2. காயஸம்ஸக்³க³ஸிக்கா²பத³வண்ணனா

269. து³தியே கேஸுசி வாதபானேஸு விவடேஸு ப³ஹிபி அந்த⁴காரத்தா ஆலோகோ ந பவிஸதி, விவடகவாடேன அஞ்ஞதோ ஆக³ச்ச²ந்தஸ்ஸ ஆலோகஸ்ஸ நிவாரணதோ கவாடஸ்ஸ பிட்டி²பஸ்ஸே க⁴னந்த⁴காரோவ ஹோதி, தாதி³ஸானி ஸந்தா⁴ய ‘‘யேஸு விவடேஸு அந்த⁴காரோ ஹோதீ’’திஆதி³ வுத்தம்.

ப்³ராஹ்மணீ அத்தனோ அங்க³மங்கா³னம் பராமஸனக்க²ணே அனாசாரானுகூலா ஹுத்வா ந கிஞ்சி வத்வா பி⁴க்கு²னோ வண்ணப⁴ணனக்க²ணே வுத்தத்தா ஆஹ ‘‘பப்³ப³ஜிதுகாமோ மஞ்ஞேதி ஸல்லக்கே²த்வா’’தி, பப்³ப³ஜிதுகாமோ வியாதி ஸல்லக்கே²த்வாதி அத்தோ². குலித்தீ²னம் ஏவம் பரேஹி அபி⁴ப⁴வனம் நாம அச்சந்தாவமானோதி ஆஹ ‘‘அத்தனோ விப்பகார’’ந்தி.

270. ஓதிண்ணஸத்³த³ஸ்ஸ கம்மஸாத⁴னபக்க²ம் ஸந்தா⁴ய ‘‘யக்கா²தீ³ஹீ’’திஆதி³ வுத்தம், கத்துஸாத⁴னபக்க²ம் ஸந்தா⁴ய ‘‘கூபாதீ³னீ’’திஆதி³ வுத்தம். தஸ்மிம் வத்து²ஸ்மிந்தி இத்தி²ஸரீரஸங்கா²தே வத்து²ஸ்மிம்.

271. அஸ்ஸாதி ஹத்த²க்³கா³ஹாதி³கஸ்ஸ ஸப்³ப³ஸ்ஸ.

273. ஏதேஸம் பதா³னந்தி ஆமஸனாதி³பதா³னம். இத்தி²ஸஞ்ஞீதி மனுஸ்ஸித்தி²ஸஞ்ஞீ. நம்-ஸத்³த³ஸ்ஸ காயவிஸேஸனபா⁴வேன ஏதம் காயந்தி அத்த²ம் த³ஸ்ஸேதும் ‘‘அத² வா’’திஆதி³ வுத்தம். ஓமஸந்தோ…பே… ஏகாவ ஆபத்தீதி அனிவத்த²ம் ஸந்தா⁴ய வுத்தம், ந நிவத்த²ம். ஸனிவத்தா²ய பன மத்த²கதோ பட்டா²ய ஹத்த²ம் ஓதாரேந்தஸ்ஸ நிவத்த²ஸாடகோபரி ஹத்தே² ஆருள்ஹே து²ல்லச்சயம். ஸாடகதோ ஹத்த²ம் ஓதாராபேத்வா ஜங்க⁴தோ பட்டா²ய ஓமஸந்தஸ்ஸ புன ஸங்கா⁴தி³ஸேஸோ.

யதா²னித்³தி³ட்ட²னித்³தே³ஸேதி யதா²வுத்தகாயஸம்ஸக்³க³னித்³தே³ஸே. தேனாதி யேன காரணேன வத்து²ஸஞ்ஞாத³யோ ஹோந்தி, தேன காரணேன. யதா²வுத்தஸிக்கா²பத³னித்³தே³ஸே வுத்தம் க³ருகம் பி⁴க்கு²னோ கரேய்ய பகாஸேய்யாதி யோஜனா.

ஸஞ்ஞாய விராகி³தம்ஹீதி ஸஞ்ஞாய விரத்³தா⁴ய. இத³ம் நாம வத்து²ந்தி இமஸ்மிம் ஸிக்கா²பதே³ ஆக³தம், அனாக³தஞ்ச யம் கிஞ்சி ஸவிஞ்ஞாணகாவிஞ்ஞாணகம் பு²ஸந்தஸ்ஸ அனாபத்திஅபா⁴வம் ஸந்தா⁴ய வுத்தம்.

