11. ஏகாத³ஸமாதி³ஸிக்கா²பத³வண்ணனா

1214. உபசாரம் ஸந்தா⁴ய கதி²தந்தி ‘‘த்³வாத³ஸஹத்த²ம் உபசாரோ’’தி லிகி²தம்.

1221. ஸுத்தந்தே ஓகாஸம் காராபேத்வா வினயம் வா அபி⁴த⁴ம்மம் வா புச்ச²தீதி ஏத்த² ச தீணி பிடகானி அத்தனோ அத்தனோ நாமேன வுத்தானீதி கத்வா அபி⁴த⁴ம்மோ பு³த்³தே⁴ன பா⁴ஸிதோ ஏவாதி தீ³பிதம் ஹோதி.

1224-5. த²னோ ச உத³ரோ ச த²னுத³ரா. ‘‘ஸம்கச்சிகாய பமாணம் திரியம் தி³யட்³ட⁴ஹத்தா²’’தி போராணக³ண்டி²பதே³ வுத்தம். ‘‘அபரிக்கி²த்தஸ்ஸ கா³மஸ்ஸ உபசாரம் ஓக்கமந்தியா’’தி ப³ஹூஸு போத்த²கேஸு, ஸங்கா⁴தி³ஸேஸகண்டே³ விய ‘‘உபசாரம் அதிக்கமந்தியா’’தி பாடோ² அப்பகேஸு, ஸோவ பாடோ². அட்ட²கதா²யம் ‘‘பரிக்கே²பம் அதிக்கமந்தியாதி ஏகேன பாதே³ன அதிக்கந்தே து³க்கடம், து³தியேன பாசித்தியம். உபசாரேபி ஏஸேவ நயோ’’தி வசனம்பி ‘‘உபசாரம் அதிக்கமந்தியா’’தி பாடோ²தி தீ³பேதீதி நோ தக்கோதி ஆசரியோ.

ஏகாத³ஸமாதி³ஸிக்கா²பத³வண்ணனா நிட்டி²தா.

ச²த்துபாஹனவக்³க³வண்ணனா நிட்டி²தா.

