12. ரூபியாதி³படிக்³க³ஹணவினிச்ச²யகதா²

59. ஏவம் கயவிக்கயஸமாபத்திவினிச்ச²யம் கதே²த்வா இதா³னி ரூபியாதி³படிக்³க³ஹணவினிச்ச²யம் கதே²ந்தோ ‘‘ரூபியாதி³படிக்³க³ஹோ’’திஆதி³மாஹ. தத்த² ஸஞ்ஞாணத்தா²ய கதம் ரூபம் ஏத்த² அத்தீ²தி ரூபியம், யம் கிஞ்சி வோஹாரூபக³ம் த⁴னம். தேன வுத்தம் ஸமந்தபாஸாதி³காயம் (பாரா. அட்ட². 2.583-584) ‘‘இத⁴ பன யம் கிஞ்சி வோஹாரக³மனீயம் கஹாபணாதி³ அதி⁴ப்பேத’’ந்தி. பட²மம் ஆதீ³யதீதிஆதி³, கிம் தம்? ரூபியம், ரூபியம் ஆதி³ யேஸம் தேதி ரூபியாத³யோ, தா³ஸிதா³ஸகே²த்தவத்து²ஆத³யோ, படிக்³க³ஹணம் படிக்³க³ஹோ, ஸம்படிச்ச²னந்தி அத்தோ². ரூபியாதீ³னம் படிக்³க³ஹோ ரூபியாதி³படிக்³க³ஹோ. ஜாதஸமயே உப்பன்னம் ரூபமேவ ரூபம் அஸ்ஸ ப⁴வதி, ந விகாரமாபஜ்ஜதீதி ஜாதரூபம், ஸுவண்ணம். த⁴வலஸபா⁴வதாய ஸத்தேஹி ரஞ்ஜியதேதி ரஜதம், ஸஜ்ஜு². ஜாதரூபேன கதோ மாஸகோ ஜாதரூபமாஸகோ. ரஜதேன கதோ மாஸகோ ரஜதமாஸகோதி இத³ம் சதுப்³பி³த⁴மேவ நிஸ்ஸக்³கி³யவத்து² ஹோதி, ந லோஹமாஸகாத³யோதி ஆஹ ‘‘தம்ப³லோஹாதீ³ஹி…பே… ஸங்க³ஹிதோ’’தி. தம்ப³லோஹாதீ³ஹீதி ஆதி³-ஸத்³தே³ன கம்ஸலோஹவட்டலோஹதிபுஸீஸாதீ³ஹி கதோபி லோஹமாஸகோயேவாதி த³ஸ்ஸேதி. கிம் இத³மேவ நிஸ்ஸக்³கி³யவத்து² ஹோதி, உதா³ஹு முத்தாத³யோபீதி ஆஹ ‘‘முத்தா…பே… து³க்கடவத்தூ²’’தி. இமேஸம் த்³வின்னம் வத்தூ²னம் கோ விஸேஸோதி ஆஹ ‘‘தத்த² நிஸ்ஸக்³கி³யவத்து²ம்…பே… து³க்கடமேவா’’தி. தத்த² நிஸ்ஸக்³கி³யவத்து² அத்தனோ அத்தா²ய நிஸ்ஸக்³கி³யம் பாசித்தியம், ஸேஸானம் அத்தா²ய து³க்கடம், து³க்கடவத்து² ஸப்³பே³ஸம் அத்தா²ய து³க்கடமேவாதி யோஜனா.

இதா³னி தேஸு வத்தூ²ஸு கப்பியாகப்பியவினிச்ச²யம் வித்தா²ரதோ த³ஸ்ஸேதும் ஆஹ ‘‘தத்ராயம் வினிச்ச²யோ’’தி. தத்த² ஸம்படிச்சி²தும் ந வட்டதி, கஸ்மா? ‘‘இத³ம் ஸங்க⁴ஸ்ஸ த³ம்மீ’’தி அகப்பியவோஹாரேன தி³ன்னத்தா. த³த்வா பக்கமதி, வட்டதி, கஸ்மா? ஸங்க⁴ஸ்ஸ ஹத்தே² அத³த்வா வட்³ட⁴கீஆதீ³னம் ஹத்தே² தி³ன்னத்தா. ஏவம்பி வட்டதி கி³ஹீனம் ஹத்தே² ட²பிதத்தா. படிக்கி²பிதும் ந வட்டதி ஸங்க⁴க³ணபுக்³க³லானம் அனாமஸிதத்தா. ‘‘ந வட்டதீ’’தி படிக்கி²பிதப்³ப³ம் ‘‘தும்ஹே க³ஹேத்வா ட²பேதா²’’தி வுத்தத்தா. படிக்³க³ஹணேபி பரிபோ⁴கே³பி ஆபத்தீதி ‘‘ஸங்க⁴ஸ்ஸ த³ம்மீ’’தி வுத்தத்தா படிக்³க³ஹணே பாசித்தியம், பரிபோ⁴கே³ து³க்கடம். ஸ்வேவ ஸாபத்திகோதி து³க்கடாபத்திம் ஸந்தா⁴ய வத³தி. வத³தி, வட்டதி ‘‘தும்ஹே பச்சயே பரிபு⁴ஞ்ஜதா²’’தி கப்பியவோஹாரேன வுத்தத்தா. சீவரத்தா²ய தி³ன்னம் சீவரேயேவ உபனேதப்³ப³ம், கஸ்மா? யதா² தா³யகா வத³ந்தி, ததா² படிபஜ்ஜிதப்³ப³த்தா. ஸேனாஸனபச்சயஸ்ஸ இதரபச்சயத்தயதோ விஸேஸம் த³ஸ்ஸேந்தோ ‘‘ஸேனாஸனத்தா²யா’’திஆதி³மாஹ. இமினா அவிஸ்ஸஜ்ஜியஅவேப⁴ங்கி³யபா⁴வம் த³ஸ்ஸேதி. ஏவம் ஸந்தேபி ஆபதா³ஸு கத்தப்³ப³விதி⁴ம் த³ஸ்ஸேந்தோ ‘‘ஸசே பனா’’திஆதி³மாஹ.

60. ஏவம் நிஸ்ஸக்³கி³யவத்தூ²ஸு கத்தப்³ப³விதி⁴ம் த³ஸ்ஸேத்வா இதா³னி து³க்கடவத்தூ²ஸு கத்தப்³ப³விதி⁴ம் த³ஸ்ஸேந்தோ ‘‘ஸசே கோசி மய்ஹ’’ந்த்யாதி³மாஹ. ஏத்த² பன படிக்³க³ஹணேபி பரிபோ⁴கே³பி ஆபத்தீதி து³க்கடமேவ ஸந்தா⁴ய வுத்தம். தளாகஸ்ஸபி கே²த்தஸங்க³ஹிதத்தா தஸ்ஸ படிக்³க³ஹணேபி ஆபத்தி வுத்தா. ‘‘சத்தாரோ பச்சயே பரிபு⁴ஞ்ஜதா²தி தே³தீதி ஏத்த² ‘பி⁴க்கு²ஸங்க⁴ஸ்ஸ சத்தாரோ பச்சயே பரிபு⁴ஞ்ஜிதும் தளாகம் த³ம்மீ’தி வா ‘சதுபச்சயபரிபோ⁴க³த்த²ம் தளாகம் த³ம்மீ’தி வா வத³தி, வட்டதியேவ. ‘இதோ தளாகதோ உப்பன்னே பச்சயே த³ம்மீ’தி வுத்தே பன வத்தப்³ப³மேவ நத்தீ²’’தி ஸாரத்த²தீ³பனியம் (ஸாரத்த². டீ. 2.537-539) வுத்தம். விமதிவினோத³னியம்பி (வி. வி. டீ. 1.538-539) ததே²வ வத்வா ‘‘இத³ஞ்ச ஸங்க⁴ஸ்ஸ தீ³யமானஞ்ஞேவ ஸந்தா⁴ய வுத்தம், புக்³க³லஸ்ஸ பன ஏவம்பி தி³ன்னம் தளாககே²த்தாதி³ ந வட்டதி. ஸுத்³த⁴சித்தஸ்ஸ பன உத³கபரிபோ⁴க³த்த²ம் கூபபோக்க²ரணிஆத³யோ வட்டந்தி. ‘ஸங்க⁴ஸ்ஸ தளாகம் அத்தி², தம் கத²’ந்தி ஹி ஆதி³னா ஸப்³ப³த்த² ஸங்க⁴வஸேனேவ வுத்த’’ந்தி வுத்தம். ஹத்தே² ப⁴விஸ்ஸதீதி வஸே ப⁴விஸ்ஸதி.

கப்பியகாரகம் ட²பேதா²தி வுத்தேதி ஸாமீசிவஸேன வுத்தம், அவுத்தேபி ட²பேந்தஸ்ஸ ந தோ³ஸோ அத்தி². தேனாஹ ‘‘உத³கம் வாரேதும் லப்³ப⁴தீ’’தி. யஸ்மா பரஸந்தகம் பி⁴க்கூ²னம் நாஸேதும் ந வட்டதி, தஸ்மா ‘‘ந ஸஸ்ஸகாலே’’தி வுத்தம். ஸஸ்ஸகாலேபி தாஸேத்வா முஞ்சிதும் வட்டதி, அமுஞ்சதோ பன ப⁴ண்ட³தே³ய்யம். ஜனபத³ஸ்ஸ ஸாமிகோதி இமினாவ யோ தம் ஜனபத³ம் விசாரேதி, தேனபி அச்சி²ந்தி³த்வா தி³ன்னம் வட்டதியேவாதி வத³ந்தி. புன தே³தீதி அச்சி²ந்தி³த்வா புன தே³தி, ஏவம்பி வட்டதீதி ஸம்ப³ந்தோ⁴. இமினா யேன கேனசி இஸ்ஸரேன ‘‘பரிச்சத்தமித³ம் பி⁴க்கூ²ஹி அஸ்ஸாமிக’’ந்தி ஸஞ்ஞாய அத்தனோ க³ஹேத்வா தி³ன்னம் வட்டதீதி த³ஸ்ஸேதி. உத³கவாஹகந்தி உத³கமாதிகம். கப்பியவோஹாரேபி வினிச்ச²யம் வக்கா²மீதி பாட²ஸேஸோ. உத³கவஸேனாதி உத³கபரிபோ⁴க³த்த²ம். ஸுத்³த⁴சித்தானந்தி உத³கபரிபோ⁴க³த்த²மேவ. இத³ம் ஸஹத்தே²ன ச அகப்பியவோஹாரேன ச கரோந்தே ஸந்தா⁴ய வுத்தம். ‘‘ஸஸ்ஸஸம்பாத³னத்த²’’ந்தி ஏவம் அஸுத்³த⁴சித்தானம்பி பன ஸயம் அகத்வா கப்பியவோஹாரேன ஆணாபேதும் வட்டதி ஏவ. கப்பியகாரகம் ட²பேதும் ந வட்டதீதி இத³ம் ஸஹத்தா²தி³னா கததளாகத்தா அஸ்ஸாருப்பந்தி வுத்தம். ட²பேந்தஸ்ஸ பன தம் பச்சயம் பரிபு⁴ஞ்ஜந்தஸ்ஸ வா ஸங்க⁴ஸ்ஸ ஆபத்தி ந பஞ்ஞாயதி, அட்ட²கதா²பமாணேன வா ஏத்த² ஆபத்தி க³ஹேதப்³பா³. அலஜ்ஜினா காராபிதே வத்தப்³ப³மேவ நத்தீ²தி ஆஹ ‘‘லஜ்ஜிபி⁴க்கு²னா’’தி, மத்திகுத்³த⁴ரணாதீ³ஸு காராபிதேஸூதி அதி⁴ப்பாயோ.

61. நவஸஸ்ஸேதி அகதபுப்³பே³ கேதா³ரே. கஹாபணேதி இமினா த⁴ஞ்ஞுட்டா²பனே தஸ்ஸேவ அகப்பியந்தி த³ஸ்ஸேதி. அபரிச்சி²ன்னபா⁴கே³தி ‘‘ஏத்தகே பூ⁴மிபா⁴கே³ ஏத்தகோ பா⁴கோ³ தா³தப்³போ³’’தி ஏவம் அபரிச்சி²ன்னபா⁴கே³. த⁴ஞ்ஞுட்டா²பனே கஸதி, பயோகே³பி து³க்கடமேவ, ந கஹாபணுட்டா²பனே விய. ‘‘கஸத² வபதா²’’தி வசனேன ஸப்³பே³ஸம்பி அகப்பியம் ஸியாதி ஆஹ ‘‘அவத்வா’’தி. ஏத்தகோ நாம பா⁴கோ³தி ஏத்த² ஏத்தகோ கஹாபணோதி இத³ம்பி ஸந்தா⁴ய வத³தி. ததா²வுத்தேபி ஹி ததா³ கஹாபணானம் அவிஜ்ஜமானத்தா ஆயதிம் உப்பஜ்ஜமானம் அஞ்ஞேஸம் வட்டதி ஏவ. தேனாஹ ‘‘தஸ்ஸேவ தம் அகப்பிய’’ந்தி. தஸ்ஸ பன ஸப்³ப³பயோகே³ஸு பரிபோ⁴கே³ ச து³க்கடம். கேசி பன த⁴ஞ்ஞபரிபோ⁴கே³ ஏவ ஆபத்தி, ந புப்³ப³பா⁴கே³தி வத³ந்தி, தம் ந யுத்தம், யேன மினனரக்க²ணாதி³னா பயோகே³ன பச்சா² த⁴ஞ்ஞபரிபோ⁴கே³ ஆபத்தி ஹோதி தஸ்ஸ பயோக³ஸ்ஸ கரணே அனாபத்தியா அயுத்தத்தா. பரியாயகதா²ய பன ஸப்³ப³த்த² அனாபத்தி. தேனேவ ‘‘ஏத்தகேஹி வீஹீஹி இத³ஞ்சித³ஞ்ச ஆஹரதா²’’தி நியமவசனே அகப்பியம் வுத்தம். கஹாபணவிசாரணேபி ஏஸேவ நயோ. ‘‘வத்து² ச ஏவரூபம் நாம ஸம்விஜ்ஜதி, கப்பியகாரகோ நத்தீ²தி வத்தப்³ப³’’ந்திஆதி³வசனஞ்சேத்த² ஸாத⁴கம். ரஜ்ஜுயா வா த³ண்டே³ன வாதி ஏத்த² ‘‘பாதே³ஹிபி மினிதும் ந வட்டதீ’’தி வத³ந்தி. க²லே வா ட²த்வா ரக்க²தீதி ஏத்த² பன தே²னேத்வா க³ண்ஹந்தே தி³ஸ்வா ‘‘மா க³ண்ஹதா²’’தி நிவாரேந்தோ ரக்க²தி நாம, ஸசே பன அவிசாரேத்வா கேவலம் துண்ஹீபூ⁴தோவ ரக்க²ணத்தா²ய ஓலோகேந்தோ திட்ட²தி, வட்டதி. ‘‘ஸசேபி தஸ்மிம் துண்ஹீபூ⁴தே சோரிகாய ஹரந்தி, ‘மயம் பி⁴க்கு²ஸங்க⁴ஸ்ஸ ஆரோசேஸ்ஸாமா’தி ஏவம் வத்தும்பி வட்டதீ’’தி வத³ந்தி. நீஹராபேதி படிஸாமேதீதி ஏத்தா²பி ‘‘ஸசே பரியாயேன வத³தி, வட்டதீ’’தி வத³ந்தி. அபுப்³ப³ஸ்ஸ அனுப்பாதி³தத்தா அஞ்ஞேஸம் வட்டதீதி ஆஹ ‘‘தஸ்ஸேவேதம் அகப்பிய’’ந்தி.