ஸாரத்தந்தி காயஸம்ஸக்³க³ராகே³னேவ ஸாரத்தம். விரத்தந்தி காயஸம்ஸக்³க³ராக³ரஹிதம் மாதுஆதி³ம் ஸந்தா⁴ய வத³தி. து³க்கடந்தி மாதுபேமாதி³வஸேன க³ண்ஹந்தஸ்ஸ வஸேன வுத்தம், விரத்தம்பி இத்தி²ம் காயஸம்ஸக்³க³ராகே³ன க³ண்ஹந்தஸ்ஸ பன ஸங்கா⁴தி³ஸேஸோ ஏவ. இமாய பாளியா ஸமேதீதி ஸம்ப³ந்தோ⁴. கத²ம் ஸமேதீதி சே? யதி³ ஹி ‘‘இத்தி²யா காயப்படிப³த்³த⁴ம் க³ண்ஹிஸ்ஸாமீ’’தி சித்தே உப்பன்னே இத்தி²ஸஞ்ஞா விராகி³தா ப⁴வேய்ய. காயப்படிப³த்³த⁴க்³க³ஹணேபி து²ல்லச்சயேனாபி ந ப⁴விதப்³ப³ம் இத்தி²ஸஞ்ஞாய ஏவ பாளியம் (பாரா. 276) து²ல்லச்சயஸ்ஸ வுத்தத்தா, தஸ்மா ‘‘இத்தி²யா காயப்படிப³த்³த⁴ம் க³ண்ஹிஸ்ஸாமீதி காயம் க³ண்ஹந்தஸ்ஸ இத்தி²ஸஞ்ஞா விராகி³தா நாம ந ஹோதீதி காயப்படிப³த்³த⁴ம் க³ண்ஹிஸ்ஸாமீதி காயம் க³ண்ஹதோ இத்தி²ஸஞ்ஞாய சேவ காயஸம்ஸக்³க³ராக³ஸ்ஸ ச காயக்³க³ஹணஸ்ஸ ச ஸம்ப⁴வா யதா²வத்து²கம் ஸங்கா⁴தி³ஸேஸமேவ ஆபஜ்ஜதீ’’தி மஹாஸுமத்தே²ரேன வுத்தவாதோ³வ இமாய பாளியா ஸமேதி. அட்ட²கதா²யஞ்ஹி ‘‘ஸம்ப³ஹுலா இத்தி²யோ பா³ஹாஹி பரிக்கி²பித்வா க³ண்ஹாமீ’’தி ஸஞ்ஞாய பரிக்கி²பதோ மஜ்ஜ²க³தானம் வஸேன து²ல்லச்சயம் வுத்தம். ந ஹி தஸ்ஸ ‘‘மஜ்ஜ²க³தா இத்தி²யோ காயப்படிப³த்³தே⁴ன க³ண்ஹாமீ’’தி ஸஞ்ஞா அத்தி², தஸ்மா அட்ட²கதா²யபி ஸமேதீதி க³ஹேதப்³ப³ம். நீலேன து³விஞ்ஞேய்யபா⁴வதோ காளித்தீ² வுத்தா.

