2. கோஸியவக்³கோ³

1. கோஸியஸிக்கா²பத³வண்ணனா

542. கோஸியகாரகோதி ஏத்த² கோஸம் கரோந்தீதி ‘‘கோஸகாரா’’தி லத்³த⁴வோஹாரானம் பாணகானம் கோஸதோ நிப்³ப³த்தம் கோஸியம் நாம. அத்தனா கதம் சே? நிஸ்ஸஜ்ஜனகாலே ‘‘ஸயம் கதம் நிஸ்ஸக்³கி³ய’’ந்தி வத்தப்³ப³ம். உபோ⁴ஹி சே கதம், யதா²பாட²மேவ வத்தப்³ப³ம். அத்தனா ச பரேஹி ச விப்பகதம் அத்தனா பரியோஸாபேதீதிஆதி³சதுக்கம்பி ஸம்ப⁴வந்தம் ந த³ஸ்ஸிதம். வினயத⁴ம்மதா ஹேஸா, யதி³த³ம் ஏகஸ்மிம் திகே வா சதுக்கே வா த³ஸ்ஸிதே இதரம் ஸம்ப⁴வந்தம்பி ந வுச்சதீதி.

கோஸியஸிக்கா²பத³வண்ணனா நிட்டி²தா.

2. ஸுத்³த⁴காளகஸிக்கா²பத³வண்ணனா

547. ஸுத்³த⁴காளகானந்தி ஏத்த² யதா² பட²மே ‘‘ஏகேனபி கோஸியம்ஸுனா’’தி வுத்தம், ததா² இத⁴ ‘‘ஏகேனபி அஞ்ஞேன அமிஸ்ஸேத்வா’’தி வசனாபா⁴வதோ அஞ்ஞேஹி மிஸ்ஸபா⁴வே ஸதிபி அபஞ்ஞாயமானரூபகம் ‘‘ஸுத்³த⁴காளக’’மிச்சேவ வுச்சதீதி வேதி³தப்³ப³ம்.

ஸுத்³த⁴காளகஸிக்கா²பத³வண்ணனா நிட்டி²தா.

3. த்³வேபா⁴க³ஸிக்கா²பத³வண்ணனா

552. ‘‘தா⁴ரயித்வா த்³வே துலா ஆதா³தப்³பா³’’தி வசனதோ யதா² துலாதா⁴ரணாய காளகா அதி⁴கா ந ஹோந்தி, ததா² காளகானம் த்³வே பா⁴வா க³ஹேதப்³பா³ உக்கட்ட²பரிச்சே²தே³ன. கத²ம் பஞ்ஞாயதீதி? ஸுத்³த⁴காளகபடிஸேத⁴னனிதா³னேன. ததியம் ஓதா³தானம் சதுத்த²ம் கோ³சரியானந்தி ஹேட்டி²மபரிச்சே²தோ³. மாதிகாட்ட²கதா²யம் பன ‘‘ஏகஸ்ஸபி காளகலோமஸ்ஸ அதிரேகபா⁴வே நிஸ்ஸக்³கி³ய’’ந்தி (கங்கா². அட்ட². த்³வேபா⁴க³ஸிக்கா²பத³வண்ணனா) வுத்தம், தம் துலாதா⁴ரணாய கிஞ்சாபி ந ஸமேதி, அசித்தகத்தா பன ஸிக்கா²பத³ஸ்ஸ புப்³பே³ துலாய தா⁴ரயித்வா ட²பிதேஸு ஏகம்பி லோமம் தத்த² பதேய்ய நிஸ்ஸக்³கி³யந்தி அதி⁴ப்பாயோதி நோ தக்கோ. அஞ்ஞதா² த்³வே துலா நாதா³தப்³பா³, ஊனகதரா ஆதா³தப்³பா³ ஸியும். ந ஹி லோமம் க³ணேத்வா துலாதா⁴ரணா கரீயதி. அத² க³ணேத்வாவ காதப்³ப³ம். கிம் துலாதா⁴ரணாய பயோஜனந்தி கேசி. ‘‘கோ³சரியஓதா³தேஸு ஏகமேவ தி³கு³ணம் கத்வா க³ஹேதும் வட்டதீ’’தி வத³ந்தி, அட்ட²கதா²யம் அவிசாரிதத்தா வீமம்ஸிதப்³ப³ம்.

த்³வேபா⁴க³ஸிக்கா²பத³வண்ணனா நிட்டி²தா.

4. ச²ப்³ப³ஸ்ஸஸிக்கா²பத³வண்ணனா

562. நவம் நாம கரணம் உபாதா³யாதி இத³ம் ஆதி³கரணதோ பட்டா²ய வஸ்ஸக³ணனம் தீ³பேதி. கரித்வா வாதி வசனம் நிட்டா²னதி³வஸதோ பட்டா²யாதி தீ³பேதி. தா⁴ரேதப்³ப³ந்தி வசனம் பன பரிபோ⁴க³தோ பட்டா²யாதி தீ³பேதி, யஸ்மா லத்³த⁴ஸம்முதிகஸ்ஸ க³தக³தட்டா²னே ச²ன்னம் ச²ன்னம் வஸ்ஸானம் ஓரதோவ கதானி ப³ஹூனிபி ஹோந்தி, தஸ்மா அஞ்ஞம் நவந்தி கிம் கததோ அஞ்ஞம், உதா³ஹு தா⁴ரிததோ அஞ்ஞந்தி? கிஞ்சேத்த² யதி³ கததோ அஞ்ஞம், தேஸு அஞ்ஞதரம் து³க்கதம் வா பரிபோ⁴க³ஜிண்ணம் வா புன காதும் வட்டதி, தஞ்ச கோ² வினாபி புராணஸந்த²தஸ்ஸ ஸுக³தவித³த்தி²ம் அப்படிஸித்³த⁴பரியாபன்னத்தா. கததோ ஹி அஞ்ஞம் படிஸித்³த⁴ம், இத³ஞ்ச புப்³ப³கதந்தி ததோ அனந்தரஸிக்கா²பத³விரோதோ⁴ ஹோதி. அத² தா⁴ரிததோ அஞ்ஞம் நாம, ஸம்முதி நிரத்தி²கா ஆபஜ்ஜதி, பட²மகதம் சே அபரிபு⁴த்தம், ஸதியாபி ஸம்முதியா அஞ்ஞம் நவம் ந வட்டதீதி அதி⁴ப்பாயோ? தத்ரித³ம் ஸன்னிட்டா²னனித³ஸ்ஸனம் – நிட்டா²னதி³வஸதோ பட்டா²ய ச²ன்னம் ச²ன்னம் வஸ்ஸானம் பரிச்சே²தோ³ வேதி³தப்³போ³. தத்த² ச ஸத்தமே வஸ்ஸே ஸம்பத்தே ச²ப்³ப³ஸ்ஸானி பரிபுண்ணானி ஹோந்தி. தஞ்ச கோ² மாஸபரிச்சே²த³வஸேன, ந வஸ்ஸபரிச்சே²த³வஸேன. ஸத்தமே பரிபுண்ணஞ்ச ஊனகஞ்ச வஸ்ஸம் நாம, தஸ்மா விப்பகதஸ்ஸேவ ஸசே ச²ப்³ப³ஸ்ஸானி பூரேந்தி, புன நிட்டா²னதி³வஸதோ பட்டா²ய ச²ப்³ப³ஸ்ஸானி லப⁴ந்தி. தஞ்ச கோ² பரிபு⁴த்தம் வா ஹோது அபரிபு⁴த்தம் வா, தா⁴ரிதமேவ நாம. யஸ்மா ‘‘நவம் நாம கரணம் உபாதா³ய வுச்சதீ’’தி வுத்தம், தஸ்மா ச²ன்னம் வஸ்ஸானம் பரதோ தமேவ புப்³ப³கதம் து³க்கதபா⁴வேன, பரிபோ⁴க³ஜிண்ணதாய வா விஜடேத்வா புன கரோதி, நிட்டா²னதி³வஸதோ பட்டா²ய ச²ப்³ப³ஸ்ஸபரமதா தா⁴ரேதப்³ப³ம், அதிரேகம் வா. அந்தோ சே கரோதி, ததே³வ அஞ்ஞம் நவம் நாம ஹோதி கரணம் உபாதா³ய, தஸ்மா நிஸ்ஸக்³கி³யம். அஞ்ஞதா² ‘‘நவம் நாம கரணம் உபாதா³யா’’தி இமினா ந கோசி விஸேஸோ அத்தி². ஏவம் ஸந்தே கிம் ஹோதி? அட்டு²ப்பத்தீதி. ‘‘யாசனப³ஹுலா விஞ்ஞத்திப³ஹுலா விஹரந்தீ’’தி ஹி தத்த² வுத்தம், தஞ்ச அஞ்ஞஸ்ஸ கரணம் தீ³பேதி. யதி³ ஏவம் தம் நிப்³பி³ஸேஸமேவ ஆபஜ்ஜதீதி? நாபஜ்ஜதி. அயம் பனஸ்ஸ விஸேஸோ, யஸ்மா ‘‘அஞ்ஞேன கதம் படிலபி⁴த்வா பரிபு⁴ஞ்ஜதி, அனாபத்தீ’’தி வுத்தத்தோ² விஸேஸோதி. கிம் வுத்தம் ஹோதி? ‘‘நவம் நாம கரணம் உபாதா³ய வுச்சதீ’’தி வுத்தே அதிரேகசீவரஸ்ஸ உப்பத்தி விய படிலாபே⁴னஸ்ஸ உப்பத்தி நவதா ஆபஜ்ஜதி. ததோ படிலத்³த⁴தி³வஸதோ பட்டா²ய ச²ப்³ப³ஸ்ஸபரமதா தா⁴ரேதப்³ப³ம். ஓரேன சே ச²ன்னம் வஸ்ஸானம்…பே… காராபேய்ய, நிஸ்ஸக்³கி³யந்தி ஆபஜ்ஜதி, தஸ்மா நவம் நாம கரணமேவ உபாதா³ய வுச்சதி, ந படிலாப⁴ம். ஓரேன ச²ன்னம் வஸ்ஸானம் அத்தனோ அனுப்பன்னத்தா ‘‘நவ’’ந்தி ஸங்க்²யம் க³தம், அப்படிலத்³த⁴ம் சே காராபேய்ய, யதா² லாபோ⁴, ததா² கரேய்ய வா காராபேய்ய வாதி ச ந ஹோதி. கஸ்மா? யஸ்மா அஞ்ஞேன கதம் படிலபி⁴த்வா பரிபு⁴ஞ்ஜதி, அனாபத்தீதி விஸேஸோதி.

