9. து³தியஉபக்க²டஸிக்கா²பத³வண்ணனா

532. து³தியஉபக்க²டேன கிம்பயோஜனந்தி? நத்தி², கேவலம் அட்டு²ப்பத்திவஸேன பஞ்ஞத்தம் பி⁴க்கு²னியா ரஹோனிஸஜ்ஜஸிக்கா²பத³ம் விய. ஏவம் ஸந்தே தந்தி அனாரோபேதப்³ப³ம் ப⁴வேய்ய வினாபி தேன தத³த்த²ஸித்³தி⁴தோ, அனிஸ்ஸரத்தா, அனாரோபேதும் அனுஞ்ஞாதத்தா ச. வுத்தஞ்ஹேதம் ‘‘ஆகங்க²மானோ, ஆனந்த³, ஸங்கோ⁴…பே… ஸமூஹனேய்யா’’தி (தீ³. நி. 2.216). இத³ம் ஸப்³ப³மகாரணம். ந ஹி பு³த்³தா⁴ அப்பயோஜனம் வாசம் நிச்சா²ரேந்தி, பகே³வ ஸிக்கா²பத³ம், தேனேவாஹ அட்ட²கதா²யம் ‘‘தஞ்ஹி இமஸ்ஸ அனுபஞ்ஞத்திஸதி³ஸ’’ந்திஆதி³. அனுபஞ்ஞத்தி ச நிப்பயோஜனா நத்தி², தம்ஸதி³ஸஞ்சேதம், ந நிப்பயோஜனந்தி த³ஸ்ஸிதம் ஹோதி, ஏவம் ஸந்தே கோ பனேத்த² விஸேஸோதி? ததோ ஆஹ ‘‘பட²மஸிக்கா²பதே³ ஏகஸ்ஸ பீளா கதா, து³தியே த்³வின்னம், அயமேத்த² விஸேஸோ’’தி. இமினா அத்த²விஸேஸேன கோ பனஞ்ஞோ அதிரேகத்தோ² த³ஸ்ஸிதோதி? போராணக³ண்டி²பதே³ தாவ வுத்தம் ‘‘ஏகஸ்மிம்பி வத்து²ஸ்மிம் உபி⁴ன்னம் பீளா காதும் வட்டதீதி அயமதிரேகத்தோ² த³ஸ்ஸிதோ’’தி. தேனேதம் தீ³பேதி ‘‘ந கேவலம் படிலத்³த⁴சீவரக³ணனாயேவ ஆபத்திக³ணனா, பீளிதபுக்³க³லஸங்கா²தவத்து²க³ணனாயபீ’’தி.

ஹோந்தி சேத்த² –

‘‘வத்து²தோ க³ணனாயாபி, ஸியா ஆபத்தி நேகதா;

இதி ஸந்த³ஸ்ஸனத்த²ஞ்ச, து³தியூபக்க²டம் இத⁴.

‘‘காயஸம்ஸக்³க³ஸிக்கா²ய, விப⁴ங்கே³ விய கிந்தேதம்;

ஏகித்தி²யாபி நேகதா, ஆபத்தீனம் பயோக³தோ’’தி.

அபிசேதம் ஸிக்கா²பத³ம் தம்ஜாதிகேஸு ஸிக்கா²பதே³ஸு ஸப்³பே³ஸுபி க³ஹேதப்³ப³வினிச்ச²யஸ்ஸ நயத³ஸ்ஸனப்பயோஜனந்தி வேதி³தப்³ப³ம். ஆஹ ச –

‘‘அஞ்ஞாதிகாய ப³ஹுதாய விமிஸ்ஸதாய,

ஆபத்தியாபி ப³ஹுதா ச விமிஸ்ஸதா ச;

இச்சேவமாதி³விதி⁴ஸம்ப⁴வத³ஸ்ஸனத்த²ம்,

ஸத்தா² உபக்க²டமித³ம் து³தியம் அவோசா’’தி.