279. ஸேவனாதி⁴ப்பாயோதி ப²ஸ்ஸஸுக²ஸேவனாதி⁴ப்பாயோ. காயப்படிப³த்³தா⁴மஸனவாரே காயப்படிப³த்³த⁴வஸேன ப²ஸ்ஸபடிவிஜானனம் வேதி³தப்³ப³ம். சித்துப்பாத³மத்தே ஆபத்தியாபா⁴வதோ அனாபத்தீதி இத³ம் காயஸம்ஸக்³க³ராக³மத்தேன காயசலனஸ்ஸ அனுப்பத்திதோ இத்தி²யா கரியமானகாயசலனம் ஸாதி³யதோபி பயோகா³பா⁴வம் ஸந்தா⁴ய வுத்தம். பட²மபாராஜிகே பன பரேஹி உபக்கமியமானஸ்ஸ அபா⁴வதோ ஸேவனாதி⁴ப்பாயே உப்பன்னே தேன அதி⁴ப்பாயேன அங்க³ஜாதக்கோ²போ⁴ ஸயமேவ அவஸ்ஸம் ஸஞ்ஜாயதி, ஸோ ச தேன கதோ நாம ஹோதீதி பாராஜிகம் வுத்தம், தேனேவ நயேன பட²மஸங்கா⁴தி³ஸேஸேபி பரேன கரியமானபயோக³ஸாதி³யமானேபி அங்க³ஜாதக்கோ²ப⁴ஸம்ப⁴வேன ஆபத்தி ஹோதீதி வேதி³தப்³ப³ம். சதுத்தே²தி ‘‘ந ச காயேன வாயமதி, ந ச ப²ஸ்ஸம் படிவிஜானாதீ’’தி இமஸ்மிம் வாரே. ப²ஸ்ஸபடிவிஜானனம்பீதி அபி-ஸத்³தே³ன ததியவாரே விய வாயாமோபி நத்தீ²தி த³ஸ்ஸேதி. நிஸ்ஸக்³கி³யேன நிஸ்ஸக்³கி³யாமஸனே வியாதி இத³ம் பன ப²ஸ்ஸபடிவிஜானனாபா⁴வமத்தஸ்ஸேவ நித³ஸ்ஸனம், ந பயோகா³பா⁴வஸ்ஸாதி த³ட்ட²ப்³ப³ம். மோக்கா²தி⁴ப்பாயோதி ஏத்த² சித்தஸ்ஸ லஹுபரிவத்திதாய அந்தரந்தரா காயஸம்ஸக்³க³ராகே³ ஸமுப்பன்னேபி மோக்கா²தி⁴ப்பாயஸ்ஸ அவிச்சி²ன்னதாய அனாபத்தியேவ, விச்சி²ன்னே பன தஸ்மிம் ஆபத்தி ஏவ.

பத³பா⁴ஜனீயவண்ணனானயோ.

281. ஏத்த² க³ண்ஹாஹீதி ந வத்தப்³பா³தி கே³ஹஸிதபேமேன காயப்படிப³த்³தே⁴ன பு²ஸனே து³க்கடம் ஸந்தா⁴ய வுத்தம், காருஞ்ஞேன பன வத்தா²தி³ம் க³ஹேதும் அஸக்கோந்திம் ‘‘க³ண்ஹா’’தி வத³ந்தஸ்ஸாபி அவஸஸபா⁴வப்பத்தம் உத³கே நிமுஜ்ஜந்திம் காருஞ்ஞேன ஸஹஸா அனாமாஸந்தி அசிந்தேத்வா கேஸாதீ³ஸு க³ஹேத்வா மோக்கா²தி⁴ப்பாயேன ஆகட்³ட⁴தோபி அனாபத்தியேவ. ந ஹி மீயமானம் மாதரம் உக்கி²பிதும் ந வட்டதி. அஞ்ஞாதிகாய இத்தி²யாபி ஏஸேவ நயோ. உக்கட்டா²ய மாதுயாபி ஆமாஸோ ந வட்டதீதி த³ஸ்ஸனத்த²ம் ‘‘மாதர’’ந்தி வுத்தம். தஸ்ஸா காதப்³ப³ம் பன அஞ்ஞாஸம்பி இத்தீ²னம் கரோந்தஸ்ஸாபி அனாபத்தியேவ அனாமாஸத்தே விஸேஸாபா⁴வா.