ஸப்³பே³ஸம் அகப்பியம், கஸ்மா? கஹாபணானம் விசாரிதத்தாதி ஏத்த² ஸாரத்த²தீ³பனியம் (ஸாரத்த². டீ. 2.537-539) ஏவம் விசாரணா கதா – நனு ச து³ப்³பி³சாரிதமத்தேன தஸ்ஸேவேதம் அகப்பியம், ந ஸப்³பே³ஸம் ரூபியஸம்வோஹாரே சதுத்த²பத்தோ விய. வுத்தஞ்ஹி தத்த² (பாரா. அட்ட². 2.589) ‘‘யோ பன ரூபியம் அஸம்படிச்சி²த்வா ‘தே²ரஸ்ஸ பத்தம் கிணித்வா தே³ஹீ’தி பஹிதகப்பியகாரகேன ஸத்³தி⁴ம் கம்மாரகுலம் க³ந்த்வா பத்தம் தி³ஸ்வா ‘இமே கஹாபணே க³ஹேத்வா இமம் தே³ஹீ’தி கஹாபணே தா³பேத்வா க³ஹிதோ, அயம் பத்தோ ஏதஸ்ஸேவ பி⁴க்கு²னோ ந வட்டதி து³ப்³பி³சாரிதத்தா, அஞ்ஞேஸம் பன வட்டதி மூலஸ்ஸ அஸம்படிச்சி²தத்தா’’தி, தஸ்மா யம் தே ஆஹரந்தி, ஸப்³பே³ஸம் அகப்பியம். கஸ்மா? கஹாபணானம் விசாரிதத்தாதி இத³ம் கஸ்மா வுத்தந்தி? ஏத்த² கேசி வத³ந்தி ‘‘கஹாபணே ஸாதி³யித்வா விசாரிதம் ஸந்தா⁴ய ஏவம் வுத்த’’ந்தி, ஸங்கி⁴கத்தா ச நிஸ்ஸஜ்ஜிதும் ந ஸக்கா, தஸ்மா ஸப்³பே³ஸம் ந கப்பதீதி தேஸம் அதி⁴ப்பாயோ. கேசி பன ‘‘அஸாதி³யித்வாபி கஹாபணானம் விசாரிதத்தா ரூபியஸம்வோஹாரோ கதோ ஹோதி, ஸங்கி⁴கத்தா ச நிஸ்ஸஜ்ஜிதும் ந ஸக்கா, தஸ்மா ஸப்³பே³ஸம் ந கப்பதீ’’தி வத³ந்தி. க³ண்டி²பதே³ஸு பன தீஸுபி இத³ம் வுத்தம் ‘‘சதுத்த²பத்தோ கி³ஹிஸந்தகானம்யேவ கஹாபணானம் விசாரிதத்தா அஞ்ஞேஸம் கப்பதி, இத⁴ பன ஸங்கி⁴கானம் விசாரிதத்தா ஸப்³பே³ஸம் ந கப்பதீ’’தி. ஸப்³பே³ஸம்பி வாதோ³ தேன தேன பரியாயேன யுத்தோயேவாதி.

62. சதுஸாலத்³வாரேதி போ⁴ஜனஸாலம் ஸந்தா⁴ய வுத்தம்.

63. ‘‘வனம் த³ம்மி, அரஞ்ஞம் த³ம்மீ’’தி வுத்தே பன வட்டதீதி ஏத்த² நிவாஸட்டா²னத்தா புக்³க³லஸ்ஸபி ஸுத்³த⁴சித்தேன க³ஹேதும் வட்டதி. ஸீமம் தே³மாதி விஹாரஸீமாதி³ஸாதா⁴ரணவசனேன வுத்தத்தா ‘‘வட்டதீ’’தி வுத்தம். பரியாயேன கதி²தத்தாதி ‘‘க³ண்ஹாஹீ’’தி அவத்வா ‘‘ஸீமா க³தா’’தி பரியாயேன கதி²தத்தா. பகதிபூ⁴மிகரணத்த²ம் ‘‘ஹேட்டா² க³ஹிதம் பம்ஸு’’ந்திஆதி³ வுத்தம். தா³ஸம் த³ம்மீதி ஏத்த² ‘‘மனுஸ்ஸம் த³ம்மீதி வுத்தே வட்டதீ’’தி வத³ந்தி. வேய்யாவச்சகரந்திஆதி³னா வுத்தே புக்³க³லஸ்ஸபி தா³ஸம் க³ஹேதும் வட்டதி ‘‘அனுஜானாமி பி⁴க்க²வே ஆராமிக’’ந்தி விஸேஸேத்வா அனுஞ்ஞாதத்தா. தஞ்ச கோ² பிலிந்த³வச்சே²ன க³ஹிதபரிபு⁴த்தக்கமேன, ந க³ஹட்டா²னம் தா³ஸபரிபோ⁴க³க்கமேன. கே²த்தாத³யோ பன ஸப்³பே³ ஸங்க⁴ஸ்ஸேவ வட்டந்தி பாளியம் புக்³க³லிகவஸேன க³ஹேதும் அனனுஞ்ஞாதத்தாதி த³ட்ட²ப்³ப³ம். குக்குடஸூகரே…பே… வட்டதீதி ஏத்த² குக்குடஸூகரேஸு தீ³யமானேஸு ‘‘இமேஹி அம்ஹாகம் அத்தோ² நத்தி², ஸுக²ம் ஜீவந்து, அரஞ்ஞே விஸ்ஸஜ்ஜேதா²’’தி வத்தும் வட்டதி. விஹாரஸ்ஸ தே³மாதி ஸங்கி⁴கவிஹாரம் ஸந்தா⁴ய வுத்தம். ‘‘கே²த்தவத்து²படிக்³க³ஹணா படிவிரதோ ஹோதீ’’திஆதி³னா (தீ³. நி. 1.10, 194) ஸுத்தந்தேஸு ஆக³தபடிக்கே²போ ப⁴க³வதா ஆபத்தியாபி ஹேதுபா⁴வேன கதோதி ப⁴க³வதோ அதி⁴ப்பாயம் ஜானந்தேஹி ஸங்கீ³திகாரகமஹாதே²ரேஹி கே²த்தபடிக்³க³ஹணாதி³னிஸ்ஸிதோ அயம் ஸப்³போ³பி பாளிமுத்தவினிச்ச²யோ வுத்தோதி க³ஹேதப்³போ³.

64. சீவரசேதாபன்னந்தி சீவரமூலம். பஹிணேய்யாதி பேஸேய்ய. சேதாபேத்வாதி பரிவத்தேத்வா. அச்சா²தே³ஹீதி வோஹாரவசனமேதம், இத்த²ன்னாமஸ்ஸ பி⁴க்கு²னோ தே³ஹீதி அயம் பனேத்த² அத்தோ². ஆப⁴தந்தி ஆனீதம்.

இமஸ்மிம் டா²னே ஸாரத்த²தீ³பனியம் (ஸாரத்த². டீ. 2.528-531) ஏவம் விசாரணா கதா – ஏத்த² ச யம் வுத்தம் மாதிகாட்ட²கதா²யம் (கங்கா². அட்ட². ராஜஸிக்கா²பத³வண்ணனா) ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீதி இத³ம் ஆக³மனஸுத்³தி⁴ம் த³ஸ்ஸேதும் வுத்தம். ஸசே ஹி ‘இத³ம் இத்த²ன்னாமஸ்ஸ பி⁴க்கு²னோ தே³ஹீ’தி பேஸேய்ய, ஆக³மனஸ்ஸ அஸுத்³த⁴த்தா அகப்பியவத்து²ம் ஆரப்³ப⁴ பி⁴க்கு²னா கப்பியகாரகோபி நித்³தி³ஸிதப்³போ³ ந ப⁴வேய்யா’’தி, தத்த² ஆக³மனஸ்ஸ ஸுத்³தி⁴யா வா அஸுத்³தி⁴யா வா விஸேஸப்பயோஜனம் ந தி³ஸ்ஸதி. ஸதிபி ஹி ஆக³மனஸ்ஸ அஸுத்³த⁴பா⁴வே தூ³தோ அத்தனோ குஸலதாய கப்பியவோஹாரேன வத³தி, கப்பியகாரகோ ந நித்³தி³ஸிதப்³போ³தி இத³ம் நத்தி², ந ச தூ³தேன கப்பியவோஹாரவஸேன வுத்தே தா³யகேன ‘‘இத³ம் கத²ம் பேஸித’’ந்தி ஈதி³ஸீ விசாரணா உபலப்³ப⁴தி, அவிசாரேத்வா ச தம் ந ஸக்கா ஜானிதும். யதி³ பன ஆக³மனஸ்ஸ அஸுத்³த⁴த்தா கப்பியகாரகோ நித்³தி³ஸிதப்³போ³ ந ப⁴வேய்ய, சீவரானம் அத்தா²ய தூ³தஸ்ஸ ஹத்தே² அகப்பியவத்து²ம்ஹி பேஸிதே ஸப்³ப³த்த² தா³யகேன கத²ம் பேஸிதந்தி புச்சி²த்வாவ கப்பியகாரகோ நித்³தி³ஸிதப்³போ³ ப⁴வேய்ய, தஸ்மா அஸதிபி ஆக³மனஸுத்³தி⁴யம் ஸசே ஸோ தூ³தோ அத்தனோ குஸலதாய கப்பியவோஹாரவஸேன வத³தி, தூ³தஸ்ஸேவ வசனம் க³ஹேதப்³ப³ம். யதி³ ஹி ஆக³மனஸுத்³தி⁴யேவேத்த² பமாணம், மூலஸ்ஸாமிகேன கப்பியவோஹாரவஸேன பேஸிதஸ்ஸ தூ³தஸ்ஸ அகப்பியவோஹாரவஸேன வத³தோபி கப்பியகாரகோ நித்³தி³ஸிதப்³போ³ ப⁴வேய்ய, தஸ்மா ஸப்³ப³த்த² தூ³தவசனமேவ பமாணந்தி க³ஹேதப்³ப³ம். இமினா சீவரசேதாபன்னேனாதிஆதி³னா பன இமமத்த²ம் த³ஸ்ஸேதி ‘‘கப்பியவஸேன ஆப⁴தம்பி சீவரமூலம் ஈதி³ஸேன தூ³தவசனேன அகப்பியம் ஹோதி, தஸ்மா தம் படிக்கி²பிதப்³ப³’’ந்தி. தேனேவாஹ ‘‘தேன பி⁴க்கு²னா ஸோ தூ³தோ ஏவமஸ்ஸ வசனீயோதிஆதீ³’’தி.

விமதிவினோத³னியம் (வி. வி. டீ. 1.538-539) பன ஏவம் வுத்தம் – யம் வுத்தம் மாதிகாட்ட²கதா²யம் (கங்கா². அட்ட². ராஜஸிக்கா²பத³வண்ணனா) ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீதி இத³ம் ஆக³மனஸுத்³தி⁴ம் த³ஸ்ஸேதும் வுத்தம். ஸசே ஹி ‘இத³ம் இத்த²ன்னாமஸ்ஸ பி⁴க்கு²னோ தே³ஹீ’தி பேஸேய்ய, ஆக³மனஸ்ஸ அஸுத்³த⁴த்தா அகப்பியவத்து²ம் ஆரப்³ப⁴ பி⁴க்கு²னா கப்பியகாரகோபி நித்³தி³ஸிதப்³போ³ ந ப⁴வேய்யா’’தி, தம் நிஸ்ஸக்³கி³யவத்து²து³க்கடவத்து²பூ⁴தம் அகப்பியசீவரசேதாபன்னம் ‘‘அஸுகஸ்ஸ பி⁴க்கு²னோ தே³ஹீ’’தி ஏவம் ஆக³மனஸுத்³தி⁴யா அஸதி, ஸிக்கா²பதே³ ஆக³தனயேன தூ³தவசனே ச அஸுத்³தே⁴ ஸப்³ப³தா² படிக்கே²போயேவ காதும் வட்டதி, ந பன ‘‘சீவரஞ்ச கோ² மயம் படிக்³க³ண்ஹாமா’’தி வத்தும், தத³னுஸாரேன வேய்யாவச்சகரஞ்ச நித்³தி³ஸிதும் ஆக³மனதூ³தவசனானம் உபி⁴ன்னம் அஸுத்³த⁴த்தா, பாளியம் ஆக³தனயேன பன ஆக³மனஸுத்³தி⁴யா ஸதி தூ³தவசனே அஸுத்³தே⁴பி ஸிக்கா²பதே³ ஆக³தனயேன ஸப்³ப³ம் காதும் வட்டதீதி த³ஸ்ஸனத்த²ம் வுத்தம். தேன ச யதா² தூ³தவசனாஸுத்³தி⁴யம்பி ஆக³மனே ஸுத்³தே⁴ வேய்யாவச்சகரம் நித்³தி³ஸிதும் வட்டதி, ஏவம் ஆக³மனாஸுத்³தி⁴யம்பி தூ³தவசனே ஸுத்³தே⁴ வட்டதி ஏவாதி அயமத்தோ² அத்த²தோ ஸித்³தோ⁴வ ஹோதி. உப⁴யஸுத்³தி⁴யம் வத்தப்³ப³மேவ நத்தீ²தி உப⁴யாஸுத்³தி⁴பக்க²மேவ ஸந்தா⁴ய மாதிகாட்ட²கதா²யம் (கங்கா². அட்ட². ராஜஸிக்கா²பத³வண்ணனா) ‘‘கப்பியகாரகோபி நித்³தி³ஸிதப்³போ³ ந ப⁴வேய்யா’’தி வுத்தந்தி வேதி³தப்³ப³ம்.

யம் பனேத்த² ஸாரத்த²தீ³பனியம் (ஸாரத்த². டீ. 2.237-539) ‘‘ஆக³மனஸ்ஸ ஸுத்³தி⁴யா வா அஸுத்³தி⁴யா வா விஸேஸப்பயோஜனம் ந தி³ஸ்ஸதீ’’திஆதி³ வுத்தம், தம் மாதிகாட்ட²கதா²வசனஸ்ஸ அதி⁴ப்பாயம் அஸல்லக்கே²த்வா வுத்தம் யதா²வுத்தனயேன ஆக³மனஸுத்³தி⁴ஆதி³னா ஸப்பயோஜனத்தா. யோ பனேத்த² ‘‘மூலஸ்ஸாமிகேன கப்பியவோஹாரவஸேன, பேஸிததூ³தஸ்ஸ அகப்பியவோஹாரேன வத³தோபி கப்பியகாரகோ நித்³தி³ஸிதப்³போ³ ப⁴வேய்யா’’தி அனிட்ட²ப்பஸங்கோ³ வுத்தோ, ஸோ அனிட்ட²ப்பஸங்கோ³ ஏவ ந ஹோதி அபி⁴மதத்தா. ததா² ஹி ஸிக்கா²பதே³ ஏவ ‘‘படிக்³க³ண்ஹது ஆயஸ்மா சீவரசேதாபன்ன’’ந்தி அகப்பியவோஹாரேன வத³தோ தூ³தஸ்ஸ கப்பியேன கம்மேன வேய்யாவச்சகரோ நித்³தி³ஸிதப்³போ³ வுத்தோ ஆக³மனஸ்ஸ ஸுத்³த⁴த்தா, ஆக³மனஸ்ஸபி அஸுத்³தி⁴யம் பன கப்பியேனபி கம்மேன வேய்யாவச்சகரோ ந நித்³தி³ஸிதப்³போ³வாதி அத்தே²வ ஆக³மனஸ்ஸ ஸுத்³தி⁴அஸுத்³தி⁴யா பயோஜனம். கத²ம் பன தூ³தவசனேன ஆக³மனஸுத்³தி⁴ விஞ்ஞாயதீதி? நாயம் பா⁴ரோ. தூ³தேன ஹி அகப்பியவோஹாரேன வுத்தே ஏவ ஆக³மனஸுத்³தி⁴ க³வேஸிதப்³பா³, ந இதரத்த². தத்த² ச தஸ்ஸ வசனக்கமேன புச்சி²த்வா ச யுத்திஆதீ³ஹி ச ஸக்கா விஞ்ஞாதும். இதா⁴பி ஹி ஸிக்கா²பதே³ ‘‘சீவரசேதாபன்னம் ஆப⁴த’’ந்தி தூ³தவசனேனேவ சீவரம் கிணித்வா தா³தும் பேஸிதபா⁴வோ விஞ்ஞாயதி. யதி³ ஹி ஸப்³ப³தா² ஆக³மனஸுத்³தி⁴ ந விஞ்ஞாயதி, படிக்கே²போ ஏவ கத்தப்³போ³தி.

