1. சீவரவக்³கோ³

1. பட²மகதி²னஸிக்கா²பத³வண்ணனா

459. ஸமிதாவினாதி ஸமிதபாபேன. கோ³தமகசேதியம் நாம கோ³தமயக்க²ஸ்ஸ சேதியட்டா²னே கதவிஹாரோ வுச்சதி.

461. நவமம் வா த³ஸமம் வாதி பு⁴ம்மத்தே² உபயோக³வசனம். ஸசே ப⁴வேய்யாதி ஸசே கஸ்ஸசி கங்கா² ப⁴வேய்ய. வுத்தஸதி³ஸந்தி த³ஸமம் வாதி வுத்தஸதி³ஸம் பரிச்சே²த³ஸதி³ஸம், ‘‘வுத்தஸதி³ஸமேவா’’திபி லிக²ந்தி. தா⁴ரேதுந்தி ஏத்த² ஆஹாதி பாட²ஸேஸோ த³ட்ட²ப்³போ³.

463. ஸூசியா படிஸாமனந்தி ஸூசிக⁴ரே ஸம்கோ³பனம், இத³ஞ்ச ஸூசிகம்மஸ்ஸ ஸப்³ப³ஸ்ஸ பரினிட்டி²தபா⁴வத³ஸ்ஸனத்த²ம் வுத்தம். ஏதந்தி நட்ட²சீவரம். ஏதேஸம்பீதி நட்ட²சீவராதீ³னி பராமஸதி, தேன சீவரபலிபோ³தா⁴பா⁴வம் த³ஸ்ஸேதி. து³தியஸ்ஸ பலிபோ³த⁴ஸ்ஸாதி ஆவாஸபலிபோ³த⁴ஸ்ஸ. ஏத்த² ச நிட்டி²தசீவரஸ்மிம், உப்³ப⁴தஸ்மிம் கதி²னேதி த்³வீஹி பதே³ஹி த்³வின்னம் பலிபோ³தா⁴னம் அபா⁴வத³ஸ்ஸனேன அத்த²தகதி²னஸ்ஸ பஞ்சமாஸப்³ப⁴ந்தரே யாவ சீவரபலிபோ³த⁴ஆவாஸபலிபோ³தே⁴ஸு அஞ்ஞதரம் ந உபச்சி²ஜ்ஜதி, தாவ அதிரேகசீவரம் தா⁴ரேதும் வட்டதீதி தீ³பேதி. பக்கமனம் அந்தோ அஸ்ஸாதி பக்கமனந்திகா, ஏவம் ஸேஸாபி வேதி³தப்³பா³. வித்தா²ரோ பனேத்த² ஆக³தட்டா²னே ஆவி ப⁴விஸ்ஸதி.

த³ஸாஹபரமம் காலந்தி அச்சந்தஸம்யோக³வசனம். இத³ஞ்ஹி வுத்தம் ஹோதி…பே… த³ஸாஹபரமபா⁴வோதி இத³ம் த³ஸாஹபரமதாபத³ஸ்ஸ அத்த²மத்தத³ஸ்ஸனம், த³ஸாஹபரமபா⁴வோதி இத³ஞ்ஹி வுத்தம் ஹோதீதி ஏவமேத்த² யோஜனா வேதி³தப்³பா³. அயமத்தோ²திஆதி³ த³ஸாஹபரமபத³ஸ்ஸேவ அதி⁴ப்பேதத்த²த³ஸ்ஸனவஸேன வுத்தம். தத்த² ஏத்தகோ காலோதி ‘‘த³ஸாஹபரமதா’’தி வுத்தோ யோ காலோ, ஸோ ஏத்தகோ காலோதி அத்தோ².

கோ²மந்தி கோ²மஸுத்தேஹி வாயிதம் கோ²மபடசீவரம், தம் வாகமயந்தி வத³ந்தி. கப்பாஸஸுத்தேஹி வாயிதம் கப்பாஸிகம், ஏவம் ஸேஸானிபி. கம்ப³லந்தி ஏளகாதீ³னம் லோமமயஸுத்தேன வாயிதபடம். ப⁴ங்க³ந்தி கோ²மஸுத்தாதீ³னி ஸப்³பா³னி, ஏகச்சானி வா மிஸ்ஸேத்வா வாயிதம் சீவரம். ப⁴ங்க³ம்பி வாகமயமேவாதி கேசி. து³கூலம் பத்துண்ணம் ஸோமாரபடம் சீனபடம் இத்³தி⁴ஜம் தே³வதி³ன்னந்தி இமானி பன ச² சீவரானி ஏதேஸஞ்ஞேவ அனுலோமானீதி விஸும் ந வுத்தானி. து³கூலஞ்ஹி ஸாணஸ்ஸ அனுலோமம் வாகமயத்தா. ‘‘பத்துண்ணம் கோஸேய்யவிஸேஸோ’’தி அபி⁴தா⁴னகோஸே வுத்தம். ஸோமாரதே³ஸே, சீனதே³ஸே ச ஜாதவத்தா²னி ஸோமாரசீனபடானி. பத்துண்ணாதீ³னி தீணி கோஸேய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴ஜந்தி ஏஹிபி⁴க்கூ²னம் புஞ்ஞித்³தி⁴யா நிப்³ப³த்தசீவரம். கப்பருக்கே² நிப்³ப³த்தம், தே³வதி³ன்னஞ்ச கோ²மாதீ³னம் அஞ்ஞதரம் ஹோதீதி தேஸம் ஸப்³பே³ஸம் அனுலோமானி. மனுஸ்ஸானம் பகதிவித³த்தி²ம் ஸந்தா⁴ய ‘‘த்³வே வித³த்தி²யோ’’திஆதி³ வுத்தம். இமினா தீ³க⁴தோ வட்³ட⁴கீஹத்த²ப்பமாணம் வித்தா²ரதோ ததோ உபட்³ட⁴ப்பமாணம் விகப்பனுபக³ந்தி த³ஸ்ஸேதி. ததா² ஹி ‘‘ஸுக³தவித³த்தி² நாம இதா³னி மஜ்ஜி²மஸ்ஸ புரிஸஸ்ஸ திஸ்ஸோ வித³த்தி²யோ, வட்³ட⁴கீஹத்தே²ன தி³யட்³டோ⁴ ஹத்தோ² ஹோதீ’’தி (பாரா. அட்ட². 2.348-349) குடிகாரஸிக்கா²பத³ட்ட²கதா²யம் வுத்தம், தஸ்மா ஸுக³தங்கு³லேன த்³வாத³ஸங்கு³லா ஸுக³தவித³த்தி² வட்³ட⁴கீஹத்தே²ன தி³யட்³டோ⁴ ஹத்தோ²தி ஸித்³த⁴ம். ஏவஞ்ச கத்வா ‘‘ஸுக³தங்கு³லேன அட்ட²ங்கு³லம் வட்³ட⁴கீஹத்த²ப்பமாண’’ந்தி ஆக³தட்டா²னேஹி ச ஸமேதி.

தம் அதிக்காமயதோதி ஏத்த² தந்தி சீவரம், காலம் வா பராமஸதி. தஸ்ஸ யோ அருணோதி சீவருப்பாத³தி³வஸஸ்ஸ யோ அதிக்கந்தோ அருணோ. சீவருப்பாத³தி³வஸேன ஸத்³தி⁴ந்தி சீவருப்பாத³தி³வஸஸ்ஸ ஆதி³பூ⁴தேன அதிக்கந்தஅருணேன ஸத்³தி⁴ந்தி அத்தோ², இத³ஞ்ச ப⁴க³வதா ‘‘த³ஸாஹபரம’’ந்தி வத்வா புன ‘‘ஏகாத³ஸே அருணுக்³க³மனே’’தி வுத்தத்தா புப்³பா³பரஸம்ஸந்த³னத்த²ம் ஸத்³த³தோ க³ம்மமானம்பி ‘‘சீவருப்பாத³தி³வஸேன ஸத்³தி⁴’’ந்தி ஏவம் வுத்தம். ‘‘த³ஸமே அருணே’’தி வுத்தே ஏவ ஹி த³ஸாஹபரமேன ஸத்³தி⁴ம் ஸமேதி. தி³வஸபரியோஸானஸ்ஸ அவதி⁴பூ⁴தஅனாக³தாருணவஸேன ஹி தி³வஸம் அதிக்கந்தம் நாம ஹோதி, ந பன தி³வஸஸ்ஸ ஆதி³பூ⁴தாருணவஸேன பரிவாஸாதீ³ஸு ததா² அக்³க³ஹணதோ, இத⁴ பன ப⁴க³வதா தி³வஸஸ்ஸ ஆதி³அந்தபரிச்சே²த³த³ஸ்ஸனவஸேன ‘‘ஏகாத³ஸே அருணுக்³க³மனே’’தி வுத்தம், தஸ்மா அட்ட²கதா²யம் தி³வஸஸ்ஸ ஆதி³பூ⁴தம் தம்தி³வஸனிஸ்ஸிதம்பி அருணம் க³ஹேத்வா ‘‘ஏகாத³ஸே அருணுக்³க³மனே நிஸ்ஸக்³கி³யம் ஹோதீ’’தி வுத்தம். அருணோதி சேத்த² ஸூரியுக்³க³மனஸ்ஸ புரேசரோ வட்³ட⁴னக⁴னரத்தோ பபா⁴விஸேஸோதி த³ட்ட²ப்³போ³.

வசனீயோதி ஸங்கா⁴பேக்கோ². வசனபே⁴தோ³தி ‘‘ஞத்தியம் த்³வே ஆபத்தியோ ஸரதீ’’திஆதி³னா வத்தப்³ப³ந்தி அதி⁴ப்பாயோ.

468. ‘‘ந இத⁴ ஸஞ்ஞா ரக்க²தீ’’தி இத³ம் வேமதிகஞ்ச அனதிக்கந்தஸஞ்ஞஞ்ச ஸந்தா⁴ய வுத்தம். யோபி ஏவம்ஸஞ்ஞீ தஸ்ஸபீதி யோ அனதிக்கந்தஸஞ்ஞீ, வேமதிகோ வா, தஸ்ஸபீதி அத்தோ². அனட்ட²தோ அவிலுத்தஸ்ஸ விஸேஸமாஹ ‘‘பஸய்ஹாவஹாரவஸேனா’’தி. தே²ய்யாவஹாரவஸேன க³ஹிதம்பி இத⁴ நட்ட²ம்.

அனாபத்தி அஞ்ஞேன கதம் படிலபி⁴த்வாதிஆதி³ நிஸீத³னஸந்த²தம் ஸந்தா⁴ய வுத்தம். யேன ஹி புராணஸந்த²தஸ்ஸ ஸாமந்தா ஸுக³தவித³த்தி²ம் அனாதி³யித்வா நவம் நிஸீத³னஸந்த²தம் கதம், தஸ்ஸ தம் நிஸ்ஸக்³கி³யம்பி ததோ அஞ்ஞஸ்ஸ படிலபி⁴த்வா பரிபு⁴ஞ்ஜந்தஸ்ஸ அனாபத்திகரந்தி ஸிஜ்ஜ²னதோ அயமத்தோ² ஸப்³ப³னிஸ்ஸக்³கி³யேஸுபி ஸிஜ்ஜ²தி.

469. திசீவரம் அதி⁴ட்டா²துந்தி ஸங்கா⁴டிஆதி³னாமேன அதி⁴ட்டா²தும். ‘‘ந விகப்பேது’’ந்தி இமினா நாமேன ந விகப்பேதும், ஏதேன விகப்பிததிசீவரோ தேசீவரிகோ ந ஹோதி. தஸ்ஸ தஸ்மிம் அதி⁴ட்டி²ததிசீவரே விய அவிப்பவாஸாதி³னா கத்தப்³ப³விதி⁴ ந காதப்³போ³தி த³ஸ்ஸேதி, ந பன விகப்பனே தோ³ஸோதி. ததோ பரந்தி சதுமாஸதோ பரம் விகப்பேத்வா பரிபு⁴ஞ்ஜிதும் அனுஞ்ஞாதந்தி கேசி வத³ந்தி, அஞ்ஞே பன ‘‘விகப்பேத்வா யாவ ஆகா³மிவஸ்ஸானம், தாவ ட²பேதுமேவ வட்டதீ’’தி வத³ந்தி, அபரே பன ‘‘விகப்பனே ந தோ³ஸோ, ததா² விகப்பிதம் பரிக்கா²ராதி³னாமேன அதி⁴ட்ட²ஹித்வா பரிபு⁴ஞ்ஜிதப்³ப³’’ந்தி வத³ந்தி.

முட்டி²பஞ்சகந்தி முட்டி²யா உபலக்கி²தம் பஞ்சகம், சதுஹத்தே² மினித்வா பஞ்சமம் ஹத்த²ம் முட்டி²ம் கத்வா மினிதப்³ப³ந்தி அதி⁴ப்பாயோ. கேசி பன ‘‘முட்டி²ஹத்தா²னம் பஞ்சகம் முட்டி²பஞ்சகம், தஸ்மா பஞ்சபி ஹத்தே² முட்டி²ம் கத்வாவ மினிதப்³பா³’’தி வத³ந்தி. முட்டி²த்திகந்தி ஏத்தா²பி ஏஸேவ நயோ. த்³விஹத்தே²ன அந்தரவாஸகேன திமண்ட³லம் படிச்சா²தே³தும் ஸக்காதி ஆஹ ‘‘பாருபனேனா’’திஆதி³. அதிரேகந்தி ஸுக³தசீவரப்பமாணதோ அதி⁴கம். ஊனகந்தி முட்டி²பஞ்சகாதி³தோ ஊனகம், தேன ச தேஸு திசீவராதி⁴ட்டா²னம் ந ருஹதீதி த³ஸ்ஸேதி.

