4. மேத்தாஸஹக³தஸுத்தவண்ணனா

235. கீதி³ஸா க³தி நிப்³ப³த்தி ஏதிஸ்ஸாதி கிம்க³திகா, கிம்னிட்டா²தி வுத்தம் ஹோதி. கீதி³ஸீ பரமா உத்தமா கோடி ஏதிஸ்ஸாதி கிம்பரமா. கீதி³ஸம் ப²லம் ஆனிஸம்ஸம் உத³யோ ஏதிஸ்ஸாதி கிம்ப²லா. ஸம்ஸட்ட²ம் ஸம்பயுத்தந்தி இத³ம் ஸஹக³த-ஸத்³த³ஸ்ஸ அத்த²த³ஸ்ஸனமத்தம், இத⁴ பன மேத்தாஜா²னம் பாத³கம் கத்வா விபஸ்ஸனாபுப்³ப³பா⁴க³போ³ஜ்ஜ²ங்கா³ ச ‘‘மேத்தாஸஹக³தம் ஸதிஸம்போ³ஜ்ஜ²ங்க³’’ந்திஆதி³னா வுத்தாதி வேதி³தப்³ப³ம். ஸப்³ப³த்தா²தி ஸப்³பே³ஸு போ³ஜ்ஜ²ங்கே³ஸு ஸப்³பே³ஸு ச ப்³ரஹ்மவிஹாரேஸு.

படிகூலேதி விரஜ்ஜதீதி படிகூலம், அனிட்ட²ம். ந படிகூலம் அப்படிகூலம், இட்ட²ம். தேனாஹ ‘‘இட்டே² வத்து²ஸ்மி’’ந்தி. ஏத்தா²தி அப்படிகூலவத்து²ஸ்மிம். ஏவந்தி படிகூலஸஞ்ஞீ. ஸத்தே அப்படிகூலே அஸுப⁴ப²ரணம், ஸங்கா²ரே அப்படிகூலே அனிச்சந்தி மனஸிகாரம் கரோந்தோ. அஸுபா⁴யாதி அஸுப⁴ஸஞ்ஞாய. அனிச்சதோ வா உபஸம்ஹரதீதி அனிச்சந்தி மனஸிகாரம் பவத்தேதி. ‘‘ஏஸேவ நயோ’’தி ஸங்கே²பதோ வுத்தமத்த²ம் விவரிதும் ‘‘அப்படிகூலபடிகூலேஸூ’’திஆதி³ வுத்தம். ச²ளங்கு³பேக்க²ந்தி ச²ஸு ஆரம்மணேஸு பஹீனானுரோத⁴ஸ்ஸ உப்பத்தியா ச²ளங்க³வந்தம் உபேக்க²ம்.

மேத்தாயாதி மேத்தாபா⁴வனாய. படிகூலாதீ³ஸு வத்தூ²ஸு இச்சி²தவிஹாரேன விஹரிதும் ஸமத்த²தா அரியானம் ஏவ, தத்த² ச அரஹதோ ஏவ இஜ்ஜ²னதோ அரியித்³தி⁴ நாம. தஸ்ஸா அரியித்³தி⁴யா ச த³ஸ்ஸிதத்தா தே³ஸனா வினிவட்டேதப்³பா³ பரியோஸானேதப்³பா³ ஸியா. அரஹத்தம் பாபுணிதும் ந ஸக்கோதி இந்த்³ரியானம் அபரிபக்கத்தா நிகந்தியா ச து³ப்பரியாதா³னதோ. அயம் தே³ஸனாதி ‘‘மேத்தாஸஹக³தம் போ³ஜ்ஜ²ங்க³ம் பா⁴வேதீ’’திஆதி³னா அயம் தே³ஸனா ஆரத்³தா⁴. யோ ஹி மேத்தாஜா²னம் பாத³கம் கத்வா ஸம்மஸனம் ஆரபி⁴த்வா அரஹத்தம் பாபுணிதும் அஸக்கோந்தோ பரிஸுத்³தே⁴ஸு வண்ணகஸிணேஸு விமோக்க²ஸங்கா²தம் ரூபாவசரஜ்ஜா²னம் நிப்³ப³த்தேதி, தம் ஸந்தா⁴யாஹ ப⁴க³வா – ‘‘ஸுப⁴ம் கோ² பன விமோக்க²ம் உபஸம்பஜ்ஜ விஹரதீ’’தி.

