4. வஸ்ஸிகஸாடிகஸிக்கா²பத³வண்ணனா

628. சதுத்தே² ஜேட்ட²மூலபுண்ணமாஸியா…பே… கரணக்கே²த்தஞ்சாதி பட²மத்³த⁴மாஸம்பி கரணக்கே²த்தம் வுத்தம். தம் ‘‘கத்வா நிவாஸேதப்³ப³’’ந்தி இமஸ்ஸ புரிமத்³த⁴மாஸே வா பச்சி²மத்³த⁴மாஸே வா கத்வா பச்சி²மமாஸேவ நிவாஸேதப்³ப³ந்தி ஏவமத்த²ம் க³ஹேத்வா வுத்தம் நிவாஸனேயேவ ஆபத்தியா வுத்தத்தாதி. யம் பன மாதிகாட்ட²கதா²யம் ‘‘கி³ம்ஹானம் பச்சி²மோ மாஸோ பரியேஸனக்கே²த்தம், பச்சி²மோ அத்³த⁴மாஸோ கரணனிவாஸனக்கே²த்தம்பீ’’தி (கங்கா². அட்ட². வஸ்ஸிகஸாடிகஸிக்கா²பத³வண்ணனா) வுத்தம், தம் தஸ்மிம்யேவ அத்³த⁴மாஸே கத்வா நிவாஸேதப்³ப³ந்தி ஏவமத்த²ம் க³ஹேத்வா வுத்தம். இத⁴ வுத்தனயேனேவ அத்தே² க³ஹிதே விரோதோ⁴ நத்தி².

‘‘வத்தபே⁴தே³ து³க்கட’’ந்தி இத³ம் வஸ்ஸிகஸாடிகஅதி³ன்னபுப்³பே³ ஸந்தா⁴ய வுத்தம். தேனாஹ ‘‘யே மனுஸ்ஸா’’திஆதி³. பகதியா வஸ்ஸிகஸாடிகதா³யகா நாம ஸங்க⁴ம் வா அத்தானம் வா அப்பவாரேத்வாவ அனுஸம்வச்ச²ரம் தா³யகா.

630. ‘‘ச² மாஸே பரிஹாரம் லப⁴தீ’’தி ஏதேன அந்தோவஸ்ஸேபி யாவ வஸ்ஸானஸ்ஸ பச்சி²மதி³வஸா அகதா பரிஹாரம் லப⁴தீதி தீ³பிதம் ஹோதி. ஏகமாஸந்தி ஹேமந்தஸ்ஸ பச்சி²முபோஸதே²ன ஸஹ க³ணேத்வா வுத்தம். தஸ்மிம் உபோஸத²தி³வஸே ஏவ ஹி தம் மூலசீவரம் காதப்³ப³ம், இதரதா² ஹி நிஸ்ஸக்³கி³யதோ. ஏகாஹத்³வீஹாதி³வஸேன…பே… லத்³தா⁴ சேவ நிட்டி²தா சாதி ஏத்த² ஏகாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா ச த்³வீஹானாக³தாய…பே… த³ஸாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா ச, அந்தோவஸ்ஸே வா லத்³தா⁴ சேவ நிட்டி²தா சாதி ஏவமத்தோ² த³ட்ட²ப்³போ³. தத்த² ஆஸள்ஹீமாஸஸ்ஸ ஜுண்ஹபக்க²புண்ணமியம் லத்³தா⁴, தத³ஹேவ ரஜனகப்பபரியோஸானேஹி நிட்டி²தா ச வஸ்ஸிகஸாடிகா ‘‘ஏகாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா சா’’தி வுச்சதி. ஏதேனேவ நயேன ஜுண்ஹபக்க²ஸ்ஸ ச²ட்டி²யம் லத்³தா⁴, நிட்டி²தா ச ‘‘த³ஸாஹானாக³தாய வஸ்ஸூபனாயிகாய லத்³தா⁴ சேவ நிட்டி²தா சா’’தி வுச்சதி. யாவ பட²மகத்திகதேமாஸிபுண்ணமா, தாவ லத்³தா⁴, நிட்டி²தா ச ‘‘அந்தோவஸ்ஸே லத்³தா⁴ சேவ நிட்டி²தா சா’’தி வுச்சதி. பட²மகத்திகதேமாஸிபுண்ணமிதோ பரம் லத்³தா⁴ சேவ நிட்டி²தா ச யாவ சீவரகாலோ நாதிக்கமதி, தாவ அனதி⁴ட்ட²ஹித்வாபி ட²பேதும் வட்டதீதி அதி⁴ப்பாயோ.

