியாயந்தரத³ஸ்ஸனே ஆத³ரம் ந கரிம்ஹ உபதே³ஸதோவ க³ஹேதப்³ப³தோ.

யந்தி வட்டகந்த³ம்.

முளாலந்தி தூ²லதருணமூலமேவ.

ருக்க²வல்லிஆதீ³னந்தி ஹேட்டா² வுத்தமேவ ஸம்பிண்டே³த்வா வுத்தம்.

அந்தோபத²வீக³தோதி ஸாலகல்யாணிக்க²ந்த⁴ம் ஸந்தா⁴ய வுத்தம்.

ஸப்³ப³கப்பியானீதி மூலதசபத்தாதீ³னம் வஸேன ஸப்³ப³ஸோ கப்பியானி, தேஸம்பி நாமவஸேன ந ஸக்கா பரியந்தம் த³ஸ்ஸேதுந்தி ஸம்ப³ந்தோ⁴.

அச்சி²வாதீ³னம் அபரிபக்கானேவ ப²லானி யாவஜீவிகானீதி த³ஸ்ஸேதும் ‘‘அபரிபக்கானீ’’தி வுத்தம்.

ஹரீதகாதீ³னம் அட்டீ²னீதி ஏத்த² மிஞ்ஜம் படிச்சா²தே³த்வா டி²தானி கபாலானி யாவஜீவிகானீதி ஆசரியா. மிஞ்ஜம்பி யாவஜீவிகந்தி ஏகே. விமதிவினோத³னியம் (வி. வி. டீ. பாசித்திய 2.248-249) பன ‘‘ஹரீதகாதீ³னம் அட்டீ²னீதி ஏத்த² ‘மிஞ்ஜம் யாவகாலிக’ந்தி கேசி வத³ந்தி, தம் ந யுத்தம் அட்ட²கதா²யம் அவுத்தத்தா’’தி வுத்தம்.

ஹிங்கூ³தி ஹிங்கு³ருக்க²தோ பக்³க⁴ரிதனிய்யாஸோ. ஹிங்கு³ஜதுஆத³யோபி ஹிங்கு³விகதியோ ஏவ. தத்த² ஹிங்கு³ஜது நாம ஹிங்கு³ருக்க²ஸ்ஸ த³ண்ட³பத்தானி பசித்வா கதனிய்யாஸோ. ஹிங்கு³ஸிபாடிகம் நாம ஹிங்கு³பத்தானி பசித்வா கதனிய்யாஸோ. ‘‘அஞ்ஞேன மிஸ்ஸேத்வா கதோ’’திபி வத³ந்தி. தகந்தி அக்³க³கோடியா நிக்க²ந்தஸிலேஸோ. தகபத்தீதி பத்ததோ நிக்க²ந்தஸிலேஸோ. தகபண்ணீதி பலாஸே ப⁴ஜ்ஜித்வா கதஸிலேஸோ. ‘‘த³ண்ட³தோ நிக்க²ந்தஸிலேஸோ’’திபி வத³ந்தி.

91. யாமகாலிகேஸு பனாதி ஏத்த² கிஞ்சாபி பாளியம் கா²த³னீயபோ⁴ஜனீயபதே³ஹி யாவகாலிகமேவ ஸங்க³ஹிதம், ந யாமகாலிகம், ததா²பி ‘‘அனாபத்தி யாமகாலிகம் யாமே நித³ஹித்வா பு⁴ஞ்ஜதீ’’தி இத⁴ சேவ ‘‘யாமகாலிகேன பி⁴க்க²வே ஸத்தாஹகாலிகம்…பே… யாவஜீவிகம் தத³ஹுபடிக்³க³ஹிதம் யாமே கப்பதி, யாமாதிக்கந்தே ந கப்பதீ’’தி அஞ்ஞத்த² (மஹாவ. 305) ச வுத்தத்தா ‘‘யாமகாலிக’’ந்திவசனஸாமத்தி²யதோ ச ப⁴க³வதோ அதி⁴ப்பாயஞ்ஞூஹி அட்ட²கதா²சரியேஹி யாமகாலிகம் ஸன்னிதி⁴காரகம் பாசித்தியவத்து²மேவ வுத்தந்தி த³ட்ட²ப்³ப³ம்.

ட²பேத்வா த⁴ஞ்ஞப²லரஸந்தி ஏத்த² ‘‘தண்டு³லதோ⁴வனோத³கம்பி த⁴ஞ்ஞப²லரஸோயேவா’’தி வத³ந்தி.

92. ஸத்தாஹகாலிகே பஞ்ச பே⁴ஸஜ்ஜானீதி பே⁴ஸஜ்ஜகிச்சம் கரோந்து வா மா வா, ஏவம்லத்³த⁴வோஹாரானி பஞ்ச. ‘‘கோ³ஸப்பீ’’திஆதி³னா லோகே பாகடம் த³ஸ்ஸேத்வா ‘‘யேஸம் மம்ஸம் கப்பதீ’’தி இமினா அஞ்ஞேஸம்பி ரோஹிதமிகா³தீ³னம் ஸப்பிம் க³ஹேத்வா த³ஸ்ஸேதி. யேஸஞ்ஹி கீ²ரம் அத்தி², ஸப்பிம்பி தேஸம் அத்தி²யேவ, தம் பன ஸுலப⁴ம் வா து³ல்லப⁴ம் வா அஸம்மோஹத்த²ம் வுத்தம். ஏவம் நவனீதம்பி. ‘‘யேஸம் மம்ஸம் கப்பதீ’’தி ச இத³ம் நிஸ்ஸக்³கி³யவத்து²த³ஸ்ஸனத்த²ம் வுத்தம், ந பன யேஸம் மம்ஸம் ந கப்பதி, தேஸம் ஸப்பிஆதி³ ந கப்பதீதி த³ஸ்ஸனத்த²ம். மனுஸ்ஸகீ²ராதீ³னிபி ஹி நோ ந கப்பந்தி.

93. யாவ காலோ நாதிக்கமதி, தாவ பரிபு⁴ஞ்ஜிதும் வட்டதீதி ஏத்த² காலோதி பி⁴க்கூ²னம் போ⁴ஜனகாலோ அதி⁴ப்பேதோ, ஸோ ச ஸப்³ப³ந்திமேன பரிச்சே²தே³ன டி²தமஜ்ஜ²ன்ஹிகோ. டி²தமஜ்ஜ²ன்ஹிகோபி ஹி காலஸங்க³ஹம் க³ச்ச²தி, ததோ பட்டா²ய பன கா²தி³தும் வா பு⁴ஞ்ஜிதும் வா ந ஸக்கா, ஸஹஸா பிவிதும் ஸக்கா ப⁴வேய்ய, குக்குச்சகேன பன ந கத்தப்³ப³ம். காலபரிச்சே²த³ஜானனத்த²ஞ்ச காலத்த²ம்போ⁴ யோஜேதப்³போ³. காலந்தரே வா ப⁴த்தகிச்சம் காதப்³ப³ம். படிக்³க³ஹணேதி க³ஹணமேவ ஸந்தா⁴ய வுத்தம். படிக்³க³ஹிதமேவ ஹி தம், ஸன்னிஹிதம் ந கப்பதீதி புன படிக்³க³ஹணகிச்சம் நத்தி², தேனேவ ‘‘அஜ்ஜோ²ஹரிதுகாமதாய க³ண்ஹந்தஸ்ஸ படிக்³க³ஹணே’’தி வுத்தம். மாதிகாட்ட²கதா²யம் (கங்கா². அட்ட². ஸன்னிதி⁴காரகஸிக்கா²பத³வண்ணனா) பன ‘‘அஜ்ஜோ²ஹரிஸ்ஸாமீதி க³ண்ஹந்தஸ்ஸ க³ஹணே’’இச்சேவ வுத்தம்.

