16. ஸஹஸேய்யவினிச்ச²யகதா²

79. ஏவம் பூ⁴தகா³மவினிச்ச²யம் கதே²த்வா இதா³னி ஸஹஸேய்யவினிச்ச²யம் கதே²தும் ‘‘து³வித⁴ம் ஸஹஸேய்யக’’ந்திஆதி³மாஹ. தத்த² த்³வே விதா⁴ பகாரா யஸ்ஸ ஸஹஸேய்யகஸ்ஸ தம் து³வித⁴ம், ஸஹ ஸயனம், ஸஹ வா ஸயதி ஏத்தா²தி ஸஹஸேய்யா, ஸஹஸேய்யா ஏவ ஸஹஸேய்யகம் ஸகத்தே² க-பச்சயவஸேன. தம் பன அனுபஸம்பன்னேனஸஹஸேய்யாமாதுகா³மேனஸஹஸேய்யாவஸேன து³வித⁴ம். தேனாஹ ‘‘து³வித⁴ம் ஸஹஸேய்யக’’ந்தி. தி³ரத்ததிரத்தந்தி ஏத்த² வசனஸிலிட்ட²தாமத்தேன தி³ரத்தக்³க³ஹணம் கதந்தி வேதி³தப்³ப³ம். திரத்தஞ்ஹி ஸஹவாஸே லப்³ப⁴மானே தி³ரத்தே வத்தப்³ப³மேவ நத்தீ²தி தி³ரத்தக்³க³ஹணம் விஸும் ந பயோஜேதி. தேனேவாஹ ‘‘உத்தரிதி³ரத்ததிரத்தந்தி ப⁴க³வா ஸாமணேரானம் ஸங்க³ஹகரணத்தா²ய திரத்தபரிஹாரம் அதா³ஸீ’’தி. நிரந்தரம் திரத்தக்³க³ஹணத்த²ம் வா தி³ரத்தக்³க³ஹணம் கதம். கேவலஞ்ஹி ‘‘திரத்த’’ந்தி வுத்தே அஞ்ஞத்த² வாஸேன அந்தரிகம்பி திரத்தம் க³ண்ஹேய்ய. தி³ரத்தவிஸிட்ட²ம் பன திரத்தம் வுச்சமானம் தேன அனந்தரிகமேவ திரத்தம் தீ³பேதி. விமதிவினோத³னியம்பி (வி. வி. டீ. பாசித்திய 2.50-51) ‘‘தி³ரத்தக்³க³ஹணம் வசனாலங்காரத்த²ம். நிரந்தரம் திஸ்ஸோவ ரத்தியோ ஸயித்வா சதுத்த²தி³வஸாதீ³ஸு ஸயந்தஸ்ஸேவ ஆபத்தி, ந ஏகந்தரிகாதி³வஸேன ஸயந்தஸ்ஸாதி த³ஸ்ஸனத்த²ம்பீதி த³ட்ட²ப்³ப³’’ந்தி வுத்தம். ஸஹஸேய்யம் ஏகதோ ஸேய்யம். ஸேய்யந்தி சேத்த² காயப்பஸாரணஸங்கா²தம் ஸயனம்பி வுச்சதி, யஸ்மிம் ஸேனாஸனே ஸயந்தி, தம்பி, தஸ்மா ஸேய்யம் கப்பேய்யாதி ஏத்த² ஸேனாஸனஸங்கா²தம் ஸேய்யம் பவிஸித்வா காயப்பஸாரணஸங்கா²தம் ஸேய்யம் கப்பேய்ய ஸம்பாதே³ய்யாதி அத்தோ². தி³யட்³ட⁴ஹத்து²ப்³பே³தே⁴னாதி ஏத்த² தி³யட்³ட⁴ஹத்தோ² வட்³ட⁴கிஹத்தே²ன க³ஹேதப்³போ³. பஞ்சஹி ச²த³னேஹீதி இட்ட²காஸிலாஸுதா⁴திணபண்ணஸங்கா²தேஹி பஞ்சஹி ச²த³னேஹி. வாசுக்³க³தவஸேனாதி பகு³ணவஸேன.

