4. நீவரணவக்³கோ³

3-4. உபக்கிலேஸஸுத்தாதி³வண்ணனா

214-215. ந ச பபா⁴வந்தந்தி ந ச பபா⁴ஸம்பன்னம். பபி⁴ஜ்ஜனஸபா⁴வந்தி தாபேத்வா தாலனே பப⁴ங்கு³தம். அவஸேஸம் லோஹந்தி வுத்தாவஸேஸம் ஜாதிலோஹம், விஜாதிலோஹம், கித்திமலோஹந்தி பபே⁴த³ம் ஸப்³ப³ம்பி லோஹம். உப்பஜ்ஜிதும் அப்பதா³னேனாதி ஏத்த² நனு லோகியகுஸலசித்தஸ்ஸபி ஸுவிஸுத்³த⁴ஸ்ஸ உப்பஜ்ஜிதும் அப்பதா³னேன உபக்கிலேஸதாதி? ஸச்சமேதம், யஸ்மிம் பன ஸந்தானே நீவரணானி லத்³த⁴பதிட்டா²னி, தத்த² மஹக்³க³தகுஸலஸ்ஸபி அஸம்ப⁴வோ, பகே³வ லோகுத்தரகுஸலஸ்ஸ, பரித்தகுஸலம் பன யதா²பச்சயம் உப்பஜ்ஜதி. நீவரணே ஹி வூபஸந்தே ஸந்தானே உப்பத்தியா அபரிஸுத்³த⁴ம் ஹோதி, உபக்கிலிட்ட²ம் நாம ஹோதி, அபரிஸுத்³த⁴தீ³பகபல்லிகவட்டி²தேலாதி³ஸன்னிஸ்ஸயோ தீ³போ விய, அபிச நிப்பரியாயதோ உப்பஜ்ஜிதும் அப்பதா³னேனேவ தேஸம் உபக்கிலேஸதாதி த³ஸ்ஸேந்தோ ‘‘யத³க்³கே³ன ஹீ’’திஆதி³மாஹ. ஆரம்மணே விக்கி²த்தப்பத்திவஸேன சுண்ணவிசுண்ணதா வேதி³தப்³பா³. ந ஆவரந்தீதி குஸலத⁴ம்மே உப்பஜ்ஜிதும் அப்பதா³னவஸேன ந ஆவரந்தி, அத² கோ² தேஸம் உப்பத்தியா ஹோந்தி. ந படிச்சா²தே³ந்தீதி ந வினந்த⁴ந்தி. சதுபூ⁴மகசித்தஸ்ஸாதி சதுத்த²பூ⁴மககுஸலசித்தஸ்ஸ அனுபக்கிலேஸா, தேஹி அகிலிஸ்ஸனதோ.

8. ஆவரணனீவரணஸுத்தவண்ணனா

219. பஞ்ஞா து³ப்³ப³லா ஹோதி, ந ப³லவதீ படிபக்கே²ன உபக்கிலிட்ட²பா⁴வதோ. தேனாஹ ‘‘மந்தா³ அவிஸதா³’’தி.

பஞ்ச நீவரணா தூ³ரே ஹோந்தி ஆவரணாபா⁴வதோ. தமேவ பீதிந்தி ஸப்பாயத⁴ம்மஸவனே உப்பன்னம் பீதிம். தஸ்ஸா ததா³ உப்பன்னாகாரஸல்லக்க²ணேன அவிஜஹந்தோ புனப்புனம் தஸ்ஸா நிப்³ப³த்தனேன. தேனாஹ ‘‘பஞ்ச நீவரணே விக்க²ம்பே⁴த்வா’’தி. இத³ம் ஸந்தா⁴யாதி ஏத்தகே தி³வஸேபி ந வினஸ்ஸந்தி, ஸா த⁴ம்மபீதி லத்³த⁴பச்சயா ஹுத்வா விஸேஸாவஹாதி இமமத்த²ம் ஸந்தா⁴ய ஏதம் ‘‘இமஸ்ஸ பஞ்ச நீவரணா தஸ்மிம் ஸமயே ந ஹோந்தீ’’திஆதி³ வுத்தம். பீதிபாமோஜ்ஜபக்கி²யாதி பீதிபாமோஜ்ஜபச்சயா. நஸ்ஸந்தீதி நிரோத⁴பச்சயவஸேன பவத்தனதோ நஸ்ஸந்தி. ஸபா⁴க³பச்சயவஸேன புன உப்பஜ்ஜந்தாபி…பே… வுச்சதி கிச்சஸாத⁴னவஸேன பவத்தனதோ.

9. ருக்க²ஸுத்தவண்ணனா

220. அபி⁴ருஹனகாதி ஸமீபருக்கே² அபி⁴ப⁴வித்வா ருஹனகா. அட்டி²கச்ச²கோதி அட்டி²ப³ஹுலகச்ச²கோ. கபித²னஸதி³ஸப²லத்தா கபித்த²னோதி லத்³த⁴னாமோ.

10. நீவரணஸுத்தவண்ணனா

221. அந்த⁴பா⁴வகரணா பஞ்ஞாசக்கு²ஸ்ஸ விப³ந்த⁴னதோ. ததா² ஹி தே ‘‘அசக்கு²கரணா பஞ்ஞானிரோதி⁴கா’’தி வுத்தா. விஹனதி விபா³த⁴தீதி விகா⁴தோ, து³க்க²ந்தி ஆஹ ‘‘விகா⁴தபக்கி²யாதி து³க்க²பக்கி²கா’’தி. நிப்³பா³னத்தா²ய ந ஸம்வத்தந்தீதி அனிப்³பா³னஸம்வத்தனிகா. மிஸ்ஸகபோ³ஜ்ஜ²ங்கா³வ கதி²தா புப்³ப³பா⁴கி³கானம் கதி²தத்தா.

நீவரணவக்³க³வண்ணனா நிட்டி²தா.