யந்தி யம் பத்தம். ஸந்தி³ஸ்ஸதீதி யாகு³யா உபரி ஸந்தி³ஸ்ஸதி. தேலவண்ணே பத்தே ஸதிபி நிஸ்னேஹபா⁴வே அங்கு³லியா க⁴ம்ஸந்தஸ்ஸ வண்ணவஸேனேவ லேகா² பஞ்ஞாயதி, தஸ்மா தத்த² அனாபத்தீதி த³ஸ்ஸனத்த²ம் ‘‘ஸா அப்³போ³ஹாரிகா’’தி வுத்தம். ஸயம் படிக்³க³ஹேத்வா அபரிச்சத்தமேவ ஹி து³தியதி³வஸே ந வட்டதீதி ஏத்த² படிக்³க³ஹணே அனபேக்க²விஸ்ஸஜ்ஜனேன, அனுபஸம்பன்னஸ்ஸ நிரபேக்க²தா³னேன வா விஜஹிதபடிக்³க³ஹணம் பரிச்சத்தமேவ ஹோதீதி ‘‘அபரிச்சத்த’’ந்தி இமினா உப⁴யதா²பி அவிஜஹிதபடிக்³க³ஹணமேவ வுத்தம், தஸ்மா யம் பரஸ்ஸ பரிச்சஜித்வா அதி³ன்னம்பி ஸசே படிக்³க³ஹணே நிரபேக்க²விஸ்ஸஜ்ஜனேன விஜஹிதபடிக்³க³ஹணம் ஹோதி, தம்பி து³தியதி³வஸே வட்டதீதி வேதி³தப்³ப³ம். யதி³ ஏவம் ‘‘பத்தோ து³த்³தோ⁴தோ ஹோதீ’’திஆதீ³ஸு கஸ்மா ஆபத்தி வுத்தாதி? ‘‘படிக்³க³ஹணம் அவிஸ்ஸஜ்ஜேத்வாவ ஸயம் வா அஞ்ஞேன வா துச்ச²ம் கத்வா ந ஸம்மா தோ⁴வித்வா நிட்டா²பிதே பத்தே லக்³க³ம்பி அவிஜஹிதபடிக்³க³ஹணமேவ ஹோதீதி தத்த² ஆபத்தீ’’தி தீஸுபி க³ண்டி²பதே³ஸு வுத்தம். கேசி பன ‘‘ஸாமணேரானம் பரிச்சஜந்தீதி இமஸ்மிம் அதி⁴காரே ட²த்வா ‘அபரிச்சத்தமேவா’தி வுத்தத்தா அனுபஸம்பன்னஸ்ஸ பரிச்சத்தமேவ வட்டதி, அபரிச்சத்தம் ந வட்டதீதி ஆபன்னம், தஸ்மா நிராலயபா⁴வேன படிக்³க³ஹணே விஜஹிதேபி அனுபஸம்பன்னஸ்ஸ அபரிச்சத்தம் ந வட்டதீ’’தி வத³ந்தி. தம் யுத்தம் விய ந தி³ஸ்ஸதி. யத³க்³கே³ன ஹி படிக்³க³ஹணம் விஜஹதி, தத³க்³கே³ன ஸன்னிதி⁴ம்பி ந கரோதி விஜஹிதபடிக்³க³ஹணஸ்ஸ அப்படிக்³க³ஹிதஸதி³ஸத்தா. படிக்³க³ஹேத்வா நித³ஹிதேயேவ ச ஸன்னிதி⁴பச்சயா ஆபத்தி வுத்தா.

விமதிவினோத³னியம் (வி. வி. டீ. பாசித்திய 2.252-253) பன ‘‘அபரிச்சத்தமேவாதி நிரபேக்க²தாய அனுபஸம்பன்னஸ்ஸ அதி³ன்னம் அபரிச்சத்தஞ்ச யாவகாலிகாதி³வத்து²மேவ ஸந்தா⁴ய வத³தி, ந பன தக்³க³தபடிக்³க³ஹணம். ந ஹி வத்து²ம் அபரிச்சஜித்வா தத்த²க³தபடிக்³க³ஹணம் பரிச்சஜிதும் ஸக்கா, ந ச தாதி³ஸம் வசனம் அத்தி², யதி³ ப⁴வேய்ய, ‘ஸசே பத்தோ து³த்³தோ⁴தோ ஹோதி…பே… பு⁴ஞ்ஜந்தஸ்ஸ பாசித்திய’ந்தி வசனம் விருஜ்ஜே²ய்ய. ந ஹி தோ⁴வனேன ஆமிஸம் அபனேதும் வாயமந்தஸ்ஸ படிக்³க³ஹணே அபேக்கா² வத்ததி. யேன புனதி³வஸே பு⁴ஞ்ஜதோ பாசித்தியம் ஜனேய்ய, பத்தே பன வத்தமானா அபேக்கா² தக்³க³திகே ஆமிஸேபி வத்ததி ஏவ நாமாதி ஆமிஸே அனபேக்க²தா ஏத்த² ந லப்³ப⁴தி, ததோ ஆமிஸே அவிஜஹிதபடிக்³க³ஹணம் புனதி³வஸே பாசித்தியம் ஜனேதீதி இத³ம் வுத்தம். அத² மதம் ‘யத³க்³கே³னேத்த² ஆமிஸானபேக்க²தா ந லப்³ப⁴தி, தத³க்³கே³ன படிக்³க³ஹணானபேக்க²தாபி ந லப்³ப⁴தீ’தி. ததா² ஸதி யத்த² ஆமிஸாபேக்கா² அத்தி², தத்த² படிக்³க³ஹணாபேக்கா²பி ந விக³ச்ச²தீதி ஆபன்னம், ஏவஞ்ச படிக்³க³ஹணே அனபேக்க²விஸ்ஸஜ்ஜனம் விஸும் ந வத்தப்³ப³ம் ஸியா, அட்ட²கதா²யஞ்சேதம்பி படிக்³க³ஹணவிஜஹனம் காரணத்தேன அபி⁴மதம் ஸியா. இத³ம் ஸுட்டு²தரம் கத்வா விஸும் வத்தப்³ப³ம் சீவராபேக்கா²ய வத்தமானாயபி பச்சுத்³தா⁴ரேன அதி⁴ட்டா²னவிஜஹனம் விய. ஏதஸ்மிஞ்ச உபாயே ஸதி க³ண்டி²காஹதபத்தேஸு அவட்டனதா நாம ந ஸியாதி வுத்தோவாயமத்தோ², தஸ்மா யம் வுத்தம் ஸாரத்த²தீ³பனியம் (ஸாரத்த². டீ. பாசித்திய 3.252-253) ‘யம் பரஸ்ஸ பரிச்சஜித்வா அதி³ன்னம்பி ஸசே படிக்³க³ஹணே நிரபேக்க²விஸ்ஸஜ்ஜனேன விஜஹிதபடிக்³க³ஹணம் ஹோதி, தம்பி து³தியதி³வஸே வட்டதீ’திஆதி³, தம் ந ஸாரதோ பச்சேதப்³ப³’’ந்தி வுத்தம்.

பாளியம் (பாசி. 255) ‘‘ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸா’’திஆதி³னா ஸன்னிஹிதேஸு ஸத்தாஹகாலிகயாவஜீவிகேஸு புரேப⁴த்தம்பி ஆஹாரத்தா²ய அஜ்ஜோ²ஹரணேபி து³க்கடஸ்ஸ வுத்தத்தா யாமகாலிகேபி அஜ்ஜோ²ஹாரே விஸும் து³க்கடேன ப⁴விதப்³ப³ந்தி ஆஹ ‘‘ஆஹாரத்தா²ய அஜ்ஜோ²ஹரதோ து³க்கடேன ஸத்³தி⁴ம் பாசித்திய’’ந்தி. பகதிஆமிஸேதி ஓத³னாதி³கப்பியாமிஸே. த்³வேதி புரேப⁴த்தம் படிக்³க³ஹிதம் யாமகாலிகம் புரேப⁴த்தம் ஸாமிஸேன முகே²ன பு⁴ஞ்ஜதோ ஸன்னிதி⁴பச்சயா ஏகம், யாவகாலிகஸம்ஸட்ட²தாய யாவகாலிகத்தப⁴ஜனேன அனதிரித்தபச்சயா ஏகந்தி த்³வே பாசித்தியானி. விகப்பத்³வயேதி ஸாமிஸனிராமிஸபக்க²த்³வயே. து²ல்லச்சயம் து³க்கடஞ்ச வட்³ட⁴தீதி மனுஸ்ஸமம்ஸே து²ல்லச்சயம், ஸேஸஅகப்பியமம்ஸே து³க்கடம் வட்³ட⁴தி.

படிக்³க³ஹணபச்சயா தாவ து³க்கடந்தி ஏத்த² ஸன்னிஹிதத்தா புரேப⁴த்தம்பி து³க்கடமேவ. ஸதி பச்சயே பன ஸன்னிஹிதம்பி ஸத்தாஹகாலிகம் யாவஜீவிகஞ்ச பே⁴ஸஜ்ஜத்தா²ய க³ண்ஹந்தஸ்ஸ பரிபு⁴ஞ்ஜந்தஸ்ஸ ச அனாபத்தியேவ.

94. உக்³க³ஹிதகம் கத்வா நிக்கி²த்தந்தி அபடிக்³க³ஹிதம் ஸயமேவ க³ஹேத்வா நிக்கி²த்தம். விமதிவினோத³னியம் (வி. வி. டீ. 1.622) ‘‘உக்³க³ஹிதகந்தி பரிபோ⁴க³த்தா²ய ஸயம் க³ஹித’’ந்தி வுத்தம். ஸயம் கரோதீதி பசித்வா கரோதி. புரேப⁴த்தந்தி தத³ஹுபுரேப⁴த்தமேவ வட்டதி ஸவத்து²கபடிக்³க³ஹிதத்தா. ஸயம்கதந்தி நவனீதம் பசித்வா கதம். நிராமிஸமேவாதி தத³ஹுபுரேப⁴த்தம் ஸந்தா⁴ய வுத்தம்.

95. அஜ்ஜ ஸயம்கதம் நிராமிஸமேவ பு⁴ஞ்ஜந்தஸ்ஸ கஸ்மா ஸாமம்பாகோ ந ஹோதீதி ஆஹ ‘‘நவனீதம் தாபேந்தஸ்ஸா’’திஆதி³. பச்சா²ப⁴த்தம் படிக்³க³ஹிதகேஹீதி கீ²ரத³தீ⁴னி ஸந்தா⁴ய வுத்தம். உக்³க³ஹிதகேஹி கதம் அப்³ப⁴ஞ்ஜனாதீ³ஸு உபனேதப்³ப³ந்தி யோஜனா. உப⁴யேஸம்பீதி பச்சா²ப⁴த்தம் படிக்³க³ஹிதகீ²ரத³தீ⁴ஹி ச புரேப⁴த்தம் உக்³க³ஹிதகேஹி ச கதானம். ஏஸ நயோதி நிஸ்ஸக்³கி³யம் ந ஹோதீதி அத்தோ². அகப்பியமம்ஸஸப்பிம்ஹீதி ஹத்தி²ஆதீ³னம் ஸப்பிம்ஹி. காரணபதிரூபகம் வத்வாதி ‘‘ஸஜாதிகானம் ஸப்பிபா⁴வதோ’’தி காரணபதிரூபகம் வத்வா. ஸப்பினயேன வேதி³தப்³ப³ந்தி நிராமிஸமேவ ஸத்தாஹம் வட்டதீதி அத்தோ². ஏத்தா²தி நவனீதே. தோ⁴தம் வட்டதீதி அதோ⁴தஞ்சே, ஸவத்து²கபடிக்³க³ஹிதம் ஹோதி, தஸ்மா தோ⁴தம் படிக்³க³ஹேத்வா ஸத்தாஹம் நிக்கி²பிதும் வட்டதீதி தே²ரானம் அதி⁴ப்பாயோ.

