11. யவகலாபிஸுத்தவண்ணனா

248. யவபுஞ்ஜோ ஸுபரிபக்கயவஸமுதா³யோ. காஜஹத்தா²தி த³ண்ட³ஹத்தா². போதே²ய்யுந்தி யதா² யவஸங்கா²தம் த⁴ஞ்ஞம் வண்டதோ முச்சதி, ஏவம் போதே²ய்யும். யவே ஸாவேத்வாதி யவஸீஸதோ யவே போத²னேன மோசேத்வா விவேசேத்வா.

சதுமஹாபதோ² விய ச² ஆயதனானி ஆரம்மணத³ண்ட³கேஹி ஹனனட்டா²னத்தா. யவகலாபீ விய ஸத்தோ தேஹி ஹஞ்ஞமானத்தா. ச² ப்³யாப⁴ங்கி³யோ விய ஸபா⁴வதோ ச²தா⁴பி பச்சேகம் இட்டா²னிட்ட²மஜ்ஜ²த்தவஸேன அட்டா²ரஸ ஆரம்மணானி யவகலாபட்டா²னியஸ்ஸ ஸத்தஸ்ஸ ஹனனதோ. ப⁴வபத்த²னாய அபராபருப்பத்திம் ஸந்தா⁴ய ‘‘ப⁴வபத்த²னா கிலேஸா’’தி ப³ஹுவசனனித்³தே³ஸோ. ப⁴வபத்த²னா ச தஸ்ஸ பச்சயபூ⁴தா கிலேஸா சாதி ப⁴வபத்த²னாகிலேஸாதி ஏவம் வா ஏத்த² அத்தோ² த³ட்ட²ப்³போ³. யஸ்மா ஸத்தானம் வட்டது³க்க²ம் நாம ஸப்³ப³ம்பி தம் ப⁴வபத்த²னாமூலகம், தஸ்மா வுத்தம் ‘‘ஏவம் ஸத்தா’’திஆதி³. ப⁴வபத்த²னகிலேஸாதி ச ப⁴வபத்த²னாமூலகம் கிலேஸம்.

பு⁴ம்மந்தி ஸமீபத்தே² பு⁴ம்மம். தேனாஹ ‘‘ஸுத⁴ம்மாய த்³வாரே’’தி. ந கதந்தி து³க்கு²ப்பாத³னம் ந கதம். நவகூ³த²ஸூகரம் வியாதி நவகூ³த²ப⁴க்க²ஸூகரம் விய. சித்தேனேவாதி யோ ப³ஜ்ஜ²தி, தஸ்ஸ சித்தேனேவ. தஸ்மாதி யஸ்மா வேபசித்திப³ந்த⁴னஸ்ஸ ப³ந்த⁴னமுச்சனம் விய, தஸ்மா ‘‘வேபசித்திப³ந்த⁴ன’’ந்தி வுத்தம். ஞாணமோக்க²ம் ப³ந்த⁴னந்தி ஞாணேன முச்சனம் ப³ந்த⁴னம்.

மஞ்ஞமானோதி பரிகப்பிததண்ஹாவஸேன ‘‘ஏதம் மமா’’தி, தி³ட்டி²வஸேன ‘‘ஏஸோ மே அத்தா’’தி, மானவஸேன ‘‘ஏஸோஹமஸ்மீ’’தி மஞ்ஞந்தோ. க²ந்த⁴வினிமுத்தஸ்ஸ மஞ்ஞமானவத்து²னோ அபா⁴வா ‘‘க²ந்தே⁴ மஞ்ஞந்தோ’’தி வுத்தம். ஏதந்தி ‘‘மாரஸ்ஸா’’தி ஏதம் ஸாமிவசனம். கிலேஸமாரேன ப³த்³தோ⁴தி கிலேஸமாரேன தேனேவ கிலேஸப³ந்த⁴னேன ப³த்³தோ⁴. முத்தோதி ஏத்தா²பி ஏஸேவ நயோ.

தண்ஹாமஞ்ஞனாய ஸதி தி³ட்டி²மானமஞ்ஞனானம் பஸங்கோ³ ஏவ நத்தீ²தி யதா² ‘‘அஸ்மீ’’தி பதே³ன தி³ட்டி²மானமஞ்ஞனா வுத்தா ஹோந்தி, ஏவம் தண்ஹாமஞ்ஞிதாபீதி வுத்தம் ‘‘அஸ்மீதி பதே³ன தண்ஹாமஞ்ஞிதம் வுத்த’’ந்தி. அயமஹமஸ்மீதி பதே³ன தி³ட்டி²மஞ்ஞிதந்தி ஏதரஹி லப்³ப⁴மானதி³ட்டி²வத்து²வஸேனேவ. ப⁴விஸ்ஸந்தி அனாக³ததி³ட்டி²வத்து²பரிகப்பனவஸேனேவ தி³ட்டி²மஞ்ஞிதம். யேபு⁴ய்யேன ஹி அனாக³தாலிங்க³னா ஸஸ்ஸததி³ட்டி². உச்சே²த³வஸேன தி³ட்டி²மஞ்ஞிதமேவாதி ஆனேத்வா ஸம்ப³ந்தோ⁴. ரூபீதிஆதீ³னி பதா³னி. ஸஸ்ஸதஸ்ஸேவாதி ஸஸ்ஸதகா³ஹஸ்ஸேவ பபே⁴த³தீ³பனானி. யஸ்மா மஞ்ஞிதம் ஆபா³த⁴வஸேன ரோகோ³, அந்தோதோ³ஸவஸேன க³ண்டோ³, அங்க³னிகந்தவஸேன ஸல்லம், தஸ்மா இமேஹி தண்ஹாதீ³ஹி கிலேஸேஹி பாகடசலனவஸேன இஞ்ஜந்தி சேவ, அபாகடஸஞ்சலனவஸேன ப²ந்த³ந்தி ச. பபஞ்சிதம் ஸம்ஸாரே சிராயனம் த³ட்ட²ப்³ப³ம், க²ந்த⁴ஸந்தானஸ்ஸ வா வித்தா²ரணம். பமத்தாகாரப்பத்தா முச்ச²னாகாரப்பத்தா. தேஸந்தி தண்ஹாதி³ட்டி²கிலேஸானம். ஆகாரத³ஸ்ஸனத்த²ந்தி பவத்திஆகாரத³ஸ்ஸனத்த²ம்.

