13. தா³னலக்க²ணாதி³வினிச்ச²யகதா²

69. ஏவம் ரூபியாதி³படிக்³க³ஹணவினிச்ச²யம் கதே²த்வா இதா³னி தா³னவிஸ்ஸாஸக்³கா³ஹலாப⁴பரிணாமனவினிச்ச²யம் கதே²தும் ‘‘தா³னவிஸ்ஸாஸக்³கா³ஹேஹீ’’திஆதி³மாஹ. தத்த² தீ³யதே தா³னம், சீவராதி³வத்து²ம் ஆரம்மணம் கத்வா பவத்தோ அலோப⁴ப்பதா⁴னோ காமாவசரகுஸலகிரியசித்துப்பாதோ³. ஸஸனம் ஸாஸோ, ஸஸு ஹிம்ஸாயந்தி தா⁴து, ஹிம்ஸனந்தி அத்தோ², விக³தோ ஸாஸோ ஏதஸ்மா கா³ஹாதி விஸ்ஸாஸோ. க³ஹணம் கா³ஹோ, விஸ்ஸாஸேன கா³ஹோ விஸ்ஸாஸக்³கா³ஹோ. விஸேஸனே சேத்த² கரணவசனம், விஸ்ஸாஸவஸேன கா³ஹோ, ந தே²ய்யசித்தவஸேனாதி அத்தோ². லச்ச²தேதி லாபோ⁴, சீவராதி³வத்து², தஸ்ஸ லாப⁴ஸ்ஸ. பரிணமியதே பரிணாமனம், அஞ்ஞேஸம் அத்தா²ய பரிணதஸ்ஸ அத்தனோ, அஞ்ஞஸ்ஸ வா பரிணாமனம், தா³பனந்தி அத்தோ². தா³னவிஸ்ஸாஸக்³கா³ஹேஹி லாப⁴ஸ்ஸ பரிணாமனந்தி ஏத்த² உத்³தே³ஸே ஸமபி⁴னிவிட்ட²ஸ்ஸ ‘‘தா³ன’’ந்தி பத³ஸ்ஸ அத்த²வினிச்ச²யோ தாவ பட²மம் ஏவம் வேதி³தப்³போ³தி யோஜனா. அத்தனோ ஸந்தகஸ்ஸ சீவராதி³பரிக்கா²ரஸ்ஸ தா³னந்தி ஸம்ப³ந்தோ⁴. யஸ்ஸ கஸ்ஸசீதி ஸம்பதா³னனித்³தே³ஸோ, யஸ்ஸ கஸ்ஸசி படிக்³கா³ஹகஸ்ஸாதி அத்தோ².

