6. உபயவக்³கோ³

1. உபயஸுத்தவண்ணனா

53. உபேதீதி உபயோ. கத²முபேதி? தண்ஹாமானாதி³வஸேனாதி ஆஹ ‘‘தண்ஹாமானதி³ட்டி²வஸேனா’’தி. கத²மித³ம் லப்³ப⁴தீதி? ‘‘அவிமுத்தோ’’தி வசனதோ. தண்ஹாதி³ட்டி²வஸேன ஹி ப³த்³தோ⁴, கிம் உபேதீதி ஆஹ ‘‘பஞ்சக்க²ந்தே⁴’’தி தப்³பி³னிமுத்தஸ்ஸ ததா² உபேதஸ்ஸ அபா⁴வதோ. கோ பனுபேதீதி? தம்ஸமங்கீ³புக்³க³லோ. தண்ஹாதி³ட்டி²வஸேன உபக³மஸ்ஸ வுத்தத்தா விஞ்ஞாணந்தி அகுஸலகம்மவிஞ்ஞாணமேவாதி வத³ந்தி. ஜவாபேத்வாதி க³ஹிதஜவம் கத்வா. யதா² படிஸந்தி⁴ம் ஆகட்³டி⁴தும் ஸமத்த²ம், ஏவம் கத்வா. தேனாஹ ‘‘படிஸந்தீ⁴’’திஆதி³. அக்³க³ஹணே காரணம் வுத்தமேவ ‘‘ஓகம் பஹாய அனிகேதஸாரீ’’தி கா³தா²ய விஸ்ஸஜ்ஜனே. கம்மனிமித்தாதி³வஸேன படிஸந்தி⁴யா பச்சயபூ⁴தம் ஆரம்மணம் படிஸந்தி⁴ஜனகஸ்ஸ கம்மஸ்ஸ வஸேன வோச்சி²ஜ்ஜதி. பதிட்டா² ந ஹோதி ஸராக³காலே விய அனுபட்டா²னதோ. அப்பதிட்டி²தம் விஞ்ஞாணம் வுத்தப்பகாரேன. அனபி⁴ஸங்க²ரித்வாதி அனுப்பாதே³த்வா பச்சயகா⁴தேன.

உபயஸுத்தவண்ணனா நிட்டி²தா.

2. பீ³ஜஸுத்தவண்ணனா

54. பீ³ஜஜாதானீதி ஜாத-ஸத்³தோ³ பத³பூரணமத்தந்தி ஆஹ ‘‘பீ³ஜானீ’’தி. வசந்தி ஸேதவசம். அஜ்ஜுகந்தி தச்ச²கம். ப²ணிஜ்ஜகம் துலஸி. அபி⁴ன்னானீதி ஏகதே³ஸேனபி அக²ண்டி³தானி. பீ³ஜத்தா²யாதி பீ³ஜகிச்சாய. ந உபகப்பதீதி பச்சயோ ந ஹோதீதி த³ஸ்ஸேதி. ந பாபிதானீதி பூதிதம் ந உபக³தானி. தண்டு³லஸாரஸ்ஸ ஆதா³னதோ ஸாராதா³னி. ஆரம்மணக்³க³ஹணவஸேன விஞ்ஞாணம் திட்ட²தி ஏத்தா²தி விஞ்ஞாணட்டி²தியோ. ஆரம்மணவஸேனாதி ஆரம்மணபா⁴வவஸேன. ஸினேஹனட்டே²னாதி தண்ஹாயனவஸேன ஸினித்³த⁴தாபாத³னேன, யதோ ‘‘நந்தூ³பஸேசன’’ந்தி வுத்தம். ததா² ஹி விரோபிதம் தம் கம்மவிஞ்ஞாணம் படிஸந்தி⁴அங்குருப்பாத³னஸமத்த²ம் ஹோதி. ஸப்பச்சயந்தி அவிஜ்ஜாஅயோனிஸோனமனஸிகாராதி³பச்சயேஹி ஸப்பச்சயம். விருஹதி விபாகஸந்தானுப்பாத³னஸமத்தோ² ஹுத்வா.

பீ³ஜஸுத்தவண்ணனா நிட்டி²தா.