மஹாஸீவத்தே²ரஸ்ஸ பன வத்து²னோ வியோஜிதத்தா த³தி⁴கு³ளிகாதீ³ஹி யுத்ததாமத்தேன ஸவத்து²கபடிக்³க³ஹிதம் நாம ந ஹோதி, தஸ்மா தக்கதோ உத்³த⁴டமத்தமேவ படிக்³க³ஹேத்வா தோ⁴வித்வா, பசித்வா வா நிராமிஸமேவ கத்வா பு⁴ஞ்ஜிம்ஸூதி அதி⁴ப்பாயோ, ந பன த³தி⁴கு³ளிகாதீ³ஹி ஸஹ விகாலே பு⁴ஞ்ஜிம்ஸூதி. தேனாஹ ‘‘தஸ்மா நவனீதம் பரிபு⁴ஞ்ஜந்தேன…பே… ஸவத்து²கபடிக்³க³ஹம் நாம ந ஹோதீ’’தி. தத்த² அதோ⁴தம் படிக்³க³ஹேத்வாபி தம் நவனீதம் பரிபு⁴ஞ்ஜந்தேன த³தி⁴ஆதீ³னி அபனேத்வா பரிபு⁴ஞ்ஜிதப்³ப³ந்தி அத்தோ². கேசி பன ‘‘தக்கதோ உத்³த⁴டமத்தமேவ கா²தி³ம்ஸூ’’தி வசனஸ்ஸ அதி⁴ப்பாயம் அஜானந்தா ‘‘தக்கதோ உத்³த⁴டமத்தம் அதோ⁴தம்பி த³தி⁴கு³ளிகாதி³ஸஹிதம் விகாலே பரிபு⁴ஞ்ஜிதும் வட்டதீ’’தி வத³ந்தி, தம் ந க³ஹேதப்³ப³ம். ந ஹி த³தி⁴கு³ளிகாதி³ஆமிஸேன ஸம்ஸட்ட²ரஸம் நவனீதம் பரிபு⁴ஞ்ஜிதும் வட்டதீதி ஸக்கா வத்தும். நவனீதம் பரிபு⁴ஞ்ஜந்தேனாதி அதோ⁴வித்வா படிக்³க³ஹிதனவனீதம் பரிபு⁴ஞ்ஜந்தேன. த³தி⁴ ஏவ த³தி⁴க³தம் யதா² ‘‘கூ³த²க³தம் முத்தக³த’’ந்தி (ம. நி. 2.119; அ. நி. 9.11). ‘‘க²யம் க³மிஸ்ஸதீ’’தி வசனதோ கீ²ரம் பக்கி²பித்வா பக்கஸப்பிஆதி³பி விகாலே கப்பதீதி வேதி³தப்³ப³ம். க²யம் க³மிஸ்ஸதீதி நிராமிஸம் ஹோதி, தஸ்மா விகாலேபி வட்டதீதி அத்தோ². ஏத்தாவதாதி நவனீதே லக்³க³மத்தேன விஸும் த³தி⁴ஆதி³வோஹாரம் அலத்³தே⁴ன அப்பமத்தேன த³தி⁴ஆதி³னாதி அத்தோ², ஏதேன விஸும் படிக்³க³ஹிதத³தி⁴ஆதீ³ஹி ஸஹ பக்கம் ஸவத்து²கபடிக்³க³ஹிதஸங்க²மேவ க³ச்ச²தீதி த³ஸ்ஸேதி. தஸ்மிம்பீதி நிராமிஸபூ⁴தேபி. குக்குச்சகானம் பன அயம் அதி⁴ப்பாயோ – படிக்³க³ஹணே தாவ த³தி⁴ஆதீ³ஹி அஸம்பி⁴ன்னரஸத்தா ப⁴த்தேன ஸஹிதகு³ளபிண்டா³தி³ விய ஸவத்து²கபடிக்³க³ஹிதம் நாம ஹோதி. தம் பன பசந்தேன தோ⁴வித்வாவ பசிதப்³ப³ம். இதரதா² பசனக்க²ணே பச்சமானத³தி⁴கு³ளிகாதீ³ஹி ஸம்பி⁴ன்னரஸதாய ஸாமம்பக்கம் ஜாதம், தேஸு கீ²ணேஸுபி ஸாமம்பக்கமேவ ஹோதி, தஸ்மா நிராமிஸமேவ பசிதப்³ப³ந்தி. தேனேவ ‘‘ஆமிஸேன ஸத்³தி⁴ம் பக்கத்தா’’தி காரணம் வுத்தம்.

ஏத்த² சாயம் விசாரணா – ஸவத்து²கபடிக்³க³ஹிதத்தாபா⁴வே ஆமிஸேன ஸஹ பி⁴க்கு²னா பக்கஸ்ஸ ஸயம்பாகதோ³ஸோ வா பரிஸங்கீயதி, யாவகாலிகதா வா. தத்த² ந தாவ ஸயம்பாகதோ³ஸோ ஏத்த² ஸம்ப⁴வதி ஸத்தாஹகாலிகத்தா. யஞ்ஹி தத்த² த³தி⁴ஆதி³ ஆமிஸக³தம், தம் பரிக்கீ²ணந்தி. அத² படிக்³க³ஹிதத³தி⁴கு³ளிகாதி³னா ஸஹ அத்தனா பக்கத்தா ஸவத்து²கபக்கம் விய ப⁴வேய்யாதி பரிஸங்கீயதி, ததா³ ‘‘ஆமிஸேன ஸஹ படிக்³க³ஹிதத்தா’’தி காரணம் வத்தப்³ப³ம், ந பன ‘‘பக்கத்தா’’தி, ததா² ச உபட்³ட⁴த்தே²ரானம் மதமேவ அங்கீ³கதம் ஸியா. தத்த² ச ஸாமணேராதீ³ஹி பக்கம்பி யாவகாலிகமேவ ஸியா படிக்³க³ஹிதகீ²ராதி³ம் பசித்வா அனுபஸம்பன்னேஹி கதஸப்பிஆதி³ விய, ந ச தம் யுத்தம் பி⁴க்கா²சாரேன லத்³த⁴னவனீதாதீ³னம் தக்காதி³ஆமிஸஸம்ஸட்ட²ஸம்ப⁴வேன அபரிபு⁴ஞ்ஜிதப்³ப³த்தாப்பஸங்க³தோ. ந ஹி க³ஹட்டா² தோ⁴வித்வா, ஸோதே⁴த்வா வா பத்தே ஆகிரந்தீதி நியமோ அத்தி².

அட்ட²கதா²யஞ்ச ‘‘யதா² தத்த² பதிததண்டு³லகணாத³யோ ந பச்சந்தி, ஏவம்…பே… புன பசித்வா தே³தி, புரிமனயேனேவ ஸத்தாஹம் வட்டதீ’’தி இமினா வசனேனபேதம் விருஜ்ஜ²தி, தஸ்மா இத⁴ குக்குச்சகானம் குக்குச்சுப்பத்தியா நிமித்தமேவ ந தி³ஸ்ஸதி. யதா² சேத்த², ஏவம் ‘‘லஜ்ஜீ ஸாமணேரோ யதா² தத்த² தண்டு³லகணாத³யோ ந பச்சந்தி, ஏவம் அக்³கி³ம்ஹி விலீயாபேத்வா…பே… தே³தீ’’தி வசனஸ்ஸாபி நிமித்தம் ந தி³ஸ்ஸதி. யதி³ ஹி ஏதம் யாவகாலிகஸம்ஸக்³க³பரிஹாராய வுத்தம் ஸியா. அத்தனாபி ததா² காதப்³ப³ம் ப⁴வேய்ய. க³ஹட்டே²ஹி தி³ன்னஸப்பிஆதீ³ஸு ச ஆமிஸஸம்ஸக்³க³ஸங்கா ந விக³ச்சே²ய்ய. ந ஹி க³ஹட்டா² ஏவம் விலீயாபேத்வா பரிஸ்ஸாவேத்வா கணதண்டு³லாதி³ம் அபனேத்வா புன பசந்தி. அபிச பே⁴ஸஜ்ஜேஹி ஸத்³தி⁴ம் கீ²ராதி³ம் பக்கி²பித்வா யதா² கீ²ராதி³ க²யம் க³ச்ச²தி, ஏவம் பரேஹி பக்கபே⁴ஸஜ்ஜதேலாதி³பி யாவகாலிகமேவ ஸியா, ந ச தம்பி யுத்தம் த³தி⁴ஆதி³க²யகரணத்த²ம் ‘‘புன பசித்வா தே³தீ’’தி வுத்தத்தா, தஸ்மா மஹாஸீவத்தே²ரவாதே³ குக்குச்சம் அகத்வா அதோ⁴தம்பி நவனீதம் தத³ஹுபி புனதி³வஸாதீ³ஸுபி பசிதும், தண்டு³லாதி³மிஸ்ஸம் ஸப்பிஆதி³ம் அத்தனாபி அக்³கி³ம்ஹி விலீயாபேத்வா புன தக்காதி³க²யத்த²ம் பசிதுஞ்ச வட்டதி.

