1. அத³ந்தஅகு³த்தஸுத்தவண்ணனா

94. அத³மிதாதி த³மம் நிப்³பி³ஸேவனபா⁴வம் அனீதா. அகோ³பிதாதி ஸதிஸங்கா²தாய வதியா ந ரக்கி²தா. அபிஹிதாதி ஸதிகவாடேன ந பிஹிதா. சதூஹிபி பதே³ஹி இந்த்³ரியானம் அனாவரணமேவாஹ. அதி⁴கம் வஹந்தீதி அதி⁴வாஹா, து³க்க²ஸ்ஸ அதி⁴வாஹா து³க்கா²தி⁴வாஹா. நிரயேஸு உப்பஜ்ஜனகம் நேரயிகம். ஆதி³-ஸத்³தே³ன ஸேஸபாளிம் ஸங்க³ண்ஹாதி.

ஸளேவாதி ச²-காரஸ்ஸ ஸ-காரோ, ள-காரோ பத³ஸந்தி⁴கரோ. யத்தா²தி நிமித்தத்தே² பு⁴ம்மம். அனவஸ்ஸுதா அதிந்தாதி ராகே³ன அதேமிதா.

அஸ்ஸாதி³தந்தி அஸ்ஸாத³ம் இதம் உபக³தம். தேனாஹ ‘‘அஸ்ஸாத³வந்த’’ந்தி. ஸுக²து³க்க²ந்தி இட்டா²னிட்ட²ம். அன்வயதீதி அன்வயோ, ஹேது. ப²ஸ்ஸோதி அன்வயோ ஏதஸ்ஸாதி ப²ஸ்ஸன்வயந்தி ஆஹ – ‘‘ப²ஸ்ஸஹேதுக’’ந்தி. ‘‘அவிருத்³த⁴’’இதி விப⁴த்திலோபேன நித்³தே³ஸோ.

பபஞ்சஸஞ்ஞாதி தண்ஹாதி³ஸமதூ⁴பஸம்ஹதஸஞ்ஞா. தேனாஹ ‘‘கிலேஸஸஞ்ஞாய பபஞ்சஸஞ்ஞா நாம ஹுத்வா’’தி. பபஞ்சஸஞ்ஞா ஏதேஸம் அத்தீ²தி பபஞ்சஸஞ்ஞா, இதரீதரா நரா. பபஞ்சயந்தாதி ஸம்ஸாரே பபஞ்சம் சிராயனம் கரோந்தா. ஸஞ்ஞினோதி கே³ஹஸ்ஸிதஸஞ்ஞாய ஸஞ்ஞாவந்தோ. மனோமயம் விதக்கந்தி கேவலம் மனஸா ஸம்பா⁴விதம் மிச்சா²விதக்கம். இரீயதீதி இரியம் படிபத்திம் இரீயதி படிபஜ்ஜதி.

ஸுட்டு² பா⁴விதோதி ஸுட்டு²பா⁴வம் ஸுபா⁴வனம் இதோ பா⁴விதபா⁴விதோ. பு²ட்ட²ஸ்ஸ சித்தந்தி தேன யதா²வுத்தப²ஸ்ஸேன பு²ட்ட²ம் அஸ்ஸ சித்தம். ந விகம்பதே க்வசீதி கிஸ்மிஞ்சி இட்டா²னிட்டா²ரம்மணே ந கம்பதி. பாரகா³தி பாரகா³மினோ ப⁴வத².

அத³ந்தஅகு³த்தஸுத்தவண்ணனா நிட்டி²தா.