ஸுவண்ணம் ரஜதம் கஹாபணோ மாஸகோதி இமானி ஹி சத்தாரி நிஸ்ஸக்³கி³யவத்தூ²னி, முத்தா மணி வேளுரியோ ஸங்கோ² ஸிலா பவாளம் லோஹிதங்கோ மஸாரக³ல்லம் ஸத்த த⁴ஞ்ஞானி தா³ஸிதா³ஸம் கே²த்தம் வத்து² புப்பா²ராமப²லாராமாத³யோதி இமானி து³க்கடவத்தூ²னி ச அத்தனோ வா சேதியஸங்க⁴க³ணபுக்³க³லானம் வா அத்தா²ய ஸம்படிச்சி²தும் ந வட்டந்தி, தஸ்மா தம் ஸாதி³தும் ந வட்டதீதி த³ஸ்ஸனத்த²ம் ‘‘ந கோ² மயம் ஆவுஸோ சீவரசேதாபன்னம் படிக்³க³ண்ஹாமா’’தி வுத்தம். சீவரஞ்ச கோ² மயம் படிக்³க³ண்ஹாமா’’திஆதி³ தூ³தவசனஸ்ஸ அகப்பியத்தேபி ஆக³மனஸுத்³தி⁴யா படிபஜ்ஜனவிதி⁴த³ஸ்ஸனத்த²ம் வுத்தம். காலேன கப்பியந்தி யுத்தபத்தகாலேன யதா³ நோ அத்தோ² ஹோதி, ததா³ கப்பியம் சீவரம் படிக்³க³ண்ஹாமாதி அத்தோ². வேய்யாவச்சகரோதி கிச்சகரோ, கப்பியகாரகோதி அத்தோ². ‘‘வேய்யாவச்சகரோ நித்³தி³ஸிதப்³போ³’’தி இத³ம் ‘‘அத்தி² பனாயஸ்மதோ கோசி வேய்யாவச்சகரோ’’தி கப்பியவசனேன வுத்தத்தா அனுஞ்ஞாதம். ஸசே பன தூ³தோ ‘‘கோ இமம் க³ண்ஹாதி, கஸ்ஸ வா தே³மீ’’தி வத³தி, ந நித்³தி³ஸிதப்³போ³. ஆராமிகோ வா உபாஸகோ வாதி இத³ம் ஸாருப்பதாய வுத்தம், ட²பேத்வா பன பஞ்ச ஸஹத⁴ம்மிகே யோ கோசி கப்பியகாரகோ வட்டதி. ஏஸோ கோ² ஆவுஸோ பி⁴க்கூ²னம் வேய்யாவச்சகரோதி இத³ம் தூ³தேன ‘‘அத்தி² பனாயஸ்மதோ கோசி வேய்யாவச்சகரோ’’தி புச்சி²தத்தா புச்சா²ஸபா⁴கே³ன பி⁴க்கு²ஸ்ஸ கப்பியவசனத³ஸ்ஸனத்த²ம் வுத்தம். ஏவமேவ ஹி பி⁴க்கு²னா வத்தப்³ப³ம், ந வத்தப்³ப³ம் ‘‘தஸ்ஸ தே³ஹீ’’திஆதி³. தேனேவ பாளியம் ‘‘ந வத்தப்³போ³ தஸ்ஸ தே³ஹீ’’திஆதி³மாஹ. விமதிவினோத³னியம் (வி. வி. டீ. 1.538-539) பன ‘‘ஏஸோ கோ²…பே… ந வத்தப்³போ³ தஸ்ஸ தே³ஹீதிஆதி³ அகப்பியவத்து²ஸாதி³யனபரிமோசனத்த²ம் வுத்த’’ந்தி வுத்தம்.

ஆணத்தோ ஸோ மயாதி யதா² தும்ஹாகம் சீவரேன அத்தே² ஸதி சீவரம் த³ஸ்ஸதி, ஏவம் வுத்தோதி அத்தோ². விமதிவினோத³னியம் பன ‘‘ஸஞ்ஞத்தோதிஆதி³ ஏவம் தூ³தேன புன வுத்தே ஏவ சோதே³தும் வட்டதி, ந இதரதா²தி த³ஸ்ஸனத்த²ம் வுத்த’’ந்தி வுத்தம். ஏத்த² பன பாளியம் ‘‘ஸஞ்ஞத்தோ ஸோ மயா’’தி ஆக³தத்தா ஏவம் வுத்தோ, புரிமவாக்யே பன வினயஸங்க³ஹப்பகரணே (வி. ஸங்க³. அட்ட². 64) ‘‘ஆணத்தோ ஸோ மயா’’தி பரியாயவசனேன பரிவத்தித்வா ட²பிதத்தா ததா² வுத்தோ, தேன ச கப்பியகாரகஸ்ஸ ஸஞ்ஞாபிதபா⁴வே தூ³தேன பி⁴க்கு²ஸ்ஸ புன ஆரோசிதே ஏவ பி⁴க்கு²னா கப்பியகாரகோ சோதே³தப்³போ³ ஹோதி, ந அனாரோசிதேதி த³ஸ்ஸேதி.

அத்தோ² மே ஆவுஸோ சீவரேனாதி சோத³னாலக்க²ணனித³ஸ்ஸனமேதம். இத³ம் வா ஹி வசனம் வத்தப்³ப³ம், தஸ்ஸ வா அத்தோ² யாய காயசி பா⁴ஸாய வத்தப்³போ³. தே³ஹி மே சீவரந்திஆதீ³னி பன ந வத்தப்³பா³காரத³ஸ்ஸனத்த²ம் வுத்தானி. ஏதானி ஹி வசனானி, ஏதேஸம் வா அத்தோ² யாய காயசி பா⁴ஸாய ந வத்தப்³போ³. ‘‘ஏவம் வத³ந்தோ ச படிக்கி²த்தத்தா வத்தபே⁴தே³ து³க்கடம் ஆபஜ்ஜதி, சோத³னா பன ஹோதியேவா’’தி மஹாக³ண்டி²பதே³ மஜ்ஜி²மக³ண்டி²பதே³ ச வுத்தம். விமதிவினோத³னியம் (வி. வி. டீ. 1.538-539) பன ‘‘ந வத்தப்³போ³ ‘தே³ஹி மே சீவரம்…பே… சேதாபேஹி மே சீவர’ந்தி இத³ம் தூ³தேனாப⁴தரூபியம் படிக்³க³ஹேதும் அத்தனா நித்³தி³ட்ட²கப்பியகாரகத்தாவ ‘தே³ஹி மே சீவரம்…பே… சேதாபேஹி மே சீவர’ந்தி வத³ந்தோ ரூபியஸ்ஸ பகதத்தா தேன ரூபியேன பரிவத்தேத்வா ‘தே³ஹி சேதாபேஹீ’தி ரூபியஸம்வோஹாரம் ஸமாபஜ்ஜந்தோ நாம ஹோதீதி தம் தோ³ஸம் தூ³ரதோ பரிவஜ்ஜேதும் வுத்தம் ரூபியபடிக்³கா³ஹகேன ஸங்க⁴மஜ்ஜே² நிஸ்ஸட்ட²ரூபியே விய. வுத்தஞ்ஹி தத்த² ‘ந வத்தப்³போ³ இமம் வா இமம் வா ஆஹரா’தி (பாரா. அட்ட². 2.583-584), தஸ்மா ந இத³ம் விஞ்ஞத்திதோ³ஸே பரிவஜ்ஜேதும் வுத்தந்தி வேதி³தப்³ப³ம் ‘அத்தோ² மே ஆவுஸோ சீவரேனா’திபி அவத்தப்³ப³தாப்பஸங்க³தோ. தேனேவ தூ³தனித்³தி³ட்டே²ஸு ரூபியஸம்வோஹாரஸங்காபா⁴வதோ அஞ்ஞம் கப்பியகாரகம் ட²பேத்வாபி ஆஹராபேதப்³ப³’’ந்தி வுத்தம். தத்தா²பி ‘‘தூ³தேன ட²பிதரூபியேன சேதாபேத்வா சீவரம் ஆஹராபேஹீ’’தி அவத்வா கேவலம் ‘‘சீவரம் ஆஹராபேஹீ’’தி ஏவம் ஆஹராபேதப்³ப³ந்தி அதி⁴ப்பாயோ க³ஹேதப்³போ³தி வுத்தம்.

இச்சேதம் குஸலந்தி ஏவம் யாவததியம் சோதே³ந்தோ தம் சீவரம் அபி⁴னிப்பா²தே³தும் ஸக்கோதி அத்தனோ படிலாப⁴வஸேன, இச்சேதம் குஸலம் ஸாது⁴ ஸுட்டு² ஸுந்த³ரம். சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ந்தி டா²னலக்க²ணனித³ஸ்ஸனமேதம். ச²க்க²த்துபரமந்தி ச பா⁴வனபும்ஸகவசனமேதம். ச²க்க²த்துபரமந்தி ஏதேன சீவரம் உத்³தி³ஸ்ஸ துண்ஹீபூ⁴தேனேவ டா²தப்³ப³ம், ந அஞ்ஞம் கிஞ்சி காதப்³ப³ந்தி இத³ம் டா²னலக்க²ணம். தேனேவ ‘‘ந ஆஸனேதிஆதீ³’’தி அட்ட²கதா²யம் வுத்தம். ஸத்³த³ஸத்தே² பன –

‘‘கிரியாவிஸேஸனம் ஸத்தே², வுத்தம் தா⁴துவிஸேஸனம்;

பா⁴வனபும்ஸகந்த்யேவ, ஸாஸனே ஸமுதீ³ரித’’ந்தி. –

வசனதோ கிரியாவிஸேஸனமேவ ஸாஸனவோஹாரேன பா⁴வனபும்ஸகம் நாம ஜாதம்;

‘‘முது³ம் பசதிஇச்சத்ர, பசனம் ப⁴வதீதி ச;

ஸுக²ம் ஸயதிஇச்சத்ர, கரோதி ஸயனந்தி சா’’தி. –

வசனதோ கிரியாவிஸேஸனபதே³ன துல்யாதி⁴கரணபூ⁴தம் கிரியாவிஸேஸ்யபத³ம் அகம்மகம்பி ஸகம்மகம்பி பூ⁴தா⁴துகரதா⁴தூஹி ஸம்ப³ந்தி⁴தப்³ப³ம் ஹோதீதி இமினா ஞாயேன ச²க்க²த்துபரமம் டா²னம் ப⁴விதப்³ப³ம், ச²க்க²த்துபரமம் டா²னம் காதப்³ப³ந்தி அத்தோ². ஏதேன ச²க்க²த்துபரமம் ஏவம் டா²னம் ப⁴விதப்³ப³ம், ந ததோ அதி⁴கம், ச²க்க²த்துபரமம் ஏவ டா²னம் காதப்³ப³ம், ந ததோ உத்³த⁴ந்தி இமமத்த²ம் த³ஸ்ஸேதி. ந ஆஸனே நிஸீதி³தப்³ப³ந்தி ‘‘இத⁴ ப⁴ந்தே நிஸீத³தா²’’தி வுத்தேபி ந நிஸீதி³தப்³ப³ம். ந ஆமிஸம் படிக்³க³ஹேதப்³ப³ந்தி ‘‘யாகு³க²ஜ்ஜகாதி³பே⁴த³ம் கிஞ்சி ஆமிஸம் க³ண்ஹத² ப⁴ந்தே’’தி யாசியமானேனபி ந க³ண்ஹிதப்³ப³ம். ந த⁴ம்மோ பா⁴ஸிதப்³போ³தி ‘‘மங்க³லம் வா அனுமோத³னம் வா பா⁴ஸதா²’’தி யாசியமானேனபி கிஞ்சி ந பா⁴ஸிதப்³ப³ம், கேவலம் ‘‘கிம்காரணா ஆக³தோஸீ’’தி புச்சி²யமானேன ‘‘ஜானாஹி ஆவுஸோ’’தி வத்தப்³போ³.

டா²னம் ப⁴ஞ்ஜதீதி ஆக³தகாரணம் ப⁴ஞ்ஜதி கோபேதி. டா²னந்தி டி²தியா ச காரணஸ்ஸ ச நாமம், தஸ்மா ஆஸனே நிஸீத³னேன டா²னம் குப்பதி, ஆக³தகாரணம்பி, ஆமிஸபடிக்³க³ஹணாதீ³ஸு பன ஆக³தகாரணமேவ ப⁴ஞ்ஜதி, ந டா²னம். தேனாஹ ‘‘ஆக³தகாரணம் ப⁴ஞ்ஜதீ’’தி. கேசி பன ‘‘ஆமிஸபடிக்³க³ஹணாதி³னா டா²னம்பி ப⁴ஞ்ஜதீ’’தி வத³ந்தி, தம் அட்ட²கதா²ய ந ஸமேதி, டீகாயம்பி நானாவாதே³ த³ஸ்ஸேத்வா டா²னப⁴ஞ்ஜனம் வுத்தம், தம் அட்ட²கதா²வசனேன அஸம்ஸந்த³னதோ க³ந்த²க³ருப⁴யேன ந வதி³ம்ஹ. இதா³னி யா திஸ்ஸோ சோத³னா, ச² ச டா²னானி வுத்தானி, தத்த² வுத்³தி⁴ஹானிம் த³ஸ்ஸேந்தோ ‘‘ஸசே சதுக்க²த்தும் சோதே³தீ’’திஆதி³மாஹ. யஸ்மா ச ஏகசோத³னாவுத்³தி⁴யா த்³வின்னம் டா²னானம் ஹானி வுத்தா, தஸ்மா சோத³னா த்³விகு³ணம் டா²னந்தி லக்க²ணம் த³ஸ்ஸிதம் ஹோதி. இதி இமினா லக்க²ணேன திக்க²த்தும் சோதே³த்வா ச²க்க²த்தும் டா²தப்³ப³ம், த்³விக்க²த்தும் சோதே³த்வா அட்ட²க்க²த்தும் டா²தப்³ப³ம், ஸகிம் சோதே³த்வா த³ஸக்க²த்தும் டா²தப்³ப³ம்.

தத்ர தத்ர டா²னே திட்ட²தீதி இத³ம் சோத³கஸ்ஸ டி²தட்டா²னதோ அபக்கம்ம தத்ர தத்ர உத்³தி³ஸ்ஸ டா²னம்யேவ ஸந்தா⁴ய வுத்தம். கோ பன வாதோ³ நானாதி³வஸேஸூதி நானாதி³வஸேஸு ஏவம் கரோந்தஸ்ஸ கோ பன வாதோ³, வத்தப்³ப³மேவ நத்தீ²தி அதி⁴ப்பாயோ. ‘‘ஸாமம் வா க³ந்தப்³ப³ம், தூ³தோ வா பாஹேதப்³போ³தி இத³ம் ஸபா⁴வதோ சோதே³தும் அனிச்ச²ந்தேனபி காதப்³ப³மேவா’’தி வத³ந்தி. ந தம் தஸ்ஸ பி⁴க்கு²னோ கிஞ்சி அத்த²ம் அனுபோ⁴தீதி தம் சீவரசேதாபன்னம் அஸ்ஸ பி⁴க்கு²னோ கிஞ்சி அப்பமத்தகம்பி கம்மம் ந நிப்பா²தே³தி. யுஞ்ஜந்தாயஸ்மந்தோ ஸகந்தி ஆயஸ்மந்தோ அத்தனோ ஸந்தகம் த⁴னம் பாபுணந்து. விமதிவினோத³னியம் (வி. வி. டீ. 1.538-539) பன ‘‘யதஸ்ஸ சீவரசேதாபன்னந்திஆதி³ யேன அத்தனா வேய்யாவச்சகரோ நித்³தி³ட்டோ², சீவரஞ்ச அனிப்பா²தி³தம், தஸ்ஸ கத்தப்³ப³த³ஸ்ஸனம். ஏவம் பி⁴க்கு²னா வத்து²ஸாமிகானம் வுத்தே சோதே³த்வா தே³ந்தி, வட்டதி ‘ஸாமிகா சோதே³த்வா தே³ந்தீ’தி (பாரா. 541) அனாபத்தியம் வுத்தத்தா. தேனேவ ஸோ ஸயம் அசோதே³த்வா உபாஸகாதீ³ஹி பரியாயேன வத்வா சோதா³பேதி, தேஸு ஸதக்க²த்தும்பி சோதே³த்வா சீவரம் தா³பேந்தேஸு தஸ்ஸ அனாபத்தி ஸித்³தா⁴ ஹோதி ஸிக்கா²பத³ஸ்ஸ அனாணத்திகத்தா’’தி வுத்தம்.

65. கேனசி அனித்³தி³ட்டோ² அத்தனோ முகே²னேவ ப்³யாவடபா⁴வம் வேய்யாவச்சகரத்தம் பத்தோ முக²வேவடிகோ, அவிசாரேதுகாமதாயாதி இமினா விஜ்ஜமானம்பி தா³தும் அனிச்ச²ந்தா அரியாபி வஞ்சனாதி⁴ப்பாயம் வினா வோஹாரதோ நத்தீ²தி வத³ந்தீதி த³ஸ்ஸேதி. ஸாரத்த²தீ³பனியம் (ஸாரத்த². டீ. 2.537-539) பன ‘‘அவிசாரேதுகாமதாயாதி இமஸ்மிம் பக்கே² ‘நத்த²ம்ஹாகம் கப்பியகாரகோ’தி இத³ம் தாதி³ஸம் கரோந்தோ கப்பியகாரகோ நத்தீ²தி இமினா அதி⁴ப்பாயேன வுத்த’’ந்தி வுத்தம். பே⁴ஸஜ்ஜக்க²ந்த⁴கே மேண்ட³கஸேட்டி²வத்து²ம்ஹி (மஹாவ. 299) வுத்தம் ‘‘ஸந்தி பி⁴க்க²வே’’திஆதி³வசனமேவ மேண்ட³கஸிக்கா²பத³ம் நாம. தத்த² ஹி மேண்ட³கேன நாம ஸேட்டி²னா ‘‘ஸந்தி ஹி ப⁴ந்தே மக்³கா³ கந்தாரா அப்போத³கா அப்பப⁴க்கா² ந ஸுகரா அபாதே²ய்யேன க³ந்தும், ஸாது⁴ ப⁴ந்தே ப⁴க³வா பி⁴க்கூ²னம் பாதே²ய்யம் அனுஜானாதூ’’தி யாசிதேன ப⁴க³வதா ‘‘அனுஜானாமி பி⁴க்க²வே பாதே²ய்யம் பரியேஸிதும். தண்டு³லோ தண்டு³லத்தி²கேன, முக்³கோ³ முக்³க³த்தி²கேன, மாஸோ மாஸத்தி²கேன, லோணம் லோணத்தி²கேன, கு³ளோ கு³ளத்தி²கேன, தேலம் தேலத்தி²கேன, ஸப்பி ஸப்பித்தி²கேனா’’தி வத்வா இத³ம் வுத்தம் ‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தே கப்பியகாரகானம் ஹத்தே² ஹிரஞ்ஞம் உபனிக்கி²பந்தி ‘இமினா யம் அய்யஸ்ஸ கப்பியம், தம் தே³தா²’தி. அனுஜானாமி, பி⁴க்க²வே, யம் ததோ கப்பியம், தம் ஸாதி³தும், ந த்வேவாஹம், பி⁴க்க²வே, கேனசி பரியாயேன ஜாதரூபரஜதம் ஸாதி³தப்³ப³ம் பரியேஸிதப்³ப³ந்தி வதா³மீ’’தி. ‘‘கப்பியகாரகானம் ஹத்தே² ஹிரஞ்ஞம் நிக்கி²பந்தீ’’தி ஏத்தா²பி பி⁴க்கு²ஸ்ஸ ஆரோசனம் அத்தி²யேவ, அஞ்ஞதா² அனித்³தி³ட்ட²கப்பியகாரகபக்க²ம் ப⁴ஜதீதி ந சோதே³தப்³போ³ ஸியா, இத³ம் பன தூ³தேன நித்³தி³ட்ட²கப்பியகாரகே ஸந்தா⁴ய வுத்தம், ந பன பி⁴க்கு²னா நித்³தி³ட்டே² வா அனித்³தி³ட்டே² வா. தேனேவாஹ ‘‘ஏத்த² சோத³னாய பரிமாணம் நத்தீ²’’திஆதி³. யதி³ மூலம் ஸந்தா⁴ய சோதே³தி, தம் ஸாதி³தமேவ ஸியாதி ஆஹ ‘‘மூலம் அஸாதி³யந்தேனா’’தி.