யதி³த³ம் ‘‘தா³ன’’ந்தி வுத்தம், தத்த² கிம் லக்க²ணந்தி ஆஹ ‘‘தத்ரித³ம் தா³னலக்க²ண’’ந்தி. ‘‘இத³ம் துய்ஹம் தே³மீ’’தி வத³தீதி இத³ம் திவங்க³ஸம்பன்னம் தா³னலக்க²ணம் ஹோதீதி யோஜனா. தத்த² இத³ந்தி தே³ய்யத⁴ம்மனித³ஸ்ஸனம். துய்ஹந்தி படிக்³கா³ஹகனித³ஸ்ஸனம். தே³மீதி தா³யகனித³ஸ்ஸனம். த³தா³மீதிஆதீ³னி பன பரியாயவசனானி. வுத்தஞ்ஹி ‘‘தே³ய்யதா³யகபடிக்³கா³ஹகா விய தா³னஸ்ஸா’’தி, ‘‘திண்ணம் ஸம்முகீ²பா⁴வா குஸலம் ஹோதீ’’தி ச. ‘‘வத்து²பரிச்சாக³லக்க²ணத்தா தா³னஸ்ஸா’’தி இத³ம் பன ஏகதே³ஸலக்க²ணகத²னமேவ, கிம் ஏவம் தீ³யமானம் ஸம்முகா²யேவ தி³ன்னம் ஹோதி, உதா³ஹு பரம்முகா²பீதி ஆஹ ‘‘ஸம்முகா²பி பரம்முகா²பி தி³ன்னம்யேவ ஹோதீ’’தி. துய்ஹம் க³ண்ஹாஹீதிஆதீ³ஸு அயமத்தோ² – ‘‘க³ண்ஹாஹீ’’தி வுத்தே ‘‘தே³மீ’’தி வுத்தஸதி³ஸம் ஹோதி, தஸ்மா முக்²யதோ தி³ன்னத்தா ஸுதி³ன்னம் ஹோதி, ‘‘க³ண்ஹாமீ’’தி ச வுத்தே முக்²யதோ க³ஹணம் ஹோதி, தஸ்மா ஸுக்³க³ஹிதம் ஹோதி. ‘‘துய்ஹம் மய்ஹ’’ந்தி இமானி பன படிக்³கா³ஹகபடிப³ந்த⁴தாகரணே வசனானி. தவ ஸந்தகம் கரோஹீதிஆதீ³னி பன பரியாயதோ தா³னக்³க³ஹணானி, தஸ்மா து³தி³ன்னம் து³க்³க³ஹிதஞ்ச ஹோதி. லோகே ஹி அபரிச்சஜிதுகாமாபி புன க³ண்ஹிதுகாமாபி ‘‘தவ ஸந்தகம் ஹோதூ’’தி நிய்யாதேந்தி யதா² தம் குஸரஞ்ஞோ மாது ரஜ்ஜனிய்யாதனம். தேனாஹ ‘‘நேவ தா³தா தா³தும் ஜானாதி, ந இதரோ க³ஹேது’’ந்தி. ஸசே பனாதிஆதீ³ஸு பன தா³யகேன பஞ்ஞத்தியம் அகோவித³தாய பரியாயவசனே வுத்தேபி படிக்³கா³ஹகோ அத்தனோ பஞ்ஞத்தியம் கோவித³தாய முக்²யவசனேன க³ண்ஹாதி, தஸ்மா ‘‘ஸுக்³க³ஹித’’ந்தி வுத்தம்.

ஸசே பன ஏகோதிஆதீ³ஸு பன தா³யகோ முக்²யவசனேன தே³தி, படிக்³கா³ஹகோபி முக்²யவசனேன படிக்கி²பதி, தஸ்மா தா³யகஸ்ஸ புப்³பே³ அதி⁴ட்டி²தம்பி சீவரம் தா³னவஸேன அதி⁴ட்டா²னம் விஜஹதி, பரிச்சத்தத்தா அத்தனோ அஸந்தகத்தா அதிரேகசீவரம்பி ந ஹோதி, தஸ்மா த³ஸாஹாதிக்கமேபி ஆபத்தி ந ஹோதி. படிக்³கா³ஹகஸ்ஸபி ந படிக்கி²பிதத்தா அத்தனோ ஸந்தகம் ந ஹோதி, தஸ்மா அதிரேகசீவரம் ந ஹோதீதி த³ஸாஹாதிக்கமேபி ஆபத்தி நத்தி². யஸ்ஸ பன ருச்சதீதி ஏத்த² பன இமஸ்ஸ சீவரஸ்ஸ அஸ்ஸாமிகத்தா பம்ஸுகூலட்டா²னே டி²தத்தா யஸ்ஸ ருச்சதி, தேன பம்ஸுகூலபா⁴வேன க³ஹேத்வா பரிபு⁴ஞ்ஜிதப்³ப³ம், பரிபு⁴ஞ்ஜந்தேன பன தா³யகேன புப்³ப³அதி⁴ட்டி²தம்பி தா³னவஸேன அதி⁴ட்டா²னஸ்ஸ விஜஹிதத்தா புன அதி⁴ட்ட²ஹித்வா பரிபு⁴ஞ்ஜிதப்³ப³ம் இதரேன புப்³பே³ அனதி⁴ட்டி²தத்தாதி த³ட்ட²ப்³ப³ம்.

