2. காயஸுத்தவண்ணனா

183. திட்ட²ந்தி ஏதேனாதி டி²தி, காரணம். கம்மஉதுசித்தாஹாரஸஞ்ஞிதோ சதுப்³பி³தோ⁴ பச்சயோ டி²தி ஏதஸ்ஸாதி பச்சயட்டி²திகோ. ஆஹாரபச்சயஸத்³தா³ ஹி ஏகத்தா². ஸுப⁴ம்பீதி காமச்ச²ந்தோ³ பச்சயோ, அஸுபே⁴ ஸுபா⁴காரேன பவத்தனதோ ஸுப⁴ந்தி வுச்சதி. தேன காரணேன பவத்தனகஸ்ஸ அஞ்ஞஸ்ஸ காமச்ச²ந்த³ஸ்ஸ நிமித்தத்தா ஸுப⁴னிமித்தந்தி. ஸுப⁴ஸ்ஸாதி யதா²வுத்தஸ்ஸ ஸுப⁴ஸ்ஸ. ஆரம்மணம்பீதி ஸுபா⁴காரேன, இட்டா²காரேன வா க³ய்ஹமானம் ரூபாதி³ஆரம்மணம்பி ஸுப⁴னிமித்தம் வுத்தாகாரேன. அனுபாயமனஸிகாரோதி ஆகங்கி²தஸ்ஸ ஹிதஸுக²ஸ்ஸ அனுபாயபூ⁴தோ மனஸிகாரோ, ததோ ஏவ உப்பத²மனஸிகாரோதி அயோனிஸோமனஸிகாரோ. தஸ்மிந்தி யதா²னித்³தா⁴ரிதே காமச்ச²ந்த³பூ⁴தே ததா³ரம்மணபூ⁴தே ச து³விதே⁴பி ஸுப⁴னிமித்தே. அட்ட²கதா²யம் பன ‘‘ஸுபா⁴ரம்மணே’’இச்சேவ வுத்தம். அத்தி², பி⁴க்க²வே, ஸுப⁴னிமித்தந்திஆதீ³தி ஆதி³-ஸத்³தே³ன காமச்ச²ந்த³னீவரணஸ்ஸ ஆஹாரத³ஸ்ஸனபாளி உத்தானாதி கத்வா வுத்தம் – ‘‘ஏவம் ஸப்³ப³னீவரணேஸு யோஜனா வேதி³தப்³பா³’’தி.

படிகோ⁴பி படிக⁴னிமித்தம் புரிமுப்பன்னஸ்ஸ பச்சா² உப்பஜ்ஜனகஸ்ஸ நிமித்தபா⁴வதோ. படிகா⁴ரம்மணம் நாம ஏகூனவீஸதி ஆகா⁴தவத்து²பூ⁴தா ஸத்தஸங்கா²ரா. அரதீதி பந்தஸேனாஸனாதீ³ஸு அரமணம். உக்கண்டி²தாதி உக்கண்ட²பா⁴வோ. பந்தேஸூதி தூ³ரேஸு, விவித்தேஸு வா. அதி⁴குஸலேஸூதி ஸமத²விபஸ்ஸனாத⁴ம்மேஸு. அரதி ரதிபடிபக்கோ². அரதிதாதி அரமணாகாரோ. அனபி⁴ரதீதி அனபி⁴ரதபா⁴வோ. அனபி⁴ரமணாதி அனபி⁴ரமணாகாரோ. உக்கண்டி²தாதி உக்கண்ட²னாகாரோ. பரிதஸ்ஸிதாதி உக்கண்ட²னவஸேனேவ பரிதஸ்ஸனா.

ஆக³ந்துகம், ந ஸபா⁴வஸித்³த⁴ம். காயாலஸியந்தி நாமகாயே அலஸபா⁴வோ. ஸம்மோஹவினோத³னியம் பன ‘‘தந்தீ³தி ஜாதிஆலஸிய’’ந்தி வுத்தம். வத³தீதி ஏதேன அதிஸீதாதி³பச்சயா ஸங்கோசாபத்திம் த³ஸ்ஸேதி. யம் ஸந்தா⁴ய வுத்தம் கிலேஸவத்து²விப⁴ங்கே³ (விப⁴. அட்ட². 857). தந்தீ³தி ஜாதிஆலஸியம். தந்தி³யனாதி தந்தி³யனாகாரோ. தந்தி³மனகதாதி தந்தி³யா அபி⁴பூ⁴தசித்ததா. அலஸஸ்ஸ பா⁴வோ ஆலஸ்யம். ஆலஸ்யாயனாகாரோ ஆலஸ்யாயனா. ஆலஸ்யாயிதஸ்ஸ பா⁴வோ ஆலஸ்யாயிதத்தம். இதி ஸப்³பே³ஹிபி இமேஹி பதே³ஹி கிலேஸவஸேன காயாலஸியம் கதி²தம்.