தத்த² விஜ்ஜமானஸ்ஸாபி பச்சமானக்க²ணே ஸம்பி⁴ன்னரஸஸ்ஸ யாவகாலிகஸ்ஸ அப்³போ³ஹாரிகத்தேன ஸவத்து²கபடிக்³க³ஹிதபுரேபடிக்³க³ஹிதகானம்பி அப்³போ³ஹாரிகதோதி நிட்ட²மேத்த² க³ந்தப்³ப³ந்தி. தேனேவ ‘‘ஏத்தாவதா ஹி ஸவத்து²கபடிக்³க³ஹிதம் நாம ந ஹோதீ’’தி வுத்தம். விஸும் படிக்³க³ஹிதேன பன கீ²ராதி³னா ஆமிஸேன நவனீதாதி³ம் மிஸ்ஸேத்வா பி⁴க்கு²னா வா அஞ்ஞேஹி வா பக்கதேலாதி³பே⁴ஸஜ்ஜம் ஸவத்து²கபடிக்³க³ஹிதஸங்க²மேவ க³ச்ச²தி தத்த² பவிட்ட²யாவகாலிகஸ்ஸ அப்³போ³ஹாரிகத்தாபா⁴வா. யம் பன புரேபடிக்³க³ஹிதபே⁴ஸஜ்ஜேஹி ஸத்³தி⁴ம் அப்படிக்³க³ஹிதம் கீ²ராதி³ம் பக்கி²பித்வா பக்கதேலாதி³கம் அனுபஸம்பன்னேஹேவ பக்கம்பி ஸவத்து²கபடிக்³க³ஹிதம்பி ஸன்னிதி⁴பி ந ஹோதி தத்த² பக்கி²த்தகீ²ராதி³மிஸ்ஸாபி தஸ்மிம் க²ணே ஸம்பி⁴ன்னரஸதாய புரேபடிக்³க³ஹிதத்தாபத்திதோ, ஸசே பன அப்படிக்³க³ஹிதேஹேவ, அஞ்ஞேஹி வா பக்கதேலாதீ³ஸுபி ஆமிஸரஸோ பஞ்ஞாயதி, தம் யாவகாலிகம்வ ஹோதீதி வேதி³தப்³ப³ம். அயம் கதா²மக்³கோ³ விமதிவினோத³னியம் (வி. வி. டீ. 1.622) ஆக³தோ. ஸாரத்த²தீ³பனியம் (ஸாரத்த². டீ. 2.622) பன ‘‘குக்குச்சாயந்தி குக்குச்சகாதி இமினா அத்தனோபி தத்த² குக்குச்சஸப்³பா⁴வம்பி தீ³பேதி. தேனேவ மாதிகாட்ட²கதா²யம் (கங்கா². அட்ட². பே⁴ஸஜ்ஜஸிக்கா²பத³வண்ணனா) ‘நிப்³ப³ட்டிதஸப்பி வா நவனீதம் வா பசிதும் வட்டதீ’தி வுத்த’’ந்தி ஏத்தகமேவ ஆக³தோ.

உக்³க³ஹேத்வாதி ஸயமேவ க³ஹேத்வா. தானி படிக்³க³ஹேத்வாதி தானி கீ²ரத³தீ⁴னி படிக்³க³ஹேத்வா. க³ஹிதந்தி தண்டு³லாதி³விக³மத்த²ம் புன பசித்வா க³ஹிதந்தி அத்தோ². படிக்³க³ஹேத்வா ச ட²பிதபே⁴ஸஜ்ஜேஹீதி அதிரேகஸத்தாஹபடிக்³க³ஹிதேஹி யாவஜீவிகபே⁴ஸஜ்ஜேஹி, ஏதேன தேஹி யுத்தம்பி ஸப்பிஆதி³ அதிரேகஸத்தாஹபடிக்³க³ஹிதம் ந ஹோதீதி த³ஸ்ஸேதி. வத்³த³லிஸமயேதி வஸ்ஸகாலஸமயே, அனாதபகாலேதி அத்தோ². வுத்தனயேன யதா² தண்டு³லாதீ³னி ந பச்சந்தி, ததா² லஜ்ஜீயேவ ஸம்பாதே³த்வா தே³தீதி லஜ்ஜிஸாமணேரக்³க³ஹணம். அபிச அலஜ்ஜினா அஜ்ஜோ²ஹரிதப்³ப³ம் யம் கிஞ்சி அபி⁴ஸங்க²ராபேதும் ந வட்டதி, தஸ்மாபி ஏவமாஹ.

96. திலே படிக்³க³ஹேத்வா கததேலந்தி அத்தனா ப⁴ஜ்ஜாதீ³னி அகத்வா கததேலம். தேனேவ ‘‘ஸாமிஸம்பி வட்டதீ’’தி வுத்தம். நிப்³ப³ட்டீதத்தாதி யாவகாலிகதோ விவேசிதத்தா, ஏதேன ஏலாஅபா⁴வதோ யாவகாலிகத்தாபா⁴வம், பி⁴க்கு²னோ ஸவத்து²கபடிக்³க³ஹணேன யாவகாலிகத்துபக³மனஞ்ச த³ஸ்ஸேதி. உப⁴யம்பீதி அத்தனா அஞ்ஞேஹி ச கதம்.

யாவ அருணுக்³க³மனா திட்ட²தி, நிஸ்ஸக்³கி³யந்தி ஸத்தமே தி³வஸே கததேலம் ஸசே யாவ அருணுக்³க³மனா திட்ட²தி, நிஸ்ஸக்³கி³யம்.

அச்ச²வஸந்தி து³க்கடவத்து²னோ வஸாய அனுஞ்ஞாதத்தா தம்ஸதி³ஸானம் து³க்கடவத்தூ²னம்யேவ அகப்பியமம்ஸஸத்தானம் வஸா அனுஞ்ஞாதா, ந து²ல்லச்சயவத்து² மனுஸ்ஸானம் வஸாதி ஆஹ ‘‘ட²பேத்வா மனுஸ்ஸவஸ’’ந்தி. ஸம்ஸட்ட²ந்தி பரிஸ்ஸாவிதம். திண்ணம் து³க்கடானந்தி அஜ்ஜோ²ஹாரே அஜ்ஜோ²ஹாரே தீணி து³க்கடானி ஸந்தா⁴ய வுத்தம். கிஞ்சாபி பரிபோ⁴க³த்தா²ய விகாலே படிக்³க³ஹணபசனபரிஸ்ஸாவனாதீ³ஸு புப்³ப³பயோகே³ஸு பாளியம், அட்ட²கதா²யஞ்ச ஆபத்தி ந வுத்தா, ததா²பி ஏத்த² ஆபத்தியா ஏவ ப⁴விதப்³ப³ம் படிக்கி²த்தஸ்ஸ கரணதோ ஆஹாரத்தா²ய விகாலே யாமகாலிகாதீ³னம் படிக்³க³ஹணே விய. ‘‘காலே படிக்³க³ஹிதம் விகாலே அனுபஸம்பன்னேனாபி நிபக்கம் ஸம்ஸட்ட²ஞ்ச பரிபு⁴ஞ்ஜந்தஸ்ஸ த்³வேபி து³க்கடானி ஹோந்தியேவா’’தி வத³ந்தி.

யஸ்மா கீ²ராதீ³னி பக்கி²பித்வா பக்கபே⁴ஸஜ்ஜதேலே கஸடம் ஆமிஸக³திகம், தேன ஸஹ தேலம் படிக்³க³ஹேதும், பசிதும் வா பி⁴க்கு²னோ ந வட்டதி, தஸ்மா வுத்தம் ‘‘பக்கதேலகஸடே விய குக்குச்சாயதீ’’தி. ‘‘ஸசே வஸாய ஸஹ பக்கத்தா ந வட்டதி, இத³ம் கஸ்மா வட்டதீ’’தி புச்ச²ந்தா ‘‘ப⁴ந்தே…பே… வட்டதீ’’தி ஆஹம்ஸு, தே²ரோ அதிகுக்குச்சகதாய ‘‘ஏதம்பி ஆவுஸோ ந வட்டதீ’’தி ஆஹ, ரோக³னிக்³க³ஹத்தா²ய ஏவ வஸாய அனுஞ்ஞாதத்தம் ஸல்லக்கே²த்வா பச்சா² ‘‘ஸாதூ⁴’’தி ஸம்படிச்சி².

