5. சக்கவத்திவக்³கோ³

1. விதா⁴ஸுத்தவண்ணனா

222. விதீ⁴யந்தீதி விதா⁴, மானாதி³பா⁴கா³ கோட்டா²ஸாதி ஆஹ ‘‘தயோ மானகோட்டா²ஸா’’தி. ததா² ததா² வித³ஹனதோதி ‘‘ஸேய்யோஹமஸ்மீ’’திஆதி³னா தேன தேனாகாரேன வித³ஹனதோ ட²பனதோ, ட²பேதப்³ப³தோ வா.

2. சக்கவத்திஸுத்தவண்ணனா

223. ஸிரிஸம்பத்தியா ராஜதி தி³ப்பதி ஸோப⁴தீதி ராஜா, தா³னபியவசனஅத்த²சரியாஸமானத்ததாஸங்கா²தேஹி சதூஹி ஸங்க³ஹவத்தூ²ஹி. ரஞ்ஜேதீதி ரமேதி. அப்³பு⁴க்³க³தாயாதி உதீ³ரிதா நிப்³ப³த்திதோ தத்த² தத்த² க³ச்ச²னதோ. சக்கம் வத்தேதீதி சக்கரதனம் பவத்தேதி. தே³வட்டா²னந்தி பூஜனீயதே³வட்டா²னம். சித்தீகதட்டே²னாதி பூஜனீயபா⁴வேன. அக்³கோ⁴ நத்தி² சிரகாலஸம்ப⁴வபுஞ்ஞானுபா⁴வஸித்³த⁴ரதனஸப்³பா⁴வதோ. அஞ்ஞேஹி சக்கவத்தினோ பரிக்³க³ஹபூ⁴தரதனேஹி. லோகேதி மனுஸ்ஸலோகே. தேன தத³ஞ்ஞலோகம் நிவத்தேதி. விஜ்ஜமானக்³க³ஹணேன அதீதானாக³தம் நிவத்தேதி. பு³த்³தா⁴ ச கதா³சி கரஹசி உப்பஜ்ஜந்தி சக்கவத்தினோபி யேபு⁴ய்யேன தஸ்மிம்யேவ உப்பஜ்ஜனதோதி அதி⁴ப்பாயோ. அனோமஸ்ஸாதி அலாமகஸ்ஸ உக்கட்ட²ஸ்ஸ. ஸேஸானி ரதனானி.

தத்ராதி வாக்யோபஞ்ஞாஸனே நிபாதோ, தஸ்மிம் பாதுபா⁴வவசனே. ‘‘அயுத்த’’ந்தி வத்வா தத்த² அதி⁴ப்பாயம் விவரந்தோ ‘‘உப்பன்னம் ஹீ’’திஆதி³மாஹ. தேஹி ரதனேஹி சக்கவத்தனனியமாபேக்க²தாய சக்கவத்திவசனஸ்ஸ. நியமேனாதி ஏகந்தேன. வத்தப்³ப³தம் ஆபஜ்ஜதி பா⁴வினி பூ⁴தே விய உபசாரோதி யதா² – ‘‘அக³மா ராஜக³ஹம் பு³த்³தோ⁴’’தி (ஸு. நி. 410). லத்³த⁴னாமஸ்ஸாதி சக்கவத்தீதி லோகே லத்³த⁴ஸமஞ்ஞஸ்ஸ பத்த²னீயஸ்ஸ புரிஸவிஸேஸஸ்ஸ. மூலுப்பத்திவசனதோபீதி ‘‘சக்கவத்திஸ்ஸ பாதுபா⁴வா’’தி ஏதஸ்ஸ பட²முப்பத்தியா வசனதோபி. இதா³னி தமத்த²ம் விவரந்தோ ‘‘யோ ஹீ’’திஆதி³மாஹ. யோ ஹி சக்கவத்திராஜா, தஸ்ஸ உப்பத்தியா சக்கரதனஸ்ஸ உப்பஜ்ஜனதோ சக்கவத்தீதி ஏவம் நாமம் உப்பஜ்ஜதி. ‘‘சக்கம் வத்தேஸ்ஸதீ’’தி இத³ம் பன நியாமம் அனபேக்கி²த்வா தஸ்ஸ உப்பஜ்ஜதீதி ரதனானுப்பத்திம் க³ஹேத்வா வுத்தனயதோ ஸஞ்ஞா உப்பஜ்ஜதி ‘‘சக்கவத்தீ’’தி. ஏகமேவாதி சக்கரதனமேவ பட²மம் பாதுப⁴வதி. யஸ்மிம் பூ⁴தே ரஞ்ஞோ சக்கவத்திஸமஞ்ஞா, அத² பச்சா² ரதனானி பாதுப⁴வந்தீதி ப³ஹூனம் பாதுபா⁴வம் உபாதா³ய ப³ஹுலவசனதோபி ஏதம் ‘‘சக்கவத்திஸ்ஸ பாதுபா⁴வா ரதனானம் பாதுபா⁴வோ’’தி வுத்தம். அயம் ஹேதுகத்துஸஞ்ஞிதோ அத்த²பே⁴தோ³. பாதுபா⁴வாதி பாதுபா⁴வதோ. புஞ்ஞஸம்பா⁴ரோ பி⁴ன்னஸந்தானதாய ரதனானம்பி பரியாயேன உபனிஸ்ஸயஹேதூதி வுத்தம். யுத்தமேவேதம் யதா²வுத்தயுத்தியுத்தத்தா.