அஞ்ஞாதகஅப்பவாரிதேஸு விய படிபஜ்ஜிதப்³ப³ந்தி இத³ம் அத்தனா சோத³னாட்டா²னஞ்ச ந காதப்³ப³ந்தி த³ஸ்ஸனத்த²ம் வுத்தம். பிண்ட³பாதாதீ³னம் அத்தா²யாதி இமினா சீவரத்தா²யேவ ந ஹோதீதி த³ஸ்ஸேதி. ஏஸேவ நயோதி இமினா வத்து²ஸாமினா நித்³தி³ட்ட²கப்பியகாரகேஸுபி பிண்ட³பாதாதீ³னம்பி அத்தா²ய தி³ன்னே ச டா²னசோத³னாதி³ஸப்³ப³ம் ஹேட்டா² வுத்தனயேனேவ காதப்³ப³ந்தி த³ஸ்ஸேதி.

66. உபனிக்கி²த்தஸாதி³யனே பனாதிஆதீ³ஸு ‘‘இத³ம் அய்யஸ்ஸ ஹோதூ’’தி ஏவம் ஸம்முகா² வா ‘‘அமுகஸ்மிம் நாம டா²னே மம ஹிரஞ்ஞஸுவண்ணம் அத்தி², தம் துய்ஹம் ஹோதூ’’தி ஏவம் பரம்முகா² வா டி²தஸ்ஸ கேவலம் வாசாய வா ஹத்த²முத்³தா³ய வா ‘‘துய்ஹ’’ந்தி வத்வா பரிச்சத்தஸ்ஸ காயவாசாஹி அப்படிக்கி²பித்வா சித்தேன ஸாதி³யனம் உபனிக்கி²த்தஸாதி³யனம் நாம. ஸாதி³யதீதி வுத்தமேவத்த²ம் விபா⁴வேதி ‘‘க³ண்ஹிதுகாமோ ஹோதீ’’தி.

இத³ம் கு³த்தட்டா²னந்தி ஆசிக்கி²தப்³ப³ந்தி பச்சயபரிபோ⁴க³ம்யேவ ஸந்தா⁴ய ஆசிக்கி²தப்³ப³ம். ‘‘இத⁴ நிக்கி²பா’’தி வுத்தே ‘‘உக்³க³ண்ஹாபேய்ய வா’’தி வுத்தலக்க²ணேன நிஸ்ஸக்³கி³யம் ஹோதீதி ஆஹ ‘‘இத⁴ நிக்கி²பாஹீதி ந வத்தப்³ப³’’ந்தி. அத² வா ‘‘இத³ம் கு³த்தட்டா²ன’’ந்தி ஆசிக்க²ந்தோ டா²னஸ்ஸ கு³த்தபா⁴வமேவ த³ஸ்ஸேதி, ந வத்து²ம் பராமஸதி, தஸ்மா ஆசிக்கி²தப்³ப³ம். ‘‘இத⁴ நிக்கி²பாஹீ’’தி பன வத³ந்தோ நிக்கி²பிதப்³ப³ம் வத்து²ம் நிக்கி²பாஹீதி வத்து²ம் பராமஸதி நாம, தஸ்மா ந வத்தப்³ப³ம். பரதோ இத³ம் க³ண்ஹாதி ஏத்தா²பி ஏஸேவ நயோ. கப்பியஞ்ச அகப்பியஞ்ச நிஸ்ஸாய டி²தம் ஹோதீதி யஸ்மா ததோ உப்பன்னபச்சயபரிபோ⁴கோ³ கப்பதி, தஸ்மா கப்பியம் நிஸ்ஸாய டி²தம், யஸ்மா பன து³ப்³பி³சாரணாய ததோ உப்பன்னபச்சயபரிபோ⁴கோ³ ந கப்பதி, தஸ்மா அகப்பியம் நிஸ்ஸாய டி²தந்தி வேதி³தப்³ப³ம். அத² வா இத³ம் த⁴னம் யஸ்மா ‘‘நயித³ம் கப்பதீ’’தி படிக்கி²த்தம், தஸ்மா கப்பியம் நிஸ்ஸாய டி²தம், யஸ்மா பன ஸப்³ப³ஸோ அவிஸ்ஸஜ்ஜிதம், தஸ்மா அகப்பியம் நிஸ்ஸாய டி²தம். அத² வா தம் த⁴னம் யஸ்மா பச்சா² ஸுட்டு²விசாரணாய ஸதியா கப்பியம் ப⁴விஸ்ஸதி, து³ப்³பி³சாரணாய ஸதியா அகப்பியம் ப⁴விஸ்ஸதி, தஸ்மா கப்பியஞ்ச அகப்பியஞ்ச நிஸ்ஸாய டி²தம் ஹோதீதி. விமதிவினோத³னியம் பன ‘‘ஏகோ ஸதம் வா ஸஹஸ்ஸம் வாதிஆதி³ ரூபியே ஹேட்டி²மகோடியா பவத்தனாகாரம் த³ஸ்ஸேதும் வுத்த’’ந்தி ச ‘‘ந பன ஏவம் படிபஜ்ஜிதப்³ப³மேவாதி த³ஸ்ஸேதும், ‘இத⁴ நிக்கி²பாஹீ’தி வுத்தே உக்³க³ண்ஹாபனம் ஹோதீதி ஆஹ ‘இத⁴ நிக்கி²பாஹீ’தி ந வத்தப்³ப³’’ந்தி ச ‘‘கப்பியஞ்ச…பே… ஹோதீதி யஸ்மா அஸாதி³தத்தா ததோ உப்பன்னபச்சயா வட்டந்தி, தஸ்மா கப்பியம் நிஸ்ஸாய டி²தம், யஸ்மா பன து³ப்³பி³சாரணாய ஸதி ததோ உப்பன்னம் ந கப்பதி, தஸ்மா அகப்பியம் நிஸ்ஸாய டி²தந்தி வேதி³தப்³ப³’’ந்தி ச வுத்தம்.

67. ஸங்க⁴மஜ்ஜே² நிஸ்ஸஜ்ஜிதப்³ப³ந்தி யஸ்மா ரூபியம் நாம அகப்பியம், தஸ்மா ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா நிஸ்ஸஜ்ஜிதப்³ப³ந்தி ந வுத்தம். யஸ்மா பன தம் படிக்³க³ஹிதமத்தமேவ ஹோதி, ந தேன கிஞ்சி கப்பியப⁴ண்ட³ம் சேதாபிதம், தஸ்மா உபாயேன பரிபோ⁴க³த³ஸ்ஸனத்த²ம் ‘‘ஸங்க⁴மஜ்ஜே² நிஸ்ஸஜ்ஜிதப்³ப³’’ந்தி (பாரா. 584) வுத்தம். ந தேன கிஞ்சி கப்பியப⁴ண்ட³ம் சேதாபிதந்தி இமினா சேதாபிதஞ்சே, நத்தி² பரிபோ⁴கூ³பாயோ உக்³க³ஹேத்வா அனிஸ்ஸட்ட²ரூபியேன சேதாபிதத்தா. ஈதி³ஸஞ்ஹி ஸங்க⁴மஜ்ஜே² நிஸ்ஸஜ்ஜனம் கத்வாவ ச²ட்³டே³த்வா பாசித்தியம் தே³ஸாபேதப்³ப³ந்தி த³ஸ்ஸேதி. கேசி பன ‘‘யஸ்மா நிஸ்ஸக்³கி³யவத்து²ம் படிக்³க³ஹேத்வாபி சேதாபிதம் கப்பியப⁴ண்ட³ம் ஸங்கே⁴ நிஸ்ஸட்ட²ம் கப்பியகாரகேஹி நிஸ்ஸட்ட²ரூபியேன பரிவத்தேத்வா ஆனீதகப்பியப⁴ண்ட³ஸதி³ஸம் ஹோதி, தஸ்மா வினாவ உபாயம் பா⁴ஜேத்வா பரிபு⁴ஞ்ஜிதும் வட்டதீ’’தி வத³ந்தி, தம் பத்தசதுக்காதி³கதா²ய ந ஸமேதி. தத்த² ஹி ரூபியேன பரிவத்திதபத்தஸ்ஸ அபரிபோ⁴கோ³வ த³ஸ்ஸிதோ, ந நிஸ்ஸஜ்ஜனவிசாரோதி. கப்பியம் ஆசிக்கி²தப்³ப³ந்தி பப்³ப³ஜிதானம் ஸப்பி வா தேலம் வா வட்டதி உபாஸகாதி ஏவம் ஆசிக்கி²தப்³ப³ம்.

ஆராமிகானம் வா பத்தபா⁴க³ந்தி இத³ம் கி³ஹீனம் ஹத்த²க³தோபி ஸோயேவ பா⁴கோ³தி கத்வா வுத்தம். ஸசே பன தேன அஞ்ஞம் பரிவத்தேத்வா ஆராமிகா தே³ந்தி, பரிபு⁴ஞ்ஜிதும் வட்டதீதி மஜ்ஜி²மக³ண்டி²பதே³ சூளக³ண்டி²பதே³ ச வுத்தம். ததோ ஹரித்வாதி அஞ்ஞேஸம் பத்தபா⁴க³தோ ஹரித்வா. கஸிணபரிகம்மந்தி ஆலோககஸிணபரிகம்மம். மஞ்சபீடா²தீ³னி வாதி ஏத்த² ததோ க³ஹிதமஞ்சபீடா²தீ³னி பரிவத்தேத்வா அஞ்ஞம் சே க³ஹிதம், வட்டதீதி வத³ந்தி. சா²யாபீதி போ⁴ஜனஸாலாதீ³னம் சா²யாபி. பரிச்சே²தா³திக்கந்தாதி கே³ஹபரிச்சே²த³ம் அதிக்கந்தா, சா²யாய க³தக³தட்டா²னம் கே³ஹம் ந ஹோதீதி அதி⁴ப்பாயோ. மக்³கே³னபீதி ஏத்த² ஸசே அஞ்ஞோ மக்³கோ³ நத்தி², மக்³க³ம் அதி⁴ட்ட²ஹித்வா க³ந்தும் வட்டதீதி வத³ந்தி. கீதாயாதி தேன வத்து²னா கீதாய. உபனிக்கே²பம் ட²பேத்வா ஸங்கோ⁴ பச்சயே பரிபு⁴ஞ்ஜதீதி ஸசே உபாஸகோ ‘‘அதிப³ஹு ஏதம் ஹிரஞ்ஞம், இத³ம் ப⁴ந்தே அஜ்ஜேவ ந வினாஸேதப்³ப³’’ந்தி வத்வா ஸயம் உபனிக்கே²பம் ட²பேதி, அஞ்ஞேன வா ட²பாபேதி, ஏவம் உபனிக்கே²பம் ட²பேத்வா ததோ உப்பன்னபச்சயம் பரிபு⁴ஞ்ஜந்தோ ஸங்கோ⁴ பச்சயே பரிபு⁴ஞ்ஜதி, தேன வத்து²னா க³ஹிதத்தா ‘‘அகப்பிய’’ந்தி வுத்தம். விமதிவினோத³னியம் (வி. வி. டீ. 1.583-584) பன ‘‘உபனிக்கே²பம் ட²பேத்வாதி கப்பியகாரகேஹி வட்³டி⁴யா பயோஜனம் ஸந்தா⁴ய வுத்தம். அகப்பியந்தி தேன வத்து²னா க³ஹிதத்தா வுத்த’’ந்தி வுத்தம்.

ஸசே ஸோ ச²ட்³டே³தீதி யத்த² கத்த²சி கி²பதி, அதா²பி ந ச²ட்³டே³தி, ஸயம் க³ஹேத்வா க³ச்ச²தி, ந வாரேதப்³போ³. நோ சே ச²ட்³டே³தீதி அத² நேவ க³ஹேத்வா க³ச்ச²தி, ந ச²ட்³டே³தி, ‘‘கிம் மய்ஹம் இமினா ப்³யாபாரேனா’’தி யேனகாமம் பக்கமதி, ததோ யதா²வுத்தலக்க²ணோ ரூபியச²ட்³ட³கோ ஸமன்னிதப்³போ³. யோ ந ச²ந்தா³க³திந்திஆதீ³ஸு லோப⁴வஸேன தம் வத்து²ம் அத்தனோ வா கரோந்தோ அத்தானம் வா உக்கம்ஸேந்தோ ச²ந்தா³க³திம் நாம க³ச்ச²தி. தோ³ஸவஸேன ‘‘நேவாயம் மாதிகம் ஜானாதி, ந வினய’’ந்தி பரம் அபஸாதே³ந்தோ தோ³ஸாக³திம் நாம க³ச்ச²தி. மோஹவஸேன பமுட்டோ² பமுட்ட²ஸ்ஸதிபா⁴வம் ஆபஜ்ஜந்தோ மோஹாக³திம் நாம க³ச்ச²தி. ரூபியபடிக்³கா³ஹகஸ்ஸ ப⁴யேன ச²ட்³டே³தும் அவிஸஹந்தோ ப⁴யாக³திம் நாம க³ச்ச²தி. ஏவம் அகரோந்தோ ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி நாமாதி வேதி³தப்³போ³.

68. பதிதோகாஸம் அஸமன்னாரஹந்தேன ச²ட்³டே³தப்³ப³ந்தி இத³ம் நிரபேக்க²பா⁴வத³ஸ்ஸனபரந்தி வேதி³தப்³ப³ம், தஸ்மா பதிதட்டா²னே ஞாதேபி தஸ்ஸ கூ³த²ம் ச²ட்³டே³ந்தஸ்ஸ விய நிரபேக்க²பா⁴வோயேவேத்த² பமாணந்தி வேதி³தப்³ப³ம். அஸந்தஸம்பா⁴வனாயாதி அத்தனி அவிஜ்ஜமானஉத்தரிமனுஸ்ஸத⁴ம்மாரோசனம் ஸந்தா⁴ய வுத்தம். தே²ய்யபரிபோ⁴கோ³ நாம அனரஹஸ்ஸ பரிபோ⁴கோ³. ப⁴க³வதா ஹி அத்தனோ ஸாஸனே ஸீலவதோ பச்சயா அனுஞ்ஞாதா, ந து³ஸ்ஸீலஸ்ஸ. தா³யகானம்பி ஸீலவதோ ஏவ பரிச்சாகோ³, ந து³ஸ்ஸீலஸ்ஸ அத்தனோ காரானம் மஹப்ப²லபா⁴வஸ்ஸ பச்சாஸீஸனதோ. இதி ஸத்தா²ரா அனனுஞ்ஞாதத்தா தா³யகேஹி ச அபரிச்சத்தத்தா து³ஸ்ஸீலஸ்ஸ பரிபோ⁴கோ³ தே²ய்யபரிபோ⁴கோ³. இணவஸேன பரிபோ⁴கோ³ இணபரிபோ⁴கோ³, படிக்³கா³ஹகதோ த³க்கி²ணாவிஸுத்³தி⁴யா அபா⁴வதோ இணம் க³ஹேத்வா பரிபோ⁴கோ³ வியாதி அத்தோ². தஸ்மாதி ‘‘ஸீலவதோ’’திஆதி³னா வுத்தமேவத்த²ம் காரணபா⁴வேன பச்சாமஸதி. சீவரம் பரிபோ⁴கே³ பரிபோ⁴கே³தி காயதோ மோசேத்வா பரிபோ⁴கே³ பரிபோ⁴கே³. புரேப⁴த்த…பே… பச்சி²மயாமேஸு பச்சவேக்கி²தப்³ப³ந்தி ஸம்ப³ந்தோ⁴. ததா² அஸக்கோந்தேன யதா²வுத்தகாலவிஸேஸவஸேன ஏகஸ்மிம் தி³வஸே சதுக்க²த்தும் திக்க²த்தும் த்³விக்க²த்தும் ஸகிம்யேவ வா பச்சவேக்கி²தப்³ப³ம்.

