2. கோஸியவக்³கோ³

1. கோஸியஸிக்கா²பத³வண்ணனா

542. து³தியஸ்ஸ பட²மே பாளியம் கோஸியகாரகேதி கோஸகாரகபாணானம் கோஸதோ நிப்³ப³த்தத்தா கோஸியேன ஸுத்தேன வத்தா²தி³ம் கரோந்தே. ஸங்கா⁴தந்தி வினாஸம்.

544. ‘‘அவாயிம’’ந்தி வுத்தத்தா வாயித்வா கரணே அனாபத்தி. மிஸ்ஸேத்வாதி ஏளகலோமேஹி மிஸ்ஸேத்வா. படிலாபே⁴னாதி பரினிட்டா²னேன ‘‘பரியோஸாபேதி, நிஸ்ஸக்³கி³ய’’ந்தி (பாரா. 545) வுத்தத்தா, கோஸியமிஸ்ஸகதா, அத்தனோ அத்தா²ய ஸந்த²தஸ்ஸ கரணகாராபனம், படிலாபோ⁴ சாதி இமானேத்த² தீணி அங்கா³னி.

கோஸியஸிக்கா²பத³வண்ணனா நிட்டி²தா.

547-552. து³தியஞ்ச ததியஞ்ச உத்தானமேவ. தத்த² பன ஓதா³தாதி³மிஸ்ஸகஸஞ்ஞாய ஸுத்³த⁴காளகானஞ்ஞேவ ஸந்த²தஸ்ஸ கரணவஸேன சேத்த² த்³வேபா⁴க³தோ அதி⁴கேஸு ஸுத்³த⁴காளகேஸு அனதி⁴கஸஞ்ஞாய ஸந்த²தஸ்ஸ கரணவஸேன ச அசித்தகதா வேதி³தப்³பா³.

4. ச²ப்³ப³ஸ்ஸஸிக்கா²பத³வண்ணனா

557. சதுத்தே² ஹத³ கரீஸுஸ்ஸக்³கே³, மிஹ ஸேசனேதி தா⁴துஅத்த²ம் ஸந்தா⁴யாஹ ‘‘வச்சம்பி பஸ்ஸாவம்பி கரோந்தீ’’தி. ஊனகச²ப்³ப³ஸ்ஸேஸு அதிரேகச²ப்³ப³ஸ்ஸஸங்கிதாதி³வஸேனேத்த² அசித்தகதா வேதி³தப்³பா³.

ச²ப்³ப³ஸ்ஸஸிக்கா²பத³வண்ணனா நிட்டி²தா.

5. நிஸீத³னஸந்த²தஸிக்கா²பத³வண்ணனா

565. பஞ்சமே தத்த² ஸந்தி³ஸ்ஸிஸ்ஸதீதி ஸகாய கதிகாய அயுத்தகாரிதாவஸேன விஞ்ஞூஹி ஸந்தி³ஸ்ஸிஸ்ஸதீதி அத்தோ². அரஞ்ஞகங்கா³தீ³னி தீணி பாளியம் ஸேனாஸனாதி³பச்சயத்தயஸ்ஸ ஆதி³அங்க³வஸேன வுத்தானி, ஸேஸானிபி தே ஸமாதி³யிம்ஸு ஏவாதி வேதி³தப்³ப³ம்.

566. பிஹயந்தாதி பத்த²யந்தா. ஸந்த²தஸ்ஸ அவாயிமத்தா, ஸேனாஸனபரிக்கா²ரத்தா ச சீவரதா, அதி⁴ட்டா²தப்³ப³தா ச நத்தீ²தி ஆஹ ‘‘சதுத்த²சீவரஸஞ்ஞிதாயா’’தி, விபல்லாஸஸஞ்ஞாயாதி அத்தோ². கேசி பன ‘‘இத³ம் நிஸீத³னஸந்த²தம் நாம நவஸு சீவரேஸு நிஸீத³னசீவரமேவ, நாஞ்ஞம். நிஸீத³னஸிக்கா²பதே³பி (பாசி. 531 ஆத³யோ) இமஸ்மிம் ஸிக்கா²பதே³ விய ‘நிஸீத³னம் நாம ஸத³ஸம் வுச்சதீ’தி ச அட்ட²கதா²யஞ்சஸ்ஸ ‘ஸந்த²தஸதி³ஸம் ஸந்த²ரித்வா ஏகஸ்மிம் அந்தே ஸுக³தவித³த்தி²யா வித³த்தி²மத்தே பதே³ஸே த்³வீஸு டா²னேஸு பா²லேத்வா திஸ்ஸோ த³ஸா கரீயந்தி, தாஹி த³ஸாஹி ஸத³ஸம் நாம வுச்சதீ’தி (பாசி. அட்ட². 531) ச வுத்தத்தா’’தி வத³ந்தி, தம் ந யுத்தம் இத⁴ பமாணனியமஸ்ஸ அவுத்தத்தா, ஸந்த²தஸ்ஸ ச அவாயிமசீவரத்தா, அதி⁴ட்டா²னுபக³த்தாபா⁴வா அட்ட²கதா²யம் அவுத்தத்தா ச. நிஸீத³னசீவரம் பன ச²ன்னம் சீவரானம் க²ண்ட³பிலோதிகானி பமாணயுத்தமேவ ஸந்த²ரித்வா ஸந்த²தம் விய கரோந்தி. தேனேவ ‘‘ஸந்த²தஸதி³ஸ’’ந்தி ஸதி³ஸக்³க³ஹணம் கதம், தஸ்மா ததே³வ சீவரம் அதி⁴ட்டா²னுபக³ஞ்ச, ந இத³ந்தி க³ஹேதப்³ப³ம்.

567. ஸுக³தவித³த்தி²கம் அனாதா³ய ஆதி³யந்திஸஞ்ஞாய, ஸுக³தவித³த்தி²ஊனே அனூனந்திஸஞ்ஞாய ச வஸேனேத்த² அசித்தகதா வேதி³தப்³பா³. விதானாதீ³னஞ்ஞேவ அத்தா²ய கரணே அனாபத்திவசனதோ நிபஜ்ஜனத்தா²ய கரோதோபி ஆபத்தி ஏவ. பரிபு⁴ஞ்ஜிதும் ந வட்டதீதி கோஸியேஸு ஸுத்³த⁴காளகானஞ்ச வத்தூ²னம் அகப்பியத்தா வுத்தம். தேனேவ பாளியம் ‘‘அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’’தி (பாரா. 545, 550) தத்த² தத்த² வுத்தம், இதரேஸு பன த்³வீஸு ‘‘அனாபத்தீ’’தி வுத்தம். தத்த² சதுத்தே² அஞ்ஞஸ்ஸத்தா²ய கரணேபி அனாபத்தி, பஞ்சமே தத்த² து³க்கடந்தி த³ட்ட²ப்³ப³ம். நிஸ்ஸட்ட²தா³னவசனதோ பன க³ஹணே தோ³ஸோ நத்தி², பரிபு⁴ஞ்ஜனே ச விஜடேத்வா கப்பியவஸேன கதே ந தோ³ஸோ.

நிஸீத³னஸந்த²தஸிக்கா²பத³வண்ணனா நிட்டி²தா.

6. ஏளகலோமஸிக்கா²பத³வண்ணனா

572. ச²ட்டே² பாளியம் ‘‘அத்³தா⁴னமக்³க³ப்படிபன்னஸ்ஸா’’தி இத³ம் வத்து²வஸேன வுத்தம். நிவாஸட்டா²னே லத்³தா⁴னிபி தியோஜனதோ பரம் ஹரிதும் ந வட்டதி ஏவ. அஸந்தே ஹாரகேதி அனுரூபதோ வுத்தம். ஸந்தேபி ஹாரகே ஹரதோ நத்தி² தோ³ஸோ. ஆபத்தியேவாதி அனாணத்தேன ஹடத்தா. பக்க²த்³வயஸ்ஸபி காரணமாஹ ‘‘ஸஉஸ்ஸாஹத்தா’’தி, அனுபரதக³மனிச்ச²த்தாதி அத்தோ². ஸுத்³த⁴சித்தபக்க²ஸ்ஸேவ காரணமாஹ ‘‘அசித்தகத்தா’’தி. ந ஸமேதீதி ‘‘அனாபத்தி, அஞ்ஞம் ஹராபேதீ’’தி ஏத்தகஸ்ஸேவ பரிஹரணே வுத்தத்தா. அக³ச்ச²ந்தேதி டி²தே. ஹேட்டா²தி பூ⁴மியா.