நிக³மனவண்ணனா

கி³ரக்³க³ஸமஜ்ஜாதீ³னி ‘‘அசித்தகானி லோகவஜ்ஜானீ’’தி வுத்தத்தா ‘‘நச்ச’’ந்தி வா ‘‘க³ந்தோ⁴’’தி வா அஜானித்வாபி த³ஸ்ஸனேன, விலிம்பனேன வா ஆபஜ்ஜனதோ வத்து²அஜானனசித்தேன அசித்தகானி. ‘‘நச்ச’’ந்தி வா ‘‘க³ந்தோ⁴’’தி வா ஜானித்வா பஸ்ஸந்தியா, விலிம்பந்தியா ச அகுஸலத்தா ஏவ லோகவஜ்ஜானி. சோரிவுட்டா²பனாதீ³னி ‘‘சோரீ’’திஆதி³னா வத்து²ம் ஜானித்வா கரணே ஏவ ஆபத்திஸப்³பா⁴வதோ ஸசித்தகானி. உபஸம்பதா³தீ³னம் ஏகந்தேன அகுஸலசித்தேனேவ அகத்தப்³ப³த்தா பண்ணத்திவஜ்ஜானி. ‘‘இத⁴ ஸசித்தகாசித்தகதா பண்ணத்திஜானனாஜானனதாய அக்³க³ஹேத்வா வத்து²ஜானனாஜானனதாய க³ஹேதப்³பா³’’தி லிகி²தம். அனுக³ண்டி²பதே³ பன ‘‘கி³ரக்³க³ஸமஜ்ஜாதீ³னி ‘அசித்தகானி லோகவஜ்ஜானீ’தி வுத்தத்தா ‘நச்ச’ந்தி வா ‘ஸங்கா⁴ணீ’தி வா ‘க³ந்தோ⁴’தி வா தஸ்ஸ நாமவஸேன அஜானித்வா மாயாகாரஸ்ஸ மாயானி ஸீஸட்டி²ஆதீ³னி படிஸங்கா²ய பஸ்ஸந்தியா, அக்க²மாலாதி³அத்தா²ய ஸங்கா⁴ணிம் கடியா ப³ந்த⁴ந்தியா, ‘ஸேத³க³ந்த⁴ம் அபனேத்வா பு³த்³த⁴பூஜம் கரிஸ்ஸாமீ’தி உப்பன்னேன சித்தேன க³ந்த⁴ம் விலிம்பேத்வா நஹாயந்தியா ச ஆபத்திஸப்³பா⁴வதோ நாமேன ஸத்³தி⁴ம் நாமவஸேன வா வத்து²ஸ்ஸ அஜானனசித்தேன அசித்தகானி நாம. ந அந்த⁴காரே ‘கடிஸுத்தமித³’ந்தி ஸஞ்ஞாய ஸங்கா⁴ணிம் க³ஹேத்வா கடியம் தா⁴ரணகாலே, மத்திகாஸஞ்ஞாய ச க³ந்த⁴ம் க³ஹேத்வா விலிம்பனகாலே ஆபத்திஸப்³பா⁴வதோ ‘அசித்தகானீ’தி வத்தப்³பா³னி. தஸ்மிம் காலே அனாபத்தி, தேனேவ ஸங்கா⁴ணியா அஸங்கா⁴ணிஸஞ்ஞாவாரேபி ‘ஆபத்தி பாசித்தியஸ்ஸா’தி பாளி ந வுத்தா. யதா² ‘கே²த்தஆபா³த⁴பச்சயா, கடிஸுத்தகம் தா⁴ரேதீ’தி வசனதோ வினாபி அகுஸலேன ஸங்கா⁴ணிஆதீ³னி ஸக்கா தா⁴ரேதுந்தி ஸித்³த⁴ம், ஏவம் ஆபா³த⁴பச்சயா வினாபி அகுஸலேன ந ஸக்கா ஸுரம் பாதுந்தி ஸித்³த⁴ம் ‘அனாபத்தி ஆபா³த⁴பச்சயா மஜ்ஜம் பிவதீ’தி பாளியா அபா⁴வதோ. அகுஸலேன வினா மது⁴புண்ணமுட்டி²யம் பக்கி²த்தமஜ்ஜஸ்ஸ அஜ்ஜோ²ஹரணகாலாதீ³ஸு ஸுராபானாபத்திம் ஆபஜ்ஜதீதி ச ஸித்³த⁴ம் ‘மஜ்ஜே அமஜ்ஜஸஞ்ஞீ பிவதி, ஆபத்தி பாசித்தியஸ்ஸா’தி (பாசி. 328) வுத்தத்தா. கிம்ப³ஹுனா, காமபோ⁴க³ஸஞ்ஞாய ஸத்³தி⁴ம் ‘ஸங்கா⁴ணீ’தி ச ‘க³ந்தோ⁴’தி ச ஜானித்வா வினா அனாபத்திகாரணேன தா⁴ரேந்தியா ஏகந்தாகுஸலத்தா லோகவஜ்ஜானி நாம வுச்சந்தி. இமினா உபாயேன ஸேஸேஸுபி நயோ நேதப்³போ³. ஏத்த² ஸுராபானாதி⁴காரே உபதிஸ்ஸத்தே²ரவாதோ³’’தி வுத்தம். அஸம்கச்சிகஸிக்கா²பதே³ ‘‘அபரிக்கி²த்தஸ்ஸ கா³மஸ்ஸ உபசாரம் ஓக்கமந்தியாதி பாடோ²’’தி ச ‘‘பணீதபோ⁴ஜனவிஞ்ஞத்தி, அசேலகஸிக்கா²பத³ம், நிமந்திதஸ்ஸ சாரித்தாபஜ்ஜனம், து³ட்டு²ல்லப்படிச்சா²த³னம், ஊனவீஸதிவஸ்ஸுபஸம்பத³ம், மாதுகா³மேன ஸத்³தி⁴ம் ஸம்விதா⁴ய அத்³தா⁴னக³மனம், ராஜந்தேபுரப்பவேஸனம், ஸந்தம் பி⁴க்கு²ம் அனாபுச்சா² விகாலே கா³மப்பவேஸனம், நிஸீத³னம், வஸ்ஸிகஸாடிகந்தி பாடோ²’’தி ச வுத்தம்.

நிக³மனவண்ணனா நிட்டி²தா.

பாசித்தியகண்ட³வண்ணனா நிட்டி²தா.

உப⁴தோவிப⁴ங்க³ட்ட²கதா²வண்ணனா நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