இமம் ஸங்கா⁴டிம் பச்சுத்³த⁴ராமீதி இமம் ஸங்கா⁴டிஅதி⁴ட்டா²னம் உக்கி²பாமி பரிச்சஜாமீதி அத்தோ². காயவிகாரம் கரோந்தேனாதி ஹத்தே²ன சீவரம் பராமஸந்தேன, சாலேந்தேன வா. வாசாய அதி⁴ட்டா²தப்³பா³தி ஏத்த² காயேனபி சாலேத்வா வாசம்பி பி⁴ந்தி³த்வா காயவாசாஹி அதி⁴ட்டா²னம்பி ஸங்க³ஹிதந்தி வேதி³தப்³ப³ம் ‘‘காயேன அபு²ஸித்வா’’தி வுத்தத்தா. து³வித⁴ந்தி அஹத்த²பாஸஹத்த²பாஸவஸேன து³வித⁴ம். தத்த² ஹத்த²பாஸோ நாம அட்³ட⁴தேய்யஹத்தோ² வுச்சதி. த்³வாத³ஸஹத்த²ந்தி கேசி வத³ந்தி, தம் இத⁴ ந ஸமேதி. ‘‘ஸாமந்தவிஹாரே’’தி இத³ம் ட²பிதட்டா²னஸல்லக்க²ணயோக்³கே³ டி²தம் ஸந்தா⁴ய வுத்தம். ததோ தூ³ரே டி²தம்பி ட²பிதட்டா²னம் ஸல்லக்கே²ந்தேன அதி⁴ட்டா²தப்³ப³மேவ. தத்த²பி சீவரஸ்ஸ ட²பிதபா⁴வஸல்லக்க²ணமேவ பமாணம். ந ஹி ஸக்கா ஸப்³ப³தா² டா²னம் ஸல்லக்கே²தும். ஏகஸ்மிம் விஹாரே ட²பேத்வா ததோ அஞ்ஞஸ்மிம் ட²பிதந்தி அதி⁴ட்டா²தும் ந வட்டதி. கேசி பன ‘‘ததா²பி அதி⁴ட்டி²தே ந தோ³ஸோ’’தி வத³ந்தி, தம் அட்ட²கதா²ய ந ஸமேதி, வீமம்ஸிதப்³ப³ம். அதி⁴ட்ட²ஹித்வா ட²பிதவத்தே²ஹீதி பரிக்கா²ரசோளனாமேன அதி⁴ட்ட²ஹித்வா ட²பிதவத்தே²ஹி, தேனேவ ‘‘இமம் பச்சுத்³த⁴ராமீ’’தி பரிக்கா²ரசோளஸ்ஸ பச்சுத்³தா⁴ரம் த³ஸ்ஸேதி. ஏதேன ச தேசீவரது⁴தங்க³ம் பரிஹரந்தேன பம்ஸுகூலாதி³வஸேன லத்³த⁴ம் வத்த²ம் த³ஸாஹப்³ப⁴ந்தரே கத்வா ரஜித்வா பாருபிதும் அஸக்கோந்தேன பரிக்கா²ரசோளவஸேன அதி⁴ட்ட²ஹித்வாவ த³ஸாஹம் அதிக்கமேதப்³ப³ம், இதரதா² நிஸ்ஸக்³கி³யம் ஹோதீதி த³ஸ்ஸேதி. தேனேவ ‘‘ரஜிதகாலதோ பன பட்டா²ய நிக்கி²பிதும் ந வட்டதி, து⁴தங்க³சோரோ நாம ஹோதீ’’தி (விஸுத்³தி⁴. 1.25) விஸுத்³தி⁴மக்³கே³ வுத்தம். ‘‘புன அதி⁴ட்டா²தப்³பா³னீ’’தி இத³ஞ்ச ஸங்கா⁴டிஆதி³திசீவரனாமேன அதி⁴ட்ட²ஹித்வா பரிபு⁴ஞ்ஜிதுகாமஸ்ஸ வஸேன வுத்தம், இதரஸ்ஸ பன புரிமாதி⁴ட்டா²னமேவ அலந்தி வேதி³தப்³ப³ம். ‘‘புன அதி⁴ட்டா²தப்³ப³’’ந்தி இமினா கப்பபி³ந்து³பி தா³தப்³ப³ந்தி த³ஸ்ஸேதி.

ப³த்³த⁴ஸீமாயம் அவிப்பவாஸஸீமாஸம்முதிஸம்ப⁴வதோ ந தத்த² து³ப்பரிஹாரதாதி ஆஹ ‘‘அப³த்³த⁴ஸீமாயம் து³ப்பரிஹார’’ந்தி.

அதிரித்தப்பமாணாய சே²த³னகம் பாசித்தியந்தி ஆஹ ‘‘அனதிரித்தப்பமாணா’’தி. ததோ பரம் பச்சுத்³த⁴ரித்வா விகப்பேதப்³பா³தி வஸ்ஸிகமாஸதோ பரம் அதி⁴ட்டா²னம் பச்சுத்³த⁴ரித்வா விகப்பேதப்³பா³, இமினா சதுன்னம் வஸ்ஸிகமாஸானம் உபரி அதி⁴ட்டா²னம் திட்ட²தீதி விஞ்ஞாயதி ததோ பச்சுத்³த⁴ராயோகா³. யஞ்ச மாதிகாட்ட²கதா²யம் ‘‘வஸ்ஸிகஸாடிகா வஸ்ஸானமாஸாதிக்கமேனாபி, கண்டு³படிச்சா²தி³ ஆபா³த⁴வூபஸமேனாபி அதி⁴ட்டா²னம் விஜஹதீ’’தி (கங்கா². அட்ட². கதி²னஸிக்கா²பத³வண்ணனா) வுத்தம், தம் ஸமந்தபாஸாதி³காயம் நத்தி². பரிவாரட்ட²கதா²யஞ்ச ‘‘அத்தா²பத்தி ஹேமந்தே ஆபஜ்ஜதி, நோ கி³ம்ஹே’’தி ஏத்த² இத³ம் வுத்தம் ‘‘கத்திகபுண்ணமாஸியா பச்சி²மே பாடிபத³தி³வஸே விகப்பேத்வா ட²பிதம் வஸ்ஸிகஸாடிகம் நிவாஸேந்தோ ஹேமந்தே ஆபஜ்ஜதி, குருந்தி³யம் பன ‘கத்திகபுண்ணமதி³வஸே அபச்சுத்³த⁴ரித்வா ஹேமந்தே ஆபஜ்ஜதீ’தி வுத்தம், தம்பி ஸுவுத்தம், ‘சதுமாஸம் அதி⁴ட்டா²தும் ததோ பரம் விகப்பேது’ந்தி ஹி வுத்த’’ந்தி (பரி. அட்ட². 323). தத்த² மஹாஅட்ட²கதா²யம் நிவாஸனபச்சயா து³க்கடம் வுத்தம், குருந்த³ட்ட²கதா²யம் பன அபச்சுத்³தா⁴ரபச்சயா, தஸ்மா குருந்தி³யம் வுத்தனயேனாபி வஸ்ஸிகஸாடிகா வஸ்ஸானமாஸாதிக்கமேபி அதி⁴ட்டா²னம் ந விஜஹதீதி பஞ்ஞாயதி. அதி⁴ட்டா²னவிஜஹனேஸு ச வஸ்ஸானமாஸஆபா³தா⁴னம் விக³மேன விஜஹனம் மாதிகாட்ட²கதா²யம்பி ந உத்³த⁴டம், தஸ்மா ஸமந்தபாஸாதி³காயம் ஆக³தனயேன யாவ பச்சுத்³தா⁴ரா அதி⁴ட்டா²னம் திட்ட²தீதி க³ஹேதப்³ப³ம். நஹானத்தா²ய அனுஞ்ஞாதத்தா ‘‘வண்ணபே⁴த³மத்தரத்தாபி சேஸா வட்டதீ’’தி வுத்தம். ‘‘த்³வே பன ந வட்டந்தீ’’தி இமினா ஸங்கா⁴டிஆதீ³ஸு விய து³தியே அதி⁴ட்டா²னம் ந ருஹதி, அதிரேகசீவரம் ஹோதீதி த³ஸ்ஸேதி. மஹாபச்சரியம் சீவரவஸேன பரிபோ⁴க³கிச்சஸ்ஸ அபா⁴வம் ஸந்தா⁴ய அனாபத்தி வுத்தா ஸேனாஸனபரிக்கா²ரத்தா²ய தி³ன்னபச்சத்த²ரணே விய. யம் பன ‘‘பச்சத்த²ரணம்பி அதி⁴ட்டா²தப்³ப³’’ந்தி வுத்தம், தம் ஸேனாஸனத்தா²யேவாதி நியமிதம் ந ஹோதி நவஸு சீவரேஸு க³ஹிதத்தா, தஸ்மா அத்தனோ நாமேன அதி⁴ட்ட²ஹித்வா நித³ஹித்வா பரிக்கா²ரசோளம் விய யதா² ததா² வினியுஜ்ஜிதப்³ப³மேவாதி க³ஹேதப்³ப³ம். பாவாரோ கோஜவோதி இமேஸம்பி பச்சத்த²ரணாதீ³னம் லோகேபி வோஹரணதோ ஸேனாஸனபரிக்கா²ரத்தா²ய தி³ன்னபச்சத்த²ரணதோ விஸும் க³ஹணம் கதம்.

‘‘ஹீனாயாவத்தனேனா’’தி இத³ம் அந்திமவத்து²ம் அஜ்ஜா²பஜ்ஜித்வா பி⁴க்கு²படிஞ்ஞாய டி²தஸ்ஸ சேவ தித்தி²யபக்கந்தஸ்ஸ ச பி⁴க்கு²னியா ச பி⁴க்கு²னிபா⁴வே நிரபேக்க²தாய கி³ஹிலிங்க³தித்தி²யலிங்க³க்³க³ஹணம் ஸந்தா⁴ய வுத்தம். ஸிக்க²ம் அபச்சக்கா²ய கி³ஹிபா⁴வூபக³மனம் ஸந்தா⁴ய வுத்தந்தி கேசி வத³ந்தி, தம் ந யுத்தம் ததா³பிஸ்ஸ உபஸம்பன்னத்தா, சீவரஸ்ஸ ச தஸ்ஸ ஸந்தகத்தாவிஜஹனதோ. பமாணசீவரஸ்ஸாதி பச்சி²மப்பமாணம் ஸந்தா⁴ய வுத்தம். த்³வே சீவரானி பாருபந்தஸ்ஸாதி கா³மப்பவேஸே தி³கு³ணம் கத்வா ஸங்கா⁴டியோ பாருபனம் ஸந்தா⁴ய வுத்தம். ‘‘ஏஸ நயோ’’தி இமினா பமாணயுத்தேஸு யத்த² கத்த²சி சி²த்³த³ம் அதி⁴ட்டா²னம் விஜஹதீதிஆதி³அத்த²ம் ஸங்க³ண்ஹாதி.

அஞ்ஞம் பச்சி²மப்பமாணம் நாம நத்தீ²தி ஸுத்தே ஆக³தம் நத்தீ²தி அதி⁴ப்பாயோ. இதா³னி தமேவ விபா⁴வேதும் ‘‘யஞ்ஹீ’’திஆதி³ வுத்தம், தம் ந ஸமேதி, ஸங்கா⁴டிஆதீ³னம் முட்டி²பஞ்சகாதி³ஹேட்டி²மப்பமாணஸ்ஸ ஸுத்தே அனாக³தத்தாதி அதி⁴ப்பாயோ.

மஹந்தம் வா கு²த்³த³கம் கரோதீதி ஏத்த² அதிமஹந்தம் சீவரம் முட்டி²பஞ்சகாதி³பச்சி²மப்பமாணயுத்தம் கத்வா ஸமந்ததோ சி²ந்த³னேனாபி விச்சி²ந்த³னகாலே சி²ஜ்ஜமானட்டா²னம் சி²த்³த³ஸங்க்²யம் ந க³ச்ச²தி அதி⁴ட்டா²னம் ந விஜஹதி ஏவாதி ஸிஜ்ஜ²தி, ‘‘க⁴டேத்வா சி²ந்த³தி, ந பி⁴ஜ்ஜதீ’’தி வசனேன ச ஸமேதி. பரிக்கா²ரசோளம் பன விகப்பனுபக³பச்சி²மப்பமாணதோ ஊனம் கத்வா சி²ன்னம் அதி⁴ட்டா²னம் விஜஹதி அதி⁴ட்டா²னஸ்ஸ அனிஸ்ஸயத்தா. தானி புன ப³த்³தா⁴னி க⁴டிதானி அதி⁴ட்டா²தப்³ப³மேவாதி வேதி³தப்³ப³ம். கேசி பன ‘‘வஸ்ஸிகஸாடிகசீவரே த்³விதா⁴ சி²ன்னே யதி³பி ஏகேகம் க²ண்ட³ம் பச்சி²மபச்சி²மப்பமாணம் பஹோதி, ஏகஸ்மிம்யேவ க²ண்டே³ அதி⁴ட்டா²னம் திட்ட²தி, ந இதரே, ‘‘த்³வே பன ந வட்டந்தீ’’தி வுத்தத்தா. நிஸீத³னகண்டு³ப்படிச்சா²தீ³ஸுபி ஏஸேவ நயோதி வத³ந்தி.

