7. ஸேகி²யகண்ட³ம்

1. பரிமண்ட³லவக்³க³வண்ணனா

576. ஸேகி²யேஸு யஸ்மா வத்தக்க²ந்த⁴கே (சூளவ. 356 ஆத³யோ) வுத்தவத்தானிபி ஸிக்கி²தப்³ப³த்தா ஸேகி²யானேவ, தஸ்மா பாராஜிகாதீ³ஸு வியேத்த² பாளியம் பரிச்சே²தோ³ ந கதோ. சாரித்தனயத³ஸ்ஸனத்த²ஞ்ச ‘‘யோ பன பி⁴க்கு² ஓலம்பே³ந்தோ நிவாஸேய்ய, து³க்கட’’ந்தி அவத்வா ‘‘ஸிக்கா² கரணீயா’’தி ஸப்³ப³த்த² பாளி ஆரோபிதா. பத³பா⁴ஜனே பன ‘‘ஆபத்தி து³க்கடஸ்ஸா’’தி வுத்தத்தா ஸப்³ப³த்த² அனாத³ரியகரணே து³க்கடம் வேதி³தப்³ப³ம்.

அட்ட²ங்கு³லமத்தந்தி மத்த-ஸத்³தே³ன ததோ கிஞ்சி அதி⁴கம், ஊனம்பி ஸங்க³ண்ஹாதி. தேனேவ நிஸின்னஸ்ஸ சதுரங்கு³லமத்தம்பி வுத்தம். ந ஹி நிஸின்னஸ்ஸ சதுரங்கு³லப்பமாணம், டி²தஸ்ஸ அட்ட²ங்கு³லமேவாதி ஸக்கா நியமேதும் ஊனாதி⁴கத்தஸம்ப⁴வதோ. தஸ்மா யதா² ஸாருப்பம் ஹோதி ஏவம் அட்ட²ங்கு³லானுஸாரேன நிவாஸனஞ்ஞேவ அதி⁴ப்பேதந்தி க³ஹேதப்³ப³ம். தேனேவ வக்க²தி ‘‘யோ பன பி⁴க்கு² ஸுக்க²ஜங்கோ⁴ வா’’திஆதி³. குருந்தி³யம் ‘‘அஜானந்தஸ்ஸ அனாபத்தீ’’தி ஆத³ரம் கத்வா உக்³க³ண்ஹந்தஸ்ஸாபி அஜானனம் ஸந்தா⁴ய வுத்தம். தேனாபி நிரந்தரம் நிவாஸனபாருபனவத்தம் ஸிக்கி²தப்³ப³ம், அஸிக்கி²தோ அனாத³ரியமேவ. பரிமண்ட³லக்³க³ஹணேன உக்கி²பித்வா நிவாஸனம்பி படிக்கி²த்தந்தி ஆஹ ‘‘உக்கி²பித்வா வா ஓதாரேத்வா வா’’தி.

