3. மாதுகா³மஸம்யுத்தம்

1. பட²மபேய்யாலவக்³கோ³

1-2. மாதுகா³மஸுத்தாதி³வண்ணனா

280-281. அகு³ணங்கே³ஹீதி அகு³ணகோட்டா²ஸேஹி. ரூபயதீதி ரூபம், ஸரீரரூபம். ஸரீரரூபம் பாஸம்ஸம் ஏதஸ்ஸ அத்தீ²தி ரூபவா, தப்படிக்கே²பேன ந ச ரூபவா, ஸம்பன்னரூபோ ந ஹோதீதி அத்தோ². ஞாதிகுலதோ அஞ்ஞதோ வா ஆக³தாய போ⁴க³ஸம்பதா³ய அபா⁴வேன ந போ⁴க³ஸம்பன்னோ. து³ஸ்ஸீலோதி நிஸ்ஸீலோ. நிஸ்ஸீலதாய ஏவ சஸ்ஸா புப்³பு³ட்டா²யிதாதி³ஆசாராபா⁴வோ வுத்தோ. ஆலஸியோதி ஆலஸியதாய யுத்தோ. பஜஞ்சஸ்ஸ ந லப⁴தீதி பஜாபா⁴வஸீஸேன தஸ்ஸா பரிவாரஹானி வுத்தா. பரிவத்தேதப்³ப³ந்தி புரிஸவஸேன பரிவத்தேதப்³ப³ம்.

மாதுகா³மஸுத்தாதி³வண்ணனா நிட்டி²தா.

3. ஆவேணிகது³க்க²ஸுத்தவண்ணனா

282. ஆவேணிதப்³ப³தோ மரியாதா³ய விஸும் அஸாதா⁴ரணதோ பஸ்ஸிதப்³ப³தோ ஆவேணிகானி. படிபச்சேகே புக்³க³லே நியுத்தானீதி பாடிபுக்³க³லிகானி. பரிசாரிகபா⁴வந்தி உபட்டா²யிகபா⁴வம்.

ஆவேணிகது³க்க²ஸுத்தவண்ணனா நிட்டி²தா.

4. தீஹித⁴ம்மேஹிஸுத்தாதி³வண்ணனா

283-303. மச்சே²ரமலபரியுட்டி²தேனாதி மச்ச²ரியமலேன அபி⁴பூ⁴தேன. தேனாதி கஸ்ஸசி கிஞ்சி அதா³னேன ச. ஏதம் ‘‘மச்சே²ரமலபரியுட்டி²தேனா’’திஆதி³ வுத்தம். விலோகேந்தோ விசரதி இஸ்ஸாபகதசித்ததாய. பஞ்சமாதீ³னி யாவ ஏகாத³ஸமா உத்தானத்தா²னேவ.

தீஹித⁴ம்மேஹிஸுத்தாதி³வண்ணனா நிட்டி²தா.

3. ப³லவக்³கோ³

1. விஸாரத³ஸுத்தவண்ணனா

304. ரூபஸம்பத்தி ரூபப³லம் தம்ஸமங்கி³னோ உபத்த²ம்ப⁴கபா⁴வதோ. ஏஸ நயோ ஸேஸேஸுபி. ப³லானி ஹி ஸத்தானம் வுட்³டி⁴யா உபத்த²ம்ப⁴கபச்சயோ ஹோதி, யதா² தம் ஆஹாரோ. தேனாஹ – ‘‘இமானீ’’திஆதி³.

விஸாரத³ஸுத்தவண்ணனா நிட்டி²தா.

2-10. பஸய்ஹஸுத்தாதி³வண்ணனா

305-313. அபி⁴ப⁴வித்வா ஸப்³ப³ம் அந்தோஜனம் ஸாமிகஞ்ச. நாஸேந்தீதி நாஸனம் அத³ஸ்ஸனம் நேந்தி நீஹரந்தீதி அத்தோ².

பஸய்ஹஸுத்தாதி³வண்ணனா நிட்டி²தா.

மாதுகா³மஸம்யுத்தவண்ணனா நிட்டி²தா.