ஸம்முகே² பவத்தா ஸம்முகா²தி பச்சத்தவசனம், தஞ்ச விகப்பனவிஸேஸனம், தஸ்மா ‘‘ஸம்முகே²’’தி பு⁴ம்மத்தே² நிஸ்ஸக்கவசனம் கத்வாபி அத்த²ம் வத³ந்தி, அபி⁴முகே²தி அத்தோ². அத² வா ஸம்முகே²ன அத்தனோ வாசாய ஏவ விகப்பனா ஸம்முகா²விகப்பனா. பரம்முகே²ன விகப்பனா பரம்முகா²விகப்பனாதி கரணத்தே²னாபி அத்தோ² த³ட்ட²ப்³போ³, அயமேவ பாளியா ஸமேதி. ஸன்னிஹிதாஸன்னிஹிதபா⁴வந்தி ஆஸன்னதூ³ரபா⁴வம். ஏத்தாவதா நிதே⁴தும் வட்டதீதி ஏத்தகேனேவ விகப்பனாகிச்சஸ்ஸ நிட்டி²தத்தா, அதிரேகசீவரம் ந ஹோதீதி த³ஸாஹாதிக்கமே ந நிஸ்ஸக்³கி³யம் ஜனேதீதி அதி⁴ப்பாயோ. பரிபு⁴ஞ்ஜிதும்…பே… ந வட்டதீதி ஸயம் அபச்சுத்³த⁴ரணம் பரிபு⁴ஞ்ஜனே பாசித்தியம், அதி⁴ட்டா²னே பரேஸம் விஸ்ஸஜ்ஜனே து³க்கடஞ்ச ஸந்தா⁴ய வுத்தம்.

பரிபோ⁴கா³த³யோபி வட்டந்தீதி பரிபோ⁴க³விஸ்ஸஜ்ஜனஅதி⁴ட்டா²னானிபி. அபி-ஸத்³தே³ன நிதே⁴தும்பி வட்டதீதி அத்தோ², ஏதேன ச பச்சுத்³தா⁴ரேபி கதே சீவரம்பி விகப்பிதசீவரமேவ ஹோதி, ந அதிரேகசீவரம். தம் பன திசீவராதி³னாமேன அதி⁴ட்டா²துகாமேன அதி⁴ட்ட²ஹிதப்³ப³ம், இதரேன விகப்பிதசீவரமேவ கத்வா பரிபு⁴ஞ்ஜிதப்³ப³ந்தி த³ஸ்ஸேதி. கேசி பன ‘‘யம் விகப்பிதசீவரம், தம் யாவ அபரிபோ⁴க³காலா அபச்சுத்³த⁴ராபேத்வாவ நித³ஹிதப்³ப³ம், பரிபோ⁴க³காலே பன ஸம்பத்தே பச்சுத்³த⁴ராபேத்வா அதி⁴ட்ட²ஹித்வா பரிபு⁴ஞ்ஜிதப்³ப³ம். யதி³ ஹி ததோ புரேபி பச்சுத்³த⁴ராபேய்ய, பச்சுத்³தா⁴ரேனேவ விகப்பனாய விக³தத்தா அதிரேகசீவரம் நாம ஹோதி, த³ஸாஹாதிக்கமே ச நிஸ்ஸக்³கி³யம் பாசித்தியம். தஸ்மா யம் அபரிபு⁴ஞ்ஜித்வாவ ட²பேதப்³ப³ம், ததே³வ விகப்பேதப்³ப³ம், பச்சுத்³தா⁴ரே ச கதே அந்தோத³ஸாஹேயேவ அதி⁴ட்டா²தப்³ப³ம். யஞ்ச அட்ட²கதா²யம் ‘ததோ பபு⁴தி பரிபோ⁴கா³த³யோபி வட்டந்தீ’திஆதி³ வுத்தம், தம் பாளியா விருஜ்ஜ²தீ’’தி வத³ந்தி, தம் தேஸம் மதிமத்தமேவ. பாளியஞ்ஹி ‘‘அந்தோத³ஸாஹம் அதி⁴ட்டே²தி, விகப்பேதீ’’தி (பாரா. 469) ச ‘‘ஸாமம் சீவரம் விகப்பேத்வா அபச்சுத்³தா⁴ரணம் பரிபு⁴ஞ்ஜேய்ய பாசித்திய’’ந்தி (பாசி. 373) ச ‘‘அனாபத்தி ஸோ வா தே³தி, தஸ்ஸ வா விஸ்ஸாஸந்தோ பரிபு⁴ஞ்ஜதீ’’தி (பாசி. 374) ச ஸாமஞ்ஞதோ வுத்தத்தா, அட்ட²கதா²யஞ்ச ‘‘இமம் சீவரம் வா விகப்பனம் வா பச்சுத்³த⁴ராமீ’’திஆதி³னா பச்சுத்³தா⁴ரம் அத³ஸ்ஸேத்வா ‘‘மய்ஹம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா’’தி ஏவம் அத்தனோ ஸந்தகத்தம் அமோசேத்வாவ பரிபோ⁴கா³தி³வஸேனேவ பச்சுத்³தா⁴ரஸ்ஸ வுத்தத்தா, ‘‘ததோ பபு⁴தி பரிபோ⁴கா³த³யோபி வட்டந்தீ’’தி அதி⁴ட்டா²னம் வினாபி விஸும் பரிபோ⁴க³ஸ்ஸ, நித³ஹனஸ்ஸ ச வுத்தத்தா விகப்பனானந்தரமேவ பச்சுத்³த⁴ராபேத்வா அனதி⁴ட்ட²ஹித்வா ஏவ திசீவரவிரஹிதம் விகப்பனாரஹம் சீவரம் பரிபு⁴ஞ்ஜிதும், நித³ஹிதுஞ்ச இத³ம் பாடேக்கம் வினயகம்மந்தி கா²யதி. அபிச ப³ஹூனம் பத்தானம் விகப்பேதும், பச்சுத்³தா⁴ரேதுஞ்ச வுத்தத்தா பச்சுத்³தா⁴ரேன தேஸம் அதிரேகபத்ததா த³ஸ்ஸிதாதி ஸிஜ்ஜ²தி தேஸு ஏகஸ்ஸேவ அதி⁴ட்டா²தப்³ப³தோ. தஸ்மா அட்ட²கதா²யம் ஆக³தனயேனேவ க³ஹேதப்³ப³ம்.

பஞ்ஞத்திகோவிதோ³ ந ஹோதீதி ஏவம் விகப்பிதே ‘‘அனந்தரமேவ ஏவம் பச்சுத்³த⁴ரிதப்³ப³’’ந்தி வினயகம்மம் ந ஜானாதி. தேனாஹ ‘‘ந ஜானாதி பச்சுத்³த⁴ரிது’’ந்தி, இமினாபி சேதம் வேதி³தப்³ப³ம் ‘‘விகப்பனானந்தரமேவ பச்சுத்³தா⁴ரோ காதப்³போ³’’தி.

அவிஸேஸேன வுத்தவசனந்தி திசீவராதீ³னம் ஸாதா⁴ரணவசனேன வுத்தவசனம். யம் பனேத்த² ‘‘விருத்³த⁴ம் விய தி³ஸ்ஸதீ’’தி வத்வா தம் விரோதா⁴ஸங்கம் நிவத்தேதும் ‘‘திசீவரஸங்கே²பேன…பே… விகப்பனாய ஓகாஸோ தி³ன்னோ ஹோதீ’’தி வுத்தம், தம் ‘‘அதி⁴ட்டே²தி விகப்பேதீ’’தி ஸாமஞ்ஞதோ வுத்தேபி திசீவரம்பி விகப்பேதீதி அயமத்தோ² ந ஸிஜ்ஜ²தி, ‘‘திசீவரம் அதி⁴ட்டா²தும் ந விகப்பேது’’ந்தி (மஹாவ. 358) விஸேஸேத்வா வுத்தத்தா. யம் பன அதி⁴ட்டா²தப்³ப³ம், தம் அதி⁴ட்டா²தி. யம் திசீவரவிரஹிதம், தம் விகப்பேதப்³ப³ம், தம் விகப்பேதீதி ஏவமத்தோ² ஸிஜ்ஜ²தீதி. தஸ்மா ஏத்த² புப்³பா³பரவிரோதோ⁴ ந தி³ஸ்ஸதி ஸாமஞ்ஞவசனஸ்ஸ வுத்தாவஸேஸேயேவ அவதிட்ட²னதோ. யம் பனேத்த² திசீவரஸ்ஸாபி விகப்பனவிதி⁴ம் த³ஸ்ஸேதும் ‘‘திசீவரம் திசீவரஸங்கே²பேனா’’திஆதி³ வுத்தம். தத்த² திசீவரஸங்கே²பேன பரிஹரியமானேஸு ஏகம்பி பச்சுத்³த⁴ரித்வா விகப்பேதும் ந வட்டதி, திசீவரதோ பன ஏகம் வா ஸகலமேவ வா அபனேத்வா அபரம் திசீவரம் திசீவரஸங்கே²பேன பரிஹரிதுகாமஸ்ஸ வா திசீவராதி⁴ட்டா²னம் முஞ்சித்வா பரிக்கா²ரசோளவஸேனேவ ஸப்³ப³சீவரம் பரிபு⁴ஞ்ஜிதுகாமஸ்ஸ வா புரிமம் அதி⁴ட்டி²தசீவரம் பச்சுத்³த⁴ரித்வா விகப்பேதும் வட்டதீதி ஏவமதி⁴ப்பாயேன ‘‘திசீவரே ஏகேன சீவரேன விப்பவஸிதுகாமோ ஹோதீ’’திஆதி³ வுத்தம் ஸியா, இச்சேதம் பாளியா ஸத்³தி⁴ம் ஸமேதி. அத² புனபி ததே³வ திசீவராதி⁴ட்டா²னேன அதி⁴ட்டா²துகாமோ ஹுத்வா விப்பவாஸஸுக²த்த²ம் பச்சுத்³த⁴ரித்வா விகப்பேதீதி இமினா அதி⁴ப்பாயேன வுத்தம் ஸியா, தம் ‘‘திசீவரம் அதி⁴ட்டா²தும் ந விகப்பேது’’ந்தி (மஹாவ. 358) இமினா வசனேன ந ஸமேதி. யதி³ ஹி ஸேஸசீவரானி விய திசீவரம்பி பச்சுத்³த⁴ரித்வா விகப்பேதப்³ப³ம் ஸியா, ‘‘திசீவரம் அதி⁴ட்டா²தும் ந விகப்பேது’’ந்தி இத³ம் வசனமேவ நிரத்த²கம் ஸியா ஸேஸசீவரேஹி திசீவரஸ்ஸ விஸேஸாபா⁴வா. தஸ்மா ‘‘விகப்பேதீ’’தி இத³ம் திசீவரவிரஹிதமேவ ஸந்தா⁴ய வுத்தம். திசீவரம் பன விகப்பேதும் ந வட்டதீதி விஞ்ஞாயதி, தேனேவ து³தியகதி²னஸிக்கா²பத³ஸ்ஸ அனாபத்திவாரே ‘‘விகப்பேதீ’’தி இத³ம் ந வுத்தம், வீமம்ஸித்வா யதா² பாளியா ஸத்³தி⁴ம் ந விருஜ்ஜ²தி, ததா² ஏத்த² அதி⁴ப்பாயோ க³ஹேதப்³போ³.

துய்ஹம் தே³மீதிஆதீ³ஸு பரிச்சத்தத்தா மனஸா அஸம்படிச்ச²ந்தேபி ஸம்பதா³னபூ⁴தஸ்ஸேவ ஸந்தகம் ஹோதி, ஸோ இச்சி²தக்க²ணே க³ஹேதும் லப⁴தி. இத்த²ன்னாமஸ்ஸாதி பரம்முகே² டி²தம் ஸந்தா⁴ய வத³தி. யஸ்ஸ பன ருச்சதீதிஆதி³ உபோ⁴ஹிபி பரிச்சத்ததாய அஸ்ஸாமிகதம் ஸந்தா⁴ய வுத்தம்.

‘‘தம் ந யுஜ்ஜதீ’’தி இத³ம் அந்தோத³ஸாஹே ஏவ விஸ்ஸாஸக்³க³ஹணம் ஸந்தா⁴ய அனாபத்திவாரஸ்ஸ ஆக³தத்தா, இத⁴ நிஸ்ஸக்³கி³யசீவரஸ்ஸ கப்பியபா⁴வகரணத்த²ம் லேஸேன க³ஹிதத்தா ச வுத்தம், கேசி பன ‘‘பரேஹி ஸபா⁴கே³ன அச்சி²ன்னே, விஸ்ஸாஸக்³க³ஹிதே ச புன லத்³தே⁴ தோ³ஸோ ந தி³ஸ்ஸதீ’’தி வத³ந்தி. அனதி⁴ட்டா²னேனாதி காயவாசாஹி கத்தப்³ப³ஸ்ஸ அகரணேனாதி அதி⁴ப்பாயோ. சீவரஸ்ஸ அத்தனோ ஸந்தகதா, ஜாதிபமாணயுத்ததா, சி²ன்னபலிபோ³த⁴பா⁴வோ, அதிரேகசீவரதா, த³ஸாஹாதிக்கமோதி இமானேத்த² பஞ்ச அங்கா³னி.