97. ‘‘மது⁴கரீஹி மது⁴மக்கி²காஹீதி இத³ம் கு²த்³த³கப⁴மரானம் த்³வின்னம் ஏவ விஸேஸன’’ந்தி கேசி வத³ந்தி. அஞ்ஞே பன ‘‘த³ண்ட³கேஸு மது⁴காரிகா மது⁴கரிமக்கி²கா நாம, தாஹி ஸஹ திஸ்ஸோ மது⁴மக்கி²கஜாதியோ’’தி வத³ந்தி. ப⁴மரமக்கி²காதி மஹாபடலகாரிகா. ஸிலேஸஸதி³ஸந்தி ஸுக்க²தாய வா பக்கதாய வா க⁴னீபூ⁴தம். இதரந்தி தனுகமது⁴. மது⁴படலந்தி மது⁴ரஹிதம் கேவலம் மது⁴படலம். ‘‘ஸசே மது⁴ஸஹிதம் படலம் படிக்³க³ஹேத்வா நிக்கி²பந்தி. படலஸ்ஸ பா⁴ஜனட்டா²னியத்தா மது⁴னோ வஸேன ஸத்தாஹாதிக்கமே நிஸ்ஸக்³கி³யம் ஹோதீ’’தி வத³ந்தி, ‘‘மது⁴மக்கி²தம் பன மது⁴க³திகமேவா’’தி இமினா தம் ஸமேதி.

98. ‘‘பா²ணிதம் நாம உச்சு²ம்ஹா நிப்³ப³த்த’’ந்தி பாளியம் (பாசி. 260) அவிஸேஸேன வுத்தத்தா, அட்ட²கதா²யஞ்ச ‘‘உச்சு²ரஸம் உபாதா³ய…பே… அவத்து²கா உச்சு²விகதி ‘பா²ணித’ந்தி வேதி³தப்³பா³’’தி வசனதோ உச்சு²ரஸோபி நிக்கஸடோ ஸத்தாஹகாலிகோதி வேதி³தப்³ப³ம். கேனசி பன ‘‘மது⁴ம்ஹி சத்தாரோ காலிகா யதா²ஸம்ப⁴வம் யோஜேதப்³பா³, உச்சு²ம்ஹி சா’’தி வத்வா ‘‘ஸமக்கி²கண்ட³ம் ஸேலகம் மது⁴ யாவகாலிகம், அனேலகம் உத³கஸம்பி⁴ன்னம் யாமகாலிகம், அஸம்பி⁴ன்னம் ஸத்தாஹகாலிகம், மது⁴ஸித்த²ம் பரிஸுத்³த⁴ம் யாவஜீவிகம், ததா² உச்சு²ரஸோ ஸகஸடோ யாவகாலிகோ, நிக்கஸடோ உத³கஸம்பி⁴ன்னோ யாமகாலிகோ, அஸம்பி⁴ன்னோ ஸத்தாஹகாலிகோ, ஸுத்³த⁴கஸடம் யாவஜீவிக’’ந்தி ச வத்வா உத்தரிபி ப³ஹுதா⁴ பபஞ்சிதம். தத்த² ‘‘உத³கஸம்பி⁴ன்னம் மது⁴ வா உச்சு²ரஸோ வா ஸகஸடோ யாவகாலிகோ, நிக்கஸடோ உத³கஸம்பி⁴ன்னோ யாமகாலிகோ’’தி இத³ம் நேவ பாளியம், ந அட்ட²கதா²யம் தி³ஸ்ஸதி, ‘‘யாவகாலிகம் ஸமானம் க³ருதரம்பி முத்³தி³காஜாதிரஸம் அத்தனா ஸம்ஸட்ட²ம் லஹுகம் யாமகாலிகபா⁴வம் உபனேந்தம் உத³கம் லஹுதரம் ஸத்தாஹகாலிகம் அத்தனா ஸம்ஸட்ட²ம் க³ருதரம் யாமகாலிகபா⁴வம் உபனேதீ’’தி ஏத்த² காரணம் ஸோயேவ புச்சி²தப்³போ³. ஸப்³ப³த்த² பாளியம் அட்ட²கதா²யஞ்ச உத³கஸம்பி⁴ன்னேன க³ருதரஸ்ஸாபி லஹுபா⁴வோபக³மனம்யேவ த³ஸ்ஸிதம். பாளியம்பி (மஹாவ. 284) ஹி ‘‘அனுஜானாமி, பி⁴க்க²வே, கி³லானஸ்ஸ கு³ளம், அகி³லானஸ்ஸ கு³ளோத³க’’ந்தி வத³ந்தேன அகி³லானேன பரிபு⁴ஞ்ஜிதும் அயுத்தோபி கு³ளோ உத³கஸம்பி⁴ன்னோ அகி³லானஸ்ஸபி வட்டதீதி அனுஞ்ஞாதோ.

யம்பி ச ‘‘உச்சு² சே, யாவகாலிகோ, உச்சு²ரஸோ சே, யாமகாலிகோ, பா²ணிதம் சே, ஸத்தாஹகாலிகம், தசோ சே, யாவஜீவிகோ’’தி அட்ட²கதா²வசனம் த³ஸ்ஸேத்வா ‘‘உச்சு²ரஸோ உத³கஸம்பி⁴ன்னோ யாமகாலிகோ’’தி அஞ்ஞேன கேனசி வுத்தம், தம்பி ததா²வித⁴ஸ்ஸ அட்ட²கதா²வசனஸ்ஸ ஸமந்தபாஸாதி³காய வினயட்ட²கதா²ய அபா⁴வதோ ந ஸாரதோ பச்சேதப்³ப³ம், ததோயேவ ச ‘‘உச்சு²ரஸோ உத³கஸம்பி⁴ன்னோபி அஸம்பி⁴ன்னோபி ஸத்தாஹகாலிகோயேவா’’தி கேசி ஆசரியா வத³ந்தி. பே⁴ஸஜ்ஜக்க²ந்த⁴கே ச ‘‘அனுஜானாமி, பி⁴க்க²வே, உச்சு²ரஸ’’ந்தி ஏத்த² தீஸுபி க³ண்டி²பதே³ஸு அவிஸேஸேன வுத்தம் ‘‘உச்சு²ரஸோ ஸத்தாஹகாலிகோ’’தி. ஸயம்கதம் நிராமிஸமேவ வட்டதீதி ஏத்த² அபரிஸ்ஸாவிதம் படிக்³க³ஹிதம்பி கரணஸமயே பரிஸ்ஸாவேத்வா, கஸடம் அபனேத்வா ச அத்தனா கதந்தி வேதி³தப்³ப³ம், அயம் ஸாரத்த²தீ³பனீபாடோ² (ஸாரத்த². டீ. 2.623).

விமதிவினோத³னியம் (வி. வி. டீ. 1.623) பன உச்சு²ரஸம் உபாதா³யாதி நிக்கஸடரஸஸ்ஸாபி ஸத்தாஹகாலிகத்தம் த³ஸ்ஸேதி ‘‘உச்சு²ம்ஹா நிப்³ப³த்த’’ந்தி பாளியம் ஸாமஞ்ஞதோ வுத்தத்தா. யம் பன ஸுத்தந்தட்ட²கதா²யம் ‘‘உச்சு² சே, யாவகாலிகோ, உச்சு²ரஸோ சே, யாமகாலிகோ, பா²ணிதம் சே, ஸத்தாஹகாலிகம், தசோ சே, யாவஜீவிகோ’’தி வுத்தம், தம் அம்ப³ப²லரஸாதி³மிஸ்ஸதாய யாமகாலிகத்தம் ஸந்தா⁴ய வுத்தந்தி க³ஹேதப்³ப³ம், அவினயவசனத்தா தம் அப்பமாணந்தி. தேனேவ ‘‘புரேப⁴த்தம் படிக்³க³ஹிதேன அபரிஸ்ஸாவிதஉச்சு²ரஸேனா’’திஆதி³ வுத்தம். நிராமிஸமேவ வட்டதி தத்த² பவிட்ட²யாவகாலிகஸ்ஸ அப்³போ³ஹாரிகத்தாதி இத³ம் கு³ளே கதே தத்த² விஜ்ஜமானம்பி கஸடம் பாகேன ஸுக்க²தாய யாவஜீவிகத்தம் ப⁴ஜதீதி வுத்தம். தஸ்ஸ யாவகாலிகத்தே ஹி ஸாமம்பாகேன புரேப⁴த்தேபி அனஜ்ஜோ²ஹரணீயம் ஸியாதி. ‘‘ஸவத்து²கபடிக்³க³ஹிதத்தா’’தி இத³ம் உச்சு²ரஸே சுண்ணவிசுண்ணம் ஹுத்வா டி²தகஸடம் ஸந்தா⁴ய வுத்தம், தேன ச ‘‘அபரிஸ்ஸாவிதேன அப்படிக்³க³ஹிதேன அனுபஸம்பன்னேஹி கதம் ஸத்தாஹம் வட்டதீதி த³ஸ்ஸேதீ’’தி வுத்தம்.

ஜா²மஉச்சு²பா²ணிதந்தி அக்³கி³ம்ஹி உச்சு²ம் தாபேத்வா கதம். கோட்டிதஉச்சு²பா²ணிதந்தி கு²த்³தா³னுகு²த்³த³கம் சி²ந்தி³த்வா கோட்டேத்வா நிப்பீளேத்வா பக்கம். தம் தத்த² விஜ்ஜமானம்பி கஸடம் பக்ககாலே யாவகாலிகத்தம் விஜஹதீதி ஆஹ ‘‘தம் யுத்த’’ந்தி. ஸீதோத³கேன கதந்தி மது⁴கபுப்பா²னி ஸீதோத³கேன மத்³தி³த்வா பரிஸ்ஸாவேத்வா பசித்வா கதம். ‘‘அபரிஸ்ஸாவேத்வா கத’’ந்தி கேசி, தத்த² காரணம் ந தி³ஸ்ஸதி. கீ²ரம் பக்கி²பித்வா கதம் மது⁴கபா²ணிதம் யாவகாலிகந்தி ஏத்த² கீ²ரம் பக்கி²பித்வா பக்கதேலம் கஸ்மா விகாலே வட்டதீதி சே? தேலே பக்கி²த்தம் கீ²ரம் தேலமேவ ஹோதி, அஞ்ஞம் பன கீ²ரம் பக்கி²பித்வா கதம் கீ²ரபா⁴வம் க³ண்ஹாதீதி இத³மேத்த² காரணம். யதி³ ஏவம் க²ண்ட³ஸக்க²ரம்பி கீ²ரம் பக்கி²பித்வா கரோந்தி, தம் கஸ்மா வட்டதீதி ஆஹ ‘‘க²ண்ட³ஸக்க²ரம் பனா’’திஆதி³. தத்த² கீ²ரஜல்லிகந்தி கீ²ரபே²ணம்.

