10. ப⁴ண்ட³படிஸாமனவினிச்ச²யகதா²

53. ஏவம் சீவரவிப்பவாஸவினிச்ச²யம் கதே²த்வா இதா³னி ப⁴ண்ட³படிஸாமனவினிச்ச²யம் கதே²தும் ‘‘ப⁴ண்ட³ஸ்ஸ படிஸாமன’’ந்திஆதி³மாஹ. தத்த² ப⁴டி³தப்³ப³ம் பா⁴ஜேதப்³ப³ந்தி ப⁴ண்ட³ம், ப⁴டி³தப்³ப³ம் இச்சி²தப்³ப³ந்தி வா ப⁴ண்ட³ம், ப⁴ண்ட³ந்தி பரிப⁴ண்ட³ந்தி ஸத்தா ஏதேனாதி வா ப⁴ண்ட³ம், மூலத⁴னம், பரிக்கா²ரோ வா. வுத்தஞ்ஹி அபி⁴தா⁴னப்பதீ³பிகாயம் –

‘‘பா⁴ஜனாதி³பரிக்கா²ரே, ப⁴ண்ட³ம் மூலத⁴னேபி சா’’தி.

தஸ்ஸ ப⁴ண்ட³ஸ்ஸ, படிஸாமியதே படிஸாமனம், ரக்க²ணம் கோ³பனந்தி அத்தோ². தேனாஹ ‘‘பரேஸம் ப⁴ண்ட³ஸ்ஸ கோ³பன’’ந்தி. மாது கண்ணபிளந்த⁴னம் தாலபண்ணம்பீதி பி-ஸத்³தோ³ ஸம்பா⁴வனத்தோ². தேன பகே³வ அஞ்ஞாதகானம் ஸந்தகந்தி த³ஸ்ஸேதி. கி³ஹிஸந்தகந்தி இமினா பஞ்சன்னம் ஸஹத⁴ம்மிகானம் ஸந்தகம் படிஸாமேதும் வட்டதீதி தீ³பேதி. ப⁴ண்டா³கா³ரிகஸீஸேனாதி ஏதேன விஸ்ஸாஸக்³கா³ஹாதி³னா க³ஹேத்வா படிஸாமேந்தஸ்ஸ அனாபத்தீதி த³ஸ்ஸேதி. தேன வக்க²தி ‘‘அத்தனோ அத்தா²ய க³ஹேத்வா படிஸாமேதப்³ப³’’ந்தி. ச²ந்தே³னபி ப⁴யேனபீதி வட்³ட⁴கீஆதீ³ஸு ச²ந்தே³ன, ராஜவல்லபா⁴தீ³ஸு ப⁴யேன ப³லக்காரேன பாதேத்வா க³தேஸு ச படிஸாமேதும் வட்டதீதி யோஜேதப்³ப³ம்.

ஸங்கோ³பனத்தா²ய அத்தனோ ஹத்தே² நிக்கி²த்தஸ்ஸ ப⁴ண்ட³ஸ்ஸ கு³த்தட்டா²னே படிஸாமனபயோக³ம் வினா ‘‘நாஹம் க³ண்ஹாமீ’’திஆதி³னா அஞ்ஞஸ்மிம் பயோகே³ அகதே ரஜ்ஜஸங்கோ²பா⁴தி³காலே ‘‘ந தா³னி தஸ்ஸ த³ஸ்ஸாமி, ந மய்ஹம் தா³னி த³ஸ்ஸதீ’’தி உபோ⁴ஹிபி ஸகஸகட்டா²னே நிஸீதி³த்வா து⁴ரனிக்கே²பே கதேபி அவஹாரோ நத்தி². கேசி பனேத்த² ‘‘பாராஜிகமேவ படிஸாமனபயோக³ஸ்ஸ கதத்தா’’தி வத³ந்தி, தம் தேஸம் மதிமத்தம், ந ஸாரதோ பச்சேதப்³ப³ம். படிஸாமனகாலே ஹிஸ்ஸ தே²ய்யசித்தம் நத்தி², ‘‘ந தா³னி தஸ்ஸ த³ஸ்ஸாமீ’’தி தே²ய்யசித்துப்பத்திக்க²ணே ச ஸாமினோ து⁴ரனிக்கே²பசித்தப்பவத்தியா ஹேதுபூ⁴தோ காயவசீபயோகோ³ நத்தி², யேன ஸோ ஆபத்திம் ஆபஜ்ஜேய்ய. ந ஹி அகிரியஸமுட்டா²னா அயம் ஆபத்தீதி. தா³னே ஸஉஸ்ஸாஹோ, ரக்க²தி தாவாதி அவஹாரம் ஸந்தா⁴ய அவுத்தத்தா ‘‘நாஹம் க³ண்ஹாமீ’’திஆதி³னா முஸாவாத³கரணே பாசித்தியமேவ ஹோதி, ந து³க்கடம் தே²ய்யசித்தாபா⁴வேன ஸஹபயோக³ஸ்ஸபி அபா⁴வதோதி க³ஹேதப்³ப³ம்.

