1.ஹிமவந்தஸுத்தவண்ணனா

182. பு³ஜ்ஜ²தி சதுஸச்சம் அரியஸாவகோ ஏதாயாதி போ³த⁴ம், த⁴ம்மஸாமக்³கீ³, அரியஸாவகோ பன சதுஸச்சம் பு³ஜ்ஜ²தீதி போ³தி⁴. அங்கா³தி காரணா. யாய த⁴ம்மஸாமக்³கி³யாதி ஸம்ப³ந்தோ⁴. தண்ஹாவஸேன பதிட்டா²னம், தி³ட்டி²வஸேன ஆயூஹனா. ஸஸ்ஸததி³ட்டி²யா பதிட்டா²னம், உச்சே²த³தி³ட்டி²யா ஆயூஹனா. லீனவஸேன பதிட்டா²னம், உத்³த⁴ச்சவஸேன ஆயூஹனா. காமஸுகா²னுயோக³வஸேன பதிட்டா²னம், அத்தகிலமதா²னுயோக³வஸேன ஆயூஹனா. ஓக⁴தரணஸுத்தவண்ணனாயம் (ஸம். நி. 1.1) –

‘‘கிலேஸவஸேன பதிட்டா²னம், அபி⁴ஸங்கா²ரவஸேன ஆயூஹனா. தண்ஹாதி³ட்டீ²ஹி பதிட்டா²னம், அவஸேஸகிலேஸாபி⁴ஸங்கா²ரேஹி ஆயூஹனா, ஸப்³பா³குஸலாபி⁴ஸங்கா²ரவஸேன பதிட்டா²னம், ஸப்³ப³லோகியகுஸலாபி⁴ஸங்கா²ரவஸேன ஆயூஹனா’’தி –

வுத்தேஸு பகாரேஸு இத⁴ அவுத்தானம் வஸேன வேதி³தப்³போ³. கிலேஸஸந்தானனித்³தா³ய உட்ட²ஹதீதி ஏதேன ஸிகா²பத்தவிபஸ்ஸனாஸஹக³தானம்பி ஸதிஆதீ³னம் போ³ஜ்ஜ²ங்க³பா⁴வம் த³ஸ்ஸேதி. சத்தாரீதிஆதி³னா மக்³க³ப²லேன ஸஹக³தானம். ஸத்தஹி போ³ஜ்ஜ²ங்கே³ஹி பா⁴விதேஹி ஸச்சபடிவேதோ⁴ ஹோதீதி கத²மித³ம் ஜானிதப்³ப³ந்தி சோத³னம் ஸந்தா⁴யாஹ ‘‘யதா²ஹா’’திஆதி³. ஜா²னங்க³மக்³க³ங்கா³த³யோ வியாதி ஏதேன போ³தி⁴போ³ஜ்ஜ²ங்க³ஸத்³தா³னம் ஸமுதா³யாவயவவிஸயதம் த³ஸ்ஸேதி. ஸேனங்க³ரத²ங்கா³த³யோ வியாதி ஏதேன புக்³க³லபஞ்ஞத்தியா அவிஜ்ஜமானபஞ்ஞத்திபா⁴வம் த³ஸ்ஸேதி.

போ³தா⁴ய ஸம்வத்தந்தீதி போ³ஜ்ஜ²ங்கா³தி வுத்தம் ‘‘காரணத்தோ² அங்க³ஸத்³தோ³’’தி. பு³ஜ்ஜ²தீதி போ³தி⁴, போ³தி⁴யா ஏவ அங்கா³தி போ³ஜ்ஜ²ங்கா³தி வுத்தம் ‘‘பு³ஜ்ஜ²ந்தீதி போ³ஜ்ஜ²ங்கா³’’தி. விபஸ்ஸனாதீ³னம் காரணானம் பு³ஜ்ஜி²தப்³பா³னம் ஸச்சானம் அனுரூபம் பச்சக்க²பா⁴வேன படிமுக²ம் அவிபரீதம் ஸம்மா பு³ஜ்ஜ²ந்தீதி ஏவம் வத்து²விஸேஸதீ³பகேஹி உபரிமக்³கே³ஹி அனுபு³ஜ்ஜ²ந்தீதிஆதி³னா வுத்தபோ³தி⁴ஸத்³தே³ஹி நிப்பதே³ஸேன வுத்தம் ‘‘பு³ஜ்ஜ²னதாஸாமஞ்ஞேன ஸங்க³ண்ஹாதீ’’தி. ஏத்த² ச லீனபதிட்டா²ன-காமஸுக²ல்லிகானுயோக³-உச்சே²தா³பி⁴னிவேஸானம் த⁴ம்மவிசய-வீரியபீதிபதா⁴ன-த⁴ம்மஸாமக்³கீ³ படிபக்கோ². உத்³த⁴ச்சாயூஹனஅத்தகிலமதா²னுயோக³-ஸஸ்ஸதாபி⁴னிவேஸானம் பஸ்ஸத்³தி⁴ஸமாதி⁴-உபேக்கா²பதா⁴ன-த⁴ம்மஸாமக்³கீ³ படிபக்கோ². ஸதி பன உப⁴யத்தா²பி இச்சி²தப்³பா³. ததா² ஹி ஸா ஸப்³ப³த்தி²கா வுத்தா.

ஸம்-ஸத்³தோ³ பஸம்ஸாயம். புனதே³வ ஸுந்த³ரோ ச அத்தோ²பீதி ஆஹ ‘‘பஸத்தோ² ஸுந்த³ரோ ச போ³ஜ்ஜ²ங்கோ³’’தி. அபி⁴னிப்³ப³த்தேதீதி அபி⁴விஸிட்ட²பா⁴வேன நிப்³ப³த்தேதி ஸவிஸேஸபா⁴வம் வத³தி. ‘‘ஏகே வண்ணயந்தீ’’தி வத்வா தத்த² யதா²வுத்தவிவேகத்தயதோ அஞ்ஞம் விவேகத்³வயம் உத்³த⁴ரித்வா த³ஸ்ஸேதும் ‘‘தே ஹீ’’திஆதி³ வுத்தம். தத்த² ஜா²னக்க²ணே தாவ கிச்சதோ விக்க²ம்ப⁴னவிவேகனிஸ்ஸிதம், விபஸ்ஸனாக்க²ணே அஜ்ஜா²ஸயதோ படிப்பஸ்ஸத்³தி⁴விவேகனிஸ்ஸிதம் பா⁴வேதீதி. தேனாஹ – ‘‘அனுத்தரம் விமோக்க²ம் உபஸம்பஜ்ஜ விஹரிஸ்ஸாமீ’’தி. தத்த² தத்த² நிச்ச²யதாய கஸிணஜ்ஜா²னக்³க³ஹணேன அனுப்பாதா³னம்பி க³ஹணம் த³ட்ட²ப்³ப³ம்.

ஹிமவந்தஸுத்தவண்ணனா நிட்டி²தா.