2. உச்சாஸயனஸுத்தவண்ணனா

1152. உச்சாதி உச்ச-ஸத்³தே³ன ஸமானத்த²ம் ஏகம் ஸத்³த³ந்தரம். ஸேதி ஏத்தா²தி ஸயனம், உச்சாஸயனம் மஹாஸயனஞ்ச ஸமணஸாருப்பரஹிதம் படிக்கி²த்தந்தி ஆஹ – ‘‘பமாணாதிக்கந்தம் அகப்பியத்த²ரண’’ந்தி. ஆஸந்தா³தி³ஆஸனஞ்சேத்த² ஸயனேனேவ ஸங்க³ஹிதம். யஸ்மா பன ஆதா⁴ரே படிக்கி²த்தே ததா³தா⁴ரகிரியா படிக்கி²த்தாவ ஹோதி, தஸ்மா ‘‘உச்சாஸயனமஹாஸயனா’’இச்சேவ வுத்தம். அத்த²தோ பன தது³பபோ⁴க³பூ⁴தனிஸஜ்ஜானிபஜ்ஜனேஹி விரதி த³ஸ்ஸிதாதி த³ட்ட²ப்³ப³ம். அத² வா உச்சாஸயனமஹாஸயனஞ்ச உச்சாஸயனமஹாஸயனஞ்சாதி உச்சாஸயனமஹாஸயனந்தி ஏதஸ்மிம் அத்தே² ஏகஸேஸனயேன அயம் நித்³தே³ஸோ கதோ யதா² – ‘‘நாமரூபபச்சயா ஸளாயதன’’ந்தி (உதா³. 1). ஆஸனகிரியாபுப்³ப³கத்தா வா ஸயனகிரியாய ஸயனக்³க³ஹணேனேவ ஆஸனம்பி க³ஹிதந்தி த³ட்ட²ப்³ப³ம்.