2. த⁴ம்மசக்கப்பவத்தனவக்³கோ³

1. த⁴ம்மசக்கப்பவத்தனஸுத்தவண்ணனா

1081. ‘‘இஸீனம் பதனுப்பதனவஸேன ஓஸீத³னஉப்பதனட்டா²னவஸேன ஏவம் ‘இஸிபதன’ந்தி ‘லத்³த⁴னாமே’தி ஸங்கே²பதோ வுத்தமத்த²ம் விவரிதும் ‘ஏத்த² ஹீ’’’திஆதி³ வுத்தம்.

ஆமந்தேஸீதி ஏத்த² யஸ்மா த⁴ம்மசக்கப்பவத்தனத்த²ம் அயம் ஆமந்தனா, தஸ்மா ஸமுதா³க³மதோ பட்டா²ய ஸத்து² புப்³ப³சரிதம் ஸங்கே²பேனேவ பகாஸேதும் வட்டதீதி ‘‘தீ³பங்கரபாத³மூலே கதாபி⁴னீஹாரதோ பட்டா²யா’’திஆதி³ ஆரத்³த⁴ம். தத்த² மாரப³லம் பி⁴ந்தி³த்வாதி மாரஞ்ச மாரப³லஞ்ச ப⁴ஞ்ஜித்வா. அத² வா மாரஸ்ஸ அப்³ப⁴ந்தரம் பா³ஹிரஞ்சாதி து³வித⁴ம் ப³லம் ப⁴ஞ்ஜித்வா. ‘‘த்³வேமே, பி⁴க்க²வே, அந்தா’’தி ஏத்த² அந்த-ஸத்³தோ³ ‘‘புப்³ப³ந்தே ஞாணம் அபரந்தே ஞாண’’ந்திஆதீ³ஸு (த⁴. ஸ. 1063) விய பா⁴க³பரியாயோதி ஆஹ ‘‘த்³வே இமே, பி⁴க்க²வே, கோட்டா²ஸா’’தி. ஸஹ ஸமுதா³ஹாரேனாதி உச்சாரணஸமகாலம். பத்த²ரித்வா அட்டா²ஸி பு³த்³தா⁴னுபா⁴வேன. ப்³ரஹ்மானோ ஸமாக³ச்சி²ம்ஸு பரிபக்ககுஸலமூலா ஸச்சாபி⁴ஸம்போ³தா⁴ய கதாதி⁴காரா.

கி³ஹிஸஞ்ஞோஜனந்தி கி³ஹிப³ந்த⁴னம். சி²ந்தி³த்வாதி ஹரித்வா. ந வளஞ்ஜேதப்³பா³தி நானுயுஞ்ஜேதப்³பா³. கிலேஸகாமஸுக²ஸ்ஸாதி கிலேஸகாமயுத்தஸ்ஸ ஸுக²ஸ்ஸ. அனுயோகோ³தி அனுப⁴வோ. கா³மவாஸீஹி ஸேவிதப்³ப³த்தா கா³மவாஸீனம் ஸந்தகோ. அத்தனோதி அத்தபா⁴வஸ்ஸ. ஆஹிதோ அஹம்மானோ ஏத்தா²தி அத்தா, அத்தபா⁴வோ. து³க்க²கரணந்தி து³க்கு²ப்பாத³னம். அத்தமாரணேஹீதி அத்தபா³த⁴னேஹி. உபஸமாயாதி கிலேஸவூபஸமோ அதி⁴ப்பேதோ, தத³த்த²ஸம்பதா³னவசனந்தி ஆஹ ‘‘கிலேஸூபஸமத்தா²யா’’தி. ஏஸ நயோ ஸேஸேஸுபி.