பட²மகதி²னஸிக்கா²பத³வண்ணனா நிட்டி²தா.

2. உதோ³ஸிதஸிக்கா²பத³வண்ணனா

473. து³தியே அவிப்பவாஸேதி அவிப்பவாஸே நிப்பா²தே³தப்³பே³, விப்பவாஸதோ³ஸாபா⁴வே ஸாதே⁴தப்³பே³ கத்தப்³பா³ ஸம்முதீதி அத்தோ².

475. படிஸித்³த⁴பரியாபன்னேனாதி விப்பவஸிதும் படிஸித்³தே⁴ஸு தீஸு சீவரேஸு அந்தோக³தே⁴ன, ஏகேன ச அவயவே ஸமுதா³யோபசாரம் த³ஸ்ஸேதி.

478-9. ஏத்தாவதாதி ‘‘பரிக்கி²த்தோ’’தி இமினா. ‘‘ஸபா⁴யேதி லிங்க³ப்³யத்தயேன ஸபா⁴ வுத்தா’’தி வத்வா புன ஸயம்பி ‘‘ஸபா⁴யே’’தி இமினா வோஹரந்தோ ஸபா⁴-ஸத்³த³ஸ்ஸ பரியாயோ ஸபா⁴ய-ஸத்³தோ³ நபும்ஸகலிங்க³யுத்தோ அத்தீ²தி த³ஸ்ஸேதி. ‘‘ஸபா⁴யந்தி லிங்க³ப்³யத்தயேன ஸபா⁴ வுத்தா’’தி வா பாடோ². லிங்க³ப்³யத்தயேன ஸபா⁴தி ச லிங்க³ந்தரயுத்தோ ஸபா⁴ஸத்³த³பரியாயோ ஸபா⁴யஸத்³தோ³தி அத்தோ².

ஸபா⁴யம் க³ச்ச²தீதி ஸப⁴ம் க³ச்ச²தி. வஸிதப்³ப³ம் நத்தீ²தி சீவரஹத்த²பாஸேயேவ வஸிதப்³ப³ம் நத்தீ²தி அத்தோ². தஸ்ஸாதி வீதி²யா. ஸபா⁴யஸ்ஸ ச த்³வாரஸ்ஸ ச ஹத்த²பாஸா ந விஜஹிதப்³ப³ந்தி ஏத்த² ஸபா⁴யத்³வாரானமந்தரே வீதி² கே³ஹாபி க³ஹிதா ஏவ ஹோந்தி ஆதி³பரியோஸானானம் க³ஹிதத்தா. ஏத்த² ச த்³வாரவீதி²க⁴ரேஸு வஸந்தேன கா³மப்பவேஸனஸஹஸேய்யாதி³தோ³ஸம் பரிஹரித்வா ஸுபடிச்ச²ன்னதாதி³யுத்தேனேவ ப⁴விதப்³ப³ம், ஸபா⁴ பன யதி³ ஸப்³பே³ஸம் வஸனத்தா²ய ஸாலாஸதி³ஸா கதா, அந்தராராமே விய யதா²ஸுக²ம் வஸிதும் வட்டதீதி வேதி³தப்³ப³ம். பரிக்கி²த்ததாய ச ஏகூபசாரதம், அபரிக்கி²த்ததாய நானூபசாரதஞ்ச நிவேஸனாதீ³ஸுபி அதிதி³ஸந்தோ ஆஹ ‘‘ஏதேனேவூபாயேனா’’திஆதி³. நிவேஸனாதீ³னி ப³ஹிகா³மதோ ஸன்னிவிட்டா²னி க³ஹிதானி அந்தோகா³மே டி²தானம் கா³மக்³க³ஹணேனேவ க³ஹிதத்தா. ஸப்³ப³த்தா²தி கா³மனிக³மனிவேஸனாதீ³ஸு பன்னரஸஸு. பரிக்கே²பாதீ³தி ஆதி³-ஸத்³தே³ன அபரிக்கே²பஸ்ஸேவ க³ஹணம், ந ஏககுலாதீ³னம்பி தேஸம் ஏகூபசாரதானானூபசாரதானிமித்ததாபா⁴வா. ஏத்த² ச ஸத்த²ஸ்ஸ கதிபாஹம் கத்த²சி நிவிட்ட²ஸ்ஸேவ பரிக்கே²போ ஹோதி, ந க³ச்ச²ந்தஸ்ஸ.

482-7. கா³மதோ ப³ஹி இஸ்ஸரானம் ஸமுத்³த³தீராதீ³ஸு கதப⁴ண்ட³ஸாலா உதோ³ஸிதோதி ஆஹ ‘‘யானாதீ³ன’’ந்திஆதி³. முண்ட³ச்ச²த³னபாஸாதோ³தி நாதிஉச்சோ சந்தி³கங்க³ணயுத்தோ ஸிக²ரகூடமாலாதி³விரஹிதோ பாஸாதோ³.

489. பரியாதி³யித்வாதி அஜ்ஜோ²த்த²ரித்வா. நதீ³பரிஹாரோதி விஸும்கா³மாதீ³னம் விய நதீ³பரிஹாரஸ்ஸ அவுத்தத்தா சீவரஹத்த²பாஸோ ஏவாதி வத³ந்தி, அஞ்ஞே பன ‘‘இமினா அட்ட²கதா²வசனேன நதீ³பரிஹாரோபி விஸும் ஸித்³தோ⁴, நதி³யா ஹத்த²பாஸோ ந விஜஹிதப்³போ³’’தி வத³ந்தி. விஹாரஸீமந்தி அவிப்பவாஸஸீமம் ஸந்தா⁴யாஹ. ஏத்த² ச விஹாரஸ்ஸ நானாகுலஸந்தகபா⁴வேபி அவிப்பவாஸஸீமாபரிச்சே²த³ப்³ப⁴ந்தரே ஸப்³ப³த்த² சீவரஅவிப்பவாஸஸம்ப⁴வதோ தஸ்ஸா பதா⁴னத்தா தத்த² ஸத்த²பரிஹாரோ ந லப்³ப⁴தீதி ‘‘விஹாரம் க³ந்த்வா வஸிதப்³ப³’’ந்தி வுத்தம். ‘‘ஸத்த²ஸமீபே’’தி இத³ம் யதா²வுத்தம் அப்³ப⁴ந்தரபரிச்சே²த³வஸேன வுத்தம். பாளியம் நானாகுலஸ்ஸ ஸத்தோ² ஹோதி, ஸத்தே² சீவரம் நிக்கி²பித்வா ஹத்த²பாஸா ந விஜஹிதப்³ப³ந்தி ஏத்த² ஸத்த²ஹத்த²பாஸோ க³ஹிதோ.

490. ஏககுலஸ்ஸ கே²த்தேதி அபரிக்கி²த்தம் ஸந்தா⁴ய வத³தி.

491-4. விஹாரோ நாம உபசாரஸீமா. தத்த² யஸ்மிம் விஹாரேதி தஸ்ஸ அந்தோபரிவேணாதி³ம் ஸந்தா⁴ய வுத்தம், ஏககுலாதி³ஸந்தகதா சேத்த² காராபகானம் வஸேன. சா²யாய பு²ட்டோ²காஸஸ்ஸாதி உஜுகம் அவக்கி²த்தலேட்³டு³பாதப்³ப⁴ந்தரம் ஸந்தா⁴ய வத³தி.

அக³மனபதே²தி தத³ஹேவ க³ந்த்வா நிவத்தேதும் ந ஸக்குணேய்யகே ஸமுத்³த³மஜ்ஜே² யே தீ³பகா, தேஸூதி யோஜனா. இதரஸ்மிந்தி புரத்தி²மதி³ஸாய சீவரே. ‘‘உபோஸத²காலே…பே… வட்³ட⁴தீ’’தி இமினா சீவரவிப்பவாஸஸத்தப்³ப⁴ந்தரதோ ஸமானஸம்வாஸாய ஸத்தப்³ப⁴ந்தரஸீமாய அச்சந்தவிஸதி³ஸதம் த³ஸ்ஸேதி. ததா² ஹி ப³ஹூஸு பி⁴க்கூ²ஸு ஏகதோ நிஸீதி³த்வா ஸமந்தா ஸத்தப்³ப⁴ந்தரபரிச்சே²தே³ஸு யதா²ஸகம் சீவரம் ட²பேத்வா பரிஹரந்தேஸு ஏகேகஸ்ஸ பி⁴க்கு²னோ நிஸின்னோகாஸதோ பட்டா²ய பச்சேகம் ஸத்தப்³ப⁴ந்தரஸ்ஸ பரிச்சே²தோ³ அஞ்ஞமஞ்ஞவிஸதி³ஸோ அனேகவிதோ⁴ ஹோதி, ந ஏகோ பரிஸபரியந்ததோ பட்டா²ய அனிமிதப்³ப³த்தா. தேனேவ தத்த² பரிஸவஸேன வுட்³டி⁴, ஹானி வா ந ஹோதி, ந ஏவம் ஸத்தப்³ப⁴ந்தரஸீமாய. ஸா ஹி யோஜனிகாயபி பரிஸபரியந்ததோவ பட்டா²ய ஸமந்தா ஸத்தப்³ப⁴ந்தரபஅச்சி²ன்னா ஏகாவ ஹோதி. தேனேவ ஸா பரிஸவஸேன வட்³ட⁴தி, ஹாயதி ச, தஸ்மா அஞ்ஞாவ ஸத்தப்³ப⁴ந்தரஸீமா அஞ்ஞோ ஸத்தப்³ப⁴ந்தரதோ பரிச்சி²ன்னோ சீவரவிப்பவாஸபரிஹாரோ அப்³போ⁴காஸோதி வேதி³தப்³ப³ம். யஞ்சேத்த² வத்தப்³ப³ம், தம் க²ந்த⁴கே ஸீமாகதா²யமேவ (மஹாவ. 143) வக்கா²ம.

495. நதி³ம் ஓதரதீதி ஹத்த²பாஸம் முஞ்சித்வா ஓதரதி. ப³ஹிகா³மே ட²பேத்வாதி அபாருபிதப்³ப³தாய வுத்தம். வினயகம்மம் காதப்³ப³ந்தி உத்தராஸங்கே³ ச ப³ஹிகா³மே ட²பிதஸங்கா⁴டியஞ்ச பட²மம் வினயகம்மம் கத்வா பச்சா² உத்தராஸங்க³ம் நிவாஸேத்வா அந்தரவாஸகே காதப்³ப³ம். ஏத்த² ச ப³ஹிகா³மே ட²பிதஸ்ஸாபி வினயகம்மவசனதோ பரம்முகா²பி டி²தம் விஸ்ஸஜ்ஜிதும், நிஸ்ஸட்ட²ம் தா³துஞ்ச வட்டதீதி வேதி³தப்³ப³ம். த³ஹரானம் க³மனே ஸஉஸ்ஸாஹத்தா ‘‘நிஸ்ஸயோ பன ந படிப்பஸ்ஸம்ப⁴தீ’’தி வுத்தம். முஹுத்தம்…பே… படிப்பஸ்ஸம்ப⁴தீதி ஸஉஸ்ஸாஹத்தே க³மனஸ்ஸ உபச்சி²ன்னத்தா வுத்தம். தேஸம் பன புராருணாவ உட்ட²ஹித்வா ஸஉஸ்ஸாஹேன க³ச்ச²ந்தானம் அருணே அந்தரா உட்டி²தேபி ந படிப்பஸ்ஸம்ப⁴தி ‘‘யாவ அருணுக்³க³மனா ஸயந்தீ’’தி வுத்தத்தா. தேனேவ ‘‘கா³மம் பவிஸித்வா…பே… ந படிப்பஸ்ஸம்ப⁴தீ’’தி வுத்தம். அஞ்ஞமஞ்ஞஸ்ஸ வசனம் அக்³க³ஹேத்வாதிஆதி³ம்ஹி ஸஉஸ்ஸாஹத்தா க³மனக்க²ணே படிப்பஸ்ஸத்³தி⁴ ந வுத்தா. தே⁴னுப⁴யேனாதி தருணவச்ச²கா³வீனம் அபி⁴தா⁴வித்வா ஸிங்கே³ன பஹரணப⁴யேன. நிஸ்ஸயோ ச படிப்பஸ்ஸம்ப⁴தீதி ஏத்த² தே⁴னுப⁴யாதீ³ஹி டி²தானம் யாவ ப⁴யவூபஸமா டா²தப்³ப³தோ ‘‘அந்தோஅருணேயேவ க³மிஸ்ஸாமீ’’தி நியமேதும் அஸக்குணேய்யத்தா வுத்தம். யத்த² பன ஏவம் நியமேதும் ஸக்கா, தத்த² அந்தராருணே உக்³க³தேபி நிஸ்ஸயோ ந படிப்பஸ்ஸம்ப⁴தி பே⁴ஸஜ்ஜத்தா²ய கா³மப்பவிட்ட²த³ஹரானம் விய. அந்தோஸீமாயம் கா³மந்தி அவிப்பவாஸஸீமாஸம்முதிதோ பச்சா² பதிட்டா²பிதகா³மம் ஸந்தா⁴ய வத³தி கா³மஞ்ச கா³மூபசாரஞ்ச ட²பேத்வா ஸம்மன்னிதப்³ப³தோ. பவிட்டா²னந்தி ஆசரியந்தேவாஸிகானம் விஸும் விஸும் க³தானம் அவிப்பவாஸஸீமத்தா நேவ சீவரானி நிஸ்ஸக்³கி³யானி ஹோந்தி, ஸஉஸ்ஸாஹதாய நிஸ்ஸயோ ந படிப்பஸ்ஸம்ப⁴தி. அந்தராமக்³கே³தி த⁴ம்மம் ஸுத்வா ஆக³ச்ச²ந்தானம் அந்தராமக்³கே³.

