9. தே²ரவக்³கோ³

1. ஆனந்த³ஸுத்தவண்ணனா

83. படிச்சாதி நிஸ்ஸயம் கத்வா. ‘‘ஏஸோஹமஸ்மீ’’தி தி³ட்டி²க்³கா³ஹோ, ‘‘ஸேய்யோஹமஸ்மீ’’தி மானக்³கா³ஹோ ச தண்ஹாவஸேனேவ ஹோந்தீதி தண்ஹாபி ததா²பவத்தியா பச்சயபூ⁴தா ததா²பவத்தி ஏவாதி வுத்தம் ‘‘அஸ்மீதி ஏவம் பவத்தம் தண்ஹாமானதி³ட்டி²பபஞ்சத்தயம் ஹோதீ’’தி. த³ஹரஸத்³தோ³ பா³லதா³ரகேபி பவத்ததீதி ததோ விஸேஸனத்த²ம் ‘‘யுவா’’தி வுத்தம். யுவாபி ஏகோ அமண்ட³னஸீலோதி ததோ விஸேஸனத்த²ம் ‘‘மண்ட³னகஜாதிகோ’’தி வுத்தம். தேன முக²னிமித்தபச்சவேக்க²ணஸ்ஸ ஸப்³பா⁴வம் த³ஸ்ஸேதி. தந்தி ஆதா³ஸமண்ட³லம் ஓலோகயதோ. பரம்முக²ம் ஹுத்வா பஞ்ஞாயேய்யாதி யதி³ புரத்தி²மதி³ஸாபி⁴முக²ம் ஹுத்வா டி²தம், முக²னிமித்தம்பி புரத்தி²மதி³ஸாபி⁴முக²மேவ ஹுத்வா பஞ்ஞாயேய்யாதி அத்தோ². யதி³பி பரஸ்ஸ ஸதி³ஸஸ்ஸ முக²ம் ப⁴வேய்ய, ததா²பி காசி அஸதி³ஸதா ப⁴வேய்யாதி வுத்தம் ‘‘வண்ணாதீ³ஹி அஸதி³ஸம் ஹுத்வா பஞ்ஞாயேய்யா’’தி. நிபா⁴ஸரூபந்தி படிபா⁴ஸரூபம். நிபா⁴ஸரூபம் தாவ கம்ஸாதி³மயே பப⁴ஸ்ஸரே மண்ட³லே பஞ்ஞாயது, உத³கே பன கத²ந்தி ‘‘கேன காரணேனா’’தி புச்ச²தி. இதரோ ‘‘மஹாபூ⁴தானம் விஸுத்³த⁴தாயா’’தி வத³ந்தோ தத்தா²பி யதா²லத்³த⁴பப⁴ஸ்ஸரபா⁴வேனேவாதி த³ஸ்ஸேதி. ஏத்த² ச மண்ட³னஜாதிகோ புரிஸோ விய புது²ஜ்ஜனோ, ஆதா³ஸதலாத³யோ விய பஞ்சக்க²ந்தா⁴, முக²னிமித்தம் விய ‘‘அஸ்மீ’’தி க³ஹணம், முக²னிமித்தம் உபாதா³ய தி³ஸ்ஸமானரூபாதி³ விய ‘‘அஸ்மீ’’தி ஸதி ‘‘அஹமஸ்மீ’’தி ‘‘பரோஸ்மீ’’திஆத³யோ கா³ஹவிஸேஸா. அபி⁴ஸமேதோதி அபி⁴ஸமிதோ, அயமேவ வா பாடோ².

ஆனந்த³ஸுத்தவண்ணனா நிட்டி²தா.