575. தம் ஹரந்தஸ்ஸாதி பட²மம் படிலாப⁴ட்டா²னதோ பட்டா²ய தியோஜனதோ உத்³த⁴ம் ஹரந்தஸ்ஸாதி அத்தோ². ததா² ஹரந்தஸ்ஸ ஹி சோரேஹி அச்சி²ந்தி³த்வா புன தி³ன்னட்டா²னதோ தியோஜனம் ஹரிதும் வட்டதி. கேசி பன ‘‘மாதிகாட்ட²கதா²யம் அங்கே³ஸு ‘பட²மப்படிலாபோ⁴’தி வுத்தத்தா து³தியபடிலாப⁴ட்டா²னதோ தியோஜனாதிக்கமேபி அனாபத்தீ’’தி வத³ந்தி, தம் ந யுத்தம், து³தியபடிலாப⁴ஸ்ஸாபி படிலாப⁴ட்டா²னே பவிஸனதோ வாஸத்தா²ய க³மனட்டா²னதோ புன க³மனே விய. காயப³ந்த⁴னாதீ³னந்தி த்³விபடலகாயப³ந்த⁴னாதீ³னம் அந்தரே பக்கி²த்தம் பஸிப்³ப³கே பக்கி²த்தஸதி³ஸம், ந கதப⁴ண்ட³ந்தி வுத்தம், ததா² நிதா⁴னமுக²ந்தி. அகதப⁴ண்ட³தா, பட²மப்படிலாபோ⁴, தியோஜனாதிக்கமனம், ஆஹரணபச்சாஹரணம், அவாஸாதி⁴ப்பாயதாதி இமானேத்த² பஞ்ச அங்கா³னி.

ஏளகலோமஸிக்கா²பத³வண்ணனா நிட்டி²தா.

7. ஏளகலோமதோ⁴வாபனஸிக்கா²பத³வண்ணனா

581. ஸத்தமே பாளியம் அனாபத்திவாரே அபரிபு⁴த்தம் கதப⁴ண்ட³ம் தோ⁴வாபேதீதி ஏத்த² பரிபு⁴த்தஸ்ஸ கம்ப³லாதி³கதப⁴ண்ட³ஸ்ஸ தோ⁴வாபனம் புராணசீவரதோ⁴வாபனஸிக்கா²பதே³ன ஆபத்திகரந்தி தன்னிவத்தனத்த²ம் ‘‘அபரிபு⁴த்தம் கதப⁴ண்ட³’’ந்தி வுத்தம். ஸேஸமேத்த² உத்தானத்த²மேவ.

ஏளகலோமதோ⁴வாபனஸிக்கா²பத³வண்ணனா நிட்டி²தா.

8. ரூபியஸிக்கா²பத³வண்ணனா

583-4. அட்ட²மே ஸுவண்ணமயகஹாபணேன கஹாபணோபி ரஜதே ஏவ ஸங்க³ய்ஹதீதி ஆஹ ‘‘ஸோவண்ணமயோ வா’’தி. ரூபியமயோ வாதி ரஜதேன ரூபம் ஸமுட்ட²பேத்வா கதகஹாபணோ. பாகதிகோ நாம ஏதரஹி பகதிகஹாபணோ.

இச்சேதம் ஸப்³ப³ம்பீதி ஸிக்கா²பதே³ன, விப⁴ங்கே³ன ச வுத்தம் ஸப்³ப³ம்பி நித³ஸ்ஸேதி. தஸ்ஸ சதுப்³பி³த⁴ம் நிஸ்ஸக்³கி³யவத்தூ²தி இமினாவ ஸம்ப³ந்தோ⁴, ந பன அனந்தரேன ‘‘ரஜத’’ந்தி பதே³ன. இதா³னி தம் சதுப்³பி³த⁴ம் நிஸ்ஸக்³கி³யவத்து²ம் ஸரூபதோ த³ஸ்ஸேந்தோ ‘‘ரஜத’’ந்திஆதி³மாஹ. தத்த² கிஞ்சாபி ஹேட்டா² ரஜதமாஸகோவ வுத்தோ, ந கேவலம் ரஜதம், ததா²பி ஸிக்கா²பதே³ ‘‘ஜாதரூபரஜத’’ந்தி பதே³னேவ வுத்தந்தி தம்பி த³ஸ்ஸேதும் ‘‘ரஜத’’ந்தி இத³ம் விஸும் வுத்தம். பத³பா⁴ஜனே பன மாதிகாபதே³னேவ ஸித்³த⁴த்தா தம் அவத்வா தேன ஸஹ ஸங்க³ய்ஹமானமேவ த³ஸ்ஸேதும் ‘‘ரஜதம் நாம கஹாபணோ’’திஆதி³ வுத்தந்தி வேதி³தப்³ப³ம். ஜாதரூபமாஸகோதி ஸுவண்ணமயகஹாபணோ. வுத்தப்பபே⁴தோ³தி ‘‘ரூபியமயோ வா பாகதிகோ வா’’திஆதி³னா வுத்தப்பபே⁴தோ³. படோவ படகோ, வத்த²ம். து³க்கடமேவாதி படிக்³கா³ஹகஸ்ஸேவ படிக்³க³ஹணபச்சயா து³க்கடம், பரிபோ⁴கே³ பன பஞ்சஸஹத⁴ம்மிகேஹி படிக்³க³ஹிதானம் த⁴ஞ்ஞவிரஹிதமுத்தாதீ³னம் காரணா உப்பன்னபச்சயம் பரிபு⁴ஞ்ஜந்தானம் ஸப்³பே³ஸம்பி து³க்கடமேவ. கேசி பன ‘‘த⁴ஞ்ஞம்பி பஞ்சஸஹத⁴ம்மிகேஹி படிக்³க³ஹிதம் முத்தாதி³கே²த்தாதி³ விய ஸப்³பே³ஸம்பி பரிபு⁴ஞ்ஜிதும் ந வட்டதி, கேவலம் ஸங்கி⁴கபூ⁴மியம் கப்பியவோஹாரேன ச உப்பன்னஸ்ஸ த⁴ஞ்ஞஸ்ஸ விசாரணமேவ ஸந்தா⁴ய ‘தஸ்ஸேவேதம் அகப்பிய’ந்தி வுத்த’’ந்தி வத³ந்தி.

ஏகோ ஸதம் வா ஸஹஸ்ஸம் வாதிஆதி³ ரூபியே ஹேட்டி²மகோடியா பவத்தனாகாரம் த³ஸ்ஸேதும் வுத்தம், ந பன ‘‘ஏவம் படிபஜ்ஜிதப்³ப³மேவா’’தி த³ஸ்ஸேதும். ‘‘இத⁴ நிக்கி²பாஹீ’’தி வுத்தே உக்³க³ண்ஹாபனம் ஹோதீதி ஆஹ ‘‘இத⁴ நிக்கி²பாஹீதி ந வத்தப்³ப³’’ந்தி. கப்பியஞ்ச…பே… ஹோதீதி யஸ்மா அஸாதி³தத்தா ததோ உப்பன்னபச்சயா வட்டந்தி, தஸ்மா கப்பியம் நிஸ்ஸாய டி²தம். யஸ்மா பன து³ப்³பி³சாரணாய ஸதி ததோ உப்பன்னம்பி ந கப்பதி, தஸ்மா அகப்பியம் நிஸ்ஸாய டி²தந்தி வேதி³தப்³ப³ம்.

‘‘ந தேன கிஞ்சி கப்பியப⁴ண்ட³ம் சேதாபித’’ந்தி இமினா சேதாபிதம் சே, நத்தி² பரிபோ⁴கூ³பாயோ உக்³க³ஹேத்வா அனிஸ்ஸட்ட²ரூபியேன சேதாபிதத்தா. ஈதி³ஸஞ்ஹி ஸங்க⁴மஜ்ஜே² நிஸ்ஸஜ்ஜனம் கத்வாவ ச²ட்³டே³த்வா பாசித்தியம் தே³ஸேதப்³ப³ந்தி த³ஸ்ஸேதி. கேசி பன ‘‘யஸ்மா நிஸ்ஸக்³கி³யவத்து²ம் படிக்³க³ஹேத்வாபி சேதாபிதம் கப்பியப⁴ண்ட³ம் ஸங்கே⁴ நிஸ்ஸட்ட²ம் கப்பியகாரகேஹி நிஸ்ஸட்ட²ரூபியம் பரிவத்தேத்வா ஆனீதகப்பியப⁴ண்ட³ஸதி³ஸம் ஹோதி, தஸ்மா வினாவ உபாயம் பா⁴ஜேத்வா பரிபு⁴ஞ்ஜிதும் வட்டதீ’’தி வத³ந்தி, தம் பத்தசதுக்காதி³கதா²ய (பாரா. அட்ட². 2.589) ந ஸமேதி. தத்த² ரூபியேன பரிவத்திதபத்தஸ்ஸ அபரிபோ⁴கோ³வ த³ஸ்ஸிதோ, ந நிஸ்ஸஜ்ஜனவிதா⁴னந்தி. உபனிக்கே²பம் ட²பேத்வாதி கப்பியகாரகேஹி வட்³டி⁴யா பயோஜனம் ஸந்தா⁴ய வுத்தம். அகப்பியந்தி தேன வத்து²னா க³ஹிதத்தா வுத்தம்.