ச²ப்³ப³ஸ்ஸஸிக்கா²பத³வண்ணனா நிட்டி²தா.

5. நிஸீத³னஸந்த²தஸிக்கா²பத³வண்ணனா

565. நாஸ்ஸுத⁴ கோசீதி ஏத்த² அஸ்ஸுத⁴-இதி அவதா⁴ரணத்தே² நிபாதோ. தத்த² கிஞ்சாபி ‘‘ஏவம் ப⁴ந்தேதி கோ² தே பி⁴க்கூ²’’தி ப³ஹுவசனம் வுத்தம், ததா²பி தே பி⁴க்கூ² ப⁴க³வதோ படிஸ்ஸுணித்வா இத⁴ தேஸு பி⁴க்கூ²ஸு கோசி ப⁴க³வந்தம் நாஸ்ஸுத⁴ உபஸங்கமதி அஞ்ஞத்ர ஏகேனாதி அத்தோ² க³ஹேதப்³போ³. தம் ஸுக்³கா³ஹம் ஏகாஹம் ப⁴ந்தே ப⁴க³வந்தம் வரந்திஆதீ³ஸு (மஹாவ. 337) விய, அனுஜானாமி…பே… யதா²ஸுக²ம் மம் த³ஸ்ஸனாய உபஸங்கமந்தூதி த³ஸ்ஸனத்தா²ய உபஸங்கமந்து.

566-7. ‘‘மயம் ஆயஸ்மந்தம் உபஸேன’’ந்தி தஸ்ஸ க³ணபாமோக்க²த்தா வுத்தம். ஆரஞ்ஞிகபிண்ட³பாதிகபம்ஸுகூலிகவஸேன ஸப்³பா³னி வுத்தானி. தேனேவாஹ அட்ட²கதா²யம் ‘‘ஸந்த²தே சதுத்த²சீவரஸஞ்ஞிதாயா’’தி. கிம் ஸப்³பே³பி தே சீவரம் ந பு³ஜ்ஜ²ந்தீதி சே? யதா² ஹோது. கதமம் சீவரம் நாமாதி? ச²ன்னம் அஞ்ஞதரம் விகப்பனுபக³ம் பச்சி²மந்தி. கிஞ்ச வாயிமம் அவாயிமந்தி? வாயிமமேவாதி. கதரஸுத்தேனாதி? அத்³தா⁴ ஸோ ஸுத்தமேவ ந பஸ்ஸதி, ஸிவேய்யகம் து³ஸ்ஸயுக³ம், இத்³தி⁴மயிகஞ்ச தே³வத³த்தியஞ்ச அசீவரம் கரோதி. யதி³ ஏவம் அவாயிமம்பீதி வதா³மீதி. ஏவம் ஸந்தே ஸித்³தா⁴ ஸந்த²தே சீவரஸஞ்ஞிதா கம்ப³லஸீஸேன உண்ணாமயஸாமஞ்ஞதோ. கிம் பன தே ஸந்த²தம் அதி⁴ட்ட²ஹிம்ஸூதி? து³ட்டு² அதி⁴ட்ட²ஹிம்ஸு அசீவரத்தா, ந அதி⁴ட்டா²னுபக³த்தா ச ஸந்த²தஸ்ஸ. அத² நாதி⁴ட்ட²ஹிம்ஸு, புப்³பே³வ தத்த² அசீவரஸஞ்ஞினோ ஏதேதி கத்வா தத்த² சீவரஸஞ்ஞிதாய தது³ப⁴யம் ந யுஜ்ஜதீதி. கிம் பனேதம் அதி⁴ட்டா²னுபக³ம் நத்தீ²தி? தத்தே²வாக³தம், அபிசேதம் அவிகப்பனுபக³ம் சே, சீவரம் ந ஹோதி, அஞ்ஞதா² ‘‘சீவரம் நாம ச²ன்னம் சீவரானம் அஞ்ஞதர’’ந்தி ஏத்தாவதா ஸித்³த⁴ம் ‘‘விகப்பனுபக³ம் பச்சி²ம’’ந்தி ந வத்தப்³ப³ம். அத² ந விகப்பனுபக³ம்பி சீவரமேவ ஸித்³த⁴ம், அனதி⁴ட்டா²னுபக³ம், அவிகப்பனுபக³ஞ்ச ஏகஜ்ஜ²ம் ‘‘சீவர’’ந்தி ஸங்க்²யம் க³ச்ச²தி. தேனேவாஹ ‘‘தேசீவரிகஸ்ஸ சதுத்த²சீவரம் வத்தமானம் அம்ஸகாஸாவமேவ வட்டதீ’’தி.

அபிச ஸந்த²தே சீவரஸஞ்ஞிதா ந கேவலம் தேஸம்யேவ, அஞ்ஞேஸம்பி அனுப³ந்த⁴தி ஏவ ‘‘புராணஸந்த²தம் நாம ஸகிம் நிவத்த²ம்பி ஸகிம் பாருதம்பீ’’தி வசனதோ. அட்ட²கதா²சரியோ பனஸ்ஸ அசீவரதம் ஸந்தா⁴யபா⁴ஸிதத்த²தீ³பனேன தீ³பேதி. நிவத்த²பாருதந்தி ஏதேஸம் நிஸின்னஞ்சேவ நிபன்னஞ்சாதி அத்தோ². அபிச ஏவம் ஸந்தேபி ஸந்த²தே சீவரஸஞ்ஞிதா அனுப³ந்த⁴தி ஏவ. க²ந்த⁴கே (மஹாவ. 358) ஹி ‘‘நிஸீத³னம் அதி⁴ட்டா²தும் ந விகப்பேது’’ந்தி ச, பரிவாரே (பரி. 329) ‘‘நவ சீவரானி அதி⁴ட்டா²தப்³பா³னீ’’தி ச நிஸீத³னஸிக்கா²பதே³ ‘‘த³ஸா வித³த்தீ²’’தி ச இத⁴ ‘‘நிஸீத³னம் நாம ஸத³ஸம் வுச்சதீ’’தி ச வுத்தம், அட்ட²கதா²யஞ்சஸ்ஸ ‘‘ஸந்த²தஸதி³ஸம் ஸந்த²ரித்வா ஏகஸ்மிம் அந்தே ஸுக³தவித³த்தி²யா வித³த்தி²மத்தபதே³ஸே த்³வீஸு டா²னேஸு பா²லேத்வா திஸ்ஸோ த³ஸா கரீயந்தி, தாஹி த³ஸாஹி ஸத³ஸம் நாம வுச்சதீ’’தி ச ‘‘நிஸீத³னம் வுத்தனயேன அதி⁴ட்டா²தப்³ப³மேவ, தஞ்ச கோ² பமாணயுத்தம் ஏகமேவ, த்³வே ந வட்டந்தீ’’தி ச வுத்தம், தஸ்மா நிஸீத³னம் நாம நவன்னம் சீவரானம் அஞ்ஞதரம் சீவரம் அதி⁴ட்டா²தப்³ப³ம், தஞ்ச ஸந்த²தஸதி³ஸம் ஏளகலோமமயஸந்த²தவிஸேஸந்தி ஸித்³த⁴ம், ததா² நிஸீத³னமேவ நிஸீத³னஸந்த²தஞ்ச ஸித்³த⁴ம். போராணக³ண்டி²பதே³ ச ‘‘ஏகமேவா’’தி வுத்தம். தஸ்மிம் ஸித்³தே⁴ ஸித்³தா⁴ ஸந்த²தே சீவரஸஞ்ஞிதாதி அத்தோ². கஸ்மா? ஸந்த²தஸாமஞ்ஞதோ.

ஏத்தா²ஹ – கத²ம் அத³ஸமேவ ஸந்த²தம் சீவரஸங்க்²யம் ந க³ச்ச²தி. அனேகம்பி அனதி⁴ட்டி²தம்பி மஹந்தம்பி வட்டதி, யதோ ஸத³ஸமேவ ஸந்த²தம் சீவரஸங்க்²யம் க³ச்ச²தி, ததோ அதி⁴ட்டா²னஞ்ச உபக³ச்ச²தீதி. அஸந்த²தபரியாபன்னத்தா ஓரேன ச ச²ன்னம் வஸ்ஸானம் வினாபி ஸம்முதிம், தஞ்ச போராணம் விஸ்ஸஜ்ஜேத்வா ஏவ, ந அவிஸ்ஸஜ்ஜேத்வா ‘‘தஞ்ச கோ² பமாணயுத்தம் ஏகமேவ, த்³வே ந வட்டந்தீ’’தி (பாரா. அட்ட². 2.469) வசனதோதி. அதா²பி ஸியா ஸந்த²தம் ஸயனத்த²மேவ கரீயதி, நிஸீத³னம் அஸந்த²தமேவாதி. தஞ்ச ந நியமதோ ‘‘புராணஸந்த²தம் நாம ஸகிம் நிவத்த²ம் ஸகிம் பாருதம்பீ’’தி வுத்தத்தாதி. ஏத்த² வுச்சதி, ந ஏத்த² காரணம் பரியேஸிதப்³ப³ம் வினயபஞ்ஞத்தியா அனஞ்ஞவிஸயத்தா.

