1. பட²மஸங்கா⁴தி³ஸேஸஸிக்கா²பத³வண்ணனா

679. ஸங்கா⁴தி³ஸேஸகண்டே³ ‘‘து³தியஸ்ஸ ஆரோசேதீ’’தி ஏத்தா²பி த்³வீஸுபி அட்³ட³காரகேஸு யஸ்ஸ கஸ்ஸசி து³தியஸ்ஸ கத²ம் யோ கோசி ஆரோசேதீதி ஏவமத்தோ² க³ஹேதப்³போ³தி ஆஹ ‘‘ஏஸேவ நயோ’’தி.

க³திக³தந்தி சிரகாலப்பவத்தம். ஆபத்தீதி ஆபஜ்ஜனம். ‘‘நிஸ்ஸாரணீய’’ந்தி இத³ம் கத்துஅத்தே² ஸித்³த⁴ந்தி ஆஹ ‘‘நிஸ்ஸாரேதீ’’தி. ஆபன்னம் பி⁴க்கு²னிம் ஸங்க⁴தோ வியோஜேதி, வியோஜனஹேது ஹோதீதி அத்தோ².

கீ³வாயேவாதி ஆணத்தியா அபா⁴வதோ. தேஸம் அனத்த²காமதாயாதி ‘‘சோரோ’’தி வுத்தம் மம வசனம் ஸுத்வா கேசி த³ண்டி³ஸ்ஸந்தி ஜீவிதா வோரோபேஸ்ஸந்தீதி ஏவம் ஸஞ்ஞாய. ஏதேன கேவலம் ப⁴யேன வா பரிக்கா²ரக்³க³ஹணத்த²ம் வா ஸஹஸா ‘‘சோரோ’’தி வுத்தே த³ண்டி³தேபி ந தோ³ஸோதி த³ஸ்ஸேதி. ராஜபுரிஸானஞ்ஹி ‘‘சோரோ அய’’ந்தி உத்³தி³ஸ்ஸ கத²னே ஏவ கீ³வா, பி⁴க்கூ²னம், பன ஆராமிகாதீ³னம் வா ஸம்முகா² ‘‘அஸுகோ சோரோ ஏவமகாஸீ’’தி கேனசி வுத்தவசனம் நிஸ்ஸாய ஆராமிகாதீ³ஸு ராஜபுரிஸானம் வத்வா த³ண்டா³பேந்தேஸுபி பி⁴க்கு²ஸ்ஸ ந கீ³வா ராஜபுரிஸானம் அவுத்தத்தா. யேஸஞ்ச வுத்தம், தேஹி ஸயம் சோரஸ்ஸ அத³ண்டி³தத்தாதி க³ஹேதப்³ப³ம். ‘‘த்வம் ஏதஸ்ஸ ஸந்தகம் அச்சி²ந்தா³’’தி ஆணத்தோபி ஹி ஸசே அஞ்ஞேன அச்சி²ந்தா³பேதி, ஆணாபகஸ்ஸ அனாபத்தி விஸங்கேதத்தா. ‘‘அத்தனோ வசனகர’’ந்தி இத³ம் ஸாமீசிவஸேன வுத்தம். வசனம் அகரோந்தானம் ராஜபுரிஸானம்பி ‘‘இமினா க³ஹிதபரிக்கா²ரம் ஆஹராபேஹி, மா சஸ்ஸ த³ண்ட³ம் கரோஹீ’’தி உத்³தி³ஸ்ஸ வத³ந்தஸ்ஸாபி த³ண்டே³ க³ஹிதேபி ந கீ³வா ஏவ த³ண்ட³க்³க³ஹணஸ்ஸ படிக்கி²த்தத்தா, ‘‘அஸுகப⁴ண்ட³ம் அவஹரா’’தி ஆணாபேத்வா விப்படிஸாரே உப்பன்னே புன படிக்கி²பனே (பாரா. 121) விய.

தா³ஸாதீ³னம் ஸம்படிச்ச²னே விய தத³த்தா²ய அட்³ட³கரணே பி⁴க்கூ²னம்பி து³க்கடந்தி ஆஹ ‘‘அகப்பியஅட்³டோ³ நாம ந வட்டதீ’’தி. கேனசி பன பி⁴க்கு²னா கே²த்தாதி³அத்தா²ய வோஹாரிகானம் ஸந்திகம் க³ந்த்வா அட்³டே³ கதேபி தம் கே²த்தாதி³ஸம்படிச்ச²னே விய ஸப்³பே³ஸம் அகப்பியம் ந ஹோதி புப்³பே³ ஏவ ஸங்க⁴ஸ்ஸ ஸந்தகத்தா, பி⁴க்கு²ஸ்ஸேவ பன பயோக³வஸேன ஆபத்தியோ ஹோந்தி. தா³ஸாதீ³னம்பி பன அத்தா²ய ரக்க²ம் யாசிதும் வோஹாரிகேன புட்டே²ன ஸங்க⁴ஸ்ஸ உப்பன்னம் கப்பியக்கமம் வத்தும், ஆராமிகாதீ³ஹி ச அட்³ட³ம் காராபேதுஞ்ச வட்டதி ஏவ. விஹாரவத்தா²தி³கப்பியஅட்³ட³ம் பன பி⁴க்கு²னோ ஸயம்பி காதும் வட்டதி.

பி⁴க்கு²னீனம் வுத்தோதி ரக்க²ம் யாசந்தீனம் பி⁴க்கு²னீனம் வுத்தோ உத்³தி³ஸ்ஸஅனுத்³தி³ஸ்ஸவஸேன ரக்கா²யாசனவினிச்ச²யோ, ந ஸப்³போ³ ஸிக்கா²பத³வினிச்ச²யோ அஸாதா⁴ரணத்தா ஸிக்கா²பத³ஸ்ஸ. தேனாஹ ‘‘பி⁴க்கு²னோபீ’’திஆதி³. அனாகட்³டி⁴தாய அட்³ட³கரணம், அட்³ட³பரியோஸானந்தி த்³வே அங்கா³னி.

பட²மஸங்கா⁴தி³ஸேஸஸிக்கா²பத³வண்ணனா நிட்டி²தா.