585. ‘‘பதிதோகாஸம் அஸமன்னாஹரந்தேனா’’தி இத³ம் நிரபேக்க²பா⁴வத³ஸ்ஸனபரந்தி வேதி³தப்³ப³ம். அஸந்தஸம்பா⁴வனாயாதி பரியாயாதி³னா அபூ⁴தாரோசனம் ஸந்தா⁴ய வுத்தம். தே²ய்யபரிபோ⁴கோ³தி பச்சயஸாமினா ப⁴க³வதா அனனுஞ்ஞாதத்தா வுத்தம். இணபரிபோ⁴கோ³தி ப⁴க³வதா அனுஞ்ஞாதம்பி கத்தப்³ப³ம் அகத்வா பரிபு⁴ஞ்ஜனதோ வுத்தம், தேன ச பச்சயஸன்னிஸ்ஸிதஸீலம் விபஜ்ஜதீதி த³ஸ்ஸேதி. பரிபோ⁴கே³ பரிபோ⁴கே³தி காயதோ மோசேத்வா மோசேத்வா பரிபோ⁴கே³. பச்சி²மயாமேஸு பச்சவேக்கி²தப்³ப³ந்தி யோஜனா. இணபரிபோ⁴க³ட்டா²னே திட்ட²தீதி ஏத்த² ‘‘ஹிய்யோ யம் மயா சீவரம் பரிபு⁴த்த’’ந்திஆதி³னாபி அதீதபச்சவேக்க²ணா வட்டதீதி வத³ந்தி. பரிபோ⁴கே³ பரிபோ⁴கே³தி உத³கபதனட்டா²னதோ அந்தோபவேஸனேஸு, நிஸீத³னஸயனேஸு ச. ஸதிபச்சயதா வட்டதீதி பச்சவேக்க²ணஸதியா பச்சயத்தம் லத்³து⁴ம் வட்டதி. படிக்³க³ஹணே ச பரிபோ⁴கே³ ச பச்சவேக்க²ணாஸதி அவஸ்ஸம் லத்³த⁴ப்³பா³தி த³ஸ்ஸேதி. தேனாஹ ‘‘ஸதிம் கத்வா’’திஆதி³. கேசி பன ‘‘ஸதிபச்சயதா பச்சயே ஸதி பே⁴ஸஜ்ஜபரிபோ⁴க³ஸ்ஸ காரணே ஸதீ’’தி ஏவம்பி அத்த²ம் வத³ந்தி, தேஸம்பி பச்சயே ஸதீதி பச்சயஸப்³பா⁴வஸல்லக்க²ணே ஸதீதி ஏவமத்தோ² க³ஹேதப்³போ³ பச்சயஸப்³பா⁴வமத்தேன ஸீலஸ்ஸ அஸுஜ்ஜ²னதோ. ‘‘பரிபோ⁴கே³ அகரோந்தஸ்ஸேவ ஆபத்தீ’’தி இமினா பாதிமோக்க²ஸம்வரஸீலஸ்ஸ பே⁴தோ³ த³ஸ்ஸிதோ, ந பச்சயஸன்னிஸ்ஸ்ஸிஸீலஸ்ஸ, தஸ்ஸ அதீதபச்சவேக்க²ணாய விஸுஜ்ஜ²னதோ. ஏதஸ்மிம், பன ஸேஸபச்சயேஸு ச இணபரிபோ⁴கா³தி³வசனேன பச்சயஸன்னிஸ்ஸிதஸீலஸ்ஸேவ பே⁴தோ³தி ஏவமிமேஸம் நானாகரணம் வேதி³தப்³ப³ம்.

ஏவம் பச்சயஸன்னிஸ்ஸிதஸீலஸ்ஸ விஸுத்³தி⁴ம் த³ஸ்ஸேத்வா தேனேவ பஸங்கே³ன ஸப்³பா³பி விஸுத்³தி⁴யோ த³ஸ்ஸேதும் ‘‘சதுப்³பி³தா⁴ ஹி ஸுத்³தீ⁴’’திஆதி³மாஹ. தத்த² ஸுஜ்ஜ²தி தே³ஸனாதீ³ஹி, ஸோதீ⁴யதீதி வா ஸுத்³தி⁴, சதுப்³பி³த⁴ஸீலம். தேனாஹ ‘‘தே³ஸனாய ஸுஜ்ஜ²னதோ’’திஆதி³. ஏத்த² தே³ஸனாக்³க³ஹணேன வுட்டா²னம்பி சி²ன்னமூலானம் அபி⁴க்கு²தாபடிஞ்ஞாபி ஸங்க³ஹிதா. சி²ன்னமூலானம்பி ஹி பாராஜிகாபத்திவுட்டா²னேன ஹேட்டா² பரிரக்கி²தம் பி⁴க்கு²ஸீலம் விஸுத்³த⁴ம் நாம ஹோதி, தேன தேஸம் மக்³க³படிலாபோ⁴பி ஸம்பஜ்ஜதி.

தா³தப்³ப³ட்டே²ன தா³யம், தம் ஆதி³யந்தீதி தா³யாதா³. ஸத்தன்னம் ஸேக்கா²னந்தி ஏத்த² கல்யாணபுது²ஜ்ஜனாபி ஸங்க³ஹிதா தேஸம் ஆணண்யபரிபோ⁴க³ஸ்ஸ தா³யஜ்ஜபரிபோ⁴கே³ ஸங்க³ஹிதத்தாதி வேதி³தப்³ப³ம். த⁴ம்மதா³யாத³ஸுத்தந்தி ‘‘த⁴ம்மதா³யாதா³ மே, பி⁴க்க²வே, ப⁴வத², மா ஆமிஸதா³யாதா³’’திஆதி³னா (ம. நி. 1.29) பவத்தம் ஸுத்தம். தத்த² மா மே ஆமிஸதா³யாதா³தி ஏவம் மே-ஸத்³த³ம் ஆனேத்வா அத்தோ² க³ஹேதப்³போ³. ஏவஞ்ஹி ததா² வுத்தத்த²ஸாத⁴கம் ஹோதி.

லஜ்ஜினா ஸத்³தி⁴ம் பரிபோ⁴கோ³தி த⁴ம்மாமிஸவஸேன மிஸ்ஸபா⁴வோ. அலஜ்ஜினா ஸத்³தி⁴ந்தி ஏத்தா²பி ஏஸேவ நயோ. ‘‘ஆதி³தோ பட்டா²ய ஹி அலஜ்ஜீ நாம நத்தீ²’’தி இமினா தி³ட்ட²தி³ட்டே²ஸு ஆஸங்கா நாம ந காதப்³பா³, தி³ட்ட²ஸுதாதி³காரணே ஸதி ஏவ காதப்³பா³தி த³ஸ்ஸேதி. அத்தனோ பா⁴ரபூ⁴தா ஸத்³தி⁴விஹாரிகாத³யோ. ஸசே ந ஓரமதீதி அக³திக³மனேன த⁴ம்மாமிஸபரிபோ⁴க³தோ ந ஓரமதி. ‘‘ஆபத்தி நாம நத்தீ²’’தி இத³ம் அலஜ்ஜீனம் த⁴ம்மேன உப்பன்னபச்சயம், த⁴ம்மகம்மஞ்ச ஸந்தா⁴ய வுத்தம். தேஸம்பி ஹி குலதூ³ஸனாதி³ஸமுப்பன்னபச்சயம் பரிபு⁴ஞ்ஜந்தானம், வக்³க³கம்மாதி³ம் கரோந்தானஞ்ச ஆபத்தி ஏவ.

‘‘த⁴ம்மியாத⁴ம்மியபரிபோ⁴கோ³ பச்சயவஸேன வேதி³தப்³போ³’’தி வுத்தத்தா ஹேட்டா² லஜ்ஜிபரிபோ⁴கோ³ பச்சயவஸேன ச ஏககம்மாதி³வஸேன ச வுத்தோ ஏவாதி வேதி³தப்³ப³ம். தேனேவ து³ட்ட²தோ³ஸஸிக்கா²பத³ட்ட²கதா²யம் சோத³கசுதி³தகபா⁴வே டி²தா த்³வே அலஜ்ஜினோ த⁴ம்மபரிபோ⁴க³ம்பி ஸந்தா⁴ய ‘‘ஏகஸம்போ⁴க³பரிபோ⁴கா³ ஹுத்வா ஜீவதா²’’தி (பாரா. அட்ட². 2.385-386) வுத்தா தேஸம் அஞ்ஞமஞ்ஞம் த⁴ம்மாமிஸபரிபோ⁴கே³ விரோதா⁴பா⁴வா. லஜ்ஜீனமேவ ஹி அலஜ்ஜினா ஸஹ தது³ப⁴யபரிபோ⁴கா³ ந வட்டந்தீதி.