ஸந்த²தஸ்ஸ பன அசீவரபா⁴வே அயம் யுத்தி – ஆதி³தோ ‘‘தீணி ஸந்த²தானி பன வினயகம்மம் கத்வா படிலபி⁴த்வா பரிபு⁴ஞ்ஜிதும் ந வட்டந்தீ’’தி அட்ட²கதா²வசனதோ தானி அகப்பியானீதி ஸித்³த⁴ம், ப⁴க³வதா ச கோ²மாதீ³னி ச² அனுஞ்ஞாதானீதி கோஸேய்யம் கப்பியந்தி ஸித்³த⁴ம். ஏவம் ஸந்தே ஸுத்³த⁴கோஸேய்யம்பி சீவரம் கப்பியம் ஜாதம், பகே³வ கோஸியமிஸ்ஸகஸந்த²தசீவரந்தி ஆபஜ்ஜதி. ததா² கம்ப³லஞ்ச அனுஞ்ஞாதம், தஞ்ச ஸுத்³தி⁴கம்பி ஹோதி ஜாதிகாளகபா⁴வேன, பகே³வ ஓதா³தகோ³சரியமிஸ்ஸகஸந்த²தசீவரந்தி ஆபஜ்ஜதி. ததோ ச அஞ்ஞமஞ்ஞவிரோதோ⁴, தஸ்மா ந ஸந்த²தம் சீவரம் நாம ஹோதி, நிஸீத³னம் பன ஹோதி தஸ்ஸ பமாணஸண்டா²னபரிச்சே²த³ஸம்ப⁴வதோ. ஏத்தா²ஹு கேசி ஆசரியா ‘‘து³வித⁴ம் நிஸீத³னம் ஸந்த²தம், அஸந்த²தஞ்ச. தத்த² ஸந்த²தம் ஸந்த²தமேவ. அஸந்த²தம் கோ²மாதி³ச²ப்³பி³த⁴ம், தத³னுலோமம் வா ஹோதி, அயமேதேஸம் விஸேஸோ’’தி.

ஏத்தா²ஹ – கஸ்மா பனேத்த² ‘‘ஸந்த²தம் பன பி⁴க்கு²னா’’தி ஸிக்கா²பத³ம் அபஞ்ஞாபேத்வா ‘‘நிஸீத³னஸந்த²த’’ந்தி பஞ்ஞத்தந்தி? சீவரஸஞ்ஞிதாய ஸந்த²தானம் உஜ்ஜி²தத்தா தேஸம் அசீவரபா⁴வத³ஸ்ஸனத்த²ம் ததா² பஞ்ஞத்தந்தி வுத்தம் ஹோதி, தஸ்மா தே பி⁴க்கூ² து⁴தங்க³பே⁴த³ப⁴யா தானி உஜ்ஜி²த்வா தேரஸாபி து⁴தங்கா³னி ஸமாதி³யிம்ஸு, ஸீஸத³ஸ்ஸனவஸேன தீணேவ வுத்தானி, ப⁴க³வா ச தேஸம் ஸந்த²தம் அனுஜானி, ததோ நேஸம் ஏவம் ஹோதி ‘‘நிஸீத³னசீவரஸண்டா²னம்பேதம் நிஸீத³னஸந்த²தம் நோ அனுஞ்ஞாதம், சதுத்த²சீவரபா⁴வேன பகே³வ கதஸந்த²தம் வா’’தி. ததோ ஸந்த²தே நேஸம் சீவரஸஞ்ஞிதா ந ப⁴விஸ்ஸதீதி தத³த்த²ம் ப⁴க³வதா நிஸீத³னஸந்த²தந்தி பஞ்ஞத்தந்தி அதி⁴ப்பாயோ. ‘‘பச்சி²மானி த்³வே வட்டந்தீ’’தி கத²ம் பஞ்ஞாயதீதி சே? ‘‘அனாபத்தி அஞ்ஞேன கதம் படிலபி⁴த்வா பரிபு⁴ஞ்ஜதீ’’தி வசனதோதி.

நிஸீத³னஸந்த²தஸிக்கா²பத³வண்ணனா நிட்டி²தா.

6. ஏளகலோமஸிக்கா²பத³வண்ணனா

572-3. அத்³தா⁴னமக்³க³ப்படிபன்னஸ்ஸாதி இமினா பகதியா தீ³க⁴மக்³க³ப்படிபன்னஸ்ஸ உப்பன்னானிபி தியோஜனபரமமேவ ஹரிதப்³பா³னி, பகே³வ அப்படிபன்னஸ்ஸாதி த³ஸ்ஸேதி. அத்³தா⁴னமக்³க³ப்படிபன்னஸ்ஸ நிஸ்ஸக்³கி³யந்தி வா ஸம்ப³ந்தோ⁴. தேனேவ வாஸாதி⁴ப்பாயஸ்ஸ படிப்பஸ்ஸத்³த⁴க³மனுஸ்ஸாஹத்தா ‘‘அப்படிபன்னோ’’தி ஸங்க்²யம் க³தஸ்ஸ அனாபத்தீதி ஸித்³தா⁴. இமஸ்மிம் அத்த²விகப்பே ஹி பி⁴க்கு²னோ பனேவ ஏளகலோமானி உப்பஜ்ஜேய்யும்…பே… அஸந்தேபி ஹாரகே அத்³தா⁴னம் மக்³க³ப்படிபன்னஸ்ஸ நிஸ்ஸக்³கி³யம் பாசித்தியந்தி யோஜனா வேதி³தப்³பா³. ஆகங்க²மானேன பி⁴க்கு²னா படிக்³க³ஹேதப்³பா³னீதி அத்தனோ ஸந்தகானம்யேவ தியோஜனாதிக்கமே ஆபத்திம் த³ஸ்ஸேதி. தேன அனாகங்க²மானேன பரஸந்தகானி படிக்³க³ஹிதானி அதிரேகதியோஜனம் ஹரந்தஸ்ஸ அனாபத்தி ஸித்³தா⁴. அயமத்தோ² ‘‘பி⁴க்கு²னோ உப்பஜ்ஜேய்யு’’ந்தி இமினா, ‘‘அச்சி²ன்னம் படிலபி⁴த்வா’’தி இமினா ச தீ³பிதோவ ஹோதீதி. போராணக³ண்டி²பதே³ ச ‘‘அஞ்ஞம் பி⁴க்கு²ம் ஹராபேந்தோ க³ச்ச²தி சே, த்³வின்னம் அனாபத்தீதி வுத்தம், தஸ்மா த்³வே பி⁴க்கூ² தியோஜனபரமம் பத்வா அஞ்ஞமஞ்ஞஸ்ஸ ப⁴ண்ட³ம் பரிவத்தேத்வா சே ஹரந்தி, அனாபத்தீதி ஸித்³த⁴ம், தேனேவ அனாபத்திவாரே ‘‘அஞ்ஞம் ஹராபேதீ’’தி வுத்தம். கிம் ஹராபேதி? ஜானந்தம் அஜானந்தம். கிஞ்சேத்த² யதி³ ஜானந்தம், ‘‘அஞ்ஞோ ஹரிஸ்ஸதீதி ட²பேதி, தேன ஹரிதேபி ஆபத்தியேவா’’தி ஏகம்ஸதோ ந வத்தப்³ப³ம். ஜானந்தோபி ஹி ஏகச்சோ ஹரதீதி. ததோ அட்ட²கதா²ய விருஜ்ஜ²தி. அத² அஜானந்தம், ‘‘அஞ்ஞஸ்ஸ யானே வா ப⁴ண்டே³ வா அஜானந்தஸ்ஸ பக்கி²பித்வா தியோஜனம் அதிக்காமேதி, நிஸ்ஸக்³கி³யானீ’’தி பாளியா விருஜ்ஜ²தி, அத² உபோ⁴பி ஏகதோ ஏகம் ப⁴ண்ட³ம் ஹராபேந்தி, தம்பி நிஸ்ஸக்³கி³யம் ஸியா. அனிஸ்ஸக்³கி³யந்தி யுத்தியா விருஜ்ஜ²தி ‘‘தியோஜனபரமம் ஸஹத்தா² ஹரிதப்³பா³னி அஸந்தே ஹாரகே’’தி அவிஸேஸேன ச பாளி வுத்தா. ஹாரகோபி ஸசேதனோ அசேதனோதி து³விதோ⁴. ஸசேதனோபி ஏளகலோமபா⁴வம் வா ‘‘அஹமித³ம் ஹராமீ’’தி வா ‘‘மம் ஏஸ இத³ம் ஹராபேதீ’’தி வா ஜானனாஜானனவஸேன து³விதோ⁴ ஹோதி. தத்த² அசேதனோ நாம ஹாரகோ நதீ³ஸோதோ வா நாவா வா அஸ்ஸாமிகயானம் வா ஹோதி. ஸசேதனோ பாகடோவ. தத்த² ‘‘மம் ஏஸ இத³ம் ஹராபேதீ’’தி ஏத்தகம் ஜானந்தம் மனுஸ்ஸம் வா திரச்சா²னக³தம் வா அஞ்ஞம் ஹராபேதி, அனாபத்தீதி அனுக³ண்டி²பத³நயோ. அயம் பாளியா, அட்ட²கதா²ய ச ஏகரஸோ வினிச்ச²யோ, ‘‘அஸந்தே ஹாரகே’’தி கிஞ்சாபி இத³ம் அவிஸேஸதோ வுத்தம், ‘‘அஞ்ஞஸ்ஸ யானே வா ப⁴ண்டே³ வா அஜானந்தஸ்ஸா’’தி வசனதோ பன ஸசேதனோவ ஹாரகோ தத்த² அதி⁴ப்பேதோதி பஞ்ஞாயதி, ஸோ ச ஏளகலோமபா⁴வஞ்ச ‘‘இத³ம் ஹராமீ’’தி ச ஜானந்தோ நாதி⁴ப்பேதோ. தேன வுத்தம் ‘‘அஞ்ஞோ ஹரிஸ்ஸதீதி ட²பேதி, தேன ஹரிதேபி ஆபத்தியேவா’’திஆதி³. தத்த² ஹேதுகத்துனோ அபா⁴வதோவ. பாளியஞ்ஹி ‘‘அஞ்ஞம் ஹராபேதீ’’தி ஹேதுகத்துவஸேன வுத்தா. இதரே த்³வே ஜானந்தா இத⁴ ஸம்ப⁴வந்தி. ‘‘அஜானந்தஸ்ஸ பக்கி²பித்வா’’தி பாளியம் ‘‘ஏஸ ஹராபேதீ’’தி வா ‘‘இத³ம் டா²னம் அதிக்கமாபேதீ’’தி வா ஜானந்தஸ்ஸ யானே வா ப⁴ண்டே³ வா பக்கி²பித்வா தியோஜனம் அதிக்கமாபேதி, ந நிஸ்ஸக்³கி³யா ஹோந்தீதி தீ³பேதி.