திணண்டு³பகந்தி ஹிரிவேராதி³மூலேஹி கேஸாலங்காரத்தா²ய கதசும்ப³டகம். பரிவத்தேத்வாதி அத்தனோ நிவாஸனாதி³பா⁴வதோ அபனேத்வா. பூஜாதி³அத்த²ம் பன தாவகாலிகம்பி ஆமஸிதும் வட்டதி. ஸீஸபஸாத⁴னகத³ந்தஸூசிஆதீ³தி இத³ம் ஸீஸாலங்காரத்தா²ய படபிலோதிகாதீ³ஹி கதம் ஸீஸபஸாத⁴னகஞ்சேவ த³ந்தஸூசிஆதி³ சாதி த்³விதா⁴ யோஜேத்வா ஸீஸபஸாத⁴னம் ஸிபாடிகோபகரணத்தா²ய சேவ த³ந்தஸூசிஉபகரணத்தா²ய ச க³ஹேதப்³ப³ந்தி யதா²க்கமம் அத்த²ம் த³ஸ்ஸேதி. கேஸகலாபம் ப³ந்தி⁴த்வா தத்த² திரியம் பவேஸனத்தா²ய கதா த³ந்தஸூசி ஏவ ஸீஸபஸாத⁴னகத³ந்தஸூசீதி ஏகமேவ கத்வா ஸிபாடிகாய பக்கி²பித்வா பரிஹரிதப்³ப³ஸூசியேவ தஸ்ஸ தஸ்ஸ கிச்சஸ்ஸ உபகரணந்தி ஸிபாடிகாஸூசிஉபகரணந்தி ஏவம் வா யோஜனா காதப்³பா³. போத்த²கரூபந்தி ஸுதா⁴தீ³ஹி கதம், பாராஜிகவத்து²பூ⁴தானம் திரச்சா²னக³தித்தீ²னம் ஸண்டா²னேன கதம்பி அனாமாஸமேவ. இத்தி²ரூபாதீ³னி த³ஸ்ஸேத்வா கதம், வத்த²பி⁴த்திஆதி³ஞ்ச இத்தி²ரூபம் அனாமஸித்வா வளஞ்ஜேதும் வட்டதி. ஏவரூபேஹி அனாமாஸே காயஸம்ஸக்³க³ராகே³ அஸதி காயப்படிப³த்³தே⁴ன ஆமஸதோ தோ³ஸோ நத்தி². பி⁴ந்தி³த்வாதி ஏத்த² அனாமாஸம்பி த³ண்ட³பாஸாணாதீ³ஹி பே⁴த³னஸ்ஸ அட்ட²கதா²யம் வுத்தத்தா, பாளியம்பி ஆபதா³ஸு மோக்கா²தி⁴ப்பாயஸ்ஸ ஆமஸனேபி அனாபத்தியா வுத்தத்தா ச. ஸப்பினீஆதீ³ஹி வாளமிகீ³ஹி ச க³ஹிதபாணகானம் மோசனத்தா²ய தம் ஸப்பினீஆதி³ம் வத்த²த³ண்டா³தீ³ஹி பரிக்கி²பித்வா க³ஹேதும், மாதுஆதி³ம் உத³கே மீயமானம் வத்தா²தீ³ஹி க³ஹேதும், அஸக்கோந்திம் கேஸாதீ³ஸு க³ஹேத்வா காருஞ்ஞேன உக்கி²பிதும் வட்டதீதி அயமத்தோ² க³ஹேதப்³போ³வ. அட்ட²கதா²யம் ‘‘ந த்வேவ ஆமஸிதப்³பா³’’தி இத³ம் பன வசனம் அமீயமானவத்து²ம் ஸந்தா⁴ய வுத்தந்தி அயம் அம்ஹாகம் க²ந்தி.

மக்³க³ம் அதி⁴ட்டா²யாதி ‘‘மக்³கோ³ அய’’ந்தி மக்³க³ஸஞ்ஞம் உப்பாதே³த்வாதி அத்தோ². பஞ்ஞபேத்வா தே³ந்தீதி இத³ம் ஸாமீசிவஸேன வுத்தம், தேஹி பன ஆஸனம் அபஞ்ஞபேத்வாவ நிஸீத³தா²தி வுத்தே ஸயமேவ பஞ்ஞபேத்வா நிஸீதி³தும்பி வட்டதி. தத்த²ஜாதகானீதி அச்சி²ந்தி³த்வா பூ⁴தகா³மபா⁴வேனேவ டி²தானி. கீளந்தேனாதி வுத்தத்தா ஸதி பச்சயே ஆமஸந்தஸ்ஸ அனாபத்தி. பி⁴க்கு²ஸந்தகம் பன பரிபோ⁴கா³ரஹம் ஸப்³ப³தா² ஆமஸிதும் ந வட்டதி து³ருபசிண்ணத்தா. அனுபஸம்பன்னானம் த³ஸ்ஸாமீதி இத³ம் அப்படிக்³க³ஹேத்வா க³ஹணம் ஸந்தா⁴ய வுத்தம். அத்தனோபி அத்தா²ய படிக்³க³ஹேத்வா க³ஹணே தோ³ஸோ நத்தி² அனாமாஸத்தாபா⁴வா.