இத்த²ன்னாமஸ்ஸ தே³ஹீதிஆதீ³ஸு பன ஆணத்யத்தே² பவத்தாய பஞ்சமீவிப⁴த்தியா வுத்தத்தா ஆணத்தேன படிக்³கா³ஹகஸ்ஸ தி³ன்னகாலேயேவ படிக்³கா³ஹகஸ்ஸ ஸந்தகம் ஹோதி, ந ததோ புப்³பே³, புப்³பே³ பன ஆணாபகஸ்ஸேவ, தஸ்மா ‘‘யோ பஹிணதி, தஸ்ஸேவ ஸந்தக’’ந்தி வுத்தம். இத்த²ன்னாமஸ்ஸ த³ம்மீதி பன பச்சுப்பன்னத்தே² பவத்தாய வத்தமானவிப⁴த்தியா வுத்தத்தா ததோ பட்டா²ய படிக்³கா³ஹகஸ்ஸேவ ஸந்தகம் ஹோதி, தஸ்மா ‘‘யஸ்ஸ பஹீயதி, தஸ்ஸ ஸந்தக’’ந்தி வுத்தம். தஸ்மாதி இமினா ஆயஸ்மதா ரேவதத்தே²ரேன ஆயஸ்மதோ ஸாரிபுத்தஸ்ஸ சீவரபேஸனவத்து²ஸ்மிம் ப⁴க³வதா தே³ஸிதேஸு அதி⁴ட்டா²னேஸு இத⁴ வுத்தலக்க²ணேன அஸம்மோஹதோ ஜானிதப்³ப³ந்தி த³ஸ்ஸேதி.

தத்த² த்³வாதி⁴ட்டி²தம், ஸ்வாதி⁴ட்டி²தந்தி ச ந திசீவராதி⁴ட்டா²னம் ஸந்தா⁴ய வுத்தம், அத² கோ² ஸாமிகே ஜீவந்தே விஸ்ஸாஸக்³கா³ஹசீவரபா⁴வேன ச ஸாமிகே மதே மதகசீவரபா⁴வேன ச க³ஹணம் ஸந்தா⁴ய வுத்தம், ததோ பன த³ஸாஹே அனதிக்கந்தேயேவ திசீவராதி⁴ட்டா²னம் வா பரிக்கா²ரசோளாதி⁴ட்டா²னம் வா விகப்பனம் வா காதப்³ப³ம். யோ பஹிணதீதி தா³யகம் ஸந்தா⁴யாஹ, யஸ்ஸ பஹீயதீதி படிக்³கா³ஹகம்.

பரிச்சஜித்வா…பே… ந லப⁴தி, ஆஹராபேந்தோ ப⁴ண்ட³க்³கே⁴ன காரேதப்³போ³தி அத்தோ². அத்தனா…பே… நிஸ்ஸக்³கி³யந்தி இமினா பரஸந்தகபூ⁴தத்தம் ஜானந்தோ தே²ய்யபஸய்ஹவஸேன அச்சி²ந்த³ந்தோ பாராஜிகோ ஹோதீதி த³ஸ்ஸேதி. போராணடீகாயம் பன ‘‘ஸகஸஞ்ஞாய வினா க³ண்ஹந்தோ ப⁴ண்ட³ம் அக்³கா⁴பேத்வா ஆபத்தியா காரேதப்³போ³’’தி வுத்தம். ஸகஸஞ்ஞாய வினாபி தாவகாலிகபம்ஸுகூலஸஞ்ஞாதி³வஸேன க³ண்ஹந்தோ ஆபத்தியா ந காரேதப்³போ³. அட்ட²கதா²யம் பன பஸய்ஹாகாரம் ஸந்தா⁴ய வத³தி. தேனாஹ ‘‘அச்சி²ந்த³தோ நிஸ்ஸக்³கி³ய’’ந்தி. ஸசே பன…பே… வட்டதீதி துட்ட²தா³னம் ஆஹ, அத² பனாதிஆதி³னா குபிததா³னம். உப⁴யதா²பி ஸயம் தி³ன்னத்தா வட்டதி, க³ஹணே ஆபத்தி நத்தீ²தி அத்தோ².