ஸசித்தகந்தி வத்து²விஜானனசித்தேன ஸசித்தகம். ஸாரத்த²தீ³பனியம் பன உபதிஸ்ஸத்தே²ரவாத³னயேன லோகவஜ்ஜத்தம் க³ஹேத்வா ‘‘வத்து²விஜானனசித்தேன, பண்ணத்திவிஜானனசித்தேன ச ஸசித்தக’’ந்தி (ஸாரத்த². டீ. ஸேகி²யகண்ட³ 3.576) வுத்தம். தத்த² ச வத்து²விஜானனம் விஸும் ந வத்தப்³ப³ம். பண்ணத்திவிஜானனேன தஸ்ஸாபி அந்தோக³த⁴பா⁴வதோ இத³ம் வத்து²ம் ஏவம் வீதிக்கமந்தஸ்ஸ ஆபத்தீதி விஜானந்தோ ஹி பண்ணத்திம் விஜானாதீதி வுச்சதி. உபதிஸ்ஸத்தே²ரவாதே³ சேத்த² பண்ணத்திம் அஜானித்வா அபரிமண்ட³லனிவாஸனாதி³வத்து²மேவ ஜானந்தஸ்ஸ பண்ணத்திவீதிக்கமானாத³ரியாபா⁴வா ஸப்³ப³ஸேகி²யேஸு அனாபத்தி ஏவ அபி⁴மதா, தஞ்ச ந யுத்தம் கோஸம்ப³க்க²ந்த⁴கே (மஹாவ. 451 ஆத³யோ) வச்சகுடியம் உத³காவஸேஸம் ட²பேந்தஸ்ஸ பண்ணத்திவிஜானனாபா⁴வேபி ஆபத்தியா வுத்தத்தா. வுத்தஞ்ஹி தத்த² ‘‘தேன கோ² பன ஸமயேன அஞ்ஞதரோ பி⁴க்கு² ஆபத்திம் ஆபன்னோ ஹோதி …பே… ஸோ அபரேன ஸமயேன தஸ்ஸா ஆபத்தியா அனாபத்திதி³ட்டி² ஹோதீ’’திஆதி³ (மஹாவ. 451). அட்ட²கதா²யஞ்சஸ்ஸ ‘‘த்வம் ஏத்த² ஆபத்திபா⁴வம் ந ஜானாஸீதி, ஆம ந ஜானாமீதி. ஹோது ஆவுஸோ, ஏத்த² ஆபத்தீதி, ஸசே ஹோதி, தே³ஸேஸ்ஸாமீதி. ஸசே பன தே, ஆவுஸோ, அஸஞ்சிச்ச அஸதியா கதம், நத்தி² ஆபத்தீதி. ஸோ தஸ்ஸா ஆபத்தியா அனாபத்திதி³ட்டி² அஹோஸீ’’தி (மஹாவ. அட்ட². 451) வுத்தம், ததா² ‘‘அத⁴ம்மவாதீ³தி உக்கி²த்தானுவத்தகேஸு அஞ்ஞதரோ’’தி (மஹாவ. அட்ட². 457-458) ச வுத்தம். க²ந்த⁴கவத்தானஞ்ஹி ஸேகி²யத்தா தத்த² வுத்தோ நயோ இமேஸம், இத⁴ வுத்தோ ச தேஸம் ஸாதா⁴ரணோவ ஹோதீதி. தேனேவ ‘‘அஸஞ்சிச்ச அஸதியா கதம், நத்தி² ஆபத்தீ’’தி ஏவம் இத⁴ வுத்தோ ஆபத்தினயோ தத்தா²பி த³ஸ்ஸிதோ. தஸ்மா பு²ஸ்ஸதே³வத்தே²ரவாதே³ ஏவ ட²த்வா வத்து²விஜானனசித்தேனேவ ஸப்³ப³ஸேகி²யானி ஸசித்தகானி, ந பண்ணத்திவிஜானனசித்தேன. பி⁴ய்யோகம்யதாயஸூபப்³யஞ்ஜனபடிச்சா²த³னஉஜ்ஜா²னஸஞ்ஞீதி த்³வே ஸிக்கா²பதா³னி லோகவஜ்ஜானி அகுஸலசித்தானி, ஸேஸானி பண்ணத்திவஜ்ஜானி, திசித்தானி, திவேத³னானி சாதி க³ஹணமேவ யுத்ததரம் தி³ஸ்ஸதி. தேனேவேத்த² ‘‘அஸஞ்சிச்சாதி புரதோ வா பச்ச²தோ வா ஓலம்பே³த்வா நிவாஸேஸ்ஸாமீதி ஏவம் அஸஞ்சிச்சா’’திஆதி³னா வத்து²அஜானனவஸேனேவ அனாபத்திவண்ணனா கதா, ந பண்ணத்திவிஜானனசித்தவஸேன.

