4. பாசித்தியகண்ட³ம்

1. லஸுணவக்³கோ³

1. பட²மலஸுணாதி³ஸிக்கா²பத³வண்ணனா

797. பாசித்தியேஸு லஸுணவக்³க³ஸ்ஸ பட²மே ப³த³ரஸாளவம் நாம ப³த³ரப²லானி ஸுக்கா²பேத்வா தேஹி கத்தப்³ப³ப்³யஞ்ஜனவிகதி. ஆமகமாக³த⁴லஸுணஞ்சேவ, அஜ்ஜோ²ஹரணஞ்சாதி த்³வே அங்கா³னி.

799-812. து³தியாதீ³னி உத்தானத்தா²னி.

815. ச²ட்டே² பாளியம் ஆஸும்பி⁴த்வாதி பாதேத்வா.

817. த³தி⁴மத்தூ²தி த³தி⁴ம்ஹி பஸன்னோத³கம். ரஸகீ²ராதீ³னந்தி மம்ஸரஸகீ²ராதீ³னம். பு⁴ஞ்ஜந்தஸ்ஸ பி⁴க்கு²னோ ஹத்த²பாஸே டா²னம், பானீயஸ்ஸ வா விதூ⁴பனஸ்ஸ வா க³ஹணந்தி த்³வே அங்கா³னி.

822. ஸத்தமே அவிஞ்ஞத்தியா லத்³த⁴ந்தி அத்தனோ விஞ்ஞத்திம் வினா லத்³த⁴ம். புப்³பா³பரவிருத்³த⁴ந்தி ஸயம் கரணே பாசித்தியந்தி இத³ம் காராபனே து³க்கடவசனேன விருஜ்ஜ²னம் ஸந்தா⁴ய வுத்தம். தேனாஹ ‘‘ந ஹீ’’திஆதி³, ‘‘அவிஞ்ஞத்தியா லத்³த⁴’’ந்திஆதி³வசனேன வா விருஜ்ஜ²னம் ஸந்தா⁴ய வுத்தம். அஞ்ஞாய விஞ்ஞத்திபி ஹி இமிஸ்ஸா அவிஞ்ஞத்தியா லத்³த⁴மேவாதி. ஆமகத⁴ஞ்ஞவிஞ்ஞாபனாதி³, தம் ப⁴ஜ்ஜனாதி³னா அஜ்ஜோ²ஹரணந்தி த்³வே அங்கா³னி.

824. அட்ட²மே நிப்³பி³ட்டோ²தி லத்³தோ⁴. கேணீதி ரஞ்ஞோ தா³தப்³போ³ ஆயோ, ஆயுப்பத்திட்டா²னந்தி அத்தோ². தேனாஹ ‘‘ஏகம் டா²னந்தர’’ந்திஆதி³. டா²னந்தரந்தி ச கா³மஜனபதா³ணாயத்தம். வளஞ்ஜியமானதிரோகுட்டாதி³தா, அனபலோகேத்வா உச்சாராதீ³னம் ச²ட்³ட³னாதீ³தி த்³வே அங்கா³னி.

830. நவமே ‘‘மத்த²கச்சி²ன்னனாளிகேரம்பீ’’தி வுத்தத்தா ஹரிதூபரி ச²ட்³ட³னமேவ படிக்கி²த்தம். தேனாஹ ‘‘அனிக்கி²த்தபீ³ஜேஸூ’’திஆதி³. யத்த² ச ச²ட்³டே³தும் வட்டதி, தத்த² ஹரிதே வச்சாதி³ம் காதும்பி வட்டதி ஏவ. ஸப்³பே³ஸந்தி பி⁴க்கு²பி⁴க்கு²னீனம்.

836-7. த³ஸமே தேஸம்யேவாதி யேஸம் நிச்சம் பஸ்ஸதி. ஆராமே ட²த்வாதி டி²தனிஸன்னட்டா²னே ஏவ ட²த்வா ஸமந்ததோ கீ³வம் பரிவத்தேத்வாபி பஸ்ஸதி, அனாபத்தி. டி²தட்டா²னதோ க³ந்த்வா பஸ்ஸிதும் ந வட்டதி. கேசி பன ‘‘வட்டதீ’’தி வத³ந்தி. தம் பன ‘‘த³ஸ்ஸனாய க³ச்சே²ய்ய, பாசித்திய’’ந்தி ஸாமஞ்ஞதோ க³மனஸ்ஸ படிக்கி²த்தத்தா, அனாபத்தியம்பி க³மனாய அவுத்தத்தா ச ந க³ஹேதப்³ப³ம். நச்சாதி³தா, அனனுஞ்ஞாதகாரணா க³மனம், த³ஸ்ஸனாதி³ சாதி தீணி அங்கா³னி.

நிட்டி²தோ லஸுணவக்³கோ³ பட²மோ.