ஸசஸ்ஸ அப்பச்சவேக்க²தோவ அருணோ உக்³க³ச்ச²தி, இணபரிபோ⁴க³ட்டா²னே திட்ட²தீதி ஏத்த² ஹிய்யோ யம் மயா சீவரம் பரிபு⁴த்தம், தம் யாவதே³வ ஸீதஸ்ஸ படிகா⁴தாய…பே… ஹிரிகோபினபடிச்சா²த³னத்த²ம். ஹிய்யோ யோ மயா பிண்ட³பாதோ பரிபு⁴த்தோ, ஸோ நேவ த³வாயாதிஆதி³னா ஸசே அதீதபரிபோ⁴க³பச்சவேக்க²ணம் ந கரேய்ய, இணபரிபோ⁴க³ட்டா²னே திட்ட²தீதி வத³ந்தி, தம் வீமம்ஸிதப்³ப³ம். ஸேனாஸனம்பி பரிபோ⁴கே³ பரிபோ⁴கே³தி பவேஸே பவேஸே. ஏவம் பன அஸக்கோந்தேன புரேப⁴த்தாதீ³ஸு பச்சவேக்கி²தப்³ப³ம், தம் ஹேட்டா² வுத்தனயேனேவ ஸக்கா விஞ்ஞாதுந்தி இத⁴ விஸும் ந வுத்தம். ஸதிபச்சயதாதி ஸதியா பச்சயபா⁴வோ. படிக்³க³ஹணஸ்ஸ பரிபோ⁴க³ஸ்ஸ ச பச்சவேக்க²ணஸதியா பச்சயபா⁴வோ யுஜ்ஜதி, பச்சவேக்கி²த்வாவ படிக்³க³ஹேதப்³ப³ம் பரிபு⁴ஞ்ஜிதப்³ப³ஞ்சாதி அத்தோ². தேனேவாஹ ‘‘ஸதிம் கத்வா’’திஆதி³. ஏவம் ஸந்தேபீதி யதி³பி த்³வீஸுபி டா²னேஸு பச்சவேக்க²ணா யுத்தா, ஏவம் ஸந்தேபி. அபரே பனாஹு ‘‘ஸதிபச்சயதாதி ஸதி பே⁴ஸஜ்ஜபரிபோ⁴க³ஸ்ஸ பச்சயபா⁴வே, பச்சயேதி அத்தோ². ஏவம் ஸந்தேபீதி பச்சயே ஸதிபீ’’தி, தம் தேஸம் மதிமத்தம். ததா² ஹி பச்சயஸன்னிஸ்ஸிதஸீலம் பச்சவேக்க²ணாய விஸுஜ்ஜ²தி, ந பச்சயஸப்³பா⁴வமத்தேன.

நனு ச ‘‘பரிபோ⁴கே³ கரோந்தஸ்ஸ அனாபத்தீ’’தி இமினா பாதிமோக்க²ஸம்வரஸீலம் வுத்தம், தஸ்மா பச்சயஸன்னிஸ்ஸிதஸீலஸ்ஸ பாதிமோக்க²ஸம்வரஸீலஸ்ஸ ச கோ விஸேஸோதி? வுச்சதே – புரிமேஸு தாவ தீஸு பச்சயேஸு விஸேஸோ பாகடோயேவ, கி³லானபச்சயே பன யதா² வதிம் கத்வா ருக்க²மூலே கோ³பிதே தஸ்ஸ ப²லானிபி ரக்கி²தானேவ ஹோந்தி, ஏவமேவ பச்சவேக்க²ணாய பச்சயஸன்னிஸ்ஸிதஸீலே ரக்கி²தே தப்படிப³த்³த⁴ம் பாதிமோக்க²ஸம்வரஸீலம்பி நிப்ப²ன்னம் நாம ஹோதி. கி³லானபச்சயம் அப்பச்சவேக்கி²த்வா பரிபு⁴ஞ்ஜந்தஸ்ஸ ஸீலம் பி⁴ஜ்ஜமானம் பாதிமோக்க²ஸம்வரஸீலமேவ பி⁴ஜ்ஜதி, பச்சயஸன்னிஸ்ஸிதஸீலம் பன பச்சா²ப⁴த்தபுரிமயாமாதீ³ஸு யாவ அருணுக்³க³மனா அப்பச்சவேக்க²ந்தஸ்ஸேவ பி⁴ஜ்ஜதி. புரேப⁴த்தஞ்ஹி அப்பச்சவேக்கி²த்வாபி கி³லானபச்சயம் பரிபு⁴ஞ்ஜந்தஸ்ஸ அனாபத்தி, இத³மேதேஸம் நானாகரணந்தி ஸாரத்த²தீ³பனியம் (ஸாரத்த². டீ. 2.585) ஆக³தம்.

விமதிவினோத³னியம் (வி. வி. டீ. 1.585) பன ‘‘தே²ய்யபரிபோ⁴கோ³தி பச்சயஸ்ஸாமினா ப⁴க³வதா அனனுஞ்ஞாதத்தா வுத்தம். இணபரிபோ⁴கோ³தி ப⁴க³வதா அனுஞ்ஞாதம்பி கத்தப்³ப³ம் அகத்வா பரிபு⁴ஞ்ஜனதோ வுத்தம். தேன ச பச்சயஸன்னிஸ்ஸிதஸீலம் விபஜ்ஜதீதி த³ஸ்ஸேதி. பரிபோ⁴கே³ பரிபோ⁴கே³தி காயதோ மோசேத்வா மோசேத்வா பரிபோ⁴கே³. பச்சி²மயாமேஸு பச்சவேக்கி²தப்³ப³ந்தி யோஜனா. இணபரிபோ⁴க³ட்டா²னே திட்ட²தீதி ஏத்த² ‘ஹிய்யோ யம் மயா சீவரம் பரிபு⁴த்த’ந்திஆதி³னாபி அதீதபச்சவேக்க²ணா வட்டதீதி வத³ந்தி. பரிபோ⁴கே³ பரிபோ⁴கே³தி உத³கபதனட்டா²னதோ அந்தோபவேஸனேஸு நிஸீத³னஸயனேஸு ச. ஸதிபச்சயதா வட்டதீதி பச்சவேக்க²ணஸதியா பச்சயத்தம் லத்³து⁴ம் வட்டதி. படிக்³க³ஹணே ச பரிபோ⁴கே³ ச பச்சவேக்க²ணாஸதி அவஸ்ஸம் லத்³த⁴ப்³பா³தி த³ஸ்ஸேதி. தேனாஹ ‘ஸதிம் கத்வா’திஆதி³. கேசி பன ‘ஸதிபச்சயதா பச்சயே ஸதி பே⁴ஸஜ்ஜபரிபோ⁴க³ஸ்ஸ காரணே ஸதீ’தி ஏவம்பி அத்த²ம் வத³ந்தி, தேஸம்பி பச்சயே ஸதீதி பச்சயஸப்³பா⁴வஸல்லக்க²ணே ஸதீதி ஏவமத்தோ² க³ஹேதப்³போ³ பச்சயஸப்³பா⁴வமத்தேன ஸீலஸ்ஸ அஸுஜ்ஜ²னதோ. பரிபோ⁴கே³ அகரோந்தஸ்ஸேவ ஆபத்தீதி இமினா பாதிமோக்க²ஸம்வரஸீலஸ்ஸ பே⁴தோ³ த³ஸ்ஸிதோ, ந பச்சயஸன்னிஸ்ஸிதஸீலஸ்ஸ தஸ்ஸ அதீதபச்சவேக்க²ணாய விஸுஜ்ஜ²னதோ. ஏதஸ்மிம் பன ஸேஸபச்சயேஸு ச இணபரிபோ⁴கா³தி³வசனேன பச்சயஸன்னிஸ்ஸிதஸீலஸ்ஸேவ பே⁴தோ³தி ஏவமிமேஸம் நானாகரணம் வேதி³தப்³ப³’’ந்தி ஆக³தம்.

ஏதேஸு த்³வீஸு பகரணேஸு ‘‘இணபரிபோ⁴க³ட்டா²னே திட்ட²தீ’’தி ஏத்த² ஹிய்யோ யம் மயா சீவரம் பரிபு⁴த்தந்தி…பே… வத³ந்தீதி ஆக³தம். இமம் பன நயம் நிஸ்ஸாய இதா³னி ஏகச்சே பண்டி³தா ‘‘அஜ்ஜபாதோ பரிபு⁴த்தம் ஸாயம் பச்சவேக்க²ந்தேன அஜ்ஜ யம் மயா சீவரம் பரிபு⁴த்தந்திஆதி³னா அதீதவஸேன பச்சவேக்க²ணா காதப்³பா³’’தி வத³ந்தி. கேசி ‘‘ஹிய்யோ பரிபு⁴த்தமேவ அதீதவஸேன பச்சவேக்க²ணா காதப்³பா³, ந அஜ்ஜ பரிபு⁴த்தம், தம் பன பச்சுப்பன்னவஸேன பச்சவேக்க²ணாயேவா’’தி வத³ந்தி. தத்த² மூலவசனே ஏவம் விசாரணா காதப்³பா³. கத²ம்? இத³ம் ஹிய்யோத்யாதி³வசனம் ஸுத்தம் வா ஸுத்தானுலோமம் வா ஆசரியவாதோ³ வா அத்தனோமதி வாதி. தத்த² ந தாவ ஸுத்தம் ஹோதி ‘‘ஸுத்தம் நாம ஸகலே வினயபிடகே பாளீ’’தி வுத்தத்தா இமஸ்ஸ ச வசனஸ்ஸ ந பாளிபூ⁴தத்தா. ந ச ஸுத்தானுலோமம் ‘‘ஸுத்தானுலோமம் நாம சத்தாரோ மஹாபதே³ஸா’’தி (பாரா. அட்ட². 1.45) வுத்தத்தா இமஸ்ஸ ச மஹாபதே³ஸபா⁴வாபா⁴வதோ. ந ச ஆசரியவாதோ³ ‘‘ஆசரியவாதோ³ நாம த⁴ம்மஸங்கா³ஹகேஹி பஞ்சஹி அரஹந்தஸதேஹி ட²பிதா பாளிவினிமுத்தா ஓக்கந்தவினிச்ச²யப்பவத்தா அட்ட²கதா²தந்தீ’’தி வசனதோ இமஸ்ஸ ச அட்ட²கதா²பாட²பா⁴வாபா⁴வதோ. ந ச அத்தனோமதி ‘‘அத்தனோமதி நாம ஸுத்தஸுத்தானுலோமஆசரியவாதே³ முஞ்சித்வா அனுமானேன அத்தனோ பு³த்³தி⁴யா நயக்³கா³ஹேன உபட்டி²தாகாரகத²னம், அபிச ஸுத்தந்தாபி⁴த⁴ம்மவினயட்ட²கதா²ஸு ஆக³தோ ஸப்³போ³பி தே²ரவாதோ³ அத்தனோமதி நாமா’’தி வுத்தத்தா இமஸ்ஸ ச அட்ட²கதா²ஸு ஆக³தத்தே²ரவாத³பா⁴வாபா⁴வதோ.

இதி –

‘‘சதுப்³பி³த⁴ஞ்ஹி வினயம், மஹாதே²ரா மஹித்³தி⁴கா;

நீஹரித்வா பகாஸேஸும், த⁴ம்மஸங்கா³ஹகா புரா’’தி. (பாரா. அட்ட². 1.45) –

வுத்தேஸு சதுப்³பி³த⁴வினயேஸு அனந்தோக³த⁴த்தா இத³ம் வசனம் விசாரேதப்³ப³ம். தேன வுத்தம் ஸாரத்த²தீ³பனியம் (ஸாரத்த². டீ. 2.585) டீகாசரியேன ‘‘தம் வீமம்ஸிதப்³ப³’’ந்தி. அத² வா ‘‘நயக்³கா³ஹேன உபட்டி²தாகாரகத²ன’’ந்தி இமினா லக்க²ணேன தேஸம் தேஸம் ஆசரியானம் உபட்டி²தாகாரவஸேன கத²னம் அத்தனோமதி ஸியா, ஏவம்பி விசாரேதப்³ப³மேவ. ‘‘அத்தனோமதி ஆசரியவாதே³ ஓதாரேதப்³பா³. ஸசே தத்த² ஓதரதி சேவ ஸமேதி ச, க³ஹேதப்³பா³. ஸசே நேவ ஓதரதி ந ஸமேதி, ந க³ஹேதப்³பா³. அயஞ்ஹி அத்தனோமதி நாம ஸப்³ப³து³ப்³ப³லா’’தி (பாரா. அட்ட². 1.45) வசனதோ இமஸ்ஸ ச வசனஸ்ஸ அட்ட²கதா²வசனே அனோதரணதோ அப்பவிஸனதோ. வுத்தஞ்ஹி அட்ட²கதா²யம் ‘‘ஸசஸ்ஸ அப்பச்சவேக்க²தோவ அருணோ உக்³க³ச்ச²தி, இணபரிபோ⁴க³ட்டா²னே திட்ட²தீ’’தி.

அபரோ நயோ – கிம் இத³ம் வசனம் பாளிவசனம் வா அட்ட²கதா²வசனம் வா டீகாவசனம் வா க³ந்த²ந்தரவசனம் வாதி. தத்த² ந தாவ பாளிவசனம், ந அட்ட²கதா²வசனம், ந க³ந்த²ந்தரவசனம், அத² கோ² டீகாவசனந்தி. ஹோது டீகாவசனம், ஸகவசனம் வா பரவசனம் வா அதி⁴ப்பேதவசனம் வா அனதி⁴ப்பேதவசனம் வாதி. தத்த² ந ஸகவசனம் ஹோதி, அத² கோ² பரவசனம். தேனாஹ ‘‘வத³ந்தீ’’தி. ந டீகாசரியேன அதி⁴ப்பேதவசனம் ஹோதி, அத² கோ² அனதி⁴ப்பேதவசனம். தேனாஹ ‘‘தம் வீமம்ஸிதப்³ப³’’ந்தி. தேஹி பன ஆசரியேஹி அதீதபரிபோ⁴க³பச்சவேக்க²ணாதி இத³ம் அதீதபஅபோ⁴க³வஸேன பச்சவேக்க²ணா அதீதபரிபோ⁴க³பச்சவேக்க²ணாதி பரிகப்பேத்வா அதீதவாசகேன ஸத்³தே³ன யோஜேத்வா கதம் ப⁴வேய்ய. அதீதே பரிபோ⁴கோ³ அதீதபரிபோ⁴கோ³, அதீதபரிபோ⁴க³ஸ்ஸ பச்சவேக்க²ணா அதீதபரிபோ⁴க³பச்சவேக்க²ணாதி ஏவம் பன கதே அதீதபரிபோ⁴க³ஸ்ஸ பச்சுப்பன்னஸமீபத்தா பச்சுப்பன்னவாசகேன ஸத்³தே³ன கத²னம் ஹோதி யதா² தம் நக³ரதோ ஆக³ந்த்வா நிஸின்னம் புரிஸம் ‘‘குதோ ஆக³ச்ச²ஸீ’’தி வுத்தே ‘‘நக³ரதோ ஆக³ச்சா²மீ’’தி பச்சுப்பன்னவாசகஸத்³தே³ன கத²னம்.

