2. மாலுக்யபுத்தஸுத்தவண்ணனா

95. அபஸாதே³தீதி தஜ்ஜேதி. உஸ்ஸாதே³தீதி உக்கம்ஸேதி. அயம் கிர தே²ரோ மாலுக்யபுத்தோ. பமஜ்ஜித்வாதி யோனிஸோமனஸிகாரஸ்ஸ அனனுயுஜ்ஜனேன பமஜ்ஜித்வா.

யத்ராதி பச்சத்தம் வசனாலங்காரே. நாமாதி அஸம்பா⁴வனே அபஸாத³னபக்கே², உஸ்ஸாத³னபக்கே² பன ஸம்பா⁴வனே. கிம் ஜாதந்தி கிம் தேன மஹல்லகபா⁴வேன ஜாதந்தி மஹல்லகபா⁴வம் திணாயபி அமஞ்ஞமானோ வத³தி. தேனாஹ ‘‘யதி³…பே… அனுக்³க³ண்ஹந்தோ’’தி. அனுக்³க³ண்ஹந்தோதி அசிந்தேந்தோ. மாதி³ஸானம் ப⁴க³வதோ ஓவாதோ³ உபகாராவஹோதி ஏதரஹி ஓவாத³ஞ்ச பஸம்ஸந்தோ.

‘‘அதி³ட்டா² அதி³ட்ட²புப்³பா³’’திஆதி³னா பரிகப்பவஸேன வுத்தனித³ஸ்ஸனம் ‘‘யதா² ஏதேஸு ச²ந்தா³த³யோ ந ஹோந்தி, ஏவமிதரேஸுபி பரிஞ்ஞாதேஸூ’’தி நயபடிபஜ்ஜனத்த²ம், தேஸம்பி இமேஹி ஸமானேதப்³ப³த்தா. தேன வுத்தம் ‘‘ஸுபினகூபமா காமா’’தி (ம. நி. 1.234; 2.46; பாசி. 417; சூளவ. 65).

சக்கு²விஞ்ஞாணேன தி³ட்டே² தி³ட்ட²மத்தந்தி சக்கு²விஞ்ஞாணஸ்ஸ ரூபாயதனம் யத்தகோ க³ஹணாகாரோ, தத்தகம். கித்தகம் பமாணந்தி அத்தஸம்வேதி³யம் பரஸ்ஸ ந தி³ஸிதப்³ப³ம், கப்பனாமத்தம் ரூபம். தேனாஹ ‘‘சக்கு²விஞ்ஞாணம் ஹீ’’திஆதி³. ரூபேதி ரூபாயதனே. ரூபமத்தமேவாதி நீலாதி³பே⁴த³ம் ரூபாயதனமத்தம், ந நீலாதி³. விஸேஸனிவத்தனத்தோ² ஹி அயம் மத்த-ஸத்³தோ³. யதி³ ஏவம், ஏவ-காரோ கிமத்தி²யோ? சக்கு²விஞ்ஞாணஞ்ஹி ரூபாயதனே லப்³ப⁴மானம்பி நீலாதி³விஸேஸம் ‘‘இத³ம் நீலம் நாம, இத³ம் பீதம் நாமா’’தி ந க³ண்ஹாதி. குதோ நிச்சானிச்சாதி³ஸபா⁴வத்த²ந்தி ஸம்ஹிதஸ்ஸபி நிவத்தனத்த²ம் ஏவகாரக்³க³ஹணம். தேனாஹ ‘‘ந நிச்சாதி³ஸபா⁴வ’’ந்தி. ஸேஸவிஞ்ஞாணேஹிபீதி ஜவனவிஞ்ஞாணேஹிபி.

தி³ட்ட²ம் நாம சக்கு²விஞ்ஞாணம் ரூபாயதனஸ்ஸ த³ஸ்ஸனந்தி கத்வா. தேனாஹ ‘‘ரூபே ரூபவிஜானன’’ந்தி. சக்கு²விஞ்ஞாணமத்தமேவாதி யத்தகம் சக்கு²விஞ்ஞாணம் ரூபாயதனே க³ஹணமத்தம், தம்மத்தமேவ மே ஸப்³ப³ம் சித்தம் ப⁴விஸ்ஸதீதி அத்தோ². ‘‘ராகா³தி³ரஹேனா’’தி வா பாடோ². தி³ட்ட²ம் நாம பத³த்த²தோ சக்கு²விஞ்ஞாணேன தி³ட்ட²ம் ரூபம். தத்தே²வாதி சக்கு²விஞ்ஞாணேன தி³ட்ட²மத்தே ரூபே. சித்தத்தயம் தி³ட்ட²மத்தம் நாம சக்கு²விஞ்ஞாணம் விய ராகா³தி³விரஹேன பவத்தனதோ. தேனாஹ ‘‘யதா² த’’ந்தி ஆதி³.

மனோத்³வாராவஜ்ஜனேன விஞ்ஞாதாரம்மணம் விஞ்ஞாதந்தி அதி⁴ப்பேதம் ராகா³தி³விரஹேன விஞ்ஞேய்யதோ. தேனாஹ ‘‘யதா² ஆவஜ்ஜனேனா’’திஆதி³.

ததா³தி தஸ்மிம் காலே, ந ததோ பட்டா²யாதி அயமேத்த² அத்தோ²தி த³ஸ்ஸேதி. ‘‘தி³ட்ட²மத்த’’ந்திஆதி³னா யேஸம் ராகா³தீ³னம் நிவத்தனம் அதி⁴ப்பேதம், தே ‘‘தேனா’’தி ஏத்த² த-ஸத்³தே³ன பச்சாமஸீயந்தீதி ‘‘தேன ராகே³ன வா ரத்தோ’’திஆதி³ வுத்தம். தத்தா²தி விஸயே பு⁴ம்மம், விஸயபா⁴வோ ச விஸயினா ஸம்ப³ந்த⁴வஸேன இச்சி²தப்³போ³தி வுத்தம் ‘‘படிப³த்³தோ⁴’’திஆதி³.

ஸதீதி ரூபஸ்ஸ யதா²ஸபா⁴வஸல்லக்க²ணா ஸதி முட்டா² பியனிமித்தமனஸிகாரேன அனுப்பஜ்ஜனதோ ந தி³ஸ்ஸதி நப்பவத்ததி. அஜ்ஜோ²ஸாதி அஜ்ஜோ²ஸாய. கி³லித்வா பரினிட்ட²பேத்வா அத்தனியகரணேன.

அபி⁴ஜ்ஜா² ச விஹேஸா சாதி கரணத்தே² பச்சத்தவசனந்தி ஆஹ – ‘‘அபி⁴ஜ்ஜா²ய ச விஹேஸாய சா’’தி. அத்த²வஸேன விப⁴த்திபரிணாமோதி ஆஹ – ‘‘அபி⁴ஜ்ஜா²விஹேஸாஹீ’’தி. ஆசினந்தஸ்ஸாதி வட்³டே⁴ந்தஸ்ஸ. படிஸ்ஸதோதி பதிஸ்ஸதோ ஸப்³ப³த்த² ஸதியா யுத்தோ. ஸேவதோ சாபீதி ஏத்த² ச-ஸத்³தோ³ அபி-ஸத்³தோ³ ச நிபாதமத்தந்தி ‘‘ஸேவந்தஸ்ஸ’’இச்சேவ அத்தோ² வுத்தோ.

மாலுக்யபுத்தஸுத்தவண்ணனா நிட்டி²தா.