மணீதி வேளுரியாதி³தோ அஞ்ஞோ ஜோதிரஸாதி³பே⁴தோ³ ஸப்³போ³பி மணி. வேளுரியோதி அல்லவேளுவண்ணோமணி, ‘‘மஜ்ஜாரக்கி² மண்ட³லவண்ணோ’’திபி வத³ந்தி. ஸிலாதி முக்³க³மாஸவண்ணா அதிஸினித்³தா⁴ காளஸிலா, மணிவோஹாரம் ஆக³தா ரத்தஸேதாதி³வண்ணா ஸுமட்டா²பி ஸிலா அனாமாஸா ஏவாதி வத³ந்தி. ரஜதந்தி கஹாபணமாஸாதி³பே⁴த³ம் ஜதுமாஸாதி³ம் உபாதா³ய ஸப்³ப³ம் வுத்தாவஸேஸம் ரூபியம் க³ஹிதம். லோஹிதங்கோதி ரத்தமணி. மஸாரக³ல்லந்தி கப³ரவண்ணோ மணி, ‘‘மரகத’’ந்திபி வத³ந்தி. பே⁴ஸஜ்ஜத்தா²ய பிஸித்வா யோஜிதானம் முத்தானம் ரதனபா⁴வவிரஹதோ க³ஹணக்க²ணேபி ரதனாகாரேன அபேக்கி²தாபா⁴வா ‘‘பே⁴ஸஜ்ஜத்தா²ய பன வட்டதீ’’தி வுத்தம். யாவ பன தா முத்தா ரதனரூபேன திட்ட²ந்தி, தாவ ஆமஸிதும் ந வட்டதி ஏவ. ஏவம் அஞ்ஞம்பி ரதனபாஸாணம் பிஸித்வா பே⁴ஸஜ்ஜே யோஜனத்தா²ய க³ஹேதும் வட்டதி ஏவ, ஜாதரூபரஜதம் பன பிஸித்வா யோஜனபே⁴ஸஜ்ஜத்தா²யபி ஸம்படிச்சி²தும் ந வட்டதி, க³ஹட்டே²ஹி யோஜேத்வா தி³ன்னம்பி யதி³ பே⁴ஸஜ்ஜே ஸுவண்ணாதி³ரூபேன திட்ட²தி, வியோஜேதுஞ்ச ஸக்கா, தாதி³ஸம் பே⁴ஸஜ்ஜம்பி ந வட்டதி. தம் அப்³போ³ஹாரிகத்தம் க³தம் சே, வட்டதி. ‘‘ஜாதிப²லிகம் உபாதா³யா’’தி வுத்தத்தா, ஸூரியகந்தசந்த³கந்தாதி³கம் ஜாதிபாஸாணம் மணிம்ஹி ஏவ ஸங்க³ஹிதந்தி த³ட்ட²ப்³ப³ம். த⁴மனஸங்கோ² ச தோ⁴தவித்³தோ⁴ ச ரதனமிஸ்ஸோ சாதி யோஜேதப்³ப³ம். வித்³தோ⁴தி மணிஆதி³பா⁴வேன கதசி²த்³தோ³.

ரதனமிஸ்ஸோதி கஞ்சனலதாதி³விசித்தோ, முத்தாதி³ரதனக²சிதோ ச, ஏதேன த⁴மனஸங்க²தோ அஞ்ஞோ ரதனமிஸ்ஸோவ அனாமாஸோதி த³ஸ்ஸேதி. ஸிலாயம்பி ஏஸேவ நயோ. பானீயஸங்கோ²தி இமினாவ தா²லகாதி³ஆகாரேன கதஸங்க²மயபா⁴ஜனானி பி⁴க்கூ²னம் ஸம்படிச்சி²தும் வட்டதீதி ஸித்³த⁴ம். ஸேஸாதி ரதனஸம்யுத்தம் ட²பேத்வா அவஸேஸா.

