2. வேத³னாஸம்யுத்தம்

1. ஸகா³தா²வக்³கோ³

1. ஸமாதி⁴ஸுத்தவண்ணனா

249. வேத³னா ச பஜானாதீதி ஸச்சாபி⁴ஸம்போ³த⁴வஸேன வுச்சமானவேத³னானம் பஜானனம் ஸாதிஸயஸமாதா⁴னபுப்³ப³கந்தி ப⁴க³வதா ‘‘ஸமாஹிதோ’’தி வுத்தந்தி ஆஹ ‘‘உபசாரேன வா அப்பனாய வா ஸமாஹிதோ’’தி. வேத³னாதி திஸ்ஸோபி வேத³னா. து³க்க²ஸச்சவஸேனாதி து³க்க²ஸச்சபா⁴வேன, பரிஜானனவஸேனாதி அத்தோ². ஸம்ப⁴வந்தி ஸமுத³யம் தண்ஹாவிஜ்ஜாகம்மப²ஸ்ஸாதி³ப்பபே⁴த³ம் உப்பத்திகாரணம். தேனாஹ ‘‘ஸமுத³யஸச்சவஸேன பஜானாதீ’’தி. யத்தா²தி யம்னிமித்தம், யம் ஆக³ம்ம காமதண்ஹாவிஜ்ஜாதி³னிரோதா⁴ வேத³னானிரோதோ⁴, தேஸம் அயம் நிரோதோ⁴. நிப்³பா³னம் ஆரப்³ப⁴ அரியமக்³க³ப்பவத்தியா ஹி நிப்³பா³னம் வேத³னானிரோதோ⁴தி வுத்தோ. க²யம் க³மேதீதி க²யகா³மீ, தம் க²யகா³மினம். சா²தம் வுச்சதி தண்ஹா காமானம் பாதுகாமதாவஸேன பவத்தனதோ, அச்சந்தமேவ ஸமுச்சி²ன்னத்தா நத்தி² ஏதஸ்மிம் சா²தந்தி நிச்சா²தோ. தேனாஹ ‘‘நித்தண்ஹோ’’தி. ஸம்மஸனசாரவேத³னாதி ஸம்மஸனூபசாரவேத³னா. த்³வீஹி பதே³ஹீதி ‘‘ஸமாஹிதோ ஸம்பஜானோ’’தி இமேஹி த்³வீஹி. ‘‘ஸதோ’’தி பன இத³ம் ஸம்பஜானபத³ஸ்ஸேவ உபப்³ரூஹனந்தி அதி⁴ப்பாயோ. ஸேஸேஹி சதூஹி சதுஸச்சம் கதி²தம், இதரேஹி பன த்³வீஹி சதுஸச்சபு³ஜ்ஜ²னமேவ கதி²தம். ஸப்³ப³ஸங்கா³ஹிகோதி ஸப்³ப³ஸபா⁴வத⁴ம்மானம் ஸங்க³ண்ஹனகோ. தேனாஹ ‘‘சதுபூ⁴மகத⁴ம்மபரிச்சே²தோ³ வுத்தோ’’தி.

ஸமாதி⁴ஸுத்தவண்ணனா நிட்டி²தா.

2. ஸுக²ஸுத்தவண்ணனா

250. து³க்க²ம் ந ஹோதீதி அது³க்க²ம், ஸுக²ம் ந ஹோதீதி அஸுக²ம், ம-காரோ பத³ஸந்தி⁴கரோ. அது³க்க²மஸுக²ந்தி வேத³யிதஸத்³தா³பேக்கா²ய நபும்ஸகனித்³தே³ஸோ. ஸபரஸந்தானக³தே ஸந்தா⁴ய அஜ்ஜ²த்தப³ஹித்³தா⁴க³ஹணந்தி ஆஹ ‘‘அத்தனோ ச பரஸ்ஸ சா’’தி. தேன ஸப்³ப³ம்பி வேத³யிதம் க³ஹிதந்தி த³ட்ட²ப்³ப³ம். நஸ்ஸனஸபா⁴வந்தி இத்தரக²ணதாய ப⁴ங்க³தோ உத்³த⁴ம் அபஸ்ஸிதப்³ப³ஸபா⁴வம். பலோகோ பே⁴தோ³ ஏதஸ்ஸ அத்தீ²தி பலோகினம். தேனாஹ ‘‘பி⁴ஜ்ஜனஸபா⁴வ’’ந்தி. ஞாணேன பு²ஸித்வா பு²ஸித்வாதி புப்³ப³பா⁴கே³ விபஸ்ஸனாஞாணேன அனிச்சா பப⁴ங்கு³னோதி ஆரம்மணதோ, உத்தரகாலம் அஸம்மோஹதோ மக்³க³பரம்பராய பு²ஸித்வா பு²ஸித்வா வயம் பஸ்ஸந்தோ. விரஜ்ஜதீதி மக்³க³விராகே³ன விரஜ்ஜதி. ஸம்மஸனசாரவேத³னா கதி²தா ஆரத்³த⁴விபஸ்ஸகானம் வஸேன தே³ஸனாதி. லோகியலோகுத்தரேஹி ஞாணேஹி யாதா²வதோ பரிஜானனம் படிவிஜ்ஜ²னம் ஞாணபு²ஸனம்.

ஸுக²ஸுத்தவண்ணனா நிட்டி²தா.