99. ‘‘மது⁴கபுப்ப²ம் பனா’’திஆதி³ யாவகாலிகரூபேன டி²தஸ்ஸாபி அவட்டனகம் மேரயபீ³ஜவத்து²ம் த³ஸ்ஸேதும் ஆரத்³த⁴ம். ஆஹாரகிச்சம் கரோந்தானி ஏதானி கஸ்மா ஏவம் பரிபு⁴ஞ்ஜிதப்³பா³னீதி சோத³னாபரிஹாராய பே⁴ஸஜ்ஜோதி³ஸ்ஸம் த³ஸ்ஸேந்தேன தப்பஸங்கே³ன ஸப்³பா³னிபி ஓதி³ஸ்ஸகானி ஏகதோ த³ஸ்ஸேதும் ‘‘ஸத்தவித⁴ஞ்ஹீ’’திஆதி³ வுத்தம் ஸமந்தபாஸாதி³காயம் (பாரா. அட்ட². 2.623). வினயஸங்க³ஹப்பகரணே பன தம் ந வுத்தம், ‘‘பச்சா²ப⁴த்ததோ பட்டா²ய ஸதி பச்சயேதி வுத்தத்தா படிக்³க³ஹிதபே⁴ஸஜ்ஜானி து³தியதி³வஸதோ பட்டா²ய புரேப⁴த்தம்பி ஸதி பச்சயேவ பரிபு⁴ஞ்ஜிதப்³பா³னி, ந ஆஹாரத்தா²ய பே⁴ஸஜ்ஜத்தா²ய படிக்³க³ஹிதத்தா’’தி வத³ந்தி. த்³வாரவாதபானகவாடேஸூதி மஹாத்³வாரஸ்ஸ வாதபானானஞ்ச கவாடப²லகேஸு. கஸாவே பக்கி²த்தானி தானி அத்தனோ ஸபா⁴வம் பரிச்சஜந்தீதி ‘‘கஸாவே…பே… மக்கே²தப்³பா³னீ’’தி வுத்தம், கு⁴ணபாணகாதி³பரிஹாரத்த²ம் மக்கே²தப்³பா³னீதி அத்தோ². அதி⁴ட்டே²தீதி ‘‘இதா³னி மய்ஹம் அஜ்ஜோ²ஹரணீயம் ந ப⁴விஸ்ஸதி, பா³ஹிரபரிபோ⁴க³த்தா²ய ப⁴விஸ்ஸதீ’’தி சித்தம் உப்பாதே³தீதி அத்தோ². தேனேவாஹ ‘‘ஸப்பிஞ்ச தேலஞ்ச வஸஞ்ச முத்³த⁴னி தேலம் வா அப்³ப⁴ஞ்ஜனம் வா’’திஆதி³, ஏவம் பரிபோ⁴கே³ அனபேக்க²தாய படிக்³க³ஹணம் விஜஹதீதி அதி⁴ப்பாயோ. ஏவம் அஞ்ஞேஸுபி காலிகேஸு அனஜ்ஜோ²ஹரிதுகாமதாய ஸுத்³த⁴சித்தேன பா³ஹிரபரிபோ⁴க³த்தா²ய நியமேபி படிக்³க³ஹணம் விஜஹதீதி இத³ம்பி விஸும் ஏகம் படிக்³க³ஹணவிஜஹனந்தி த³ட்ட²ப்³ப³ம்.

அஞ்ஞேன பி⁴க்கு²னா வத்தப்³போ³தி ஏத்த² ஸுத்³த⁴சித்தேன தி³ன்னத்தா ஸயம்பி ஆஹராபேத்வா பரிபு⁴ஞ்ஜிதும் வட்டதியேவ. த்³வின்னம்பி அனாபத்தீதி யதா² அஞ்ஞஸ்ஸ ஸந்தகம் ஏகேன படிக்³க³ஹிதம் ஸத்தாஹாதிக்கமேபி நிஸ்ஸக்³கி³யம் ந ஹோதி பரஸந்தகபா⁴வதோ, ஏவமித³ம்பி அவிப⁴த்தத்தா உப⁴யஸாதா⁴ரணம்பி வினிப்³போ⁴கா³பா⁴வதோ நிஸ்ஸக்³கி³யம் ந ஹோதீதி அதி⁴ப்பாயோ. பரிபு⁴ஞ்ஜிதும் பன ந வட்டதீதி பி⁴க்கு²னா படிக்³க³ஹிதத்தா ஸத்தாஹாதிக்கமே யஸ்ஸ கஸ்ஸசி பி⁴க்கு²னோ பரிபு⁴ஞ்ஜிதும் ந வட்டதி படிக்³க³ஹிதஸப்பிஆதீ³னம் பரிபோ⁴க³ஸ்ஸ ஸத்தாஹேனேவ பரிச்சி²ன்னத்தா. ‘‘தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னீ’’தி (பாரா. 623) ஹி வுத்தம்.

‘‘ஆவுஸோ இமம் தேலம் ஸத்தாஹமத்தம் பரிபு⁴ஞ்ஜிதும் வட்டதீ’’தி இமினா யேன படிக்³க³ஹிதம், தேன அந்தோஸத்தாஹேயேவ பரஸ்ஸ விஸ்ஸஜ்ஜிதபா⁴வம் த³ஸ்ஸேதி. கஸ்ஸ ஆபத்தீதி ‘‘பட²மம் தாவ உபி⁴ன்னம் ஸாதா⁴ரணத்தா அனாபத்தி வுத்தா, இதா³னி பன ஏகேன இதரஸ்ஸ விஸ்ஸட்ட²பா⁴வதோ உப⁴யஸாதா⁴ரணதா நத்தீ²தி விப⁴த்தஸதி³ஸம் ஹுத்வா டி²தம், தஸ்மா ஏத்த² படிக்³க³ஹிதஸ்ஸ ஸத்தாஹாதிக்கமே ஏகஸ்ஸ ஆபத்தியா ப⁴விதப்³ப³’’ந்தி மஞ்ஞமானோ ‘‘கிம் படிக்³க³ஹணபச்சயா படிக்³கா³ஹகஸ்ஸ ஆபத்தி, உதா³ஹு யஸ்ஸ ஸந்தகம் ஜாதம், தஸ்ஸா’’தி புச்ச²தி. நிஸ்ஸட்ட²பா⁴வதோயேவ ச இத⁴ ‘‘அவிப⁴த்தபா⁴வதோ’’தி காரணம் அவத்வா ‘‘யேன பரிக்³க³ஹிதம், தேன விஸ்ஸஜ்ஜிதத்தா’’தி வுத்தம், இத³ஞ்ச விஸ்ஸட்டா²பா⁴வதோ உப⁴யஸாதா⁴ரணதம் பஹாய ஏகஸ்ஸ ஸந்தகம் ஹோந்தம்பி யேன படிக்³க³ஹிதம், ததோ அஞ்ஞஸ்ஸ ஸந்தகம் ஜாதம், தஸ்மா பரஸந்தகபடிக்³க³ஹணே விய படிக்³கா³ஹகஸ்ஸ படிக்³க³ஹணபச்சயா நத்தி² ஆபத்தீதி த³ஸ்ஸனத்த²ம் வுத்தம், ந பன ‘‘யேன படிக்³க³ஹிதம், தேன விஸ்ஸஜ்ஜிதத்தா’’தி வசனதோ அவிஸ்ஸஜ்ஜிதே ஸதி அவிப⁴த்தேபி ஸத்தாஹாதிக்கமே ஆபத்தீதி த³ஸ்ஸனத்த²ம் அவிஸ்ஸஜ்ஜிதே அவிப⁴த்தபா⁴வதோயேவ அனாபத்தியா ஸித்³த⁴த்தா. ஸசே பன இதரோ யேன படிக்³க³ஹிதம், தஸ்ஸேவ அந்தோஸத்தாஹே அத்தனோ பா⁴க³ம்பி விஸ்ஸஜ்ஜேதி, ஸத்தாஹாதிக்கமே ஸியா ஆபத்தி யேன படிக்³க³ஹிதம், தஸ்ஸேவ ஸந்தகபா⁴வமாபன்னத்தா. ‘‘இதரஸ்ஸ அப்படிக்³க³ஹிதத்தா’’தி இமினா தஸ்ஸ ஸந்தகபா⁴வேபி அஞ்ஞேஹி படிக்³க³ஹிதஸகஸந்தகே விய தேன அப்படிக்³க³ஹிதபா⁴வதோ அனாபத்தீதி தீ³பேதி, இமம் பன அதி⁴ப்பாயம் அஜானித்வா இதோ அஞ்ஞதா² க³ண்டி²பத³காராதீ³ஹி பபஞ்சிதம், ந தம் ஸாரதோ பச்சேதப்³ப³ம், இத³ம் ஸாரத்த²தீ³பனீவசனம் (ஸாரத்த². டீ. 2.625).

