3. பே⁴ஸஜ்ஜஸிக்கா²பத³வண்ணனா

618-621. ததியே பாளியம் பிலிந்த³வச்ச²த்தே²ரேன ‘‘ந கோ², மஹாராஜ, ப⁴க³வதா ஆராமிகோ அனுஞ்ஞாதோ’’தி பட²மம் படிக்கி²பித்வா ‘‘அனுஜானாமி, பி⁴க்க²வே, ஆராமிக’’ந்தி புக்³க³லானம்பி ஆராமிகனாமேன தா³ஸக்³க³ஹணே அனுஞ்ஞாதே ஏவ ஆராமிகானம் க³ஹிதத்தா கே²த்தவத்தா²தீ³னி கப்பியவோஹாரேனபி புக்³க³லானம் க³ஹேதும் ந வட்டதி, ததா² அனனுஞ்ஞாதத்தாதி விஞ்ஞாயதி. ‘‘கே²த்தவத்து²படிக்³க³ஹணா படிவிரதோ ஹோதீ’’திஆதி³னா (தீ³. நி. 1.10, 194) ஹி படிக்கி²த்தேஸு ஏகஸ்ஸேவ புக்³க³லிகவஸேன க³ஹணே அனுஞ்ஞாதே இதரீதரானம் ததா² ந க³ஹேதப்³ப³தா ஸித்³தா⁴வ ஹோதி. யஞ்ச பிலிந்த³வச்ச²த்தே²ரேன தா³யககுலஸ்ஸ தா³ரிகாய ஸுவண்ணமாலாவஸேன திணண்டு³பகஸ்ஸ நிம்மானம், தம் ‘‘அனாபத்தி, பி⁴க்க²வே, இத்³தி⁴மஸ்ஸ இத்³தி⁴விஸயே’’தி (பாரா. 159) வசனதோ குலஸங்க³ஹாதி³ ந ஹோதீதி கதந்தி த³ட்ட²ப்³ப³ம், கேசி பன ‘‘கீ²ணாஸவானம் லாபி⁴ச்சா²ய அபா⁴வதோ குலஸங்க³ஹேபி ஆஜீவகோபோ நத்தீ²’’தி வத³ந்தி, தம் ந யுத்தம் கீ²ணாஸவானம்பி ஆஜீவவிபத்திஹேதூனம் பிண்ட³பாதாதீ³னம் பரிவஜ்ஜேதப்³ப³தோ. வுத்தஞ்ஹி த⁴ம்மஸேனாபதினா ‘‘நேவ பி⁴ந்தே³ய்யமாஜீவம், சஜமானோபி ஜீவித’’ந்தி (மி. ப. 6.1.5). ப⁴க³வதா ச ‘‘கா³தா²பி⁴கீ³தம் மே அபோ⁴ஜனீய’’ந்திஆதி³ வுத்தம் (ஸு. நி. 81, 484; மி. ப. 4.5.9; ஸம். நி. 1.197).

622. உக்³க³ஹிதகந்தி பரிபோ⁴க³த்தா²ய ஸயம் க³ஹிதம். ஸயம் கரோதீதி பசித்வா கரோதி. புரேப⁴த்தந்தி தத³ஹுபுரேப⁴த்தமேவ வட்டதி ஸவத்து²கபடிக்³க³ஹிதத்தா. ஸயம்கதந்தி கீ²ரனவனீதம் பசித்வா கதம். நிராமிஸமேவாதி தத³ஹுபுரேப⁴த்தம் ஸந்தா⁴ய வுத்தம். அஜ்ஜ ஸயம்கதம் நிராமிஸமேவ பு⁴ஞ்ஜந்தஸ்ஸ கஸ்மா ஸாமபாகோ ந ஹோதீதி ஆஹ ‘‘நவனீதம் தாபேந்தஸ்ஸா’’திஆதி³. படிக்³க³ஹிதேஹீதி கீ²ரத³தீ⁴னி ஸந்தா⁴ய வுத்தம். உக்³க³ஹிதகேஹி கதம் அப்³ப⁴ஞ்ஜனாதீ³ஸு உபனேதப்³ப³ந்தி யோஜனா. ஏஸேவ நயோதி நிஸ்ஸக்³கி³யாபத்திம் ஸந்தா⁴ய வுத்தம். அகப்பியமம்ஸஸப்பிம்ஹீதி ஹத்தி²ஆதீ³னம் ஸப்பிம்ஹி.

