5. சீவரஅச்சி²ந்த³னஸிக்கா²பத³வண்ணனா

631. பஞ்சமே யம்பி…பே… அச்சி²ந்தீ³தி ஏத்த² யம் தே அஹம் சீவரம் அதா³ஸிம், தம் ‘‘மயா ஸத்³தி⁴ம் பக்கமிஸ்ஸதீ’’தி ஸஞ்ஞாய அதா³ஸிம், ந அஞ்ஞதா²தி குபிதோ அச்சி²ந்தீ³தி ஏவம் அஜ்ஜா²ஹரித்வா யோஜேதப்³ப³ம்.

633. ஏகம் து³க்கடந்தி யதி³ ஆணத்தோ அவஸ்ஸம் அச்சி²ந்த³தி, ஆணத்திக்க²ணே பாசித்தியமேவ. யதி³ ந அச்சி²ந்த³தி, ததா³ ஏவ து³க்கடந்தி த³ட்ட²ப்³ப³ம். ஏகவாசாய ஸம்ப³ஹுலா ஆபத்தியோதி யதி³ ஆணத்தோ அனந்தராயேன அச்சி²ந்த³தி, ஆணத்திக்க²ணேயேவ வத்து²க³ணனாய பாசித்தியஆபத்தியோ பயோக³கரணக்க²ணேயேவ ஆபத்தியா ஆபஜ்ஜிதப்³ப³தோ, சீவரம் பன அச்சி²ன்னேயேவ நிஸ்ஸக்³கி³யம் ஹோதி. யதி³ ஸோ ந அச்சி²ந்த³தி, ஆணத்திக்க²ணே ஏகமேவ து³க்கடந்தி த³ட்ட²ப்³ப³ம். ஏவம் அஞ்ஞத்தா²பி ஈதி³ஸேஸு நயோ ஞாதப்³போ³.

635. உபஜ்ஜ²ம் க³ண்ஹிஸ்ஸதீதி ஸாமணேரஸ்ஸ தா³னம் தீ³பேதி, தேன ச ஸாமணேரகாலே த³த்வா உபஸம்பன்னகாலே அச்சி²ந்த³தோபி பாசித்தியம் தீ³பேதி. ‘‘பி⁴க்கு²ஸ்ஸ ஸாமம் சீவரம் த³த்வா’’தி இத³ம் உக்கட்ட²வஸேன வுத்தம். ஆஹராபேதும் பன வட்டதீதி கம்மே அகதே ப⁴திஸதி³ஸத்தா வுத்தம். விகப்பனுபக³பச்சி²மசீவரதா, ஸாமம் தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னம் வா அச்சி²ந்தா³பனம் வாதி இமானேத்த² பஞ்ச அங்கா³னி.

சீவரஅச்சி²ந்த³னஸிக்கா²பத³வண்ணனா நிட்டி²தா.