மம ஸந்திகே…பே… ஏவம் பன தா³தும் ந வட்டதீதி வத்து²பரிச்சாக³லக்க²ணத்தா தா³னஸ்ஸ ஏவம் த³த³ந்தோ அபரிச்சஜித்வா தி³ன்னத்தா தா³னம் ந ஹோதீதி ந வட்டதி, ததோ ஏவ து³க்கடம் ஹோதி. ஆஹராபேதும் பன வட்டதீதி புப்³பே³ ‘‘அகரோந்தஸ்ஸ ந தே³மீ’’தி வுத்தத்தா யதா²வுத்தஉபஜ்ஜா²யக்³க³ஹணாதீ³னி அகரோந்தே ஆசரியஸ்ஸேவ ஸந்தகம் ஹோதீதி கத்வா வுத்தம். கரோந்தே பன அந்தேவாஸிகஸ்ஸ ஸந்தகம் ப⁴வேய்ய ஸப்³ப³ஸோ அபரிச்சஜித்வா தி³ன்னத்தா. ஸகஸஞ்ஞாய விஜ்ஜமானத்தா ‘‘ஆஹராபேதும் வட்டதீ’’தி வுத்தம் ஸியா. டீகாயம் (ஸாரத்த². டீ. 2.635) பன ‘‘ஏவம் தி³ன்னம் ப⁴திஸதி³ஸத்தா ஆஹராபேதும் வட்டதீ’’தி வுத்தம். ப⁴திஸதி³ஸே ஸதிபி கம்மே கதே ப⁴தி லத்³த⁴ப்³பா³ ஹோதி, தஸ்மா ஆரோபேதும் ந வட்டேய்ய. விமதிவினோத³னியம் (வி. வி. டீ. 1.635) பன ‘‘ஆஹராபேதும் வட்டதீதி கம்மே அகதே ப⁴திஸதி³ஸத்தா வுத்த’’ந்தி வுத்தம், தேன கம்மே கதே ஆஹராபேதும் ந வட்டதீதி ஸித்³த⁴ம். உபஜ்ஜ²ம் க³ண்ஹிஸ்ஸதீதி ஸாமணேரஸ்ஸ தா³னம் தீ³பேதி, தேன ச ஸாமணேரகாலே த³த்வா உபஸம்பன்னகாலே அச்சி²ந்த³தோபி பாசித்தியம் தீ³பேதி. அயம் தாவ தா³னே வினிச்ச²யோதி இமினா தா³னவினிச்ச²யாதீ³னம் திண்ணம் வினிச்ச²யானம் ஏகபரிச்சே²த³கதபா⁴வம் தீ³பேதி.

விஸ்ஸாஸக்³கா³ஹலக்க²ணவினிச்ச²யகதா²

70. அனுட்டா²னஸேய்யா நாம யாய ஸேய்யாய ஸயிதோ யாவ ஜீவிதிந்த்³ரியுபச்சே²த³ம் ந பாபுணாதி, தாவ வுச்சதி. த³த³மானேன ச மதகத⁴னம் தாவ யே தஸ்ஸ த⁴னே இஸ்ஸரா க³ஹட்டா² வா பப்³ப³ஜிதா வா, தேஸம் தா³தப்³ப³ந்தி ஏத்த² கே க³ஹட்டா² கே பப்³ப³ஜிதா கேன காரணேன தஸ்ஸ த⁴னே இஸ்ஸராதி? க³ஹட்டா² தாவ கி³லானுபட்டா²கபூ⁴தா தேன காரணேன கி³லானுபட்டா²கபா⁴க³பூ⁴தே தஸ்ஸ த⁴னே இஸ்ஸரா, யேஸஞ்ச வாணிஜானம் ஹத்த²தோ கப்பியகாரகேன பத்தாதி³பரிக்கா²ரோ கா³ஹாபிதோ, தேஸம் யம் தா³தப்³ப³மூலம், தே ச தஸ்ஸ த⁴னே இஸ்ஸரா, யேஸஞ்ச மாதாபிதூனம் அத்தா²ய பரிச்சி²ந்தி³த்வா வத்தா²னி ட²பிதானி, தேபி தஸ்ஸ த⁴னஸ்ஸ இஸ்ஸரா. ஏவமாதி³னா யேன யேன காரணேன யம் யம் பரிக்கா²ரத⁴னம் யேஹி யேஹி க³ஹட்டே²ஹி லபி⁴தப்³ப³ம் ஹோதி, தேன தேன காரணேன தே தே க³ஹட்டா² தஸ்ஸ தஸ்ஸ த⁴னஸ்ஸ இஸ்ஸரா.