பீ³ஜதோ பட்டா²யாதி தா⁴துபாஸாணதோ பட்டா²ய. படிக்கி²பீதி ஸுவண்ணமயதா⁴துகரண்ட³கஸ்ஸ, பு³த்³த⁴ரூபாதி³ஸ்ஸ ச அத்தனோ ஸந்தககரணே நிஸ்ஸக்³கி³யத்தா வுத்தம். ‘‘ரூபியச²ட்³ட³கட்டா²னே’’தி வுத்தத்தா ரூபியச²ட்³ட³கஸ்ஸ ஜாதரூபரஜதம் ஆமஸித்வா ச²ட்³டே³தும் வட்டதீதி ஸித்³த⁴ம். கேளாபயிதுந்தி ஆமஸித்வா இதோ சிதோ ச ஸஞ்சாரேதும். வுத்தந்தி மஹாஅட்ட²கதா²யம் வுத்தம். கசவரமேவ ஹரிதும் வட்டதீதி கோ³பகா வா ஹோந்து அஞ்ஞே வா, ஹத்தே²ன புஞ்சி²த்வா கசவரம் அபனேதும் வட்டதி, மலம்பி பமஜ்ஜிதும் வட்டதி ஏவாதி வத³ந்தி, தம் அட்ட²கதா²ய ந ஸமேதி கேளாயனஸதி³ஸத்தா. ஆரகூடலோஹந்தி ஸுவண்ணவண்ணோ கித்திமலோஹவிஸேஸோ. திவித⁴ஞ்ஹி கித்திமலோஹம் கம்ஸலோஹம் வட்டலோஹம் ஹாரகூடலோஹந்தி. தத்த² திபுதம்பே³ மிஸ்ஸேத்வா கதம் கம்ஸலோஹம் நாம. ஸீஸதம்பே³ மிஸ்ஸேத்வா கதம் வட்டலோஹம். ரஸதம்பே³ மிஸ்ஸேத்வா கதம் ஹாரகூடலோஹம் நாம. தம் பன ‘‘ஜாதரூபக³திக’’ந்தி வுத்தத்தா உக்³க³ண்ஹதோ நிஸ்ஸக்³கி³யம்பி ஹோதீதி கேசி வத³ந்தி. ரூபியேஸு பன அக³ணிதத்தா நிஸ்ஸக்³கி³யம் ந ஹோதி, ஆமஸனே, ஸம்படிச்ச²னே ச து³க்கடமேவாதி வேதி³தப்³ப³ம். ஸப்³ப³கப்பியோதி யதா²வுத்தஸுவண்ணாதி³மயானம் ஸேனாஸனபரிக்கா²ரானம் ஆமஸனகோ³பனாதி³வஸேன பரிபோ⁴கோ³ ஸப்³ப³தா² கப்பியோதி அதி⁴ப்பாயோ. தேனாஹ ‘‘தஸ்மா’’திஆதி³. ‘‘பி⁴க்கூ²னம் த⁴ம்மவினயவண்ணனட்டா²னே’’தி வுத்தத்தா ஸங்கி⁴கமேவ ஸுவண்ணாதி³மயம் ஸேனாஸனம், ஸேனாஸனபரிக்கா²ரா ச வட்டந்தி, ந புக்³க³லிகானீதி க³ஹேதப்³ப³ம்.

பி⁴ந்தி³த்வாதி பட²மமேவ அனாமஸித்வா பாஸாணாதி³னா கிஞ்சிமத்தம் பே⁴த³ம் கத்வா பச்சா² கப்பியப⁴ண்ட³த்தா²ய அதி⁴ட்ட²ஹித்வா ஹத்தே²ன க³ஹேதும் வட்டதி. தேனாஹ ‘‘கப்பியப⁴ண்ட³ம் கரிஸ்ஸாமீதி ஸப்³ப³ம்பி ஸம்படிச்சி²தும் வட்டதீ’’தி. ஏத்தா²பி கிஞ்சி பி⁴ந்தி³த்வா, வியோஜேத்வா வா ஆமஸிதப்³ப³.

ப²லகஜாலிகாதீ³னீதி ஏத்த² ஸரபரித்தாணாய ஹத்தே²ன க³ஹேதப்³ப³ம் கிடிகாப²லகம் அக்கி²ரக்க²ணத்தா²ய அயலோஹாதீ³ஹி ஜாலாகாரேன கத்வா ஸீஸாதீ³ஸு படிமுஞ்சிதப்³ப³ம் ஜாலிகம் நாம. ஆதி³-ஸத்³தே³ன கவசாதி³ம் ஸங்க³ண்ஹாதி. அனாமாஸானீதி மச்ச²ஜாலாதி³பரூபரோத⁴கம் ஸந்தா⁴ய வுத்தம், ந ஸரபரித்தாணம் தஸ்ஸ ஆவுத⁴ப⁴ண்ட³த்தாபா⁴வா. தேனேவ வக்க²தி ‘‘பரூபரோத⁴னிவாரணம் ஹீ’’திஆதி³. ஆஸனஸ்ஸாதி சேதியஸ்ஸ ஸமந்தா கதபரிப⁴ண்ட³ஸ்ஸ. ப³ந்தி⁴ஸ்ஸாமீதி காகாதீ³ஹி அதூ³ஸனத்தா²ய ப³ந்தி⁴ஸ்ஸாமி.

