11. கயவிக்கயஸமாபத்திவினிச்ச²யகதா²

57. ஏவம் ப⁴ண்ட³படிஸாமனவினிச்ச²யம் கதே²த்வா இதா³னி கயவிக்கயவினிச்ச²யம் கதே²ந்தோ ‘‘கயவிக்கயஸமாபத்தீ’’திஆதி³மாஹ. தத்த² கயனம் கயோ, பரப⁴ண்ட³ஸ்ஸ க³ஹணம், விக்கயனம் விக்கயோ, ஸகப⁴ண்ட³ஸ்ஸ தா³னம், கயோ ச விக்கயோ ச கயவிக்கயம். ஸமாபஜ்ஜனம் ஸமாபத்தி, தஸ்ஸ து³வித⁴ஸ்ஸ கிரியஸ்ஸ கரணம். தஸ்ஸரூபம் த³ஸ்ஸேதி ‘‘இமினா’’திஆதி³னா.

ஸேஸஞாதகேஸு ஸத்³தா⁴தே³ய்யவினிபாதஸம்ப⁴வதோ தத³பா⁴வட்டா²னம்பி த³ஸ்ஸேதும் ‘‘மாதரம் வா பன பிதரம் வா’’திஆதி³ வுத்தம். தேன விஞ்ஞத்திஸத்³தா⁴தே³ய்யவினிபாதனஞ்ச ந ஹோதி ‘‘இமினா இத³ம் தே³ஹீ’’தி வத³ந்தோதி த³ஸ்ஸேதி, கயவிக்கயம் பன ஆபஜ்ஜதி ‘‘இமினா இத³ம் தே³ஹீ’’தி வத³ந்தோதி த³ஸ்ஸேதி. இமினா ச உபரி அஞ்ஞாதகந்த்யாதி³னா ச ஸேஸஞாதகம் ‘‘இமம் தே³ஹீ’’தி வத³தோ விஞ்ஞத்தி ந ஹோதி, ‘‘இமம் க³ண்ஹாஹீ’’தி பன த³த³தோ ஸத்³தா⁴தே³ய்யவினிபாதனம், ‘‘இமினா இமம் தே³ஹீ’’தி கயவிக்கயம் ஆபஜ்ஜதோ நிஸ்ஸக்³கி³யந்தி அயம்பி அத்தோ² த³ஸ்ஸிதோ ஹோதி மிக³பத³வலஞ்ஜனன்யாயேன. தஸ்மாஇச்சாதி³கேபி ‘‘மாதாபிதூஹி ஸத்³தி⁴ம் கயவிக்கயம், ஸேஸஞாதகேஹி ஸத்³தி⁴ம் த்³வே ஆபத்தியோ, அஞ்ஞாதகேஹி ஸத்³தி⁴ம் திஸ்ஸோ ஆபத்தியோ’’தி வத்தப்³பே³ தேனேவ ந்யாயேன ஞாதும் ஸக்காதி கத்வா ந வுத்தந்தி த³ட்ட²ப்³ப³ம், அஞ்ஞதா² அப்³யாபிததோ³ஸோ ஸியா.

‘‘இத³ம் ப⁴த்தம் பு⁴ஞ்ஜித்வா இத³ம் கரோதா²’’தி வுத்தே புப்³பா³பரஸம்ப³ந்தா⁴ய கிரியாய வுத்தத்தா ‘‘இமினா இத³ம் தே³ஹீ’’தி வுத்தஸதி³ஸம் ஹோதி. இத³ம் ப⁴த்தம் பு⁴ஞ்ஜ, இத³ம் நாம கரோஹீ’’தி வா, ‘‘இத³ம் ப⁴த்தம் பு⁴த்தோஸி, இத³ம் நாம கரோஹி, இத³ம் ப⁴த்தம் பு⁴ஞ்ஜிஸ்ஸஸி, இத³ம் நாம கரோஹீ’’தி பன வுத்தே அஸம்ப³ந்தா⁴ய கிரியாய வுத்தத்தா கயவிக்கயோ ந ஹோதி. விகா⁴ஸாதா³னம் ப⁴த்ததா³னே ச அனபேக்க²த்தா ஸத்³தா⁴தே³ய்யவினிபாதனம் ந ஹோதி, காராபனே ஹத்த²கம்மமத்தத்தா விஞ்ஞத்தி ந ஹோதி, தஸ்மா வட்டதி. ‘‘ஏத்த² சா’’திஆதி³னா அஸதிபி நிஸ்ஸக்³கி³யவத்து²ம்ஹி பாசித்தியம் தே³ஸேதப்³ப³ந்தி த³ஸ்ஸேதி.