3. பஹானஸுத்தவண்ணனா

251. ஸப்³ப³ம்பி அட்ட²ஸதபபே⁴த³ம் தண்ஹம் சி²ந்தி³ ஸமுச்சே²த³பஹானவஸேன பஜஹி. தேனாஹ ‘‘ஸமுச்சி²ந்தீ³’’தி. யத³க்³கே³ன தண்ஹா ஸப்³ப³ஸோ ஸமுச்சி²ன்னா, தத³க்³கே³ன ஸப்³பா³னிபி ஸஞ்ஞோஜனானீதி ஆஹ ‘‘த³ஸவித⁴ம்பீ’’திஆதி³. ஸம்மாதி ஸுட்டு². பஹானஞ்ச நாம உபாயேன ஞாயேன பஹானந்தி ஆஹ ‘‘ஹேதுனா காரணேனா’’தி. த³ஸ்ஸனாபி⁴ஸமயாதி அஸம்மோஹபடிவேதா⁴. அரஹத்தமக்³கோ³ ஹி உப்பஜ்ஜமானோவ ஸபா⁴வபடிச்சா²த³கம் மோஹம் வித்³த⁴ம்ஸேந்தோ ஏவ பவத்ததி, தேன மானோ யாதா²வதோ தி³ட்டோ² நாம ஹோதி, அயமஸ்ஸ த³ஸ்ஸனாபி⁴ஸமயோ. யதா² ஹி ஸூரியே உட்டி²தே அந்த⁴காரோ வித்³த⁴ம்ஸியமானோ விஹதோ, ஏவம் அரஹத்தமக்³கே³ உப்பஜ்ஜமானே ஸோ ஸப்³ப³ஸோ பஹீனோ ஏவ ஹோதி, ந தஸ்மிம் ஸந்தானே பதிட்ட²ம் லப⁴தி, அயமஸ்ஸ பஹானாபி⁴ஸமயோ. தேன வுத்தம் ‘‘அரஹத்தமக்³கோ³ ஹீ’’திஆதி³. கிச்சவஸேனாதி அஸம்மோஹபடிவேத⁴ஸங்கா²தஸ்ஸ த³ஸ்ஸனகிச்சஸ்ஸ அனிப்பா²த³னவஸேன.

யே இமே சத்தாரோ அந்தாதி ஸம்ப³ந்தோ⁴. மரியாத³ந்தோதி மரியாத³ஸங்கா²தோ அந்தோ. ஏஸ நயோ ஸேஸத்தயேபி. தேஸூதி சதூஸு அந்தேஸு. அது³ம் சதுத்த²கோடிஸங்கா²தம் ஸப்³ப³ஸ்ஸேவ வட்டது³க்க²ஸ்ஸ அந்தம் பரிச்சே²த³ம் அரஹத்தமக்³கே³ன மானஸ்ஸ தி³ட்ட²த்தா பஹீனத்தா ச அகாஸீதி யோஜனா. ஸமுஸ்ஸயோ அத்தபா⁴வோ.

ந ரிஞ்சதீதி ந விவேசேதி ந விஸ்ஸஜ்ஜேதி. தேனாஹ ‘‘ஸம்பஜஞ்ஞம் ந ஜஹதீ’’தி, ஸம்பஜஞ்ஞம் ந பரிச்சஜதீதி அத்தோ². ஸங்க்²யம் நோபேதீதி இமஸ்ஸ ‘‘தி³ட்ட²த⁴ம்மே அனாஸவோ’’தி இமஸ்ஸ வஸேன அத்த²ம் வத³ந்தோ ‘‘ரத்தோ து³ட்டோ²’’தி அவோச ஸஉபாதி³ஸேஸனிப்³பா³னவஸேன. ஸங்க்²யம் நோபேதீதி வா தி³ட்டே²-த⁴ம்மே அனாஸவோ த⁴ம்மட்டோ² வேத³கூ³ காயஸ்ஸ பே⁴தா³ மனுஸ்ஸோ தே³வோதி வா பஞ்ஞத்திம் ந உபேதீதி அனுபாதி³ஸேஸனிப்³பா³னவஸேனபி அத்தோ² வத்தப்³போ³. ஏத்த² ச ஸுகா²தீ³ஸு வேத³னாஸு யதா²க்கமம் ராகா³னுஸயாத³யோ கதி²தாதி ஆஹ – ‘‘இமஸ்மிம் ஸுத்தே ஆரம்மணானுஸயோ கதி²தோ’’தி. யோ ஹி ராகா³தி³ பச்சயஸமவாயே அதிஇட்டா²தீ³ஸு உப்பஜ்ஜனாரஹோ மக்³கே³ன அப்பஹீனோ, ஸோ ‘‘ராகா³னுஸயோ’’திஆதி³னா வுத்தோ, அப்பஹீனத்தோ² ஸோ மக்³கே³ன பஹாதப்³போ³, ந பரியுட்டா²னாபி⁴ப⁴வத்தோ²தி.

பஹானஸுத்தவண்ணனா நிட்டி²தா.