‘‘ஹராபேதீ’’தி இத³ம் ஹேதுகத்துவசனதம் ஸாதே⁴தி, தஸ்மா அட்ட²கதா²யம் ‘‘ஸாமிகஸ்ஸ அஜானந்தஸ்ஸேவா’’தி இத³ம் ‘‘மம் ஏஸ ஹராபேதீ’’தி ஏவம் அஜானந்தம் ஸந்தா⁴ய வுத்தம். ‘‘ஸாரேதி சோதே³தி அனுப³ந்தா⁴பேதீ’’தி இத³ம் ‘‘மம் ஏஸ இத³ம் டா²னம் அதிக்கமாபேதீ’’தி ஏவம் ஜானந்தம் ஸந்தா⁴ய வுத்தம். அஜானந்தோபி ஸாரணாதீ³ஹி டி²தட்டா²னம் நாதிக்கமதி, ந வா அனுப³ந்த⁴தி. அத² ஸாரணாதீ³ஹி அனதிக்கமித்வா அத்தனோ ருசியா அதிக்கமதி ஆபத்தி ஏவ பி⁴க்கு²னோ ஹேதுகத்துபா⁴வாஸம்ப⁴வதோ.

இதா³னி யதா²டி²தட்டா²னதோ பட்டா²ய வக்கா²ம, ‘‘அஸந்தேபி ஹாரகே’’தி ஹாரகாலாப⁴பச்சயாபி ஸயம் ஹரணதோ நிஸ்ஸக்³கி³யமேவ, பகே³வ ஸதி ஹாரகேதி அயமேகோ அத்தோ². அவதா⁴ரணத்த²ம் அபி-ஸத்³த³ம் க³ஹேத்வா அஸந்தே ஏவ ஹாரகே நிஸ்ஸக்³கி³யம், ஸதி பன ஹாரகே ந தேன ஹராபேந்தஸ்ஸ நிஸ்ஸக்³கி³யந்தி அயம் து³தியோ அத்தோ². ‘‘ஸங்க⁴தோ வா…பே… அத்தனோ வா த⁴னேனா’’தி இமினா கிஞ்சாபி அசித்தகமித³ம் ஸிக்கா²பத³ம், ஸங்கா⁴தி³தோ பன அத்தனா ஆகங்க²மானேன படிக்³க³ஹிதஸ்ஸேவ ஏளகலோமஸ்ஸ தியோஜனாதிக்கமே ஆபத்தி, ந அஜானதோ அப்படிக்³க³ஹிதஸ்ஸ சீவராதீ³ஸு குதோசி லக்³க³ஸ்ஸ அதிக்கமனேதி தீ³பேதி. அனுக³ண்டி²பதே³ பன ‘‘கம்ப³லஸ்ஸ உபரி நிபஜ்ஜித்வா க³ச்ச²ந்தஸ்ஸ ஸசே ஏகம்பி லோமம் சீவரே லக்³க³ம் ஹோதி, ஆபத்தி ஏவ கம்ப³லதோ விஜடிதத்தா’’தி வுத்தம், தம் கம்ப³லஸ்ஸ படிக்³க³ஹிதத்தா அத்தனோ இச்சா²ய படிக்³க³ஹிதமேவ ஹோதீதி யுத்தம். யஸ்மா ‘‘அனாபத்தி கதப⁴ண்டே³’’தி வுத்தம், தஸ்மா தம் அனேகம்பி கதப⁴ண்ட³ட்டா²னியமேவ ஹோதி. தஞ்ஹி அனேன படிக்³க³ஹிதம், ந லோமம். அத² லோமம்பி அக்³க³ஹிதமேவ ஹோதி, கதப⁴ண்ட³ம் து³ப்பரிஹாரியலோமவினிப்³போ⁴க³கதப⁴ண்டோ³ நியமோ. ஏவம் ஸந்தே அகதப⁴ண்டே³ திகபாசித்தியம், கதப⁴ண்டே³ திகது³க்கடஞ்ச நயதோ த³ஸ்ஸேதப்³ப³ம் ப⁴வேய்ய, அஞ்ஞதா² திகஸ்ஸ த³ஸ்ஸிதத்தா. ஸஉஸ்ஸாஹத்தாதி அப்படிப்பஸ்ஸத்³த⁴க³மனத்தா. அசித்தகத்தா சாதி பி⁴க்கு²னோ உஸ்ஸாஹானுரூபம் லோமானம் தியோஜனாதிக்கமனதோ வினாபி பயோக³சித்தேன ஹரணசித்தேன ஆபஜ்ஜதி ஏவாதி அதி⁴ப்பாயோ. ஸா அனாபத்தி பாளியா ந ஸமேதீதி அந்தோ பன பயோகே³ன தியோஜனபரமம் அதிக்கமிதத்தா அனாபத்தி. ‘‘தியோஜனம் ஹரதீ’’தி இமினா தியோஜனம் பத³ஸா நேதுகாமோபி அந்தோதியோஜனே பதே³ பதே³ து³க்கடம் நாபஜ்ஜதீதி த³ஸ்ஸேதி, தம் யுத்தம் ‘‘தியோஜனம் வாஸாதி⁴ப்பாயோ க³ந்த்வா ததோ பரம் ஹரதீ’தி வசனஸ்ஸத்தி²தாயா’’தி வுத்தம். புனபி வுத்தம் ‘‘அஞ்ஞம் ஹராபேதீதி ‘இத³ம் ஹரிஸ்ஸாமீ’தி ஸஉஸ்ஸாஹமேவ அஞ்ஞம் ஹராபேதீதி அத்தோ². இதரதா² க³ச்ச²ந்தஸ்ஸ ஸீஸே ட²பேஸி, தஸ்மிம் அஜானந்தேபி அனாபத்தி ஸியா’’தி. ஸசே பன ‘‘அக³ச்ச²ந்தே யானே வா’’திஆதி³னா நயேன வுத்தத்தா ஹரணாதீ³ஹி ஜனிதஉஸ்ஸாஹானம் ஹத்தி²ஆதீ³னம் ‘இத³ம் கரிஸ்ஸாமா’தி வா ‘ஹரிஸ்ஸாமா’தி வா ஆபோ⁴கே³ ஜனிதே ஏவ அனாபத்தி, ந அஜனிதேதி உபதிஸ்ஸத்தே²ரோ ஆஹா’’தி ச வுத்தம். பரிவத்தேத்வா ட²பிதேதி த்³வின்னம்பி ப³ஹி நிக்கி²பிதத்தாதி உபதிஸ்ஸத்தே²ரோ. ப³ஹிஸீமாய ட²பிதம் ப⁴ண்டி³கம் அந்தோ அந்தோஸீமாயம் ட²பிதம் ப³ஹி கரோதோ அனாபத்தீதி கேசி, ந ஸுந்த³ரம் விய.

575. படிலபி⁴த்வா ஹரதீதி பட²மதியோஜனதோ பரம் ஹரதி, ந து³தியாதி³தோதி அத்தோ². கதப⁴ண்டே³ உப்பன்னோகாஸாபா⁴வா அனாபத்தி.

ஏளகலோமஸிக்கா²பத³வண்ணனா நிட்டி²தா.