அக்³க⁴ம் புச்சி²தும் வட்டதி, ஏத்தாவதா கயவிக்கயோ ந ஹோதீதி அத்தோ². க³ண்ஹிதும் வட்டதீதி ‘‘இமினா இத³ம் தே³ஹீ’’தி அவுத்தத்தா கயவிக்கயோ ந ஹோதி, மூலஸ்ஸ அத்தி²தாய விஞ்ஞத்திபி ந ஹோதி. பத்தோ ந க³ஹேதப்³போ³ பரப⁴ண்ட³ஸ்ஸ மஹக்³க⁴தாய. ஏவம் ஸதி கத²ம் காதப்³போ³தி ஆஹ ‘‘மம வத்து² அப்பக்³க⁴ந்தி ஆசிக்கி²தப்³ப³’’ந்தி. ப⁴ண்ட³ம் அக்³கா⁴பேத்வா காரேதப்³ப³தம் ஆபஜ்ஜதி தே²ய்யாவஹாரஸம்ப⁴வதோ, ஊனமாஸகம் சே அக்³க⁴தி, து³க்கடம். மாஸகதோ பட்டா²ய யாவ ஊனபஞ்சமாஸகம் சே அக்³க⁴தி, து²ல்லச்சயம். பஞ்சமாஸகம் சே அக்³க⁴தி, பாராஜிகந்தி வுத்தம் ஹோதி. தே³தி, வட்டதி புஞ்ஞத்தா²ய தி³ன்னத்தா அதி⁴கஸ்ஸ. கப்பியகாரகஸ்ஸ பன…பே… வட்டதி உப⁴தோ கப்பியப⁴ண்ட³த்தா. ஏகதோ உப⁴தோ வா சே அகப்பியப⁴ண்ட³ம் ஹோதி, ந வட்டதி. ‘‘மா க³ண்ஹாஹீ’’தி வத்தப்³போ³, கஸ்மா? கப்பியகாரகஸ்ஸ அசே²கத்தா.

அஞ்ஞேன அப்படிக்³க³ஹிதேன அத்தோ², கஸ்மா? ஸத்தாஹகாலிகத்தா தேலஸ்ஸ. படிக்³க³ஹிததேலம் ஸத்தாஹபரமம் ஏவ ட²பேதப்³ப³ம், தஸ்மா ததோ பரம் ட²பிதுகாமஸ்ஸ அப்படிக்³க³ஹிததேலேன அத்தோ² ஹோதி. அப்படிக்³க³ஹிதம் தூ³ஸேய்ய, அனியமிதகாலம் அப்படிக்³க³ஹிததேலம் நாளியம் அவஸிட்ட²படிக்³க³ஹிததேலம் அத்தனோ காலம் வத்தாபேய்ய.

58. இத³ம் பத்தசதுக்கம் வேதி³தப்³ப³ந்தி அகப்பியபத்தசதுக்கம் வுத்தம், பஞ்சமோ பன கப்பியோ. தேன வக்க²தி ‘‘அயம் பத்தோ ஸப்³ப³கப்பியோ பு³த்³தா⁴னம்பி பரிபோ⁴கா³ரஹோ’’தி. அயம் பத்தோ மஹாஅகப்பியோ நாம, கஸ்மா? ரூபியம் உக்³க³ண்ஹித்வா அயபீ³ஜம் ஸமுட்டா²பேத்வா தேன லோஹேன பத்தஸ்ஸ காரிதத்தா, ஏவம் பீ³ஜதோ பட்டா²ய தூ³ஸிதத்தா. யதா² ச ததியபாராஜிகவிஸயே தா²வரபயோகே³ஸு பாஸஸூலாதீ³ஸு மூலதோ பட்டா²ய காரிதேஸு கிஸ்மிஞ்சி த³ண்ட³மத்தே வா வாகமத்தே வா அவஸிட்டே² ஸதி ந முச்சதி, ஸப்³ப³ஸ்மிம் நட்டே²யேவ முச்சதி, ஏவமிதா⁴பி பீ³ஜதோ பட்டா²ய கதத்தா தஸ்மிம் பத்தே கிஸ்மிஞ்சி பத்தே அவஸிட்டே²பி கப்பியோ ப⁴விதும் ந ஸக்கா. ததா² ச வக்க²தி ‘‘ஸசேபி தம் வினாஸேத்வா தா²லகம் காரேதி, தம்பி அகப்பிய’’ந்த்யாதி³. ஏவம் ஸந்தேபி து³தியபத்தே விய மூலே ச மூலஸ்ஸாமிகானம், பத்தே ச பத்தஸ்ஸாமிகானம் தி³ன்னே கப்பியோ காதும் ஸக்கா ப⁴வேய்ய நு கோ²தி ஆஸங்காயமாஹ ‘‘ந ஸக்கா கேனசி உபாயேன கப்பியோ காது’’ந்தி. தஸ்ஸத்தோ² – து³தியபத்தம் ரூபியம் படிக்³க³ண்ஹித்வா கி³ஹீஹி பரினிட்டா²பிதமேவ கிணாதி, ந பீ³ஜதோ பட்டா²ய தூ³ஸேதி, தஸ்மா து³தியபத்தோ கப்பியோ காதும் ஸக்கா, இத⁴ பன பீ³ஜதோ பட்டா²ய தூ³ஸிதத்தா தேன பி⁴க்கு²னா தம் பத்தம் புன அயபாஸாணபீ³ஜம் காதும் அஸக்குணேய்யத்தா, படிக்³க³ஹிதரூபியஸ்ஸ ச வளஞ்ஜிதத்தா புன ஸாமிகானம் தா³தும் அஸக்குணேய்யத்தா ந ஸக்கா கேனசி உபாயேன கப்பியோ காதுந்தி.

