4. ஜம்பு³கா²த³கஸம்யுத்தம்

1. நிப்³பா³னபஞ்ஹஸுத்தவண்ணனா

314. நிப்³பா³னம் ஆக³ம்மாதி ஏத்த² ஆக³ம்மாதி ஸப்³ப³ஸங்கா²ரேஹி நிப்³பி³ன்னஸ்ஸ விஸங்கா²ரனின்னஸ்ஸ கோ³த்ரபு⁴னா விவட்டிதமானஸஸ்ஸ மக்³கே³ன ஸச்சி²கரணேனாதி அத்தோ². ஸச்சி²கிரியமானஞ்ஹி தம் அதி⁴க³ந்த்வா ஆரம்மணபச்சயபூ⁴தஞ்ச படிச்ச அதி⁴பதிபச்சயபூ⁴தே ச தஸ்மிம் பரமஸ்ஸாஸபா⁴வேன விமுத்தஸங்கா²ரஸ்ஸ பரமக³திபா⁴வேன ச பதிட்டா²னபூ⁴தே பதிட்டா²ய க²யஸங்கா²தோ மக்³கோ³ ராகா³தி³கே கே²பேதீதி தம்ஸச்சி²கரணாபா⁴வே ராகா³தீ³னம் அனுப்பத்தினிரோத⁴க³மனாபா⁴வதோ ‘‘நிப்³பா³னம் ஆக³ம்ம ராகோ³ கீ²யதீ’’தி வுத்தம்.

இமினாவ ஸுத்தேனாதி இமினாவ ஜம்பு³கா²த³கஸுத்தேன. கிலேஸக்க²யமத்தம் நிப்³பா³னந்தி வதே³ய்ய ‘‘ராக³க்க²யோ’’திஆதி³னா ஸுத்தே ஆக³தத்தா. ‘‘கிலேஸக்க²யமத்த’’ந்தி அவிஸேஸேன வுத்தத்தா ஆஹ ‘‘கஸ்ஸா’’திஆதி³. அத்³தா⁴ அத்தனோதி வக்க²தி ‘‘பரஸ்ஸ கிலேஸக்க²யேன பரஸ்ஸ நிப்³பா³னஸம்பத்தி ந யுத்தா’’தி. நிப்³பா³னாரம்மணகரணேன கோ³த்ரபு⁴க்க²ணே கிலேஸக்க²யப்பத்திதா ச ஆபன்னாதி ஆஹ – ‘‘கிம் பன தேஸு அகீ²ணேஸுயேவா’’திஆதி³. நனு ஆரம்மணகரணமத்தேன கிலேஸக்க²யோ அனுப்பத்தோதி ந ஸக்கா வத்தும். சித்தஞ்ஹி அதீதானாக³தாதி³ஸப்³ப³ம் ஆலம்ப³னம் கரோதி, ந நிப்ப²ன்னமேவாதி. கோ³த்ரபூ⁴பி மக்³கே³ன யா கிலேஸானம் அனுப்பத்தித⁴ம்மதா காதப்³பா³, தம் ஆரப்³ப⁴ பவத்திஸ்ஸதீதி? ந, அப்பத்தனிப்³பா³னஸ்ஸ நிப்³பா³னாரம்மணஞாணாபா⁴வதோ. ந ஹி அஞ்ஞே த⁴ம்மா விய நிப்³பா³னம், தம் பன அதிக³ம்பீ⁴ரத்தா அப்பத்தேன ஆலம்பி³தும் ந ஸக்கா, தஸ்மா தேன கோ³த்ரபு⁴னா பத்தப்³பே³ன திகாலிகஸபா⁴வாதிக்கந்தக³ம்பீ⁴ரபா⁴வேன ப⁴விதப்³ப³ம், கிலேஸக்க²யமத்ததம் வா இச்ச²தோ கோ³த்ரபு⁴தோ புரேதரம் நிப்ப²ன்னேன கிலேஸக்க²யேன ப⁴விதப்³ப³ம். அப்பத்தகிலேஸக்க²யாரம்மணகரணே ஹி ஸதி கோ³த்ரபு⁴தோ புரேதரசித்தானிபி ஆலம்பே³ய்யுந்தி.

