3. ஸீலஸுத்தவண்ணனா

184. கீ²ணாஸவஸ்ஸ லோகுத்தரம் ஸீலம் நாம மக்³க³ப²லபரியாபன்னா ஸம்மாவாசாகம்மந்தாஜீவா ஸீலலக்க²ணப்பத்தா தத³ஞ்ஞே சேதனாத³யோ. லோகியம் பன கிரியாப்³யாகதசித்தபரியாபன்னம் சாரித்தஸீலம், வாரித்தஸீலஸ்ஸ பன ஸம்ப⁴வோ ஏவ நத்தி² விரமணவஸேன பவத்தியா அபா⁴வதோ. ‘‘புப்³ப³பா⁴க³ஸீலம் லோகியஸீல’’ந்தி கேசி.

சக்கு²த³ஸ்ஸனந்தி சக்கூ²ஹி த³ஸ்ஸனம். லக்க²ணஸ்ஸ த³ஸ்ஸனந்தி ஸபா⁴வத⁴ம்மானம் ஸங்க²தானம் பச்சத்தலக்க²ணஸ்ஸ ஞாதபரிஞ்ஞாய, அனிச்சாதி³ஸாமஞ்ஞலக்க²ணஸ்ஸ தீரணபரிஞ்ஞாய த³ஸ்ஸனம். பஜஹந்தோபி ஹி தே பஹாதப்³பா³காரதோ பஸ்ஸதி நாம. நிப்³பா³னஸ்ஸ தத²லக்க²ணம் மக்³க³ப²லேஹி த³ஸ்ஸனம், தம் பன படிவிஜ்ஜ²னம். ஜா²னேன பத²வீகஸிணாதீ³னம், அபி⁴ஞ்ஞாஹி ரூபானம் த³ஸ்ஸனம்பி ஞாணத³ஸ்ஸனமேவ. சக்கு²த³ஸ்ஸனம் அதி⁴ப்பேதம் ஸவனபயிருபாஸனானம் பரதோ க³ஹிதத்தா. பஞ்ஹபயிருபாஸனந்தி பஞ்ஹபுச்ச²னவஸேன பயிருபாஸனம் அஞ்ஞகம்மத்தா²ய உபஸங்கமனஸ்ஸ கேவலம் உபஸங்கமனேனேவ ஜோதிதத்தா.

அரியானம் அனுஸ்ஸதி நாம கு³ணவஸேன, தத்தா²பி லத்³த⁴ஓவாதா³வஜ்ஜனமுகே²ன யதா²பூ⁴தஸீலாதி³கு³ணானுஸ்ஸரணந்தி த³ஸ்ஸேதும் ‘‘ஜா²னவிபஸ்ஸனா’’திஆதி³ வுத்தம். அஞ்ஞேஸம்யேவ ஸந்திகேதி அரியேஹி அஞ்ஞேஸம் ஸாஸனிகானம்யேவ ஸந்திகே. தேனாஹ – ‘‘அனுபப்³ப³ஜ்ஜா நாமா’’தி. அஞ்ஞேஸூதி ஸாஸனிகேஹி அஞ்ஞேஸு தாபஸபரிப்³பா³ஜகாதீ³ஸு. தத்த² ஹி பப்³ப³ஜ்ஜா அரியானம் அனுபப்³ப³ஜ்ஜா நாம ந ஹோதீதி வுத்தம்.

ஸதஸஹஸ்ஸமத்தா அஹேஸும் ஸமந்தபாஸாதி³கத்தா மஹாதே²ரஸ்ஸ. லங்காதீ³பேதி நிஸ்ஸயஸீஸேன நிஸ்ஸிதஸல்லக்க²ணம். ந ஹி பப்³ப³ஜ்ஜா தீ³பபடிலத்³தா⁴, அத² கோ² தீ³பனிவாஸிஆசரியபடிலத்³தா⁴. மஹிந்த³…பே… பப்³ப³ஜந்தி நாம தஸ்ஸ பரிவாரதாய பப்³ப³ஜ்ஜாயாதி.

