5. ஸத்தட்டா²னஸுத்தவண்ணனா

57. ஸத்தஸு ஓகாஸேஸூதி ரூபபஜானனாதீ³ஸு ஸத்தஸு ஓகாஸேஸு. வுஸிதவாஸோதி வுஸிதஅரியவாஸோ. ஏத்தா²தி இமஸ்மிம் உத்³தே³ஸே. ஸேஸம் நாம இத⁴ வுத்தாவஸேஸம். வுத்தனயேனாதி ஹேட்டா² வுத்தனயேன வேதி³தப்³ப³ம். உஸ்ஸத³னந்தி³யந்தி உஸ்ஸன்னகு³ணவதோ தோஸனம் ஸம்மோதா³பனம். கு³ணகித்தனேன பலோப⁴னீயம் ஸேக்க²கல்யாணபுது²ஜ்ஜனானம் பஸாது³ப்பாத³னேன. இதா³னி வுத்தமேவ அத்த²ம் பாகடம் காதும் ‘‘யதா² ஹீ’’திஆதி³ வுத்தம்.

ஏத்தாவதாதி பஞ்சன்னம் க²ந்தா⁴னம் வஸேன ஸத்தஸு டா²னேஸு கோஸல்லதீ³பனேன ஏத்தகேன தே³ஸனாக்கமேன. தந்தி ஆரம்மணம். தா⁴துஆதி³மத்தமேவாதி தா⁴தாயதனபடிச்சஸமுப்பாத³மத்தமேவ. இமேஸு த⁴ம்மேஸூதி இமேஸு ஜாதாதீ³ஸு. கம்மம் கத்வாதி ஸம்மஸனகம்மம் நிட்ட²பேத்வாதி அத்தோ². ஏவமேத்த² பஞ்சன்னம் க²ந்தா⁴னம் வஸேன ஸத்தட்டா²னகோஸல்லபவத்தியா பபே⁴தே³ன விப⁴ஜித்வா ‘‘திவிதூ⁴பபரிக்கீ²’’தி த³ஸ்ஸேதி த⁴ம்மராஜா.

ஸத்தட்டா²னஸுத்தவண்ணனா நிட்டி²தா.