8. அச்சேகசீவரஸிக்கா²பத³வண்ணனா

646. அட்ட²மே ச²ட்டி²யம் உப்பன்னசீவரஸ்ஸ ஏகாத³ஸமாருணோ சீவரகாலே உட்டா²தீதி ஆஹ ‘‘ச²ட்டி²தோ பட்டா²யா’’திஆதி³, தேன ச ‘‘த³ஸாஹானாக³த’’ந்தி வுத்தத்தா பஞ்சமிதோ பட்டா²ய புண்ணமிதோ புப்³பே³ த³ஸஸு அருணேஸு உட்டி²தேஸுபி சீவரம் நிஸ்ஸக்³கி³யம் ந ஹோதி. புண்ணமியா ஸஹ ஏகாத³ஸ தி³வஸா லப்³ப⁴ந்தீதி ஏத்தகமேவ இமினா ஸிக்கா²பதே³ன லத்³த⁴ம், ச²ட்டி²தோ பட்டா²ய உப்பன்னம் ஸப்³ப³சீவரம் பட²மகதி²னஸிக்கா²பத³வஸேனேவ யாவ சீவரகாலம் நிஸ்ஸக்³கி³யம் ந ஹோதீதி த³ஸ்ஸேதி.

650. இதா³னி பட²மகதி²னாதி³ஸிக்கா²பதே³ஹி தஸ்ஸ தஸ்ஸ சீவரஸ்ஸ லப்³ப⁴மானம் பரிஹாரம் இதே⁴வ ஏகதோ ஸம்பிண்டே³த்வா த³ஸ்ஸேந்தோ ‘‘அதிரேகசீவரஸ்ஸா’’திஆதி³மாஹ. ‘‘அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா’’தி அயமேவ பாடோ² பாளியா ஸமேதி. கேசி பன ‘‘த³ஸதி³வஸாதி⁴கோ மாஸோ, த³ஸதி³வஸாதி⁴கா பஞ்ச மாஸாதி பாடே²ன ப⁴விதப்³ப³’’ந்தி வத³ந்தி, தம் ந யுத்தம், அஞ்ஞதா² ‘‘நவாஹானாக³த’’ந்தி வத்தப்³ப³தோ. யம் பனேத்த² மாதிகாட்ட²கதா²யஞ்ச ‘‘காமஞ்சேஸ ‘த³ஸாஹபரமம் அதிரேகசீவரம் தா⁴ரேதப்³ப³’ந்தி இமினாவ ஸித்³தோ⁴, அட்டு²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பித’’ந்தி (கங்கா². அட்ட². அச்சேகசீவரஸிக்கா²பத³வண்ணனா) லிக²ந்தி, தம் பமாத³லிகி²தம் ‘‘பவாரணமாஸஸ்ஸ ஜுண்ஹபக்க²பஞ்சமிதோ பட்டா²ய உப்பன்னஸ்ஸ சீவரஸ்ஸ நிதா⁴னகாலோ த³ஸ்ஸிதோ ஹோதீ’’தி (கங்கா². அட்ட². அச்சேகசீவரஸிக்கா²பத³வண்ணனா) வுத்தத்தா. இமமேவ ச பமாத³லிகி²தம் க³ஹேத்வா ப⁴த³ந்தபு³த்³த⁴த³த்தாசரியேன ச ‘‘பரிஹாரேகமாஸோவ, த³ஸாஹபரமோ மதோ’’திஆதி³ வுத்தந்தி க³ஹேதப்³ப³ம்.

அச்சேகசீவரஸதி³ஸே அஞ்ஞஸ்மிந்தி புப்³பே³ அதி⁴ட்டி²தே உப்பன்னகாலாகாராதி³ ஸாதி³ஸேன அச்சேகசீவரஸதி³ஸே அஞ்ஞஸ்மிம் சீவரே அச்சேகசீவரஸஞ்ஞாய சீவரகாலம் அதிக்கமேதீதி அத்தோ². தேனேவேத்த² து³க்கடம், அனாபத்தி ச வுத்தா, இதரதா² தீஸுபி பதே³ஸு பாசித்தியஸ்ஸேவ வத்தப்³ப³தோ. அனச்சேகசீவரம்பி ஹி சீவரகாலம் அதிக்கமயதோ பாசித்தியமேவ அச்சேகசீவரத்திகே வியாதி த³ட்ட²ப்³ப³ம். விகப்பனுபக³பச்சி²மப்பமாணஸ்ஸ அச்சேகசீவரஸ்ஸ அத்தனோ ஸந்தகதா, த³ஸாஹானாக³தாய கத்திகதேமாஸிபுண்ணமாய உப்பன்னபா⁴வோ, அனதி⁴ட்டி²தஅவிகப்பிததா, சீவரகாலாதிக்கமோதி இமானேத்த² சத்தாரி அங்கா³னி.

அச்சேகசீவரஸிக்கா²பத³வண்ணனா நிட்டி²தா.