‘‘பே⁴ரிஸங்கா⁴டோதி ஸங்க⁴டிதசம்மபே⁴ரீ. வீணாஸங்கா⁴டோதி ஸங்க⁴டிதசம்மவீணா’’தி ஸாரத்த²தீ³பனியம் (ஸாரத்த². டீ. 2.281) வுத்தம். ‘‘சம்மவினத்³தா⁴னி வீணாபே⁴ரிஆதீ³னீ’’தி மஹாஅட்ட²கதா²யம் வுத்தவசனதோ விஸேஸாபா⁴வா, ‘‘குருந்தி³யம் பனா’’திஆதி³னா ததோ விஸேஸஸ்ஸ வத்துமாரத்³த⁴த்தா ச பே⁴ரிஆதீ³னம் வினத்³த⁴னோபகரணஸமூஹோ பே⁴ரிவீணாஸங்கா⁴டோதி வேதி³தப்³ப³ம் ஸங்க⁴டிதப்³போ³தி ஸங்கா⁴டோதி கத்வா. துச்ச²போக்க²ரந்தி அவினத்³த⁴சம்மபே⁴ரிவீணானம் போக்க²ரம். ஆரோபிதசம்மந்தி புப்³பே³ ஆரோபிதம் ஹுத்வா பச்சா² ததோ அபனேத்வா விஸும் ட²பிதமுக²சம்மமத்தம், ந ஸேஸோபகரணஸஹிதம். ஸஹிதம் பன ஸங்கா⁴டோதி அயம் விஸேஸோ. ஓனஹிதுந்தி பே⁴ரிபோக்க²ராதீ³னி சம்மம் ஆரோபேத்வா சம்மவட்டிஆதீ³ஹி ஸப்³பே³ஹி உபகரணேஹி வினந்தி⁴தும்.

பாளியம் பண்ட³கஸ்ஸாதி பண்ட³கேன. பாராஜிகப்பஹோனககாலேதி அகுதி²தகாலே. காயஸம்ஸக்³க³ராகா³தி³பா⁴வே ஸப்³பா³வத்தா²யபி இத்தி²யா ஸண்டா²னே பஞ்ஞாயமானே அனாமாஸது³க்கடம் ந விக³ச்ச²தீதி த³ட்ட²ப்³ப³ம். ஸங்கமாதீ³னம் டா²னாசாவனவஸேன அசாலேதப்³ப³தாய ந காயப்படிப³த்³த⁴வோஹாரோதி து³க்கடம் வுத்தம்.

282. ஏகபதி³கஸங்கமோதி தனுகஸேது. ‘‘ஆவிஞ்ச²ந்தோ’’தி வுத்தத்தா சாலேதும் யுத்தாய ஏவ ரஜ்ஜுயா து²ல்லச்சயம், ந இதராய பி⁴த்தித²ம்பா⁴தி³க³திகத்தாதி ஆஹ ‘‘யா மஹாரஜ்ஜு ஹோதீ’’திஆதி³. தேன சாலேதும் யுத்தே தனுகரஜ்ஜுத³ண்ட³கே அசாலேத்வா பு²ஸந்தஸ்ஸாபி து²ல்லச்சயமேவாதி தீ³பிதந்தி வேதி³தப்³ப³ம். படிச்சா²தே³தப்³பா³தி சா²த³னாதி³வஸேன கூ³ஹிதப்³பா³. மனுஸ்ஸித்தீ², மனுஸ்ஸித்தி²ஸஞ்ஞிதா, காயஸம்ஸக்³க³ராகோ³, வாயாமோ, தேன ஹத்தா²தீ³ஸு பு²ஸனந்தி இமானேத்த² பஞ்ச அங்கா³னி.

காயஸம்ஸக்³க³ஸிக்கா²பத³வண்ணனா நிட்டி²தா.