அபிச ‘‘யஸ்ஸ ஸசித்தகபக்கே² சித்தம் அகுஸலமேவ ஹோதி, தம் லோகவஜ்ஜ’’ந்தி (கங்கா². அட்ட². பட²மபாராஜிகவண்ணனா) இமினா லக்க²ணவசனேனாபி சேதம் ஸிஜ்ஜ²தி. வத்து²விஜானனசித்தவஸேனேவ ஹேத்த² ‘‘ஸசித்தகபக்கே²’’தி வுத்தம். இதரதா² பண்ணத்திவிஜானனசித்தவஸேன ஸப்³ப³ஸிக்கா²பதா³னம்பி ஸசித்தகபக்கே² சித்தஸ்ஸ அகுஸலத்தனியமேன லோகவஜ்ஜத்தப்பஸங்க³தோ பண்ணத்திவஜ்ஜமேவ ந ஸியா, இத³ஞ்ச வசனம் நிரத்த²கம் ஸியா இமினா வசனேன நிவத்தேதப்³ப³ஸ்ஸ ஸிக்கா²பத³ஸ்ஸ அபா⁴வா. ந ச ஸேகி²யேஸு வத்து²விஜானனசித்தேன ஸசித்தகபக்கே² சித்தம் பாணாதிபாதாதீ³ஸு விய அகுஸலமேவாதி நியமோ அத்தி², யேனேத்த² லோகவஜ்ஜதா பஸஜ்ஜேய்ய, ‘‘அனாத³ரியம் படிச்சா’’தி சேதம் பாளிவசனம் வத்து²ம் ஜானித்வா தீஹி சித்தேஹி வீதிக்கமமேவ அனாத³ரியம் கத்வா வுத்தம், ந பண்ணத்திம் ஜானித்வா அகுஸலசித்தேனேவ வீதிக்கமந்தி க³ஹேதப்³ப³ம். அஞ்ஞதா² க²ந்த⁴கபாளியா, அட்ட²கதா²யஞ்ச புப்³பா³பரஞ்ச விருஜ்ஜ²னதோதி அம்ஹாகம் க²ந்தி. யதா² வா ந விருஜ்ஜ²தி, ததா² ஏத்த² அதி⁴ப்பாயோ க³வேஸிதப்³போ³. அனாத³ரியம், அனாபத்திகாரணாபா⁴வோ, அபரிமண்ட³லனிவாஸனந்தி இமானேத்த² தீணி அங்கா³னி. யதா² சேத்த², ஏவம் ஸப்³ப³த்த². கேவலம் தத்த² தத்த² வுத்தபடிபக்க²கரணவஸேன ததியங்க³யோஜனமேவ விஸேஸோ.

577. து³தியாதீ³ஸு கி³ஹிபாருதந்தி ஸேதபடபாருதாதி³. விஹாரேபீதி ஸங்க⁴ஸன்னிபாதபு³த்³து⁴பட்டா²னாதி³காலம் ஸந்தா⁴ய வுத்தம்.

578. க³ண்டி²கம் படிமுஞ்சித்வாதிஆதி³ படிச்சா²த³னவிதி⁴த³ஸ்ஸனம். கீ³வம் படிச்சா²தே³த்வாதிஆதி³னா வுத்தத்தா ஸஞ்சிச்ச கீ³வம், மணிப³ந்த⁴னஞ்ச அப்படிச்சா²தே³ந்தஸ்ஸ ஆபத்தி. ஏத்தா²பி பரிமண்ட³லஸிக்கா²பத³ஸ்ஸ ஸாதா⁴ரணத்தா ஜாணுமண்ட³லதோ ஹேட்டா² சதுரங்கு³லமத்தம் ஓதாரேத்வா அனோலம்பே³த்வா பரிமண்ட³லமேவ பாருபிதப்³ப³ம்.