4. பாதாலஸுத்தவண்ணனா

252. யத்த² பதிட்டா² நத்தி² ஏகந்திகாதி ஏகந்திகஸ்ஸ மஹதோ பாதஸ்ஸ அலந்தி அயமேத்த² அத்தோ² அதி⁴ப்பேதோதி ஆஹ ‘‘நத்தி² ஏத்த² பதிட்டா²’’தி. அஸம்பூ⁴தத்த²ந்தி ந ஸம்பூ⁴தத்த²ம், முஸாதி அத்தோ². ஸோதி அஸ்ஸுதவா புது²ஜ்ஜனோ. யம் தம் உத³கம் பததீதி யோஜனா. யஸ்மா ஸமுத்³த³பிட்டே² அந்தரந்தரா வேரம்ப⁴வாதஸதி³ஸோ மஹாவாதோ உட்ட²ஹித்வா மஹாஸமுத்³தே³ உத³கம் உக்³க³ச்சா²பேதி, தம் கதா³சி சக்கவாளாபி⁴முக²ம், கதா³சி ஸினேருபாதா³பி⁴முக²ம் க³ந்த்வா தம் பதிஹனதி, தஸ்மா வுத்தம் ‘‘ப³லவாமுக²ம் மஹாஸமுத்³த³ஸ்ஸா’’திஆதி³. வேகே³ன பக்க²ந்தி³த்வாதி மஹதா வாதவேகே³ன ஸமுத்³த⁴தம் தேனேவ வேகே³ன பக்க²ந்த³ந்தஞ்ச ஹுத்வா. மஹானரகபபாதோ வியாதி யோஜனாயாமவித்தா²ரக³ம்பீ⁴ரஸோப்³ப⁴பபாதோ விய ஹோதி. ததா²ரூபானந்தி தத்த² வஸிதும் ஸமத்தா²னம். அஸந்தந்தி அபூ⁴தம். அத்த²வஸேன ஹி வாசா அபூ⁴தம் நாம.

ந பதிட்டா²ஸீதி பதிட்ட²ம் ந லபி⁴. அனிப³த்³த⁴ந்தி அனிப³ந்த⁴னத்த²ம் யம்கிஞ்சி. து³ப்³ப³லஞாணோதி ஞாணப³லரஹிதோ. ‘‘அஸ்ஸுதவா புது²ஜ்ஜனோ’’தி வத்வா ‘‘ஸுதவா அரியஸாவகோ’’தி வுத்தத்தா ‘‘ஸோதாபன்னோ து⁴ர’’ந்தி வுத்தம். இதரேஸு அரியஸாவகேஸு வத்தப்³ப³மேவ நத்தி². தேஸஞ்ஹி வேத³னா ஸுபரிஞ்ஞாதா. ப³லவவிபஸ்ஸகோ…பே… யோகா³வசரோபி வட்டதி மத்தஸோ வேத³னானம் பரிஞ்ஞாதத்தா.

பாதாலஸுத்தவண்ணனா நிட்டி²தா.

5. த³ட்ட²ப்³ப³ஸுத்தவண்ணனா

253. விபரிணாமனவஸேன து³க்க²தோ த³ட்ட²ப்³பா³தி கிஞ்சாபி ஸுகா², பரிணாமது³க்க²தா பன ஸுக²வேத³னாய ஏகந்திகாதி. வினிவிஜ்ஜ²னட்டே²னாதி பீளனவஸேன அத்தபா⁴வஸ்ஸ விஜ்ஜ²னட்டே²ன. ஹுத்வாதி பச்சயஸமாக³மேன உப்பஜ்ஜித்வா. தேன பாகபா⁴வபுப்³ப³கோ அத்தலாபோ⁴ வுத்தோ. அபா⁴வாகாரேனாதி ப⁴ங்கு³பக³மனாகாரேன. தேன வித்³த⁴ம்ஸபா⁴வோ வுத்தோ. உப⁴யேன உத³யப்³ப³யபரிச்சி²ன்னதாய ஸிக²ப்பத்தம் அனிச்சதம் த³ஸ்ஸேதி. ஸ்வாயம் ஹுத்வா அபா⁴வாகாரோ இதராஸுபி வேத³னாஸு லப்³ப⁴தேவ, அதி⁴கோ ச பன த்³வின்னம் து³க்க²ஸபா⁴வோ. து³க்க²தாவஸேன புரிமானம் வேத³னானம் த³ட்ட²ப்³ப³தாய த³ஸ்ஸிதத்தா பச்சி²மாய வேத³னாய ஏவம் த³ட்ட²ப்³ப³தா த³ஸ்ஸிதா. அத்³தா³தி ஞாணக³தியா ஸச்சி²கத்வா அத³க்கி². ஞாணக³மனஞ்ஹேதம், யதி³த³ம் து³க்க²தோ த³ஸ்ஸனம். ஸந்தஸபா⁴வம் ஸுக²து³க்க²தோ உபஸந்தரூபத்தா.

த³ட்ட²ப்³ப³ஸுத்தவண்ணனா நிட்டி²தா.