வினயஸுத்தந்தவிஸுத்³தி⁴மக்³கா³தீ³ஸு (ம. நி. 1.23; விஸுத்³தி⁴. 1.18) ச ‘‘படிஸங்கா² யோனிஸோ சீவரம் படிஸேவதீ’’தி வத்தமானவசனேனேவ பாடோ² ஹோதி, ந அதீதவசனேன, அதீதபரிபோ⁴கோ³தி ச இமஸ்மிம்யேவ தி³வஸே பச்சா²ப⁴த்தாதி³காலம் உபாதா³ய புரேப⁴த்தாதீ³ஸு பரிபோ⁴கோ³ இச்சி²தப்³போ³, ந ஹிய்யோ பரிபோ⁴கோ³. கத²ம் விஞ்ஞாயதீதி சே? அட்ட²கதா²பமாணேன. வுத்தஞ்ஹி அட்ட²கதா²யம் (பாரா. அட்ட². 2.585) ‘‘பிண்ட³பாதோ ஆலோபே ஆலோபே, ததா² அஸக்கோந்தேன புரேப⁴த்தபச்சா²ப⁴த்தபுரிமயாமபச்சி²மயாமேஸு. ஸசஸ்ஸ அப்பச்சவேக்க²தோவ அருணோ உக்³க³ச்ச²தி, இணபரிபோ⁴க³ட்டா²னே திட்ட²தீ’’தி. ஏதேன பிண்ட³பாதம் ஆலோபே ஆலோபே பச்சவேக்க²ந்தோ போ⁴ஜனகிரியாய அபரினிட்டி²தத்தா முக்²யதோ பச்சுப்பன்னபச்சவேக்க²ணா ஹோதி, புரேப⁴த்தாதீ³ஸு சதூஸு கோட்டா²ஸேஸு பச்சவேக்க²ந்தோ போ⁴ஜனகிரியாய பரினிட்டி²தத்தா அதீதபச்சவேக்க²ணா ஹோதீதி த³ஸ்ஸேதி. ஸா பன பச்சுப்பன்னஸமீபத்தா வத்தமானவசனேன விதீ⁴யதி. யதி³ ஹி ஹிய்யோ பரிபு⁴த்தானி அதீதபச்சவேக்க²ணேன பச்சவேக்கி²தப்³பா³னி ஸியும், அதீதது³தியதி³வஸததியதி³வஸாதி³மாஸஸம்வச்ச²ராதி³பரிபு⁴த்தானிபி பச்சவேக்கி²தப்³பா³னி ஸியும், ஏவஞ்ச ஸதி யதா²வுத்தஅட்ட²கதா²வசனம் நிரத்த²கம் ஸியா, தஸ்மா அட்ட²கதா²வசனமேவ பமாணம் காதப்³ப³ம். யதா²ஹ –

‘‘பு³த்³தே⁴ன த⁴ம்மோ வினயோ ச வுத்தோ;

யோ தஸ்ஸ புத்தேஹி ததே²வ ஞாதோ;

ஸோ யேஹி தேஸம் மதிமச்சஜந்தா;

யஸ்மா புரே அட்ட²கதா² அகம்ஸு.

‘‘தஸ்மா ஹி யம் அட்ட²கதா²ஸு வுத்தம்;

தம் வஜ்ஜயித்வான பமாத³லேக²ம்;

ஸப்³ப³ம்பி ஸிக்கா²ஸு ஸகா³ரவானம்;

யஸ்மா பமாணம் இத⁴ பண்டி³தான’’ந்தி. (பாரா. அட்ட². 1.க³ந்தா²ரம்ப⁴கதா²);

யஸ்மா ச ஸப்³பா³ஸவஸுத்தாதீ³ஸு (ம. நி. 1.23) ப⁴க³வதா தே³ஸிதகாலே பி⁴க்கு²கத்துகத்தா நாமயோக³த்தா வத்தமானபட²மபுரிஸவஸேன ‘‘படிஸங்கா² யோனிஸோ சீவரம் படிஸேவதீ’’தி தே³ஸிதா, தத³னுகரணேன பி⁴க்கூ²னம் பச்சவேக்க²ணகாலே அத்தகத்துகத்தா அம்ஹயோக³த்தா வத்தமானஉத்தமபுரிஸவஸேன ‘‘படிஸங்கா² யோனிஸோ சீவரம் படிஸேவாமீ’’தி பச்சவேக்கி²தப்³பா³ ஹோதி, ‘‘ஸீதஸ்ஸ படிகா⁴தாயா’’திஆதீ³னி தத³த்த²ஸம்பதா³னபதா³னி ச ‘‘படிஸேவதி, படிஸேவாமீ’’தி வுத்தபடிஸேவனகிரியாயமேவ ஸம்ப³ந்தி⁴தப்³பா³னி ஹோந்தி, தானி ச கிரியாபதா³னி பச்சுப்பன்னவஸேன வா பச்சுப்பன்னஸமீபஅதீதவஸேன வா வத்தமானவிப⁴த்தியுத்தானி ஹோந்தி, தஸ்மா பச்சுப்பன்னபரிபு⁴த்தானம் வா அதீதபரிபு⁴த்தானம் வா பச்சயானம் பச்சவேக்க²ணகாலே ‘‘படிஸேவாமீ’’தி வசனம் ப⁴க³வதோ வசனஸ்ஸ அனுக³தத்தா உபபன்னமேவாதி த³ட்ட²ப்³ப³ம்.

அனுவசனேபி ஏவம் விசாரணா காதப்³பா³ – ‘‘அஜ்ஜ பாதோ பரிபு⁴த்தம் ஸாயம் பச்சவேக்க²ந்தேன அஜ்ஜ யம் மயா சீவரம் பரிபு⁴த்தந்திஆதி³னா அதீதவஸேன பச்சவேக்க²ணா காதப்³பா³’’தி யே வத³ந்தி, தே ஏவம் புச்சி²தப்³பா³ – கிம் ப⁴வந்தோ ப⁴க³வதா அதீதபரிபு⁴த்தேஸு அதீதவஸேன பச்சவேக்க²ணா தே³ஸிதாதி? ந தே³ஸிதா. கத²ம் தே³ஸிதாதி? ‘‘பச்சவேக்க²தீ’’தி பச்சுப்பன்னவஸேனேவ தே³ஸிதாதி. கிம் போ⁴ந்தோ ப⁴க³வதோ காலே அதீதபரிபு⁴த்தேஸு பச்சவேக்க²ணா நத்தீ²தி? அத்தி². அத² கஸ்மா ப⁴க³வதா பச்சுப்பன்னவஸேனேவ பச்சவேக்க²ணா தே³ஸிதாதி? பச்சுப்பன்னஸமீபவஸேன வா ஸாமஞ்ஞவஸேன வா தே³ஸிதாதி. ஏவம் ஸந்தே ப⁴க³வதோ அனுகரணேன இதா³னிபி அதீதபரிபு⁴த்தானம் பச்சயானம் பச்சுப்பன்னவஸேன பச்சவேக்க²ணா காதப்³பா³தி. யே பன ஏவம் வத³ந்தி ‘‘ஹிய்யோ பரிபு⁴த்தானமேவ அதீதபச்சவேக்க²ணா காதப்³பா³, ந அஜ்ஜ பரிபு⁴த்தானம், தேஸம் பன பச்சுப்பன்னபச்சவேக்க²ணாயேவா’’தி, தே ஏவம் வத்தப்³பா³ – கிம் போ⁴ந்தோ யதா² தும்ஹே வத³ந்தி, ஏவம் பாளியம் அத்தீ²தி? நத்தி². அட்ட²கதா²யம் அத்தீ²தி? நத்தி². ஏவம் ஸந்தே ஸாட்ட²கதே²ஸு தேபிடகேஸு பு³த்³த⁴வசனேஸு அஸம்விஜ்ஜமானம் தும்ஹாகம் வசனம் கத²ம் பச்சேதப்³ப³ந்தி? ஆசரியபரம்பராவஸேன. ஹோது தும்ஹாகம் ஆசரியலத்³தி⁴வஸேன கத²னம், காலோ நாம திவிதோ⁴ அதீதோ அனாக³தோ பச்சுப்பன்னோதி. தத்த² பரினிட்டி²தகிரியா அதீதோ நாம, அபி⁴முக²கிரியா அனாக³தோ நாம, ஆரத்³த⁴அனிட்டி²தகிரியா பச்சுப்பன்னோ நாம. தேனாஹு போராணா –

‘‘ஆரத்³தா⁴னிட்டி²தோ பா⁴வோ, பச்சுப்பன்னோ ஸுனிட்டி²தோ;

அதீதானாக³துப்பாத³-மப்பத்தாபி⁴முகா² கிரியா’’தி.

தத்த² அஜ்ஜ வா ஹோது ஹிய்யோ வா ததோ புப்³பே³ வா, பரிபு⁴த்தபச்சயோ ஸுபரினிட்டி²தபு⁴ஞ்ஜனகிரியத்தா அதீதோ நாம. தத்த² ஹிய்யோ வா ததோ புப்³பே³ வா பரிபு⁴த்தபச்சயோ அதிக்கந்தஅருணுக்³க³மனத்தா ந பச்சவேக்க²ணாரஹோ, பச்சவேக்கி²தோபி அப்பச்சவேக்கி²தோயேவ ஹோதி, இணபரிபோ⁴க³ட்டா²னே திட்ட²தி. வுத்தஞ்ஹி அட்ட²கதா²யம் ‘‘ஸசஸ்ஸ அப்பச்சவேக்க²தோவ அருணோ உக்³க³ச்ச²தி, இணபரிபோ⁴க³ட்டா²னே திட்ட²தீ’’தி. அஜ்ஜேவ பன சீவரஞ்ச ஸேனாஸனஞ்ச பரிபோ⁴கே³ பரிபோ⁴கே³, பிண்ட³பாதம் ஆலோபே ஆலோபே, பே⁴ஸஜ்ஜம் படிக்³க³ஹணே பரிபோ⁴கே³ ச பச்சவேக்க²தோ அபரினிட்டி²தபு⁴ஞ்ஜனகிரியத்தா பச்சுப்பன்னபரிபு⁴த்தபச்சவேக்க²ணா நாம ஹோதி. புரே பரிபு⁴த்தம் ததோ பச்சா² சதூஸு கோட்டா²ஸேஸு பச்சவேக்க²தோ ஸுபரினிட்டி²தபு⁴ஞ்ஜனகிரியத்தா அதீதபரிபு⁴த்தபச்சவேக்க²ணா நாம ஹோதி. ஏத்தகம் பச்சவேக்க²ணாய கே²த்தம், ந ததோ புப்³பே³ பச்சா² வா. யதா²ஹ அட்ட²கதா²யம் ‘‘ஸீலவதோ அப்பச்சவேக்கி²தபரிபோ⁴கோ³ இணபரிபோ⁴கோ³ நாம. தஸ்மா சீவரம் பரிபோ⁴கே³ பரிபோ⁴கே³…பே… பே⁴ஸஜ்ஜஸ்ஸ படிக்³க³ஹணேபி பரிபோ⁴கே³பி ஸதிபச்சயதா வட்டதீ’’தி, தஸ்மா ஹிய்யோ பரிபு⁴த்தஸ்ஸ இணபரிபோ⁴க³த்தா தம் அனாமஸித்வா அஜ்ஜ பரிபு⁴த்தேஸு அதீதபச்சுப்பன்னேஸு ப⁴க³வதோ வசனஸ்ஸ அனுகரணேன வத்தமானவிப⁴த்தியுத்தேன ‘‘படிஸேவாமீ’’தி கிரியாபதே³ன பச்சவேக்க²ணா ஸூபபன்னா ஹோதீதி த³ட்ட²ப்³பா³. ஈதி³ஸபச்சவேக்க²ணமேவ ஸந்தா⁴ய விமதிவினோத³னியாதீ³ஸு (வி. வி. டீ. 1.585) ‘‘பச்சயஸன்னிஸ்ஸிதஸீலஸ்ஸ அதீதபச்சவேக்க²ணாய விஸுஜ்ஜ²னதோ’’தி வுத்தம்.

ஏவம் பச்சயஸன்னிஸ்ஸிதஸீலஸ்ஸ ஸுத்³தி⁴ம் த³ஸ்ஸேத்வா இதா³னி தேனேவ பஸங்கே³ன ஸப்³பா³பி ஸுத்³தி⁴யோ த³ஸ்ஸேதும் ‘‘சதுப்³பி³தா⁴ ஹி ஸுத்³தீ⁴’’திஆதி³மாஹ. தத்த² ஸுஜ்ஜ²தி ஏதாயாதி ஸுத்³தி⁴, யதா²த⁴ம்மம் தே³ஸனாவ ஸுத்³தி⁴ தே³ஸனாஸுத்³தி⁴. வுட்டா²னஸ்ஸபி சேத்த² தே³ஸனாய ஏவ ஸங்க³ஹோ த³ட்ட²ப்³போ³. சி²ன்னமூலாபத்தீனம் பன அபி⁴க்கு²தாபடிஞ்ஞாயேவ தே³ஸனா. அதி⁴ட்டா²னவிஸிட்டோ² ஸம்வரோவ ஸுத்³தி⁴ ஸம்வரஸுத்³தி⁴. த⁴ம்மேன ஸமேன பச்சயானம் பரியேட்டி² ஏவ ஸுத்³தி⁴ பரியேட்டி²ஸுத்³தி⁴. சதூஸு பச்சயேஸு வுத்தவிதி⁴னா பச்சவேக்க²ணாவ ஸுத்³தி⁴ பச்சவேக்க²ணஸுத்³தி⁴. ஏஸ தாவ ஸுத்³தீ⁴ஸு ஸமாஸனயோ. ஸுத்³தி⁴மந்தேஸு ஸீலேஸு பன தே³ஸனா ஸுத்³தி⁴ ஏதஸ்ஸாதி தே³ஸனாஸுத்³தி⁴. ஸேஸேஸுபி ஏஸேவ நயோ. ந புனேவம் கரிஸ்ஸாமீதி ஏத்த² ஏவந்தி ஸம்வரபே⁴த³ம் ஸந்தா⁴யாஹ. பஹாயாதி வஜ்ஜேத்வா, அகத்வாதி அத்தோ². விமதிவினோத³னியம் பன ‘‘ஸுஜ்ஜ²தி தே³ஸனாதீ³ஹி, ஸோதீ⁴யதீதி வா ஸுத்³தி⁴, சதுப்³பி³த⁴ஸீலம். தேனாஹ ‘தே³ஸனாய ஸுஜ்ஜ²னதோ’திஆதி³. ஏத்த² தே³ஸனாக்³க³ஹணேன வுட்டா²னம்பி சி²ன்னமூலானம் அபி⁴க்கு²தாபடிஞ்ஞாபி ஸங்க³ஹிதா. சி²ன்னமூலாபத்தீனம்பி ஹி பாராஜிகாபத்திவுட்டா²னேன ஹேட்டா²பரிரக்கி²தம் பி⁴க்கு²ஸீலம் விஸுத்³த⁴ம் நாம ஹோதி. தேன தேஸம் மக்³க³படிலாபோ⁴பி ஸம்பஜ்ஜதீ’’தி வுத்தம்.

தத்த² தே³ஸீயதி உச்சாரீயதீதி தே³ஸனா, தி³ஸீ உச்சாரணேதி தா⁴து, தே³ஸீயதி ஞாபீயதி ஏதாயாதி வா தே³ஸனா, தி³ஸ பேக்க²னேதி தா⁴து. உப⁴யதா²பி விரதிபதா⁴னகுஸலசித்தஸமுட்டி²தோ தே³ஸனாவசீபே⁴த³ஸத்³தோ³. ஸம்வரணம் ஸம்வரோ, ஸம்-புப்³ப³ வர ஸம்வரணேதி தா⁴து, ஸதிபதா⁴னோ சித்துப்பாதோ³. பரியேஸனா பரியேட்டி², பரி-புப்³ப³ இஸ பரியேஸனேதி தா⁴து, வீரியபதா⁴னோ சித்துப்பாதோ³. படி புனப்புனம் ஓகா³ஹேத்வா இக்க²னா பச்சவேக்க²ணா, படி-புப்³ப³ அவ-புப்³ப³ இக்க² த³ஸ்ஸனங்கேஸூதி தா⁴து, பஞ்ஞாபதா⁴னோ சித்துப்பாதோ³. தேஸு தே³ஸனாய வசீபே⁴த³ஸத்³த³பா⁴வதோ வசீபே⁴த³ம் காதும் அஸக்கோந்தஸ்ஸ ச து³தியகம் அலப⁴ந்தஸ்ஸ ச ந ஸம்பஜ்ஜதி, ஸேஸா பன சித்துப்பாத³மத்தபா⁴வதோ வசீபே⁴த³ம் காதும் அஸக்கோந்தஸ்ஸபி து³தியகம் அலப⁴ந்தஸ்ஸபி ஸம்பஜ்ஜந்தி ஏவ, தஸ்மா கி³லானாதி³காலேஸு பச்சவேக்க²ணாபாட²ம் படி²துமஸக்கோந்தேனபி அத்த²ம் மனஸி கத்வா சித்தேனேவ பச்சவேக்க²ணா காதப்³பா³தி.

