1. ஸமாதி⁴வக்³கோ³

1. ஸமாதி⁴ஸுத்தவண்ணனா

1071. சித்தேகக்³க³தாயாதி நிஸ்ஸக்கவசனம் ‘‘பரிஹாயந்தீ’’தி பத³ம் அபேக்கி²த்வா. யதா²பூ⁴தாதி³வஸேனாதி யதா²க³தாதி³வஸேன. யதா²பூ⁴தம் நாம இமஸ்மிம் ஸுத்தே ‘‘ஸமாஹிதோ, பி⁴க்க²வே, பி⁴க்கு² யதா²பூ⁴தம் பஜானாதீ’’திஆதி³. ஆதி³-ஸத்³தே³ன ‘‘ததா² யஸ்மா’’திஆதி³ஸங்க³ஹோ த³ட்ட²ப்³போ³. ததா² ஹி யதா²பூ⁴தவஸேன காரணச்சே²தோ³ கதோ ‘‘ததா² யஸ்மா’’திஆதி³வசனேஹி. வண்ணாதி அக்க²ரா, ‘‘கு³ணா’’தி கேசி. பத³ப்³யஞ்ஜனானீதி நாமாதி³பதா³னி சேவ தம்ஸமுதா³யபூ⁴தப்³யஞ்ஜனானி ச.

3. பட²மகுலபுத்தஸுத்தாதி³வண்ணனா

1073-75. ஸாஸனாவசரா அதி⁴ப்பேதா பா³ஹிரகானம் ஸச்சாபி⁴ஸமயஸ்ஸ அபா⁴வதோ. ததா²தி இமினா சதுத்த²பஞ்சமேஸு அத்த²விஸேஸாபா⁴வம் த³ஸ்ஸேதி. யதி³ ஏவம் கஸ்மா விஸும் விஸும் தே³ஸனாதி ஆஹ ‘‘தேன தேன அபி⁴லாபேனா’’திஆதி³.

10. திரச்சா²னகதா²ஸுத்தவண்ணனா

1080. து³க்³க³திதோ ஸம்ஸாரதோ ச நிய்யாதி ஏதேனாதி நிய்யானம், ஸக்³க³மக்³கோ³ மோக்க²மக்³கோ³ ச. தஸ்மிம் நிய்யானே நியுத்தா, தம் ஏத்த² அத்தீ²தி நிய்யானிகா. வசீது³ச்சரிதஸம்கிலேஸதோ வா நிய்யாதீதி ஈ-காரஸ்ஸ ரஸ்ஸத்தம் ய-காரஸ்ஸ க-காரம் கத்வா நிய்யானிகா. சேதனாய ஸத்³தி⁴ம் ஸம்ப²ப்பலாபா வேரமணி. தப்படிபக்க²தோ அனிய்யானிகா, தஸ்ஸ பா⁴வோ அனிய்யானிகத்தம். திரச்சா²னபூ⁴தந்தி திரோகரணபூ⁴தம். கம்மட்டா²னபா⁴வேதி அனிச்சதாபடிஸம்யுத்தசதுஸச்சகம்மட்டா²னபா⁴வே. ஸாத்த²கந்தி தா³னஸீலாதி³னிஸ்ஸிதத்தா ஹிதபடிஸம்யுத்தம்.

விஸிகா²தி க⁴ரஸன்னிவேஸோ. விஸிகா²க³ஹணேன ச கா³மாதி³க³ஹணே விய தன்னிவாஸினோ விஸேஸதோ க³ஹிதா ‘‘ஆக³தோ கா³மோ’’திஆதீ³ஸு விய. தேனாஹ ‘‘ஸூரா ஸமத்தா²’’தி. கும்ப⁴ட்டா²னாபதே³ஸேன கும்ப⁴தா³ஸியோ வுத்தாதி ஆஹ – ‘‘கும்ப⁴தா³ஸிகதா²’’தி. அயாதா²வதோ உப்பத்திட்டி²திஸம்ஹாராதி³வஸேன லோகோ அக்கா²யதி ஏதேனாதி லோகக்கா²யிகா. இதி இமினா பகாரேன ப⁴வோ, இமினா அப⁴வோதி ஏவம் பவத்தாய இதிப⁴வாப⁴வகதா²ய ஸத்³தி⁴ம்.

ஸமாதி⁴வக்³க³வண்ணனா நிட்டி²தா.