2. திஸ்ஸஸுத்தவண்ணனா

84. மது⁴ரகம் வுச்சதி காயே விபா⁴ரந்தி ஆஹ – ‘‘மது⁴ரகஜாதோ வியாதி ஸஞ்ஜாதக³ருபா⁴வோ வியா’’தி. க³ருபா⁴வே ஸதி லஹுதா அனோகாஸாவ, ததா² முது³தா கம்மஞ்ஞதா சாதி வுத்தம் ‘‘அகம்மஞ்ஞோ’’தி. ‘‘காயே’’தி ஆனேத்வா வத்தப்³ப³ம். ந பக்கா²யந்தீதி பகாஸா ஹுத்வா ந கா²யந்தி. தேனாஹ ‘‘ந பாகடா ஹோந்தீ’’தி. உபட்ட²ஹந்தீதி உபதிட்ட²ந்தி. ந தி³ஸ்ஸதீதி க³ஹணம் ந க³ச்ச²தி. மஹாவிசிகிச்சா²தி அட்ட²வத்து²கா ஸோளஸவத்து²கா ச விமதி. ந ஹி உப்பஜ்ஜதி பரிபக்ககுஸலமூலத்தா.

காமானமேதம் அதி⁴வசனந்தி பத³ம் உத்³த⁴ரித்வா யேன அதி⁴ப்பாயேன ப⁴க³வதா நின்னம் பல்லலம் காமானம் நித³ஸ்ஸனபா⁴வேன ஆப⁴தம், தம் அதி⁴ப்பாயம் விபா⁴வேதும் ‘‘யதா² ஹீ’’திஆதி³ வுத்தம்.

திஸ்ஸஸுத்தவண்ணனா நிட்டி²தா.

3. யமகஸுத்தவண்ணனா

85. தி³ட்டி² ஏவ தி³ட்டி²க³தம் ‘‘கூ³த²க³தம் முத்தக³த’’ந்தி (ம. நி. 2.119; அ. நி. 9.11) யதா². தி³ட்டி²க³தம் நாம ஜாதம் க²ந்த⁴வினிமுத்தஸ்ஸ ஸத்தஸ்ஸ க³ஹிதத்தா.

குபிதேதி தி³ட்டி²ஸங்கா²தரோகே³ன குபிதே. பக்³க³ய்ஹாதி தேஸம் பி⁴க்கூ²னம் ஸந்திகே விய தே²ரஸ்ஸ ஸாரிபுத்தஸ்ஸ ஸம்முகா² அத்தனோ லத்³தி⁴ம் பக்³க³ய்ஹ ‘‘ஏவம் க்²வாஹ’’ந்தி ஏவம் நிச்ச²யேன வத்தும் அஸக்கோந்தோ.

அனுயோக³வத்தம் நாம யேன யுத்தோ, தஸ்ஸ அத்தனோ கா³ஹம் நிஜ்ஜா²னக்க²ந்தியாவ யாதா²வதோ பவேத³னம். தே²ரஸ்ஸ அனுயோகே³ பு⁴ம்மந்தி ‘‘தம் கிம் மஞ்ஞஸி, ஆவுஸோ யமகா’’திஆதி³னா தே²ரேன கதி²தபுச்சா²ய பு⁴ம்மனித்³தே³ஸோ. ஸசே தம் ஆவுஸோதி இத³ந்தி ‘‘ஸசே தம், ஆவுஸோ’’தி ஏவமாதி³கம் இத³ம் வசனம். ஏதந்தி யமகத்தே²ரம். அஞ்ஞந்தி அரஹத்தம். வத்தப்³பா³காரேன வத³ந்தோ அத்த²தோ அரஹத்தம் ப்³யாகரோந்தோ நாம ஹோதீதி அதி⁴ப்பாயேன வத³தி.

ஏதஸ்ஸ பட²மமக்³க³ஸ்ஸாதி ஏதஸ்ஸ இதா³னியேவ திபரிவட்டதே³ஸனாவஸானே தயா அதி⁴க³தஸ்ஸ பட²மமக்³க³ஸ்ஸ. சதூஹி யோகே³ஹீதி அத்ததோ பியதோ உதா³ஸினதோ வேரிதோதி சதூஹிபி உப்பஜ்ஜனஅனத்த²யோகே³ஹி.