ஏத்த² ச ‘‘தஸ்மிம்யேவ அந்தோத³ஸாஹே அதி⁴ட்டா²தப்³பா³’’தி அவிஸேஸேன வுத்தேபி வஸ்ஸானதோ புப்³பே³ ஏகாஹத்³வீஹாதி³வஸேன அனாக³தாய வஸ்ஸூபனாயிகாய லத்³தா⁴ தேஹி தி³வஸேஹி த³ஸாஹம் அனதிக்கமந்தேன வஸ்ஸூபனாயிகதி³வஸதோ பட்டா²ய அதி⁴ட்டா²னக்கே²த்தம் ஸம்பத்தா ஏவ அதி⁴ட்டா²தப்³பா³, ததோ பன புப்³பே³ த³ஸாஹாதிக்கமேன நிட்டி²தாபி ந அதி⁴ட்டா²தப்³பா³ அதி⁴ட்டா²னஸ்ஸ அகே²த்தத்தா. தாதி³ஸா பன வஸ்ஸூபனாயிகதி³வஸே ஏவ அதி⁴ட்டா²தப்³பா³, அனதி⁴ட்ட²ஹதோ அருணுக்³க³மனேன நிஸ்ஸக்³கி³யம் ஹோதி. யதி³ ஏவம் ‘‘த³ஸாஹானாக³தாயா’’தி இமினா கிம் பயோஜனந்தி சே? வஸ்ஸானதோ புப்³பே³ ஏவ த³ஸாஹே அதிக்கந்தே நிட்டி²தா வஸ்ஸூபனாயிகதி³வஸே ஏவ அதி⁴ட்டா²தப்³பா³தி த³ஸ்ஸனத்த²ம் வுத்தம். தேனேவாஹ ‘‘த³ஸாஹாதிக்கமே நிட்டி²தா தத³ஹேவ அதி⁴ட்டா²தப்³பா³’’தி.

த³ஸாஹே அப்பஹோந்தே சீவரகாலம் நாதிக்கமேதப்³பா³தி தேமாஸப்³ப⁴ந்தரே த³ஸாஹே அப்பஹோந்தே நவாஹானாக³தாய கத்திகதேமாஸிபுண்ணமாய ஸத்தமிதோ பட்டா²ய லத்³தா⁴, நிட்டி²தா ச சீவரகாலம் நாதிக்கமேதப்³பா³தி அத்தோ². ததா² ஹி ‘‘மாஸோ ஸேஸோ கி³ம்ஹானந்தி பி⁴க்கு²னா வஸ்ஸிகஸாடிகசீவரம் பரியேஸிதப்³ப³’’ந்தி பரியேஸனக்கே²த்தம் வத்வா ‘‘வஸ்ஸிகஸாடிகம் வஸ்ஸானம் சாதுமாஸம் அதி⁴ட்டா²து’’ந்தி (மஹாவ. 358) வுத்தத்தா கதாயபி அகதாயபி மாஸமத்தம் அனதி⁴ட்டா²தப்³ப³தா ஸித்³தா⁴. யஸ்மா ச அகதா வஸ்ஸிகஸாடிகஸங்க்²யம் ந க³ச்ச²தி, அகரணஞ்ச கேனசி வேகல்லேன, ந அனாத³ரேன, தஸ்மா சாதுமாஸம் அகதத்தா ஏவ பரிஹாரம் லப⁴தி, கதா பன அதி⁴ட்டா²னக்கே²த்தே, அகதா ச சீவரகாலே த³ஸாஹபரமஸிக்கா²பதே³னேவ பரிஹாரம் லப⁴தீதி அயமத்தோ² லப்³ப⁴தி. கஸ்மாதி அத்தனோ மதியா காரணபுச்சா². தஸ்மாதி வஸ்ஸானேயேவ வஸ்ஸிகஸாடிகாய அதி⁴ட்டா²தப்³ப³தாவசனதோ. ‘‘திசீவரம் அதி⁴ட்டா²து’’ந்தி ஸுத்தம் பனேத்த² ஸேஸசீவரானம் ஏவம் காலனியமாபா⁴வம் ஸாதே⁴தும் உத்³த⁴டம். ந ஹி தேனேத்த² அஞ்ஞம் பயோஜனம் அத்தி².