யதி³பி முகே²ன த³ஸ்ஸாமீதி வத³தி…பே… பாராஜிகந்தி ஏத்த² கதரபயோகே³ன ஆபத்தி, ந தாவ பட²மேன ப⁴ண்ட³படிஸாமனபயோகே³ன ததா³ தே²ய்யசித்தபா⁴வா, நாபி ‘‘த³ஸ்ஸாமீ’’தி கத²னபயோகே³ன ததா³ தே²ய்யசித்தே விஜ்ஜமானேபி பயோக³ஸ்ஸ கப்பியத்தாதி? வுச்சதே – ஸாமினா ‘‘தே³ஹீ’’தி ப³ஹுஸோ யாசியமானோபி அத³த்வா யேன பயோகே³ன அத்தனோ அதா³துகாமதம் ஸாமிகஸ்ஸ ஞாபேஸி, யேன ச ஸோ அதா³துகாமோ அயம் விக்கி²பதீதி ஞத்வா து⁴ரம் நிக்கி²பதி, தேனேவ பயோகே³னஸ்ஸ ஆபத்தி. ந ஹேத்த² உபனிக்கி²த்தப⁴ண்டே³ பரியாயேன முத்தி அத்தி². அதா³துகாமதாய ஹி ‘‘கதா³ தே தி³ன்னம், கத்த² தே தி³ன்ன’’ந்திஆதி³பரியாயவசனேனபி ஸாமிகஸ்ஸ து⁴ரேனிக்கி²பாபிதே ஆபத்தியேவ. தேனேவ அட்ட²கதா²யம் வுத்தம் ‘‘கிம் தும்ஹே ப⁴ணத²…பே… உபி⁴ன்னம் து⁴ரனிக்கே²பேன பி⁴க்கு²னோ பாராஜிக’’ந்தி. பரஸந்தகஸ்ஸ பரேஹி க³ண்ஹாபனே ஏவ ஹி பரியாயதோ முத்தி, ந ஸப்³ப³த்தா²தி க³ஹேதப்³ப³ம். அத்தனோ ஹத்தே² நிக்கி²த்தத்தாதி ஏத்த² அத்தனோ ஹத்தே² ஸாமினா தி³ன்னதாய ப⁴ண்டா³கா³ரிகட்டா²னே டி²தத்தா ச டா²னாசாவனேபி நத்தி² அவஹாரோ, தே²ய்யசித்தேன பன க³ஹணே து³க்கடதோ ந முச்சதீதி வேதி³தப்³ப³ம். ஏஸேவ நயோதி அவஹாரோ நத்தி², ப⁴ண்ட³தே³ய்யம் பன ஹோதீதி அதி⁴ப்பாயோ.

54. பஞ்சன்னம் ஸஹத⁴ம்மிகானந்தி பி⁴க்கு²பி⁴க்கு²னீஸிக்க²மானஸாமணேரஸாமணேரீனம். ஏதேன ந கேவலம் கி³ஹீனம் ஏவ, அத² கோ² தாபஸபரிப்³பா³ஜகாதீ³னம்பி ஸந்தகம் படிஸாமேதும் ந வட்டதீதி த³ஸ்ஸேதி. நட்டே²பி கீ³வா ந ஹோதி, கஸ்மா? அஸம்படிச்சா²பிதத்தாதி அத்தோ². து³தியே ஏஸேவ நயோதி கீ³வா ந ஹோதி, கஸ்மா? அஜானிதத்தா. ததியே ச ஏஸேவ நயோதி கீ³வா ந ஹோதி, கஸ்மா? படிக்கி²பிதத்தா. ஏத்த² ச காயேன வா வாசாய வா சித்தேன வா படிக்கி²த்தோபி படிக்கி²த்தோயேவ நாம ஹோதி.