ஏகூபசாரோதி வளஞ்ஜனத்³வாரஸ்ஸ ஏகத்தம் ஸந்தா⁴ய வுத்தம். விமதிவினோத³னியம் (வி. வி. டீ. பாசித்திய 2.50-51) பன ‘‘ஏகூபசாரோ ஏகேன மக்³கே³ன பவிஸித்வா அப்³போ⁴காஸம் அனோக்கமித்வா ஸப்³ப³த்த² அனுபரிக³மனயோக்³கோ³, ஏதம் ப³ஹுத்³வாரம்பி ஏகூபசாரோவ. யத்த² பன குட்டாதீ³ஹி ருந்தி⁴த்வா விஸும் த்³வாரம் யோஜேந்தி, நானூபசாரோ ஹோதி. ஸசே பன ருந்த⁴தி ஏவ, விஸும் த்³வாரம் ந யோஜேந்தி, ஏதம்பி ஏகூபசாரமேவ மத்திகாதீ³ஹி பிஹிதத்³வாரோ விய க³ப்³போ⁴தி க³ஹேதப்³ப³ம். அஞ்ஞதா² க³ப்³பே⁴ பவிஸித்வா பமுகா²தீ³ஸு நிபன்னானுபஸம்பன்னேஹி ஸஹஸேய்யாபரிமுத்தியா க³ப்³ப⁴த்³வாரம் மத்திகாதீ³ஹி பித³ஹாபேத்வா உட்டி²தே அருணே விவராபேந்தஸ்ஸபி அனாபத்தி ப⁴வேய்யா’’தி வுத்தம். சதுஸாலம் ஏகூபசாரம் ஹோதீதி ஸம்ப³ந்தோ⁴. தேஸம் பயோகே³ பயோகே³ பி⁴க்கு²ஸ்ஸ ஆபத்தீதி ஏத்த² கேசி ‘‘அனுட்ட²ஹனேன அகிரியஸமுட்டா²னா ஆபத்தி வுத்தா, தஸ்மிம் க²ணே நித்³தா³யந்தஸ்ஸ கிரியாபா⁴வா. இத³ஞ்ஹி ஸிக்கா²பத³ம் ஸியா கிரியாய, ஸியா அகிரியாய ஸமுட்டா²தி. கிரியாய ஸமுட்டா²னதா சஸ்ஸ தப்³ப³ஹுலவஸேன வுத்தா’’தி வத³ந்தி. ‘‘யதா² சேதம், ஏவம் தி³வாஸயனம்பி. அனுட்ட²ஹனேன, ஹி த்³வாராஸம்வரணேன சேதம் அகிரியஸமுட்டா²னம்பி ஹோதீ’’தி வத³ந்தி, இத³ஞ்ச யுத்தம் விய தி³ஸ்ஸதி, வீமம்ஸித்வா க³ஹேதப்³ப³ம்.

80. உபரிமதலேன ஸத்³தி⁴ம் அஸம்ப³த்³த⁴பி⁴த்திகஸ்ஸாதி இத³ம் ஸம்ப³த்³த⁴பி⁴த்திகே வத்தப்³ப³மேவ நத்தீ²தி த³ஸ்ஸனத்த²ம் வுத்தம். உபரிமதலே ஸயிதஸ்ஸ ஸங்கா ஏவ நத்தீ²தி ‘‘ஹேட்டா²பாஸாதே³’’திஆதி³ வுத்தம். நானூபசாரேதி யத்த² ப³ஹி நிஸ்ஸேணிம் கத்வா உபரிமதலம் ஆரோஹந்தி, தாதி³ஸம் ஸந்தா⁴ய வுத்தம் ‘‘உபரிமதலேபீ’’தி. ஆகாஸங்க³ணே நிபஜ்ஜந்தஸ்ஸ ஆபத்திஅபா⁴வதோ ‘‘ச²த³னப்³ப⁴ந்தரே’’தி வுத்தம். ஸபா⁴ஸங்கே²பேனாதி ஸபா⁴காரேன. அட்³ட⁴குட்டகே ஸேனாஸனேதி ஏத்த² ‘‘அட்³ட⁴குட்டகம் நாம யத்த² உபட்³ட⁴ம் முஞ்சித்வா தீஸு பஸ்ஸேஸு பி⁴த்தியோ ப³த்³தா⁴ ஹோந்தி, யத்த² வா ஏகஸ்மிம் பஸ்ஸே பி⁴த்திம் உட்டா²பேத்வா உபோ⁴ஸு பஸ்ஸேஸு உபட்³ட⁴ம் உபட்³ட⁴ம் கத்வா பி⁴த்தியோ உட்டா²பேந்தி, தாதி³ஸம் ஸேனாஸன’’ந்தி தீஸுபி க³ண்டி²பதே³ஸு வுத்தம், க³ண்டி²பதே³ பன ‘‘அட்³ட⁴குட்டகேதி ச²த³னம் அட்³டே⁴ன அஸம்பத்தகுட்டகே’’தி வுத்தம், தம்பி நோ ந யுத்தம். விமதிவினோத³னியம் பன ‘‘ஸபா⁴ஸங்கே²பேனாதி வுத்தஸ்ஸேவ அட்³ட⁴குட்டகேதி இமினா ஸண்டா²னம் த³ஸ்ஸேதி. யத்த² தீஸு, த்³வீஸு வா பஸ்ஸேஸு பி⁴த்தியோ ப³த்³தா⁴, ச²த³னம் வா அஸம்பத்தா அட்³ட⁴பி⁴த்தி, இத³ம் அட்³ட⁴குட்டகம் நாமா’’தி வுத்தம். வாளஸங்கா⁴டோ நாம பரிக்கே²பஸ்ஸ அந்தோ த²ம்பா⁴தீ³னம் உபரி வாளரூபேஹி கதஸங்கா⁴டோ.