579. விவரித்வா நிஸீத³தோதி விஹாரே விய ஏகம்ஸபாருபனம் ஸந்தா⁴ய வுத்தம். ‘‘வாஸத்தா²ய உபக³தஸ்ஸா’’தி வுத்தத்தா வாஸாதி⁴ப்பாயம் வினா த⁴ம்மதே³ஸனபரித்தப⁴ணனாதி³அத்தா²ய ஸுசிரம்பி நிஸீத³ந்தேன ஸப்³ப³ம் அந்தரக⁴ரவத்தம் பூரேந்தேனேவ நிஸீதி³தப்³ப³ம். நிஸீத³னபடிஸம்யுத்தேஸு ஏவ ச ஸிக்கா²பதே³ஸு ‘‘வாஸூபக³தஸ்ஸா’’தி அனாபத்தியா வுத்தத்தா வாஸத்தா²ய அந்தரக⁴ரம் உபக³ச்ச²ந்தேனாபி ஸுப்படிச்ச²ன்னதாதி³ஸப்³ப³ம் அகோபேந்தேனேவ க³ந்தப்³ப³ம். ‘‘வாஸூபக³தஸ்ஸா’’தி ஹி வுத்தம், ந பன உபக³ச்ச²மானஸ்ஸாதி. கேசி பன ‘‘ஏகேகஸ்மிம் பட²மம் க³ந்த்வா வாஸபரிக்³க³ஹே கதே ததோ அஞ்ஞேஹி யதா²ஸுக²ம் க³ந்தும் வட்டதீ’’தி வத³ந்தி. அபரே பன ‘‘கே³ஹஸ்ஸாமிகேஹி ‘யாவ தும்ஹே நிவஸிஸ்ஸத², தாவ தும்ஹாகம் இமம் கே³ஹம் தே³மீ’தி தி³ன்னே அஞ்ஞேஹி அவாஸாதி⁴ப்பாயேஹி அந்தராராமே விய யதா²ஸுக²ம் க³ந்தும், நிஸீதி³துஞ்ச வட்டதீ’’தி வத³ந்தி, தம் ஸப்³ப³ம் ந க³ஹேதப்³ப³ம் ததா²வசனாபா⁴வா, தா³னலக்க²ணாபா⁴வா, தாவத்தகேன விஹாரஸங்க்²யானுபக³மனதோ ச. ‘‘யாவ நிஸீதி³ஸ்ஸத², தாவ தும்ஹாகம் இமம் கே³ஹம் தே³மீ’’தி தே³ந்தோபி ஹி தாவகாலிகமேவ தே³தி வத்து²பரிச்சாக³லக்க²ணத்தா தா³னஸ்ஸ.

582. சதுஹத்த²ப்பமாணந்தி வட்³ட⁴கீஹத்த²ம் ஸந்தா⁴ய வுத்தந்தி வத³ந்தி.

584. உக்கி²த்தசீவரோ ஹுத்வாதி கடிதோ உத்³த⁴ம் காயப³ந்த⁴னாதி³த³ஸ்ஸனவஸேனேவுக்கி²பனம் ஸந்தா⁴ய வுத்தம் பிண்டா³ய சரதோ பத்தக்³க³ஹணாதி³மத்தஸ்ஸ அனுஞ்ஞாதத்தா. தேனேவ ‘‘நிஸின்னகாலே பன த⁴மகரண’’ந்திஆதி³ வுத்தம். நிஸின்னகாலே ஹி க²ந்தே⁴ லக்³க³பத்தத்த²விகாதி³தோ த⁴மகரணம் நீஹரந்தஸ்ஸ கடிதோ உத்³த⁴ம்பி தி³ஸ்ஸதி, ததா² அத³ஸ்ஸேத்வா நீஹரிதப்³ப³ந்தி அதி⁴ப்பாயோ. ஆஸனே நிஸீத³ந்தஸ்ஸாபி ச பாருபிதசீவரம் கிஞ்சி உக்கி²பித்வா ஸங்கா⁴டிம் ஜங்க⁴பிண்டே³ஹி அனுக்கி²பித்வாவ நிஸீதி³தப்³ப³ம். இமஸ்மிஞ்ஞேவ பன ஸிக்கா²பதே³ ‘‘வாஸூபக³தஸ்ஸா’’தி வுத்தத்தா நிஸீத³னபடிஸம்யுத்தேஸு ச²ட்ட²அட்ட²மேஸு அவுத்தத்தா வாஸூபக³தேனாபி ஸுஸம்வுதேன ஓக்கி²த்தசக்கு²னாவ நிஸீதி³தப்³ப³ம். தேனேவ மாதிகாட்ட²கதா²யம்பி தேஸம் விஸேஸம் அவத்வா இதே⁴வ ‘‘வாஸூபக³தஸ்ஸ பன அனாபத்தீ’’தி (கங்கா². அட்ட². உக்கி²த்தகஸிக்கா²பத³வண்ணனா) வுத்தா.

பரிமண்ட³லவக்³க³வண்ணனா நிட்டி²தா.