விமதிவினோத³னியம் (வி. வி. டீ. 1.625) பன – ஸசே த்³வின்னம்…பே… ந வட்டதீதி ஏத்த² பாடோ² க³ளிதோ, ஏவம் பனேத்த² பாடோ² வேதி³தப்³போ³ – ஸசே த்³வின்னம் ஸந்தகம் ஏகேன படிக்³க³ஹிதம் அவிப⁴த்தம் ஹோதி, ஸத்தாஹாதிக்கமே த்³வின்னம்பி அனாபத்தி, பரிபு⁴ஞ்ஜிதும் பன ந வட்டதீதி. அஞ்ஞதா² பன ஸத்³த³ப்பயோகோ³பி ந ஸங்க³ஹம் க³ச்ச²தி, ‘‘க³ண்டி²பதே³பி ச அயமேவ பாடோ² த³ஸ்ஸிதோ’’தி ஸாரத்த²தீ³பனியம் (ஸாரத்த². டீ. 2.625) வுத்தம். ‘‘த்³வின்னம்பி அனாபத்தீ’’தி அவிப⁴த்தத்தா வுத்தம். ‘‘பரிபு⁴ஞ்ஜிதும் பன ந வட்டதீ’’தி இத³ம் ‘‘ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³ப³’’ந்தி (பாரா. 623) வசனதோ வுத்தம். ‘‘யேன படிக்³க³ஹிதம், தேன விஸ்ஸஜ்ஜிதத்தா’’தி இமினா உபஸம்பன்னஸ்ஸ தா³னம்பி ஸந்தா⁴ய ‘‘விஸ்ஸஜ்ஜேதீ’’தி இத³ம் வுத்தந்தி த³ஸ்ஸேதி. உபஸம்பன்னஸ்ஸ நிரபேக்க²தி³ன்னவத்து²ம்ஹி படிக்³க³ஹணஸ்ஸ அவிக³தத்தேபி ஸகஸந்தகதா விக³தாவ ஹோதி, தேன நிஸ்ஸக்³கி³யம் ந ஹோதி. ‘‘அத்தனாவ படிக்³க³ஹிதத்தம் ஸகஸந்தகத்தஞ்சா’’தி இமேஹி த்³வீஹி காரணேஹேவ நிஸ்ஸக்³கி³யம் ஹோதி, ந ஏகேன. அனுபஸம்பன்னஸ்ஸ நிரபேக்க²தா³னே பன தது³ப⁴யம்பி விஜஹதி, பரிபோ⁴கோ³பேத்த² வட்டதி, ந ஸாபேக்க²தா³னே தா³னலக்க²ணாபா⁴வதோ. ‘‘விஸ்ஸஜ்ஜதீ’’தி ஏதஸ்மிஞ்ச பாளிபதே³ கஸ்ஸசி அத³த்வா அனபேக்க²தாய ச²ட்³ட³னம்பி ஸங்க³ஹிதந்தி வேதி³தப்³ப³ம். ‘‘அனபேக்கா² த³த்வா’’தி இத³ஞ்ச படிக்³க³ஹணவிஜஹனவிதி⁴த³ஸ்ஸனத்த²மேவ வுத்தம். படிக்³க³ஹணே ஹி விஜஹிதே புன படிக்³க³ஹேத்வா பரிபோ⁴கோ³ ஸயமேவ வட்டிஸ்ஸதி, தப்³பி³ஜஹனஞ்ச வத்து²னோ ஸகஸந்தகதாபரிச்சாகே³ன ஹோதீதி. ஏதேன ச வத்து²ம்ஹி அஜ்ஜோ²ஹரணாபேக்கா²ய ஸதி படிக்³க³ஹணவிஸ்ஸஜ்ஜனம் நாம விஸும் ந லப்³ப⁴தீதி ஸிஜ்ஜ²தி. இதரதா² ஹி ‘‘படிக்³க³ஹணே அனபேக்கோ²வ படிக்³க³ஹணம் விஸ்ஸஜ்ஜேத்வா புன படிக்³க³ஹேத்வா பு⁴ஞ்ஜதீ’’தி வத்தப்³ப³ம் ஸியா, ‘‘அப்படிக்³க³ஹிதத்தா’’தி இமினா ஏகஸ்ஸ ஸந்தகம் அஞ்ஞேன படிக்³க³ஹிதம்பி நிஸ்ஸக்³கி³யம் ஹோதீதி த³ஸ்ஸேதி. ஏவந்தி ‘‘புன க³ஹேஸ்ஸாமீ’’தி அபேக்க²ம் அகத்வா ஸுத்³த⁴சித்தேன பரிசத்ததம் பராமஸதி. பரிபு⁴ஞ்ஜந்தஸ்ஸ அனாபத்தித³ஸ்ஸனத்த²ந்தி நிஸ்ஸக்³கி³யமூலிகாஹி பாசித்தியாதி³ஆபத்தீஹி அனாபத்தித³ஸ்ஸனத்த²ந்தி அதி⁴ப்பாயோ. பரிபோ⁴கே³ அனாபத்தித³ஸ்ஸனத்த²ந்தி ஏத்த² பன நிஸ்ஸட்ட²படிலாப⁴ஸ்ஸ காயிகபரிபோ⁴கா³தீ³ஸு யா து³க்கடாபத்தி வுத்தா, தாய அனாபத்தித³ஸ்ஸனத்த²ந்தி அதி⁴ப்பாயோ.

100. ஏவம் சதுகாலிகபச்சயம் த³ஸ்ஸேத்வா இதா³னி தேஸு விஸேஸலக்க²ணம் த³ஸ்ஸேந்தோ ‘‘இமேஸு பனா’’திஆதி³மாஹ. தத்த² அகப்பியபூ⁴மியம் ஸஹஸேய்யாபஹோனகே கே³ஹே வுத்தம் ஸங்கி⁴கம் வா புக்³க³லிகம் வா பி⁴க்கு²ஸ்ஸ, பி⁴க்கு²னியா வா ஸந்தகம் யாவகாலிகம் யாமகாலிகஞ்ச ஏகரத்தம்பி ட²பிதம் அந்தோவுத்த²ம் நாம ஹோதி, தத்த² பக்கஞ்ச அந்தோபக்கம் நாம ஹோதி. ஸத்தாஹகாலிகம் பன யாவஜீவிகஞ்ச வட்டதி. படிக்³க³ஹேத்வா ஏகரத்தம் வீதினாமிதம் பன யம் கிஞ்சி யாவகாலிகம் வா யாமகாலிகம் வா அஜ்ஜோ²ஹரிதுகாமதாய க³ண்ஹந்தஸ்ஸ பரிக்³க³ஹணே தாவ து³க்கடம், அஜ்ஜோ²ஹரதோ பன ஏகமேகஸ்மிம் அஜ்ஜோ²ஹாரே ஸன்னிதி⁴பச்சயா பாசித்தியம் ஹோதீதி அத்தோ². இதா³னி அஞ்ஞம்பி விஸேஸலக்க²ணம் த³ஸ்ஸேந்தோ ‘‘யாவகாலிகம் பனா’’திஆதி³மாஹ. தத்த² ஸம்பி⁴ன்னரஸானீதி ஸம்ஸட்ட²ரஸானி. தீ³க⁴காலானி வத்தூ²னி ரஸ்ஸகாலேன ஸம்ஸட்டா²னி ரஸ்ஸகாலமேவ அனுவத்தந்தீதி ஆஹ ‘‘யாவகாலிகம் பன…பே… தீணிபி யாமகாலிகாதீ³னீ’’தி. இதரேஸுபி ஏஸேவ நயோ. தஸ்மாதிஆதீ³ஸு தத³ஹுபுரேப⁴த்தமேவ வட்டதி, ந தத³ஹுபச்சா²ப⁴த்தம், ந ரத்தியம், ந து³தியதி³வஸாதீ³ஸூதி அத்தோ².

கஸ்மாதி சே? தத³ஹுபடிக்³க³ஹிதேன யாவகாலிகேன ஸம்ஸட்ட²த்தாதி. ஏத்த² ச ‘‘யாவகாலிகேன ஸம்ஸட்ட²த்தா’’தி ஏத்தகமேவ அவத்வா ‘‘தத³ஹுபடிக்³க³ஹிதேனா’’தி விஸேஸனஸ்ஸ வுத்தத்தா புரேபடிக்³க³ஹிதயாவகாலிகேன ஸம்ஸட்டே² ஸதி தத³ஹுபுரேப⁴த்தம்பி ந வட்டதி, அனஜ்ஜோ²ஹரணீயம் ஹோதீதி விஞ்ஞாயதி. ‘‘ஸம்பி⁴ன்னரஸ’’ந்தி இமினா ஸசேபி ஸம்ஸட்ட²ம், அஸம்பி⁴ன்னரஸம் ஸேஸகாலிகத்தயம் அத்தனோ அத்தனோ காலே வட்டதீதி த³ஸ்ஸேதி. யாமகாலிகேனாதி ஏத்த² ‘‘தத³ஹுபடிக்³க³ஹிதேனா’’தி ததியந்தவிஸேஸனபத³ம் அஜ்ஜா²ஹரிதப்³ப³ம், புப்³ப³வாக்யதோ வா அனுவத்தேதப்³ப³ம். தஸ்ஸ ப²லம் வுத்தனயமேவ.