ஏத்த² பனாதி நவனீதே விஸேஸோ அத்தீ²தி அத்தோ². தோ⁴தம் வட்டதீதி தோ⁴தமேவ படிக்³க³ஹிதும்பி ந வட்டதி, இதரதா² ஸவத்து²கபடிக்³க³ஹிதம் ஹோதீதி தே²ரானம் அதி⁴ப்பாயோ.

மஹாஸிவத்தே²ரஸ்ஸ பன வத்து²னோ வியோஜிதத்தா த³தி⁴கு³ளிகாதீ³ஹி யுத்ததாமத்தேன ஸவத்து²கபடிக்³க³ஹிதம் நாம ந ஹோதி, தஸ்மா தக்கதோ உத்³த⁴டமத்தமேவ படிக்³க³ஹேத்வா தோ⁴வித்வா, பசித்வா வா நிராமிஸமேவ கத்வா பரிபு⁴ஞ்ஜிம்ஸூதி அதி⁴ப்பாயோ, ந பன த³தி⁴கு³ளிகாதீ³ஹி ஸஹ விகாலே பு⁴ஞ்ஜிம்ஸு. தேனாஹ ‘‘தஸ்மா நவனீதம் பரிபு⁴ஞ்ஜந்தேன…பே… ஸவத்து²கபடிக்³க³ஹிதம் நாம ந ஹோதீ’’தி. தத்த² அதோ⁴தம் படிக்³க³ஹேத்வாபி தம் நவனீதம் பரிபு⁴ஞ்ஜந்தேன த³தி⁴ஆதீ³னி அபனேத்வா பரிபு⁴ஞ்ஜிதப்³ப³ந்தி அத்தோ². க²யம் க³மிஸ்ஸதீதி நிராமிஸம் ஹோதி, தஸ்மா விகாலேபி வட்டதீதி அத்தோ². ஏத்தாவதாதி நவனீதே லக்³க³மத்தேன விஸும் த³தி⁴ஆதி³வோஹாரம் அலத்³தே⁴ன அப்பமத்தேன த³தி⁴ஆதி³னாதி அத்தோ², ஏதேன விஸும் படிக்³க³ஹிதத³தி⁴ஆதீ³ஹி ஸஹ பக்கம் ஸவத்து²கபடிக்³க³ஹிதஸங்க்²யமேவ க³ச்ச²தீதி த³ஸ்ஸேதி. தஸ்மிம்பீதி நிராமிஸபூ⁴தேபி. குக்குச்சகானம் பன அயம் அதி⁴ப்பாயோ – படிக்³க³ஹணே தாவ த³தி⁴ஆதீ³ஹி அஸம்பி⁴ன்னரஸத்தா ப⁴த்தேன ஸஹிதேன கு³ளபிண்டா³தி³ விய ஸவத்து²கபடிக்³க³ஹிதம் நாம ந ஹோதி, தம் பன பசந்தேன தோ⁴வித்வாவ பசிதப்³ப³ம், இதரதா² பசனக்க²ணே பச்சமானத³தி⁴கு³ளிகாதீ³ஹி ஸம்பி⁴ன்னரஸதாய ஸாமம்பக்கம் ஜாதம், தேஸு கீ²ணேஸு ஸாமம்பக்கமேவ ஹோதி, தஸ்மா நிராமிஸமேவ பசிதப்³ப³ந்தி. தேனேவ ‘‘ஆமிஸேன ஸஹ பக்கத்தா’’தி காரணம் வுத்தம்.