இதா³னி தம் அஸக்குணேய்யத்தம் அஞ்ஞேன பகாரேன வித்தா²ரேதும் ‘‘ஸசேபீ’’திஆதி³மாஹ. இமினா கிஞ்சிபி அயவத்து²ம்ஹி அவஸிட்டே² ஸதி அகப்பியோவ ஹோதீதி த³ஸ்ஸேதி. தேன வுத்தம் விமதிவினோத³னியம் (வி. வி. டீ. 1.591) ‘‘ரூபியம் உக்³க³ண்ஹித்வாதி இத³ம் உக்கட்ட²வஸேன வுத்தம், முத்தாதி³து³க்கடவத்து²ம்பி உக்³க³ண்ஹித்வா காரிதம்பி பஞ்சன்னம் ந வட்டதி ஏவ. ஸமுட்டா²பேதீதி ஸயம் க³ந்த்வா வா ‘இமம் கஹாபணாதி³ம் கம்மகாரானம் த³த்வா பீ³ஜம் ஸமுட்டா²பேஹீ’தி அஞ்ஞம் ஆணாபேத்வா வா ஸமுட்டா²பேதி. மஹாஅகப்பியோதி அத்தனாவ பீ³ஜதோ பட்டா²ய தூ³ஸிதத்தா அஞ்ஞஸ்ஸ மூலஸ்ஸாமிகஸ்ஸ அபா⁴வதோ வுத்தம். ஸோ ஹி சோரேஹி அச்சி²ன்னோபி புன லத்³தோ⁴ ஜானந்தஸ்ஸ கஸ்ஸசீபி ந வட்டதி. யதி³ ஹி வட்டேய்ய, தளாகாதீ³ஸு விய ‘அச்சி²ன்னோ வட்டதீ’தி ஆசரியா வதே³ய்யும். ந ஸக்கா கேனசி உபாயேனாதி ஸங்க⁴ஸ்ஸ விஸ்ஸஜ்ஜனேன சோராதி³அச்சி²ந்த³னேனபி கப்பியோ காதும் ந ஸக்கா, இத³ஞ்ச தேன ரூபேன டி²தம் தம்மூலகேன வத்த²முத்தாதி³ரூபேன டி²தஞ்ச ஸந்தா⁴ய வுத்தம். து³க்கடவத்து²ம்பி ஹி தம்மூலககப்பியவத்து² ச ந ஸக்கா கேனசி தேன ரூபேன கப்பியம் காதும். யதி³ பன ஸோ பி⁴க்கு² தேன கப்பியவத்து²னா, து³க்கடவத்து²னா வா புன ரூபியம் சேதாபேய்ய, தம் ரூபியம் நிஸ்ஸஜ்ஜாபேத்வா அஞ்ஞேஸம் கப்பியம் காதும்பி ஸக்கா ப⁴வேய்யாதி த³ட்ட²ப்³ப³’’ந்தி. யம் பன ஸாரத்த²தீ³பனியம் பபஞ்சிதம், யஞ்ச தமேவ க³ஹேத்வா போராணடீகாயம் பபஞ்சிதம், தம் வித்தா²ரேத்வா வுச்சமானம் அதிவித்தா²ரிதஞ்ச ப⁴விஸ்ஸதி, ஸோதூனஞ்ச து³ப்³பி³ஞ்ஞேய்யம், தஸ்மா ஏத்தகமேவ வதி³ம்ஹ, அத்தி²கேஹி பன தேஸு தேஸு பகரணேஸு ஓலோகேத்வா க³ஹேதப்³ப³ந்தி.

து³தியபத்தே பஞ்சன்னம்பி ஸஹத⁴ம்மிகானம் ந கப்பதீதி ரூபியஸ்ஸ படிக்³க³ஹிதத்தா, கயவிக்கயஸ்ஸ ச கதத்தா. ஸக்கா பன கப்பியோ காதுந்தி கி³ஹீஹி பரினிட்டா²பிதபத்தஸ்ஸேவ கிணிதத்தா, பீ³ஜதோ பட்டா²ய அதூ³ஸிதத்தா, மூலமூலஸ்ஸாமிகானஞ்ச பத்தபத்தஸ்ஸாமிகானஞ்ச விஜ்ஜமானத்தா. யதா² பன ஸக்கா ஹோதி, தம் த³ஸ்ஸேதும் ‘‘மூலே’’திஆதி³மாஹ.