மானோ நாம ‘‘ஸேய்யோஹமஸ்மீ’’திஆதி³னா மஜ்ஜனாகாரப்பவத்தி. தண்ஹாய ஸம்பயுத்தமானவஸேனாதி கஸ்மா வுத்தம்? நனு ஸப்³போ³ மானோ தண்ஹாஸம்பயுத்தோ? ஸதி ஹி ப்³யபி⁴சாரே விஸேஸனம் இச்சி²தப்³ப³ந்தி. ஸச்சமேதம், தண்ஹா பன அத்தி² மானஸ்ஸ பச்சயபூ⁴தா, அத்தி² மானஸ்ஸ அப்பச்சயபூ⁴தா, யதோ மானோ அனியதோ வுச்சதி. ததா² ஹி பட்டா²னே ‘‘ஸம்யோஜனம் த⁴ம்மம் படிச்ச ஸம்யோஜனோ த⁴ம்மோ உப்பஜ்ஜதி ஹேதுபச்சயா’’தி ஏத்த² ஸம்யோஜனானி ஸம்யோஜனேஹி யதா²லாப⁴ம் யோஜேத்வா த³ஸ்ஸிதயோஜனாய ‘‘காமராக³ஸம்யோஜனம் படிச்ச மானஸம்யோஜனம் அவிஜ்ஜாஸம்யோஜன’’ந்தி வத்வா ‘‘காமராக³ஸம்யோஜனம் படிச்ச அவிஜ்ஜாஸம்யோஜன’’ந்தி, ‘‘மானஸம்யோஜனம் படிச்ச ப⁴வராக³ஸம்யோஜனம் அவிஜ்ஜாஸம்யோஜன’’ந்தி ச வத்வா ‘‘ப⁴வராக³ஸம்யோஜனம் படிச்ச அவிஜ்ஜாஸம்யோஜன’’ந்தி வுத்தம். ஏத்த² ச காமராக³ப⁴வராக³ஸம்யோஜனேஹி மானஸ்ஸ அனியதபா⁴வோ பகாஸிதோ. தத்த² யா தண்ஹா ப³லவதீ, தம் ஸந்தா⁴ய இத³ம் வுத்தம் ‘‘தண்ஹாய ஸம்பயுத்தமானவஸேனா’’தி. ப³லவதண்ஹாஸம்பயுத்தோ ஹி மானோ ஸயம்பி ப³லவா ஹுத்வா அஸ்மீதி ஸவிஸேஸம் மஜ்ஜனவஸேன பவத்ததீதி.

தி³ட்டி²வஸேனாதி மானமூலகதி³ட்டி²வஸேன. ‘‘ஸேய்யோஹமஸ்மீ’’திஆதி³னா ஹி ப³ஹுலமானுபேதஸ்ஸ புக்³க³லஸ்ஸ ரூபாதீ³ஸு ஏகம் உத்³தி³ஸ்ஸ அயமஹமஸ்மீதி தி³ட்டி²யா உப்பன்னாய மானஸ்ஸ அப்பஹீனத்தா மானோபி தத்த² தத்தே²வ உப்பஜ்ஜதி. இதி மானமூலகம் தி³ட்டி²ம் ஸந்தா⁴யாஹ ‘‘அயமஹமஸ்மீதி தி³ட்டி²வஸேன வுத்த’’ந்தி. சோத³கோ பன இமமத்த²ம் அஜானந்தோ அனுபலப்³ப⁴மானமேவ ஸம்பயோக³த்த²ம் க³ஹேத்வா ‘‘நனு சா’’திஆதி³னா சோதே³தி. இதரோ ‘‘ஆம நத்தீ²’’தி தமத்த²ம் ஸம்படிச்சி²த்வா ‘‘மானஸ்ஸ பனா’’திஆதி³னா பரிஹாரமாஹ. தஸ்ஸத்தோ² வுத்தோ ஏவ.

யவகலாபிஸுத்தவண்ணனா நிட்டி²தா.

ஆஸீவிஸவக்³க³வண்ணனா நிட்டி²தா.

சதுத்தோ² பண்ணாஸகோ.

ஸளாயதனஸம்யுத்தவண்ணனா நிட்டி²தா.