‘‘இத⁴ அபச்சுத்³த⁴ரண’’ந்தி இமினா அதி⁴ட்டா²னவிகப்பனானி விய பச்சுத்³த⁴ரணம்பி காயேன வா வாசாய வா கத்தப்³ப³ந்தி த³ஸ்ஸேதி. காயவாசாஹி கத்தப்³ப³ஸ்ஸ அகரணதோதி இத³ம் காயவாசாஸமுட்டா²னம் வுத்தம். அதி⁴ட்டி²ததிசீவரதா, அனத்த²தகதி²னதா, அலத்³த⁴ஸம்முதிதா, ரத்திவிப்பவாஸோதி இமானேத்த² சத்தாரி அங்கா³னி.

உதோ³ஸிதஸிக்கா²பத³வண்ணனா நிட்டி²தா.

3. ததியகதி²னஸிக்கா²பத³வண்ணனா

497. ததியே பாளியம் சீவரபச்சாஸா நிக்கி²பிதுந்தி சீவரபச்சாஸாய ஸதியா நிக்கி²பிதுந்தி அத்தோ². நிட்டி²தசீவரஸ்மிம் பி⁴க்கு²னாதி ஏத்த² து³தியகதி²னே விய ஸாமிவஸேனேவ கரணவசனஸ்ஸ அத்தோ² வேதி³தப்³போ³.

499-500. துய்ஹம் த³ம்மீதி தி³ன்னந்தி ‘‘துய்ஹம், ப⁴ந்தே, அகாலசீவரம் த³ம்மீ’’தி ஏவம் தி³ன்னம், ஏதம்பி காலே ஆதி³ஸ்ஸ தி³ன்னம் நாம ஹோதீதி அதி⁴ப்பாயோ. இத³ம் பன அட்ட²கதா²வசனம், பாளியம் ‘‘காலேபி ஆதி³ஸ்ஸ தி³ன்ன’’ந்தி இத³ஞ்ச ‘‘அகாலசீவர’’ந்தி வசனஸாமஞ்ஞதோ லப்³ப⁴மானம் ஸப்³ப³ம்பி த³ஸ்ஸேதும் அத்து²த்³தா⁴ரவஸேன வுத்தம் பட²மஅனியதே ஸோதஸ்ஸ ரஹோ விய. ஸங்க⁴ஸ்ஸ ஹி காலேபி ஆதி³ஸ்ஸ தி³ன்னம் அகாலே உப்பன்னசீவரம் விய ஸம்முகீ²பூ⁴தேஹி வுத்த²வஸ்ஸேஹி, அவுத்த²வஸ்ஸேஹி ச ஸப்³பே³ஹிபி பா⁴ஜேதப்³ப³தாஸாமஞ்ஞேன அகாலசீவரம் நாம ஹோதீதி த³ஸ்ஸனத்த²ம் அத்து²த்³தா⁴ரவஸேன பாளியம் ‘‘காலேபி ஆதி³ஸ்ஸ தி³ன்ன’’ந்தி வுத்தம், ந பன ‘‘ததோ பா⁴ஜேத்வா லத்³த⁴சீவரம்பி அகாலே லத்³த⁴சீவரம்பி வுத்த²வஸ்ஸானம் ஏகமாஸபரிஹாரம், பஞ்சமாஸபரிஹாரம் வா ந லப⁴தி, பச்சாஸாசீவரே அஸதி த³ஸாஹபரிஹாரமேவ லப⁴தீ’’தி த³ஸ்ஸனத்த²ம் வுத்தம், அட்ட²கதா²யம்பி ‘‘ஆதி³ஸ்ஸ தி³ன்ன’’ந்தி வசனஸாமஞ்ஞதோ லப்³ப⁴மானம் ஸப்³ப³ம் அத்து²த்³தா⁴ரவஸேன த³ஸ்ஸேதும் ‘‘ஏகபுக்³க³லஸ்ஸ வா இத³ம் துய்ஹம் த³ம்மீதி தி³ன்ன’’ந்தி வுத்தம், ந பன ததா²லத்³த⁴ம் வா அகாலே லத்³த⁴ம் வா அனத்த²தகதி²னானம் த³ஸாஹப்³ப⁴ந்தரே அதி⁴ட்டா²தப்³ப³ந்தி த³ஸ்ஸேதுந்தி வேதி³தப்³ப³ம் இதரதா² பாளிஅட்ட²கதா²ஹி விருஜ்ஜ²னதோ. ததா² ஹி அச்சேகசீவரஸிக்கா²பதே³ அகாலே உப்பன்னம்பி அச்சேகசீவரம் ‘‘யாவசீவரகாலஸமயம் நிக்கி²பிதப்³ப³’’ந்தி (பாரா. 648) வுத்தம், தஸ்ஸ அட்ட²கதா²யஞ்ச ‘‘பவாரணமாஸஸ்ஸ ஜுண்ஹபக்க²பஞ்சமியம் உப்பன்னஸ்ஸ அச்சேகசீவரஸ்ஸ அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா ச பரிஹாரோ வுத்தோ, தமேவ பரிஹாரம் ஸந்தா⁴ய ‘ச²ட்டி²தோ பட்டா²ய பன உப்பன்னம் அனச்சேகசீவரம்பி பச்சுத்³த⁴ரித்வா ட²பிதசீவரம்பி ஏதம் பரிஹாரம் லப⁴தியேவா’தி (பாரா. அட்ட². 2.646-649) வுத்தம். தஸ்மா காலேபி அகாலேபி ச யதா²ததா² லத்³த⁴ம் அதிரேகசீவரம் வுத்த²வஸ்ஸானம் ஏகமாஸம், பஞ்சமாஸம் வா யதா²ரஹம் பரிஹாரம் லப⁴தி ஏவாதி க³ஹேதப்³ப³ம்.

ஏவம் பன அவத்வா பத³பா⁴ஜனம் வுத்தந்தி ஸம்ப³ந்தோ⁴. தத்த² ஏவந்தி யம் அட்ட²கதா²யம் ‘‘ததோ சே உத்தரீ’’தி இமஸ்ஸ மாஸபரமதோ உத்தரீதி அத்தோ² வுத்தோ, தம் பராமஸதி. பத³பா⁴ஜனியம் ஏவமத்த²ம் அவத்வா அஞ்ஞதா² அத்தோ² வுத்தோதி அதி⁴ப்பாயோ. தாவ உப்பன்னம் பச்சாஸாசீவரந்தி பச்சத்தவசனம். ‘‘மூலசீவர’’ந்தி இத³ம் உபயோக³வசனம். அத்தனோ க³திகம் கரோதீதி அனந்தரா து³தியதி³வஸாதீ³ஸு உப்பன்னம் பச்சாஸாசீவரம் மாஸபரமம் மூலசீவரம் ட²பேதும் அத³த்வா அத்தனோ த³ஸாஹபரமதாய ஏவ பதிட்டா²பேதீதி அத்தனோ க³திகம் கரோதீதி. ததோ உத்³த⁴ம் மூலசீவரந்தி ஏத்த² பன மூலசீவரந்தி பச்சத்தவசனம். தஞ்ஹி வீஸதிமதி³வஸதோ உத்³த⁴ம் த்³வாவீஸதிமதி³வஸாதீ³ஸு உப்பன்னம் பச்சாஸாசீவரம் அத்தனா ஸத்³தி⁴ம் ஏகதோ ஸிப்³பே³த்வா க⁴டிதம் த³ஸாஹபரமம் க³ந்தும் அத³த்வா நவாஹபரமதாதி³வஸேன அத்தனோ க³திகம் கரோதி, ஏகதோ அஸிப்³பே³த்வா விஸும் ட²பிதம் பன பச்சாஸாசீவரம் த³ஸாஹபரமமேவ.

பாளியம் த³ஸாஹாதி த³ஸாஹேன. ஏகாத³ஸே உப்பன்னேதிஆதீ³ஸு ஏகாத³ஸாஹே உப்பன்னேதிஆதி³னா அத்தோ², அயமேவ வா பாடோ² க³ஹேதப்³போ³. ஏகவீஸே உப்பன்னே…பே… நவாஹா காரேதப்³ப³ந்திஆதி³ பச்சாஸாசீவரஸ்ஸ உப்பன்னதி³வஸம் ட²பேத்வா வுத்தம். தேனேவ ‘‘திம்ஸே…பே… தத³ஹேவ அதி⁴ட்டா²தப்³ப³’’ந்தி வுத்தம். ‘‘அஞ்ஞம் பச்சாஸாசீவரம்…பே… காரேதப்³ப³’’ந்தி இத³ம் ஸதியா ஏவ பச்சாஸாய வுத்தம். ஸசே பன ‘‘இதோ பட்டா²ய சீவரம் ந லபி⁴ஸ்ஸாமீ’’தி இச்சி²தட்டா²னதோ பச்சாஸாய உபச்சி²ன்னாய அஞ்ஞத்தா²பி யேன கேனசி உபாயேன பச்சாஸம் உப்பாதே³தி, மூலசீவரம் ந அதி⁴ட்டா²தப்³ப³ம், ஸப்³ப³தா² பச்சாஸாய உபச்சி²ன்னாய த³ஸாஹாதிக்கந்தம் மூலசீவரம் தத³ஹேவ அதி⁴ட்டா²தப்³ப³ம். பச்சாஸாசீவரம்பி பரிக்கா²ரசோளம் அதி⁴ட்டா²தப்³ப³ந்தி பட²மதரம் உப்பன்னம் விஸபா⁴க³ம் ஸந்தா⁴ய வத³தி. அஞ்ஞமஞ்ஞந்தி அஞ்ஞம் அஞ்ஞம், அயமேவ வா பாடோ². அங்க³ம் பனேத்த² பட²மகதி²னே வுத்தஸதி³ஸமேவ. கேவலஞ்ஹி தத்த² த³ஸாஹாதிக்கமோ, இத⁴ மாஸாதிக்கமோதி அயம் விஸேஸோ.

ததியகதி²னஸிக்கா²பத³வண்ணனா நிட்டி²தா.

4. புராணசீவரஸிக்கா²பத³வண்ணனா

503-5. சதுத்தே² பாளியம் ப⁴த்தவிஸ்ஸக்³க³ந்தி ப⁴த்தஸ்ஸ உத³ரே விஸ்ஸஜ்ஜனம், பவேஸனம் அஜ்ஜோ²ஹரணம் ப⁴த்தகிச்சந்தி அத்தோ², போ⁴ஜனபரியோஸானேன ப⁴த்தஸ்ஸ விஸ்ஸஜ்ஜனந்திபி வத³ந்தி. தத்த² நாம த்வந்தி ஸோ நாம த்வம், தாய நாம த்வந்தி வா அத்தோ². பிதா ச மாதா ச பிதரோ, பிதூனம் பிதா ச மாதா ச பிதாமஹா, தே ஏவ யுக³ளட்டே²ன யுகோ³, தஸ்மா யாவ ஸத்தமா பிதாமஹயுகா³ பிதாமஹாவட்டாதி ஏவமேத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேன மாதாமஹோ ச பிதாமஹீ மாதாமஹீ ச க³ஹிதாவ ஹோந்தி. ஸத்தமயுக³தோ பரம் ‘‘அஞ்ஞாதகா’’தி வேதி³தப்³ப³ம். யாதி பி⁴க்கு²னீ. பிது மாதா பிதாமஹீ, மாது பிதா மாதாமஹோ.

பயோகே³ பயோகே³ பி⁴க்கு²ஸ்ஸ து³க்கடந்தி ‘‘தோ⁴வா’’தி ஆணாபனவாசாய ஏகாய ஏவ தத³னுகு³ணஸ்ஸ ஸப்³ப³ஸ்ஸாபி பயோக³ஸ்ஸ ஆணத்தத்தா வுத்தம்.

506. தத³வினாபா⁴வதோ தோ⁴வனஸ்ஸ ‘‘காயவிகாரம் கத்வா’’தி ச ‘‘அந்தோத்³வாத³ஸஹத்தே²’’தி ச வுத்தத்தா காயேன தோ⁴வாபேதுகாமதம் அப்பகாஸேத்வா தா³னகி²பனபேஸனாதி³ம் கரோந்தஸ்ஸ ச த்³வாத³ஸஹத்த²ம் உபசாரம் முஞ்சித்வா ப³ஹி ட²த்வா காயவாசாஹி ஆணாபேத்வா கி²பனபேஸனாதி³ம் கரோந்தஸ்ஸ ச அனாபத்தி ஏவ.

ஏகேன வத்து²னாதி பட²மகதேன. பஞ்சஸதானி பமாணம் ஏதாஸந்தி பஞ்சஸதா. பி⁴க்கு²பா⁴வதோ பரிவத்தலிங்கா³பி பி⁴க்கு²னீ பி⁴க்கூ²னம் ஸந்திகே ஏகதோஉபஸம்பன்னா ஏவ.

507. தாவகாலிகம் க³ஹேத்வாதி அத்தனா கதிபாஹம் பாருபனாதி³அத்தா²ய தாவகாலிகம் யாசித்வா. புராணசீவரதா, உபசாரே ட²த்வா அஞ்ஞாதிகாய பி⁴க்கு²னியா ஆணாபனம், தஸ்ஸா தோ⁴வாபனாதீ³னி சாதி இமானேத்த² தீணி அங்கா³னி.