ஸச்சஞாணாதி³வஸேன தயோ பரிவட்டா ஏதஸ்ஸாதி திபரிவட்டம், ஞாணத³ஸ்ஸனம். தேனாஹ ‘‘ஸச்சஞாணா’’திஆதி³. யதா²பூ⁴தம் ஞாணந்தி படிவேத⁴ஞாணம் ஆஹ. தேஸுயேவ ஸச்சேஸு. ஞாணேன கத்தப்³ப³ஸ்ஸ ச பரிஞ்ஞாபடிவேதா⁴தி³கிச்சஸ்ஸ ச ஜானனஞாணம், ‘‘தஞ்ச கோ² படிவேத⁴தோ பகே³வா’’தி கேசி. பச்சா²தி அபரே. ததா² கதஞாணம். த்³வாத³ஸாகாரந்தி த்³வாத³ஸவித⁴ஆகாரபே⁴த³ம். அஞ்ஞத்தா²தி அஞ்ஞேஸு ஸுத்தேஸு.

படிவேத⁴ஞாணம்பி தே³ஸனாஞாணம்பி த⁴ம்மசக்கந்தி இத³ம் தத்த² ஞாணகிச்சம் பதா⁴னந்தி கத்வா வுத்தம். ஸத்³தி⁴ந்த்³ரியாதி³த⁴ம்மஸமுதா³யோ பன பவத்தனட்டே²ன சக்கந்தி த⁴ம்மசக்கம். அத² வா சக்கந்தி ஆணா, த⁴ம்மதோ அனபேதத்தா த⁴ம்மஞ்ச தம் சக்கஞ்ச, த⁴ம்மேன ஞாயேன சக்கந்திபி த⁴ம்மசக்கம். யதா²ஹ ‘‘த⁴ம்மஞ்ச பவத்தேதி சக்கஞ்சாதி த⁴ம்மசக்கம், சக்கஞ்ச பவத்தேதி த⁴ம்மஞ்சாதி த⁴ம்மசக்கம், த⁴ம்மேன பவத்ததீதி த⁴ம்மசக்கம், த⁴ம்மசரியாய பவத்ததீதி த⁴ம்மசக்க’’ந்திஆதி³ (படி. ம. 2.40-41). உப⁴யம்பீதி படிவேத⁴ஞாணம் தே³ஸனாஞாணந்தி உப⁴யம்பி. ஏதந்தி தது³ப⁴யம். இமாய தே³ஸனாயாதி இமினா ஸுத்தேன பகாஸேந்தேன ப⁴க³வதா யதா²வுத்தஞாணத்³வயஸங்கா²தம் த⁴ம்மசக்கம் பவத்திதம் நாம பவத்தனகிச்சஸ்ஸ அனிட்டி²தத்தா. பதிட்டி²தேதி அஞ்ஞாஸி கோண்ட³ஞ்ஞத்தே²ரேன ஸோதாபத்திப²லே பதிட்டி²தே. பவத்திதம் நாம கஸ்ஸபஸம்மாஸம்பு³த்³த⁴ஸ்ஸ ஸாஸனந்தரதா⁴னதோ பட்டா²ய யாவ பு³த்³து⁴ப்பாதோ³, ஏத்தகம் காலம் அப்பவத்தபுப்³ப³ஸ்ஸ பவத்திதத்தா, உபரிமக்³கா³தி⁴க³மோ பனஸ்ஸ அத்த²ங்க³தோ ஏவாதி.

ஏகப்பஹாரேனாதி ஏகேனேவ பஹாரஸஞ்ஞிதேன காலேன. தி³வஸஸ்ஸ ஹி ததியோ பா⁴கோ³ பஹாரோ நாம. பாளியம் பன ‘‘தேன க²ணேன தேன லயேன தேன முஹுத்தேனா’’தி வுத்தம். தம் பஹாரக்க²ணஸல்லக்க²ணமேவ. ஸப்³ப³ஞ்ஞுதஞ்ஞாணோபா⁴ஸோதி ஸப்³ப³ஞ்ஞுதஞ்ஞாணானுபா⁴வேன பவத்தோ ஓபா⁴ஸோ சித்தம் படிச்ச உதுஸமுட்டா²னோ வேதி³தப்³போ³. யஸ்மா ப⁴க³வதோ த⁴ம்மசக்கப்பவத்தனஸ்ஸ ஆரம்பே⁴ விய பரிஸமாபனே அதிவிய உளாரதமம் பீதிஸோமனஸ்ஸம் உத³பாதி³, தஸ்மா ‘‘இமஸ்ஸபி உதா³னஸ்ஸா’’திஆதி³ வுத்தம்.