கிலேஸவஸேனாதி ஸம்மோஹவஸேன. காயவினமனாதி காயஸ்ஸ விரூபதோ நமனா. ஜம்ப⁴னாதி ப²ந்த³னா. புனப்புனம் ஜம்ப⁴னா விஜம்ப⁴னா. ஆனமனாதி புரதோ நமனா. வினமனாதி பச்ச²தோ நமனா. ஸன்னமனாதி ஸமந்ததோ நமனா. பணமனாதி யதா² ஹி தந்ததோ உட்டி²தபேஸகாரோ கிஞ்சிதே³வ உபரிட்டி²தம் க³ஹேத்வா உஜும் காயம் உஸ்ஸாபேதி, ஏவம் காயஸ்ஸ உத்³த⁴ம் ட²பனா. ப்³யாதி⁴யகந்தி உப்பன்னப்³யாதி⁴தா. இதி ஸப்³பே³ஹிபி இமேஹி பதே³ஹி கிலேஸவஸேன காயப²ந்த³னமேவ கதி²தம் (விப⁴. அட்ட². 858).

ப⁴த்தபரிளாஹோதி ப⁴த்தவஸேன பரிளாஹுப்பத்தி. பு⁴த்தாவிஸ்ஸாதி பு⁴த்தவதோ. ப⁴த்தமுச்சா²தி ப⁴த்தகே³லஞ்ஞம். அதிபு⁴த்தபச்சயா ஹி முச்சா²பத்தோ விய ஹோதி. ப⁴த்தகிலமதோ²தி பு⁴த்தபச்சயா கிலந்தபா⁴வோ. ப⁴த்தபரிளாஹோதி ப⁴த்தத³ரதோ². குச்சி²பூரம் பு⁴த்தவதோ ஹி பரிளாஹுப்பத்தியா உபஹதிந்த்³ரியோ விய ஹோதி, காயோ கி²ஜ்ஜதி. காயது³ட்டு²ல்லந்தி பு⁴த்தப⁴த்தம் நிஸ்ஸாய காயஸ்ஸ அகம்மஞ்ஞதா.

சித்தஸ்ஸ லீயனாகாரோதி ஆரம்மணே சித்தஸ்ஸ ஸங்கோசப்பத்தி. சித்தஸ்ஸ அகல்யதாதி சித்தஸ்ஸ கி³லானபா⁴வோ. கி³லானோதி அகல்லகோ வுச்சதி. ததா² சாஹ ‘‘நாஹம், ப⁴ந்தே, அகல்லகோ’’தி. அகம்மஞ்ஞதாதி சித்தகே³லஞ்ஞஸங்கா²தோ அகம்மஞ்ஞனாகாரோ. ஓலீயனாதி ஓலீயனாகாரோ. இரியாபதி²கம்பி சித்தம் யஸ்ஸ வஸேன இரியாபத²ம் ஸந்தா⁴ரேதும் அஸக்கோந்தோ ஓலீயதி, தஸ்ஸ தம் ஆகாரம் ஸந்தா⁴ய வுத்தம் ‘‘ஓலீயனா’’தி. து³தியபத³ம் உபஸக்³கே³ன வட்³டி⁴தம். லீனந்தி அவிப்பா²ரிகதாய ஸங்கோசப்பத்தம். இதரே த்³வே ஆகாரனித்³தே³ஸா. தி²னந்தி அவிப்பா²ரிகதாய அனுஸ்ஸாஹனா அஸங்க³ஹனஸங்க³ஹனம். தி²யனாகாரோ தி²யனா. தி²யிதத்தந்தி தி²யிதஸ்ஸ ஆகாரோ, அவிப்பா²ரிகதாதி அத்தோ².

சேதஸோ அவூபஸமோதி சித்தஸ்ஸ அவூபஸந்ததா அஸன்னிஸின்னபா⁴வோ. தேனாஹ – ‘‘அவூபஸந்தாகாரோ’’தி. அத்த²தோ பனேதந்தி ஸ்வாயம் அவூபஸந்தாகாரோ விக்கே²பஸபா⁴வத்தா விக்கே²பஹேதுதாய ச அத்த²தோ ஏதம் உத்³த⁴ச்சகுக்குச்சமேவ.

