3. நக்³க³வக்³க³வண்ணனா

1-2. பட²மது³தியஸிக்கா²பத³வண்ணனா

883. நக்³க³வக்³க³ஸ்ஸ பட²மது³தியானி உத்தானானி. பட²மே அயம் விஸேஸோ – பி⁴க்கு²ஸ்ஸ ததா² ந்ஹாயந்தஸ்ஸ து³க்கடம் அஞ்ஞத்ர ஜந்தாக⁴ரஉத³கபடிச்சா²தீ³ஹி. ந ச விக³ரஹி தத்த² ப⁴க³வா அத்தனாவ அனனுஞ்ஞாதத்தா உத³கஸாடிகாயாதி போராணா. ‘‘ஏகமேவ நிவாஸேத்வா, பாருபித்வா ச நஹாயிதும் ந வட்டதீ’’தி போராணக³ண்டி²பதே³ வுத்தம்.

பட²மது³தியஸிக்கா²பத³வண்ணனா நிட்டி²தா.

3. ததியஸிக்கா²பத³வண்ணனா

894. ததியே அந்தோசதூஹபஞ்சாஹம் து⁴ரம் நிக்கி²பந்தியாபி ஆபத்தி ஏவ. லிங்க³பரிவத்தே து⁴ரம் நிக்கி²பந்தியா து³க்கடம் திகது³க்கடத்தா. ‘‘ஸம்ப³ஹுலாஹி பி⁴க்கு²னீஹி ஸத்³தி⁴ந்தி ஏத்த² சதஸ்ஸோபி ஸம்ப³ஹுலா’’தி போராணக³ண்டி²பதே³ வுத்தம்.

ததியஸிக்கா²பத³வண்ணனா நிட்டி²தா.

4. சதுத்த²ஸிக்கா²பத³வண்ணனா

898. சதுத்தே² ஸங்கா⁴டிசாரந்தி ஏத்த² ஸங்கா⁴டிஆதி³வஸேன அதி⁴ட்டி²தானம்யேவாயம் விதி⁴, நேதராஸம் கிர. தத்த² திசீவரே ஏவ விப்பவாஸபச்சயா நிஸ்ஸக்³கி³யம். அந்தோசீவரகாலேபி பஞ்சாஹிகம் ஸங்கா⁴டிசாரம் அதிக்காமேந்தியா ஆபத்தியேவ. ‘‘வினா ஏதேஹி சீவரேஹி உபஸம்பத³ம் காதும் ந வட்டதீ’’தி போராணக³ண்டி²பதே³ வுத்தம்.

சதுத்த²ஸிக்கா²பத³வண்ணனா நிட்டி²தா.

5. பஞ்சமஸிக்கா²பத³வண்ணனா

906. பஞ்சமஸ்ஸ அனாபத்திவாரே தாய வா அவிப்பவாஸாயாதி அத்த²தோ லப்³ப⁴தி.

பஞ்சமஸிக்கா²பத³வண்ணனா நிட்டி²தா.

907-911. ச²ட்ட²ஸத்தமானி உத்தானானி.

8. அட்ட²மஸிக்கா²பத³வண்ணனா

916. ஸோகஜ்ஜா²யிகா நாம கிர மாயாகாரா. விலும்பகா ப⁴ண்ட³காதி ச போராணா.

அட்ட²மஸிக்கா²பத³வண்ணனா நிட்டி²தா.

9. நவமஸிக்கா²பத³வண்ணனா

920. ‘‘கத²ஞ்ஹி நாம அதிக்காமேஸ்ஸதீ’’தி வுத்தத்தா து²ல்லனந்தா³ சீவரகாலஸமயம் ஆக³மேதா²தி அதிக்கமாபேஸீதி ஸித்³த⁴ம் ஹோதி.

நவமஸிக்கா²பத³வண்ணனா நிட்டி²தா.

10. த³ஸமஸிக்கா²பத³வண்ணனா

927. த³ஸமே ஏககுலம் ஏதத³வோசுந்தி ஏத்த² குலம் நாம தஸ்மிம் மனுஸ்ஸா, தஸ்மா ப³ஹுவசனம்.

த³ஸமஸிக்கா²பத³வண்ணனா நிட்டி²தா.

நக்³க³வக்³க³வண்ணனா நிட்டி²தா.