புராணசீவரஸிக்கா²பத³வண்ணனா நிட்டி²தா.

5. சீவரபடிக்³க³ஹணஸிக்கா²பத³வண்ணனா

508. பஞ்சமே அபஞ்ஞத்தே ஸிக்கா²பதே³தி க³ணம்ஹா ஓஹீயனஸிக்கா²பதே³ (பாசி. 691-692) அபஞ்ஞத்தே. கோட்டா²ஸஸம்பத்தீதி கேஸாதி³பஞ்சகோட்டா²ஸானம் கல்யாணதா. ஹத்த²தலேயேவ த³ஸ்ஸேத்வாதி ஹத்த²தலதோ ஸேஸகாயஸ்ஸ அத³ஸ்ஸனம் தீ³பேதி.

510. விஹத்த²தாயாதி விஹததாய, அமிஸ்ஸிததாய அபடிஸரணதாயாதி அத்தோ². தேனாஹ ‘‘ஸமபி⁴துன்னத்தா’’தி, ப்³யதி⁴தத்தாதி அத்தோ². பரிவத்தேதப்³ப³ம் பரிவத்தம், ததே³வ பாரிவத்தகம், பரிவத்தேத்வா தி³ய்யமானந்தி அத்தோ².

புரிமஸிக்கா²பதே³ விய இத⁴ த்³வாத³ஸஹத்தோ² உபசாரனியமோ நத்தீ²தி ஆஹ ‘‘உபசாரம் முஞ்சித்வா’’தி. அஞ்ஞத்ர பாரிவத்தகாதி யம் அந்தமஸோ ஹரீடகக²ண்ட³ம்பி த³த்வா வா ‘‘த³ஸ்ஸாமீ’’தி ஆபோ⁴க³ம் கத்வா வா பரிவத்தகம் க³ண்ஹாதி, தம் ட²பேத்வா. ‘‘தம் அசித்தகபா⁴வேன ந ஸமேதீ’’தி இமினா ஞாதிபா⁴வாஜானனாதீ³ஸு விய பி⁴க்கு²னீபா⁴வாஜானனாதி³வஸேனாபி அசித்தகதம் பகாஸேதி.

513-4. திகஞ்ச தம் பாசித்தியஞ்சாதி திகபாசித்தியம், பாசித்தியதிகந்தி அத்தோ². பத்தத்த²விகாதீ³தி அனதி⁴ட்டா²னுபக³ம் ஸந்தா⁴ய வத³தி. கோ பன வாதோ³ பத்தத்த²விகாதீ³ஸூதி மஹதியாபி தாவ பி⁴ஸிச்ச²வியா அனதி⁴ட்டா²னுபக³த்தா அனாபத்தி, விகப்பனுபக³பச்சி²மப்பமாணவிரஹிததாய அனதி⁴ட்டா²தப்³பே³ஸு கிமேவ வத்தப்³ப³ந்தி த³ஸ்ஸேதி. பத்தத்த²விகாதீ³னி பன விகப்பனுபக³பச்சி²மானி க³ண்ஹிதும் ந வட்டதி ஏவ. படிக்³க³ஹணம் கிரியா, அபரிவத்தனம் அகிரியா. விகப்பனுபக³சீவரதா, பாரிவத்தகாபா⁴வோ, அஞ்ஞாதிகாய ஹத்த²தோ க³ஹணந்தி இமானேத்த² தீணி அங்கா³னி.

சீவரபடிக்³க³ஹணஸிக்கா²பத³வண்ணனா நிட்டி²தா.

6. அஞ்ஞாதகவிஞ்ஞத்திஸிக்கா²பத³வண்ணனா

515. ச²ட்டே² படு ஏவ பட்டோ. பாளியம் த⁴ம்மனிமந்தனாதி ஸமணேஸு வத்தப்³பா³சாரத⁴ம்மமத்தவஸேன நிமந்தனா, தா³துகாமதாய கதனிமந்தனா ந ஹோதீதி அத்தோ². தேனேவ ‘‘விஞ்ஞாபேஸ்ஸதீ’’தி வுத்தம். அஞ்ஞாதகஅப்பவாரிததோ ஹி விஞ்ஞத்தி நாம ஹோதி.

517. ‘‘திணேன வா பண்ணேன வா படிச்சா²தே³த்வா ஆக³ந்தப்³ப³’’ந்தி இமினா பூ⁴தகா³மவிகோபனம் அனுஞ்ஞாதந்தி ஆஹ ‘‘நேவ பூ⁴தகா³மபாதப்³யதாயா’’திஆதி³. பட²மம் ஸுத்³த⁴சித்தேன லிங்க³ம் க³ஹேத்வா பச்சா² லத்³தி⁴ம் க³ண்ஹந்தோபி தித்தி²யபக்கந்தகோ ஏவாதி ஆஹ ‘‘நிவாஸேத்வாபி லத்³தி⁴ ந க³ஹேதப்³பா³’’தி.

யம் ஆவாஸம் பட²மம் உபக³ச்ச²தீதி ஏத்தா²பி விஹாரசீவராதி³அத்தா²ய பவிஸந்தேனபி திணாதீ³ஹி படிச்சா²தே³த்வாவ க³ந்தப்³ப³ம், ந த்வேவ நக்³கே³ன ஆக³ந்தப்³ப³ந்தி ஸாமஞ்ஞதோ து³க்கடஸ்ஸ வுத்தத்தா. சிமிலிகாஹீதி படபிலோதிகாஹி. பரிபோ⁴கே³னேவாதி அஞ்ஞம் சீவரம் அலபி⁴த்வா பரிபு⁴ஞ்ஜனேன. பரிபோ⁴க³ஜிண்ணந்தி யதா² தம் சீவரம் பரிபு⁴ஞ்ஜியமானம் ஓப⁴க்³க³விப⁴க்³க³தாய அஸாருப்பம் ஹோதி, ஏவம் ஜிண்ணம்.

521. அஞ்ஞஸ்ஸத்தா²யாதி ஏத்தா²பி ‘‘ஞாதகானம் பவாரிதான’’ந்தி இத³ம் அனுவத்ததி ஏவாதி ஆஹ ‘‘அத்தனோ ஞாதகபவாரிதே’’திஆதி³. இத⁴ பன அஞ்ஞஸ்ஸ அச்சி²ன்னனட்ட²சீவரஸ்ஸ அத்தா²ய அஞ்ஞாதகஅப்பவாரிதே விஞ்ஞாபேந்தஸ்ஸ நிஸ்ஸக்³கி³யேன அனாபத்தீதி அத்தோ² க³ஹேதப்³போ³, இதரதா² ‘‘ஞாதகானம் பவாரிதான’’ந்தி இமினா விஸேஸோ ந ப⁴வேய்ய. தேனேவ அனந்தரஸிக்கா²பதே³ வக்க²தி ‘‘அட்ட²கதா²ஸு பன ஞாதகபரிவாதட்டா²னே…பே… பமாணமேவ வட்டதீதி வுத்தம், தம் பாளியா ந ஸமேதீ’’தி (பாரா. அட்ட². 2.526) ச ‘‘யஸ்மா பனித³ம் ஸிக்கா²பத³ம் அஞ்ஞஸ்ஸத்தா²ய விஞ்ஞாபனவத்து²ஸ்மிம்யேவ பஞ்ஞத்தம், தஸ்மா இத⁴ ‘அஞ்ஞஸ்ஸத்தா²யா’தி ந வுத்த’’ந்தி (பாரா. அட்ட². 2.526) ச. விகப்பனுபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய படிலாபோ⁴தி இமானேத்த² சத்தாரி அங்கா³னி.

அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.

7. ததுத்தரிஸிக்கா²பத³வண்ணனா

522-524. ஸத்தமே பாளியம் பக்³கா³ஹிகஸாலந்தி து³ஸ்ஸாபணம். தஞ்ஹி வாணிஜகேஹி து³ஸ்ஸானி பக்³க³ஹேத்வா த³ஸ்ஸனட்டா²னதாய ‘‘பக்³கா³ஹிகஸாலா’’தி வுச்சதி. அஸ்ஸ சீவரஸ்ஸாதி ஸாதி³தப்³ப³சீவரஸ்ஸ. ‘‘திசீவரிகேனா’’தி இமினா அச்சி²ன்னதிசீவரதோ அஞ்ஞஸ்ஸ விஹாராதீ³ஸு நிஹிதஸ்ஸ சீவரஸ்ஸ அபா⁴வம் த³ஸ்ஸேதி. யதி³ ப⁴வேய்ய, விஞ்ஞாபேதும் ந வட்டேய்ய. தாவகாலிகம் நிவாஸேத்வா அத்தனோ சீவரம் கா³ஹேதப்³ப³ம், தாவகாலிகம்பி அலப⁴ந்தஸ்ஸ பூ⁴தகா³மவிகோபனம் கத்வா திணபண்ணேஹி ச²த³னம் விய விஞ்ஞாபனம்பி வட்டதி ஏவ. அஞ்ஞேனாதி அச்சி²ன்னஅஸப்³ப³சீவரேன. த்³வே நட்டா²னீதி அதி⁴காரதோ வுத்தம் ‘‘த்³வே ஸாதி³தப்³பா³னீ’’தி.

526. பாளியா ந ஸமேதீதி ‘‘அனாபத்தி ஞாதகானம் பவாரிதான’’ந்தி இமாய பாளியா ந ஸமேதி ததுத்தரிவிஞ்ஞாபனஆபத்திப்பஸங்கே³ ஏவ வுத்தத்தா. ‘‘அஞ்ஞஸ்ஸத்தா²யாதி ந வுத்த’’ந்தி இத³ம் அஞ்ஞஸ்ஸத்தா²ய ததுத்தரி விஞ்ஞாபனே நிஸ்ஸக்³கி³யம் பாசித்தியம் ஹோதீதி இமமத்த²ம் தீ³பேதி, தஞ்ச பாசித்தியம் யேஸம் அத்தா²ய விஞ்ஞாபேதி, தேஸம் வா ஸியா, விஞ்ஞாபகஸ்ஸேவ வா, ந தாவ தேஸம் தேஹி அவிஞ்ஞாபிதத்தா, நாபி விஞ்ஞாபகஸ்ஸ அத்தானம் உத்³தி³ஸ்ஸ அவிஞ்ஞாபிதத்தா. தஸ்மா அஞ்ஞஸ்ஸத்தா²ய விஞ்ஞாபேந்தஸ்ஸாபி நிஸ்ஸக்³கி³யம் பாசித்தியம் ந தி³ஸ்ஸதி. பாளியம் பன இமஸ்ஸ ஸிக்கா²பத³ஸ்ஸ அத்தனோ ஸாதி³யனபடிப³த்³த⁴தாவஸேன பவத்தத்தா ‘‘அஞ்ஞஸ்ஸத்தா²யா’’தி அனாபத்திவாரே ந வுத்தந்தி வத³ந்தி, தஞ்ச யுத்தம் விய தி³ஸ்ஸதி, வீமம்ஸித்வா க³ஹேதப்³ப³ம். ததுத்தரிசீவரதா, அச்சி²ன்னாதி³காரணதா, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி.

ததுத்தரிஸிக்கா²பத³வண்ணனா நிட்டி²தா.

8. பட²மஉபக்க²டஸிக்கா²பத³வண்ணனா

528-531. அட்ட²மே யோ கத்தாதி தா³யகம் ஸந்தா⁴ய வுத்தம். படோ ஏவ படகோ. ‘‘அப்பக்³க⁴ம் சேதாபேதீ’’தி இத³ம் நிஸ்ஸக்³கி³யபாசித்தியா அனாபத்திம் ஸந்தா⁴ய வுத்தம், விஞ்ஞத்திபச்சயா பன து³க்கடமேவ. ‘‘புப்³பே³ அப்பவாரிதோ’’தி ஹி ஸுத்தே விஞ்ஞத்திகாரணம் வுத்தம். மாதிகாட்ட²கதா²யம்பி ‘‘சீவரே பி⁴ய்யோகம்யதா, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² தீணி அங்கா³னீ’’தி (கங்கா². அட்ட². உபக்க²டஸிக்கா²பத³) அஞ்ஞாதகவிஞ்ஞத்திதா பகாஸிதா, கேசி பன ‘‘தா³யகேன தா³துகாமோம்ஹீதி அத்தனோ ஸந்திகே அவுத்தேபி யத³க்³க⁴னகம் ஸோ தா³துகாமோ, தத³க்³க⁴னகம் ஆஹராபேதும் வட்டதி ஏவா’’தி வத³ந்தி, தம் ராஜஸிக்கா²பத³ட்ட²கதா²யபி ந ஸமேதி, தூ³தேன வா தா³யகேன வா ‘‘ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴த’’ந்தி ஆரோசிதேபி முக²வேவடியகப்பியகாரகாதீ³னம் ஸந்திகா ஆஹராபனஸ்ஸ தத்த² படிக்கி²த்தத்தா. வுத்தஞ்ஹி தத்த² ‘‘இமே த்³வே அனித்³தி³ட்ட²கப்பியகாரகா நாம, ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ம்…பே… ந கிஞ்சி வத்தப்³பா³. தே³ஸனாமத்தமேவ சேதம் ‘தூ³தேன சீவரசேதாபன்னம் பஹிணேய்யா’தி ஸயம் ஆஹரித்வாபி பிண்ட³பாதாதீ³னம் அத்தா²ய த³த³ந்தேஸுபி ஏஸேவ நயோ’’தி. முக²வேவடியகப்பியகாரகாத³யோ ஹி தா³யகேன பரிச்சத்தேபி வத்து²ம்ஹி ‘‘அஸுகஸ்ஸ ஸந்திகே சீவரபிண்ட³பாதாதி³ம் க³ண்ஹதா²’’தி அனித்³தி³ட்ட²த்தா ஏவ ‘‘ந கிஞ்சி வத்தப்³பா³’’தி வுத்தம், ந பன தஸ்ஸ வத்து²னோ முக²வேவடியாதீ³னம் ஸந்தகத்தா, தஸ்மா இதா⁴பி தா³யகேன வா தூ³தேன வா ‘‘யம் இச்ச²த², தம் வத³தா²’’தி அப்பவாரிதஸ்ஸ வத³தோ து³க்கடமேவ. அக்³க⁴வட்³ட⁴னகந்தி சீவரே அக்³க⁴வட்³ட⁴னகம் நிஸ்ஸாய பவத்தம் இத³ம் ஸிக்கா²பத³ம், ந பிண்ட³பாதாதீ³ஸு தேஸு அக்³க⁴வட்³ட⁴னஸ்ஸ து³க்கடமத்தத்தா, பணீதபிண்ட³பாதே ஸுத்³தி⁴கபாசித்தியத்தா சாதி க³ஹேதப்³ப³ம். தேனேவ ‘‘சீவரே பி⁴ய்யோகம்யதா’’தி அங்க³ம் வுத்தம்.