வத்தப்³ப³பூ⁴தோ அதி⁴ப்பாயோ ஏதஸ்ஸ அத்தீ²தி அதி⁴ப்பாயோ, அத்த²னித்³தே³ஸோ, ஸங்கே²பதோ அதி⁴ப்பாயோ ஸங்கே²பாதி⁴ப்பாயோ. சக்கரதனானுபா⁴வேன சக்கவத்திஸ்ஸரியஸ்ஸ ஸிஜ்ஜ²னதோ ‘‘தா³தும் ஸமத்த²ஸ்ஸா’’தி வுத்தம். யோஜனப்பமாணே பதே³ஸே பவத்தத்தா யோஜனப்பமாணம் அந்த⁴காரம். அதிதீ³கா⁴திரஸ்ஸதாதி³ம் ச²ப்³பி³த⁴ம் தோ³ஸம் விவஜ்ஜேத்வா டி²தஸ்ஸாதி வசனஸேஸோ.

ஸப்³பே³ஸம் சதுபூ⁴மகத⁴ம்மானம் புரேசரம் குஸலானம் த⁴ம்மானம் க³தியோ ஸமன்வேஸனவஸேன பவத்தனதோ. பு³த்³தா⁴தீ³ஹிபி அப்பஹானீயதாய மஹந்தத⁴ம்மஸபா⁴வத்தா த⁴ம்மகாயே ச ஜேட்ட²கட்டே²ன த⁴ம்மகாயூபபன்னம். பஞ்ஞாபாஸாத³தாய சஸ்ஸ உபரிக³தட்டே²ன அச்சுக்³க³தம். வித்த²தட்டே²ன விபுலம். மஹந்ததாய மஹந்தம். அனாதி³காலபா⁴விதஸ்ஸ கிலேஸஸந்தானஸ்ஸ க²ணேனேவ வித்³த⁴ம்ஸனதோ ஸீக⁴ம் லஹு ஜவந்தி பரியாயா. போ³ஜ்ஜ²ங்க³த⁴ம்மபரியாபன்னத்தா ஹி வுத்தம் ‘‘ஏகந்த-குஸலத்தா’’தி. ஸம்பயுத்தவஸேன பீதியா ஆலோகவித்³த⁴ம்ஸனபா⁴வவஸேனாதி வுத்தம் ‘‘ஸஹஜாதபச்சயாதீ³’’திஆதி³. ஸப்³ப³ஸங்கா³ஹிகத⁴ம்மபரிச்சே²தோ³தி சதுபூ⁴மகத்தா ஸப்³ப³ஸங்கா³ஹகோ போ³ஜ்ஜ²ங்க³த⁴ம்மபரிச்சே²தோ³ கதி²தோ.

4-10. து³ப்பஞ்ஞஸுத்தாதி³வண்ணனா

225-231. ஏளம் வுச்சதி தோ³ஸோ, ஏளேன மூகோ³ வியாதி ஏளமூகோ³தி இமமத்த²ம் த³ஸ்ஸேந்தோ ‘‘முகே²ன வாச’’ந்திஆதி³மாஹ.

சக்கவத்திவக்³க³வண்ணனா நிட்டி²தா.