3. உதா³னஸுத்தவண்ணனா

55. உதா³னம் உதா³ஹரீதி அத்தமனவாசம் நிச்சா²ரேஸி. ஏஸ வுத்தப்பகாரோ உதா³ஹாரோ. பு⁴ஸோ நிஸ்ஸயோ உபனிஸ்ஸயோ, தா³னமேவ உபனிஸ்ஸயோ தா³னூபனிஸ்ஸயோ. ஏஸ நயோ ஸேஸேஸுபி. தத்த² தா³னூபனிஸ்ஸயோ அன்னாதி³வத்தூ²ஸு ப³லவாதி ப³லவபா⁴வேன ஹோதி, தஸ்மா உபனிஸ்ஸயப³ஹுலோ காமராக³ப்பஹானேனேவ கதபரிசயத்தா விபஸ்ஸனமனுயுஞ்ஜந்தோ ந சிரஸ்ஸேவ அனாகா³மிப²லம் பாபுணாதி, ததா² ஸுவிஸுத்³த⁴ஸீலூபனிஸ்ஸயோ காமதோ³ஸஜிகு³ச்ச²னேன. யதி³ ஏவம் கஸ்மா இமே த்³வே உபனிஸ்ஸயா து³ப்³ப³லாதி வுத்தா? விஜ்ஜூபமஞ்ஞாணஸ்ஸேவ பச்சயபா⁴வதோ. ஸோபி பா⁴வனூபனிஸ்ஸயஸஹாயலாபே⁴னேவ, ந கேவலம். பா⁴வனா பன படிவேத⁴ஸ்ஸ விஸேஸஹேதுபா⁴வதோ ப³லவா உபனிஸ்ஸயோ. ததா² ஹி ஸா வஜிரூபமஞாணஸ்ஸ விஸேஸபச்சயோ. தேனாஹ ‘‘பா⁴வனூபனிஸ்ஸயோ அரஹத்தம் பாபேதீ’’தி.

ஸோதி மிலகத்தே²ரோ. விஹாரந்தி வஸனட்டா²னம். விஹாரபச்சந்தே ஹி பண்ணஸாலாய தே²ரோ விஹரதி. உபட்டா²தி ஏகலக்க²ணேன. கூடகோ³ணோ விய க³மனவீதி²ம். தத்தா²தி அல்லகட்ட²ராஸிம்ஹி. உத³கமணிகானந்தி உத³கதே²வானம்.

அத்தனியேவ உபனேஸி உதா³னகதா²ய வுத்தத⁴ம்மானம் பரிபுண்ணானம் அத்தனி ஸம்விஜ்ஜமானத்தா. தேனாஹ ‘‘உட்டா²னவதா’’திஆதி³. அயஞ்ஹி மிலகத்தே²ரோ ஸிக்கா²ய கா³ரவோ ஸப்பதிஸ்ஸோ வத்தபடிவத்தம் பூரேந்தோ விஸுத்³த⁴ஸீலோ ஹுத்வா டி²தோ, தஸ்மா ‘‘து³ப்³ப³லூபனிஸ்ஸயே’’தி வுத்தம். தேனாஹ ப⁴க³வா உதா³னேந்தோ ‘‘நோ சஸ்ஸம்…பே… ஸஞ்ஞோஜனானீ’’தி.