பட²மஉபக்க²டஸிக்கா²பத³வண்ணனா நிட்டி²தா.

9. து³தியஉபக்க²டஸிக்கா²பத³வண்ணனா

533. நவமே பாளியம் பச்சேகசீவரசேதாபன்னாதி பச்சேகம் நியமேத்வா சீவரசேதாபன்னா, ஏகேகேன விஸும் விஸும் நியமிதா சீவரசேதாபன்னாதி அத்தோ². உபோ⁴வ ஸந்தா ஏகேனாதி உபோ⁴ ஏகதோவ ஸந்தா, உபோ⁴ ஏகதோ ஹுத்வாதி அத்தோ².

து³தியஉபக்க²டஸிக்கா²பத³வண்ணனா நிட்டி²தா.

10. ராஜஸிக்கா²பத³வண்ணனா

537. த³ஸமே ‘‘அஜ்ஜண்ஹோ’’தி ‘‘அஜ்ஜ நோ’’தி வத்தப்³பே³ ஹ-காராக³மம், ந-காரஸ்ஸ ச ண-காரம் கத்வா வுத்தோதி ஆஹ ‘‘அஜ்ஜ ஏகதி³வஸம் அம்ஹாக’’ந்தி.

538-9. யம் வுத்தம் மாதிகாட்ட²கதா²யம் (கங்கா². அட்ட². ராஜஸிக்கா²பத³வண்ணனா) ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீதி இத³ம் ஆக³மனஸுத்³தி⁴ம் த³ஸ்ஸேதும் வுத்தம், ஸசே ஹி ‘இத³ம் இத்த²ன்னாமஸ்ஸ பி⁴க்கு²னோ தே³ஹீ’தி பேஸேய்ய, ஆக³மனஸ்ஸ அஸுத்³த⁴த்தா அகப்பியவத்து²ம் ஆரப்³ப⁴ பி⁴க்கு²னா கப்பியகாரகோபி நித்³தி³ஸிதப்³போ³ ந ப⁴வேய்யா’’தி, தம் நிஸ்ஸக்³கி³யவத்து²து³க்கடவத்து²பூ⁴தம் அகப்பியசீவரசேதாபன்னம் ‘‘அஸுகஸ்ஸ பி⁴க்கு²னோ தே³ஹீ’’தி ஏவம் ஆக³மனஸுத்³தி⁴யா அஸதி, ஸிக்கா²பதே³ ஆக³தனயேன தூ³தவசனே ச அஸுத்³தே⁴ ஸப்³ப³தா² படிக்கே²போ ஏவ காதும் வட்டதி, ந பன ‘‘சீவரஞ்ச கோ² மயம் படிக்³க³ண்ஹாமா’’தி வத்தும், தத³னுஸாரேன ந வேய்யாவச்சகரஞ்ச நித்³தி³ஸிதும் ஆக³மனதூ³தவசனானம் உபி⁴ன்னம் அஸுத்³த⁴த்தா. பாளியம் ஆக³தனயேன பன ஆக³மனஸுத்³தி⁴யா ஸதி தூ³தவசனே அஸுத்³தே⁴பி ஸிக்கா²பதே³ ஆக³தனயேன ஸப்³ப³ம் காதும் வட்டதீதி த³ஸ்ஸனத்த²ம் வுத்தம். தேன ச யதா² தூ³தவசனாஸுத்³தி⁴யம்பி ஆக³மனே ஸுத்³தே⁴ வேய்யாவச்சகரம்பி நித்³தி³ஸிதும் வட்டதி, ஏவம் ஆக³மனாஸுத்³தி⁴யம்பி தூ³தவசனே ஸுத்³தே⁴ வட்டதி ஏவாதி அயமத்தோ² அத்த²தோ ஸித்³தோ⁴வ ஹோதி, உப⁴யஸுத்³தி⁴யம் வத்தப்³ப³மேவ நத்தீ²தி உப⁴யாஸுத்³தி⁴பக்க²மேவ ஸந்தா⁴ய மாதிகாட்ட²கதா²யம் (கங்கா². அட்ட². ராஜஸிக்கா²பத³வண்ணனா) ‘‘கப்பியகாரகோபி நித்³தி³ஸிதப்³போ³ ந ப⁴வேய்யா’’தி வுத்தந்தி வேதி³தப்³ப³ம்.

யம் பனேத்த² ஸாரத்த²தீ³பனியம் (ஸாரத்த². டீ. 2.537-539) ‘‘ஆக³மனஸ்ஸ ஸுத்³தி⁴யா வா அஸுத்³தி⁴யா வா விஸேஸப்பயோஜனம் ந தி³ஸ்ஸதீ’’திஆதி³ வுத்தம், தம் மாதிகாட்ட²கதா²வசனஸ்ஸ அதி⁴ப்பாயம் அஸல்லக்கே²த்வா வுத்தம் யதா²வுத்தனயேன ஆக³மனஸுத்³தி⁴ஆதி³னா ஸப்பயோஜனத்தா. யோ பனேத்த² ‘‘மூலஸாமிகேன கப்பியவோஹாரவஸேன, பேஸிதஸ்ஸ தூ³தஸ்ஸ அகப்பியவோஹாரவஸேன ச வத³தோபி கப்பியகாரகோ நித்³தி³ஸிதப்³போ³ ப⁴வேய்யா’’தி அனிட்ட²ப்பஸங்கோ³ வுத்தோ, ஸோ அனிட்ட²ப்பஸங்கோ³ ஏவ ந ஹோதி அபி⁴மதத்தா. ததா² ஹி ஸிக்கா²பதே³ ஏவ ‘‘படிக்³க³ண்ஹாது ஆயஸ்மா சீவரசேதாபன்ன’’ந்தி அகப்பியவோஹாரேன வத³தோ தூ³தஸ்ஸ கப்பியேன கம்மேன வேய்யாவச்சகரோ நித்³தி³ஸிதப்³போ³ வுத்தோ ஆக³மனஸ்ஸ ஸுத்³த⁴த்தா, ஆக³மனஸ்ஸாபி அஸுத்³தி⁴யம் பன கப்பியேனாபி கம்மேன வேய்யாவச்சகரோ ந நித்³தி³ஸிதப்³போ³தி அத்தே²வ ஆக³மனஸ்ஸ ஸுத்³தி⁴அஸுத்³தீ⁴ஸு பயோஜனம். கத²ம் பன தூ³தவசனேன ஆக³மனஸுத்³தி⁴ விஞ்ஞாயதீதி? நாயம் பா⁴ரோ. தூ³தேன ஹி அகப்பியவோஹாரேனேவ வுத்தே ஏவ ஆக³மனஸுத்³தி⁴ க³வேஸிதப்³பா³, ந இதரதா², தத்த² ச தஸ்ஸ வசனக்கமேன புச்சி²த்வா ச யுத்திஆதீ³ஹி ச ஸக்கா விஞ்ஞாதும். இதா⁴பி ஹி ஸிக்கா²பதே³ ‘‘சீவரசேதாபன்னம் ஆப⁴த’’ந்தி தூ³தவசனேனேவ சீவரம் கிணித்வா தா³தும் பேஸிதபா⁴வோ விஞ்ஞாயதி. யதி³ ஹி ஸப்³ப³தா² ஆக³மனஸுத்³தி⁴ ந விஞ்ஞாயதி, படிக்கே²போ ஏவ கத்தப்³போ³தி.

பாளியஞ்ச ‘‘சீவரஞ்ச கோ² மயம் படிக்³க³ண்ஹாமா’’திஆதி³ தூ³தவசனஸ்ஸ அகப்பியத்தேபி ஆக³மனஸுத்³தி⁴யா ஸதி படிபஜ்ஜனவிதி⁴த³ஸ்ஸனத்த²ம் வுத்தம். ‘‘ஏஸோ கோ²…பே… ந வத்தப்³போ³ ‘தஸ்ஸ தே³ஹீ’’’திஆதி³ அகப்பியவத்து²ஸாதி³யனபரிமோசனத்த²ம் வுத்தம். ‘‘ஸஞ்ஞத்தோ’’திஆதி³ ‘‘ஏவம் தூ³தேன புன வுத்தே ஏவ சோதே³தும் வட்டதி, ந இதரதா²’’தி த³ஸ்ஸனத்த²ம் வுத்தம். ‘‘ந வத்தப்³போ³ ‘தே³ஹி மே சீவரம்…பே… சேதாபேஹி மே சீவர’’’ந்தி இத³ம் தூ³தேனாப⁴தரூபியம் படிக்³க³ஹேதும் அத்தனா நித்³தி³ட்ட²கப்பியகாரகத்தாவ ‘‘தே³ஹி மே சீவரம்…பே… சேதாபேஹி மே சீவர’’ந்தி வத³ந்தோ ரூபியஸ்ஸ பகதத்தா தேன ரூபியேன பரிவத்தேத்வா ‘‘தே³ஹி சேதாபேஹீ’’தி ரூபியஸம்வோஹாரம் ஸமாபஜ்ஜந்தோ நாம ஹோதீதி தம் தோ³ஸம் தூ³ரதோ பரிவஜ்ஜேதும் வுத்தம் ரூபியபடிக்³க³ஹணேன ஸங்க⁴மஜ்ஜே² நிஸ்ஸட்ட²ரூபியே விய. வுத்தஞ்ஹி தத்த² ‘‘ந வத்தப்³போ³ இமம் வா இமம் வா ஆஹரா’’தி. தஸ்மா ந இத³ம் விஞ்ஞத்திதோ³ஸம் பரிவஜ்ஜேதும் வுத்தந்தி வேதி³தப்³ப³ம், ‘‘அத்தோ² மே, ஆவுஸோ, சீவரேனா’’திபி அவத்தப்³ப³தாபஸங்க³தோ, தேனேவ தூ³தனித்³தி³ட்டே²ஸு ரூபியஸம்வோஹாரஸங்காபா⁴வதோ அஞ்ஞம் கப்பியகாரகம் ட²பேத்வாபி ஆஹராபேதப்³ப³ந்தி வுத்தம். தத்தா²பி ‘‘தூ³தேன ட²பிதரூபியேன சேதாபேத்வா சீவரம் ஆஹராபேஹீ’’தி அவத்வா கேவலம் ‘‘சீவரம் ஆஹராபேஹீ’’தி ஏவம் ஆஹராபேதப்³ப³ந்தி அதி⁴ப்பாயோ க³ஹேதப்³போ³. டா²னம் ப⁴ஞ்ஜதீதி ஏத்த² டா²னந்தி டி²தியா ச காரணஸ்ஸ ச நாமம், தஸ்மா ஆஸனே நிஸீத³னேன டா²னம்பி குப்பதி, ஆக³தகாரணம்பி தேஸம் ந விஞ்ஞாயதி. டி²தம் பன அகோபேத்வா ஆமிஸபடிக்³க³ஹணாதீ³ஸு ஆக³தகாரணமேவ ப⁴ஞ்ஜதி, ந டா²னம். தேனாஹ ‘‘ஆக³தகாரணம் ப⁴ஞ்ஜதீ’’தி. கேசி பன ‘‘ஆமிஸபடிக்³க³ஹணாதி³னா டா²னம்பி ப⁴ஞ்ஜதீ’’தி வத³ந்தி, தம் அட்ட²கதா²ய ந ஸமேதி.

யதஸ்ஸ சீவரசேதாபன்னந்திஆதி³ யேன அத்தனா வேய்யாவச்சகரோ நித்³தி³ட்டோ², சீவரஞ்ச அனிப்பா²தி³தம், தஸ்ஸ கத்தப்³ப³விதி⁴த³ஸ்ஸனம். ஏவம் பி⁴க்கு²னா வத்து²ஸாமிகானம் வுத்தே தே சோதே³த்வா தே³ந்தி, வட்டதி ‘‘ஸாமிகா சோதே³த்வா தே³ந்தீ’’தி அனாபத்தியம் வுத்தத்தா. தேன ச யோ ஸயம் அசோதே³த்வா உபாஸகாதீ³ஹி பரியாயேன வத்வா சோதா³பேதி, தேஸு ஸத்தக்க²த்தும்பி சோதே³த்வா சீவரம் தா³பேந்தேஸு தஸ்ஸ அனாபத்தி ஸித்³தா⁴ ஹோதி ஸிக்கா²பத³ஸ்ஸ அனாணத்திகத்தா.

