14. பத²வீக²ணனவினிச்ச²யகதா²

72. ஏவம் தா³னவிஸ்ஸாஸக்³கா³ஹலாப⁴பரிணாமனவினிச்ச²யம் கதே²த்வா இதா³னி பத²வீவினிச்ச²யம் கதே²தும் ‘‘பத²வீ’’த்யாதி³மாஹ. தத்த² பத்த²ரதீதி பத²வீ, ப-புப்³ப³ த²ர ஸந்த²ரணேதி தா⁴து, ர-காரஸ்ஸ வ-காரோ, ஸஸம்பா⁴ரபத²வீ. தப்பபே⁴த³மாஹ ‘‘த்³வே பத²வீ, ஜாதா ச பத²வீ அஜாதா ச பத²வீ’’தி. தாஸம் விஸேஸம் த³ஸ்ஸேதும் ‘‘தத்த² ஜாதா நாம பத²வீ’’த்யாதி³மாஹ. தத்த² ஸுத்³த⁴பம்ஸுகா…பே… யேபு⁴ய்யேனமத்திகாபத²வீ ஜாதா நாம பத²வீ ஹோதி. ந கேவலம் ஸாயேவ, அத³ட்³டா⁴ பத²வீபி ‘‘ஜாதா பத²வீ’’தி வுச்சதி. ந கேவலம் இமா த்³வேயேவ, யோபி பம்ஸுபுஞ்ஜோ வா…பே… சாதுமாஸம் ஓவட்டோ², ஸோபி ‘‘ஜாதா பத²வீ’’தி வுச்சதீதி யோஜனா. இதரத்ரபி ஏஸேவ நயோ.

தத்த² ஸுத்³தா⁴ பம்ஸுகாயேவ ஏத்த² பத²வியா அத்தி², ந பாஸாணாத³யோதி ஸுத்³த⁴பம்ஸுகா. ததா² ஸுத்³த⁴மத்திகா. அப்பா பாஸாணா ஏத்தா²தி அப்பபாஸாணா. இதரேஸுபி ஏஸேவ நயோ. யேபு⁴ய்யேன பம்ஸுகா ஏத்தா²தி யேபு⁴ய்யேனபம்ஸுகா, அலுத்தஸமாஸோயம், ததா² யேபு⁴ய்யேனமத்திகா. தத்த² முட்டி²ப்பமாணதோ உபரி பாஸாணா. முட்டி²ப்பமாணா ஸக்க²ரா. கத²லாதி கபாலக²ண்டா³தி³. மரும்பாதி கடஸக்க²ரா. வாலுகா வாலுகாயேவ. யேபு⁴ய்யேனபம்ஸுகாதி ஏத்த² தீஸு கோட்டா²ஸேஸு த்³வே கோட்டா²ஸா பம்ஸு, ஏகோ பாஸாணாதீ³ஸு அஞ்ஞதரகோட்டா²ஸோ. அத³ட்³டா⁴பீதி உத்³த⁴னபத்தபசனகும்ப⁴காராதபாதி³வஸேன ததா² ததா² அத³ட்³டா⁴, ஸா பன விஸும் நத்தி², ஸுத்³த⁴பம்ஸுஆதீ³ஸு அஞ்ஞதராவாதி வேதி³தப்³பா³. யேபு⁴ய்யேனஸக்க²ராதி ப³ஹுதரஸக்க²ரா. ஹத்தி²குச்சி²யம் கிர ஏகம் பச்சி²பூரம் ஆஹராபேத்வா தோ³ணியம் தோ⁴வித்வா பத²வியா யேபு⁴ய்யேனஸக்க²ரபா⁴வம் ஞத்வா ஸயம் பி⁴க்கூ² போக்க²ரணிம் க²ணிம்ஸூதி. யானி பன மஜ்ஜே² ‘‘அப்பபம்ஸுஅப்பமத்திகா’’தி த்³வே பதா³னி, தானி யேபு⁴ய்யேனபாஸாணாதி³பஞ்சகமேவ பவிஸந்தி. தேஸஞ்ஞேவ ஹி த்³வின்னம் பபே⁴த³வசனமேதம், யதி³த³ம் ஸுத்³த⁴பாஸாணாதி³ஆதி³.