ஸசே அஹம் ந ப⁴வேய்யந்தி யதி³ அஹம் நாம கோசி ந ப⁴வேய்யம் தாதி³ஸஸ்ஸ அஹம்ஸத்³த³வசனீயஸ்ஸ கஸ்ஸசி அத்த²ஸ்ஸ அபா⁴வதோ. ததோ ஏவ மம பரிக்கா²ரோபி ந ப⁴வேய்யதஸ்ஸ ச பப⁴ங்கு³பா⁴வேன அனவட்டி²தபா⁴வதோ. ஏவம் அத்துத்³தே³ஸிகபா⁴வேன பத³த்³வயஸ்ஸ அத்த²ம் வத்வா இதா³னி கம்மப²லவஸேன வத்தும் ‘‘ஸசே வா பனா’’திஆதி³ வுத்தம். அதீதபச்சுப்பன்னவஸேன ஸுஞ்ஞதம் த³ஸ்ஸேத்வா இதா³னி பச்சுப்பன்னானாக³தவஸேன தம் த³ஸ்ஸேந்தோ ‘‘இதா³னி பனா’’திஆதி³ வுத்தம். ஏவம் அதி⁴முச்சந்தோதி ஏதி³ஸம் அதி⁴முத்திம் பவத்தேந்தோ. விப⁴விஸ்ஸதீதி வினஸ்ஸிஸ்ஸதி. விப⁴வோ ஹி வினாஸோ. தேனாஹ ‘‘பி⁴ஜ்ஜிஸ்ஸதீ’’தி. விப⁴வத³ஸ்ஸனம் விப⁴வோதி உத்தரபத³லோபேன வுத்தந்தி ஆஹ ‘‘விப⁴வத³ஸ்ஸனேனா’’தி. விப⁴வத³ஸ்ஸனம் நாம அச்சந்தாய வினாஸஸ்ஸ த³ஸ்ஸனம். தந்தி அரியமக்³க³ம். ஸாமஞ்ஞஜோதனா ஹேஸா விஸேஸனிட்டா² ஹோதீதி ததியமக்³க³வஸேன அத்தோ² வேதி³தப்³போ³.

உபரி மக்³க³ப²லந்தி அக்³க³மக்³க³ப²லம். நத்தி² ஏதிஸ்ஸா ஜாதியா அந்தரந்தி அனந்தரா, அனந்தரா விபஸ்ஸனா மக்³க³ஸ்ஸ. கோ³த்ரபூ⁴ பன அனுலோமவீதி²பரியாபன்னத்தா விபஸ்ஸனாக³திகம் வா ஸியா, நிப்³பா³னாரம்மணத்தா மக்³க³க³திகம் வாதி ந தேன மக்³கோ³ அந்தரிகோ நாம ஹோதி. தேனாஹ ‘‘விபஸ்ஸனா மக்³க³ஸ்ஸ ஆஸன்னானந்தரம் நாமா’’தி. ப²லம் பன நிப்³பா³னாரம்மணத்தா கிலேஸானம் பஜஹனவஸேன பவத்தனதோ லோகுத்தரபா⁴வதோ ச கம்மமக்³க³க³திகமேவ, குஸலவிபாகபா⁴வேன பன நேஸம் அத்தோ² பபே⁴தோ³தி விபஸ்ஸனாய ப²லஸ்ஸ ஸியா அனந்தரதாதி வுத்தம் ‘‘ப²லஸ்ஸ தூ³ரானந்தரம் நாமா’’தி. ‘‘ஆஸவானம் க²யோ’’தி பன அக்³க³மக்³கே³ வுச்சமானே விபஸ்ஸனானம் ஆஸன்னதாய வத்தப்³ப³மேவ நத்தி². அதஸிதாயேதி ந தஸிதப்³பே³ தாஸம் அனாபஜ்ஜிதப்³பே³. தாஸோதி தாஸஹேது ‘‘தஸதி ஏதஸ்மா’’தி கத்வா. ஸோதி அஸ்ஸுதவா புது²ஜ்ஜனோ. திலக்க²ணாஹதந்தி அனிச்சதாதி³லக்க²ணத்தயலக்கி²தம். மனம்ஹி நட்டோ²தி ஈஸகம் நட்டோ²ம்ஹி, ததோ பரம்பி தத்தே²வ ட²த்வா கிஞ்சி அபூரிதத்தா ஏவ முத்தோதி அதி⁴ப்பாயோ. ‘‘ந தாஸோ நாம ஹோதீ’’தி வத்வா தஸ்ஸ அதாஸபா⁴வம் த³ஸ்ஸேதும் ‘‘ந ஹீ’’திஆதி³ வுத்தம். கல்யாணபுது²ஜ்ஜனோ ஹி ப⁴யதுபட்டா²னஞாணேன ‘‘ஸப⁴யா ஸங்கா²ரா’’தி விபஸ்ஸந்தோ ந உத்தஸதி.

உதா³னஸுத்தவண்ணனா நிட்டி²தா.