தா³தப்³ப³ட்டே²ன தா³யம், தம் ஆதி³யந்தீதி தா³யாதா³, அனனுஞ்ஞாதேஸு ஸப்³பே³ன ஸப்³ப³ம் பரிபோ⁴கா³பா⁴வதோ அனுஞ்ஞாதேஸுயேவ ச பரிபோ⁴க³ஸப்³பா⁴வபா⁴வதோ பி⁴க்கூ²ஹி பரிபு⁴ஞ்ஜிதப்³ப³பச்சயா ப⁴க³வதோ ஸந்தகா. த⁴ம்மதா³யாத³ஸுத்தஞ்சேத்த² ஸாத⁴கந்தி ‘‘த⁴ம்மதா³யாதா³ மே, பி⁴க்க²வே, ப⁴வத², மா ஆமிஸதா³யாதா³, அத்தி² மே தும்ஹேஸு அனுகம்பா, கிந்தி மே ஸாவகா த⁴ம்மதா³யாதா³ ப⁴வேய்யும், நோ ஆமிஸதா³யாதா³’’தி ஏவம் பவத்தம் த⁴ம்மதா³யாத³ஸுத்தஞ்ச (ம. நி. 1.29) ஏத்த² ஏதஸ்மிம் அத்தே² ஸாத⁴கம். அவீதராகா³னம் தண்ஹாவஸீகதாய பச்சயபரிபோ⁴கே³ ஸாமிபா⁴வோ நத்தி², தத³பா⁴வேன வீதராகா³னம் தத்த² ஸாமிபா⁴வோ யதா²ருசி பரிபோ⁴க³ஸப்³பா⁴வதோ. ததா² ஹி தே படிகூலம்பி அப்படிகூலாகாரேன அப்படிகூலம்பி படிகூலாகாரேன தது³ப⁴யம்பி வஜ்ஜேத்வா அஜ்ஜு²பேக்க²ணாகாரேன பச்சயே பரிபு⁴ஞ்ஜந்தி, தா³யகானஞ்ச மனோரத²ம் பரிபூரேந்தி. தேனாஹ ‘‘தே ஹி தண்ஹாய தா³ஸப்³யம் அதீதத்தா ஸாமினோ ஹுத்வா பரிபு⁴ஞ்ஜந்தீ’’தி. யோ பனாயம் ஸீலவதோ புது²ஜ்ஜனஸ்ஸ பச்சவேக்கி²தபரிபோ⁴கோ³, ஸோ இணபரிபோ⁴க³ஸ்ஸ பச்சனீகத்தா ஆனண்யபரிபோ⁴கோ³ நாம ஹோதி. யதா² பன இணாயிகோ அத்தனோ ருசியா இச்சி²தம் தே³ஸம் க³ந்தும் ந லப⁴தி, ஏவம் இணபரிபோ⁴க³யுத்தோ லோகதோ நிஸ்ஸரிதும் ந லப⁴தீதி தப்படிபக்க²த்தா ஸீலவதோ பச்சவேக்கி²தபரிபோ⁴கோ³ ஆனண்யபரிபோ⁴கோ³தி வுச்சதி, தஸ்மா நிப்பரியாயதோ சதுபரிபோ⁴க³வினிமுத்தோ விஸும்யேவாயம் பரிபோ⁴கோ³தி வேதி³தப்³போ³, ஸோ இத⁴ விஸும் ந வுத்தோ, தா³யஜ்ஜபரிபோ⁴கே³யேவ வா ஸங்க³ஹம் க³ச்ச²தீதி. ஸீலவாபி ஹி இமாய ஸிக்கா²ய ஸமன்னாக³தத்தா ஸேக்கோ²த்வேவ வுச்சதி.

ஸப்³பே³ஸந்தி அரியானம் புது²ஜ்ஜனானஞ்ச. கத²ம் புது²ஜ்ஜனானம் இமே பரிபோ⁴கா³ ஸம்ப⁴வந்தீதி? உபசாரவஸேன. யோ ஹி புது²ஜ்ஜனஸ்ஸபி ஸல்லேக²படிபத்தியம் டி²தஸ்ஸ பச்சயகே³த⁴ம் பஹாய தத்த² அனுபலித்தேன சித்தேன பரிபோ⁴கோ³, ஸோ ஸாமிபரிபோ⁴கோ³ விய ஹோதி. ஸீலவதோ பன பச்சவேக்கி²தபரிபோ⁴கோ³ தா³யஜ்ஜபரிபோ⁴கோ³ விய ஹோதி தா³யகானம் மனோரத²ஸ்ஸாவிராத⁴னதோ. தேன வுத்தம் ‘‘தா³யஜ்ஜபரிபோ⁴கே³யேவ வா ஸங்க³ஹம் க³ச்ச²தீ’’தி. கல்யாணபுது²ஜ்ஜனஸ்ஸ பரிபோ⁴கே³ வத்தப்³ப³மேவ நத்தி² தஸ்ஸ ஸேக்க²ஸங்க³ஹதோ. ஸேக்க²ஸுத்த ஞ்ஹேதஸ்ஸ (அ. நி. 3.86) அத்த²ஸ்ஸ ஸாத⁴கம்.

விமதிவினோத³னியம் (வி. வி. டீ. 1.585) பன ‘‘தா³தப்³ப³ட்டே²ன தா³யம், தம் ஆதி³யந்தீதி தா³யாதா³. ஸத்தன்னம் ஸேக்கா²னந்தி ஏத்த² கல்யாணபுது²ஜ்ஜனாபி ஸங்க³ஹிதா தேஸம் ஆனண்யபரிபோ⁴க³ஸ்ஸ தா³யஜ்ஜபரிபோ⁴கே³ ஸங்க³ஹிதத்தாதி வேதி³தப்³ப³ம். த⁴ம்மதா³யாத³ஸுத்தந்தி ‘‘த⁴ம்மதா³யாதா³ மே, பி⁴க்க²வே, ப⁴வத², மா ஆமிஸதா³யாதா³’’திஆதி³னா பவத்தம் ஸுத்தம் (ம. நி. 1.29). தத்த² ‘‘மா மே ஆமிஸதா³யாதா³தி ஏவம் மே-ஸத்³த³ம் ஆனேத்வா அத்தோ² வேதி³தப்³போ³. ஏவஞ்ஹி யதா²வுத்தத்த²ஸாத⁴கம் ஹோதீ’’தி வுத்தம். தத்த² மே மம ஆமிஸதா³யாதா³ சதுபச்சயபு⁴ஞ்ஜகாதி ப⁴க³வதோ ஸம்ப³ந்த⁴பூ⁴தஸ்ஸ ஸம்ப³ந்தீ⁴பூ⁴தா பச்சயா வுத்தா, தஸ்மா தா³யகேஹி தி³ன்னாபி பச்சயா ப⁴க³வதா அனுஞ்ஞாதத்தா ப⁴க³வதோ பச்சயாயேவ ஹோந்தீதி ஏதஸ்ஸ அத்த²ஸ்ஸ த⁴ம்மதா³யாத³ஸுத்தம் ஸாத⁴கம் ஹோதீதி அத்தோ²தி வுத்தம்.

லஜ்ஜினா ஸத்³தி⁴ம் பரிபோ⁴கோ³ நாம லஜ்ஜிஸ்ஸ ஸந்தகம் க³ஹேத்வா பரிபோ⁴கோ³. அலஜ்ஜினா ஸத்³தி⁴ந்தி ஏத்தா²பி ஏஸேவ நயோ. ஆதி³தோ பட்டா²ய ஹி அலஜ்ஜீ நாம நத்தீ²தி இமினா தி³ட்ட²தி³ட்டே²ஸுயேவ ஆஸங்கா ந காதப்³பா³தி த³ஸ்ஸேதி. அத்தனோ பா⁴ரபூ⁴தா ஸத்³தி⁴விஹாரிகாத³யோ. தேபி நிவாரேதப்³பா³தி யோ பஸ்ஸதி, தேன நிவாரேதப்³பா³தி பாடோ². அட்ட²கதா²யம் பன ‘‘யோபி அத்தனோ பா⁴ரபூ⁴தேன அலஜ்ஜினா ஸத்³தி⁴ம் பரிபோ⁴க³ம் கரோதி, ஸோபி நிவாரேதப்³போ³’’தி பாடோ² தி³ஸ்ஸதி, ததா²பி அத்த²தோ உப⁴யதா²பி யுஜ்ஜதி. அத்தனோ ஸத்³தி⁴விஹாரிகாத³யோபி அலஜ்ஜிபா⁴வதோ நிவாரேதப்³பா³. அலஜ்ஜீஹி ஸத்³தி⁴விஹாரிகாதீ³ஹி ஏகஸம்போ⁴க³ம் கரோந்தா அஞ்ஞேபி நிவாரேதப்³பா³வ. ஸசே ந ஓரமதி, அயம்பி அலஜ்ஜீயேவ ஹோதீதி ஏத்த² ஏவம் நிவாரிதோ ஸோ புக்³க³லோ அலஜ்ஜினா ஸத்³தி⁴ம் பரிபோ⁴க³தோ ஓரமதி விரமதி, இச்சேதம் குஸலம். நோ சே ஓரமதி, அயம்பி அலஜ்ஜீயேவ ஹோதி, தேன ஸத்³தி⁴ம் பரிபோ⁴க³ம் கரோந்தோ ஸோபி அலஜ்ஜீயேவ ஹோதீதி அத்தோ². தேன வுத்தம் ‘‘ஏவம் ஏகோ அலஜ்ஜீ அலஜ்ஜிஸதம்பி கரோதீ’’தி. அத⁴ம்மியோதி அனேஸனாதீ³ஹி உப்பன்னோ. த⁴ம்மியோதி பி⁴க்கா²சரியாதீ³ஹி உப்பன்னோ. ஸங்க⁴ஸ்ஸேவ தே³தீதி ப⁴த்தம் அக்³க³ஹேத்வா அத்தனா லத்³த⁴ஸலாகம்யேவ தே³தி.

விமதிவினோத³னியம் பன ‘‘லஜ்ஜினா ஸத்³தி⁴ம் பரிபோ⁴கோ³தி த⁴ம்மாமிஸவஸேன மிஸ்ஸீபா⁴வோ. அலஜ்ஜினா ஸத்³தி⁴ந்தி ஏத்தா²பி ஏஸேவ நயோ. ஆதி³தோ பட்டா²ய ஹி அலஜ்ஜீ நாம நத்தீ²தி இமினா தி³ட்ட²தி³ட்டே²ஸு ஆஸங்கா நாம ந காதப்³பா³, தி³ட்ட²ஸுதாதி³காரணே ஸதி ஏவ காதப்³பா³தி த³ஸ்ஸேதி. அத்தனோ பா⁴ரபூ⁴தா ஸத்³தி⁴விஹாரிகாத³யோ. ஸசே ந ஓரமதீதி அக³திக³மனவஸேன த⁴ம்மாமிஸபரிபோ⁴க³தோ ந ஓரமதி. ஆபத்தி நாம நத்தீ²தி இத³ம் அலஜ்ஜீனம் த⁴ம்மேனுப்பன்னபச்சயம் த⁴ம்மகம்மஞ்ச ஸந்தா⁴ய வுத்தம். தேஸம்பி ஹி குலதூ³ஸனாதி³ஸமுப்பன்னம் பச்சயம் பரிபு⁴ஞ்ஜந்தானம் வக்³க³கம்மாதீ³னி கரோந்தானஞ்ச ஆபத்தி ஏவ. ‘த⁴ம்மியாத⁴ம்மியபரிபோ⁴கோ³ பச்சயவஸேனேவ வேதி³தப்³போ³’தி வுத்தத்தா ஹேட்டா² லஜ்ஜிபரிபோ⁴கா³லஜ்ஜிபரிபோ⁴கா³ பச்சயவஸேன ஏககம்மாதி³வஸேன ச வுத்தா ஏவாதி வேதி³தப்³ப³ம். தேனேவ து³ட்ட²தோ³ஸஸிக்கா²பத³ட்ட²கதா²யம் (பாரா. அட்ட². 2.385-386) சோத³கசுதி³தகபா⁴வே டி²தா த்³வே அலஜ்ஜினோ த⁴ம்மபரிபோ⁴க³ம்பி ஸந்தா⁴ய ‘ஏகஸம்போ⁴க³பரிபோ⁴கா³ ஹுத்வா ஜீவதா²’தி வுத்தா தேஸம் அஞ்ஞமஞ்ஞம் த⁴ம்மாமிஸாபரிபோ⁴கே³ விரோதா⁴பா⁴வா. லஜ்ஜீனமேவ ஹி அலஜ்ஜினா ஸஹ தது³ப⁴யபரிபோ⁴கோ³ ந வட்டதீ’’தி வுத்தம்.

ஸசே பன லஜ்ஜீ அலஜ்ஜிம் பக்³க³ண்ஹாதி…பே… அந்தரதா⁴பேதீதி ஏத்த² கேவலம் பக்³க³ண்ஹிதுகாமதாய ஏவம் காதும் ந வட்டதி, த⁴ம்மஸ்ஸ பன ஸாஸனஸ்ஸ ஸோதூனஞ்ச அனுக்³க³ஹத்தா²ய வட்டதீதி வேதி³தப்³ப³ம். புரிமனயேன ‘‘ஸோ ஆபத்தியா காரேதப்³போ³’’தி வுத்தத்தா இமஸ்ஸ ஆபத்தியேவாதி வத³ந்தி. உத்³தே³ஸக்³க³ஹணாதி³னா த⁴ம்மஸ்ஸ பரிபோ⁴கோ³ த⁴ம்மபரிபோ⁴கோ³. த⁴ம்மானுக்³க³ஹேன க³ண்ஹந்தஸ்ஸ ஆபத்தியா அபா⁴வேபி தே²ரோ தஸ்ஸ அலஜ்ஜிபா⁴வம்யேவ ஸந்தா⁴ய ‘‘பாபோ கிராய’’ந்திஆதி³மாஹ. தஸ்ஸ பன ஸந்திகேதி மஹாரக்கி²தத்தே²ரஸ்ஸ ஸந்திகே.

விமதிவினோத³னியம் (வி. வி. டீ. 1.585) பன இமஸ்மிம் டா²னே வித்தா²ரதோ வினிச்சி²தம். கத²ம்? த⁴ம்மபரிபோ⁴கோ³தி ‘‘ஏககம்மம் ஏகுத்³தே³ஸோ’’திஆதி³னா வுத்தஸம்வாஸோ சேவ நிஸ்ஸயக்³க³ஹணாதி³கோ ஸப்³போ³ நிராமிஸபரிபோ⁴கோ³ ச வேதி³தப்³போ³. ‘‘ந ஸோ ஆபத்தியா காரேதப்³போ³’’தி வுத்தத்தா லஜ்ஜினோ அலஜ்ஜிபக்³க³ஹே ஆபத்தீதி வேதி³தப்³ப³ம். இதரோபீதி லஜ்ஜீபி. தஸ்ஸாபி அத்தானம் பக்³க³ண்ஹந்தஸ்ஸ அலஜ்ஜினோ, இமினா ச லஜ்ஜினோ வண்ணப⁴ணனாதி³லாப⁴ம் படிச்ச ஆமிஸக³ருகதாய வா கே³ஹஸ்ஸிதபேமேன வா தம் அலஜ்ஜிம் பக்³க³ண்ஹந்தோ லஜ்ஜீ ஸாஸனம் அந்தரதா⁴பேதி நாமாதி த³ஸ்ஸேதி. ஏவம் க³ஹட்டா²தீ³ஸு உபத்த²ம்பி⁴தோ அலஜ்ஜீ ப³லம் லபி⁴த்வா பேஸலே அபி⁴ப⁴வித்வா ந சிரஸ்ஸேவ ஸாஸனம் உத்³த⁴ம்மம் உப்³பி³னயம் கரோதீதி.

த⁴ம்மபரிபோ⁴கோ³பி தத்த² வட்டதீதி இமினா ஆமிஸபரிபோ⁴க³தோ த⁴ம்மபரிபோ⁴கோ³வ க³ருகோ, தஸ்மா அதிவிய அலஜ்ஜீவிவேகேன காதப்³போ³தி த³ஸ்ஸேதி. ‘‘த⁴ம்மானுக்³க³ஹேன உக்³க³ண்ஹிதும் வட்டதீ’’தி வுத்தத்தா அலஜ்ஜுஸ்ஸன்னதாயஸாஸனே ஓஸக்கந்தே, லஜ்ஜீஸு ச அப்பஹோந்தேஸு அலஜ்ஜிம் பகதத்தம் க³ணபூரகம் க³ஹேத்வா உபஸம்பதா³தி³கரணேன சேவ கேசி அலஜ்ஜினோ த⁴ம்மாமிஸபரிபோ⁴கே³ன ஸங்க³ஹேத்வா ஸேஸாலஜ்ஜிக³ணஸ்ஸ நிக்³க³ஹேன ச ஸாஸனம் பக்³க³ண்ஹிதும்பி வட்டதி ஏவ.