9. ஸங்காஸனஸுத்தவண்ணனா

1089. அத்த²ஸம்வண்ணனே வண்ணீயந்தேதி வண்ணா. தேயேவ பரியாயேன அக்க²ரணதோ அக்க²ரானி. அத்த²ம் ப்³யஞ்ஜேந்தீதி ப்³யஞ்ஜனானி. யஸ்மா பன அகாராதி³கே ஸரஸமஞ்ஞா, ககாராதி³கே ப்³யஞ்ஜனஸமஞ்ஞா, உப⁴யத்த² வண்ணஸமஞ்ஞா, தஸ்மா வுத்தம் ‘‘வண்ணானம் வா ஏகதே³ஸா யதி³த³ம் ப்³யஞ்ஜனா நாமா’’தி. நேத்தியம் பன வாக்யே ப்³யஞ்ஜனஸமஞ்ஞா. ப்³யஞ்ஜனக்³க³ஹணேனேவ சேத்த² ஆகாரனிருத்தினித்³தே³ஸா க³ஹிதா ஏவாதி த³ட்ட²ப்³ப³ம். ஸங்காஸனாதி அத்த²ஸ்ஸ ஞாபனா பா⁴க³ஸோ. தேனாஹ ‘‘விப⁴த்தியோ’’தி. ஸங்காஸனக்³க³ஹணேனேவ சேத்த² பகாஸனா வுத்தா ஹோதி. விப⁴த்தியோ ஹி அத்த²வசனேனேவ விவரந்தி, தாஹி காரணபஞ்ஞத்தியோ வுத்தாயேவாதி, தாஹிபி அத்த²பதா³னி க³ஹிதானேவ ஹோந்தி. அயமேத்த² ஸங்கே²போ, வித்தா²ரோ பன விஸுத்³தி⁴மக்³க³வண்ணனாயம் நேத்திஅட்ட²கதா²யஞ்ச வுத்தனயேன வேதி³தப்³போ³. ஸப்³பா³காரேனாதி ஸபா⁴கா³தி³விபா⁴வனாகாரேன. வண்ணாதீ³னந்தி தஸ்மிம் பன வித்தா²ரே பவத்தவண்ணாதீ³னம். தஸ்மாதி வண்ணாதீ³னம் அந்தஅபா⁴வதோ. ஏவமாஹாதி ‘‘அபரிமாணா வண்ணா ப்³யஞ்ஜனா ஸங்காஸனா’’தி ஏவமாஹ.

10. தத²ஸுத்தவண்ணனா

1090. ஸபா⁴வாவிஜஹனட்டே²னாதி அத்தனோ து³க்க²ஸபா⁴வஸ்ஸ கதா³சிபி அபரிச்சஜனேன தத²ஸபா⁴வம். தேனாஹ ‘‘து³க்க²ஞ்ஹி து³க்க²மேவ வுத்த’’ந்தி. ஸபா⁴வஸ்ஸாதி து³க்க²ஸபா⁴வஸ்ஸ. அமோக⁴தாயாதி அவஞ்ஜ²தாய. அவிதத²ந்தி ந விதத²ம். தேனாஹ ‘‘ந ஹி து³க்க²ம் அது³க்க²ம் நாம ஹோதீ’’தி. அஞ்ஞபா⁴வானுபக³மேனாதி ஸமுத³யாதி³ஸபா⁴வானுபக³மனேன முஸா ந ஹோதீதி அஞ்ஞோ அஞ்ஞதா² ந ஹோதீதி அனஞ்ஞத²ம். தேனாஹ ‘‘ந ஹீ’’திஆதி³.

த⁴ம்மசக்கப்பவத்தனவக்³க³வண்ணனா நிட்டி²தா.