2. உஜ்ஜக்³கி⁴கவக்³க³வண்ணனா

586. து³தியவக்³கா³தி³உஜ்ஜக்³கி⁴கஅப்பஸத்³தே³ஸு நிஸீத³னபடிஸம்யுத்தேஸுபி வாஸூபக³தஸ்ஸ அனாபத்தி ந வுத்தா, காயப்பசாலகாதீ³ஸு ஏவ பன வுத்தா. பாளிபோத்த²கேஸு பனேதம் கேஸுசி பேய்யாலேன ப்³யாமோஹிதத்தா ந ஸுட்டு² விஞ்ஞாயதி. யத்த² ச அந்தரக⁴ரே த⁴ம்மம் வா தே³ஸேந்தஸ்ஸ, பாதிமோக்க²ம் வா உத்³தி³ஸந்தஸ்ஸ மஹாஸத்³தே³ன யாவபரிஸஸாவனேபி அனாபத்தி ஏவாதி த³ட்ட²ப்³ப³ம் ததா² ஆனந்த³த்தே²ரமஹிந்த³த்தே²ராதீ³ஹி ஆசரிதத்தா.

உஜ்ஜக்³கி⁴கவக்³க³வண்ணனா நிட்டி²தா.

3. க²ம்ப⁴கதவக்³க³வண்ணனா

603. பத்தே க³ஹணஸஞ்ஞா அஸ்ஸ அத்தீ²தி பத்தஸஞ்ஞீதி இமமத்த²ம் த³ஸ்ஸேதும் ‘‘பத்தே ஸஞ்ஞம் கத்வா’’தி வுத்தம்.

604. ஓலோணீதி ஏகா ப்³யஞ்ஜனவிகதி. கஞ்ஜிகதக்காதி³ரஸோதி கேசி. மம்ஸரஸாதீ³னீதி ஆதி³-ஸத்³தே³ன அவஸேஸா ஸப்³பா³பி ப்³யஞ்ஜனவிகதி ஸங்க³ஹிதா.

605. ஸமப⁴ரிதந்தி ரசிதம். ஹேட்டா² ஓரோஹதீதி ஸமந்தா ஓகாஸஸம்ப⁴வதோ ஹத்தே²ன ஸமம் கரியமானம் ஹேட்டா² ப⁴ஸ்ஸதி. பத்தமத்த²கே ட²பிதானி பூவானி ஏவ வடம்ஸகாகாரேன ட²பிதத்தா ‘‘பூவவடம்ஸக’’ந்தி வுத்தானி. கேசி பன ‘‘பத்தம் க³ஹேத்வா தூ²பீகதம் பிண்ட³பாதம் ரசித்வா தி³ய்யமானமேவ க³ண்ஹதோ ஆபத்தி, ஹத்த²க³தே ஏவ பன பத்தே தி³ய்யமானே தூ²பீகதம்பி க³ஹேதும் வட்டதீ’’தி வத³ந்தி, தம் ந க³ஹேதப்³ப³மேவ ‘‘ஸமதித்திக’’ந்தி பா⁴வனபும்ஸகவஸேன ஸாமஞ்ஞதோ வுத்தத்தா.

க²ம்ப⁴கதவக்³க³வண்ணனா நிட்டி²தா.

4. ஸக்கச்சவக்³க³வண்ணனா

608. சதுத்த²வக்³கா³தீ³ஸு ஸபதா³னந்தி ஏத்த² தா³னம் வுச்சதி அவக²ண்ட³னம், அபேதம் தா³னதோ அபதா³னம், ஸஹ அபதா³னேன ஸபதா³னம், அவக²ண்ட³னவிரஹிதம் அனுபடிபாடியாதி வுத்தம் ஹோதி. தேனாஹ ‘‘தத்த² தத்த² ஓதி⁴ம் அகத்வா’’திஆதி³.

611. விஞ்ஞத்தியந்தி ஸூபோத³னவிஞ்ஞத்திஸிக்கா²பத³ம் ஸந்தா⁴ய வத³தி. ‘‘வத்தப்³ப³ம் நத்தீ²’’தி இமினா பாளியாவ ஸப்³ப³ம் விஞ்ஞாயதீதி த³ஸ்ஸேதி. தத்த² பாளியம் அஸஞ்சிச்சாதிஆதீ³ஸு வத்து²மத்தம் ஞத்வா பு⁴ஞ்ஜனேன ஆபத்திம் ஆபஜ்ஜந்தஸ்ஸேவ புன பண்ணத்திம் ஞத்வா முக²க³தம் ச²ட்³டே³துகாமஸ்ஸ யம் அருசியா பவிட்ட²ம், தம் அஸஞ்சிச்ச பவிட்ட²ம் நாம, தத்த² அனாபத்தி. ததே³வ புன அஞ்ஞவிஹிததாய வா அவிஞ்ஞத்தமித³ந்திஸஞ்ஞாய வா பு⁴ஞ்ஜனே ‘‘அஸதியா’’தி வுச்சதி.