ஏத்த² ச கிஞ்சாபி யேபு⁴ய்யேனபம்ஸும் அப்பபம்ஸுஞ்ச பத²விம் வத்வா உபட்³ட⁴பம்ஸுகாபத²வீ ந வுத்தா, ததா²பி பண்ணத்திவஜ்ஜஸிக்கா²பதே³ஸு ஸாவஸேஸபஞ்ஞத்தியாபி ஸம்ப⁴வதோ உபட்³ட⁴பம்ஸுகாயபி பத²வியா பாசித்தியமேவாதி க³ஹேதப்³ப³ம். கேசி பன ‘‘ஸப்³ப³ச்ச²ன்னாதீ³ஸு உபட்³ட⁴ச்ச²ன்னே து³க்கடஸ்ஸ வுத்தத்தா இதா⁴பி து³க்கடம் யுஜ்ஜதீ’’தி வத³ந்தி, தம் ந யுத்தம் பாசித்தியவத்து²கஞ்ச அனாபத்திவத்து²கஞ்ச து³வித⁴ம் பத²விம் ட²பேத்வா அஞ்ஞிஸ்ஸா து³க்கடவத்து²காய ததியாய பத²வியா அபா⁴வதோ. த்³வேயேவ ஹி பத²வியோ வுத்தா ‘‘ஜாதா ச பத²வீ அஜாதா ச பத²வீ’’தி, தஸ்மா த்³வீஸு அஞ்ஞதராய பத²வியா ப⁴விதப்³ப³ம். வினயவினிச்ச²யே ச ஸம்பத்தே க³ருகலஹுகேஸு க³ருகேயேவ டா²தப்³ப³த்தா ந ஸக்கா ஏத்த² அனாபத்தியா ப⁴விதும். ஸப்³ப³ச்ச²ன்னாதீ³ஸு பன உபட்³டே⁴ து³க்கடம் யுத்தம் தத்த² தாதி³ஸஸ்ஸ து³க்கடவத்து²னோ ஸம்ப⁴வதோ. விமதிவினோத³னியம்பி (வி. வி. டீ. பாசித்திய 2.86) ‘‘அப்பபம்ஸுமத்திகாய பத²வியா அனாபத்திவத்து²பா⁴வேன வுத்தத்தா உபட்³ட⁴பம்ஸுமத்திகாயபி பாசித்தியமேவாதி க³ஹேதப்³ப³ம். ந ஹேதம் து³க்கடவத்தூ²தி ஸக்கா வத்தும் ஜாதாஜாதவினிமுத்தாய ததியாய பத²வியா அபா⁴வதோ’’தி வுத்தம்.

க²ணந்தஸ்ஸ க²ணாபேந்தஸ்ஸ வாதி அந்தமஸோ பாத³ங்கு³ட்ட²கேனபி ஸம்மஜ்ஜனிஸலாகாயபி ஸயம் வா க²ணந்தஸ்ஸ அஞ்ஞேன வா க²ணாபேந்தஸ்ஸ. ‘‘போக்க²ரணிம் க²ணா’’தி வத³தி, வட்டதீதி ‘‘இமஸ்மிம் ஓகாஸே’’தி அனியமேத்வா வுத்தத்தா வட்டதி. ‘‘இமம் வல்லிம் க²ணா’’தி வுத்தேபி பத²விக²ணனம் ஸந்தா⁴ய பவத்தவோஹாரத்தா இமினாவ ஸிக்கா²பதே³ன பாசித்தியம், ந பூ⁴தகா³மஸிக்கா²பதே³ன, உப⁴யம்பி ஸந்தா⁴ய வுத்தே பன த்³வேபி பாசித்தியானி ஹோந்தி.