விசிகிச்சா²ய ஆரம்மணத⁴ம்மா நாம ‘‘பு³த்³தே⁴ கங்க²தீ’’திஆதி³னா ஆக³தஅட்ட²கங்கா²வத்து²பூ⁴தா த⁴ம்மா. யஸ்மா விசிகிச்சா² ப்³யாபாதா³த³யோ விய அனு அனு உக்³க³ஹணபச்சயா உப்பஜ்ஜதி, தஸ்மா கங்கா²ட்டா²னீயம் ஆரம்மணமேவ த³ஸ்ஸிதம் ‘‘விசிகிச்சா²ய ஆரம்மணத⁴ம்மா’’தி. யஸ்மா புரிமுப்பன்னா விசிகிச்சா² பச்சா² விசிகிச்சா²ய பச்சயோ ஹோதி, தஸ்மா விசிகிச்சா²பி விசிகிச்சா²ட்டா²னீயத⁴ம்மா வேதி³தப்³பா³. தத்ராயம் வசனத்தோ² – திட்ட²ந்தி பவத்தந்தி ஏத்தா²தி டா²னீயா, விசிகிச்சா² ஏவ டா²னீயா விசிகிச்சா²ட்டா²னீயா. அட்ட²கதா²யம் பன ஆரம்மணஸ்ஸபி தத்த² விஸேஸபச்சயதம் உபாதா³ய ‘‘காமச்ச²ந்தோ³ விசிகிச்சா²தி இமே த்³வே த⁴ம்மா ஆரம்மணேன கதி²தா’’தி வுத்தம். ஸுப⁴னிமித்தஸ்ஸ ஹி பச்சயபா⁴வமத்தம் ஸந்தா⁴யேதம் வுத்தம், ததா²பி யதா² ‘‘படிக⁴ம்பி படிக⁴னிமித்த’’ந்தி கத்வா ‘‘ப்³யாபாதோ³ உபனிஸ்ஸயேன கதி²தோ’’தி வுத்தம், ஏவம் ஸுப⁴ம்பி ஸுப⁴னிமித்தந்தி கத்வா காமச்ச²ந்தோ³ உபனிஸ்ஸயேன கதி²தோதி ஸக்கா விஞ்ஞாதும். ஸேஸா தி²னமித்³த⁴உத்³த⁴ச்சகுக்குச்சானி. தத்த² தி²னமித்³த⁴ம் அஞ்ஞமஞ்ஞம் ஸஹஜாதாதி³வஸேன பச்சயோ, ததா² உத்³த⁴ச்சகுக்குச்சந்தி. உப⁴யேஸம்பி உபனிஸ்ஸயகோடியா பச்சயபா⁴வே வத்தப்³ப³மேவ நத்தீ²தி ஆஹ ‘‘ஸஹஜாதேன ச உபனிஸ்ஸயேன சா’’தி.

யஸ்மா ஸதி நாம ‘‘சத்தாரோ ஸதிபட்டா²னா’’திஆதி³னா தேஸம் தேஸம் த⁴ம்மானம் அனுஸ்ஸரணவஸேன வத்ததி, தஸ்மா தே த⁴ம்மா ஸதிஸம்போ³ஜ்ஜ²ங்க³ட்டா²னீயா நாம. லோகுத்தரத⁴ம்மே ச அனுஸ்ஸவாதி³வஸேன க³ஹேத்வா ததா² பவத்ததேவ. தேன வுத்தம் ‘‘ஸதியா’’திஆதி³.

கோஸல்லம் வுச்சதி பஞ்ஞா, ததோ உப்பன்னா கோஸல்லஸம்பூ⁴தா. அனவஜ்ஜஸுக²விபாகாதி அனவஜ்ஜா ஹுத்வா ஸுக²விபாகா விபச்சனகா. பத³த்³வயேன பச்சயதோ ஸபா⁴வதோ கிச்சதோ ப²லதோ குஸலத⁴ம்மம் த³ஸ்ஸேதி. அகுஸலனித்³தே³ஸேபி ஏஸேவ நயோ. ஸாவஜ்ஜாதி கா³ரய்ஹா. அனவஜ்ஜாதி அகா³ரய்ஹா. ஹீனா லாமகா. பணீதா ஸேட்டா². கண்ஹா காளகா அஸுத்³தா⁴. ஸுக்கா ஓதா³தா ஸுத்³தா⁴. படிபா⁴க³-ஸத்³தோ³ பட²மே விகப்பே ஸதி³ஸகோட்டா²ஸத்தோ², து³தியே படிபக்க²கோட்டா²ஸத்தோ², ததியே நிக்³க³ஹேதப்³ப³படிபக்க²கோட்டா²ஸத்தோ² த³ட்ட²ப்³போ³.