7. ஏளகலோமதோ⁴வாபனஸிக்கா²பத³வண்ணனா

581. கிஞ்சாபி புராணசீவரதோ⁴வனஸிக்கா²பதே³ சீவரம் ட²பேத்வா ‘‘அஞ்ஞம் பரிக்கா²ரம் தோ⁴வாபேதீ’’தி (பாரா. 507) அனாபத்திவாரே வுத்தம். இமஸ்ஸ பன ஸிக்கா²பத³ஸ்ஸ உப்பன்னகாலதோ பட்டா²ய ஏளகலோமதோ⁴வாபனாதி³னா ஆபத்தீதி ஏகே. ஸா வா அனாபத்தி மூலாபத்திதோ ஏவ, ந இமம்ஹாதி ஏகே. ஏளகலோமானம் அபரிக்கா²ரத்தா ப⁴ட்ட²ம் அக்³க³ஹணமேவாதி ஏகே. இமஸ்ஸ அந்திமனயஸ்ஸ அத்த²ப்பகாஸனத்த²ம் இத³ம் பஞ்ஹாகம்மம் – ‘‘தோ⁴வாபேதீ’’தி இத³ம் ரஜாபனவிஜடாபனக்³க³ஹணேன நிப்பதே³ஸவாசிபத³ம், உதா³ஹு அக்³க³ஹணேன ஸப்பதே³ஸவாசிபத³ம். கிஞ்சேத்த² யதி³ நிப்பதே³ஸவாசிபத³ம், ஸப்³ப³த்த² இத³மேவ வத்தப்³ப³ம், ந இதரானி. அத² ஸப்பதே³ஸவாசிபத³ம், ‘‘அவுத்தா தோ⁴வதி, அபரிபு⁴த்தம் தோ⁴வாபேதீ’’தி ஏத்த² விரோதோ⁴. ‘‘அவுத்தா ரஜதி விஜடேதி, நிஸ்ஸக்³கி³ய’’ந்தி அனிட்ட²ப்பஸங்க³தோதி? தே³ஸனாவிலாஸமத்தம் ப⁴க³வதோ வசனம், கத்த²சி திகபத³வசனம், கத்த²சி ஏகபத³வசனம், நிப்பதே³ஸபத³மேவ தே வத³ந்தீதி. ஸசே ‘‘கதப⁴ண்ட³ம் தோ⁴வாபேதீ’’தி ஏத்த² படிவிரோதோ⁴, ‘‘கதப⁴ண்ட³ம் விஜடாபேதி, அனாபத்தீ’’தி அனிட்ட²ப்பஸங்க³தோ அனாபத்தி ஏவாதி சே? ந, அகதப⁴ண்ட³ஸ்ஸ ஸுத்³த⁴லோமஸ்ஸ விஜடாபனம் இதோ வா தா³தப்³ப³ம். உத³காதி³தோ⁴வனவஸேன பிண்டே³த்வா டி²தானம் விஜடாபனம் லப்³ப⁴தீதி சே? புராணஸந்த²தஸ்ஸ விஜடாபனே அனாபத்தியா ப⁴விதப்³ப³ம், ந ச தம் யுத்தம் ‘‘அபரிபு⁴த்தம் தோ⁴வாபேதீ’’தி வசனதோ. தேன பரிபு⁴த்தம் தோ⁴வாபேதி ரஜாபேதி விஜடாபேதி, நிஸ்ஸக்³கி³யமேவாதி ஸித்³த⁴ம் ஹோதி, தஞ்ச பரிபு⁴த்தம் நாம கதப⁴ண்ட³மேவ ஹோதி. ந ஹி ஸக்கா ஏளகலோமானி பரிபு⁴ஞ்ஜிதும், அஞ்ஞதா² ‘‘பரிபு⁴த்தம் தோ⁴வாபேதீ’’தி வசனம் நிரத்த²கம் ஹோதி. ந ஹி ஏத்த² ‘‘புராணானி ஏளகலோமானி தோ⁴வாபேய்ய வா’’தி வசனம் அத்தி² புராணசீவரஸிக்கா²பதே³ விய. தத்த² ஆதி³ன்னகப்பவஸேன, இத⁴ தம் லிகி²தம். லேக²தோ³ஸோதி சே? ந, விஸேஸஹேதுனோ அபா⁴வா, புராணசீவரஸிக்கா²பதே³ அபரிபு⁴த்தம் கதப⁴ண்ட³ம் நாம, ‘‘கம்ப³லகோஜவஸந்த²தாதி³’’ந்தி வசனதோ ச. கிஞ்சாபி இமினா ஸத்³தே³ன அயமத்தோ² ஸித்³தோ⁴, ‘‘தோ⁴வாபேதீ’’தி இத³ம் பன ஸியா நிப்பதே³ஸம். ஸியா ஸப்பதே³ஸம். தஞ்ஹி ‘‘அவுத்தா தோ⁴வதீ’’திஆதீ³ஸு நிப்பதே³ஸம். ‘‘கதப⁴ண்ட³ம் தோ⁴வாபேதீ’’தி ஏத்த² ஸப்பதே³ஸம். ‘‘அகதப⁴ண்ட³ம் தோ⁴வாபேதி ரஜாபேதி, அனாபத்தீ’’தி ‘‘விஜடாபேதி, அனாபத்தீ’’தி வசனப்பமாணதோ அனாபத்தி ஏவாதி சே? ந, வசனப்பமாணதோ ஏவ ஆபத்தீதி ஆபஜ்ஜனதோ. ‘‘அபரிபு⁴த்தம் தோ⁴வாபேதீ’’தி வசனமேவ ஹி தம் அபரிபு⁴த்தம் ஸந்த²தம் விஜடாபேந்தஸ்ஸ அனாபத்தீதி தீ³பேதி சே? ஸித்³த⁴ம் பரிபு⁴த்தம் விஜடாபேந்தஸ்ஸ ஆபத்தி ஏவாதி.

ஏளகலோமதோ⁴வாபனஸிக்கா²பத³வண்ணனா நிட்டி²தா.

8. ரூபியஸிக்கா²பத³வண்ணனா

583-4. ஸப்³ப³ம்பீதி திவித⁴ம்பி. ‘‘முத்தா மணி வேளுரியோ ஸங்கோ²’திஆதி³ பன கிஞ்சாபி ராஜஸிக்கா²பதே³ ‘ந வட்டதீ’தி பஸங்க³தோ வுத்தம், ஸரூபதோ பன ஆபத்தித³ஸ்ஸனவஸேன ஸகட்டா²னேபி வத்துமாரத்³த⁴’’ந்தி வுத்தம். கத²மேதம்? முத்தாதீ³னம் ஸகட்டா²னம் ஜாதம், ந ஹி தானி இத⁴ பாளியம் தி³ஸ்ஸந்தீதி இமஸ்ஸ அட்ட²கதா²யம் வுத்தானி, ராஜஸிக்கா²பத³ஸ்ஸபி அட்ட²கதா²யம் வுத்தானீதி. ந கேவலம் ஹிரஞ்ஞஸுவண்ணமேவ, அஞ்ஞம்பி கே²த்தவத்தா²தி³கம் ‘‘அகப்பியம் ந ஸம்படிச்சி²தப்³ப³’’ந்தி ஸாமஞ்ஞேன, ந ஸரூபதோ. பாளியம் பன ஸரூபதோ ‘‘சீவரசேதாபன்னம் நாம ஹிரஞ்ஞம் வா ஸுவண்ணம் வா முத்தா வா மணி வா’’தி ஏத்தகமேவ வுத்தம், தஸ்மா ராஜஸிக்கா²பத³மேவஸ்ஸ ஸகட்டா²னம். முத்தாமணிக்³க³ஹணேன சேத்த² தஜ்ஜாதியக்³க³ஹணம் ஸித்³த⁴மேவாதி நாக³தோ இமஸ்ஸ பட²மமேவ பஞ்ஞத்தத்தா. யதி³ ஏவம் இத⁴ அனாக³தத்தா கதரம் நேஸம் ஸகட்டா²னந்தி? இத³மேவ அத்த²தோ, நோ ஸரூபதோ.

கத²ம்? ஏதானி ஹி ரதனஸிக்கா²பதே³ நிஸ்ஸக்³கி³யவத்தூ²னி, து³க்கடவத்தூ²னி ச ஏகதோ ‘‘ரதன’’ந்தி ஆக³தானி, ‘‘ரதனஸம்மத’’ந்தி கப்பியவத்து² ஆக³தம். தேஸு ச த³ஸஸு ரதனேஸு ரஜதஜாதரூபத்³வயம் இத⁴ நிஸ்ஸக்³கி³யவத்து², அவஸேஸம் து³க்கடவத்தூ²தி ஸித்³த⁴ம். இத⁴ ச ஸித்³த⁴த்தா ஏவ ரதனஸிக்கா²பத³ஸ்ஸ அனாபத்திவாரே ‘‘ரதனஸம்மதம் விஸ்ஸாஸம் க³ண்ஹாதி, தாவகாலிகம் க³ண்ஹாதி, பம்ஸுகூலஸஞ்ஞிஸ்ஸா’’தி வுத்தம், ந ரதனம் வுத்தம். ஸத்தவித⁴த⁴ஞ்ஞதா³ஸிதா³ஸகே²த்தாதி³ பன ப்³ரஹ்மஜாலாதி³ஸுத்தவஸேன (தீ³. நி. 1.1 ஆத³யோ) அகப்பியந்தி ஸித்³த⁴ம், தஸ்மா இத⁴ து³க்கடவத்தூ²தி ஸித்³த⁴ம், தேனேவ அனுயோக³வத்தே ‘‘த⁴ம்மம் ஜானாதி, த⁴ம்மானுலோமம், வினயம், வினயானுலோமம் ஜானாதீ’’தி (பரி. 442) வுத்தம். ததா² ஆமகமம்ஸம்பி து³க்கடவத்து²ம் ஆபஜ்ஜதீதி? ந, இத⁴ வினயே அனுஞ்ஞாதத்தா ‘‘அனுஜானாமி, பி⁴க்க²வே, அமனுஸ்ஸிகாபா³தே⁴ ஆமகமம்ஸ’’ந்திஆதி³னா (மஹாவ. 264), தஸ்மா ந ஆமகமம்ஸம் ஸுத்தே ஆக³தம்பி து³க்கடவத்து² ஹோதி, ததா²பி அத்தனோ பரிபோ⁴க³த்தா²ய படிக்³க³ஹணே து³க்கடமேவாதி நோ தக்கோதி ஆசரியோ. ‘‘இத⁴ நிக்கி²பாஹீ’தி வுத்தே உபனிக்கி²த்தஸாதி³யனமேவ ஹோதீ’’தி வத³ந்தி. ‘‘அகப்பியவிசாரணா ஏவ ந வட்டதீதி சே? கப்பியஞ்ச அகப்பியஞ்ச நிஸ்ஸாய டி²தந்தி ஏத்த² தம் ஸயம் அபரிபோ⁴கா³ரஹம் ஹுத்வா தத³க்³க⁴னகம் கப்பியப⁴ண்ட³ம் பரிபோ⁴கா³ரஹம் ஹுத்வா டி²தந்தி அத்தோ²’’தி லிகி²தம், ‘‘பம்ஸுகூலபா⁴வேன டி²தத்தா, கு³த்தட்டா²னாசிக்க²னஸ்ஸ கப்பியத்தா ச கப்பியம் நிஸ்ஸாய டி²தம். ‘இத³ம் க³ண்ஹா’திஆதி³னா வத³ந்தஸ்ஸ அகப்பியத்தா அகப்பியம் நிஸ்ஸாய டி²த’’ந்தி ச. ஏவம்பி கப்பியஞ்ச அகப்பியஞ்சாதி ‘‘இமஸ்மிம் ஓகாஸே ட²பிதம், கிம் ந பஸ்ஸஸீதி சே²கதரே இமேவ கஹாபணே’’திஆதி³வசனஸ்ஸ கப்பியத்தா கப்பியம் நிஸ்ஸாய டி²தம். ‘‘இத³ம் க³ண்ஹா’’தி வுத்தே து³ப்³பி³சாரிதத்தா அத்தனோ அகப்பியத்தா ததோ ஆக³தம் அகப்பியம் நிஸ்ஸாய டி²தமேவ ஹோதி. ‘‘இத³ம் க³ண்ஹா’தி வுத்தே தேன க³ஹிதே ‘உக்³க³ண்ஹாபேய்ய வா’தி வுத்தவிதி⁴ம் ந பாபுணாதி, கேவலம் து³ப்³பி³சாரிதத்தா தஸ்ஸேவ தம் அகப்பியம் ஹோதி, மூலபடிக்³க³ஹணஸ்ஸ ஸுத்³த⁴த்தா பரதோ பத்தசதுக்கே ததியபத்தோ வியாதி ச ஏவம் உபதிஸ்ஸத்தே²ரோ வத³தீ’’தி அனுக³ண்டி²பதே³ வுத்தம். கிம் ப³ஹுனா, விஸுத்³தா⁴க³மத்தா கப்பியம். து³ப்³பி³சாரணாய ஸதி அகப்பியம் நிஸ்ஸாய டி²தம் ஹோதீதி நோ தக்கோதி ஆசரியோ. ‘‘ஏவம் ஸங்க⁴க³ணாதீ³னம்பி அத்தா²ய பரிச்சத்தேபி தேன ஸமானக³திகத்தா ட²பேத்வா ஆபத்திவிஸேஸ’’ந்தி வுத்தம்.