உபேதீதி தண்ஹுபயதி³ட்டு²பயேஹி உபாதி³யதி தண்ஹாதி³ட்டி²வத்து²ம் பப்போதி. உபாதி³யதீதி த³ள்ஹக்³கா³ஹம் க³ண்ஹாதி. அதி⁴திட்ட²தீதி அபி⁴னிவிஸ்ஸ திட்ட²தி. கிந்தி? ‘‘அத்தா மே’’தி. பச்சத்தி²கா மே ஏதேதி ஏதே ரூபவேத³னாத³யோ பஞ்சுபாதா³னக்க²ந்தா⁴ மய்ஹம் பச்சத்தி²கா அனத்தா²வஹத்தாதி விபஸ்ஸனாஞாணேன ஞத்வா. விபஸ்ஸனாய யோஜேத்வாதி விபஸ்ஸனாய க²ந்தே⁴ யோஜேத்வா.

யமகஸுத்தவண்ணனா நிட்டி²தா.

4. அனுராத⁴ஸுத்தவண்ணனா

86. தஸ்ஸேவ விஹாரஸ்ஸாதி மஹாவனே யஸ்மிம் விஹாரே ப⁴க³வா விஹரதி, தஸ்ஸேவ விஹாரஸ்ஸ. இமேதி அஞ்ஞதித்தி²யா. யஸ்மா அயம் தே²ரோ ட²பனீயம் பஞ்ஹம் ட²பனீயபா⁴வேன ந ட²பேஸி, தஸ்மா. அஞ்ஞதித்தி²யா…பே… ஏதத³வோசும். தேனாஹ ‘‘ஏகதே³ஸேன ஸாஸனஸமயம் ஜானந்தா’’தி.

க³ஹிதமேவ ஹோதி ததோ பகே³வ ஸித்³த⁴த்தா. தேனாஹ ‘‘தஸ்ஸ மூலத்தா’’தி. ஏவந்தி ‘‘து³க்க²ஞ்சேவ பஞ்ஞபேமி, து³க்க²ஸ்ஸ ச நிரோத⁴’’ந்தி ஏவம். வட்டவிவட்டமேவாதி பஞ்சன்னம் பன க²ந்தா⁴னம் ஸமனுபஸ்ஸனாய வஸேன வட்டம், ‘‘ஏவம் பஸ்ஸ’’ந்திஆதி³னா விவட்டம் கதி²தமேவ.

அனுராத⁴ஸுத்தவண்ணனா நிட்டி²தா.

5. வக்கலிஸுத்தவண்ணனா

87. நக³ரமஜ்ஜே² மஹாஆபா³தோ⁴ உப்பஜ்ஜீதி நக³ரமஜ்ஜே²ன ஆக³ச்ச²ந்தோ கம்மஸமுட்டா²னோ மஹந்தோ ஆபா³தோ⁴ உப்பஜ்ஜதி. ஸமந்ததோ அதோ⁴ஸீதி ஸப்³ப³பா⁴கே³ன பரிப்ப²ந்தி³. இரியாபத²ம் யாபேதுந்தி ஸயனனிஸஜ்ஜாதி³பே⁴த³ம் இரியாபத²ம் பவத்தேதும். நிவத்தந்தீதி ஓஸக்கந்தி, பரிஹாயந்தீதி அத்தோ². அதி⁴க³ச்ச²ந்தீதி வட்³ட⁴ந்தி. ஸத்து² கு³ணஸரீரம் நாம நவவித⁴லோகுத்தரத⁴ம்மாதி⁴க³மமூலந்தி கத்வா வுத்தம் ‘‘நவவிதோ⁴ ஹி…பே… காயோ நாமா’’தி, யதா² ஸத்தானம் காயோ படிஸந்தி⁴மூலகோ.

காளஸிலாயம் கதவிஹாரோ காளஸிலாவிஹாரோ. மக்³க³விமோக்க²த்தா²யாதி அக்³க³மக்³க³விமோக்கா²தி⁴க³மாய. தே³வதாதி ஸுத்³தா⁴வாஸதே³வதா. அலாமகம் நாம புது²ஜ்ஜனகாலகிரியாய அபா⁴வதோ. தேனாஹ ‘‘தே²ரோ கிரா’’திஆதி³. ஏகம் த்³வே ஞாணானீதி ஏகம் த்³வே பச்சவேக்க²ணஞாணானி ஸபா⁴வதோ அவஸ்ஸம் உப்பஜ்ஜந்தி, அயம் த⁴ம்மதா. மக்³க³ப²லனிப்³பா³னபச்சவேக்க²ணானி தம்தம்மக்³க³வுட்டா²னே உப்பஜ்ஜந்தி ஏவ. ஏகம் த்³வேதி வசனம் உப்பன்னபா⁴வத³ஸ்ஸனத்த²ம் வுத்தம்.