குஸலகிரியாய ஆதி³கம்மபா⁴வேன பவத்தவீரியம் தி⁴திஸபா⁴வதாய தா⁴தூதி வுத்தந்தி ஆஹ ‘‘ஆரம்ப⁴தா⁴தூதி பட²மாரம்ப⁴வீரிய’’ந்தி. லத்³தா⁴ஸேவனம் வீரியம் ப³லப்பத்தம் ஹுத்வா படிபக்க²ம் வித⁴மதீதி ஆஹ – ‘‘நிக்கமதா⁴தூதி கோஸஜ்ஜதோ நிக்க²ந்தத்தா ததோ ப³லவதர’’ந்தி. அதி⁴மத்தாதி⁴மத்ததரானம் படிபக்க²த⁴ம்மானம் வித⁴மனஸமத்த²ம் படுபடுதராதி³பா⁴வப்பத்தம் ஹோதீதி ஆஹ – ‘‘பரக்கமதா⁴தூதி பரம் பரம் டா²னம் அக்கமனதாய ததோபி ப³லவதர’’ந்தி.

திட்ட²தி பவத்ததி ஏத்தா²தி டா²னீயா. ஆரம்மணத⁴ம்மா, பீதிஸம்போ³ஜ்ஜ²ங்க³ஸ்ஸ டா²னீயாதி பீதிஸம்போ³ஜ்ஜ²ங்க³ட்டா²னீயாதி ‘‘பீதியா ஆரம்மணத⁴ம்மா’’தி வுத்தம். யஸ்மா அபராபருப்பத்தியா பீதிபி ததா² வத்தப்³ப³தம் லப⁴தீதி வுத்தம் விஸுத்³தி⁴மக்³கே³ ‘‘பீதியா ஏவ தம் நாம’’ந்தி. த³ரத²பஸ்ஸத்³தீ⁴தி த³ரதோ² கிலேஸபரிளாஹோ, ஸோ பஸ்ஸம்ப⁴தி ஏதாயாதி த³ரத²பஸ்ஸத்³தி⁴, காயபஸ்ஸத்³தி⁴யா வேத³னாதி³க²ந்த⁴த்தயஸ்ஸ விய ரூபகாயஸ்ஸபி பஸ்ஸம்ப⁴னம் ஹோதி, சித்தபஸ்ஸத்³தி⁴யா சித்தஸ்ஸேவ பஸ்ஸம்ப⁴னம், ததோ ஏவேத்த² ப⁴க³வதா லஹுதாதீ³னம் விய து³வித⁴தா வுத்தா. ததா² ஸமாஹிதாகாரம் ஸல்லக்கே²த்வா க³ய்ஹமானோ ஸமதோ²வ ஸமத²னிமித்தம், தஸ்ஸ ஆரம்மணபூ⁴தம் படிபா⁴க³னிமித்தம்பி. விவித⁴ம் அக்³க³ம் ஏதஸ்ஸாதி ப்³யக்³கோ³, விக்கே²போ. ததா² ஹி ஸோ அனவட்டா²னரஸோ ப⁴ந்ததாபச்சுபட்டா²னோ வுத்தோ. ஏகக்³க³பா⁴வதோ ப்³யக்³க³படிபக்கோ²தி அப்³யக்³கோ³, ஸமாதி⁴, ஸோ ஏவ நிமித்தந்தி புப்³பே³ விய வத்தப்³ப³ம். தேனாஹ ‘‘தஸ்ஸேவ வேவசன’’ந்தி.

யோ ஆரம்மணே இட்டா²னிட்டா²காரம் அனாதி³யித்வா க³ஹேதப்³போ³ மஜ்ஜ²த்தாகாரோ, யோ ச புப்³பே³ உபேக்கா²ஸம்போ³ஜ்ஜ²ங்க³ஸ்ஸ பா⁴வனாவஸேன உப்பன்னோ மஜ்ஜ²த்தாகாரோ, து³விதோ⁴பி ஸோ உபேக்கா²ய ஆரம்மணத⁴ம்மோதி அதி⁴ப்பேதோதி ஆஹ – ‘‘அத்த²தோ பன மஜ்ஜ²த்தாகாரோ உபேக்கா²ட்டா²னீயா த⁴ம்மாதி வேதி³தப்³போ³’’தி. ஆரம்மணேன கதி²தா ஆரம்மணஸ்ஸேவ தேஸம் விஸேஸபச்சயபா⁴வதோ. ஸேஸாதி வீரியாத³யோ சத்தாரோ த⁴ம்மா. தேஸஞ்ஹி உபனிஸ்ஸயோவ ஸாதிஸயோ இச்சி²தப்³போ³தி.

காயஸுத்தவண்ணனா நிட்டி²தா.