10. த³ஸமஸிக்கா²பத³வண்ணனா

833. ஸாது⁴கீளிதகீ³தம் வாதி ஏத்த² பாசிண்ணகீ³தம்பி ஸோதும் ந வட்டதி. ‘‘கீ³துபஸஞ்ஹிதம் பன த⁴ம்மம் ஸோதும் வட்டதீதி தீ³க⁴னிகாயட்ட²கதா²யம் வுத்த’’ந்தி வுத்தம். போராணக³ண்டி²பதே³ பன ‘‘த⁴ம்மகீ³தம்பி ந வட்டதீ’’தி வத்வா ‘‘பு³த்³த⁴ஸ்ஸ கா³யாம வாதே³மாதி வுத்தே ஸம்படிச்சி²தும் ந வட்டதி, து³க்கடம் ஹோதீ’’தி வுத்தம், ‘‘பூஜம் கரோம, ஜாதகம் வா வத்து²ம் வா தே³ஸேமாதி வுத்தே ‘ஸாதூ⁴’தி ஸம்படிச்சி²தும் வட்டதீ’’தி ச வுத்தம்.

836. ஏகபயோகோ³ நாம ஏகதி³வஸாவலோகனம். தேஸம்யேவாதி யேஸம் நச்சம் பஸ்ஸதி. ‘‘பி⁴க்கு²னீ ஸயம்பி நச்சிதும் வா கா³யிதும் வா வாதி³தும் வா ந லப⁴தீ’’திஆதி³ இத⁴ ஸிக்கா²பதே³ நத்தி². கஸ்மா? ஏளகலோமஸமுட்டா²னத்தா. யதி³ ஏவம் கஸ்மா வுத்தந்தி சே? ஸுத்தானுலோமமஹாபதே³ஸதோ. யதி³ நச்சாதீ³னி பஸ்ஸிதும் வா ஸோதும் வா ந லப⁴தி, பகே³வ அத்தனா காதுந்தி நயதோ லப்³ப⁴மானத்தா வுத்தம். இதரதா² மஹாபதே³ஸா நிரத்த²கா ஸியும். ஏவமஞ்ஞத்தா²பி நயோ நேதப்³போ³. ‘‘ஸமுட்டா²னம்பி இத⁴ வுத்தமேவ அக்³க³ஹேத்வா ச²ஸமுட்டா²னவஸேன க³ஹேதப்³ப³’’ந்தி லிகி²தம். தம் ‘‘அஞ்ஞே நச்ச, கா³ய, வாதே³ஹீ’’தி வத்தும் ந லப்³ப⁴தீதிஆதி³வசீகம்மம் ஸந்தா⁴ய லிகி²தஞ்சே, தம் ஸுலிகி²தம் ஏளகலோமஸமுட்டா²னே வாசாய அபா⁴வதோ. ‘‘ஸயம்பி நச்சிது’’ந்திஆதி³காயகம்மஞ்சே ஸந்தா⁴ய லிகி²தம், து³ல்லிகி²தம். ஏளகலோமஸமுட்டா²னஞ்ஹி ஏகந்ததோ காயகம்மம் ஹோதி, தஸ்மா உத்³த⁴டம் அக்³க³ஹேத்வா ஆதி³ஸத்³தே³ன ஸங்க³ஹிதமேவ இத⁴ க³ஹேதப்³ப³ந்தி. ஏதம் ஏளகலோமஸமுட்டா²னத்தாதி ஏத்த² காரணவசனே ஸுத்தானுலோமமஹாபதே³ஸதோதி ஏத்த² பன உத்³த⁴டம் க³ஹேதப்³ப³ம், ஏவம் யதா²லாப⁴வஸேன தம் லிகி²தந்தி வேதி³தப்³ப³ம். ‘‘ஆஹச்சபா⁴ஸிதஸிக்கா²பத³வஸேன ஏளகலோமஸமுட்டா²ன’’ந்தி வுத்தந்தி உபதிஸ்ஸத்தே²ரோ. ‘‘ஏளகலோமஸமுட்டா²னஞ்சே இத³ம் ஸிக்கா²பத³ம், ஆணாபகோ முச்சேய்ய, ந ச முச்சதீ’’தி வுத்தம். தம் ‘‘கஸ்மா’’தி வுத்தே ‘‘ஸப்³ப³அட்ட²கதா²ஸு வுத்த’’ந்தி அட்ட²கதா²சரியோ ஆஹாதி த⁴ம்மஸிரித்தே²ரோ.

837. ஆராமே ட²த்வாதி ந கேவலம் ட²த்வா, ததோ க³ந்த்வா பன ஸப்³பி³ரியாபதே²ஹிபி லப⁴தி. ‘‘ஆராமே டி²தாதி பன ஆராமபரியாபன்னாதி அத்தோ², இதரதா² நிஸின்னாபி ந லபே⁴ய்யா’’தி லிகி²தம், தம் ஸுலிகி²தமேவ.

த³ஸமஸிக்கா²பத³வண்ணனா நிட்டி²தா.

லஸுணவக்³க³வண்ணனா நிட்டி²தா.