73. குடேஹீதி க⁴டேஹி. தனுககத்³த³மோதி உத³கமிஸ்ஸககத்³த³மோ, ஸோ ச உத³கக³திகத்தா வட்டதி. உத³கபப்படகோதி உத³கே அந்தோபூ⁴மியம் பவிட்டே² தஸ்ஸ உபரிபா⁴க³ம் சா²தே³த்வா தனுகபம்ஸு வா மத்திகா வா படலம் ஹுத்வா பலவமானா உட்டா²தி, தஸ்மிம் உத³கே ஸுக்கே²பி தம் படலம் வாதேன சலமானம் திட்ட²தி, தம் உத³கபப்படகோ நாம. ஓமகசாதுமாஸந்தி ஊனசாதுமாஸம். ஓவட்ட²ந்தி தே³வேன ஓவட்ட²ம். அகதபப்³பா⁴ரேதி அவலஞ்ஜனட்டா²னத³ஸ்ஸனத்த²ம் வுத்தம். தாதி³ஸே ஹி வம்மிகஸ்ஸ ஸப்³பா⁴வோதி. மூஸிகுக்குரம் நாம மூஸிகாஹி க²ணித்வா ப³ஹி கதபம்ஸுராஸி.

ஏஸேவ நயோதி ஓமகசாதுமாஸம் ஓவட்டோ²யேவ வட்டதீதி அத்தோ². ஏகதி³வஸம்பி ந வட்டதீதி ஓவட்ட²சாதுமாஸதோ ஏகதி³வஸாதிக்கந்தோபி விகோபேதும் ந வட்டதி. ஹேட்ட²பூ⁴மிஸம்ப³ந்தே⁴பி ச கோ³கண்டகே பூ⁴மிதோ சி²ந்தி³த்வா சி²ந்தி³த்வா உக்³க³தத்தா அச்சுக்³க³தம் மத்த²கதோ சி²ந்தி³தும் க³ஹேதுஞ்ச வட்டதீதி வத³ந்தி. ஸகட்டா²னே அதிட்ட²மானம் கத்வா பாதே³ஹி மத்³தி³த்வா ஆலோளிதகத்³த³மம்பி க³ஹேதும் வட்டதி.

அச்ச²த³னந்திஆதி³னா வுத்தத்தா உஜுகம் ஆகாஸதோ பதிதவஸ்ஸோத³கேன ஓவட்ட²மேவ ஜாதபத²வீ ஹோதி, ந ச²த³னாதீ³ஸு பதித்வா ததோ பவத்தஉத³கேன திந்தந்தி வேதி³தப்³ப³ம். ததோதி புராணஸேனாஸனதோ. இட்ட²கம் க³ண்ஹாமீதிஆதி³ ஸுத்³த⁴சித்தம் ஸந்தா⁴ய வுத்தம். ‘‘உத³கேனாதி உஜுகம் ஆகாஸதோயேவ பதிதஉத³கேன. ஸசே பன அஞ்ஞத்த² பஹரித்வா பதிதேன உத³கேன தேமிதம் ஹோதி, வட்டதீ’’தி வத³ந்தி. மண்ட³பத்த²ம்ப⁴ந்தி ஸாகா²மண்ட³பத்த²ம்ப⁴ம்.

74. உச்சாலேத்வாதி உக்கி²பித்வா. தேன அபதே³ஸேனாதி தேன லேஸேன. அவிஸயத்தா அனாபத்தீதி ஏத்த² ஸசேபி நிப்³பா³பேதும் ஸக்கா ஹோதி, பட²மம் ஸுத்³த⁴சித்தேன தி³ன்னத்தா த³ஹதூதி ஸல்லக்கே²த்வாபி திட்ட²தி, அனாபத்தி. மஹாமத்திகந்தி பி⁴த்திலேபனம்.

இதி வினயஸங்க³ஹஸம்வண்ணனாபூ⁴தே வினயாலங்காரே

பத²வீக²ணனவினிச்ச²யகதா²லங்காரோ நாம

சுத்³த³ஸமோ பரிச்சே²தோ³.