4. உபாதா³னபரிபவத்தஸுத்தவண்ணனா

56. சதுன்னம் பரிவட்டனவஸேனாதி பச்சேகக்க²ந்தே⁴ஸு சதுன்னம் அரியஸச்சானம் பரிவட்டனவஸேன. ரூபம் அப்³ப⁴ஞ்ஞாஸிந்தி ஸகலபூ⁴துபாதா³ரூபம் குச்சி²தபா⁴வதோ தத்த² ச துச்ச²விபல்லாஸதாய ‘‘து³க்க²ஸச்ச’’ந்தி அபி⁴விஸிட்டே²ன ஞாணேன அஞ்ஞாஸிம் படிவிஜ்ஜி²ம். ஆஹாரவஸேன ரூபகாயஸ்ஸ ஹானிவுத்³தா⁴தீ³னம் பாகடபா⁴வதோ விஸேஸபச்சயதோ ச தஸ்ஸ ‘‘ஆஹாரஸமுத³யா’’தி வுத்தம். து³க்க²ஸமுத³யகதா² நாம வட்டகதா²தி ‘‘ஸச்ச²ந்த³ராகோ³’’தி விஸேஸேத்வா வுத்தம். ச²ந்த³ராக³க்³க³ஹணேன ச உபாதா³னகம்மாவிஜ்ஜாபி க³ஹிதா ஏவ. படிபன்னா ஹோந்தீதி அத்தோ². வத்தமானகாலப்பயோகோ³ ஹேஸ யதா² ‘‘குஸலம் சித்தம் உப்பன்னம் ஹோதீ’’தி. பதிட்ட²ஹந்தீதி பதிட்ட²ம் லப⁴ந்தி. கேவலினோதி இத⁴ விமுத்திகு³ணேன பாரிபூரீதி ஆஹ ‘‘ஸகலினோ கதஸப்³ப³கிச்சா’’தி. யேன தேதி யேன அவஸிட்டே²ன தே அஸேக்கே² பஞ்ஞாபேந்தா பஞ்ஞாபேய்யும், தம் நேஸம் வட்டம் ஸேக்கா²னம் விய நத்தி² பஞ்ஞாபனாய. வட்டந்தி காரணம் வட்டனட்டே²ன ப²லஸ்ஸ பவத்தனட்டே²ன. அஸேக்க²பூ⁴மிவாரோதி அஸேக்க²பூ⁴மிப்பவத்தி.

உபாதா³னபரிபவத்தஸுத்தவண்ணனா நிட்டி²தா.

5. ஸத்தட்டா²னஸுத்தவண்ணனா

57. ஸத்தஸு ஓகாஸேஸூதி ரூபபஜானனாதீ³ஸு ஸத்தஸு ஓகாஸேஸு. வுஸிதவாஸோதி வுஸிதஅரியவாஸோ. ஏத்தா²தி இமஸ்மிம் உத்³தே³ஸே. ஸேஸம் நாம இத⁴ வுத்தாவஸேஸம். வுத்தனயேனாதி ஹேட்டா² வுத்தனயேன வேதி³தப்³ப³ம். உஸ்ஸத³னந்தி³யந்தி உஸ்ஸன்னகு³ணவதோ தோஸனம் ஸம்மோதா³பனம். கு³ணகித்தனேன பலோப⁴னீயம் ஸேக்க²கல்யாணபுது²ஜ்ஜனானம் பஸாது³ப்பாத³னேன. இதா³னி வுத்தமேவ அத்த²ம் பாகடம் காதும் ‘‘யதா² ஹீ’’திஆதி³ வுத்தம்.

ஏத்தாவதாதி பஞ்சன்னம் க²ந்தா⁴னம் வஸேன ஸத்தஸு டா²னேஸு கோஸல்லதீ³பனேன ஏத்தகேன தே³ஸனாக்கமேன. தந்தி ஆரம்மணம். தா⁴துஆதி³மத்தமேவாதி தா⁴தாயதனபடிச்சஸமுப்பாத³மத்தமேவ. இமேஸு த⁴ம்மேஸூதி இமேஸு ஜாதாதீ³ஸு. கம்மம் கத்வாதி ஸம்மஸனகம்மம் நிட்ட²பேத்வாதி அத்தோ². ஏவமேத்த² பஞ்சன்னம் க²ந்தா⁴னம் வஸேன ஸத்தட்டா²னகோஸல்லபவத்தியா பபே⁴தே³ன விப⁴ஜித்வா ‘‘திவிதூ⁴பபரிக்கீ²’’தி த³ஸ்ஸேதி த⁴ம்மராஜா.