பப்³ப³ஜிதா பன பா³ஹிரகா ததே²வ ஸதி காரணே இஸ்ஸரா. பஞ்சஸு பன ஸஹத⁴ம்மிகேஸு பி⁴க்கூ² ஸாமணேரா ச மதானம் பி⁴க்கு²ஸாமணேரானம் த⁴னம் வினாபி காரணேன தா³யாத³பா⁴வேன லப⁴ந்தி, ந இதரா. பி⁴க்கு²னீஸிக்க²மானஸாமணேரீனம்பி த⁴னம் தாயேவ லப⁴ந்தி, ந இதரே. தம் பன மதகத⁴னபா⁴ஜனம் சதுபச்சயபா⁴ஜனவினிச்ச²யே ஆவி ப⁴விஸ்ஸதி, ப³ஹூ பன வினயத⁴ரத்தே²ரா ‘‘யே தஸ்ஸ த⁴னஸ்ஸ இஸ்ஸரா க³ஹட்டா² வா பப்³ப³ஜிதா வா’’தி பாட²ம் நிஸ்ஸாய ‘‘மதபி⁴க்கு²ஸ்ஸ த⁴னம் க³ஹட்ட²பூ⁴தா ஞாதகா லப⁴ந்தீ’’தி வினிச்சி²னந்தி, தம்பி வினிச்ச²யம் தஸ்ஸ ச யுத்தாயுத்தபா⁴வம் தத்தே²வ வக்கா²ம.