த⁴ம்மபரிபோ⁴கோ³தி ‘‘ஏககம்மம் ஏகுத்³தே³ஸோ’’திஆதி³னா (பாரா. 55, 92, 172) வுத்தஸம்வாஸோ சேவ நிஸ்ஸயக்³க³ஹணதா³னாதி³கோ ஸப்³போ³ நிராமிஸபரிபோ⁴கோ³ ச வேதி³தப்³போ³. ‘‘ந ஸோ ஆபத்தியா காரேதப்³போ³’’தி வுத்தத்தா லஜ்ஜினோ அலஜ்ஜிபக்³க³ஹே ஆபத்தீதி வேதி³தப்³ப³ம். இதரோபீதி லஜ்ஜீபி. தஸ்ஸாபி அத்தானம் பக்³க³ண்ஹந்தஸ்ஸ அலஜ்ஜினோ, இமினா ச லஜ்ஜினோ வண்ணப⁴ணனாதி³லாப⁴ம் படிச்ச ஆமிஸக³ருகதாய வா கே³ஹஸிதபேமேன வா தம் அலஜ்ஜிம் பக்³க³ண்ஹந்தோ லஜ்ஜீ ஸாஸனம் அந்தரதா⁴பேதி நாமாதி த³ஸ்ஸேதி. ஏவம் க³ஹட்டா²தீ³ஸு உபத்த²ம்பி⁴தோ அலஜ்ஜீ ப³லம் லபி⁴த்வா பேஸலே அபி⁴ப⁴வித்வா நசிரஸ்ஸேவ ஸாஸனம் உத்³த⁴ம்மம் உப்³பி³னயம் கரோதீதி.

‘‘த⁴ம்மபரிபோ⁴கோ³பி தத்த² வட்டதீ’’தி இமினா ஆமிஸபரிபோ⁴க³தோ த⁴ம்மபரிபோ⁴கோ³வ க³ருகோ, தஸ்மா அதிவிய அலஜ்ஜிவிவேகேன காதப்³போ³தி த³ஸ்ஸேதி. ‘‘த⁴ம்மானுக்³க³ஹேன உக்³க³ண்ஹிதும் வட்டதீ’’தி வுத்தத்தா அலஜ்ஜுஸ்ஸன்னதாய ஸாஸனே ஓஸக்கந்தே, லஜ்ஜீஸு ச அப்பஹோந்தேஸு அலஜ்ஜிம்பி பகதத்தம் க³ணபூரகம் க³ஹேத்வா உபஸம்பதா³தி³கரணேன சேவ கேசி அலஜ்ஜினோ த⁴ம்மாமிஸபரிபோ⁴கே³ன ஸங்க³ஹேத்வா ஸேஸாலஜ்ஜிக³ணஸ்ஸ நிக்³க³ஹேன ச ஸாஸனம் பக்³க³ண்ஹிதும் வட்டதி ஏவ.

கேசி பன ‘‘கோடியம் டி²தோ க³ந்தோ²தி வுத்தத்தா க³ந்த²பரியாபுணனமேவ த⁴ம்மபரிபோ⁴கோ³, ந ஏககம்மாதி³. தஸ்மா அலஜ்ஜீஹிபி ஸத்³தி⁴ம் உபோஸதா²தி³கம் கம்மம் காதும் வட்டதி, ஆபத்தி நத்தீ²’’தி வத³ந்தி, தம் ந யுத்தம், ஏககம்மாதீ³ஸு ப³ஹூஸு த⁴ம்மபரிபோ⁴கே³ஸு அலஜ்ஜினாபி ஸத்³தி⁴ம் கத்தப்³பா³வத்தா²யுத்தம் த⁴ம்மபரிபோ⁴க³ம் த³ஸ்ஸேதும் இத⁴ நித³ஸ்ஸனவஸேன க³ந்த²ஸ்ஸேவ ஸமுத்³த⁴டத்தா. ந ஹி ஏககம்மாதி³கோ விதி⁴ த⁴ம்மபரிபோ⁴கோ³ ந ஹோதீதி ஸக்கா வத்தும் அனாமிஸத்தா த⁴ம்மாமிஸேஸு அபரியாபன்னஸ்ஸ கஸ்ஸசி அபா⁴வா. தேனேவ அட்ட²ஸாலினியம் த⁴ம்மபடிஸந்தா⁴ரகதா²யம் (த⁴. ஸ. அட்ட². 1351)‘‘கம்மட்டா²னம் கதே²தப்³ப³ம், த⁴ம்மோ வாசேதப்³போ³…பே… அப்³பா⁴னவுட்டா²னமானத்தபரிவாஸா தா³தப்³பா³, பப்³ப³ஜ்ஜாரஹோ பப்³பா³ஜேதப்³போ³, உபஸம்பதா³ரஹோ உபஸம்பாதே³தப்³போ³…பே… அயம் த⁴ம்மபடிஸந்தா⁴ரோ நாமா’’தி ஏவம் ஸங்க⁴கம்மாதி³பி த⁴ம்மகோட்டா²ஸே த³ஸ்ஸிதம். தேஸு பன த⁴ம்மகோட்டா²ஸேஸு யம் க³ணபூரணாதி³வஸேன அலஜ்ஜினோ அபேக்கி²த்வா உபோஸதா²தி³ வா தேஸம் ஸந்திகா த⁴ம்முக்³க³ஹணனிஸ்ஸயக்³க³ஹணாதி³ வா கரீயதி, தம் த⁴ம்மோ சேவ பரிபோ⁴கோ³ சாதி த⁴ம்மபரிபோ⁴கோ³தி வுச்சதி, ஏதம் ததா²ரூபபச்சயம் வினா காதும் ந வட்டதி, கரோந்தஸ்ஸ அலஜ்ஜிபரிபோ⁴கோ³ ச ஹோதி து³க்கடஞ்ச. யம் பன அலஜ்ஜிஸதம் அனபேக்கி²த்வா தஜ்ஜனீயாதி³னிக்³க³ஹகம்மம் வா பரிவாஸாதி³உபகாரகம்மம் வா உக்³க³ஹபரிபுச்சா²தா³னாதி³ வா கரீயதி, தம் த⁴ம்மோ ஏவ, நோ பரிபோ⁴கோ³. ஏதம் அனுரூபானம் காதும் வட்டதி, ஆமிஸதா³னம் விய ஆபத்தி நத்தி². நிஸ்ஸயதா³னம்பி தேரஸஸம்முதிதா³னாதி³ ச வத்தபடிவத்தஸாதி³யனாதி³பரிபோ⁴க³ஸ்ஸாபி ஹேதுத்தா ந வட்டதி.

