4. வத்த²ஸுத்தவண்ணனா

185. ‘‘ஸதிஸம்போ³ஜ்ஜ²ங்கோ³’’தி ஏவம் சே மய்ஹம் ஹோதீதி ஸதிஸம்போ³ஜ்ஜ²ங்கோ³ நாம ஸேட்டோ² உத்தமோ பவரோ, தஸ்மாஹம் ஸதிஸம்போ³ஜ்ஜ²ங்க³ஸீஸேன ப²லஸமாபத்திம் அப்பேத்வா விஹரிஸ்ஸாமீதி ஏவம் சே மய்ஹம் புப்³ப³பா⁴கே³ ஹோதீதி அத்தோ². ‘‘அப்பமாணோ’’தி ஏவம் மய்ஹம் ஹோதீதி ஸ்வாயம் ஸதிஸம்போ³ஜ்ஜ²ங்கோ³, ஸப்³ப³ஸோ பமாணகரகிலேஸாபா⁴வதோ அப்பமாணத⁴ம்மாரம்மணதோ ச அப்பமாணோதி ஏவம் மய்ஹம் அந்தோஸமாபத்தியம் அஸம்மோஹவஸேன ஹோதி. ஸுபரிபுண்ணோதி பா⁴வனாபாரிபூரியா ஸுட்டு² பரிபுண்ணோதி ஏவம் மய்ஹம் அந்தோஸமாபத்தியம் அஸம்மோஹவஸேன ஹோதீதி. திட்ட²தீதி யதா²காலபரிச்சே²த³ஸமாபத்தியா அவட்டா²னேன தப்பரியாபன்னதாய ஸதிஸம்போ³ஜ்ஜ²ங்கோ³ திட்ட²தி படிப³ந்த⁴வஸேன. உப்பாத³ம் அனாவஜ்ஜிதத்தாதி உப்பாத³ஸ்ஸ அனாவஜ்ஜனேன அஸமன்னாஹாரேன. உப்பாத³ஸீஸேன சேத்த² உப்பாத³வந்தோவ ஸங்கா²ரா க³ஹிதா. அனுப்பாத³ந்தி நிப்³பா³னம் உப்பாதா³பா⁴வதோ உப்பாத³வந்தேஹி ச வினிஸ்ஸடத்தா. பவத்தந்தி விபாகப்பவத்தம். அப்பவத்தந்தி நிப்³பா³னம் தப்படிக்கே²பதோ. நிமித்தந்தி ஸப்³ப³ஸங்கா²ரனிமித்தம். அனிமித்தந்தி நிப்³பா³னம். ஸங்கா²ரேதி உப்பாதா³தி³அனாமஸனேன கேவலமேவ ஸங்கா²ரக³ஹணம். விஸங்கா²ரந்தி நிப்³பா³னம். ஆவஜ்ஜிதத்தா ஆவஜ்ஜிதகாலதோ பட்டா²ய ஆரப்³ப⁴ பவத்தியா ஸதிஸம்போ³ஜ்ஜ²ங்கோ³ திட்ட²தி. அட்ட²ஹாகாரேஹீதி அட்ட²ஹி காரணேஹி. ஜானாதீதி ஸமாபத்திதோ வுட்டி²தகாலே பஜானாதி. அட்ட²ஹாகாரேஹீதி உப்பாதா³வஜ்ஜனாதீ³ஹி சேவ அனுப்பாதா³வஜ்ஜனாதீ³ஹி ச வுத்தாகாரவிபரீதேஹி அட்ட²ஹி ஆகாரேஹி சவந்தம் ஸமாபத்திவஸேன அனவட்டா²னதோபி க³ச்ச²ந்தம் சவதீதி தே²ரோ பஜானாதீதி.

ப²லபோ³ஜ்ஜ²ங்கா³தி ப²லஸமாபத்திபரியாபன்னா போ³ஜ்ஜ²ங்கா³. கிம் பன தே விஸும் விஸும் பவத்தந்தீதி ஆஹ ‘‘யதா³ ஹீ’’திஆதி³. ஸீஸம் கத்வாதி பதா⁴னம் ஸேட்ட²ம் கத்வா. தத³ன்வயாதி தத³னுக³தா ஸதிஸம்போ³ஜ்ஜ²ங்க³ம் அனுக³ச்ச²னகா. தஞ்ச கோ² ததா² கத்வா த⁴ம்மம் பச்சவேக்க²ணவஸேன. கேசி பன ‘‘தம் பச்சவேக்க²ணாதி³கம் கத்வா’’தி வத³ந்தி.

வத்த²ஸுத்தவண்ணனா நிட்டி²தா.