தஸ்மாதிஆதி³ வுத்தஸ்ஸேவ அத்த²ஸ்ஸ நிக³மனம். தம் பனேதம் நிப்³பா³னம். ரூபினோ த⁴ம்மா அரூபினோ த⁴ம்மாதிஆதீ³ஸூதி ஆதி³ஸத்³தே³ன லோகுத்தரஅனாஸவாதீ³னம் ஸங்க³ஹோ த³ட்ட²ப்³போ³. அரூபத⁴ம்மாதி³பா⁴வக்³க³ஹணேன சஸ்ஸ பரினிப்ப²ன்னதா தீ³பிதா. தேனாஹ ‘‘ந கிலேஸக்க²யமத்தமேவா’’தி. கிலேஸக்க²யமத்ததாய ஹி ஸதி நிப்³பா³னஸ்ஸ ப³ஹுதா ஆபஜ்ஜதி ‘‘யத்தகா கிலேஸா கீ²யந்தி, தத்தகானி நிப்³பா³னானீ’’தி. அபா⁴வஸ்ஸபா⁴வதோ க³ம்பீ⁴ராதி³பா⁴வோ அஸங்க²தாதி³பா⁴வோ ச ந ஸியா, வுத்தோ ச ஸோ நிப்³பா³னஸ்ஸ, தஸ்மாஸ்ஸ பச்சேதப்³போ³ பரினிப்ப²ன்னபா⁴வோ. யஸ்மா ச ஸம்முதிஸச்சாரம்மணம் ஸங்க²தத⁴ம்மாரம்மணம் வா ஸமுச்சே²த³வஸேன கிலேஸே பஜஹிதும் ந ஸக்கோதி, யதோ மஹக்³க³தஞாணம் விபஸ்ஸனாஞாணம் வா கிலேஸவிக்க²ம்ப⁴னவஸேன தத³ங்க³வஸேன வா பஜஹதி, தஸ்மா அரியமக்³க³ஞாணஸ்ஸ ஸம்முதிஸச்சஸங்க²தத⁴ம்மாரம்மணேஹி விபரீதஸபா⁴வேன ஆரம்மணேன ப⁴விதப்³ப³ம். ததா² ஹி தம் ஸமுச்சே²த³வஸேன கிலேஸே பஜஹீதி ஏவம் பரினிப்ப²ன்னாஸங்க²தஸபா⁴வம் நிப்³பா³னந்தி நிட்ட²மேத்த² க³ந்தப்³ப³ந்தி.

நிப்³பா³னபஞ்ஹஸுத்தவண்ணனா நிட்டி²தா.

3-15. த⁴ம்மவாதீ³பஞ்ஹஸுத்தாதி³வண்ணனா

316-328. பஹாய க³தத்தாதி அரியமக்³கே³ன ஜஹித்வா ஞாணக³மனேன க³தத்தா. ஸுட்டு² க³தாதி ஸம்மா க³தா படிபன்னாதி ஸுக³தா. பரிஜானனத்த²ந்தி தீஹி பரிஞ்ஞாஹி பரிஜானனத்த²ம். து³க்க²ஸங்கா²தோதி ‘‘து³க்க²’’ந்தி ஸங்கா²தப்³போ³ விதி³தப்³போ³ ச து³க்க²ஸபா⁴வோ த⁴ம்மோ து³க்க²து³க்க²தா. யஸ்மா து³க்க²வேத³னாவினிமுத்தஸங்க²தத⁴ம்மே ஸுக²வேத³னாய ச யதா² இத⁴ ஸங்கா²ரது³க்க²தா விபரிணாமது³க்க²தாதி து³க்க²பரியாயோ நிருப்பதேவ, தஸ்மா து³க்க²ஸபா⁴வோ த⁴ம்மோ ஏகேன து³க்க²ஸத்³தே³ன விஸேஸேத்வா வுத்தோ ‘‘து³க்க²து³க்க²தா’’தி. ஸேஸபத³த்³வயேதி ஸங்கா²ரது³க்க²தா விபரிணாமது³க்க²தாதி ஏதஸ்மிம் பத³த்³வயே. ஸங்கா²ரபா⁴வேன து³க்க²ஸபா⁴வோ ஸங்கா²ரது³க்க²தா. ஸுக²ஸ்ஸ விபரிணாமனேன து³க்க²ஸபா⁴வோ விபரிணாமது³க்க²தா.

த⁴ம்மவாதீ³பஞ்ஹஸுத்தாதி³வண்ணனா நிட்டி²தா.

16. து³க்கரபஞ்ஹஸுத்தவண்ணனா

329. பப்³ப³ஜ்ஜாயாதி பப்³ப³ஜிதபடிபத்தியம். த⁴ம்மானுத⁴ம்மப்படிபன்னோ பி⁴க்கூ²தி த⁴ம்மானுத⁴ம்மம் படிபஜ்ஜமானோ பி⁴க்கு². பாதந்தி பாதோ. நசிரஸ்ஸந்தி கி²ப்பமேவ. தேனாஹ ‘‘லஹுயேவா’’தி.

து³க்கரபஞ்ஹஸுத்தவண்ணனா நிட்டி²தா.

ஜம்பு³கா²த³கஸம்யுத்தவண்ணனா நிட்டி²தா.