ஸுப⁴பரமந்தி ஸுப⁴விமோக்க²பரமம். இத⁴ லோகே ஏவ பஞ்ஞா அஸ்ஸ. தேனாஹ ‘‘லோகியபஞ்ஞஸ்ஸாதி அத்தோ²’’தி. அரஹத்தபரமாவ மேத்தா அரஹத்தமக்³க³ஸ்ஸ பாத³கத்தா. கருணாதீ³ஸுபி ஏஸேவ நயோதி கருணாதி³ஜா²னம் பாத³கம் கத்வா ஸங்கா²ரே ஸம்மஸந்தோ அரஹத்தம் பத்தும் ஸக்கோதி, தஸ்ஸ அரஹத்த²பரமா கருணா ஹோதி, ஏவம் முதி³தாஉபேக்கா²ஸுபி வத்தப்³ப³ந்தி இமமத்த²ம் அதிதி³ஸதி. புன தே³ஸனாரம்ப⁴பயோஜனம் பன ‘‘இமினா நயேனா’’தி ஹேட்டா² அதிதி³ட்ட²மேவ.

ஸுப⁴பரமாதி³தாதி மேத்தாகருணாமுதி³தாஉபேக்கா²னம் ஸுப⁴பரமதா ஆகாஸானஞ்சாயதனபரமதா, விஞ்ஞாணஞ்சாயதனபரமதா, ஆகிஞ்சஞ்ஞாயதனபரமதா. தஸ்ஸ தஸ்ஸாதி ஸுப⁴விமோக்க²ஸ்ஸ ஹேட்டா² திண்ணம் அரூபஜ்ஜா²னானஞ்ச யதா²க்கமம் உபனிஸ்ஸயத்தா. அப்படிகூலபரிசயாதி இட்டா²ரம்மணே மனஸிகாரப³ஹுலீகாரா. அப்பகஸிரேனேவாதி ஸுகே²னேவ. தத்தா²தி விஸுத்³த⁴தாய இட்டே²ஸு வண்ணகஸிணேஸு. சித்தந்தி பா⁴வனாமயசித்தம் பக்க²ந்த³தி அப்பனாவஸேன. ததோ பரந்தி ததோ ஸுப⁴விமோக்க²தோ பரம் விமோக்கா²னம் உபனிஸ்ஸயோ நாம ந ஹோதி, மேத்தாஸஹக³தபா⁴வோ த³ட்ட²ப்³போ³.

ஸத்தது³க்க²ம் ஸமனுபஸ்ஸந்தஸ்ஸாதி த³ண்டே³ன அபி⁴ஹடப்பத்தரூபஹேதும் ஸத்தேஸு உப்பஜ்ஜனகது³க்க²ம் ஞாணேன வீமம்ஸந்தஸ்ஸ. தயித³ம் ரூபனிமித்தகம் ஸத்தேஸு உப்பஜ்ஜனகம் து³க்க²ம் ஞாணேன கருணாவிஹாரிஸ்ஸ விஸேஸதோ பக்க²ந்த³தீதி கத்வா வுத்தம் ‘‘அப்பகஸிரேனேவ தத்த² சித்தம் பக்க²ந்த³தீ’’தி, ந பன ஸப்³ப³ஸோ அரூபே ஆனிஸம்ஸத³ஸ்ஸனதோ.

விஞ்ஞாணம் ஸமனுபஸ்ஸந்தஸ்ஸாதி இத³ம் பாமோஜ்ஜக³ஹணமுகே²ன தன்னிஸ்ஸயவிஞ்ஞாணஸ்ஸ க³ஹணம் ஸம்ப⁴வதீதி கத்வா வுத்தம். விஞ்ஞாணக்³க³ஹணபரிசிதந்தி வுத்தனயேன விஞ்ஞாணக்³க³ஹணே பரிசிதம்.

உபேக்கா²விஹாரிஸ்ஸாதி உபேக்கா²ப்³ரஹ்மவிஹாரம் விஹரதோ. ஆபோ⁴கா³பா⁴வதோதி ஸுகா²தி³வஸேன ஆபு⁴ஜனாபா⁴வதோ. ஸுக²…பே… ஸம்ப⁴வதோதி ஸுக²து³க்கா²தி பரமத்த²கம்மக்³க³ஹணே விமுக²தாஸம்ப⁴வதோ. அவிஜ்ஜமானக்³க³ஹணது³க்க²ந்தி பரமத்த²தோ அவிஜ்ஜமானஸத்தபஞ்ஞத்திக³ஹணபரிசிதம் தஸ்ஸ தஸ்ஸ அபா⁴வமத்தகஸ்ஸ க³ஹணம்பி து³க்க²ம் குஸலம்பி ஹோதி. ஸேஸம் ஸுவிஞ்ஞேய்யமேவ.

மேத்தாஸஹக³தஸுத்தவண்ணனா நிட்டி²தா.