தஸ்ஸாயம் ஸங்கே²பதோ அதி⁴ப்பாயபுப்³ப³ங்க³மா விசாரணா – புராணசீவரம் ஏகமேவ பி⁴க்கு² பி⁴க்கு²னீஹி த்³வீஹி, ப³ஹூஹி வா தோ⁴வாபேதி, பி⁴க்கு²னிக³ணனாய பாசித்தியக³ணனா, ததா² த்³வின்னம், ப³ஹூனம் வா ஸாதா⁴ரணம் ஏகமேவ சீவரம் அஞ்ஞத்ர பாரிவத்தகா படிக்³க³ண்ஹாதி, இதா⁴பி ததா² த்³வின்னம், ப³ஹூனம் வா ஸாதா⁴ரணமேகம் விஞ்ஞாபேதி, விஞ்ஞத்தபுக்³க³லக³ணனாய ஆபத்திக³ணனா. ததா² அஞ்ஞேஸுபி ஏவரூபேஸு ஸிக்கா²பதே³ஸு நயோ நேதப்³போ³. அயம் தாவ ப³ஹுதாய நயோ. மிஸ்ஸதாய பன ஞாதிகாய, அஞ்ஞாதிகாய ச ஏகம் தோ⁴வாபேதி, ஏகதோ நிட்டா²பனே ஏகம் பாசித்தியம். அத² ஞாதிகா பட²மம் தோ²கம் தோ⁴வித்வா டி²தா, புன அஞ்ஞாதிகா ஸுதோ⁴தம் கரோதி, நிஸ்ஸக்³கி³யம். அத² அஞ்ஞாதிகா பட²மம் தோ⁴வதி, பச்சா² ஞாதிகா ஸுதோ⁴தம் கரோதி, அஞ்ஞாதிகாய பயோக³வஸேன பி⁴க்கு²னோ து³க்கடமேவ. அஞ்ஞாதிகாய ச ஞாதிகாய ச அஞ்ஞாதிகஸஞ்ஞீ, வேமதிகோ, ஞாதிகஸஞ்ஞீ வா தோ⁴வாபேதி, யதா²வுத்தனயேன நிஸ்ஸக்³கி³யது³க்கடாதி³ஆபத்திபே⁴த³க³ணனா வேதி³தப்³பா³. ததா² அஞ்ஞாதிகாய ச ஞாதிகாய ச ஸந்தகம் சீவரம் உபோ⁴ஹி ஏகதோ தி³ய்யமானம் படிக்³க³ண்ஹந்தஸ்ஸ, அஞ்ஞாதிகாய ஏவ ஹத்த²தோ படிக்³க³ண்ஹந்தஸ்ஸ ச நிஸ்ஸக்³கி³யமேவ. அத² ஞாதிகாய அனாபத்தி. அத² உபோ⁴ஸு அஞ்ஞாதிகாதி³ஸஞ்ஞீ வுத்தனயேனேவ நிஸ்ஸக்³கி³யது³க்கடாதி³ஆபத்திபே⁴த³க³ணனா வேதி³தப்³பா³. ததா² அஞ்ஞாதகவிஞ்ஞத்திஸிக்கா²பதே³ஸுபி யதா²ஸம்ப⁴வம் நயோ நேதப்³போ³. அயம் மிஸ்ஸதாய நயோ. ஆதி³-ஸத்³தே³ன பன அனேகே அஞ்ஞாதிகா விஞ்ஞத்தாவிஞ்ஞத்தபுக்³க³லக³ணனாய து³க்கடம். ஏகோ தே³தி, ஏகோ ந தே³தி, நிஸ்ஸக்³கி³யம். அத² அவிஞ்ஞத்தோ தே³தி, ந நிஸ்ஸக்³கி³யம். அத² விஞ்ஞத்தாவிஞ்ஞத்தானம் ஸாதா⁴ரணம் விஞ்ஞத்தோ தே³தி, நிஸ்ஸக்³கி³யமேவ. உபோ⁴ தே³ந்தி, நிஸ்ஸக்³கி³யமேவ. அவிஞ்ஞத்தோ தே³தி, நிஸ்ஸக்³கி³யேன அனாபத்தி. விஞ்ஞத்தஸ்ஸ வசனேன அவிஞ்ஞத்தோ தே³தி, அனாபத்தி ஏவ. ததா² உபக்க²டாதீ³ஸுபி யதா²ஸம்ப⁴வம் நயோ நேதப்³போ³.

து³தியஉபக்க²டஸிக்கா²பத³வண்ணனா நிட்டி²தா.