ஸத்தட்டா²னஸுத்தவண்ணனா நிட்டி²தா.

6. ஸம்மாஸம்பு³த்³த⁴ஸுத்தவண்ணனா

58. அதி⁴கம் ஸவிஸேஸம் பயஸதி பயுஞ்ஜதி ஏதேனாதி அதி⁴ப்பயாஸோ, விஸிட்ட²பயோகோ³. தேனாஹ ‘‘அதி⁴கபயோகோ³’’தி. இமஞ்ஹி மக்³க³ந்தி அட்ட²ங்கி³கம் அரியமக்³க³மாஹ. இதா⁴தி இமஸ்மிம் ஸுத்தே. அவத்தமானட்டே²னாதி பு³த்³து⁴ப்பாத³தோ புப்³பே³ ந வத்தமானபா⁴வேன. மக்³க³ம் ஜானாதீதி ஸமுதா³க³மதோ பட்டா²ய ஸபுப்³ப³பா⁴க³ம் ஸஸம்பா⁴ரவிஸயம் ஸப²லம் ஸஉத்³ரயம் அரியம் மக்³க³ம் ஜானாதி அவபு³ஜ்ஜ²தீதி மக்³க³ஞ்ஞூ. விதி³தந்தி அஞ்ஞேஸம்பி ஞாதம் படிலத்³த⁴ம் ஹத்த²தலே ஆமலகம் விய பாகடம் அகாஸி, ததா² கத்வா தே³ஸேஸி. அமக்³கே³ பரிவஜ்ஜனேன மக்³கே³ படிபத்தீதி தஸ்ஸ மக்³க³குஸலதா விய அமக்³க³குஸலதாபி இச்சி²தப்³பா³தி ஆஹ ‘‘மக்³கே³ ச அமக்³கே³ ச கோவிதோ³’’தி. அஹம் பட²மம் க³தோதி அஹம் பட²மமக்³கே³ன ஸமன்னாக³தோ.

ஸம்மாஸம்பு³த்³த⁴ஸுத்தவண்ணனா நிட்டி²தா.

7. அனத்தலக்க²ணஸுத்தவண்ணனா

59. புராணுபட்டா²கேதி புப்³பே³ பதா⁴னபத³ஹனகாலே உபட்டா²கபூ⁴தே. ‘‘அவஸவத்தனட்டே²ன அஸ்ஸாமிகட்டே²ன ஸுஞ்ஞதட்டே²ன அத்தபடிக்கே²பட்டே²னா’’தி ஏவம் புப்³பே³ வுத்தேஹி. ஏத்தகேன டா²னேனாதி ‘‘ரூபம், பி⁴க்க²வே, அனத்தா’’தி ஆரபி⁴த்வா யாவ ‘‘ஏவம் மே விஞ்ஞாணம் மா அஹோஸீ’’தி ஏத்தகேன ஸுத்தபதே³ஸேன. அகதி²தஸ்ஸேவ கத²னம் உத்தரம், ந கதி²தஸ்ஸாதி வுத்தம் ‘‘தானி த³ஸ்ஸேத்வா’’தி. ஸமோதா⁴னேத்வாதி ஸம்பிண்டி³த்வா. வித்தா²ரகதா²தி வித்தா²ரதோ அட்ட²கதா². அனத்தலக்க²ணமேவாதி தப்³ப³ஹுலதாய தப்பதா⁴னதாய ச வுத்தம். அனிச்சதாதீ³னம்பி ஹி தத்த² தம்தீ³பனத்த²மேவ வுத்தத்தா ததே³வ ஜேட்ட²ம் பதா⁴னம் ததா² வேனேய்யஜ்ஜா²ஸயதோ.

அனத்தலக்க²ணஸுத்தவண்ணனா நிட்டி²தா.

8. மஹாலிஸுத்தவண்ணனா

60. ஏகந்தது³க்க²ந்திஆதீ³னி பதா³னி வுத்தனயானேவ, தஸ்மா தத்த² வுத்தனயேனேவ அத்தோ² வேதி³தப்³போ³. ஏத்த² ச யதா² ஸராகோ³ ஹேது பச்சயோ ஸம்கிலேஸாய, ஏவம் ஸவிபஸ்ஸனோ மக்³கோ³ ஹேது பச்சயோ ச விஸுத்³தி⁴யாதி த³ட்ட²ப்³ப³ம்.