6. ஸல்லஸுத்தவண்ணனா

254. த்³வீஸு ஜனேஸூதி ஸுதவந்தஅஸ்ஸுதவந்தேஸு த்³வீஸு ஜனேஸு. அனுக³தவேத⁴ந்தி புப்³பே³ பவத்தவேத⁴ஸ்ஸ அனுக³தவேத⁴ம். ப³லவதரா தி³கு³ணா விய ஹுத்வா த³ள்ஹதரபவத்தியா. ஏவமேவாதி யதா² வித்³த⁴ஸ்ஸ புரிஸஸ்ஸ அனுவேத⁴னா ப³லவதரா, ஏவமேவ. ஸமாதி⁴மக்³க³ப²லானி நிஸ்ஸரணம் விக்க²ம்ப⁴னஸமுச்சே²த³படிப்பஸ்ஸத்³தி⁴வஸேன. ஸமாதி⁴ஸீஸேன ஹேத்த² ஜா²னஞ்ச க³ஹிதம். ஸோ ந ஜானாதி அனதி⁴க³தத்தா. நிஸ்ஸரணந்தி ஜானாதி அனிஸ்ஸரணமேவ. தாஸம் ஸமதி⁴க³தானம் ஸுக²து³க்க²வேத³னானம். ந விப்பயுத்தோ அப்பஹீனகிலேஸத்தா. ஸங்கா²தத⁴ம்மஸ்ஸாதி ஸங்கா²ய பஞ்ஞாய பரிஞ்ஞாதசதுக்க²ந்த⁴ஸ்ஸ. தேனாஹ ‘‘துலிதத⁴ம்மஸ்ஸா’’தி. இமஸ்மிம்பி ஸுத்தே புரிமஸுத்தே விய ஆரம்மணானுஸயோவ கதி²தோ, ஸோ பன தத்த² வுத்தனயேனேவ வேதி³தப்³போ³. அனுரோத⁴விரோத⁴பஹானஸ்ஸ வுத்தத்தா கீ²ணாஸவோ து⁴ரம். அனாகா³மீபி வட்டதி, தஸ்ஸ விரோத⁴ப்பஹானம் லப்³ப⁴தி.

ஸல்லஸுத்தவண்ணனா நிட்டி²தா.

7. பட²மகே³லஞ்ஞஸுத்தவண்ணனா

255. ஸத்³த³ஹித்வா கி³லானே உபட்டா²தப்³பே³ மஞ்ஞிஸ்ஸந்தீதி யோஜனா. தத்தா²தி தஸ்மிம் டா²னே. கம்மட்டா²னானுயோகோ³ ஸப்பாயோ யேஸம் தே கம்மட்டா²னஸப்பாயா, ஸதிபட்டா²னரதாதி அத்தோ². அனிச்சதம் அனுபஸ்ஸந்தோதி காயம் படிச்ச உப்பன்னாய வேத³னாய ச அனிச்சதம் அனுபஸ்ஸந்தோ. வயம் அனுபஸ்ஸந்தோதிஆதீ³ஸுபி ஏஸேவ நயோ. வயந்தி பன தாய ஏவ க²யஸங்கா²தம். விராக³ந்தி விரஜ்ஜனம். படினிஸ்ஸக்³க³ந்தி பரிச்சாக³படினிஸ்ஸக்³க³ம், பக்க²ந்த³னபடினிஸ்ஸக்³க³ம்பி வா.

ஆக³மனீயபடிபதா³தி அரியமக்³க³ஸ்ஸ ஆக³மனட்டா²னியா புப்³ப³பா⁴க³படிபதா³. புப்³ப³பா⁴கா³யேவ ந லோகுத்தரா. ஸம்பஜஞ்ஞம் புப்³ப³பா⁴கி³யமேவ. திஸ்ஸோ அனுபஸ்ஸனா புப்³ப³பா⁴கா³யேவ விபஸ்ஸனாபரியாபன்னத்தா. மிஸ்ஸகாதி லோகியலோகுத்தரமிஸ்ஸகா. பா⁴வனாகாலோ த³ஸ்ஸிதோ ‘‘நிரோதா⁴னுபஸ்ஸினோ விஹரதோ, படினிஸ்ஸக்³கா³னுபஸ்ஸினோ விஹரதோ ராகா³னுஸயோ பஹீயதீ’’தி வுத்தத்தா.

பட²மகே³லஞ்ஞஸுத்தவண்ணனா நிட்டி²தா.

8-9. து³தியகே³லஞ்ஞஸுத்தாதி³வண்ணனா

256-257. ப²ஸ்ஸம் படிச்சாதி ஏத்த² ப²ஸ்ஸஸீஸேன ப²ஸ்ஸாயதனானம் க³ஹணம். ந ஹி ப²ஸ்ஸாயதனேஹி வினா ப²ஸ்ஸஸ்ஸ ஸம்ப⁴வோ. தேனாஹ ‘‘காயோவ ஹி ஏத்த² ப²ஸ்ஸோதி வுத்தோ’’தி, ப²ஸ்ஸஸீஸேன வுத்தோதி அதி⁴ப்பாயோ. நவமம் உத்தானமேவ ஹேட்டா² வுத்தனயத்தா.

து³தியகே³லஞ்ஞஸுத்தாதி³வண்ணனா நிட்டி²தா.

10. ப²ஸ்ஸமூலகஸுத்தவண்ணனா

258. ஸுக²வேத³னாய ஹிதம் ஸுக²வேத³னியம். ஸோ பனேஸ ஹிதபா⁴வோ பச்சயபா⁴வேனாதி ஆஹ ‘‘ஸுக²வேத³னாய பச்சயபூ⁴த’’ந்தி. இமஸ்மிம்பி ஸுத்தத்³வயேதி இமஸ்மிம் நவமே த³ஸமே ச ஸுத்தேபி. ஸம்மஸனசாரவேத³னாதி ஸம்மஸனீயவேத³னா ஏவ கதி²தா, ந லோகுத்தராதி அதி⁴ப்பாயோ.