கேசி பன ‘‘கோடியம் டி²தோ க³ந்தோ²தி வுத்தத்தா க³ந்த²பரியாபுணனமேவ த⁴ம்மபரிபோ⁴கோ³, ந ஏககம்மாதி³, தஸ்மா அலஜ்ஜீஹி ஸத்³தி⁴ம் உபோஸதா²தி³கம் கம்மம் காதும் வட்டதி, ஆபத்தி நத்தீ²’’தி வத³ந்தி, தம் ந யுத்தம், ஏககம்மாதீ³ஸு ப³ஹூஸு த⁴ம்மபரிபோ⁴கே³ஸு அலஜ்ஜினாபி ஸத்³தி⁴ம் கத்தப்³பா³வத்தா²யத்தம் த⁴ம்மபரிபோ⁴க³ம் த³ஸ்ஸேதும் இத⁴ நித³ஸ்ஸனவஸேன க³ந்த²ஸ்ஸேவ ஸமுத்³த⁴டத்தா. ந ஹி ஏககம்மாதி³கோ விதி⁴ த⁴ம்மபரிபோ⁴கோ³ ந ஹோதீதி ஸக்கா வத்தும் அனாமிஸத்தா த⁴ம்மாமிஸேஸு அபரியாபன்னஸ்ஸ ச கஸ்ஸசி அபா⁴வா. தேனேவ அட்ட²ஸாலினியம் த⁴ம்மபடிஸந்தா²ரகதா²யம் (த⁴. ஸ. அட்ட². 1351) ‘‘கம்மட்டா²னம் கதே²தப்³ப³ம், த⁴ம்மோ வாசேதப்³போ³…பே… அப்³பா⁴னவுட்டா²னமானத்தபரிவாஸா தா³தப்³பா³, பப்³ப³ஜ்ஜாரஹோ பப்³பா³ஜேதப்³போ³, உபஸம்பதா³ரஹோ உபஸம்பாதே³தப்³போ³…பே… அயம் த⁴ம்மபடிஸந்தா²ரோ நாமா’’தி ஏவம் ஸங்க⁴கம்மாதி³பி த⁴ம்மகோட்டா²ஸே த³ஸ்ஸிதம். தேஸு பன த⁴ம்மகோட்டா²ஸேஸு யம் க³ணபூரகாதி³வஸேன அலஜ்ஜினோ அபேக்கி²த்வா உபோஸதா²தி³ வா தேஸம் ஸந்திகா த⁴ம்முக்³க³ஹணனிஸ்ஸயக்³க³ஹணாதி³ வா கரீயதி, தம் த⁴ம்மோ சேவ பரிபோ⁴கோ³ சாதி த⁴ம்மபரிபோ⁴கோ³தி வுச்சதி, ஏதம் ததா²ரூபபச்சயம் வினா காதும் ந வட்டதி, கரோந்தஸ்ஸ அலஜ்ஜிபரிபோ⁴கோ³ ச ஹோதி து³க்கடஞ்ச. யம் பன அலஜ்ஜிஸதம் அனபேக்கி²த்வா தஜ்ஜனீயாதி³னிக்³க³ஹகம்மம் வா பரிவாஸாதி³உபகாரகம்மம் வா உக்³க³ஹபரிபுச்சா²தா³னாதி³ வா கரீயதி, தம் த⁴ம்மோ ஏவ, நோ பரிபோ⁴கோ³, ஏதம் அனுரூபானம் காதும் வட்டதி, ஆமிஸதா³னே விய ஆபத்தி நத்தி². நிஸ்ஸயதா³னம்பி தேரஸஸம்முதிதா³னாதி³ ச வத்தபடிபத்திஸாதி³யனாதி³பரிபோ⁴க³ஸ்ஸபி ஹேதுத்தா ந வட்டதி.

யோ பன மஹாஅலஜ்ஜீ உத்³த⁴ம்மம் உப்³பி³னயம் ஸத்து²ஸாஸனம் கரோதி, தஸ்ஸ ஸத்³தி⁴விஹாரிகாதீ³னம் உபஸம்பதா³தி³ உபகாரகம்மம்பி உக்³க³ஹபரிபுச்சா²தா³னாதி³ ச காதும் ந வட்டதி, ஆபத்தி ஏவ ஹோதி, நிக்³க³ஹகம்மமேவ காதப்³ப³ம். தேனேவ அலஜ்ஜிபக்³க³ஹோபி படிக்கி²த்தோ. த⁴ம்மாமிஸபரிபோ⁴க³விவஜ்ஜனேனபி ஹி து³ம்மங்கூனம் புக்³க³லானம் நிக்³க³ஹோவ அதி⁴ப்பேதோ, ஸோ ச பேஸலானம் பா²ஸுவிஹாரஸத்³த⁴ம்மட்டி²திவினயானுக்³க³ஹாதி³அத்தா²ய ஏதத³த்த²த்தா ஸிக்கா²பத³பஞ்ஞத்தியா, தஸ்மா யம் யம் து³ம்மங்கூனம் உபத்த²ம்பா⁴ய, பேஸலானம் அபா²ஸுவிஹாராய, ஸத்³த⁴ம்மபரிஹானாதி³அத்தா²ய ஹோதி, தம் ஸப்³ப³ம்பி பரிபோ⁴கோ³ வா ஹோது அபரிபோ⁴கோ³ வா காதும் ந வட்டதி, ஏவம் கரோந்தா ஸாஸனம் அந்தரதா⁴பேந்தி, ஆபத்திஞ்ச ஆபஜ்ஜந்தி, த⁴ம்மாமிஸபரிபோ⁴கே³ஸு சேத்த² அலஜ்ஜீஹி ஏககம்மாதி³த⁴ம்மபரிபோ⁴கோ³ ஏவ பேஸலானம் அபா²ஸுவிஹாராய ஸத்³த⁴ம்மபரிஹானாதி³அத்தா²ய ஹோதி, ந ததா² ஆமிஸபரிபோ⁴கோ³. ந ஹி அலஜ்ஜீனம் பச்சயபரிபோ⁴க³மத்தேன பேஸலானம் அபா²ஸுவிஹாராதி³ ஹோதி, யதா²வுத்தத⁴ம்மபரிபோ⁴கே³ன பன ஹோதி. தப்பரிவஜ்ஜனேன ச பா²ஸுவிஹாராத³யோ. ததா² ஹி கதஸிக்கா²பத³வீதிக்கமா அலஜ்ஜிபுக்³க³லா உபோஸதா²தீ³ஸு பவிட்டா² ‘‘தும்ஹே காயத்³வாரே சேவ வசீத்³வாரே ச வீதிக்கமம் கரோதா²’’திஆதி³னா பி⁴க்கூ²ஹி வத்தப்³பா³ ஹோந்தி. யதா² வினயஞ்ச அதிட்ட²ந்தா ஸங்க⁴தோ ப³ஹிகரணாதி³வஸேன ஸுட்டு² நிக்³க³ஹேதப்³பா³, ததா² அகத்வா தேஹி ஸஹ ஸம்வஸந்தாபி அலஜ்ஜினோவ ஹோந்தி ‘‘ஏகோபி அலஜ்ஜீ அலஜ்ஜிஸதம்பி கரோதீ’’திஆதி³வசனதோ (பாரா. அட்ட². 2.585). யதி³ ஹி தே ஏவம் அனிக்³க³ஹிதா ஸியும், ஸங்கே⁴ கலஹாதி³ம் வட்³டே⁴த்வா உபோஸதா²தி³ஸாமக்³கி³கம்மபடிபா³ஹனாதி³னா பேஸலானம் அபா²ஸும் கத்வா கமேன தே தே³வத³த்தவஜ்ஜிபுத்தகாத³யோ விய பரிஸம் வட்³டே⁴த்வா அத்தனோ விப்படிபத்திம் த⁴ம்மதோ வினயதோ தீ³பேந்தா ஸங்க⁴பே⁴தா³தி³ம்பி கத்வா ந சிரஸ்ஸேவ ஸாஸனம் அந்தரதா⁴பேய்யும். தேஸு பன ஸங்க⁴தோ ப³ஹிகரணாதி³வஸேன நிக்³க³ஹிதேஸு ஸப்³போ³பி அயம் உபத்³த³வோ ந ஹோதி. வுத்தஞ்ஹி ‘‘து³ஸ்ஸீலபுக்³க³லே நிஸ்ஸாய உபோஸதோ² ந திட்ட²தி, பவாரணா ந திட்ட²தி, ஸங்க⁴கம்மானி ந பவத்தந்தி, ஸாமக்³கீ³ ந ஹோதி…பே… து³ஸ்ஸீலேஸு பன நிக்³க³ஹிதேஸு ஸப்³போ³பி அயம் உபத்³த³வோ ந ஹோதி, ததோ பேஸலா பி⁴க்கூ² பா²ஸு விஹரந்தீ’’தி, தஸ்மா ஏககம்மாதி³த⁴ம்மபரிபோ⁴கோ³வ ஆமிஸபரிபோ⁴க³தோபி அதிவிய அலஜ்ஜீவிவேகேன காதப்³போ³, ஆபத்திகரோ ச ஸத்³த⁴ம்மபரிஹானிஹேதுத்தாதி வேதி³தப்³ப³ம்.

அபிச ‘‘உபோஸதோ² ந திட்ட²தி, பவாரணா ந திட்ட²தி, ஸங்க⁴கம்மானி ந பவத்தந்தீ’’தி ஏவம் அலஜ்ஜீஹி ஸத்³தி⁴ம் ஸங்க⁴கம்மாகரணஸ்ஸ அட்ட²கதா²யம் பகாஸிதத்தாபி சேதம் ஸிஜ்ஜ²தி. ததா² பரிவத்தலிங்க³ஸ்ஸ பி⁴க்கு²னோ பி⁴க்கு²னுபஸ்ஸயம் க³ச்ச²ந்தஸ்ஸ படிபத்திகதா²யம் ‘‘ஆராதி⁴கா ச ஹோந்தி ஸங்கா³ஹிகா லஜ்ஜினியோ, தா கோபேத்வா அஞ்ஞத்த² ந க³ந்தப்³ப³ம். க³ச்ச²தி சே, கா³மந்தரனதீ³பாரரத்திவிப்பவாஸக³ணம்ஹா ஓஹீயனாபத்தீஹி ந முச்சதி…பே… அலஜ்ஜினியோ ஹோந்தி, ஸங்க³ஹம் பன கரோந்தி, தாபி பரிச்சஜித்வா அஞ்ஞத்த² க³ந்தும் லப⁴தீ’’தி ஏவம் அலஜ்ஜினீஸு து³தியிகாக³ஹணாதீ³ஸு ஸம்வாஸாபத்திபரிஹாராய நதீ³பாராக³மனாதி³க³ருகாபத்திட்டா²னானம் அனுஞ்ஞாதத்தா ததோபி அலஜ்ஜிஸம்வாஸாபத்தி ஏவ ஸத்³த⁴ம்மபரிஹானியா ஹேதுபூ⁴தோ க³ருகதராதி விஞ்ஞாயதி. ந ஹி லஹுகாபத்திட்டா²னம் வா அனாபத்திட்டா²னம் வா பரிஹரிதும் க³ருகாபத்திட்டா²னவீதிக்கமம் ஆசரியா அனுஜானந்தி. ததா² அஸம்வாஸபத³ஸ்ஸ அட்ட²கதா²யம் ‘‘ஸப்³பே³ஹிபி லஜ்ஜிபுக்³க³லேஹி ஸமம் ஸிக்கி²தப்³ப³பா⁴வதோ ஸமஸிக்கா²தா நாம. ஏத்த² யஸ்மா ஸப்³பே³பி லஜ்ஜினோ ஏதேஸு கம்மாதீ³ஸு ஸஹ வஸந்தி, ந ஏகோபி ததோ ப³ஹித்³தா⁴ ஸந்தி³ஸ்ஸதி, தஸ்மா தானி ஸப்³பா³னிபி க³ஹேத்வா ஏஸோ ஸம்வாஸோ நாமா’’தி ஏவம் லஜ்ஜீஹேவ ஏககம்மாதி³ஸம்வாஸோ வட்டதீதி பகாஸிதோ.

யதி³ ஏவம் கஸ்மா அஸம்வாஸிகேஸு அலஜ்ஜீ ந க³ஹிதோதி? நாயம் விரோதோ⁴, யே க³ணபூரகே கத்வா கதம் கம்மம் குப்பதி, தேஸம் பாராஜிகாதி³அபகதத்தானஞ்ஞேவ அஸம்வாஸிகத்தேன க³ஹிதத்தா. அலஜ்ஜினோ பன பகதத்தபூ⁴தாபி ஸந்தி, தே சே க³ணபூரகா ஹுத்வா கம்மம் ஸாதே⁴ந்தி, கேவலம் கத்வா அக³திக³மனேன கரோந்தானம் ஆபத்திகரா ஹோந்தி ஸபா⁴கா³பத்திஆபன்னா விய அஞ்ஞமஞ்ஞம். யஸ்மா அலஜ்ஜிதஞ்ச லஜ்ஜிதஞ்ச புது²ஜ்ஜனானம் சித்தக்க²ணபடிப³த்³த⁴ம், ந ஸப்³ப³காலிகம். ஸஞ்சிச்ச ஹி வீதிக்கமசித்தே உப்பன்னே அலஜ்ஜினோ ‘‘ந புன ஈதி³ஸம் கரிஸ்ஸாமீ’’தி சித்தேன லஜ்ஜினோ ஹோந்தி.

தேஸு ச யே பேஸலேஹி ஓவதி³யமானாபி ந ஓரமந்தி, புனப்புனம் கரோந்தி, தே ஏவ அஸம்வஸிதப்³பா³, ந இதரே லஜ்ஜித⁴ம்மே ஓக்கந்தத்தா, தஸ்மாபி அலஜ்ஜினோ அஸம்வாஸிகேஸு அக³ணேத்வா தப்பரிவஜ்ஜனத்த²ம் ஸோதே⁴த்வாவ உபோஸதா²தி³கரணம் அனஞ்ஞாதம். ததா² ஹி ‘‘பாரிஸுத்³தி⁴ம் ஆயஸ்மந்தோ ஆரோசேத², பாதிமோக்க²ம் உத்³தி³ஸிஸ்ஸாமீ’’திஆதி³னா (மஹாவ. 134) அபரிஸுத்³தா⁴ய பரிஸாய உபோஸத²கரணஸ்ஸ அயுத்ததா பகாஸிதா, ‘‘யஸ்ஸ ஸியா ஆபத்தி, ஸோ ஆவிகரேய்ய…பே… பா²ஸு ஹோதீ’’தி (மஹாவ. 134) ஏவம் அலஜ்ஜிம்பி லஜ்ஜித⁴ம்மே பதிட்டா²பேத்வா உபோஸத²கரணப்பகாரோ ச வுத்தோ, ‘‘கச்சித்த² பரிஸுத்³தா⁴…பே… பரிஸுத்³தே⁴த்தா²யஸ்மந்தோ’’தி (பாரா. 233) ச பாரிஸுத்³தி⁴உபோஸதே² ‘‘பரிஸுத்³தோ⁴ அஹம், ப⁴ந்தே, பரிஸுத்³தோ⁴தி மம் தா⁴ரேதா²’’தி (மஹாவ. 168) ச ஏவம் உபோஸத²ம் கரோந்தானம் பரிஸுத்³த⁴தா ச பகாஸிதா, வசனமத்தேன அனோரமந்தானஞ்ச உபோஸத²பவாரணட்ட²பனவிதி⁴ ச வுத்தோ, ஸப்³ப³தா² லஜ்ஜித⁴ம்மம் அனோக்கமந்தேஹி ஸம்வாஸஸ்ஸ அயுத்ததாய நிஸ்ஸயதா³னக்³க³ஹணபடிக்கே²போ, தஜ்ஜனீயாதி³னிக்³க³ஹகம்மகரணஉக்கே²பனீயகம்மகரணேன ஸானுவத்தகபரிஸஸ்ஸ அலஜ்ஜிஸ்ஸ அஸம்வாஸிகத்தபாபனவிதி⁴ ச வுத்தோ, தஸ்மா யதா²வுத்தேஹி ஸுத்தந்தனயேஹி, அட்ட²கதா²வசனேஹி ச பகதத்தேஹிபி அபகதத்தேஹிபி ஸப்³பே³ஹி அலஜ்ஜீஹி ஏககம்மாதி³ஸம்வாஸோ ந வட்டதி, கரோந்தானம் ஆபத்தி ஏவ து³ம்மங்கூனம் புக்³க³லானம் நிக்³க³ஹத்தா²யேவ ஸப்³ப³ஸிக்கா²பதா³னம் பஞ்ஞத்தத்தாதி நிட்ட²மேத்த² க³ந்தப்³ப³ம். தேனேவ து³தியஸங்கீ³தியம் பகதத்தாபி அலஜ்ஜினோ வஜ்ஜிபுத்தகா யஸத்தே²ராதீ³ஹி மஹந்தேன வாயாமேன ஸங்க⁴தோ வியோஜிதா. ந ஹி தேஸு பாராஜிகாதி³அஸம்வாஸிகாபத்தி அத்தி², தேஹி தீ³பிதானம் த³ஸன்னம் வத்தூ²னம் லஹுகாபத்திவிஸயத்தாதி வுத்தம்.

தஸ்ஸ ஸந்திகேதி மஹாரக்கி²தத்தே²ரஸ்ஸ ஸந்திகே.

இதி வினயஸங்க³ஹஸம்வண்ணனாபூ⁴தே வினயாலங்காரே

ரூபியாதி³படிக்³க³ஹணவினிச்ச²யகதா²லங்காரோ நாம

த்³வாத³ஸமோ பரிச்சே²தோ³.