அனத்தமனஸ்ஸ ஸந்தகந்தி ‘‘து³ட்டு² கதம் தயா மயா அதி³ன்னம் மம ஸந்தகம் க³ண்ஹந்தேனா’’தி வசீபே⁴தே³ன வா சித்துப்பாத³மத்தேன வா தோ³மனஸ்ஸப்பத்தஸ்ஸ ஸந்தகம். யோ பன பட²மம்யேவ ‘‘ஸுட்டு² கதம் தயா மம ஸந்தகம் க³ண்ஹந்தேனா’’தி வசீபே⁴தே³ன வா சித்துப்பாத³மத்தேன வா அனுமோதி³த்வா பச்சா² கேனசி காரணேன குபிதோ, பச்சாஹராபேதும் ந லப⁴தி. யோபி அதா³துகாமோ, சித்தேன பன அதி⁴வாஸேதி, ந கிஞ்சி வத³தீதி ஏத்த² து போராணடீகாயம் (ஸாரத்த². டீ. 2.131) ‘‘சித்தேன பன அதி⁴வாஸேதீதி வுத்தமேவத்த²ம் விபா⁴வேதும் ‘ந கிஞ்சி வத³தீ’தி வுத்த’’ந்தி வுத்தம். ஏவம் ஸதி ‘‘சித்தேனா’’தி இத³ம் அதி⁴வாஸனகிரியாய கரணம் ஹோதி. அதா³துகாமோதி ஏத்தா²பி தமேவ கரணம் ஸியா, ததோ ‘‘சித்தேன அதா³துகாமோ, சித்தேன அதி⁴வாஸேதீ’’திவசனம் ஓசித்யஸம்போஸகம் ந ப⁴வேய்ய. தம் ட²பேத்வா ‘‘அதா³துகாமோ’’தி ஏத்த² காயேனாதி வா வாசாயாதி வா அஞ்ஞம் கரணம்பி ந ஸம்ப⁴வதி, தத³ஸம்ப⁴வே ஸதி விஸேஸத்த²வாசகோ பன-ஸத்³தோ³பி நிரத்த²கோ. ந கிஞ்சி வத³தீதி ஏத்த² து வத³னகிரியாய கரணம் ‘‘வாசாயா’’தி பத³ம் இச்சி²தப்³ப³ம், ததா² ச ஸதி அஞ்ஞம் அதி⁴வாஸனகிரியாய கரணம், அஞ்ஞம் வத³னகிரியாய கரணம், அஞ்ஞா அதி⁴வாஸனகிரியா, அஞ்ஞா வத³னகிரியா, தஸ்மா ‘‘வுத்தமேவத்த²ம் விபா⁴வேது’’ந்தி வத்தும் ந அரஹதி, தஸ்மா யோபி சித்தேன அதா³துகாமோ ஹோதி, பன ததா²பி வாசாய அதி⁴வாஸேதி, ந கிஞ்சி வத³தீதி யோஜனம் கத்வா பன ‘‘அதி⁴வாஸேதீதி வுத்தமேவத்த²ம் பகாஸேதும் ந கிஞ்சி வத³தீதி வுத்த’’ந்தி வத்துமரஹதி. ஏத்த² து பன-ஸத்³தோ³ அருசிலக்க²ணஸூசனத்தோ². ‘‘சித்தேனா’’தி இத³ம் அதா³துகாமகிரியாய கரணம், ‘‘வாசாயா’’தி அதி⁴வாஸனகிரியாய அவத³னகிரியாய ச கரணம். அதி⁴வாஸனகிரியா ச அவத³னகிரியாயேவ. ‘‘அதி⁴வாஸேதீ’’தி வுத்தே அவத³னகிரியாய அபாகடபா⁴வதோ தம் பகாஸேதும் ‘‘ந கிஞ்சி வத³தீ’’தி வுத்தம், ஏவம் க³ய்ஹமானே புப்³பா³பரவசனத்தோ² ஓசித்யஸம்போஸகோ ஸியா, தஸ்மா ஏத்தகவிவரேஹி விசாரேத்வா க³ஹேதப்³போ³தி.

லாப⁴பரிணாமனவினிச்ச²யகதா²

71. லாப⁴பரிணாமனவினிச்ச²யே தும்ஹாகம் ஸப்பிஆதீ³னி ஆப⁴தானீதி தும்ஹாகம் அத்தா²ய ஆப⁴தானி ஸப்பிஆதீ³னி. பரிணதபா⁴வம் ஜானித்வாபி வுத்தவிதி⁴னா விஞ்ஞாபேந்தேன தேஸம் ஸந்தகமேவ விஞ்ஞாபிதம் நாம ஹோதீதி ஆஹ ‘‘மய்ஹம்பி தே³தா²தி வத³தி, வட்டதீ’’தி.

