1. நச்சகீ³தஸுத்தவண்ணனா

1151. ஸங்கே²பதோ ‘‘ஸப்³ப³பாபஸ்ஸ அகரண’’ந்திஆதி³னயப்பவத்தம் (தீ³.நி. 2.90; த⁴.ப. 183) ப⁴க³வதோ ஸாஸனம் அச்சந்தச²ந்த³ராக³பவத்திதோ நச்சாதீ³னம் த³ஸ்ஸனம் ந அனுலோமேதீதி ஆஹ ‘‘ஸாஸனஸ்ஸ அனனுலோமத்தா’’தி. அத்தனா பரேஹி ச பயோஜியமானம் பயோஜாபியமானஞ்ச ஏதேனேவ நச்ச-ஸத்³தே³ன க³ஹிதம், ததா² கீ³தவாதி³தஸத்³தே³ஹி சாதி ஆஹ – ‘‘நச்சனனச்சாபனாதி³வஸேனா’’தி. ஆதி³-ஸத்³தே³ன கா³யன-கா³யாபன-வாத³ன-வாதா³பனாதீ³னி ஸங்க³ண்ஹாதி. த³ஸ்ஸனேன சேத்த² ஸவனம்பி ஸங்க³ஹிதம் விரூபேகஸேஸனயேன. யதா²ஸகம் விஸயஸ்ஸ ஆலோசனஸபா⁴வதாய வா பஞ்சன்னம் விஞ்ஞாணானம் ஸவனகிரியாயபி த³ஸ்ஸனஸங்கே²பஸப்³பா⁴வதோ ‘‘த³ஸ்ஸனா’’இச்சேவ வுத்தம். அவிஸூகபூ⁴தஸ்ஸ கீ³தஸ்ஸ ஸவனம் கதா³சி வட்டதீதி ஆஹ – ‘‘விஸூகபூ⁴தா த³ஸ்ஸனா சா’’தி. ததா² ஹி வுத்தம் பரமத்த²ஜோதிகாய கு²த்³த³கஅட்ட²கதா²ய (கு². பா. அட்ட². 2.பச்சி²மபஞ்சஸிக்கா²பத³வண்ணனா) – ‘‘த⁴ம்மூபஸம்ஹிதம் கீ³தம் வட்டதி, கீ³தூபஸம்ஹிதோ த⁴ம்மோ ந வட்டதீ’’தி.