3. பரிஹானஸுத்தவண்ணனா

96. பரிஹானஸபா⁴வந்தி அனவஜ்ஜத⁴ம்மேஹி பரிஹாயனஸபா⁴வம். அபி⁴ப⁴விதானீதி அபி⁴பூ⁴தானி நிப்³பி³ஸேவனபா⁴வாகாரேன. ஸரஸங்கப்பாதி தஸ்மிம் தஸ்மிம் விஸயே அனவட்டி²தபா⁴வேன ஸங்கப்பா. ஸம்யோஜனியாதி ஸம்யோஜேதப்³பா³. ஸம்யோஜனானஞ்ஹி புனப்புனம் உப்பத்தியா ஓகாஸம் தே³ந்தோ கிலேஸஜாதம் அதி⁴வாஸேதி நாம. கிலேஸோ ஏவ கிலேஸஜாதம். ஆரம்மணம் பன சித்தே கரோந்தோ அதி⁴வாஸேதி நாம. ச²ந்த³ராக³ப்பஹானேன ந பஜஹதி ஆரம்மணம், கிலேஸம் பன அனுப்பத்தித⁴ம்மதாபாத³னேன ஏவ. அபி⁴ப⁴விதம் ஆயதனந்தி கதி²தம் அதி⁴வாஸனாதி³னா. ‘‘கத²ஞ்ச, பி⁴க்க²வே, பரிஹானத⁴ம்மோ ஹோதீ’’தி த⁴ம்மம் புச்சி²த்வா தம் விப⁴ஜந்தேன ப⁴க³வதா ‘‘தஞ்சே பி⁴க்கு² அதி⁴வாஸேதீ’’திஆதி³னா புக்³க³லேன புக்³க³லாதி⁴ட்டா²னேன த⁴ம்மோ த³ஸ்ஸிதோ.

பரிஹானஸுத்தவண்ணனா நிட்டி²தா.