பரிக்கே²பஸ்ஸ ப³ஹி க³தேதி ஏத்த² யத்த² யஸ்மிம் பஸ்ஸே பரிக்கே²போ நத்தி², தத்தா²பி பரிக்கே²பாரஹபதே³ஸதோ ப³ஹி க³தே அனாபத்தியேவாதி த³ட்ட²ப்³ப³ம். விமதிவினோத³னியம் (வி. வி. டீ. பாசித்திய 2.50-51) பன ‘‘பரிக்கே²பஸ்ஸ ப³ஹி க³தேதி ஏத்த² யஸ்மிம் பஸ்ஸே பரிக்கே²போ நத்தி², தத்த² ஸசே பூ⁴மிதோ வத்து² உச்சம் ஹோதி, உப⁴தோ உச்சவத்து²தோ ஹேட்டா² பூ⁴மியம் நிப்³ப³கோஸப்³ப⁴ந்தரேபி அனாபத்தி ஏவ தத்த² ஸேனாஸனவோஹாராபா⁴வதோ. அத² வத்து² நீசம் பூ⁴மிஸமமேவ ஸேனாஸனஸ்ஸ ஹேட்டி²மதலே திட்ட²தி, தத்த² பரிக்கே²பரஹிததி³ஸாய நிப்³ப³கோஸப்³ப⁴ந்தரே ஸப்³ப³த்த² ஆபத்தி ஹோதி, பரிச்சே²தா³பா⁴வதோ பரிக்கே²பஸ்ஸ ப³ஹி ஏவ அனாபத்தீதி த³ட்ட²ப்³ப³’’ந்தி வுத்தம். அபரிச்சி²ன்னக³ப்³பூ⁴பசாரேதி ஏத்த² மஜ்ஜே² விவடங்க³ணவந்தாஸு மஹாசதுஸாலாஸு யதா² ஆகாஸங்க³ணம் அனோதரித்வா பமுகே²னேவ க³ந்த்வா ஸப்³ப³க³ப்³பே⁴ பவிஸிதும் ந ஸக்கா ஹோதி, ஏவம் ஏகேகக³ப்³ப⁴ஸ்ஸ த்³வீஸு பஸ்ஸேஸு குட்டம் நீஹரித்வா கதம் பரிச்சி²ன்னக³ப்³பூ⁴பசாரம் நாம, இத³ம் பன தாதி³ஸம் ந ஹோதீதி ‘‘அபரிச்சி²ன்னக³ப்³பூ⁴பசாரே’’தி வுத்தம். ஸப்³ப³க³ப்³பே⁴பி பவிஸந்தீதி க³ப்³பூ⁴பசாரஸ்ஸ அபரிச்சி²ன்னத்தா ஆகாஸங்க³ணம் அனோதரித்வாபி பமுகே²னேவ க³ந்த்வா தம் தம் க³ப்³ப⁴ம் பவிஸந்தி. அத² குதோ தஸ்ஸ பரிக்கே²போயேவ ஸப்³ப³பரிச்சி²ன்னத்தாதி வுத்தந்தி ஆஹ ‘‘க³ப்³ப⁴பரிக்கே²போயேவ ஹிஸ்ஸ பரிக்கே²போ’’தி, இத³ஞ்ச ஸமந்தா க³ப்³ப⁴பி⁴த்தியோ ஸந்தா⁴ய வுத்தம். சதுஸாலவஸேன ஹி ஸன்னிவிட்டே² ஸேனாஸனே க³ப்³ப⁴பமுக²ம் விஸும் அபரிக்கி²த்தம்பி ஸமந்தா டி²தம் க³ப்³ப⁴பி⁴த்தீனம் வஸேன பரிக்கி²த்தம் நாம ஹோதி.