ஸரதீதி தம் ஓவாதா³னுஸாஸனித⁴ம்மம் சிந்தேதி சித்தே கரோதி. விதக்காஹதம் கரோதீதி புனப்புனம் பரிவிதக்கனேன தத³த்த²ம் விதக்கனிப்பா²தி³தம் கரோதி. ஆரத்³தோ⁴ ஹோதீதி ஸம்பாதி³தோ ஹோதி. தம் பன ஸம்பாத³னம் பாரிபூரி ஏவாதி ஆஹ ‘‘பரிபுண்ணோ ஹோதீ’’தி. தத்தா²தி யதா²வுத்தே த⁴ம்மே. ஞாணசாரவஸேனாதி ஞாணஸ்ஸ பவத்தனவஸேன. தேஸம் தேஸம் த⁴ம்மானந்தி தஸ்மிம் தஸ்மிம் ஓவாத³த⁴ம்மே ஆக³தானம் ரூபாரூபத⁴ம்மானம். லக்க²ணந்தி விஸேஸலக்க²ணம் ஸாமஞ்ஞலக்க²ணஞ்ச. பவிசினதீதி ‘‘இத³ம் ரூபம் ஏத்தகம் ரூப’’ந்திஆதி³னா விசயம் ஆபஜ்ஜதி. ஞாணஞ்ச ரோபேதீதி ‘‘அனிச்சம் சலம் பலோகம் பப⁴ங்கூ³’’திஆதி³னா ஞாணம் பவத்தேதி. வீமம்ஸனம்…பே… ஆபஜ்ஜதீதி ரூபஸத்தகாரூபஸத்தகக்கமேன விபஸ்ஸனம் பச்சக்க²தோ விய அனிச்சதாதீ³னம் த³ஸ்ஸனம் ஸம்மஸனம் ஆபஜ்ஜதி.

உப⁴யம்பேதந்தி ப²லானிஸம்ஸாதி வுத்தத்³வயம். அத்த²தோ ஏகம் பரியாயஸத்³த³த்தா. படிகச்சாதி பகே³வ. மரணகாலேதி மரணகாலஸமீபே. ஸமீபத்தே² ஹி இத³ம் பு⁴ம்மந்தி ஆஹ ‘‘மரணஸ்ஸ ஆஸன்னகாலே’’தி.

ஸோ திவிதோ⁴ ஹோதி ஞாணஸ்ஸ திக்க²மஜ்ஜ²முது³பா⁴வேன. தேனாஹ ‘‘கப்பஸஹஸ்ஸாயுகேஸூ’’திஆதி³. உபஹச்சபரினிப்³பா³யீ நாம ஆயுவேமஜ்ஜ²ம் அதிக்கமித்வா பரினிப்³பா³யனதோ. யத்த² கத்த²சீதி அவிஹாதீ³ஸு யத்த² கத்த²சி. ஸப்பயோகே³னாதி விபஸ்ஸனாஞாணஸங்கா²ரஸங்கா²தேன பயோகே³ன, ஸஹ விபஸ்ஸனாபயோகே³னாதி அத்தோ². ஸுத்³தா⁴வாஸபூ⁴மியம் உத்³த⁴ம்யேவ மக்³க³ஸோதோ ஏதஸ்ஸாதி உத்³த⁴ம்ஸோதோ. படிஸந்தி⁴வஸேன அகனிட்ட²ப⁴வம் க³ச்ச²தீதி அகனிட்ட²கா³மீ.

அவிஹாதீ³ஸு வத்தமானோபி ஏகம்ஸதோ உத்³த⁴ம்க³மனாரஹோ புக்³க³லோ அகனிட்ட²கா³மீ ஏவ நாமாதி வுத்தம் ‘‘ஏகோ உத்³த⁴ம்ஸோதோ அகனிட்ட²கா³மீதி பஞ்ச ஹோந்தீ’’தி. தேஸந்தி நித்³தா⁴ரணே ஸாமிவசனம். உத்³த⁴ம்ஸோதபா⁴வதோ யதி³பி ஹேட்டி²மாதீ³ஸுபி அரியபூ⁴மி நிப்³ப³த்ததேவ, ததா²பி தத்த² பூ⁴மீஸு ஆயும் அக்³க³ஹேத்வா அகனிட்ட²ப⁴வே ஆயுவஸேனேவ ஸோளஸகப்பஸஹஸ்ஸாயுகதா த³ட்ட²ப்³பா³. ‘‘ஸத்த ப²லா ஸத்தானிஸம்ஸா பாடிகங்கா²’’தி வுத்தத்தா ‘‘அரஹத்தமக்³க³ஸ்ஸ புப்³ப³பா⁴க³விபஸ்ஸனா போ³ஜ்ஜ²ங்கா³ கதி²தா’’தி வுத்தம். ஸத்தன்னம்பி ஸஹபா⁴வோ லப்³ப⁴தீதி ‘‘அபுப்³ப³ம் அசரிமம் ஏகசித்தக்க²ணிகா’’தி வுத்தம். தயித³ம் பாளியம் தத்த² தத்த² ‘‘தஸ்மிம் ஸமயே’’தி ஆக³தவசனேன விஞ்ஞாயதி, போ³ஜ்ஜ²ங்கா³னம் பன நானாஸபா⁴வத்தா ‘‘நானாலக்க²ணா’’தி வுத்தம்.

ஸீலஸுத்தவண்ணனா நிட்டி²தா.