6. சாரித்தஸிக்கா²பத³வண்ணனா

298. ச²ட்டே² ‘‘பரியேஸித்வா ஆரோசனகிச்சம் நாம நத்தீ²’’தி வுத்தத்தா யோ அபரியேஸிதப்³போ³ உபஸங்கமிதும் யுத்தட்டா²னே தி³ஸ்ஸதி, ஸோ ஸசேபி பகதிவசனஸ்ஸ ஸவனூபசாரம் அதிக்கம்ம டி²தோ உபக³ந்த்வா ஆபுச்சி²தப்³போ³. தேனாஹ ‘‘அபி ச…பே… யம் பஸ்ஸதி, ஸோ ஆபுச்சி²தப்³போ³’’திஆதி³.

302. அனாபத்திவாரே சேத்த² அந்தராராமாதீ³னஞ்ஞேவ வுத்தத்தா விஹாரதோ கா³மவீதி²ம் அனுஞ்ஞாதகாரணம் வினா அதிக்கமந்தஸ்ஸாபி ஆபத்தி ஹோதி, ந பன க⁴ரூபசாரம் அதிக்கமந்தஸ்ஸேவ.

யம் பன பாளியம் ‘‘அஞ்ஞஸ்ஸ க⁴ரூபசாரம் ஓக்கமந்தஸ்ஸ…பே… பட²மம் பாத³ம் உம்மாரம் அதிக்காமேதீ’’திஆதி³ வுத்தம். தம் கா³மே பவிட்ட²ம் ஸந்தா⁴ய வுத்தம், ததா²பி அஞ்ஞஸ்ஸ க⁴ரூபசாரம் அனோக்கமித்வா வீதி²மஜ்ஜே²னேவ க³ந்த்வா இச்சி²திச்சி²தக⁴ரத்³வாராபி⁴முகே² ட²த்வா மனுஸ்ஸே ஓலோகேத்வா க³ச்ச²ந்தஸ்ஸாபி பாசித்தியமேவ. தத்த² கேசி ‘‘வீதி²யம் அதிக்கமந்தஸ்ஸ க⁴ரூபசாரக³ணனாய ஆபத்தியோ’’தி வத³ந்தி. அஞ்ஞே பன ‘‘யானி குலானி உத்³தி³ஸ்ஸ க³தோ, தேஸம் க³ணனாயா’’தி. பஞ்சன்னம் போ⁴ஜனானம் அஞ்ஞதரேன நிமந்தனஸாதி³யனம், ஸந்தம் பி⁴க்கு²ம் அனாபுச்ச²னா, ப⁴த்தியக⁴ரதோ அஞ்ஞக⁴ரூபஸங்கமனம், மஜ்ஜ²ன்ஹிகானதிக்கமோ, ஸமயாபதா³னம் அபா⁴வோதி இமானேத்த² பஞ்ச அங்கா³னி.

சாரித்தஸிக்கா²பத³வண்ணனா நிட்டி²தா.