ஏத்த² சாயம் விசாரணா – ஸவத்து²கபடிக்³க³ஹிதத்தாபா⁴வே ஆமிஸேன ஸஹ பி⁴க்கு²னா பக்கஸ்ஸ ஸயம்பாகதோ³ஸோ வா பரிஸங்கீயதி யாவகாலிகதா வா, தத்த² ந தாவ ஸயம்பாகதோ³ஸோ ஏத்த² ஸம்ப⁴வதி ஸத்தாஹகாலிகத்தா. யஞ்ஹி தத்த² த³தி⁴ஆதி³ ஆமிஸக³தம், தம் பரிக்கீ²ணந்தி. அத² படிக்³க³ஹிதத³தி⁴கு³ளிகாதி³னா ஸஹ அத்தனா பக்கத்தா ஸவத்து²கபக்கம் விய ப⁴வேய்யாதி பரிஸங்கீயதி, ததா³ ஆமிஸேன ஸஹ படிக்³க³ஹிதத்தாதி காரணம் வத்தப்³ப³ம், ந பன பக்கத்தாதி. ததா² ச உபட்³ட⁴த்தே²ரானம் மதமேவ அங்கீ³ கதம் ஸியா. தத்த² ச ஸாமணேராதீ³ஹி பக்கம்பி யாவகாலிகமேவ ஸியா படிக்³க³ஹிதகீ²ராதி³ம் பசித்வா அனுபஸம்பன்னேஹி கதஸப்பிஆதி³ விய ச, ந ச தம் யுத்தம், பி⁴க்கா²சாரேன லத்³த⁴னவனீதாதீ³னம் தக்காதி³ஆமிஸஸம்ஸக்³க³ஸம்ப⁴வேன அபரிபு⁴ஞ்ஜிதப்³ப³தாபஸங்க³தோ. ந ஹி க³ஹட்டா² தோ⁴வித்வா, ஸோதே⁴த்வா வா பத்தே ஆகிரந்தீதி நியமோ அத்தி², அட்ட²கதா²யஞ்ச ‘‘யதா² தத்த² பதிததண்டு³லகணாத³யோ ந பச்சந்தி, ஏவம்…பே… புன பசித்வா தே³தி, புரிமனயேனேவ ஸத்தாஹம் வட்டதீ’’தி இமினா வசனேனபேதம் விருஜ்ஜ²தி, தஸ்மா இத⁴ குக்குச்சகானம் குக்குச்சுப்பத்தியா நிமித்தமேவ ந தி³ஸ்ஸதி. யதா² சேத்த², ஏவம் ‘‘லஜ்ஜீ ஸாமணேரோ யதா² தத்த² பதிததண்டு³லகணாத³யோ ந பச்சந்தி, ஏவம் ஸாமிஸபாகம் மோசேந்தோ அக்³கி³ம்ஹி விலீயாபேத்வா…பே… வட்டதீ’’தி வசனஸ்ஸாபி நிமித்தம் ந தி³ஸ்ஸதி. யதி³ ஹி ஏதம் யாவகாலிகஸம்ஸக்³க³பரிஹாராய வுத்தம் ஸியா, அத்தனாபி ததா² காதப்³ப³ம் ப⁴வேய்ய. க³ஹட்டே²ஹி தி³ன்னஸப்பிஆதீ³ஸு ச ஆமிஸஸம்ஸக்³க³ஸங்கா ந விக³ச்சே²ய்ய. ந ஹி க³ஹட்டா² ஏவம் விலீயாபேத்வா பன தண்டு³லாதி³ம் அபனேத்வா புன பசந்தி, அபிச பே⁴ஸஜ்ஜேஹி ஸத்³தி⁴ம் கீ²ராதி³ம் பக்கி²பித்வா யதா² கீ²ராதி³ க²யம் க³ச்ச²தி, ஏவம் பரேஹி பக்கபே⁴ஸஜ்ஜதேலாதி³பி யாவகாலிகமேவ ஸியா, ந ச தம்பி யுத்தம் த³தி⁴ஆதி³க²யகரணத்த²ம் ‘‘புன பசித்வா தே³தீ’’தி வுத்தத்தா. தஸ்மா மஹாஸிவத்தே²ரவாதே³ குக்குச்சம் அகத்வா அதோ⁴தம்பி நவனீதம் தத³ஹுபி புனதி³வஸாதீ³ஸுபி பசிதும், தண்டு³லாதி³மிஸ்ஸம் ஸப்பிஆதி³ம் அத்தனாபி அக்³கி³ம்ஹி விலீயாபேத்வா பரிஸ்ஸாவேத்வா புன தக்காதி³க²யத்த²ம் பசிதுஞ்ச வட்டதி.