யோ பன மஹாஅலஜ்ஜீ உத்³த⁴ம்மம் உப்³பி³னயம் ஸத்து² ஸாஸனம் கரோதி, தஸ்ஸ ஸத்³தி⁴விஹாரிகாதீ³னம் உபஸம்பதா³தி³உபகாரகம்மம்பி உக்³க³ஹபரிபுச்சா²தா³னாதி³ ச காதும் ந வட்டதி, ஆபத்தி ஏவ ஹோதி, நிக்³க³ஹகம்மமேவ காதப்³ப³ம். தேனேவ அலஜ்ஜிபக்³க³ஹோபி படிக்கி²த்தோ. த⁴ம்மாமிஸபரிபோ⁴க³விவஜ்ஜனேனாபி ஹி து³ம்மங்கூனம் புக்³க³லானம் நிக்³க³ஹோ அதி⁴ப்பேதோ, ஸோ ச பேஸலானம் பா²ஸுவிஹாரஸத்³த⁴ம்மட்டி²திவினயானுக்³க³ஹாதி³அத்தா²ய ஏதத³த்த²த்தா ஸிக்கா²பத³பஞ்ஞத்தியா. தஸ்மா யம் யம் து³ம்மங்கூனம் உபத்த²ம்பா⁴ய பேஸலானம் அபா²ஸுவிஹாராய ஸத்³த⁴ம்மபரிஹானாதி³அத்தா²ய ஹோதி, தம் ஸப்³ப³ம்பி பரிபோ⁴கோ³ வா ஹோது அபரிபோ⁴கோ³ வா காதும் ந வட்டதி, ஏவம் கரோந்தா ஸாஸனம் அந்தரதா⁴பேந்தி, ஆபத்திஞ்ச ஆபஜ்ஜந்தி. த⁴ம்மாமிஸபரிபோ⁴கே³ஸு சேத்த² அலஜ்ஜீஹி ஏககம்மாதி³த⁴ம்மபரிபோ⁴கோ³ ஏவ பேஸலானம் அபா²ஸுவிஹாரஸத்³த⁴ம்மபரிஹானாதி³அத்தா²ய ஹோதி, ந ததா² ஆமிஸபரிபோ⁴கோ³. ந ஹி அலஜ்ஜீனம் பச்சயபரிபோ⁴க³மத்தேன பேஸலானம் அபா²ஸுவிஹாராதி³ ஹோதி, யதா²வுத்தத⁴ம்மபரிபோ⁴கே³ன பன ஹோதி, தப்பரிவஜ்ஜனேன ச பா²ஸுவிஹாராத³யோ. ததா² ஹி கதஸிக்கா²பத³வீதிக்கமா அலஜ்ஜிபுக்³க³லா உபோஸதா²தீ³ஸு பவிட்டா² ‘‘தும்ஹே காயத்³வாரே, வசீத்³வாரே ச வீதிக்கமம் கரோதா²’’திஆதி³னா பி⁴க்கூ²ஹி வத்தப்³பா³ ஹோந்தி, யதா² வினயஞ்ச அதிட்ட²ந்தா ஸங்க⁴தோ ப³ஹிகரணாதி³வஸேன ஸுட்டு² நிக்³க³ஹேதப்³பா³, ததா² அகத்வா தேஹி ஸஹ ஸம்வஸந்தாபி அலஜ்ஜினோவ ஹோந்தி ‘‘ஏகோபி அலஜ்ஜீ அலஜ்ஜிஸதம்பி கரோதீ’’திஆதி³வசனதோ (பாரா. அட்ட². 2.585). யதி³ ஹி தே ஏவம் ந நிக்³க³ஹிதா ஸியும், ஸங்கே⁴ கலஹாதி³ம் வட்³டே⁴த்வா உபோஸதா²தி³ஸாமக்³கீ³கம்மபடிபா³ஹனாதி³னா பேஸலானம் அபா²ஸும் கத்வா கமேன தே தே³வத³த்தவஜ்ஜிபுத்தகாத³யோ விய பரிஸம் வட்³டே⁴த்வா அத்தனோ விப்படிபத்திம் த⁴ம்மதோ வினயதோ தீ³பேந்தா ஸங்க⁴பே⁴தா³தி³ம்பி கத்வா நசிரஸ்ஸேவ ஸாஸனம் அந்தரதா⁴பேய்யும், தேஸு பன ஸங்க⁴தோ ப³ஹிகரணாதி³வஸேன நிக்³க³ஹிதேஸு ஸப்³போ³பாயம் உபத்³த³வோ ந ஹோதி. வுத்தஞ்ஹி –

‘‘து³ஸ்ஸீலபுக்³க³லே நிஸ்ஸாய உபோஸதோ² ந திட்ட²தி, பவாரணா ந திட்ட²தி, ஸங்க⁴கம்மானி நப்பவத்தந்தி, ஸாமக்³கீ³ ந ஹோதி…பே… து³ஸ்ஸீலேஸு பன நிக்³க³ஹிதேஸு ஸப்³போ³பி அயம் உபத்³த³வோ ந ஹோதி, ததோ பேஸலா பி⁴க்கூ² பா²ஸு விஹரந்தீ’’தி (பாரா. அட்ட². 1.39).

தஸ்மா ஏககம்மாதி³த⁴ம்மபரிபோ⁴கோ³வ ஆமிஸபரிபோ⁴க³தோபி அதிவிய அலஜ்ஜிவிவேகேன காதப்³போ³, ஆபத்திகரோ ச ஸத்³த⁴ம்மபரிஹானிஹேதுத்தாதி வேதி³தப்³ப³ம்.

அபிச உபோஸதோ² ந திட்ட²தி, பவாரணா ந திட்ட²தி, ஸங்க⁴கம்மானி நப்பவத்தந்தீதி ஏவம் அலஜ்ஜீஹி ஸத்³தி⁴ம் ஸங்க⁴கம்மாகரணஸ்ஸ அட்ட²கதா²யம் பகாஸிதத்தாபி சேதம் ஸிஜ்ஜ²தி, ததா² பரிவத்தலிங்க³ஸ்ஸ பி⁴க்கு²னோ பி⁴க்கு²னுபஸ்ஸயம் க³ச்ச²ந்தஸ்ஸ படிபத்திகதா²யம் ‘‘ஆராதி⁴கா ச ஹோந்தி ஸங்கா³ஹிகா லஜ்ஜினியோ, தா கோபேத்வா அஞ்ஞத்த² ந க³ந்தப்³ப³ம். க³ச்ச²தி சே, கா³மந்தரனதீ³பாரரத்திவிப்பவாஸக³ணஓஹீயனாபத்தீஹி ந முச்சதி…பே… அலஜ்ஜினியோ ஹோந்தி, ஸங்க³ஹம் பன கரோந்தி, தாபி பரிச்சஜித்வா அஞ்ஞத்த² க³ந்தும் லப்³ப⁴தீ’’தி ஏவம் அலஜ்ஜினீஸு து³தியிகாக³ஹணாதீ³ஸு ஸம்வாஸாபத்திபரிஹாராய நதீ³பாரக³மனாதி³க³ருகாபத்திட்டா²னானம் அனுஞ்ஞாதத்தா ததோபி அலஜ்ஜிஸம்வாஸாபத்தி ஏவ ஸத்³த⁴ம்மபரிஹானிஹேதுதோ க³ருகதராதி விஞ்ஞாயதி. ந ஹி லஹுகாபத்திட்டா²னம், அனாபத்திட்டா²னம் வா பரிஹரிதும் க³ருகாபத்திட்டா²னவீதிக்கமம் ஆசரியா அனுஜானந்தி, ததா² அஸம்வாஸபத³ஸ்ஸ அட்ட²கதா²யம் ‘‘ஸப்³பே³ஹிபி லஜ்ஜிபுக்³க³லேஹி ஸமம் ஸிக்கி²தப்³ப³பா⁴வதோ ஸமஸிக்கா²தா நாம. ஏத்த² யஸ்மா ஸப்³பே³பி லஜ்ஜினோ ஏதேஸு கம்மாதீ³ஸு ஸஹ வஸந்தி, ந ஏகோபி ததோ ப³ஹித்³தா⁴ ஸந்தி³ஸ்ஸதி, தஸ்மா தானி ஸப்³பா³னிபி க³ஹேத்வா ஏஸோ ஸம்வாஸோ நாமா’’தி ஏவம் லஜ்ஜீஹேவ ஏககம்மாதி³ஸம்வாஸோ வட்டதீதி பகாஸிதோ.