போத்த²கேஸு பன ‘‘யாமகாலிகேன ஸம்ஸட்ட²ம் பன இதரத்³வயம் தத³ஹுபடிக்³க³ஹித’’ந்தி தி³ஸ்ஸதி, தம் ந ஸுந்த³ரம். யத்த² நத்தி², தமேவ ஸுந்த³ரம், கஸ்மா? து³தியந்தஞ்ஹி விஸேஸனபத³ம் இதரத்³வயம் விஸேஸேதி. ததோ தத³ஹுபடிக்³க³ஹிதமேவ ஸத்தாஹகாலிகம் யாவஜீவிகஞ்ச யாமகாலிகேன ஸம்ஸட்டே² ஸதி யாவ அருணுக்³க³மனா வட்டதி, ந புரேபடிக்³க³ஹிதானீதி அத்தோ² ப⁴வேய்ய, ஸோ ந யுத்தோ. கஸ்மா? ஸத்தாஹகாலிகயாவஜீவிகானம் அஸன்னிதி⁴ஜனகத்தா, ‘‘தீ³க⁴காலிகானி ரஸ்ஸகாலிகம் அனுவத்தந்தீ’’தி இமினா லக்க²ணேன விருத்³த⁴த்தா ச, தஸ்மா தத³ஹுபடிக்³க³ஹிதம் வா ஹோது புரேபடிக்³க³ஹிதம் வா, ஸத்தாஹகாலிகம் யாவஜீவிகஞ்ச தத³ஹுபடிக்³க³ஹிதேன யாமகாலிகேன ஸம்ஸட்ட²த்தா யாவ அருணுக்³க³மனா வட்டதீதி அத்தோ² யுத்தோ, ஏவஞ்ச உபரி வக்க²மானேன ‘‘ஸத்தாஹகாலிகேன பன தத³ஹுபடிக்³க³ஹிதேன ஸத்³தி⁴ம் ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் ஸத்தாஹம் கப்பதீ’’தி வசனேன ஸமம் ப⁴வேய்ய.

அபிச ‘‘யாமகாலிகேன ஸம்ஸட்ட²ம் பன இதரத்³வயம் தத³ஹு யாவ அருணுக்³க³மனா வட்டதீ’’தி புப்³ப³பாடே²ன ப⁴விதப்³ப³ம், தம் லேக²கேஹி அஞ்ஞேஸு பாடே²ஸு ‘‘தத³ஹுபடிக்³க³ஹித’’ந்தி விஜ்ஜமானம் தி³ஸ்வா, இத⁴ தத³ஹுபத³தோ படிக்³க³ஹிதபத³ம் க³ளிதந்தி மஞ்ஞமானேஹி பக்கி²பித்வா லிகி²தம் ப⁴வேய்ய, ‘‘தத³ஹூ’’தி இத³ம் பன ‘‘யாவ அருணுக்³க³மனா’’தி பத³ம் விஸேஸேதி, தேன யாவ தத³ஹுஅருணுக்³க³மனா வட்டதி, ந து³தியாஹாதி³அருணுக்³க³மனாதி அத்த²ம் த³ஸ்ஸேதி. தேனேவ உபரிபாடே²பி ‘‘ஸத்தாஹகாலிகேன பன தத³ஹுபடிக்³க³ஹிதேனா’’தி ரஸ்ஸகாலிகத்த²பதே³ன துல்யாதி⁴கரணம் விஸேஸனபத³ம் தமேவ விஸேஸேதி, ந தீ³க⁴காலிகத்த²ம் யாவஜீவிகபத³ம், தஸ்மா ‘‘தத³ஹுபடிக்³க³ஹிதேன ஸத்தாஹகாலிகேன ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் ஸத்தாஹம் கப்பதீ’’தி வுத்தம்.

த்³வீஹபடிக்³க³ஹிதேனாதிஆதீ³ஸுபி ‘‘த்³வீஹபடிக்³க³ஹிதேன ஸத்தாஹகாலிகேன ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் சா²ஹம் வட்டதி, தீஹபடிக்³க³ஹிதேன ஸத்தாஹகாலிகேன ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் பஞ்சாஹம் வட்டதி, சதூஹபடிக்³க³ஹிதேன ஸத்தாஹகாலிகேன ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் சதுராஹம் வட்டதி, பஞ்சாஹபடிக்³க³ஹிதேன ஸத்தாஹகாலிகேன ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் தீஹம் வட்டதி, சா²ஹபடிக்³க³ஹிதேன ஸத்தாஹகாலிகேன ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் த்³வீஹம் வட்டதி, ஸத்தாஹபடிக்³க³ஹிதேன ஸத்தாஹகாலிகேன ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் தத³ஹேவ வட்டதீ’’தி ஏவம் ஸத்தாஹகாலிகஸ்ஸேவ அதீததி³வஸம் பரிஹாபேத்வா ஸேஸதி³வஸவஸேன யோஜேதப்³ப³ம், ந யாவஜீவிகஸ்ஸ. ந ஹி யாவஜீவிகஸ்ஸ ஹாபேதப்³போ³ அதீததி³வஸோ நாம அத்தி² ஸதி பச்சயே யாவஜீவம் பரிபு⁴ஞ்ஜிதப்³ப³தோ. தேனாஹ ‘‘ஸத்தாஹகாலிகம்பி அத்தனா ஸத்³தி⁴ம் ஸம்ஸட்ட²ம் யாவஜீவிகம் அத்தனோ ஸபா⁴வஞ்ஞேவ உபனேதீ’’தி. கேஸுசி போத்த²கேஸு ‘‘யாமகாலிகேன ஸம்ஸட்ட²ம் பன இதரத்³வயம் தத³ஹுபடிக்³க³ஹித’’ந்தி லிகி²தம் பாட²ம் நிஸ்ஸாய இமஸ்மிம்பி பாடே² ‘‘தத³ஹுபடிக்³க³ஹிதந்தி இத³மேவ இச்சி²தப்³ப³’ந்தி மஞ்ஞமானா ‘‘புரேபடிக்³க³ஹித’’ந்தி பாட²ம் படிக்கி²பந்தி. கேஸுசி ‘‘புரேப⁴த்தம் படிக்³க³ஹிதம் வா’’தி லிக²ந்தி, தம் ஸப்³ப³ம் யதா²வுத்தனயம் அமனஸிகரோந்தா விப்³ப⁴ந்தசித்தா ஏவம் கரோந்தீதி த³ட்ட²ப்³ப³ம்.

இமேஸு சதூஸு காலிகேஸு யாவகாலிகம் மஜ்ஜ²ன்ஹிககாலாதிக்கமே, யாமகாலிகம் பச்சி²மயாமாதிக்கமே, ஸத்தாஹகாலிகம் ஸத்தாஹாதிக்கமே பரிபு⁴ஞ்ஜந்தஸ்ஸ ஆபத்தீதி வுத்தம். கதரஸிக்கா²பதே³ன ஆபத்தி ஹோதீதி புச்சா²யமாஹ ‘‘காலயாம’’இச்சாதி³. தஸ்ஸத்தோ² – யாவகாலிகம் காலாதிக்கமே பரிபு⁴ஞ்ஜந்தஸ்ஸ ‘‘யோ பன பி⁴க்கு² விகாலே கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்திய’’ந்தி இமினா விகாலேபோ⁴ஜனஸிக்கா²பதே³ன (பாசி. 248) ஆபத்தி ஹோதி. யாமகாலிகம் யாமாதிக்கமே பரிபு⁴ஞ்ஜந்தஸ்ஸ ‘‘யோ பன பி⁴க்கு² ஸன்னிதி⁴காரகம் கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்திய’’ந்தி இமினா ஸன்னிதி⁴ஸிக்கா²பதே³ன (பாசி. 253) ஆபத்தி ஹோதி. ஸத்தாஹகாலிகம் ஸத்தாஹாதிக்கமே பரிபு⁴ஞ்ஜந்தஸ்ஸ ‘‘யானி கோ² பன தானி கி³லானானம் பி⁴க்கூ²னம் படிஸாயனீயானி பே⁴ஸஜ்ஜானி, ஸேய்யதி²த³ம், ஸப்பி நவனீதம் தேலம் மது⁴ பா²ணிதம், தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னி, தம் அதிக்காமயதோ நிஸ்ஸக்³கி³யம் பாசித்திய’’ந்தி இமினா பே⁴ஸஜ்ஜஸிக்கா²பதே³ன (பாரா. 622) ஆபத்தி ஹோதீதி.

இமானி சத்தாரி காலிகானி ஏகதோ ஸம்ஸட்டா²னி ஸம்பி⁴ன்னரஸானி புரிமபுரிமகாலிகஸ்ஸ காலவஸேன பரிபு⁴ஞ்ஜிதப்³பா³னீதி வுத்தம். அஸம்பி⁴ன்னரஸானி சே ஹோந்தி, கத²ம் பரிபு⁴ஞ்ஜிதப்³பா³னீதி ஆஹ ‘‘ஸசே பனா’’திஆதி³. தஸ்ஸத்தோ² ஸுவிஞ்ஞேய்யோவ.

இதி வினயஸங்க³ஹஸம்வண்ணனாபூ⁴தே வினயாலங்காரே

சதுகாலிகவினிச்ச²யகதா²லங்காரோ நாம

அட்டா²ரஸமோ பரிச்சே²தோ³.