தத்த² விஜ்ஜமானஸ்ஸபி பச்சமானக்க²ணே ஸம்பி⁴ன்னரஸஸ்ஸ யாவகாலிகஸ்ஸ அப்³போ³ஹாரிகத்தேன ஸவத்து²கபடிக்³க³ஹிதபுரேபடிக்³க³ஹிதானம்பி அப்³போ³ஹாரிகதோதி நிட்ட²மேத்த² க³ந்தப்³ப³ந்தி. தேனேவ ‘‘ஏத்தாவதா ஸவத்து²கபடிக்³க³ஹிதம் நாம ந ஹோதீ’’தி வுத்தம். விஸும் படிக்³க³ஹிதேன பன கீ²ராதி³ஆமிஸேன நவனீதாதி³ம் மிஸ்ஸேத்வா பி⁴க்கு²னா வா அஞ்ஞேஹி வா பக்கதேலாதி³பே⁴ஸஜ்ஜம் ஸவத்து²கபடிக்³க³ஹிதஸங்க்²யமேவ க³ச்ச²தி, தத்த² பவிட்ட²யாவகாலிகஸ்ஸ அப்³போ³ஹாரிகத்தாபா⁴வா. யம் பன புரேபரிக்³க³ஹிதபே⁴ஸஜ்ஜேஹி அப்படிக்³க³ஹிதம் கீ²ராதி³ம் பக்கி²பித்வா பக்கதேலாதி³கம் அனுபஸம்பன்னேஹேவ பக்கம்பி ஸவத்து²கபடிக்³க³ஹிதம்பி ஸன்னிதி⁴பி ந ஹோதி, தத்த² பக்கி²த்தகீ²ராதி³கஸ்ஸபி தஸ்மிம் க²ணே ஸம்பி⁴ன்னரஸதாய புரேபடிக்³க³ஹிதத்தாபத்திதோ. ஸசே பன அப்படிக்³க³ஹிதேஹேவ, அஞ்ஞேஹி வா பக்கதேலாதீ³ஸுபி ஸசே ஆமிஸரஸோ பஞ்ஞாயதி, தம் யாவகாலிகமேவ ஹோதீதி வேதி³தப்³ப³ம். உக்³க³ஹேத்வாதி ஸயமேவ க³ஹேத்வா.

பரிஸ்ஸாவேத்வா க³ஹிதந்தி தண்டு³லாதி³விக³மத்த²ம் பரிஸ்ஸாவேத்வா, தக்காதி³விக³மத்த²ம் புன பசித்வா க³ஹிதந்தி அத்தோ². படிக்³க³ஹேத்வா ட²பிதபே⁴ஸஜ்ஜேஹீதி அதிரேகஸத்தாஹபடிக்³க³ஹிதேஹி, ஏதேன தேஹி யுத்தம்பி ஸப்பிஆதி³ அதிரேகஸத்தாஹபடிக்³க³ஹிதம் ந ஹோதீதி த³ஸ்ஸேதி. வத்³த³லிஸமயேதி வஸ்ஸகாலஸமயே, அனாதபகாலேதி அத்தோ².

நிப்³ப³ட்டிதத்தாதி யாவகாலிகவத்து²தோ விவேசிதத்தா, ஏதேன தேலே ஸபா⁴வதோ யாவகாலிகத்தாபா⁴வம், பி⁴க்கு²னோ ஸவத்து²கபடிக்³க³ஹணேன யாவகாலிகத்துபக³மனஞ்ச த³ஸ்ஸேதி. உப⁴யம்பீதி அத்தனா, அஞ்ஞேஹி ச கதம்.

623. அச்ச²வஸந்தி து³க்கடவத்தூ²னஞ்ஞேவ உபலக்க²ணந்தி ஆஹ ‘‘ட²பேத்வா மனுஸ்ஸவஸ’’ந்தி. ஸம்ஸட்ட²ந்தி பரிஸ்ஸாவிதம். திண்ணம் து³க்கடானந்தி அஜ்ஜோ²ஹாரே அஜ்ஜோ²ஹாரே தீணி து³க்கடானி ஸந்தா⁴ய வுத்தம். கிஞ்சாபி பரிபோ⁴க³த்தா²ய விகாலே படிக்³க³ஹணபசனபரிஸ்ஸாவனாதீ³ஸு புப்³ப³பயோகே³ஸு பாளியம், அட்ட²கதா²யஞ்ச ஆபத்தி ந வுத்தா, ததா²பி ஏத்த² ஆபத்தியா ஏவ ப⁴விதப்³ப³ம் படிக்கி²த்தஸ்ஸ கரணதோ ஆஹாரத்தா²ய விகாலே யாமகாலிகாதீ³னம் படிக்³க³ஹணே விய. யஸ்மா கீ²ராதி³ம் பக்கி²பித்வா பக்கபே⁴ஸஜ்ஜதேலே கஸடம் ஆமிஸக³திகம், தேன ஸஹ தேலம் படிக்³க³ஹேதும், பசிதும் வா பி⁴க்கு²னோ ந வட்டதி. தஸ்மா வுத்தம் ‘‘பக்கதேலகஸடே விய குக்குச்சாயதீ’’தி. ஸசே வஸாய ஸஹ பக்கத்தா ந வட்டதி, இத³ம் கஸ்மா ந வட்டதீதி புச்ச²ந்தா ‘‘ப⁴ந்தே …பே… வட்டதீ’’தி ஆஹம்ஸு. தே²ரோ அதிகுக்குச்சதாய ச ‘‘ஏதம்பி, ஆவுஸோ, ந வட்டதீ’’தி ஆஹ. ரோக³னிக்³க³ஹத்தா²ய ஏவ வஸாய அனுஞ்ஞாதத்தம் ஸல்லக்கே²த்வா பச்சா² ‘‘ஸாதூ⁴’’தி ஸம்படிச்சி².