‘‘புப்ப²ம்பி ஆரோபேதும் ந வட்டதீதி இத³ம் பரிணதம் ஸந்தா⁴ய வுத்தம், ஸசே பன ஏகஸ்மிம் சேதியே பூஜிதம் புப்ப²ம் க³ஹேத்வா அஞ்ஞஸ்மிம் சேதியே பூஜேதி, வட்டதீ’’தி ஸாரத்த²தீ³பனியம் (ஸாரத்த². டீ. 2.660) வுத்தம். அட்ட²கதா²யம் (பாரா. அட்ட². 2.660) பன நியமேத்வா ‘‘அஞ்ஞஸ்ஸ சேதியஸ்ஸ அத்தா²ய ரோபிதமாலாவச்ச²தோ’’தி வுத்தத்தா ந கேவலம் பரிணதபா⁴வோயேவ கதி²தோ, அத² கோ² நியமேத்வா ரோபிதபா⁴வோபி. புப்ப²ம்பீதி பி-ஸத்³தே³ன குதோ மாலாவச்ச²ந்தி த³ஸ்ஸேதி. விமதிவினோத³னியம் (வி. வி. டீ. 1.660) பன ‘‘ரோபிதமாலாவச்ச²தோதி கேனசி நியமேத்வா ரோபிதம் ஸந்தா⁴ய வுத்தம், அனோசிதம் மிலாயமானம் ஓசினித்வா யத்த² கத்த²சி பூஜேதும் வட்டதீ’’தி வுத்தம். டி²தம் தி³ஸ்வாதி ஸேஸகம் க³ஹேத்வா டி²தம் தி³ஸ்வா. இமஸ்ஸ ஸுனக²ஸ்ஸ மா தே³ஹி, ஏதஸ்ஸ தே³ஹீதி இத³ம் பரிணதேயேவ, திரச்சா²னக³தஸ்ஸ பரிச்சஜித்வா தி³ன்னே பன தம் பலாபேத்வா அஞ்ஞம் பு⁴ஞ்ஜாபேதும் வட்டதி, தஸ்மா ‘‘கத்த² தே³மாதிஆதி³னா ஏகேனாகாரேன அனாபத்தி த³ஸ்ஸிதா. ஏவம் பன அபுச்சி²தேபி ‘அபரிணதம் இத³’ந்தி ஜானந்தேன அத்தனோ ருசியா யத்த² இச்ச²தி, தத்த² தா³பேதும் வட்டதீ’’தி தீஸுபி க³ண்டி²பதே³ஸு வுத்தம். யத்த² இச்ச²த², தத்த² தே³தா²தி ஏத்தா²பி ‘‘தும்ஹாகம் ருசியா’’தி வுத்தத்தா யத்த² இச்ச²தி, தத்த² தா³பேதும் லப⁴தி.

பரிவாரே (பரி. அட்ட². 329) பன நவ அத⁴ம்மிகானி தா³னானீதி ஸங்க⁴ஸ்ஸ பரிணதம் அஞ்ஞஸங்க⁴ஸ்ஸ வா சேதியஸ்ஸ வா புக்³க³லஸ்ஸ வா பரிணாமேதி, சேதியஸ்ஸ பரிணதம் அஞ்ஞசேதியஸ்ஸ வா ஸங்க⁴ஸ்ஸ வா புக்³க³லஸ்ஸ வா பரிணாமேதி, புக்³க³லஸ்ஸ பரிணதம் அஞ்ஞபுக்³க³லஸ்ஸ வா ஸங்க⁴ஸ்ஸ வா சேதியஸ்ஸ வா பரிணாமேதீதி ஏவம் வுத்தானி. நவ படிக்³க³ஹா பரிபோ⁴கா³ சாதி ஏதேஸம்யேவ தா³னானம் படிக்³க³ஹா ச பரிபோ⁴கா³ ச. தீணி த⁴ம்மிகானி தா³னானீதி ஸங்க⁴ஸ்ஸ நின்னம் ஸங்க⁴ஸ்ஸேவ தே³தி, சேதியஸ்ஸ நின்னம் சேதியஸ்ஸேவ தே³தி, புக்³க³லஸ்ஸ நின்னம் புக்³க³லஸ்ஸேவ தே³தீதி இமானி தீணி. படிக்³க³ஹபடிபோ⁴கா³பி தேஸம்யேவ படிக்³க³ஹா ச பரிபோ⁴கா³ சாதி ஆக³தம்.

இதி வினயஸங்க³ஹஸம்வண்ணனாபூ⁴தே வினயாலங்காரே

தா³னலக்க²ணாதி³வினிச்ச²யகதா²லங்காரோ நாம

தேரஸமோ பரிச்சே²தோ³.