9. ஸாஸங்கஸிக்கா²பத³வண்ணனா

652-3. நவமே அந்தரந்தரா க⁴ரமேத்தா²தி அந்தரக⁴ரந்தி கா³மோ வுத்தோதி ஆஹ ‘‘அந்தோகா³மே’’தி. ‘‘பட²மம் ஜா²னம் உபஸம்பஜ்ஜ விஹரதீ’’தி (விப⁴. 624) இமஸ்ஸ விப⁴ங்கே³ ‘‘உபஸம்பஜ்ஜ’’ந்தி ஸானுஸாரம் உத்³த⁴டம். தம் ஸந்தா⁴யாஹ ‘‘உபஸம்பஜ்ஜந்திஆதீ³ஸு வியா’’தி. தஸ்ஸாபீதி ‘‘வுத்த²வஸ்ஸான’’ந்தி விப⁴ங்க³பத³ஸ்ஸபி. வுத்த²வஸ்ஸானந்தி ச நித்³தா⁴ரணே ஸாமிவசனம், ஏதேன ச புரிமஸிக்கா²பதே³ அனத்த²தகதி²னானம் கதி²னமாஸேபி அஸமாதா³னசாரோ ந லப்³ப⁴தீதி ஸித்³த⁴ம் ஹோதி, இதரதா² ஸிக்கா²பத³ஸ்ஸேவ நிரத்த²கத்தாதி த³ட்ட²ப்³ப³ம்.

பரிக்கே²பாரஹட்டா²னதோதி ஏத்த² கா³மபரியந்தே டி²தக⁴ரூபசாரதோ பட்டா²ய ஏகோ லேட்³டு³பாதோ பரிக்கே²பாரஹட்டா²னம் நாம. விஸுத்³தி⁴மக்³கே³பி ‘‘அபரிக்கி²த்தஸ்ஸ பட²மலேட்³டு³பாததோ பட்டா²யா’’தி (விஸுத்³தி⁴. 1.31) வுத்தம். தந்தி தம் பட²மஸேனாஸனாதி³ம். மஜ்ஜி²மனிகாயட்ட²கதா²யம் பன விஹாரஸ்ஸபி கா³மஸ்ஸேவ உபசாரம் நீஹரித்வா உபி⁴ன்னம் லேட்³டு³பாதானம் அந்தரா மினிதப்³ப³ந்தி வுத்தம்.

‘‘கோஸம்பி³யம் அஞ்ஞதரோ பி⁴க்கு² கி³லானோ ஹோதீ’’தி ஆக³தத்தா ‘‘கோஸம்ப³கஸம்முதி அனுஞ்ஞாதா’’தி வுத்தம். ‘‘அயஞ்ச பச்சி²மதி³ஸம் க³தோ ஹோதீ’’தி இமினா அந்தரக⁴ரே சீவரம் நிக்கி²பித்வா தஸ்மிம் விஹாரே வஸந்தஸ்ஸ ஸகலம்பி சீவரமாஸம் விப்பவஸிதும் வட்டதி, ததோ அஞ்ஞத்த² க³மனகிச்சே ஸதி விஹாரதோ ப³ஹி சா²ரத்தம் விப்பவாஸோ அனுஞ்ஞாதோதி தீ³பேதி. தேனாஹ ‘‘ஸேனாஸனம் ஆக³ந்த்வா ஸத்தமம் அருணம் உட்டா²பேது’’ந்திஆதி³. வஸித்வாதி அருணம் உட்டா²பேத்வா. தத்தே²வாதி தஸ்மிஞ்ஞேவ க³தட்டா²னே. அங்கா³னி பனேத்த² அட்ட²கதா²யமேவ வுத்தானி.

ஸாஸங்கஸிக்கா²பத³வண்ணனா நிட்டி²தா.