1. பட²மாதி³ஸிக்கா²பத³வண்ணனா

1067. ‘‘க³ப்³பி⁴னி’’ந்தி த³ஸ்ஸனாதீ³ஹிபி க³ப்³ப⁴ஸம்ப⁴வதோ வுத்தம். பத³பா⁴ஜனேபி பவாரிதபா⁴வோ ந தி³ஸ்ஸதி.

1074. தா⁴தி வாதி ஏத்த² தா³ரகம் ஸாமிகானம் த³த்வா ஆஹடே வட்³டே⁴தி, ததா² மாதாபீதி கேசி.

1080. ‘‘ஸிக்க²மான’’ந்தி பாட²ம் தீ³பவாஸினோ ரோசேந்தி கிரியாகிரியத்தா, ஜம்பு³தீ³பவாஸினோ ‘‘ஸிக்க²மானா’’தி. தஸ்ஸத்தோ² ஸிக்கா²த⁴ம்மமானனதோ ஸிக்க²மானாதி. இத⁴ கிரியா ந ஹோதி, ஸஞ்ஞாவ அதி⁴ப்பேதா. ந ஏதாஸு அஸிக்கி²தா உபஸம்பாதே³தப்³பா³ உபஜ்ஜா²யினீஆதீ³னம் ஆபத்திபா⁴வா. ‘‘தஸ்ஸா உபஸம்பதா³ ஹோதி ஏவா’’தி வத³ந்தி.

1082. த⁴ம்மகம்மேதி உபஸம்பத³கம்மம் அதி⁴ப்பேதம்.

1112. வுட்டா²பிதந்தி ஸாமணேரிபூ⁴மிதோ யாய தே²ரியா உபஸம்பதா³பேக்கா² வுட்ட²பிதா, ஸா தே²ரீ வுட்டா²பிதா நாம, தேனேவ புன விஸேஸனத்த²ம் ‘‘பவத்தினி’’ந்தி ஆஹ.

பட²மாதி³ஸிக்கா²பத³வண்ணனா நிட்டி²தா.

க³ப்³பி⁴னிவக்³க³வண்ணனா நிட்டி²தா.