ப²ஸ்ஸமூலகஸுத்தவண்ணனா நிட்டி²தா.

ஸகா³தா²வக்³க³வண்ணனா நிட்டி²தா.

2. ரஹோக³தவக்³கோ³

1. ரஹோக³தஸுத்தவண்ணனா

259. யம்கிஞ்சி வேத³யிதந்தி ‘‘ஸுக²ம் து³க்க²ம் அது³க்க²மஸுக²’’ந்தி வுத்தம் வேத³யிதம் து³க்க²ஸ்மிம் அந்தோக³த⁴ம், து³க்க²ந்தி வத்தப்³ப³தம் லப⁴தி பரியாயேனாதி அத்தோ². தேனாஹ ‘‘தம் ஸப்³ப³ம் து³க்க²ந்தி அத்தோ²’’தி. யா ஏஸாதிஆதீ³ஸு யோ ஸங்கா²ரானம் அனிச்சதாஸங்கா²தோ ஹுத்வா அபா⁴வாகாரோ, யா க²யஸபா⁴வதா வினஸ்ஸனஸபா⁴வதா ஜராய மரணேன சாதி த்³விதா⁴ விபரிணாமனஸபா⁴வதா, ஏதம் ஸந்தா⁴ய உத்³தி³ஸ்ஸ ஸப்³ப³ம் வேத³யிதம் து³க்க²ந்தி மயா வுத்தந்தி அயம் ஸங்கே²பத்தோ². ஸாதி ஸங்கா²ரானம் அனிச்சதா. வேத³னானம்பி அனிச்சதா ஏவ ஸங்கா²ரஸபா⁴வத்தா. தாஸம் அனிச்சதா ச நாம மரணம் ப⁴ங்கோ³தி கத்வா ததோ உத்தரி து³க்க²ம் நாம நத்தீ²தி ஸப்³பா³ வேத³னா ‘‘து³க்கா²’’தி வுத்தா, யதா² ‘‘யத³னிச்சம் தம் து³க்க²’’ந்தி ச, ‘‘பஞ்சுபாதா³னக்க²ந்தா⁴ து³க்கா²’’தி ச வுத்தம். இத³ம் ஸுத்தபத³ம். சத்தாரோ ஆருப்பாதி சதஸ்ஸோ அரூபஸமாபத்தியோ. ஏத்தா²தி ச ஏதஸ்மிம் படிப்பஸ்ஸத்³தி⁴வாரே.

ரஹோக³தஸுத்தவண்ணனா நிட்டி²தா.

4. அகா³ரஸுத்தவண்ணனா

262. புரத்தி²மாதி விப⁴த்திலோபேன நித்³தே³ஸோ, நிஸ்ஸக்கே வா ஏதம் பச்சத்தவசனம். பட²மஜ்ஜா²னாதி³வஸேனாதி பட²மது³தியஜ்ஜா²னவஸேன. அனுஸ்ஸதிவஸேனாதி நித³ஸ்ஸனமத்தம் அஞ்ஞஸ்ஸபி உபசாரஜ்ஜா²னக்³க³ஹிதஸ்ஸ ஸவிதக்கசாரஸ்ஸ நிராமிஸஸ்ஸ ஸுக²ஸ்ஸ லப்³ப⁴னதோ. தஸ்ஸபி வா பட²மஜ்ஜா²னாதீ³தி ஏத்த² ஆதி³-ஸத்³தே³ன ஸங்க³ஹோ த³ட்ட²ப்³போ³. காமஹேது து³க்க²ப்பத்தானம் து³க்க²வேத³னா காமாமிஸேன ஸாமிஸா வேத³னா. அனுத்தரவிமோக்கா² நாம அரஹத்தப²லம். ‘‘குதா³ஸ்ஸு நாமாஹம் ததா³யதனம் உபஸம்பஜ்ஜ விஹரிஸ்ஸாமீ’’தி ஏவம் பிஹம் உபட்டா²பயதோ தஸ்மிம் அனிஜ்ஜ²மானே பிஹப்பச்சயா உப்பன்னதோ³மனஸ்ஸவேத³னா. நேக்க²ம்மனிஸ்ஸிதா உபேக்கா²வேத³னா நிராமிஸா அது³க்க²மஸுகா² நாம. ஸவிஸேஸம் பன த³ஸ்ஸேதும் ‘‘சதுத்த²ஜ்ஜா²னவஸேன உப்பன்னா அது³க்க²மஸுக²வேத³னா’’தி வுத்தம்.

அகா³ரஸுத்தவண்ணனா நிட்டி²தா.

5-8. பட²மஆனந்த³ஸுத்தாதி³வண்ணனா

263-266. ஹேட்டா² கதி²தனயானேவ, வேனேய்யஜ்ஜா²ஸயதோ பன தேஸம் தே³ஸனாதி த³ட்ட²ப்³ப³ம். ஏத்தா²தி ஏதேஸு சதூஸு ஸுத்தேஸு. புரிமானி த்³வே ‘‘பட²மம் ஜா²னம் ஸமாபன்னஸ்ஸ வாசா படிப்பஸ்ஸத்³தா⁴ ஹோதீ’’திஆதி³னா நயேன யாவ கீ²ணாஸவஸ்ஸ கிலேஸபடிப்பஸ்ஸத்³தி⁴, தாவ தே³ஸனாய பவத்தத்தா ‘‘பரிபுண்ணபஸ்ஸத்³தி⁴கானீ’’தி வுத்தானி. தாவ பரிபூரம் கத்வா அதே³ஸிதத்தா ‘‘பச்சி²மானி உபட்³ட⁴பஸ்ஸத்³தி⁴கானி, தே³ஸனாயா’’திஆதி³ வுத்தம்.