யதி³ ஏவம், கஸ்மா அஸம்வாஸிகேஸு அலஜ்ஜீ ந க³ணிதோதி? நாயம் விரோதோ⁴, யே க³ணபூரகே கத்வா கதம் கம்மம் குப்பதி, தேஸம் பாராஜிகாதி³அபகதத்தானஞ்ஞேவ அஸம்வாஸிகத்தே க³ஹிதத்தா. அலஜ்ஜினோ பன பகதத்தபூ⁴தாபி ஸந்தி, தே சே க³ணபூரணா ஹுத்வா கம்மம் ஸாதே⁴ந்தி, கேவலம் கத்வா அக³திக³மனேன கரோந்தானம் ஆபத்திகரா ஹோந்தி ஸபா⁴கா³பத்திஆபன்னா விய அஞ்ஞமஞ்ஞம். யஸ்மா அலஜ்ஜிதஞ்ச லஜ்ஜிதஞ்ச புது²ஜ்ஜனானம் சித்தக்க²ணபடிப³த்³த⁴ம், ந ஸப்³ப³காலிகம். ஸஞ்சிச்ச ஹி வீதிக்கமசித்தே உப்பன்னே அலஜ்ஜினோ ‘‘ந புன ஈதி³ஸம் கரிஸ்ஸாமீ’’தி சித்தேன லஜ்ஜினோ ச ஹோந்தி, தேஸு ச யே பேஸலேஹி ஓவதி³யமானாபி ந ஓரமந்தி, புனப்புனம் வீதிக்கமந்தி, தே ஏவ அஸம்வஸிதப்³பா³, ந இதரே லஜ்ஜித⁴ம்மே ஓக்கந்தத்தா. தஸ்மாபி அலஜ்ஜினோ அஸம்வாஸிகேஸு அக³ணேத்வா தப்பரிவஜ்ஜனத்த²ம் ஸோதே⁴த்வாவ உபோஸதா²தி³கரணம் அனுஞ்ஞாதம். ததா² ஹி ‘‘பாரிஸுத்³தி⁴ம் ஆயஸ்மந்தோ ஆரோசேத², பாதிமோக்க²ம் உத்³தி³ஸிஸ்ஸாமீ’’திஆதி³னா (மஹாவ. 134) அபரிஸுத்³தா⁴ய பரிஸாய உபோஸத²கரணஸ்ஸ அயுத்ததா பகாஸிதா, ‘‘யஸ்ஸ ஸியா ஆபத்தி ஸோ ஆவிகரேய்ய…பே… பா²ஸு ஹோதீ’’தி (மஹாவ. 134) ஏவம் அலஜ்ஜிம்பி லஜ்ஜித⁴ம்மே பதிட்டா²பேத்வா உபோஸத²கரணப்பகாரோ ச வுத்தோ, ‘‘கச்சித்த² பரிஸுத்³தா⁴…பே… பரிஸுத்³தே⁴த்தா²யஸ்மந்தோ’’தி (பாரா. 442, 458, 662; பாசி. 551, 575, 655) ச பாரிஸுத்³தி⁴உபோஸதே² ‘‘பரிஸுத்³தோ⁴ அஹம் ப⁴ந்தே, பரிஸுத்³தோ⁴தி மம் தா⁴ரேதா²’’தி (மஹாவ. 168) ச ஏவம் உபோஸத²ம் கரோந்தானம் பரிஸுத்³த⁴தா ச பகாஸிதா, வசனமத்தேன அனோரமந்தானஞ்ச உபோஸத²பவஆரணட்ட²பனவிதி⁴ ச வுத்தா, ஸப்³ப³தா² லஜ்ஜித⁴ம்மம் அனோக்கமந்தேஹி ஸம்வாஸஸ்ஸ அயுத்ததாய நிஸ்ஸயதா³னக்³க³ஹணபடிக்கே²போ, தஜ்ஜனீயாதி³னிக்³க³ஹகம்மகரணஞ்ச உக்கே²பனீயகம்மகரணேன ஸானுவத்தகபரிஸஸ்ஸ அலஜ்ஜிஸ்ஸ அஸம்வாஸிகத்தபாபனவிதி⁴ ச வுத்தா. தஸ்மா யதா²வுத்தேஹி ஸுத்தனயேஹி, அட்ட²கதா²வசனேஹி ச பகதத்தேஹிபி அபகதத்தேஹிபி ஸப்³பே³ஹி அலஜ்ஜீஹி ஏககம்மாதி³ஸம்வாஸோ ந வட்டதி, கரோந்தானம் ஆபத்தி ஏவ து³ம்மங்கூனம் புக்³க³லானம் நிக்³க³ஹத்தா²யேவ ஸப்³ப³ஸிக்கா²பதா³னம் பஞ்ஞத்தத்தாதி நிட்ட²மேத்த² க³ந்தப்³ப³ம். தேனேவ து³தியஸங்கீ³தியம் பகதத்தாபி அலஜ்ஜினோ வஜ்ஜிபுத்தகா யஸத்தே²ராதீ³ஹி மஹந்தேன வாயாமேன ஸங்க⁴தோ வியோஜிதா. ந ஹி தேஸு பாராஜிகாதி³அஸம்வாஸிகா அத்தி² தேஹி தீ³பிதானம் த³ஸன்னம் வத்தூ²னம் (சூளவ. 452) லஹுகாபத்திவிஸயத்தா.

தஸ்ஸ பன ஸந்திகேதி மஹாரக்கி²தத்தே²ரஸ்ஸ ஸந்திகே. க²ரபத்தந்தி க²ரஸங்கா²தம் ஸுவண்ணபதிரூபகம் வத்து². தா³யகேஹி அஸதியா தி³ன்னம் ரூபியம் தேஹி புன ஸகஸஞ்ஞாய க³ண்ஹந்தே அதா³தும், நிஸ்ஸக்³கி³யவத்து²ம் க³ண்ஹாஹீதி தா³துஞ்ச ந வட்டதீதி ஆஹ ‘‘தவ சோளகம் பஸ்ஸாஹீ’’தி. ஏவம் வத்வாபி பன நட்ட²வத்து²ஸ்மிம் விய நிஸ்ஸஜ்ஜிதப்³பா³பா⁴வேபி ஆபத்தி தே³ஸேதப்³பா³வ. அஸதியாபி ஹி தம் வத்து²ம் வத்தா²தி³னா ஸஹத்தே²ன க³ஹேத்வா ‘‘இத³ம் தே³மீ’’தி தி³ன்னம், ததா³ பரிச்சாக³ஸப்³பா⁴வதோ தா³னமேவ ஹோதி ‘‘அப்பக்³க⁴ம் த³ஸ்ஸாமீ’’தி மஹக்³க⁴ஸ்ஸ தா³னே விய. படிக்³க³ண்ஹந்தஸ்ஸ ச அஸதியா தி³ய்யமானத்தே ஞாதேபி அதி³ன்னாதா³னம் ந ஹோதி தா³யகேஹி தி³ன்னத்தா, தஸ்மா ரூபியம் நிஸ்ஸக்³கி³யமேவ ஹோதி. கேசி பன ‘‘ஈதி³ஸம் நாம ந ஹோதி, தேனேவ சேத்த² ‘தவ சோளகம் பஸ்ஸா’தி வுத்த’’ந்தி வத³ந்தி, தம் நோ நக்க²மதி, வீமம்ஸிதப்³ப³ம்.

586. ஏகபரிச்சே²தா³னீதி ஸியா கிரியத்தம், ஸியா அகிரியத்தஞ்ச ஸந்தா⁴ய வுத்தம். ஜாதரூபரஜதபா⁴வோ, அத்துத்³தே³ஸிகதா, க³ஹணாதீ³ஸு அஞ்ஞதரபா⁴வோதி இமானேத்த² தீணி அங்கா³னி.

ரூபியஸிக்கா²பத³வண்ணனா நிட்டி²தா.

9. ரூபியஸம்வோஹாரஸிக்கா²பத³வண்ணனா

587. நவமே ஜாதரூபாதி³சதுப்³பி³த⁴னிஸ்ஸக்³கி³யவத்து² இத⁴ ரூபியக்³க³ஹணேனேவ க³ஹிதந்தி ஆஹ ‘‘ஜாதரூபரஜதபரிவத்தன’’ந்தி. படிக்³க³ஹிதபரிவத்தனேதி கப்பியவோஹாரேன, அகப்பியவோஹாரேன வா படிக்³க³ஹிதஸ்ஸ ரூபியஸ்ஸ பரிவத்தனே.

589. பாளியம் க⁴னகதந்தி இட்ட²காதி³. ரூபியம் நாம ஸத்து²வண்ணோதிஆதீ³ஸு கிஞ்சாபி கேவலம் ரஜதம் ந க³ஹிதம், ததா²பி ரூபியபதே³னேவ தம் க³ஹிதந்தி த³ட்ட²ப்³ப³ம். ஸுத்³தோ⁴ ரூபியஸம்வோஹாரோ ஏவ வுத்தோதி அஜ்ஜா²ஹரிதப்³ப³ம். ரூபியே ரூபியஸஞ்ஞீதிஆதி³ம்ஹி வினிச்ச²யம் வக்கா²மாதி பாட²ஸேஸோ.

591. பாளியம் ரூபியே ரூபியஸஞ்ஞீதி அத்தனா தி³ய்யமானம் ஸகஸந்தகம் ஸந்தா⁴ய வுத்தம். ரூபியம் சேதாபேதீதி பரஸந்தகம். ஏஸ நயோ ஸேஸேஸுபி. தத்த² அரூபிய-ஸத்³தே³ன து³க்கடவத்து²ம்பி ஸங்க³ண்ஹாதி. பச்சி²மே பன திகே ‘‘அரூபியே ரூபியஸஞ்ஞீ அரூபியம் சேதாபேதி, ஆபத்தி து³க்கடஸ்ஸா’’தி இமினா நயேன ஸப்³ப³த்த² யோஜனா வேதி³தப்³பா³. இமஸ்மிஞ்ச திகே அரூபிய-ஸத்³தே³ன கப்பியவத்து²யேவ க³ஹிதம், ந முத்தாதி³து³க்கடவத்து² அந்தே ‘‘பஞ்சன்னம் ஸஹ அனாபத்தீ’’தி வுத்தத்தா. கிஞ்சாபி து³க்கடவத்து² ந க³ஹிதம், ததா²பி து³க்கடவத்து²னா து³க்கடவத்து²ம், கப்பியவத்து²னா து³க்கடவத்து²ஞ்ச பரிவத்தயதோ து³க்கடம், நயதோ ஸித்³த⁴மேவ ஹோதி. தஞ்ச து³க்கடவத்து²ம்ஹி தத²ஸஞ்ஞாய வா அதத²ஸஞ்ஞாய வா விமதியா வா பரிவத்தேந்தஸ்ஸபி ஹோதியேவ அசித்தகத்தா இமஸ்ஸ ஸிக்கா²பத³ஸ்ஸ. பஞ்சன்னம் ஸஹாதி பஞ்சஹி ஸஹத⁴ம்மிகேஹி ஸஹ.