ந கிஞ்சி கப்பியப⁴ண்ட³ம் சேதாபிதந்தி சேதாபிதஞ்சே, உபாயாபா⁴வம் த³ஸ்ஸேதி. ‘‘உபனிக்கே²பம் ட²பேத்வாதி ஸசே ஸோ உபாஸகோ ‘அதிப³ஹும் ஏதம் ஹிரஞ்ஞம், இத³ம் ப⁴ந்தே அஜ்ஜேவ ந வினாஸேதப்³ப³’ந்தி வத்வா ஸயம் உபனிக்கே²பதே³ஸே ட²பேதி, அஞ்ஞேன வா ட²பாபேதி, ஏதம் உபனிக்கே²பம் ட²பேத்வா ததோ லத்³த⁴ம் உத³யம் பரிபு⁴ஞ்ஜந்தோ ஸங்கோ⁴ பச்சயே பரிபு⁴ஞ்ஜதி நாமா’’தி வுத்தம்.

585. அயம் கிர இத்த²ம்லக்க²ணஸம்பன்னோ உக்கம்ஸதோ. ஏவம் அங்க³ஸம்பன்னோபி அபரபா⁴கே³ லோப⁴வஸேன வா அஞ்ஞேன வா காரணேன ஸசே நிமித்தம் கத்வா பாதேதி, ஆபத்தி து³க்கடஸ்ஸ. ஸேனாஸனம்பி பரிபோ⁴கே³ பரிபோ⁴கே³தி பவேஸே பவேஸே. ஸோ ஹி காரணந்தரேன ருக்க²மூலிகஸ்ஸ, அப்³போ⁴காஸிகஸ்ஸபி வட்டதி ஏவ, டா²னனிஸஜ்ஜாதி³வஸேன நிவாஸாதி⁴ப்பாயே ஸதி பரிபோ⁴கே³ பரிபோ⁴கே³ பச்சவேக்கி²தப்³ப³ம். பே⁴ஸஜ்ஜஸ்ஸ ஸதிபச்சயதா ஸப்³ப³காலம்பீதி ஏகே. அஸன்னிஹிதஸ்ஸ பச்சா²ப⁴த்தமேவ, ஸன்னிஹிதஸ்ஸ புரேப⁴த்தம்பீதி நோ தக்கோதி ஆசரியோ. ‘‘யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய…பே… படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸா’’தி (பாசி. 244) ஹி வுத்தம். து³க்கடஞ்ஹி விகாலபோ⁴ஜனஸிக்கா²பதே³ ஆக³தம் விகாலே ஆபஜ்ஜதி, நோ காலே ஆஹாரகாலத்தா, ஸன்னிதி⁴ஸிக்கா²பதே³ ஆக³தம் பன காலேபி ஸன்னிதி⁴ஜாதத்தா, தேனேவ தத்த² ஸத்தாஹகாலிகயாவஜீவிகத்³வயமேவ வுத்தந்தி. ‘‘ஸதி பச்சயே’’தி வசனதோ நாயம் விஸேஸோ லப்³ப⁴தீதி சே? ந, அனிட்ட²ப்பஸங்க³தோ, வசனானியமதோ ச. ஸன்னிதி⁴ஸிக்கா²பதே³ ஹி ‘‘அனாபத்தி யாவகாலிகம் யாவகாலம் நித³ஹித்வா பு⁴ஞ்ஜதி. யாமகாலிகம் யாமே நித³ஹித்வா பு⁴ஞ்ஜதீ’’தி (பாசி. 256) ஏத்த² வசனப்பமாணதோ யாமகாலிகம் ந புரேப⁴த்தே, ந பச்சா²ப⁴த்தே, ந தி³வஸே, ந ரத்தியம் யாமமேவ நித³ஹித்வா பு⁴ஞ்ஜந்தஸ்ஸ அனாபத்தீதி அனிட்ட²ப்பஸங்கோ³. ததா² தத்தே²வ ‘‘யாமகாலிகம் யாமம் நித³ஹித்வா பு⁴ஞ்ஜதி, ஸத்தாஹகாலிகம் ஸத்தாஹம் நித³ஹித்வா பு⁴ஞ்ஜதீ’’தி ஏத்தகமேவ வுத்தம், ந வுத்தம் ‘‘ஸதி பச்சயே’’தி, தஸ்மா ஸதிபச்சய-வசனம் கத்த²சி ஹோதி, கத்த²சி ந ஹோதீதி வசனானியமதோ ஆபத்தியாபி அனியமோ ஸியா. ஏவம் ஸந்தேபி யதா²வுத்தது³க்கடம் ஆபஜ்ஜதி ஏவ. ந அனாஹாரப்பயோஜனத்தா யாமகாலிகாதீ³னந்தி சே? ந, ஸப்பிஆதி³மிஸ்ஸபோ⁴ஜனஸ்ஸ பணீதபோ⁴ஜனபா⁴வப்பத்திதோ. அபிச ஸப்³ப³காலிகேஸு யாவகாலிகம் ஓளாரிகம், தம் ஆஹாரத்தா²ய படிக்³க³ண்ஹந்தஸ்ஸ காலே அனாபத்தி, பகே³வ அனோளாரிகம் யாமகாலிகாதி³ம், ஆஹாரத்தா²ய ஏவ அனுஞ்ஞாதத்தா. யாவகாலிகே ஏவ அனாபத்தீதி சே? ந, அனாஹாரத்தா²ய க³ண்ஹந்தஸ்ஸ ஆபத்திஸம்ப⁴வதோ இதரம் ஆஹாரத்தா²ய க³ண்ஹந்தஸ்ஸ விய, தஸ்மா யதா²வுத்தமேவேத்த² ஸன்னிட்டா²னம் பாளிம், யுத்திஞ்ச அனுலோமேதீதி.

தே³ஸனாஸுத்³தீ⁴தி ஏத்த² தே³ஸனா நாம வினயகம்மம், தேன வுட்டா²னம்பி தே³ஸனா ஏவ நாம ஹோதீதி. ‘‘படிக்³க³ண்ஹாதீ’’தி அவத்வா ‘‘படிஸேவதீ’’தி வுத்தத்தா படிக்³க³ஹணே பன ஸதிம் அகத்வா பரிபோ⁴கே³ கரோந்தஸ்ஸ அனாபத்தி. கீ²ணாஸவா கதகிச்சத்தா விப⁴த்ததா³யாதா³ விய ஹோந்தி, தேன தேஸம் ஸாமிபரிபோ⁴கா³ ஹோந்தி. அஞ்ஞதா² யாவகாலிகபா⁴வம் அனதிக்கந்தத்தா விருஜ்ஜ²தி. இணபரிபோ⁴கோ³ ந வட்டதி, பே⁴ஸஜ்ஜே ஆபத்திதோ, இதரஸ்மிம் அயுத்தபரிபோ⁴க³தோ, இணம் விய அனனுஞ்ஞாதபு⁴த்தத்தா ச. ‘‘ஆதி³தோ பட்டா²ய ஹி அலஜ்ஜீ நாம நத்தி², தஸ்மா ந கோசி ஸங்கிதப்³போ³’’தி லிகி²தம். பா⁴ரபூ⁴தா ஸத்³தி⁴விஹாரிகாத³யோ. யதா²தா³னமேவ க³ஹிதத்தாதி ஏத்த² ‘‘அத்தனோ ஹத்தே²ன சே தே³தி, ந வட்டதீ’’தி வுத்தம், ‘‘அதிரேகபா⁴க³ம் க³ஹேத்வா புனதி³வஸே அத்தனோ அத்தா²ய உத்³த⁴டபா⁴க³ம் தத்தே²வ தா³பேதி, வட்டதீ’’தி ச. பரிவத்தகம் தே³தி, த⁴ம்மியஞ்சே, வட்டதி. நோ அத⁴ம்மியம். ‘‘தம் த⁴ம்மானுக்³க³ஹேன உக்³க³ண்ஹிதும் வட்டதீ’’தி வுத்தம். கேன லேஸேனாதி சே? ‘‘அலப்³ப⁴மானாய ஸாமக்³கி³யா அனாபத்தி ஸம்போ⁴கே³ ஸம்வாஸே’’தி (மஹாவ. 130) இமினா உபஸம்பத³க்க²ந்த⁴கவசனலேஸேன.