கேனசி அனித்³தி³ட்டோ² அத்தனோ முகே²னேவ ப்³யாவடபா⁴வம் வேய்யாவச்சகரத்தம் பத்தோ முக²வேவடிகோ. ‘‘அவிசாரேதுகாமதாயா’’தி இமினா விஜ்ஜமானம்பி தா³தும் அனிச்ச²ந்தா அரியாபி வஞ்சனாதி⁴ப்பாயம் வினா வோஹாரதோ நத்தீ²தி வத³ந்தீதி த³ஸ்ஸேதி. பே⁴ஸஜ்ஜக்க²ந்த⁴கே மேண்ட³கஸேட்டி²வத்து²ம்ஹி (மஹாவ. 299) வுத்தம் ‘‘ஸந்தி, பி⁴க்க²வே’’திஆதி³வசனமேவ (மஹாவ. 299) மேண்ட³கஸிக்கா²பத³ம் நாம. கப்பியகாரகானம் ஹத்தே²தி தூ³தேன நித்³தி³ட்ட²கப்பியகாரகே ஸந்தா⁴ய வுத்தம், ந பன பி⁴க்கு²னா நித்³தி³ட்டே², அனித்³தி³ட்டே² வாதி. தேனாஹ ‘‘ஏத்த² ச சோத³னாய பமாணம் நத்தீ²’’திஆதி³.

ஸயம் ஆஹரித்வா த³த³ந்தேஸூதி ஸம்ப³ந்தோ⁴. ‘‘பிண்ட³பாதாதீ³னம் அத்தா²யா’’தி இமினா சீவரத்தா²யேவ ந ஹோதீதி த³ஸ்ஸேதி. ‘‘ஏஸேவ நயோ’’தி இமினா வத்து²ஸாமினா நித்³தி³ட்ட²கப்பியகாரகபே⁴தே³ஸுபி பிண்ட³பாதாதீ³னம்பி அத்தா²ய தி³ன்னே ச டா²னசோத³னாதி³ ஸப்³ப³ம் ஹேட்டா² வுத்தனயேனேவ காதப்³ப³ந்தி த³ஸ்ஸேதி.

‘‘ஸங்க⁴ம் வா…பே… அனாமஸித்வா’’தி வுத்தத்தா ‘‘ஸங்க⁴ஸ்ஸ விஹாரத்தா²ய தே³மா’’திஆதி³னா ஆமஸித்வா வத³ந்தேஸு படிக்கி²பிதப்³ப³மேவ. ‘‘ஸங்கோ⁴ ஸம்படிச்ச²தீ’’தி இத³ம் உக்கட்ட²வஸேன வுத்தம், க³ணாதீ³ஸுபி ஸங்க⁴ஸ்ஸத்தா²ய ஸம்படிச்ச²ந்தேஸுபி படிக்³க³ஹணேபி பரிபோ⁴கே³பி து³க்கடமேவ. ஸாரத்த²தீ³பனியம் ‘‘படிக்³க³ஹணே பாசித்திய’’ந்தி (ஸாரத்த². டீ. 2.537-539) வுத்தம், தம் ந யுத்தம் ஸங்க⁴சேதியாதீ³னம் அத்தா²ய து³க்கடஸ்ஸ வுத்தத்தா. சோதே³தீதி தஸ்ஸ தோ³ஸாபா⁴வம் ஞத்வாபி கோதே⁴ன வா லோபே⁴ன வா ப⁴ண்ட³தே³ய்யந்தி சோதே³தி. ஸோ ஏவ ஹி முஸாவாதா³தி³பச்சயா பாசித்தியது³க்கடாதி³ஆபத்தீஹி ஸாபத்திகோ ஹோதி, கீ³வாதிஸஞ்ஞாய பன வத்வா நித்³தோ³ஸபா⁴வம் ஞத்வா விரமந்தஸ்ஸ நத்தி² ஆபத்தி.

தளாகம் கே²த்தே பவிட்ட²த்தா ‘‘ந ஸம்படிச்சி²தப்³ப³’’ந்தி வுத்தம். சத்தாரோ பச்சயே ஸங்கோ⁴ பரிபு⁴ஞ்ஜதூதி தே³தி, வட்டதீதி ஏத்த² ‘‘பி⁴க்கு²ஸங்க⁴ஸ்ஸ சதுபச்சயபரிபோ⁴க³த்தா²ய தளாகம் த³ம்மீ’’தி வா ‘‘பி⁴க்கு²ஸங்கோ⁴ சத்தாரோ பச்சயே பரிபு⁴ஞ்ஜிதும் தளாகம் த³ம்மீ’’தி வா ‘‘இதோ தளாகதோ உப்பன்னே சத்தாரோ பச்சயே த³ம்மீ’’தி வா வத்தும்பி வட்டதி, இத³ஞ்ச ஸங்க⁴ஸ்ஸ பரிபோ⁴க³த்தா²ய தி³ய்யமானஞ்ஞேவ ஸந்தா⁴ய வுத்தம், புக்³க³லஸ்ஸ பன ஏவம்பி தி³ன்னம் தளாககே²த்தாதி³ ந வட்டதி. ஸுத்³த⁴சித்தஸ்ஸ பன உத³கபரிபோ⁴க³த்த²ம் கூபபோக்க²ரணீஆத³யோ வட்டந்தி. ‘‘ஸங்க⁴ஸ்ஸ தளாகம் அத்தி², தம் கத²’’ந்தி ஹி ஆதி³னா ஸப்³ப³த்த² ஸங்க⁴வஸேனேவ வுத்தம். ஹத்தே²தி வஸே.

‘‘ட²பேதா²தி வுத்தே’’தி இத³ம் ஸாமீசிவஸேன வுத்தம், அவுத்தேபி ட²பேந்தஸ்ஸ தோ³ஸோ நத்தி². தேனாஹ ‘‘உத³கம் வாரேதும் லப்³ப⁴தீ’’தி. ஸஸ்ஸகாலேபி தாஸேத்வா முஞ்சிதும் வட்டதி, அமுஞ்சதோ பன ப⁴ண்ட³தே³ய்யம். புன தே³தீதி அச்சி²ந்தி³த்வா புன தே³தி, ஏவம்பி வட்டதீதி ஸம்ப³ந்தோ⁴. இமினா ‘‘யேன கேனசி இஸ்ஸரேன ‘பரிச்சத்தமித³ம் பி⁴க்கூ²ஹி, அஸ்ஸாமிக’ந்திஸஞ்ஞாய அத்தனா க³ஹேத்வா தி³ன்னம் வட்டதீ’’தி த³ஸ்ஸேதி. கப்பியவோஹாரேபி வினிச்ச²யம் வக்கா²மாதி பாட²ஸேஸோ.

உத³கவஸேனாதி உத³கபரிபோ⁴க³த்த²ம். ‘‘ஸுத்³த⁴சித்தான’’ந்தி இத³ம் ஸஹத்தே²ன ச அகப்பியவோஹாரேன ச கரோந்தே ஸந்தா⁴ய வுத்தம். ஸஸ்ஸஸம்பாத³னத்த²ந்தி ஏவம் அஸுத்³த⁴சித்தானம்பி பன ஸயம் அகத்வா கப்பியவோஹாரேன ஆணாபேதும் வட்டதி ஏவ. ‘‘கப்பியகாரகம் ட²பேதும் ந வட்டதீ’’தி இத³ம் ஸஹத்தா²தி³னா கததளாகத்தா ‘‘அஸாருப்ப’’ந்தி வுத்தம், ட²பேந்தஸ்ஸ, பன தம் பச்சயம் பரிபு⁴ஞ்ஜந்தஸ்ஸபி வா ஸங்க⁴ஸ்ஸ ஆபத்தி ந விஞ்ஞாயதி, அட்ட²கதா²பமாணேன வா ஏத்த² ஆபத்தி க³ஹேதப்³பா³. லஜ்ஜிபி⁴க்கு²னாதி லஜ்ஜினாபி, பகே³வ அலஜ்ஜினா மத்திகுத்³த⁴ரணாதீ³ஸு காராபிதேஸூதி அதி⁴ப்பாயோ. நவஸஸ்ஸேதி அகதபுப்³பே³ கேதா³ரே. ‘‘கஹாபணே’’தி இமினா த⁴ஞ்ஞுட்டா²பனே தஸ்ஸேவ அகப்பியந்தி த³ஸ்ஸேதி, த⁴ஞ்ஞுட்டா²பனே சஸ்ஸ பயோகே³பி து³க்கடமேவ, ந கஹாபணுட்டா²பனே விய.

‘‘கஸத² வபதா²’’தி வசனே ஸப்³பே³ஸம்பி அகப்பியம் ஸியாதி ஆஹ ‘‘அவத்வா’’தி. ஏத்தகோ நாம பா⁴கோ³தி ஏத்த² ஏத்தகோ கஹாபணோதி இத³ம்பி ஸந்தா⁴ய வத³தி. ததா² வுத்தேபி ஹி ததா³ கஹாபணானம் அவிஜ்ஜமானத்தா ஆயதிம் உப்பன்னம் அஞ்ஞேஸம் வட்டதி ஏவ. தேனாஹ ‘‘தஸ்ஸேவ தம் அகப்பிய’’ந்தி. தஸ்ஸ பன ஸப்³ப³பயோகே³ஸு, பரிபோ⁴கே³ஸுபி து³க்கடம். கேசி பன ‘‘த⁴ஞ்ஞபரிபோ⁴கே³ ஏவ ஆபத்தி, ந புப்³ப³பயோகே³’’தி வத³ந்தி, தம் ந யுத்தம், யேன மினனரக்க²ணாதி³பயோகே³ன பச்சா² த⁴ஞ்ஞபரிபோ⁴கே³ ஆபத்தி ஹோதி, தஸ்ஸ பயோக³ஸ்ஸ கரணே அனாபத்தியா அயுத்தத்தா. பரியாயகதா²ய பன ஸப்³ப³த்த² அனாபத்தி. தேனேவ ‘‘ஏத்தகேஹி வீஹீஹி இத³ஞ்சித³ஞ்ச ஆஹரதா²’’தி நியமவசனே அகப்பியம் வுத்தம், கஹாபணவிசாரணேபி ஏஸேவ நயோ. வத்து² ச ஏவரூபம் நாம ஸம்விஜ்ஜதி, கப்பியகாரகோ நத்தீ²தி வத்தப்³ப³ந்திஆதி³வசனஞ்சேத்த² ஸாத⁴கம்.

வனம் த³ம்மி…பே… வட்டதீதி ஏத்த² நிவாஸட்டா²னத்தா புக்³க³லஸ்ஸாபி ஸுத்³த⁴சித்தேன க³ஹேதும் வட்டதி. ஸீமம் தே³மாதி விஹாரஸீமாதி³ஸாதா⁴ரணவசனேன வுத்தத்தா ‘‘வட்டதீ’’தி வுத்தம்.

‘‘வேய்யாவச்சகர’’ந்திஆதி³னா வுத்தேபி புக்³க³லஸ்ஸபி தா³ஸம் க³ஹேதும் வட்டதி ‘‘அனுஜானாமி, பி⁴க்க²வே, ஆராமிக’’ந்தி (பாரா. 619; மஹாவ. 270) விஸேஸேத்வா அனுஞ்ஞாதத்தா, தஞ்ச கோ² பிலிந்த³வச்சே²ன க³ஹிதபரிபு⁴த்தக்கமேன, ந க³ஹட்டா²னம் தா³ஸபரிபோ⁴க³க்கமேன. கே²த்தாத³யோ பன ஸப்³பே³ ஸங்க⁴ஸ்ஸேவ வட்டந்தி பாளியம் புக்³க³லிகவஸேன க³ஹேதும் அனனுஞ்ஞாதத்தாதி த³ட்ட²ப்³ப³ம். விஹாரஸ்ஸ தே³மாதி ஸங்கி⁴கவிஹாரம் ஸந்தா⁴ய வுத்தம், ‘‘கே²த்தவத்து²படிக்³க³ஹணா படிவிரதோ ஹோதீ’’திஆதி³னா (தீ³. நி. 1.10, 194) ஸுத்தந்தேஸு ஆக³தபடிக்கே²போ ப⁴க³வதா ஆபத்தியாபி ஹேதுபா⁴வேன கதோதி ப⁴க³வதோ அதி⁴ப்பாயம் ஜானந்தேஹி ஸங்கீ³திமஹாதே²ரேஹி கே²த்தபடிக்³க³ஹணாதி³னிஸ்ஸிதோ அயம் ஸப்³போ³பி பாளிமுத்தவினிச்ச²யோ வுத்தோதி க³ஹேதப்³போ³. கப்பியகாரகஸ்ஸ நித்³தி³ட்ட²பா⁴வோ, தூ³தேன அப்பிததா, ததுத்தரி வாயாமோ, தேன படிலாபோ⁴தி இமானேத்த² சத்தாரி அங்கா³னி.

ராஜஸிக்கா²பத³வண்ணனா நிட்டி²தா.

நிட்டி²தோ சீவரவக்³கோ³ பட²மோ.