‘‘மது⁴கரீஹி நாம மது⁴மக்கி²காஹீ’’தி இத³ம் கு²த்³த³கப⁴மரானம் த்³வின்னம் ஏவ விஸேஸனந்தி கேசி வத³ந்தி, அஞ்ஞே பன ‘‘த³ண்ட³கேஸு மது⁴காரிகா மது⁴கரீமக்கி²கா நாம, தாஹி ஸஹ திஸ்ஸோ மது⁴மக்கி²காஜாதியோ’’தி வத³ந்தி. ப⁴மரமக்கி²காதி மஹாபடலகாரிகா. ஸிலேஸஸதி³ஸந்தி ஸுக்க²தாய வா பக்கதாய வா க⁴னீபூ⁴தம். இதரந்தி தனுகமது⁴.

உச்சு²ரஸம் உபாதா³யாதி நிக்கஸடரஸஸ்ஸபி ஸத்தாஹகாலிகதம் த³ஸ்ஸேதி ‘‘உச்சு²ம்ஹா நிப்³ப³த்த’’ந்தி பாளியம் ஸாமஞ்ஞதோ வுத்தத்தா. யம் பன ஸுத்தந்தட்ட²கதா²யம் ‘‘உச்சு² சே, யாவகாலிகோ. உச்சு²ரஸோ சே, யாமகாலிகோ. பா²ணிதம் சே, ஸத்தாஹகாலிகம். தசோ சே, யாவஜீவகோ’’தி வுத்தம், தம் அம்ப³ப²லரஸாதி³மிஸ்ஸதாய யாமகாலிகத்தம் ஸந்தா⁴ய வுத்தந்தி க³ஹேதப்³ப³ம், அவினயவசனத்தா தம் அப்பமாணந்தி. தேனேவ ‘‘புரேப⁴த்தம் படிக்³க³ஹிதேன அபரிஸ்ஸாவிதஉச்சு²ரஸேனா’’திஆதி³ வுத்தம். நிராமிஸமேவ வட்டதி தத்த² பவிட்ட²யாவகாலிகஸ்ஸ அப்³போ³ஹாரிகத்தாதி இத³ம் கு³ளே கதே தத்த² விஜ்ஜமானம்பி கஸடம் பாகேன ஸுக்க²தாய யாவஜீவிகத்தம் ப⁴ஜதீதி வுத்தம். தஸ்ஸ யாவகாலிகத்தே ஹி ஸாமம்பாகேன புரேப⁴த்தேபி அனஜ்ஜோ²ஹரணீயம் ஸியாதி. ‘‘ஸவத்து²கபடிக்³க³ஹிதத்தா’’தி இத³ம் உச்சு²ரஸே சுண்ணவிசுண்ணம் ஹுத்வா டி²தகஸடம் ஸந்தா⁴ய வுத்தம், தேன ச அபரிஸ்ஸாவிதேன அப்படிக்³க³ஹிதேன அனுபஸம்பன்னேஹி கதம் ஸத்தாஹம் வட்டதீதி த³ஸ்ஸேதி. ஜா²மஉச்சு²பா²ணிதந்தி அக்³கி³ம்ஹி உச்சு²ம் தாபேத்வா கதம். கோட்டிதஉச்சு²பா²ணிதந்தி கு²த்³தா³னுகு²த்³த³கம் சி²ந்தி³த்வா கோட்டேத்வா நிப்பீளேத்வா பக்கம்.