2. அந்த⁴காரவக்³கோ³

1. பட²மாதி³ஸிக்கா²பத³வண்ணனா

841. து³தியவக்³க³ஸ்ஸ பட²மே தா³னே வாதி தா³னனிமித்தம். ரத்தந்த⁴காரே புரிஸஸ்ஸ ஹத்த²பாஸே டா²னாதி³, ரஹோபேக்கா², ஸஹாயாபா⁴வோதி தீணி அங்கா³னி.

842-850. து³தியாதீ³னி உத்தானானி.

854. பஞ்சமே பல்லங்கஸ்ஸ அனோகாஸேதி ஊருப³த்³தா⁴ஸனஸ்ஸ அப்பஹோனகே. புரேப⁴த்தம் அந்தரக⁴ரே பல்லங்கப்பஹோனகாஸனே நிஸஜ்ஜா, அனனுஞ்ஞாதகாரணா அனாபுச்சா² வுத்தபரிச்சே²தா³திக்கமோதி த்³வே அங்கா³னி.

860-879. ச²ட்டா²தீ³னி உத்தானானி.

நிட்டி²தோ அந்த⁴காரவக்³கோ³ து³தியோ.

3. நக்³க³வக்³கோ³

1. பட²மாதி³ஸிக்கா²பத³வண்ணனா

883-887. ததியவக்³க³ஸ்ஸ பட²மது³தியானி உத்தானானி.

893. ததியே விஸிப்³பே³த்வாதி விஜடேத்வா. து⁴ரம் நிக்கி²த்தமத்தேதி விஸிப்³ப³னதி³வஸதோ பஞ்ச தி³வஸே அதிக்காமேத்வா து⁴ரம் நிக்கி²த்தமத்தே. அந்தோபஞ்சாஹே பன து⁴ரனிக்கே²பேபி அனாபத்தி ஏவ ‘‘அஞ்ஞத்ர சதூஹபஞ்சாஹா’’தி வுத்தத்தா. உபஸம்பன்னாய சீவரம் ஸிப்³ப³னத்தா²ய விஸிப்³பே³த்வா பஞ்சஹாதிக்கமோ, அனனுஞ்ஞாதகாரணா து⁴ரனிக்கே²போதி த்³வே அங்கா³னி.

900. சதுத்தே² பஞ்சன்னம் சீவரானம் அபரிவத்தனம், அனனுஞ்ஞாதகாரணா பஞ்சாஹாதிக்கமோதி த்³வே அங்கா³னி.

903. பஞ்சமம் உத்தானமேவ.

909. ச²ட்டே² விகப்பனுபக³ஸ்ஸ ஸங்கே⁴ பரிணததா, வினா ஆனிஸம்ஸத³ஸ்ஸனேன அந்தராயகரணந்தி த்³வே அங்கா³னி.

911. ஸத்தமம் உத்தானமேவ.

916. அட்ட²மே கும்ப⁴தூ²ணம் நாம கும்ப⁴ஸத்³தோ³, தேன கீளந்தீதி கும்ப⁴தூ²ணிகா. தேனாஹ ‘‘க⁴டகேன கீளனகா’’தி. தீ³க⁴னிகாயட்ட²கதா²யம் பன ‘‘சதுரஸ்ஸஅம்ப³ணகதாள’’ந்தி வுத்தம். தஞ்ஹி ருக்க²ஸாராதி³மயம் அந்தோசி²த்³த³ம் சதூஸு பஸ்ஸேஸு சம்மோனத்³த⁴ம் வாதி³தப⁴ண்ட³ம், யம் ‘‘பி³ம்பி³ஸக’’ந்திபி வுச்சதி, தம் வாதே³ந்தாபி கும்ப⁴தூ²ணிகா. தேனாஹ ‘‘பி³ம்பி³ஸகவாதி³தகாதிபி வத³ந்தீ’’தி.

918. பாளியம் கப்பகதந்தி கப்பகதம் நிவாஸனபாருபனூபக³ம். ஸமணசீவரதா, அனனுஞ்ஞாதானம் தா³னந்தி த்³வே அங்கா³னி.

921-931. நவமத³ஸமானி உத்தானானேவ.

நிட்டி²தோ நக்³க³வக்³கோ³ ததியோ.

4. துவட்டவக்³கோ³

10. த³ஸமஸிக்கா²பத³வண்ணனா

976. துவட்டவக்³க³ஸ்ஸ த³ஸமே சாரிகாய அபக்கமனம் பண்ணத்திவஜ்ஜமேவ. பண்ணத்திவிஜானனசித்தேன ஸசித்தகதம் ஸந்தா⁴ய பனேத்த² ‘‘லோகவஜ்ஜ’’ந்தி த³ட்ட²ப்³ப³ம். ஸேஸம் ஸப்³ப³த்த² உத்தானமேவ.