தூ⁴மாயனபா⁴வோ தூ⁴மாகாரதா, ததா² திமிராயனபா⁴வோ.

வக்கலிஸுத்தவண்ணனா நிட்டி²தா.

6. அஸ்ஸஜிஸுத்தவண்ணனா

88. பஸ்ஸம்பி⁴த்வாதி நிரோதே⁴த்வா. நோ ச ஸ்வாஹந்தி நோ ச ஸு அஹம். பரிஹாயி குப்பத⁴ம்மத்தா. ஏதந்தி ஸமாதி⁴மத்தஸாரம், ஸீலமத்தே பன வத்தப்³ப³மேவ நத்தி². கத²ம் ஹோதீதி கத²ம் அபி⁴னந்த³னா ஹோதி. து³க்க²ம் பத்வாதி து³க்கு²ப்பத்திஹேது ஸுக²ம் பத்தே²தி ‘‘ஏவம் மே து³க்க²பரிளாஹோ ந ப⁴விஸ்ஸதீ’’தி. யத³க்³கே³னாதி யேன பா⁴கே³ன. ‘‘து³க்க²ம் பத்தே²தியேவா’’தி வத்வா தத்த² காரணமாஹ ‘‘ஸுக²விபரிணாமேன ஹீ’’திஆதி³. ஸுக²விபரிவத்தே ஸுக²விபரிணாமது³க்க²ம், தஸ்மா ஸுக²ம் அபி⁴னந்த³ந்தோ அத்த²தோ து³க்க²ம் அபி⁴னந்த³தி நாம.

அஸ்ஸஜிஸுத்தவண்ணனா நிட்டி²தா.

7. கே²மகஸுத்தவண்ணனா

89. அத்தனியந்தி தி³ட்டி²க³திகபரிகப்பிதஸ்ஸ அத்தனோ ஸந்தகம். தேனாஹ ‘‘அத்தனோ பரிக்கா²ரஜாத’’ந்தி. தண்ஹாமானோ அதி⁴க³தோ அரஹத்தஸ்ஸ அனதி⁴க³தத்தா, நோ தி³ட்டி²மானோ அதி⁴க³தோ, ததா² காமராக³ப்³யாபாதா³பி. அனாகா³மீ கிர கே²மகத்தே²ரோ, ‘‘ஸகதா³கா³மீ’’தி கேசி வத³ந்தி. ஸந்தா⁴வனிகாயாதி ஸஞ்சரணேன. தேனாஹ ‘‘புனப்புனம் க³மனாக³மனேனா’’தி. சதுக்க²த்தும் க³மனாக³மனேனாதி சதுக்க²த்தும் க³மனேன ச ஆக³மனேன ச. தேனாஹ – ‘‘தம் தி³வஸம் த்³வியோஜனம் அத்³தா⁴னம் ஆஹிண்டீ³’’தி. ஞத்வாதி அஜ்ஜா²ஸயம் ஞத்வா. தே²ரோதி கே²மகத்தே²ரோ.

ரூபமேவ அஸ்மீதி வத³தீதி ரூபக்க²ந்த⁴மேவ ‘‘அஸ்மீ’’தி கா³ஹஸ்ஸ வத்து²ம் கத்வா வத³தி. அதி⁴க³தோ தண்ஹாமானோ.

அணுஸஹக³தோதி அணுபா⁴வம் க³தோ. தேனாஹ ‘‘ஸுகு²மோ’’தி. தயோ கா²ரா விய திஸ்ஸோ அனுபஸ்ஸனா சித்தஸம்கிலேஸஸ்ஸ விஸோத⁴னதோ. ஸீலக³ந்தா⁴தீ³ஹி கு³ணக³ந்தே⁴ஹி.