தம் தத்த² விஜ்ஜமானம்பி கஸடம் பக்ககாலே யாவகாலிகத்தம் விஜஹதீதி ஆஹ ‘‘தம் யுத்த’’ந்தி. ஸீதோத³கேன கதந்தி மது⁴கபுப்பா²னி ஸீதோத³கேன மத்³தி³த்வா பரிஸ்ஸாவேத்வா பசித்வா கதம், அமத்³தி³த்வா கதந்தி கேசி, தத்த² காரணம் ந தி³ஸ்ஸதி. கீ²ரஜல்லிகந்தி கீ²ரபே²ணம். மது⁴கபுப்ப²ம் பனாதிஆதி³ யாவகாலிகரூபேன டி²தஸ்ஸபி அவட்டனகமேரயபீ³ஜவத்து²ம் த³ஸ்ஸேதும் ஆரத்³த⁴ம்.

ஸப்³பா³னிபீதி ஸப்பிஆதீ³னி பஞ்சபி. ஆஹாரகிச்சம் கரோந்தானி ஏதானி கஸ்மா ஏவம் பரிபு⁴ஞ்ஜிதப்³பா³னீதி சோத³னாபரிஹாராய பே⁴ஸஜ்ஜோதி³ஸ்ஸம் த³ஸ்ஸேந்தேன தப்பஸங்கே³ன ஸப்³பா³னிபி ஓதி³ஸ்ஸகானி ஏகதோ த³ஸ்ஸேதும் ‘‘ஸத்தவித⁴ம் ஹீ’’திஆதி³ வுத்தம். அபகதிபே⁴ஸஜ்ஜத்தா விகடானி விரூபானி விஸஹரணதோ மஹாவிஸயத்தா மஹந்தானி சாதி மஹாவிகடானி. உபஸம்பதா³தீ³னீதி ஆதி³-ஸத்³தே³ன க³ணங்க³ணூபாஹனாதி³ம் ஸங்க³ண்ஹாதி.

அதி⁴ட்டே²தீதி பா³ஹிரபரிபோ⁴க³த்த²மேதந்தி சித்தம் உப்பாதே³தி, ஏவம் பரிபோ⁴கே³ அனபேக்க²தாய படிக்³க³ஹணம் விஜஹதீதி அதி⁴ப்பாயோ. ஏவம் அஞ்ஞேஸுபி காலிகேஸு அனஜ்ஜோ²ஹரிதுகாமதாய ஸுத்³த⁴சித்தேன பா³ஹிரபரிபோ⁴க³த்தா²ய நியமேபி படிக்³க³ஹணம் விஜஹதீதி இத³ம்பி விஸும் ஏகம் படிக்³க³ஹணவிஜஹனகாரணந்தி த³ட்ட²ப்³ப³ம்.