ததியபத்தே ஸதி³ஸோயேவாதி ‘‘பஞ்சன்னம்பி ஸஹத⁴ம்மிகானம் ந வட்டதி, ஸக்கா பன கப்பியோ காது’’ந்தி இமம் நயம் நித்³தி³ஸதி. நனு ததியபத்தோ கப்பியவோஹாரேன க³ஹிதோ, அத² கஸ்மா அகப்பியோதி சோத³னம் ஸந்தா⁴யாஹ ‘‘கப்பியவோஹாரேன க³ஹிதோபி து³தியபத்தஸதி³ஸோயேவ, மூலஸ்ஸ ஸம்படிச்சி²தத்தா அகப்பியோ’’தி. து³தியசோத³னம் பன ஸயமேவ வத³தி. ஏத்த² ச ‘‘து³தியபத்தஸதி³ஸோயேவா’’தி வுத்தத்தா மூலே ச மூலஸ்ஸாமிகானம், பத்தே ச பத்தஸ்ஸாமிகானம் தி³ன்னே கப்பியோ ஹோதி, கப்பியப⁴ண்ட³ம் த³த்வா க³ஹேத்வா பரிபு⁴ஞ்ஜிதும் வட்டதீதி த³ட்ட²ப்³போ³. மூலஸ்ஸ அனிஸ்ஸட்ட²த்தாதி யேன உக்³க³ஹிதமூலேன பத்தோ கீதோ, தஸ்ஸ மூலஸ்ஸ ஸங்க⁴மஜ்ஜே² அனிஸ்ஸட்ட²த்தா. ஏதேன ரூபியமேவ நிஸ்ஸஜ்ஜிதப்³ப³ம், ந தம்மூலகம் அரூபியந்தி த³ஸ்ஸேதி. யதி³ ஹி தேன ஸம்படிச்சி²தமூலம் ஸங்க⁴மஜ்ஜே² நிஸ்ஸட்ட²ம் ஸியா, தேன கப்பியேன கம்மேன ஆராமிகாதீ³ஹி க³ஹேத்வா தி³ன்னபத்தோ ரூபியபடிக்³கா³ஹகம் ட²பேத்வா ஸேஸானம் வட்டேய்ய.

சதுத்த²பத்தே து³ப்³பி³சாரிதத்தாதி ‘‘இமே கஹாபணே த³த்வா இத³ம் தே³ஹீ’’தி க³ஹிதத்தா கி³ஹிஸந்தகானம் கஹாபணானம் து³ட்டு²விசாரிதத்தா ஏதஸ்ஸ விசாரணகஸ்ஸ பி⁴க்கு²னோ ஏவ ந வட்டதீதி அத்தோ². மூலஸ்ஸ அஸம்படிச்சி²தத்தாதி ஏதேன மூலஸ்ஸ கி³ஹிஸந்தகத்தம் த³ஸ்ஸேதி, தேனேவ பத்தஸ்ஸ ரூபியஸம்வோஹாரேன அனுப்பன்னதஞ்ச த³ஸ்ஸேதி, தேன ச தஸ்ஸ பத்தஸ்ஸ நிஸ்ஸஜ்ஜியாபா⁴வம், பி⁴க்கு²ஸ்ஸ ச பாசித்தியாபா⁴வம் தீ³பேதி, தேன ச து³ப்³பி³சாரிதமத்தேன து³க்கடமத்தபா⁴வம் பகாஸேதி. நிஸ்ஸஜ்ஜீதி இத³ஞ்ச தா³னவஸேன வுத்தம், ந வினயகம்மவஸேன. தேனேவ ச ‘‘ஸப்பிஸ்ஸ பூராபேத்வா’’தி வுத்தம்.

பஞ்சமபத்தே ஸப்³ப³கப்பியோதி அத்தனோ ச பஞ்சன்னம் ஸஹத⁴ம்மிகானஞ்ச பு³த்³த⁴பச்சேகபு³த்³தா⁴னஞ்ச கப்பியோ. தேனாஹ ‘‘பு³த்³தா⁴னம்பி பரிபோ⁴கா³ரஹோ’’தி.

இதி வினயஸங்க³ஹஸம்வண்ணனாபூ⁴தே வினயாலங்காரே

கயவிக்கயஸமாபத்திவினிச்ச²யகதா²லங்காரோ நாம

ஏகாத³ஸமோ பரிச்சே²தோ³.