586. அஸ்ஸதியா தி³ன்னந்தி ஏத்த² ‘‘அஸ்ஸதியா தி³ன்னம் நாம அபரிச்சத்தம் ஹோதி, தஸ்மா து³ஸ்ஸந்தே ப³த்³த⁴கஹாபணாதீ³னி ஸதிம் படிலபி⁴த்வா தா³யகா சே புன க³ண்ஹந்தி, நிஸ்ஸக்³கி³யமேவ தே³ஸேதப்³ப³ம். தேன அகப்பியப⁴ண்டே³ன தே சே தா³யகா ஸப்பிஆதீ³னி கிணித்வா ஸங்க⁴ஸ்ஸ தே³ந்தி, தஸ்ஸபி பி⁴க்கு²னோ கப்பதி தா³யகானம்யேவ ஸந்தகத்தா. பி⁴க்கு²னா ஹி ‘வத்த²ம் க³ண்ஹாமீ’தி வத்த²ஸஞ்ஞாய ஏவ க³ஹிதம், ந ரூபியஸஞ்ஞாய. இத³ஞ்ச ஸிக்கா²பத³ம் அத்தனோ அத்தா²ய உக்³க³ஹணம் ஸந்தா⁴ய வுத்தம், ந ச தேன தம் அத்தனோ அத்தா²ய பரேஸம் வா அத்தா²ய க³ஹிதம். அத² தே தா³யகா நோ சே ஆக³ந்த்வா க³ண்ஹந்தி, தா³யகே புச்சி²த்வா அத்தனோ அத்தா²ய சே பரிச்சத்தம், ஸங்கே⁴ நிஸ்ஸஜ்ஜித்வா ஆபத்தி தே³ஸேதப்³பா³. நோ சே, ஆபத்தி ஏவ தே³ஸேதப்³பா³’’தி வுத்தம், தம் புப்³பா³பரவிருத்³த⁴ம். ஆபத்திதே³ஸனாய ஹி ஸதி ரூபியம் படிக்³க³ஹிதந்தி ஸித்³த⁴ம், தஸ்மிம் ஸித்³தே⁴ ‘‘ததோ உப்பன்னம் தஸ்ஸபி கப்பதீ’’தி இத³ம் ந யுஜ்ஜதீதி. கப்பதி ஏவாதி சே? ந, வத்து²ம் அனிஸ்ஸஜ்ஜித்வா ஆபத்தி தே³ஸேதப்³பா³தி ந யுஜ்ஜதி. அசித்தகத்தா ஸிக்கா²பத³ஸ்ஸ யுஜ்ஜதீதி சே? ந, ஸப்³ப³த்த² ‘‘ரூபியம் படிக்³க³ண்ஹாதீ’’தி வசனதோ. ‘‘ரூபியம் படிக்³க³ண்ஹாதீ’’தி ஹி வுத்தம், அஞ்ஞதா² ஸப்³ப³த்த² ‘‘ரூபிய’’ந்தி பத³ம் நிரத்த²கம் ஹோதி வினாபி தேன தத³த்த²ஸித்³தி⁴தோ. அனேன ச வத்த²ம் படிக்³க³ஹிதம், தா³யகேன ச வத்த²மேவ தி³ன்னம், வத்த²க³தம்பி ரூபியம் தே²ய்யசித்தேன க³ண்ஹந்தோ பத³வாரேன காரேதப்³போ³. அட்ட²கதா²யஞ்ச ‘‘ரூபியே அரூபியஸஞ்ஞீதி ஸுவண்ணாதீ³ஸு க²ரபத்தாதி³ஸஞ்ஞீ’’தி வுத்தம் ‘‘ரூபியம் படிக்³க³ண்ஹாதீ’’தி வசனவஸேன.

‘‘அபிச புஞ்ஞகாமா’’திஆதி³ பன விதா⁴னந்தரத³ஸ்ஸனத்த²ம் வுத்தம், தேனேவ ஹி ‘‘இமஸ்மிம் கே³ஹே இத³ம் லத்³த⁴ந்தி ஸல்லக்கே²தப்³ப³’’ந்தி வுத்தம். அஞ்ஞதா² ஸல்லக்க²ணே விமதிவஸேன, விமதியா ச ஸதி நிஸ்ஸக்³கி³யமேவ ‘‘ரூபியே வேமதிகோ’’திஆதி³ வசனதோதி. இத³ம் விதா⁴னம் நிரத்த²கமேவ ஆபஜ்ஜதி, ந ச நிரத்த²கம். கஸ்மா? து³ஸ்ஸந்தே ப³த்³த⁴கஹாபணாதி³ அஸ்ஸதியா தி³ன்னம் வத்த²ஸஞ்ஞாய படிக்³க³ஹிதஞ்ச, ததோ ந ரூபியம் தி³ன்னஞ்ச ஹோதி படிக்³க³ஹிதஞ்சாதி. ஏத்த² ஆபத்திதே³ஸனாகிச்சம் நத்தி², தம் பன தா³யகானமேவ படிதா³தப்³ப³ம். ததோ உப்பன்னம் கப்பியப⁴ண்ட³ஞ்ச ஸப்³பே³ஸம் கப்பதீதி இமஸ்ஸ விதா⁴னந்தரத³ஸ்ஸனத்த²ம் ‘‘அபிச புஞ்ஞகாமா’’திஆதீ³தி நோ தக்கோதி ஆசரியோ.

ரூபியஸிக்கா²பத³வண்ணனா நிட்டி²தா.

9. ரூபியஸம்வோஹாரஸிக்கா²பத³வண்ணனா

587. ‘‘ஜாதரூபரஜதபரிவத்தன’’ந்தி உக்கட்ட²பரிச்சே²தே³ன வுத்தம், ததா² ‘‘ரூபியம் நாம ஸத்து²வண்ணோ கஹாபணோ’’திஆதி³ பாளிவசனஞ்ச. ‘‘அரூபியே ரூபியஸஞ்ஞீ ரூபியம் சேதாபேதீ’’திஆதி³ திகவசனதோ, ‘‘து³க்கடவத்து²னா பன நிஸ்ஸக்³கி³யவத்து²ம் சேதாபேந்தஸ்ஸ…பே… நிஸ்ஸக்³கி³யம் பாசித்தியம் க³ருகஸ்ஸ சேதாபிதத்தா’’தி அட்ட²கதா²வசனதோ ச பன அனுக்கட்ட²பரிச்சே²தோ³பேத்த² லப்³ப⁴தீதி ஸித்³த⁴ம். ஸத்து²வண்ணோ ச கஹாபணோ ச ததோ யே சஞ்ஞே வோஹாரம் க³ச்ச²ந்தீதி ஏவமேத்த² ஸமுச்சயோ வேதி³தப்³போ³. இமஸ்மிம் பன ஸிக்கா²பதே³ ‘‘நானப்பகாரகம் நாம கதம்பி அகதம்பி கதாகதம்பீ’’தி ஏத்த² விப⁴த்தானம் திண்ணம் ரூபியாரூபியானஞ்ச த்³வின்னம் வஸேன பஞ்ச திகா வுத்தா, அட்ட²கதா²சரியேஹி தத³னுலோமதோ ஏகோ திகோ த³ஸ்ஸிதோதி ஸப்³பே³ ச² ஹோந்தி.

ஏத்தா²ஹ – அஞ்ஞஸ்மிம் ஸிக்கா²பதே³ ஏகஸ்மிம் திகச்சே²தே³ த³ஸ்ஸிதே ஸதிபி ஸம்ப⁴வே இதரே ந த³ஸ்ஸீயந்தி, இதே⁴வ கஸ்மா த³ஸ்ஸிதோதி? ‘‘நானப்பகாரக’’ந்தி மாதிகாயம் வுத்தத்தா இதே⁴வ நானப்பகாரபா⁴வத³ஸ்ஸனத்த²ந்தி. ந கயவிக்கயஸிக்கா²பதே³பி வத்தப்³ப³ப்பஸங்க³தோதி சே? ந, இத⁴ த³ஸ்ஸிதனயத்தா. அத² ச ரூபியஸ்ஸ விப⁴ங்கே³ ‘‘யே வோஹாரம் க³ச்ச²ந்தீ’’தி அந்தே வுத்தத்தா ஸத்து²வண்ணாத³யோ வளஞ்ஜனுபகா³ ஏவாதி ஸித்³த⁴ம். ததோ அவளஞ்ஜனுபகே³ஹி ஜாதரூபரஜதேஹி வோஹாரேன ந நிஸ்ஸக்³கி³யந்தி ஆபஜ்ஜதி, தஸ்மா தம் ஆபஜ்ஜனத்த²ந்தி த³ஸ்ஸேந்தேன ‘‘கதேன கதம் சேதாபேதீ’’திஆத³யோ திகா வுத்தாதி, ஏவம் ஸந்தே ரூபியவிப⁴ங்கே³ ‘‘யே ச வோஹாரம் க³ச்ச²ந்தீ’’தி ந வத்தப்³ப³ம், தஸ்மிம் பதே³ அவுத்தே அவளஞ்ஜனுபகா³பி ஸங்க³ஹம் க³தாவ ஹோந்தீதி கதாதீ³ஹி திகத்தயஸ்ஸ வத்தப்³ப³பயோஜனம் ந ப⁴விஸ்ஸதீதி சே? ந, கப்பியப⁴ண்டே³ன கப்பியப⁴ண்ட³பஅவத்தனஸ்ஸாபி ரூபியஸம்வோஹாரபா⁴வப்பஸங்க³தோ. ‘‘யே வோஹாரம் க³ச்ச²ந்தீ’’தி வசனேனபி கமுக கத²ல கம்ஸபா⁴ஜன ஸாடகாதி³பரிவத்தனஸ்ஸபி ரூபியஸம்வோஹாரபா⁴வப்பஸங்கோ³ ஏவாதி சே? ந, கதாதி³வசனேன ஜாதரூபாதி³அகப்பியவத்தூ²னஞ்ஞேவ அதி⁴ப்பேதபா⁴வதீ³பனதோ, தஸ்மா உப⁴யேனபி யதே³தம் கதாகதாதி³பே⁴த³ம் பாகதிகரூபியம் யஞ்ச கஹாபணமாஸகஸங்கே²பம், யஞ்ச கஹாபணாதி³வோஹாரூபக³ம், உப⁴யம்பேதம் இத⁴ ச அனந்தராதீதஸிக்கா²பதே³ ச ரூபியம் நாமாதி அதி⁴ப்பேதத்த²ஸித்³தி⁴ ஹோதி, ந தண்டு³லாதீ³னி, தத்த² கதாதி³வோஹாராஸம்ப⁴வதோ. ஏத்தாவதா கதாதி³திகத்தயப்பயோஜனம் வுத்தம்.