தஸ்ஸேவ கீ³வா ஹோதி, ந ஸேஸபி⁴க்கூ²னம், கஸ்மா? தஸ்ஸேவ ப⁴ண்டா³கா³ரிகஸ்ஸ ப⁴ண்டா³கா³ரே இஸ்ஸரபா⁴வதோ. ப⁴ண்டா³கா³ரிகஸ்ஸ கீ³வா ந ஹோதி அலஸஜாதிகஸ்ஸேவ பமாதே³ன ஹரிதத்தா. து³தியே ப⁴ண்டா³கா³ரிகஸ்ஸ கீ³வா ந ஹோதி தஸ்ஸ அனாரோசிதத்தா. நட்டே² தஸ்ஸ கீ³வா தேன ட²பிதத்தா. தஸ்ஸேவ கீ³வா, ந அஞ்ஞேஸம் தேன ப⁴ண்டா³கா³ரிகேன ஸம்படிச்சி²தத்தா ட²பிதத்தா ச. நத்தி² கீ³வா தேன படிக்கி²பிதத்தா. நட்ட²ம் ஸுனட்ட²மேவ ப⁴ண்டா³கா³ரிகஸ்ஸ அஸம்படிச்சா²பனதோ. நட்டே² கீ³வா தேன ட²பிதத்தா. ஸப்³ப³ம் தஸ்ஸ கீ³வா தஸ்ஸ ப⁴ண்டா³கா³ரிகஸ்ஸ பமாதே³ன ஹரணதோ. தத்தே²வ உபசாரே விஜ்ஜமானேதி ப⁴ண்டா³கா³ரிகஸ்ஸ ஸமீபேயேவ உச்சாரபஸ்ஸாவட்டா²னே விஜ்ஜமானே.

55. மயி ச மதே ஸங்க⁴ஸ்ஸ ச ஸேனாஸனே வினட்டே²தி ஏத்த² கேவலம் ஸங்க⁴ஸ்ஸ ஸேனாஸனம் மா வினஸ்ஸீதி இமினா அதி⁴ப்பாயேன விவரிதும்பி வட்டதியேவாதி வத³ந்தி. ‘‘தம் மாரேஸ்ஸாமீ’’தி ஏத்தகே வுத்தேபி விவரிதும் வட்டதி ‘‘கி³லானபக்கே² டி²தத்தா அவிஸயோ’’தி வுத்தத்தா. மரணதோ ஹி பரம் கே³லஞ்ஞம் அவிஸயத்தஞ்ச நத்தி². ‘‘த்³வாரம் சி²ந்தி³த்வா ஹரிஸ்ஸாமா’’தி ஏத்தகே வுத்தேபி விவரிதும் வட்டதியேவ. ஸஹாயேஹி ப⁴விதப்³ப³ந்தி தேஹிபி பி⁴க்கா²சாராதீ³ஹி பரியேஸித்வா அத்தனோ ஸந்தகம்பி கிஞ்சி கிஞ்சி தா³தப்³ப³ந்தி வுத்தம் ஹோதி. அயஞ்ஹி ஸாமீசீதி ப⁴ண்டா³கா³ரே வஸந்தானம் இத³ம் வத்தம். லோலமஹாதே²ரோதி மந்தோ³ மோமூஹோ ஆகிண்ணவிஹாரீ ஸதா³ கீளாபஸுதோ வா மஹாதே²ரோ.