625. ஸசே த்³வின்னம்…பே… ந வட்டதீதி ஏத்த² பாடோ² க³ளிதோ, ஏவம் பனேத்த² பாடோ² வேதி³தப்³போ³ ‘‘ஸசே த்³வின்னம் ஸந்தகம் ஏகேன படிக்³க³ஹிதம் அவிப⁴த்தம் ஹோதி, ஸத்தாஹாதிக்கமே த்³வின்னம்பி அனாபத்தி, பரிபு⁴ஞ்ஜிதும் பன ந வட்டதீ’’தி. அஞ்ஞதா² ஹி ஸத்³த³ப்பயோகோ³பி ந ஸங்க³ஹம் க³ச்ச²தி. ‘‘க³ண்டி²பதே³பி ச அயமேவ பாடோ² த³ஸ்ஸிதோ’’தி (ஸாரத்த². டீ. 2.625) ஸாரத்த²தீ³பனியம் வுத்தம். த்³வின்னம்பி அனாபத்தீதி அவிப⁴த்தத்தா வுத்தம். ‘‘பரிபு⁴ஞ்ஜிதும் பன ந வட்டதீ’’தி இத³ம் ‘‘ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³ப³’’ந்தி வசனதோ வுத்தம். ‘‘யேன படிக்³க³ஹிதம், தேன விஸ்ஸஜ்ஜிதத்தா’’தி இமினா உபஸம்பன்னஸ்ஸ தா³னம்பி ஸந்தா⁴ய ‘‘விஸ்ஸஜ்ஜேதீ’’தி இத³ம் வுத்தந்தி த³ஸ்ஸேதி. உபஸம்பன்னஸ்ஸ நிரபேக்க²தி³ன்னவத்து²ம்ஹி படிக்³க³ஹணஸ்ஸ அவிக³தத்தேபி ஸகஸந்தகதா விக³தாவ ஹோதி, தேன நிஸ்ஸக்³கி³யம் ந ஹோதி. அத்தனாவ படிக்³க³ஹிதத்தம், ஸகஸந்தகத்தஞ்சாதி இமேஹி த்³வீஹி காரணேஹி நிஸ்ஸக்³கி³யம் ஹோதி, ந ஏகேன. அனுபஸம்பன்னஸ்ஸ நிரபேக்க²தா³னே பன தது³ப⁴யம்பி விஜஹதி, பரிபோ⁴கோ³பேத்த² வட்டதி, ந ஸாபேக்க²தா³னே தா³னலக்க²ணாபா⁴வதோ. ‘‘விஸ்ஸஜ்ஜேதீ’’தி ஏதஸ்மிஞ்ச பாளிபதே³ கஸ்ஸசி அத³த்வா அனபேக்க²தாய ச²ட்³ட³னம்பி ஸங்க³ஹிதந்தி வேதி³தப்³ப³ம். ‘‘அனபேக்கோ² த³த்வா’’தி இத³ஞ்ச படிக்³க³ஹணவிஜஹனவிதி⁴த³ஸ்ஸனத்த²மேவ வுத்தம். படிக்³க³ஹணே ஹி விஜஹிதே புன படிக்³க³ஹேத்வா பரிபோ⁴கோ³ ஸயமேவ வட்டிஸ்ஸதி, தப்³பி³ஜஹனஞ்ச வத்து²னோ ஸகஸந்தகதாபரிச்சாகே³ன ஹோதீதி, ஏதேன ச வத்து²ம்ஹி அஜ்ஜோ²ஹரணாபேக்கா²ய ஸதி படிக்³க³ஹணவிஸ்ஸஜ்ஜனம் நாம விஸும் ந லப்³ப⁴தீதி ஸிஜ்ஜ²தி. இதரதா² ஹி ‘‘படிக்³க³ஹணே அனபேக்கோ²வ படிக்³க³ஹணம் விஸ்ஸஜ்ஜேத்வா புன படிக்³க³ஹேத்வா பு⁴ஞ்ஜதீ’’தி வத்தப்³ப³ம் ஸியா. ‘‘அப்படிக்³க³ஹிதத்தா’’தி இமினா ஏகஸ்ஸ ஸந்தகம் அஞ்ஞேன படிக்³க³ஹிதம்பி நிஸ்ஸக்³கி³யம் ஹோதீதி த³ஸ்ஸேதி.

ஏவந்தி ‘‘புன க³ஹேஸ்ஸாமீ’’தி அபேக்க²ம் அகத்வா ஸுத்³த⁴சித்தேன பரிச்சத்ததம் பராமஸதி. பரிபு⁴ஞ்ஜந்தஸ்ஸ அனாபத்தித³ஸ்ஸனத்த²ந்தி நிஸ்ஸக்³கி³யமூலிகாஹி பாசித்தியாதி³ஆபத்தீஹி அனாபத்தித³ஸ்ஸனத்த²ந்தி அதி⁴ப்பாயோ. பரிபோ⁴கே³ அனாபத்தித³ஸ்ஸனத்த²ந்தி ஏத்த² பன நிஸ்ஸட்ட²படிலத்³த⁴ஸ்ஸ காயிகபரிபோ⁴கா³தீ³ஸு யா து³க்கடாபத்தி வுத்தா, தாய அனாபத்தித³ஸ்ஸனத்த²ந்தி அதி⁴ப்பாயோ. ஸப்பிஆதீ³னம் படிக்³க³ஹிதபா⁴வோ, அத்தனோ ஸந்தகதா, ஸத்தாஹாதிக்கமோதி இமானேத்த² தீணி அங்கா³னி.

பே⁴ஸஜ்ஜஸிக்கா²பத³வண்ணனா நிட்டி²தா.