இதா³னி ஸேஸத்திகானி வுச்சதி – ஏத்த² ஹி யதா²வுத்தப்பபே⁴த³ம் நிஸ்ஸக்³கி³யவத்து² ரூபியம் நாம, ஸேஸம் து³க்கடவத்து²பி கப்பியவத்து²பி ந ரூபியந்தி அரூபியம் நாம ஹோதீதி கத்வா ‘‘அரூபியே அரூபியஸஞ்ஞீ பஞ்சன்னம் ஸஹத⁴ம்மிகானம் அனாபத்தீ’’தி இத³ம் ந ஏகம்ஸிகம் ஆபஜ்ஜதி து³க்கடவத்து²ம்ஹி து³க்கடாபஜ்ஜனதோ. இத⁴ வசனப்பமாணதோ நிஸ்ஸக்³கி³யவத்து²தோ அஞ்ஞம் அந்தமஸோ முத்தாதி³பி அரூபியமேவ நாம. தத்த² பஞ்சன்னம் ஸஹத⁴ம்மிகானம் அனாபத்தீதி சே? ந, ராஜஸிக்கா²பத³விரோத⁴தோ. தத்த² ஹி ‘‘முத்தா வா மணி வா’’தி வுத்தம், தஸ்மா முத்தாதி³ அகப்பியம் து³க்கடவத்தூ²தி ச ஸித்³த⁴ம் நிஸ்ஸக்³கி³யவத்தூ²ஸு அபா⁴வா. ஏவம் ஸந்தே ‘‘அரூபியே அரூபியஸஞ்ஞீ பஞ்சன்னம் ஸஹத⁴ம்மிகானம் அனாபத்தீ’’தி ஸுத்³த⁴கப்பியப⁴ண்ட³ம் ஸந்தா⁴ய வுத்தம், ந ஸப்³ப³ம் அரூபியம். ததோ அஞ்ஞத்த² பன ‘‘அரூபியே ரூபியஸஞ்ஞீ’’திஆதி³திகது³க்கடே ச அட்ட²கதா²யம் த³ஸ்ஸிததிகே ச ஸப்³ப³ம் அரூபியம் நாமாதி வேதி³தப்³ப³ம், தஸ்மா அரூபியபா⁴வதீ³பனத்த²ம் து³தியோ திகோ வுத்தோ. தத³த்த²மேவ அட்ட²கதா²யம் த³ஸ்ஸிதோ ஏகோ திகோ. கஸ்மா ந பாளியம் ஸோ வுத்தோதி சே? தத்த² சேதாபிதஅரூபியே ரூபியச²ட்³ட³னகஸம்முதிகிச்சாபா⁴வதோ. தஸ்மிஞ்ஹி திகே வுத்தே கப்பியவத்து²னோபி அரூபியச²ட்³ட³னகஸம்முதி தா³தப்³பா³தி ஆபஜ்ஜதி, தஸ்ஸ வஸேன ரூபியச²ட்³ட³னகஸம்முதி ஏவ ந வத்தப்³பா³தி? ந, ரூபியஸ்ஸபி ஸம்முதிகிச்சாபா⁴வப்பஸங்க³தோ, தஸ்மா ரூபியே ரூபியஸஞ்ஞீ கப்பியவத்து²ம் சேதாபேதி பத்தசதுக்கே ததியபத்தம் விய, தம் ஸங்கா⁴தீ³னம் நிஸ்ஸஜ்ஜிதப்³ப³ம், நிஸ்ஸட்ட²ம் பன அஞ்ஞேஸம் கப்பதி ததியபத்தோ விய. அத² ஸம்படிச்சி²தரூபியேன சேதாபிதம் ஹோதி து³தியபத்தோ விய, தம் வினாபி ஸம்முதியா யோ கோசி பி⁴க்கு² ச²ட்³டே³தி, வட்டதி. ததோ பரம் ‘‘ஸசே தத்த² ஆக³ச்ச²தி ஆராமிகோ வா’’திஆதி³னா வுத்தனயேனேவ படிபஜ்ஜிதப்³ப³ம். தத்த² ‘‘ரூபியே’’தி வா ‘‘அரூபியே’’தி வா ஸப்³ப³த்த² பு⁴ம்மப்பத்தே அத்தனோ ஸந்தகம், உபயோக³ப்பத்தே பரஸந்தகந்தி வேதி³தப்³ப³ம். ஏத்தா²ஹ – உபதிஸ்ஸத்தே²ரோ புரிமஸிக்கா²பதே³ன ரூபியபடிக்³க³ஹணம் வாரிதம், இமினா ஸுத்³தா⁴க³மேன கப்பியகாரகஸ்ஸ ஹத்தே² கப்பியம் நிஸ்ஸாய டி²தேன ஸம்வோஹாரோ வாரிதோதி.

589. நிஸ்ஸக்³கி³யவத்து²னா நிஸ்ஸக்³கி³யவத்து²ம்…பே… அபராபரபரிவத்தனே இமினாதி ஏத்த² ஏகஸ்மிம் ஏவ வத்து²ஸ்மிம் த்³வின்னம் ஸிக்கா²பதா³னம் வஸேன ஏகதோ ஆபத்தி வுத்தா, தம் பன பச்சி²மஸ்ஸ வஸேன நிஸ்ஸஜ்ஜிதப்³ப³ம். ஏதேன நிஸ்ஸக்³கி³யம் ஆபன்னம்பி ஆபஜ்ஜதீதி ஏகே. பரஸ்ஸ ரூபியக்³க³ஹணம் பரிவத்தனந்தி ரூபியே அக்³க³ஹிதே தஸ்ஸ அபா⁴வதோ இமினாவ ஆபத்தி, ந புரிமேன ஓமஸவாதோ³ விய. முஸாவாதே³ன முஸா வத³ந்தஸ்ஸாபி ஹி ஓமஸவாதே³னேவ ஆபத்தி. நிஸ்ஸக்³கி³யவத்து²னா து³க்கட…பே… ஏஸேவ நயோதி ஏதஸ்ஸ யுத்திம் த³ஸ்ஸேந்தோ ‘‘யோ ஹி அய’’ந்தி ஆஹ.

வட்³டி⁴ம் பயோஜேந்தஸ்ஸாதி ஏத்த² இத³ம் க³ஹேத்வா ஸதி மாஸே, ஸதி ஸம்வச்ச²ரே ‘‘ஏத்தகம் தே³ஹீ’’தி சே வத³தி. ரூபியஸம்வோஹாரோ ஹோதி. வினா கப்பியகாரகேன ‘‘ஏத்தகா வுட்³டி⁴ ஹோது, ஏத்தகம் க³ண்ஹா’’தி வத³தோ து³க்கடம் கயவிக்கயலக்க²ணாபா⁴வதோ. ‘‘மூலே மூலஸாமிகான’’ந்திஆதி³ கப்பியகரணூபாயத³ஸ்ஸனத்த²ம் வுத்தம், ந கேவலம் நிஸ்ஸட்ட²ம் அபரிபோ⁴க³ம் ஹோதி, புன ஏவம் கதே பரிபு⁴ஞ்ஜிதும் வட்டதி. தஸ்ஸபி பரிபோ⁴கே³ மூலஸ்ஸ கப்பியகரணூபாயோ சே ந ஹோதி, கப்பியம் ஆசிக்கி²தப்³ப³ந்தி யதா² பாளியா சேத்த² கப்பியகரணூபாயோ, ஸோ ச ததியபத்தேபி, ‘‘யதா² ச அத்தனோ அத்தா²ய க³ஹிதே ஏவரூபுபாயோ, ததா² ஸங்கா⁴தி³அத்தா²ய க³ஹிதேபி ஏஸோ வா’’தி வுத்தம். இமே கிர பட²மது³தியபத்தே யாவ க³ஹட்டே²ன பரிவத்தேதி, தாவ ந கப்பியகரணூபாயோ, அனேகபுரிஸயுக³ம்பி ‘‘அகப்பியா ஏவா’’தி அட்ட²கதா²யம் வுத்தம். அனுக³ண்டி²பதே³ பன ‘‘ஸங்க⁴ஸந்தகம் கப்பியப⁴ண்ட³ம் விக்கிணித்வா ஆக³தகஹாபணானிபி படிக்³க³ஹணம் மோசேத்வாவ ஸம்படிச்சி²தப்³பா³னி, தஸ்மா கப்பியகாரகோ சே இமானி தானி கஹாபணானீதி வத³தி, ந வட்டதியேவ, படிக்கி²பிதப்³ப³ம், ந விசாரேதப்³ப³ம், விசாரேதி சே? ஸப்³பே³ஸம் ந கப்பதி. படிக்³க³ஹணம் மோசேத்வா ஸம்படிச்சி²தானி சே விசாரேதி, தஸ்ஸேவ ந வட்டதீ’’தி அபி⁴க்க²ணம் வுத்தம்.

ரூபியஸம்வோஹாரஸிக்கா²பத³வண்ணனா நிட்டி²தா.

10. கயவிக்கயஸிக்கா²பத³வண்ணனா

593. படபிலோதிகானந்தி படபிலோதிகேஹி. ‘‘அஜ்ஜா²சரதி, ஆபத்தி து³க்கடஸ்ஸா’’தி இத³ம் புரிமஸிக்கா²பதே³பி வேதி³தப்³ப³ம். ‘‘கயிதஞ்ச ஹோதி விக்கயிதஞ்சா’’தி ஏதேஸம் பதா³னம் விபரீததோ ‘‘அத்தனோ ப⁴ண்ட³’’ந்திஆதி³ வுத்தம். கஸ்மா? ‘‘இமினா இம’’ந்தி வசனானுரூபதோ. ஸத்³தா⁴தே³ய்யவினிபாதனம் பனேத்த² அட்டா²னபதா³னம் வஸேன வேதி³தப்³ப³ம்.

கயவிக்கயஸிக்கா²பத³வண்ணனா நிட்டி²தா.

நிட்டி²தோ கோஸியவக்³கோ³ து³தியோ.