56. இதரேஹீதி தஸ்மிம்யேவ க³ப்³பே⁴ வஸந்தேஹி பி⁴க்கூ²ஹி. விஹாரரக்க²ணவாரே நியுத்தோ விஹாரவாரிகோ, வுட்³ட⁴படிபாடியா அத்தனோ வாரே விஹாரரக்க²ணகோ. நிவாபந்தி ப⁴த்தவேதனம். சோரானம் படிபத²ம் க³தேஸூதி சோரானம் ஆக³மனம் ஞத்வா ‘‘பட²மதரம்யேவ க³ந்த்வா ஸத்³த³ம் கரிஸ்ஸாமா’’தி சோரானம் அபி⁴முக²ம் க³தேஸு. ‘‘சோரேஹி ஹடப⁴ண்ட³ம் ஆஹரிஸ்ஸாமா’’தி தேஸம் அனுபத²ம் க³தேஸுபி ஏஸேவ நயோ. நிப³த்³த⁴ம் கத்வாதி ‘‘அஸுககுலே யாகு³ப⁴த்தம் விஹாரவாரிகானம்யேவா’’தி ஏவம் நியமனம் கத்வா. த்³வே திஸ்ஸோ யாகு³ஸலாகா ச சத்தாரி பஞ்ச ஸலாகப⁴த்தானி ச லப⁴மானோவாதி இத³ம் நித³ஸ்ஸனமத்தம், ததோ ஊனம் வா ஹோது அதி⁴கம் வா, அத்தனோ ச வேய்யாவச்சகரஸ்ஸ ச யாபனமத்தம் லப⁴னமேவ பமாணந்தி க³ஹேதப்³ப³ம். நிஸ்ஸிதகே ஜக்³கா³பேந்தீதி அத்தனோ அத்தனோ நிஸ்ஸிதகே பி⁴க்கா²சரியாய போஸேந்தா நிஸ்ஸிதகேஹி விஹாரம் ஜக்³கா³பேந்தி. அஸஹாயஸ்ஸாதி ஸஹாயரஹிதஸ்ஸ. ‘‘அஸஹாயஸ்ஸ அது³தியஸ்ஸா’’தி பாடோ² யுத்தோ. பச்சி²மம் புரிமஸ்ஸேவ வேவசனம். அஸஹாயஸ்ஸ வா அத்தது³தியஸ்ஸ வாதி இமஸ்மிம் பன பாடே² ஏகேன ஆனீதம் த்³வின்னம் நப்பஹோதீதி அத்தது³தியஸ்ஸபி வாரோ நிவாரிதோதி வத³ந்தி, தம் ‘‘யஸ்ஸ ஸபா⁴கோ³ பி⁴க்கு² ப⁴த்தம் ஆனேத்வா தா³தா நத்தீ²’’தி இமினா ந ஸமேதி, வீமம்ஸிதப்³ப³ம். விமதிவினோத³னியம் (வி. வி. டீ. 1.112) பன ‘‘அத்தது³தியஸ்ஸாதி அப்பிச்ச²ஸ்ஸ. அத்தாஸரீரமேவ து³தியோ, ந அஞ்ஞோதி ஹி அத்தது³தியோ, தது³ப⁴யஸ்ஸபி அத்த²ஸ்ஸ விபா⁴வனம் ‘யஸ்ஸா’திஆதி³. ஏதேன ஸப்³பே³ன ஏகேகஸ்ஸ வாரோ ந பாபேதப்³போ³தி த³ஸ்ஸேதீ’’தி வுத்தம்.

பாகவத்தத்தா²யாதி நிச்சம் பசிதப்³ப³யாகு³ப⁴த்தஸங்கா²தவத்தத்தா²ய. ட²பேந்தீதி தா³யகா ட²பேந்தி. தம் க³ஹேத்வாதி தம் ஆராமிகாதீ³ஹி தீ³யமானம் பா⁴க³ம் க³ஹேத்வா. உபஜீவந்தேன டா²தப்³ப³ந்தி அப்³போ⁴காஸிகருக்க²மூலிகேனபி பாகவத்தம் உபனிஸ்ஸாய ஜீவந்தேன அத்தனோ பத்தசீவரரக்க²ணத்தா²ய விஹாரவாரே ஸம்பத்தே டா²தப்³ப³ம். ந கா³ஹாபேதப்³போ³தி ஏத்த² யஸ்ஸ அப்³போ⁴காஸிகஸ்ஸபி அத்தனோ அதி⁴கபரிக்கா²ரோ சே ட²பிதோ அத்தி², சீவராதி³ஸங்கி⁴கபா⁴கே³பி ஆலயோ அத்தி², ஸோபி கா³ஹாபேதப்³போ³. பரிபுச்ச²ந்தி புச்சி²தபஞ்ஹவிஸ்ஸஜ்ஜனம், அட்ட²கத²ம் வா. தி³கு³ணந்தி அஞ்ஞேஹி லப்³ப⁴மானதோ த்³விகு³ணம். பக்க²வாரேனாதி அட்³ட⁴மாஸவாரேன.

இதி வினயஸங்க³ஹஸம்வண்ணனாபூ⁴தே வினயாலங்காரே

ப⁴ண்ட³படிஸாமனவினிச்ச²யகதா²லங்காரோ நாம

த³ஸமோ பரிச்சே²தோ³.