4. சதுத்த²ஸிக்கா²பத³வண்ணனா

1038. நிமந்திதா வா பவாரிதா வாதி ஏத்த² போராணக³ண்டி²பதே³ தாவ ஏவம் வுத்தம் ‘‘பவாரிதாபி யாகு³ம் பாதும் லப⁴தி, போ⁴ஜ்ஜயாகு³ம் ந லப⁴தி. யாகு³ பனேத்த² கா²த³னீயபோ⁴ஜனீயஸங்க்²யம் ந க³ச்ச²தி. நிமந்திதா பி⁴க்கு²னீ பிண்டா³ய சரித்வா பு⁴ஞ்ஜிதுகாமா ஸாமிகே அபலோகேத்வாவ பு⁴ஞ்ஜிதும் லப⁴தி. பரம்பரபோ⁴ஜனாபத்தி பி⁴க்கு²னீனம் நத்தி². நிமந்திதா தம் ப⁴த்தம் பு⁴ஞ்ஜித்வா வா அபு⁴ஞ்ஜித்வா வா பவாரிதா கப்பியம் காராபேத்வா பு⁴ஞ்ஜிதும் ந லப⁴தி, அகப்பியனிமந்தனேன நிமந்தியமானா த்³வே நிமந்தனானி ஸம்படிச்சி²துஞ்ச ந லப⁴தீ’’தி. தத்த² ‘‘பவாரிதாபி யாகு³ம் பாதும் லப⁴தீ’’தி வுத்தம் பாளியம், அட்ட²கதா²யஞ்ச அனுஞ்ஞாதத்தா. ‘‘நிமந்திதா அப்பவாரிதா யாகு³ம் பிவதீ’’தி ஹி பாளியம் வுத்தம். தத்ரித³ம் ஸிக்கா²பத³வண்ணனாபுப்³ப³ங்க³மஸன்னிட்டா²னம் – நிமந்திதா வா பவாரிதா வாதி ஏத்த² வாஸத்³தே³ன அகப்பியனிமந்தனேன நிமந்திதா அப்பவாரிதா ட²பேத்வா யாகு³ம் அஞ்ஞம் கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்தியம் அஞ்ஞத்ர ஸாமிகானம் அபலோகனா. பரம்பரபோ⁴ஜனாபா⁴வேன பி⁴க்கு²னீனம் கோ கு³ணோ ஜாதோதி? ந ஏதாஸம் கு³ணலாபோ⁴, கேவலம் பாகடதரம் ஜாதம். பி⁴க்கூ²பி விகப்பேத்வா மிஸ்ஸேத்வாவ பு⁴ஞ்ஜிதும் லப⁴ந்தி. ஸமயே யதா²ஸுக²ம் லப⁴ந்தி. இமினா அபலோகனேன கிந்தி? பவாரிதா வா அனிமந்திதா வா ந கிஞ்சி கப்பியம் காராபேத்வா கி³லானாதிரித்தம்பி லப⁴ந்தி, நிமந்திதா ச பவாரிதா ச யாகு³ம்பி ந லப⁴ந்தி, அபலோகேத்வாபி ந லப⁴ந்தீதி.

சதுத்த²ஸிக்கா²பத³வண்ணனா நிட்டி²தா.

ஆராமவக்³க³வண்ணனா நிட்டி²தா.