81. ஏகதி³ஸாய உஜுகமேவ தீ³க⁴ம் கத்வா ஸன்னிவேஸிதோ பாஸாதோ³ ஏகஸாலஸன்னிவேஸோ. த்³வீஸு தீஸு சதூஸு வா தி³ஸாஸு ஸிங்கா⁴டகஸண்டா²னாதி³வஸேன கதா த்³விஸாலாதி³ஸன்னிவேஸா வேதி³தப்³பா³. ஸாலப்பபே⁴த³தீ³பனமேவ சேத்த² புரிமதோ விஸேஸோதி. அட்ட² பாசித்தியானீதி உபட்³ட⁴ச்ச²ன்னம் உபட்³ட⁴பரிச்ச²ன்னம் ஸேனாஸனம் து³க்கடவத்து²ஸ்ஸ ஆதி³ம் கத்வா பாளியம் த³ஸ்ஸிதத்தா ததோ அதி⁴கம் ஸப்³ப³ச்ச²ன்னஉபட்³ட⁴பரிச்ச²ன்னாதி³கம்பி ஸப்³ப³ம் பாளியம் அவுத்தம்பி பாசித்தியஸ்ஸேவ வத்து²பா⁴வேன த³ஸ்ஸிதம் ஸிக்கா²பத³ஸ்ஸ பண்ணத்திவஜ்ஜத்தா, க³ருகே டா²தப்³ப³தோ சாதி வேதி³தப்³ப³ம். ‘‘ஸத்த பாசித்தியானீ’’தி பாளியம் வுத்தபாசித்தியத்³வயம் ஸாமஞ்ஞதோ ஏகத்தேன க³ஹேத்வா வுத்தம். பாளியம் (பாசி. 54) ‘‘ததியாய ரத்தியா புராருணா நிக்க²மித்வா புன ஸயதீ’’தி இத³ம் உக்கட்ட²வஸேன வுத்தம், அனிக்க²மித்வா புராருணா உட்ட²ஹித்வா அந்தோச²த³னே நிஸின்னஸ்ஸாபி புன தி³வஸே ஸஹஸேய்யேன அனாபத்தி ஏவ. ஏத்த² சதுபா⁴கோ³ சூளகம், த்³வேபா⁴கா³ உபட்³ட⁴ம், தீஸு பா⁴கே³ஸு த்³வே பா⁴கா³ யேபு⁴ய்யந்தி இமினா லக்க²ணேன சூளகச்ச²ன்னபரிச்ச²ன்னாதீ³னி வேதி³தப்³பா³னி. இதா³னி து³தியஸிக்கா²பதே³பி யதா²வுத்தனயம் அதிதி³ஸந்தோ ‘‘மாதுகா³மேன…பே… அயமேவ வினிச்ச²யோ’’தி ஆஹ. ‘‘மதித்தி²யா பாராஜிகவத்து²பூ⁴தாயபி அனுபாதி³ன்னபக்கே² டி²தத்தா ஸஹஸேய்யாபத்திம் ந ஜனேதீ’’தி வத³ந்தி. ‘‘அத்த²ங்க³தே ஸூரியே மாதுகா³மே நிபன்னே நிபஜ்ஜதி, ஆபத்தி பாசித்தியஸ்ஸா’’தி (பாசி. 57) வசனதோ தி³வா தஸ்ஸ ஸயந்தஸ்ஸ ஸஹஸேய்யாபத்தி ந ஹோதியேவாதி த³ட்ட²ப்³ப³ம்.

இதி வினயஸங்க³ஹஸம்வண்ணனாபூ⁴தே வினயாலங்காரே

ஸஹஸேய்யவினிச்ச²யகதா²லங்காரோ நாம

ஸோளஸமோ பரிச்சே²தோ³.