613. ‘‘அஞ்ஞஸ்ஸத்தா²யா’’தி இத³மஸ்ஸ ஸிக்கா²பத³ஸ்ஸ அத்தனோ அத்தா²ய விஞ்ஞாபேத்வா ஸயம் பு⁴ஞ்ஜனே ஏவ பஞ்ஞத்தத்தா இமினா ஸிக்கா²பதே³ன அனாபத்திம் ஸந்தா⁴ய வுத்தம். பஞ்சஸஹத⁴ம்மிகானம் பன அத்தா²ய அஞ்ஞாதகஅப்பவாரிதட்டா²னே விஞ்ஞாபேந்தோ விஞ்ஞத்திக்க²ணே அட்ட²கதா²ஸு ஸுத்தானுலோமதோ வுத்தஅகதவிஞ்ஞத்திது³க்கடதோ ந முச்சதி. ஸஞ்சிச்ச பு⁴ஞ்ஜனக்க²ணே ஸயஞ்ச அஞ்ஞே ச மிச்சா²ஜீவதோ ந முச்சந்தீதி க³ஹேதப்³ப³ம்.

615. ‘‘குக்குடண்ட³ம் அதிகு²த்³த³க’’ந்தி இத³ம் அஸாருப்பவஸேன வுத்தம், அதிமஹந்தே ஏவ ஆபத்தீதி த³ட்ட²ப்³ப³ம். பு⁴ஞ்ஜந்தேன பன சோராதி³ப⁴யம் படிச்ச மஹந்தம்பி அபரிமண்ட³லம்பி கத்வா ஸீக⁴ம் பு⁴ஞ்ஜனவஸேனேத்த² ஆபதா³. ஏவமஞ்ஞேஸுபி யதா²னுரூபம் த³ட்ட²ப்³ப³ம்.

ஸக்கச்சவக்³க³வண்ணனா நிட்டி²தா.

5. கப³ளவக்³க³வண்ணனா

617. அனாஹடே கப³ளே முக²த்³வாரவிவரணே பன பயோஜனாபா⁴வா ‘‘ஆபதா³ஸூ’’தி ந வுத்தம். ஏவமஞ்ஞேஸுபி ஈதி³ஸேஸு.

618. ஸப்³ப³ம் ஹத்த²ந்தி ஹத்தே²கதே³ஸா அங்கு³லியோ வுத்தா ‘‘ஹத்த²முத்³தா³’’திஆதீ³ஸு விய, தஸ்மா ஏகங்கு³லிம்பி முகே² பக்கி²பிதும் ந வட்டதி.

கப³ளவக்³க³வண்ணனா நிட்டி²தா.

6. ஸுருஸுருவக்³க³வண்ணனா

627. பாளியம் ஸீதீகதோதி ஸீதபீளிதோ. ஸிலகபு³த்³தோ⁴தி பரிஹாஸவசனமேதம். ஸிலகஞ்ஹி கிஞ்சி தி³ஸ்வா ‘‘பு³த்³தோ⁴ அய’’ந்தி வோஹரந்தி.

628. ‘‘அங்கு³லியோ முகே² பவேஸேத்வா பு⁴ஞ்ஜிதும் வட்டதீ’’தி இமினா ஸப்³ப³ம் ஹத்த²ம் அந்தோமுகே² பக்கி²பனஸிக்கா²பத³ஸ்ஸபி பவிட்ட²ங்கு³லினில்லேஹனேன இமஸ்ஸபி ஸிக்கா²பத³ஸ்ஸ அனாபத்திம் த³ஸ்ஸேதி. ஏஸேவ நயோதி க⁴னயாகு³ஆதீ³ஸு பத்தம் ஹத்தே²ன, ஓட்ட²ஞ்ச ஜிவ்ஹாய நில்லேஹிதும் வட்டதீதி அதிதி³ஸதி. தஸ்மாதி யஸ்மா க⁴னயாகு³ஆதி³விரஹிதம் நில்லேஹிதும் ந வட்டதி.