நிட்டி²தோ துவட்டவக்³கோ³ சதுத்தோ².

5. சித்தாகா³ரவக்³கோ³

1. பட²மாதி³ஸிக்கா²பத³வண்ணனா

978. சித்தாகா³ரவக்³க³ஸ்ஸ பட²மே பாடேக்கா ஆபத்தியோதி கீ³வாய பரிவத்தனப்பயோக³க³ணனாய.

1015. நவமே ஹத்தி²ஆதீ³ஸு ஸிப்ப-ஸத்³தோ³ பச்சேகம் யோஜேதப்³போ³, ததா² ஆத²ப்³ப³ணாதீ³ஸு மந்த-ஸத்³தோ³. தத்த² ஆத²ப்³ப³ணமந்தோ நாம ஆத²ப்³ப³ணவேத³விஹிதோ பரூபகா⁴தகரோ மந்தோ. கீ²லனமந்தோ நாம வேரிமாரணத்தா²ய ஸாரதா³ருமயம் கீ²லம் மந்தேத்வா பத²வியம் ஆகோடனமந்தோ. அக³த³ப்பயோகோ³ விஸப்பயோஜனம். நாக³மண்ட³லந்தி ஸப்பானம் பவேஸனிவாரணத்த²ம் மண்ட³லப³ந்த⁴மந்தோ. ஸேஸம் ஸப்³ப³த்த² உத்தானமேவ.

நிட்டி²தோ சித்தாகா³ரவக்³கோ³ பஞ்சமோ.

1025-1116. ஆராமவக்³கே³, க³ப்³பி⁴னிவக்³கே³ ச ஸப்³ப³ம் உத்தானமேவ.

8. குமாரிபூ⁴தவக்³கோ³

1. பட²மாதி³ஸிக்கா²பத³வண்ணனா

1119. அட்ட²மவக்³க³ஸ்ஸ பட²மே ஸப்³ப³பட²மா த்³வே மஹாஸிக்க²மானாதி க³ப்³பி⁴னிவக்³கே³ (பாசி. 1067 ஆத³யோ) ஸப்³ப³பட²மம் வுத்தா த்³வே. ஸிக்க²மானா இச்சேவ வத்தப்³பா³தி ஸம்முதிகம்மாதீ³ஸு அஞ்ஞதா² வுத்தே கம்மம் குப்பதீதி அதி⁴ப்பாயோ.

1167. ஏகாத³ஸமே பாரிவாஸியேன ச²ந்த³தா³னேனாதி பரிவுத்தே²ன நவிகப்பவுத்தே²ன விக³தேன ச²ந்த³தா³னேனாதி அத்தோ², ச²ந்த³விஸ்ஸஜ்ஜனமத்தேன வா.

1168. ‘‘வுட்டி²தாயா’’தி ஏதேன ‘‘இதா³னி கம்மம் ந கரிஸ்ஸாமா’’தி து⁴ரம் நிக்கி²பித்வா காயேன அவுட்ட²ஹித்வா நிஸின்னாயபி பரிஸாய கம்மம் காதும் ந வட்டதீதி த³ஸ்ஸேதி. தேனாஹ ‘‘ச²ந்த³ம் அவிஸ்ஸஜ்ஜேத்வா அவுட்டி²தாயா’’தி. பாளியம் பன ‘‘அனாபத்தி அவுட்டி²தாய பரிஸாயா’’தி ஸாமஞ்ஞதோ வுத்தத்தா, உபோஸத²க்க²ந்த⁴கே ச ‘‘ந, பி⁴க்க²வே, பாரிவாஸிகபாரிஸுத்³தி⁴தா³னேன உபோஸதோ² காதப்³போ³ அஞ்ஞத்ர அவுட்டி²தாய பரிஸாயா’’தி (மஹாவ. 183) வுத்தத்தா, தத³ட்ட²கதா²யம்பி ‘‘பாரிவாஸியபாரிஸுத்³தி⁴தா³னம் நாம பரிஸாய வுட்டி²தகாலதோ பட்டா²ய ந வட்டதி, அவுட்டி²தாய பன வட்டதீ’’தி (மஹாவ. அட்ட². 183) வுத்தத்தா ச ‘‘கம்மம் ந கரிஸ்ஸாமீ’’தி து⁴ரம் நிக்கி²பித்வா நிஸின்னாயபி கம்மம் காதும் வட்டதீதி க³ஹேதப்³ப³ம். ஸேஸம் உத்தானமேவ.

நிட்டி²தோ குமாரிபூ⁴தவக்³கோ³ அட்ட²மோ.

1181. ச²த்தவக்³கோ³ உத்தானோ ஏவ.

கு²த்³த³கவண்ணனானயோ நிட்டி²தோ.