9. ஸங்காஸனஸுத்தவண்ணனா

1089. அத்த²ஸம்வண்ணனே வண்ணீயந்தேதி வண்ணா. தேயேவ பரியாயேன அக்க²ரணதோ அக்க²ரானி. அத்த²ம் ப்³யஞ்ஜேந்தீதி ப்³யஞ்ஜனானி. யஸ்மா பன அகாராதி³கே ஸரஸமஞ்ஞா, ககாராதி³கே ப்³யஞ்ஜனஸமஞ்ஞா, உப⁴யத்த² வண்ணஸமஞ்ஞா, தஸ்மா வுத்தம் ‘‘வண்ணானம் வா ஏகதே³ஸா யதி³த³ம் ப்³யஞ்ஜனா நாமா’’தி. நேத்தியம் பன வாக்யே ப்³யஞ்ஜனஸமஞ்ஞா. ப்³யஞ்ஜனக்³க³ஹணேனேவ சேத்த² ஆகாரனிருத்தினித்³தே³ஸா க³ஹிதா ஏவாதி த³ட்ட²ப்³ப³ம். ஸங்காஸனாதி அத்த²ஸ்ஸ ஞாபனா பா⁴க³ஸோ. தேனாஹ ‘‘விப⁴த்தியோ’’தி. ஸங்காஸனக்³க³ஹணேனேவ சேத்த² பகாஸனா வுத்தா ஹோதி. விப⁴த்தியோ ஹி அத்த²வசனேனேவ விவரந்தி, தாஹி காரணபஞ்ஞத்தியோ வுத்தாயேவாதி, தாஹிபி அத்த²பதா³னி க³ஹிதானேவ ஹோந்தி. அயமேத்த² ஸங்கே²போ, வித்தா²ரோ பன விஸுத்³தி⁴மக்³க³வண்ணனாயம் நேத்திஅட்ட²கதா²யஞ்ச வுத்தனயேன வேதி³தப்³போ³. ஸப்³பா³காரேனாதி ஸபா⁴கா³தி³விபா⁴வனாகாரேன. வண்ணாதீ³னந்தி தஸ்மிம் பன வித்தா²ரே பவத்தவண்ணாதீ³னம். தஸ்மாதி வண்ணாதீ³னம் அந்தஅபா⁴வதோ. ஏவமாஹாதி ‘‘அபரிமாணா வண்ணா ப்³யஞ்ஜனா ஸங்காஸனா’’தி ஏவமாஹ.