கதா³ அதி⁴ட்டா²தப்³பா³திஆதி³குருந்தி³வசனேனாபி ‘‘யதா³ வா ததா³ வா அதி⁴ட்டா²தும் வட்டதீ’’தி இத³ம் படிக்கி²பித்வா த³ஸாஹப்³ப⁴ந்தரே ஏவ கதாய அதி⁴ட்டா²தப்³ப³தம் த³ஸ்ஸேதி.

பாளியம் அச்சி²ன்னசீவரஸ்ஸாதிஆதீ³ஸு அச்சி²ன்னஸேஸசீவரஸ்ஸ நட்ட²ஸேஸசீவரஸ்ஸ. ஏதேஸஞ்ஹி அஸமயே பரியேஸனனிவாஸனாபத்தியா ஏவ அனாபத்தி வுத்தா. தேனேவ மாதிகாட்ட²கதா²யம் ‘‘அச்சி²ன்னசீவரஸ்ஸ வா நட்ட²சீவரஸ்ஸ வா அனிவத்த²ம் சோரா ஹரந்தீதி ஏவம் ஆபதா³ஸு வா நிவாஸயதோ உம்மத்தகாதீ³னஞ்ச அனாபத்தீ’’தி (கங்கா². அட்ட². வஸ்ஸிகஸாடிகஸிக்கா²பத³வண்ணனா) வுத்தம், இத⁴ பன ஸமந்தபாஸாதி³காயம் அயம் நிஸ்ஸக்³கி³யா அனாபத்தி பாளிதோ ஸயமேவ ஸிஜ்ஜ²தீதி இமம் அத³ஸ்ஸேத்வா அஸிஜ்ஜ²மானம் நக்³க³ஸ்ஸ ந்ஹாயதோ து³க்கடாபத்தியா ஏவ அனாபத்திம் த³ஸ்ஸேதும் ‘‘அச்சி²ன்னசீவரஸ்ஸா’’திஆதி³ வுத்தந்தி க³ஹேதப்³ப³ம். ந ஹி ஏஸா அனாபத்தி அவுத்தே ஸிஜ்ஜ²தீதி. வஸ்ஸிகஸாடிகாய அத்துத்³தே³ஸிகதா, அஸமயே பரியேஸனதா, தாய ச படிலாபோ⁴தி இமானி தாவ பரியேஸனாபத்தியா தீணி அங்கா³னி. நிவாஸனாபத்தியா பன ஸசீவரதா, ஆபதா³பா⁴வோ, வஸ்ஸிகஸாடிகாய ஸகபா⁴வோ, அஸமயே நிவாஸனந்தி சத்தாரி அங்கா³னி.

வஸ்ஸிகஸாடிகஸிக்கா²பத³வண்ணனா நிட்டி²தா.