634. விலீவச்ச²த்தந்தி வேணுபேஸிகாஹி கதம். மண்ட³லப³த்³தா⁴னீதி தீ³க⁴ஸலாகாஸு திரியம் வலயாகாரேன ஸலாகம் ட²பேத்வா ஸுத்தேஹி ப³த்³தா⁴னி தீ³க⁴ஞ்ச திரியஞ்ச உஜுகமேவ ஸலாகாயோ ட²பேத்வா த³ள்ஹப³த்³தா⁴னி சேவ திரியம் ட²பேத்வா தீ³க⁴த³ண்ட³கேஹேவ ஸங்கோசாரஹம் கத்வா ஸுத்தேஹேவ திரியம் ப³த்³தா⁴னி. தத்த²ஜாதகத³ண்ட³கேன கதந்தி ஸஹ த³ண்ட³கேன சி²ன்னதாலபண்ணாதீ³ஹி கதம். ச²த்தபாது³காயாதி யஸ்மிம் ச²த்தத³ண்ட³கோடிம் பவேஸேத்வா ச²த்தம் உஜுகம் ட²பேத்வா ஹேட்டா² சா²யாய நிஸீத³ந்தி, திட்ட²ந்தி வா, தாதி³ஸே ச²த்தாதா⁴ரே.

637. சாபோதி மஜ்ஜே² வங்ககாஜத³ண்ட³ஸதி³ஸா த⁴னுவிகதி. கோத³ண்டோ³தி வித்³த⁴த³ண்டா³ த⁴னுவிகதி.

ஸுருஸுருவக்³க³வண்ணனா நிட்டி²தா.

7. பாது³கவக்³க³வண்ணனா

647. ஸத்தமவக்³கே³ ருக்க²தோ பதிதோதி ஏகம் ஓலம்ப³னஸாக²ம் க³ஹேத்வா பதிதோ. பாளியாதி அத்தனோ ஆசாரப்பகாஸகக³ந்த²ஸ்ஸ. தீ⁴ரத்தூ²தி தீ⁴ அத்து², நிந்தா³ ஹோதூதி அத்தோ². வினிபாதனஹேதுனாதி வினிபாதனஸ்ஸ ஹேதுபா⁴வேன. த்வந்தி உபயோக³த்தே² பச்சத்தவசனம், தம் இச்சேவ வா பாடோ². அஸ்மாதி பாஸாணோ.

649. ந கதே²தப்³ப³ந்தி தே²ரேன அத்தனோ கங்கா²ட்டா²னஸ்ஸ புச்சி²தத்தா வுத்தம். த³ஹரஸ்ஸ அத்த²கோஸல்லம் ஞாதும் புச்சி²தேன உச்சாஸனே நிஸின்னஸ்ஸ ஆசரியஸ்ஸ அனுயோக³தா³னனயேன வத்தும் வட்டதி.

652. கே²ளேன சேத்த² ஸிங்கா⁴ணிகாபி ஸங்க³ஹிதாதி ஏத்த² உத³கக³ண்டு³ஸகம் கத்வா உச்சு²கசவராதி³ஞ்ச முகே²னேவ ஹரிதும் உத³கேஸு ச²ட்³டே³தும் வட்டதீதி த³ட்ட²ப்³ப³ம். ஸேஸம் ஸப்³ப³த்த² உத்தானமேவ.

பாது³கவக்³க³வண்ணனா நிட்டி²தா.

ஸேகி²யவண்ணனானயோ நிட்டி²தோ.

655. அதி⁴கரணஸமதே²ஸு ச இத⁴ வத்தப்³ப³ம் நத்தி².

இதி ஸமந்தபாஸாதி³காய வினயட்ட²கதா²ய விமதிவினோத³னியம்

பி⁴க்கு²விப⁴ங்க³வண்ணனானயோ நிட்டி²தோ.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

பி⁴க்கு²னீவிப⁴ங்க³வண்ணனா