பட²மஆனந்த³ஸுத்தாதி³வண்ணனா நிட்டி²தா.

9-10. பஞ்சகங்க³ஸுத்தாதி³வண்ணனா

267-268. த³ண்ட³முக்³க³ரம் அக்³க³ஸோண்ட³முக்³க³ரம். காளஸுத்தபக்கி²பனம் காளஸுத்தனாளி. வாஸிஆதீ³னி பஞ்ச அங்கா³னி அஸ்ஸாதி பஞ்சகங்கோ³. வத்து²விஜ்ஜாய வுத்தவிதி⁴னா கத்தப்³ப³னிஸ்ஸயானி ட²பேதீதி த²பதி. பண்டி³தஉதா³யித்தே²ரோ, ந லாளுதா³யித்தே²ரோ. த்³வேபானந்தா³தி அட்ட²கதா²ய பது³த்³தா⁴ரோ கதோ – ‘‘த்³வேபி மயா ஆனந்தா³’’தி பன பாளியம். பஸாத³காயஸன்னிஸ்ஸிதா காயிகா, சேதோஸன்னிஸ்ஸிதா சேதஸிகா. ஆதி⁴பச்சட்டே²ன ஸுக²மேவ இந்த்³ரியந்தி ஸுகி²ந்த்³ரியம். உபவிசாரவஸேனாதி ரூபாதீ³னி உபேச்ச விசரணவஸேன. அதீதே ஆரம்மணே. பச்சுப்பன்னேதி அத்³தா⁴பச்சுப்பன்னே. ஏவம் அட்டா²தி⁴கம் ஸதம் அட்ட²ஸதம்.

பாடியேக்கோ அனுஸந்தீ⁴தி புச்சா²னுஸந்தி⁴ஆதீ³ஹி விஸும் தேஹி அஸம்மிஸ்ஸோ ஏகோ அனுஸந்தி⁴. ஏகாபி வேத³னா கதி²தா ‘‘தத்ர, பி⁴க்க²வே, ஸுதவா அரியஸாவகோ’’தி ஆஹரித்வா ‘‘ப²ஸ்ஸபச்சயா வேத³னா’’தி. யஸ்மா ப⁴க³வா சதுத்த²ஜ்ஜா²னுபேக்கா²வேத³னம் வத்வா – ‘‘அத்தா²னந்த³, ஏதஸ்மா ஸுகா² அஞ்ஞம் ஸுக²’’ந்திஆதி³ம் வத³ந்தோ த²பதினோ வாத³ம் உபத்த²ம்பே⁴தி நாம. தேன ஹி உபேக்கா²வேத³னா ‘‘ஸுக²’’ந்தேவ வுத்தா ஸந்தஸபா⁴வத்தா. அபி⁴க்கந்ததரந்தி அதிவிய கந்ததரம் மனோரமதரம். தேனாஹ ‘‘ஸுந்த³ரதர’’ந்தி. பணீததரந்தி பதா⁴னபா⁴வம் நீததாய உளாரதரம். தேனாஹ ‘‘அதப்பகதர’’ந்தி. ஸுக²ந்தி வுத்தா படிபக்க²ஸ்ஸ ஸுட்டு² கா²த³னேன, ஸுகரம் ஓகாஸதா³னமஸ்ஸாதி வா. நிரோதோ⁴ ஸுக²ம் நாம ஸப்³ப³ஸோ உத³யப்³ப³யாபா⁴வதோ. தேனாஹ ‘‘நித்³து³க்க²பா⁴வஸங்கா²தேன ஸுக²ட்டே²னா’’தி.

ஸுக²ஸ்மிம்யேவாதி ஸுக²மிச்சேவ பஞ்ஞபேதி. நிரோத⁴ஸமாபத்திம் ஸீஸம் கத்வாதி நிரோத⁴ஸமாபத்திதே³ஸனாய ஸீஸம் உத்தமம் கத்வா. தே³ஸனாய உத்³தே³ஸாதி⁴முத்தே உட்டா²பேத்வா வித்தா²ரிதத்தா ‘‘நேய்யபுக்³க³லஸ்ஸ வஸேனா’’தி வுத்தம். த³ஸமம் அனந்தரஸுத்தே வுத்தனயத்தா உத்தானத்த²மேவ.

பஞ்சகங்க³ஸுத்தாதி³வண்ணனா நிட்டி²தா.

ரஹோக³தவக்³க³வண்ணனா நிட்டி²தா.