இதா³னி ‘‘நிஸ்ஸக்³கி³யவத்து²னா து³க்கடவத்து²ம் வா’’திஆதி³னா வுத்தஸ்ஸ அத்த²ஸ்ஸ பாளியம் ஸரூபேன அனாக³தத்தேபி நயதோ லப்³ப⁴மானதம் த³ஸ்ஸேதும் ‘‘யோ ஹி அய’’ந்திஆதி³ வுத்தம். ஏத்த² ச யஸ்மா ரூபியேன பரிவத்திதம் அரூபியம் நிஸ்ஸட்ட²ம்பி ஸப்³பே³ஸம்பி அகப்பியத்தா நிஸ்ஸக்³கி³யமேவ ந ஹோதி நிஸ்ஸஜ்ஜித்வா பரிபு⁴ஞ்ஜிதப்³ப³ஸ்ஸேவ நிஸ்ஸஜ்ஜிதப்³ப³தோ, கேவலம் பன இத³ம் ச²ட்³டே³த்வா பாசித்தியமேவ பரிவத்தகேன தே³ஸேதப்³ப³ம், தஸ்மா ‘‘ரூபியே ரூபியஸஞ்ஞீ அரூபியம் சேதாபேதி, நிஸ்ஸக்³கி³யம் பாசித்திய’’ந்திஆதி³ திகோ ப⁴க³வதா ந வுத்தோ, தீஸுபி பதே³ஸு பரிவத்தியமானஸ்ஸ அரூபியத்தேன நிஸ்ஸக்³கி³யவசனாயோகா³ ரூபியஸ்ஸேவ நிஸ்ஸஜ்ஜிதப்³ப³தோ. ரூபியஸ்ஸேவ ஹி நிஸ்ஸட்ட²ஸ்ஸ ஆராமிகாதீ³ஹி படிபஜ்ஜனவிதி⁴ பாளியம் த³ஸ்ஸிதோ, ந அரூபியஸ்ஸ. தஸ்மா பாசித்தியமத்தஸம்ப⁴வத³ஸ்ஸனத்த²மேவ பனேத்த² அட்ட²கதா²யம் ‘‘அவுத்தோபி அயம்…பே… திகோ வேதி³தப்³போ³’’தி வுத்தம், ந பன தஸ்ஸ வத்து²னோ நிஸ்ஸக்³கி³யதாத³ஸ்ஸனத்த²ம். தேனேவ பத்தசதுக்கே ‘‘ந ஸக்கா கேனசி உபாயேன கப்பியம் காது’’ந்திஆதி³ வுத்தம். அயம் அம்ஹாகம் க²ந்தி. அத்தனோ வா ஹீதிஆதி³ து³தியதிகானுலோமேனேவ ததியத்திகஸ்ஸ ஸிஜ்ஜ²னப்பகாரம் ஸமத்தே²தும் வுத்தம். தத்ராயம் அதி⁴ப்பாயோ – யஸ்மா ஹி யதா² அத்தனோ அரூபியேன பரஸ்ஸ ரூபியம் சேதாபேந்தஸ்ஸ ஏகஸ்மிம் அந்தே ரூபியஸம்ப⁴வதோ ‘‘ரூபியஸம்வோஹாரோ கதோ ஏவ ஹோதீ’’தி து³தியத்திகோ வுத்தோ, ஏவம் அத்தனோ ரூபியேன பரஸ்ஸ அரூபியம் சேதாபேந்தஸ்ஸாபி ஹோதீதி ததியோ திகோ வத்தப்³போ³ ப⁴வேய்ய, ஸோ பன து³தியத்திகேனேவ ஏகதோ ரூபியபக்க²ஸாமஞ்ஞேன ஸிஜ்ஜ²தீதி பாளியம் ந வுத்தோதி. தத்த² ஏகந்தேன ரூபியபக்கே²தி ஏகேன அந்தேன ரூபியபக்கே², ‘‘ஏகதோ ரூபியபக்கே²’’தி வா பாடோ².

இதா³னி து³தியத்திகே அரூபியபத³ஸ்ஸ அத்த²பூ⁴தேஸு து³க்கடவத்து²கப்பியவத்தூ²ஸு து³க்கடவத்து²னா ரூபியாதி³பரிவத்தனே ஆபத்திபே⁴த³ம் த³ஸ்ஸேதும் ‘‘து³க்கடவத்து²னா’’திஆதி³ ஆரத்³த⁴ம். து³க்கடவத்து²னா து³க்கடவத்து²ந்திஆதி³ பன து³க்கடவத்து²னா பரிவத்தனப்பஸங்கே³ பாளியம் அவுத்தஸ்ஸாபி அத்த²ஸ்ஸ நயதோ லப்³ப⁴மானதம் த³ஸ்ஸேதும் வுத்தம். தத்த² இமினாதி ரூபியஸம்வோஹாரஸிக்கா²பதே³ன, தேன ச து³க்கடஸ்ஸ அசித்தகதம்பி த³ஸ்ஸேதி. அஞ்ஞத்ர ஸஹத⁴ம்மிகேஹீதி ‘‘பஞ்சன்னம் ஸஹ அனாபத்தீ’’தி வசனதோ வுத்தம், தேனாபி கயவிக்கயஸிக்கா²பத³ஸ்ஸ கப்பியவத்து²னிஸ்ஸிததம் ஏவ ஸாதே⁴தி. இமம்…பே… ரூபியசேதாபனஞ்ச ஸந்தா⁴ய வுத்தந்தி பகதேன ஸம்ப³ந்தோ⁴. இதா⁴தி இமஸ்மிம் ஸிக்கா²பதே³. தத்தா²தி கயவிக்கயஸிக்கா²பதே³ (பாரா. 593).

ஏவம் து³க்கடவத்து²னா ரூபியாதி³பரிவத்தனே ஆபத்திபே⁴த³ம் த³ஸ்ஸேத்வா இதா³னி கப்பியவத்து²னாபி த³ஸ்ஸேதும் ‘‘கப்பியவத்து²னா பனா’’திஆதி³ ஆரத்³த⁴ம். தத்த² தேனேவாதி கப்பியவத்து²னா ஏவ. ‘‘ரூபியம் உக்³க³ண்ஹித்வா’’தி இத³ம் உக்கட்ட²வஸேன வுத்தம். முத்தாதி³து³க்கடவத்து²ம்பி உக்³க³ஹேத்வா காரிதம்பி பஞ்சன்னம்பி ந வட்டதி ஏவ. ஸமுட்டா²பேதீதி ஸயம் க³ந்த்வா, ‘‘இமம் கஹாபணாதி³ம் கம்மகாரானம் த³த்வா பீ³ஜம் ஸமுட்டா²பேஹீ’’தி ஏவம் அஞ்ஞம் ஆணாபேத்வா வா ஸமுட்டா²பேதி. மஹாஅகப்பியோதி அத்தனாவ பீ³ஜதோ பட்டா²ய தூ³ஸிதத்தா அஞ்ஞஸ்ஸ மூலஸாமிகஸ்ஸ அபா⁴வதோ வுத்தம். ஸோ ஹி சோரேஹி அச்சி²ன்னோபி புன லத்³தோ⁴ ஜானந்தஸ்ஸ கஸ்ஸசிபி ந வட்டதி. யதி³ ஹி வட்டேய்ய, தளாகாதீ³ஸு விய அச்சி²ன்னோ வட்டதீதி ஆசரியா வதே³ய்யும். ந ஸக்கா கேனசி உபாயேனாதி ஸங்கே⁴ நிஸ்ஸஜ்ஜனேன, சோராதி³அச்சி²ந்த³னாதி³னா ச கப்பியம் காதும் ந ஸக்கா, இத³ஞ்ச தேன ரூபேன டி²தம், தம்மூலிகேன வத்து²முத்தாதி³ரூபேன டி²தஞ்ச ஸந்தா⁴ய வுத்தம். து³க்கடவத்து²ம்பி ஹி தம்மூலிககப்பியவத்து²ஞ்ச ந ஸக்கா கேனசி உபாயேன தேன ரூபேன கப்பியம் காதும். யதி³ பன ஸோ பி⁴க்கு² தேன கப்பியவத்து²து³க்கடவத்து²னா புன ரூபியம் சேதாபேய்ய, தம் ரூபியம் நிஸ்ஸஜ்ஜாபேத்வா அஞ்ஞேஸம் கப்பியம் காதும்பி ஸக்கா ப⁴வேய்யாதி த³ட்ட²ப்³ப³ம்.