கதே²துந்தி உத்³தே³ஸவஸேன கதே²தும். பகாஸேதுந்தி நித்³தே³ஸவஸேன தமத்த²ம் பகாஸேதும். ஜானாபேதுந்தி காரணவஸேன ஜானாபேதும். பதிட்டா²பேதுந்தி கதா²பேதும். விவடம் காதுந்தி உதா³ஹரணம் வண்ணேத்வா பாகடம் காதும். ஸுவிப⁴த்தம் காதுந்தி அன்வயதோ ப்³யதிரேகதோ ஸுட்டு², விப⁴த்தம் காதும். உத்தானகம் காதுந்தி உபனயனிக³மேஹி தமத்த²ம் விபூ⁴தம் காதும். அஞ்ஞேன நீஹாரேனாதி விபஸ்ஸனாவிமுத்தேன சித்தாபி⁴னீஹாரேன.

கே²மகஸுத்தவண்ணனா நிட்டி²தா.

8. ச²ன்னஸுத்தவண்ணனா

90. மக்கீ²தி கு³ணமக்க²னலக்க²ணேன மக்கே²ன ஸமன்னாக³தோ. பளாஸீதி யுக³க்³கா³ஹலக்க²ணேன பளாஸேன ஸமன்னாக³தோ. ஏதம் அவோசாதி ‘‘ஓவத³ந்து மம்…பே… பஸ்ஸேய்ய’’ந்தி ஏதம் அவோச.

தே²ரந்தி ச²ன்னத்தே²ரம். அத்தனோ து³க்³க³ஹணேன கஞ்சி உபாரம்ப⁴ம்பி கரேய்ய. தேன வுத்தம் ‘‘ஏவம் கிர நேஸம் அஹோஸீ’’திஆதி³. நித்³தோ³ஸமேவஸ்ஸ கத்வாதி ஆதி³தோ அனுரூபத்தமேவ கத்வா ஸத்³த⁴ம்மம் கதே²ஸ்ஸாமாதி.

பரிதஸ்ஸனா உபாதா³னந்தி ப⁴யபரிதஸ்ஸனா தி³ட்டு²பாதா³னம். அனத்தனி ஸதி அனத்தகதானி கம்மானி கமத்தானம் பு²ஸிஸ்ஸந்தீதி ப⁴யபரிதஸ்ஸனா சேவ தி³ட்டு²பாதா³னஞ்ச உப்பஜ்ஜதி. படினிவத்ததீதி யதா²ரத்³த⁴விபஸ்ஸனாதோ படினிவத்ததி, நாஸக்கீ²தி அத்தோ². கஸ்மா பனேதஸ்ஸ விபஸ்ஸனமனுயுஞ்ஜந்தஸ்ஸ ஏவம் அஹோஸீதி தத்த² காரணம் வத³தி ‘‘அயம் கிரா’’திஆதி³னா. ஏவந்தி ‘‘கோ நு கோ² மே அத்தா’’தி ஏவம் ந ஹோதி. தாவதிகா விஸ்ஸத்தீ²தி ‘‘மய்ஹம் த⁴ம்மம் தே³ஸேதூ’’தி வுத்தவிஸ்ஸாஸோ அத்தீ²தி அத்தோ². இத³ம் கச்சானஸத்த²ம் அத்³த³ஸாதி யோஜனா. ‘‘த்³வயனிஸ்ஸிதோ, கச்சான, லோகோ’’திஆதி³ தி³ட்டி²வினிவேட²னா. ‘‘ஏதே தே, கச்சான, உபோ⁴ அந்தே அனுபக³ம்மா’’திஆதி³ பு³த்³த⁴ப³லதீ³பனா.

ச²ன்னஸுத்தவண்ணனா நிட்டி²தா.

9-10. ராஹுலஸுத்தாதி³வண்ணனா

91-92. ஏதானி ஸுத்தானி. இதா⁴க³தானீதி இமஸ்மிம் வக்³கே³ ஆனீதானி ஸங்கீ³திகாரேஹீதி.

ராஹுலஸுத்தாதி³வண்ணனா நிட்டி²தா.

தே²ரவக்³க³வண்ணனா நிட்டி²தா.