3. அட்ட²ஸதபரியாயவக்³கோ³

1. ஸீவகஸுத்தவண்ணனா

269. சூளா பன அஸ்ஸ மஹதீ அத்தி² ஸவிஸேஸா, தஸ்மா ‘‘மோளியஸீவகோ’’தி வுச்சதி. ச²ன்னபரிப்³பா³ஜகோதி கம்ப³லாதி³னா கோபீனபடிச்சா²த³கபரிப்³பா³ஜகோ. பித்தபச்சயானீதி பித்தஹேதுகானி. ‘‘திஸ்ஸோ வேத³னா’’தி வத்வா தாஸம் ஸம்ப⁴வம் த³ஸ்ஸேதும் ‘‘கத²’’ந்திஆதி³ வுத்தம். குஸலவேத³னா உப்பஜ்ஜதி பித்தபச்சயா. பித்தபே⁴ஸஜ்ஜம் கரிஸ்ஸாமீதி பே⁴ஸஜ்ஜஸம்ப⁴ரணத்த²ஞ்சேவ தத³த்த²ம் ஆமிஸகிஞ்ஜக்க²ஸம்ப⁴ரணத்த²ஞ்ச பாணம் ஹனதீதி யோஜனா. மஜ்ஜ²த்தோ பே⁴ஸஜ்ஜகரணே உதா³ஸீனோ.

தஸ்மாதி யஸ்மா பித்தாதி³பச்சயஹேதுகந்தி அத்தனோ ச லோகஸ்ஸ ச பச்சக்க²ம் அதிதா⁴வந்தி யே ஸமணா வா ப்³ராஹ்மணா வா, தஸ்மா தேஸம் மிச்சா². பித்தாதீ³னம் திண்ணம்பி ஸமோதா⁴னஸன்னிபாதே ஜாதானி ஸன்னிபாதிகானி. புரிமஉதுனோ விஸதி³ஸோ உதுவிபரிணாமோதி ஆஹ ‘‘விஸபா⁴க³உதுதோ ஜாதானீ’’தி. அனுத³கோ த²த்³த⁴லூக²பூ⁴மிவிபா⁴கோ³ ஜங்க³லதே³ஸோ, வுத்தவிபரியாயேன அனுபதே³ஸோ வேதி³தப்³போ³. மலயம் ஹிமஸீதப³ஹுலோ, இதரோ உண்ஹப³ஹுலோ.

அத்தனோ பகதிசரியானம் விஸமம் காயஸ்ஸ பரிஹரணவஸேன, ஜாதானி பன அஸய்ஹஸஹனஅதே³ஸஅகாலசரணாதி³னா வேதி³தப்³பா³னீதி ஆஹ ‘‘மஹாபா⁴ரவஹனா’’திஆதி³. பரஸ்ஸ உபக்கமதோ நிப்³ப³த்தானி ஓபக்கமிகானீதி ஆஹ – ‘‘அயம் சோரோ வா’’திஆதி³. கேவலந்தி பா³ஹிரபச்சயம் அனபேக்கி²த்வா கேவலம் தேனேவ. தேனாஹ ‘‘கம்மவிபாகதோவ ஜாதானீ’’தி. ஸக்கா படிபா³ஹிதும் பதீகாரேன. லோகவோஹாரோ நாம கதி²தோ பித்தஸமுட்டா²னாதி³ஸமஞ்ஞாய லோகஸித்³த⁴த்தா. காமம் ஸரீரஸன்னிஸ்ஸிதா வேத³னா கம்மனிப்³ப³த்தாவ, தஸ்ஸா பன பச்சுப்பன்னபச்சயவஸேன ஏவமயம் லோகவோஹாரோதி வுத்தஞ்சேவ க³ஹேத்வா பரவாத³படிஸேதோ⁴ கதோதி த³ட்ட²ப்³ப³ம்.

ஸீவகஸுத்தவண்ணனா நிட்டி²தா.

2-10. அட்ட²ஸதஸுத்தாதி³வண்ணனா

270-278. வேத³னானம் அட்டா²தி⁴கம் ஸதம், தஸ்ஸ அட்ட²ஸதஸ்ஸ தப்³பா⁴வஸ்ஸ பரியாயோ காரணம் ஏத்த² அத்தீ²தி அட்ட²ஸதபரியாயோ, ஸுத்தம். தேனாஹ ‘‘அட்ட²ஸதஸ்ஸ காரணபூ⁴த’’ந்தி. த⁴ம்மகாரணந்தி பரியத்தித⁴ம்மபூ⁴தம் காரணம். காயிகாதி பஞ்சத்³வாரகாயிகா. தேனாஹ ‘‘காமாவசரேயேவ லப்³ப⁴ந்தீ’’தி, காமபூ⁴மிகாதி அத்தோ². அரூபாவசரே நத்தி², திபூ⁴மிகாதி அத்தோ². தேனாஹ – ‘‘அரூபே திகசதுக்கஜ்ஜா²னம் உப்பஜ்ஜதி, தஞ்ச கோ² லோகுத்தரம், ந லோகிய’’ந்தி. இதரா உபேக்கா²வேத³னா. உபவிசரந்தி உபேச்ச பஜ்ஜந்தீதி அத்தோ². தம்ஸம்பயுத்தானந்தி விசாரஸம்பயுத்தானம்.

படிலாப⁴தோதி படிலத்³த⁴பா⁴வதோ. ஸமனுபஸ்ஸதோதி பச்சவேக்க²தோ பஸ்ஸதோ. அதீதம் க²ணத்தயாதிக்கமேன அதிக்கந்தம், நிருத்³த⁴ப்பத்தியா நிருத்³த⁴ம், பகதிவிஜஹனேன விபரிணதம். ஸமனுஸ்ஸரதோதி சிந்தயதோ. கே³ஹஸ்ஸிதந்தி காமகு³ணனிஸ்ஸிதம். காமகு³ணா ஹி இத⁴ கே³ஹனிஸ்ஸிதத⁴ம்மேன கே³ஹபரியாயேன வுத்தா.