பத்தம் கிணாதீதி ஏத்த² ‘‘இமினா கஹாபணாதி³னா கம்மாரகுலதோ பத்தம் கிணித்வா ஏஹீ’’தி ஆராமிகாதீ³ஹி கிணாபனம்பி ஸங்க³ஹிதந்தி வேதி³தப்³ப³ம். தேனேவ ராஜஸிக்கா²பத³ட்ட²கதா²யம் ‘‘ஏத்தகேஹி கஹாபணேஹி ஸாடகே ஆஹர, ஏத்தகேஹி யாகு³ஆதீ³னி ஸம்பாதே³ஹீதி வத³தி, யம் தே ஆஹரந்தி, ஸப்³பே³ஸம் அகப்பியம். கஸ்மா? கஹாபணானம் விசாரிதத்தா’’தி (பாரா. அட்ட². 2.538-539) வுத்தம். இமினா பன வசனேன யம் மாதிகாட்ட²கதா²யம் ரூபியஸம்வோஹாரஸிக்கா²பத³ம் ‘‘அனாணத்திக’’ந்தி வுத்தம், தம் ந ஸமேதி. ந கேவலஞ்ச இமினா, பாளியாபி தம் ந ஸமேதி. பாளியஞ்ஹி நிஸ்ஸட்ட²ரூபியேன ஆராமிகாதீ³ஹி ஸப்பியாதி³ம் பரிவத்தாபேதும் ‘‘ஸோ வத்தப்³போ³ ‘ஆவுஸோ, இமம் ஜானாஹீ’தி. ஸசே ஸோ ப⁴ணதி ‘இமினா கிம் ஆஹரீயதூ’தி, ந வத்தப்³போ³ ‘இமம் வா இமம் வா ஆஹரா’தி. கப்பியம் ஆசிக்கி²தப்³ப³ம் ‘ஸப்பி வா’’’திஆதி³னா ரூபியஸம்வோஹாரம் பரிமோசேத்வாவ வுத்தம். ‘‘இமினா ரூபியேன கிம் ஆஹரீயதூ’’தி புச்ச²ந்தோ ‘‘இமம் ஆஹரா’’தி வுத்தேபி அதி⁴காரதோ ‘‘இமினா ரூபியேன இமம் ஆஹரா’’தி பி⁴க்கூ²ஹி ஆணத்தோ ஏவ ஹோதீதி தம் ரூபியஸம்வோஹாரம் பரிவஜ்ஜேதும் ‘‘ந வத்தப்³போ³ ‘இமம் வா இமம் வா ஆஹரா’’’தி படிக்கே²போ கதோ, அனாபத்திவாரேபி ‘‘கப்பியகாரகஸ்ஸ ஆசிக்க²தீ’’தி ந வுத்தம். கயவிக்கயஸிக்கா²பதே³ (பாரா. 595) பன ததா² வுத்தம், தஸ்மா இத³ம் ஸாணத்திகம் கயவிக்கயமேவ அனாணத்திகந்தி க³ஹேதப்³ப³ம்.

மூலஸ்ஸ அனிஸ்ஸட்ட²த்தாதி யேன உக்³க³ஹிதமூலேன பத்தோ கீதோ, தஸ்ஸ மூலஸ்ஸ ஸங்க⁴மஜ்ஜே² அனிஸ்ஸட்ட²த்தா, ஏதேன ரூபியமேவ நிஸ்ஸஜ்ஜிதப்³ப³ம், ந தம்மூலிகம் அரூபியந்தி த³ஸ்ஸேதி. யதி³ ஹி தேன ரூபியேன அஞ்ஞம் ரூபியம் சேதாபேய்ய, தம் ரூபியஸம்வோஹாரஸிக்கா²பதே³ ஆக³தனயேனேவ நிஸ்ஸஜ்ஜாபேத்வா ஸேஸேஹி பரிபு⁴ஞ்ஜிதப்³ப³ம் ப⁴வேய்யாதி. ‘‘மூலஸ்ஸ அஸம்படிச்சி²தத்தா’’தி இமினா மூலஸ்ஸ கி³ஹிஸந்தகத்தம், தேனேவ பத்தஸ்ஸ ரூபியஸம்வோஹாரானுப்பன்னதஞ்ச த³ஸ்ஸேதி. பஞ்சஸஹத⁴ம்மிகஸந்தகேனேவ ஹி ரூபியஸம்வோஹாரதோ³ஸோ. தத்த² ச அத்தனோ ஸந்தகே பாசித்தியம், இதரத்த² து³க்கடம்.

நிஸ்ஸஜ்ஜீதி தா³னவஸேன வுத்தம், ந வினயகம்மவஸேன. தேனேவ ‘‘ஸப்பிஸ்ஸ பூரேத்வா’’தி வுத்தம். யம் அத்தனோ த⁴னேன பரிவத்தேதி, தஸ்ஸ வா த⁴னஸ்ஸ ரூபியபா⁴வோ, பரிவத்தனபரிவத்தாபனேஸு அஞ்ஞதரபா⁴வோ சாதி இமானேத்த² த்³வே அங்கா³னி.

ரூபியஸம்வோஹாரஸிக்கா²பத³வண்ணனா நிட்டி²தா.

10. கயவிக்கயஸிக்கா²பத³வண்ணனா

593-5. த³ஸமே பாளியம் ஜானாஹீதி இதா³னேவ உபதா⁴ரேஹி, இத³ம் பச்சா² ச²ட்³டே³தும் ந ஸக்காதி அதி⁴ப்பாயோ. இமினாதி பி⁴க்கு²னா தி³ய்யமானம் வுத்தம். இமந்தி பரேன படிதி³ய்யமானம். ஸேஸஞாதகேஸு ஸத்³தா⁴தே³ய்யவினிபாதஸம்ப⁴வதோ தத³பா⁴வட்டா²னம்பி த³ஸ்ஸேதும் ‘‘மாதரம் பன பிதரம் வா’’தி வுத்தம். ந ஸக்கா தம் படிக்கி²பிதுந்தி ஏத்த² யதா² ரூபியம் ப⁴தகானம் த³த்வா அஸ்ஸாமிகபூ⁴மியம் அயோபீ³ஜஸமுட்டா²பனே ப⁴தியா க²ணந்தானம் ஸந்திகா க³ஹிதப⁴ண்ட³கபா⁴வேபி பாசித்தியம் ஹோதி, ஏவமிதா⁴பீதி கேசி வத³ந்தி, தம் ந யுத்தம். யஞ்ஹி அஸ்ஸாமிகபூ⁴மிம் க²ணித்வா ஸமுட்டா²பிதம் அயோபீ³ஜம், தம் ப⁴தகானம் ஸந்தகம் நாம ஹோதி, தத³த்த²ஞ்ச தேஸம் ரூபியம் தே³ந்தஸ்ஸ ரூபியஸம்வோஹாரோவ ஹோதி அகப்பியவோஹாரேன ரஜனச்ச²ல்லிஆதீ³னம் ஆஹராபனே கயவிக்கயோ விய, தாதி³ஸம்பி பரப⁴ண்ட³ம் இத⁴ வத்த²தோ⁴வனாதீ³ஸு நத்தி², தஸ்மா அட்ட²கதா²பமாணேனேவேத்த² பாசித்தியம் க³ஹேதப்³ப³ம்.

597. புஞ்ஞம் ப⁴விஸ்ஸதீதி தே³தீதி ஏத்த² ஸசே பி⁴க்கு² அத்தனோ ப⁴ண்ட³ஸ்ஸ அப்பக்³க⁴தம் ஞத்வாபி அகதே²த்வா ‘‘இதா³னேவ உபபரிக்கி²த்வா க³ண்ஹ, மா பச்சா² விப்படிஸாரீ ஹோஹீ’’தி வத³தி, இதரோ ச அத்தனோ தி³ய்யமானஸ்ஸ மஹக்³க⁴தம் அஜானந்தோ ‘‘ஊனம் வா அதி⁴கம் வா தும்ஹாகமேவா’’தி த³த்வா க³ச்ச²தி, பி⁴க்கு²ஸ்ஸ அனாபத்தி உபனந்த³ஸ்ஸ விய பரிப்³பா³ஜகவத்து²க்³க³ஹணே. விப்படிஸாரிஸ்ஸ புன ஸகஸஞ்ஞாய ஆக³தஸ்ஸ யம் அதி⁴கம் க³ஹிதம், தம் தா³தப்³ப³ம். யேன யம் பரிவத்தேதி, தேஸம் உபி⁴ன்னம் கப்பியவத்து²தா, அஸஹத⁴ம்மிகதா, கயவிக்கயாபஜ்ஜனஞ்சாதி இமானேத்த² தீணி அங்கா³னி.

கயவிக்கயஸிக்கா²பத³வண்ணனா நிட்டி²தா.

நிட்டி²தோ கோஸியவக்³கோ³ து³தியோ.