விபரிணாமவிராக³னிரோத⁴ந்தி விபரிணாமனம் விரஜ்ஜனலக்க²ணம் நிருஜ்ஜ²னஞ்ச விதி³த்வா. புப்³பே³தி அதீதே. ஏதரஹீதி இதா³னி வத்தமானா. ஸம்மப்பஞ்ஞாய பஸ்ஸதோதி விபஸ்ஸனாபஞ்ஞாய சேவ மக்³க³பஞ்ஞாய ச யாதா²வதோ பஸ்ஸதோ. உஸ்ஸுக்காபேதுந்தி விபஸ்ஸனம் பட்ட²பேத்வா மக்³க³படிவேத⁴ம் பாபேதும். நிப்³பா³னம் உத்³தி³ஸ்ஸ பவத்திதத்தா நேக்க²ம்மஸ்ஸிதஸோமனஸ்ஸானி நாம. லோகாமிஸபடிஸம்யுத்தானந்தி காமகு³ணனிஸ்ஸிதானம். ததா³யதனந்தி தம் ஆயதனம் தம் காரணம் அரஹத்தம். அனுத்தரேஸு விமோக்கே²ஸூதி அரியப²லத⁴ம்மேஸு. பிஹந்தி அதி⁴க³மிச்ச²ம்.

உபேக்கா²தி ஸோமனஸ்ஸரஹிதஅஞ்ஞாணுபேக்கா². பா³ல்யயோக³தோ பா³லஸ்ஸ, ததோ ஏவ மூள்ஹஸ்ஸ புது²ஜ்ஜனஸ்ஸ. கிலேஸோதீ⁴னம் மக்³கோ³தீ⁴ஹி அஜிதத்தா அனோதி⁴ஜினஸ்ஸ. ஸத்தமப⁴வாதி³தோ உத்³த⁴ம் பவத்தனவிபாகஸ்ஸ அஜிதத்தா அவிபாகஜினஸ்ஸ. அனேகாதீ³னவே வட்டே ஆதீ³னவஸ்ஸ அஜானனேன அனாதீ³னவத³ஸ்ஸாவினோ. படிபத்திபடிவேத⁴பா³ஹுஸச்சாபா⁴வேன அஸ்ஸுதவதோ புது²ஜ்ஜனஸ்ஸ. ரூபம் ஸா நாதிவத்ததி ந அதிக்கமதி ஞாணஸம்பயுத்தாபா⁴வதோ. ஸப்³ப³ஸங்கா³ஹகோதி ஸப்³ப³த⁴ம்மே ஸங்க³ண்ஹனகோ. ததியாதீ³னி யாவ த³ஸமா ஹேட்டா² வுத்தனயத்தா உத்தானத்தா²னேவ.

அட்ட²ஸதஸுத்தாதி³வண்ணனா நிட்டி²தா.

11. நிராமிஸஸுத்தவண்ணனா

279. ஆரம்மணதோ ஸம்பயோக³தோ ச கிலேஸாமிஸேன ஸாமிஸா. நிராமிஸாயாதி நிஸ்ஸக்கவசனம். நிராமிஸதராவாதி ஏகம்ஸவசனம் தஸ்ஸா ததா² நிஸ்ஸமேதப்³ப³தாய. ஸா ஹி பீதி ஸப்³ப³ஸோ ஸந்தகிலேஸாமிஸே ஸந்தானே பவத்தியா அச்சந்தஸபா⁴வத⁴ம்மாரம்மணவிஸயதாய ஸயம்பி ஸாதிஸயம் ஸந்தஸபா⁴வாகாரேன பவத்தியா நிராமிஸாயபி நிராமிஸதரா வுத்தா. தேனாஹ ‘‘நனு சா’’திஆதி³. இதா³னி தமத்த²ம் உபமாய ஸாதே⁴தும் ‘‘யதா² ஹீ’’திஆதி³மாஹ. அப்படிஹாரிகந்தி படிஹரணரஹிதம் அப்படிஹாரம், கேனசி அனாவடந்தி அத்தோ². ஸேஸவாரேஸூதி ஸுக²வாரஉபேக்கா²வாரேஸு.

விமோக்க²வாரோ பன ந அதிதி³ட்டோ² இதரேஹி விஸதி³ஸத்தா. தேனாஹ ‘‘விமோக்க²வாரே பனா’’திஆதி³. ரூபபடிஸம்யுத்தோதி பா⁴விதரூபபடிஸம்யுத்தோ. ஸாமிஸோ நாம யஸ்மா ஸாமிஸரூபபடிப³த்³த⁴வுத்தி சேவ ஸாமிஸரூபபடிபா⁴க³ஞ்ச, தஸ்மா ‘‘ரூபாமிஸ’’ந்தி வுச்சதி, தேன ரூபாமிஸேன ஸாமிஸோ நாம. அரூபாமிஸஸ்ஸ அபா⁴வதோ அரூபபடிஸம்யுத்தோ விமோக்கோ² நிராமிஸோ நாம.

நிராமிஸஸுத்தவண்ணனா நிட்டி²தா.

அட்ட²ஸதபரியாயவக்³க³வண்ணனா நிட்டி²தா.

வேத³னாஸம்யுத்தவண்ணனா நிட்டி²தா.