மஹாலிஸுத்தவண்ணனா நிட்டி²தா.

9. ஆதி³த்தஸுத்தவண்ணனா

61. ஏகாத³ஸஹீதி ராகா³தீ³ஹி உபாயாஸபரியோஸானேஹி ஏகாத³ஸஹி ஸந்தாபனட்டே²ன அக்³கீ³ஹி. த்³வீஸூதி அட்ட²மனவமேஸு. து³க்க²லக்க²ணமேவாதி தப்³ப³ஹுலதாய தப்பதா⁴னதாய ச வுத்தம்.

ஆதி³த்தஸுத்தவண்ணனா நிட்டி²தா.

10. நிருத்திபத²ஸுத்தவண்ணனா

62. நிருத்தியோவ நிருத்திபதா²தி பத²-ஸத்³தே³ன பத³வட்³ட⁴னமாஹ யதா² ‘‘பீ³ஜானியேவ பீ³ஜஜாதானீ’’தி. நிருத்திவஸேனாதி நிப்³ப³சனவஸேன. பதா² ச அத்தா²னுரூபபா⁴வதோ. தீணிபீதி நிருத்திஅதி⁴வசனபஞ்ஞத்திபத²பதா³னி. ததா² ஹி ‘‘பு²ஸதீதி ப²ஸ்ஸோ’’திஆதி³னா நீஹரித்வா வசனம் நிருத்தி, ‘‘ஸிரீவட்³ட⁴கோ த⁴னவட்³ட⁴கோ’’திஆதி³னா வசனமத்தமேவ அதி⁴காரம் கத்வா பவத்தம் அதி⁴வசனம், ‘‘தக்கோ விதக்கோ’’திஆதி³னா தம்தம்பகாரேன ஞாபனதோ பஞ்ஞத்தி. அத² வா தம்தம்அத்த²ப்பகாஸனேன நிச்சி²தம், நியதம் வா வசனம் நிருத்தி. அதி⁴-ஸத்³தோ³ உபரிபா⁴கே³, உபரி வசனம் அதி⁴வசனம். கஸ்ஸ உபரி? பகாஸேதப்³ப³ஸ்ஸ அத்த²ஸ்ஸாதி பாகடோயமத்தோ². அதீ⁴னம் வசனம் அதி⁴வசனம். கேன அதீ⁴னம்? அத்தே²ன. அத்த²ஸ்ஸ பஞ்ஞாபனத்தே²ன பஞ்ஞத்தீதி ஏவம் நிருத்திஆதி³பதா³னம் ஸப்³ப³வசனேஸு பவத்தி வேதி³தப்³பா³. அஞ்ஞதா² ‘‘பு²ஸதீதி ப²ஸ்ஸோ’’திஆதி³ப்பகாரேன நித்³தா⁴ரணவசனானம்யேவ நிருத்திதா, ஸிரிவட்³ட⁴கத⁴னவட்³ட⁴கபகாரானமேவ அபி⁴லாபனம் அதி⁴வசனதா. ‘‘தக்கோ விதக்கோ’’தி ஏவம்பகாரானமேவ ஏகமேவ அத்த²ம் தேன தேன பகாரேன ஞாபேந்தானம் வசனானம் பஞ்ஞத்திதா ச ஆபஜ்ஜேய்ய. அஸம்கிண்ணாதி ந ஸம்கிண்ணா. தேனாஹ ‘‘அவிஜஹிதா…பே… அச²ட்³டி³தா’’தி. ந ஸம்கீயந்தீதி ந ஸம்கிரீயந்தி, ந ஸம்கீயிஸ்ஸந்தி ந ஸம்கிரீயிஸ்ஸந்தீதி அத்தோ². அப்படிகுட்டா²தி ந படிக்கி²த்தா. யஸ்மா ப⁴ங்க³ம் அதிக்கந்தம் உப்பாதா³தி³ அதிக்கந்தமேவ ஹோதி, தஸ்மா வுத்தம் ‘‘ப⁴ங்க³மேவா’’தி. யஸ்மா தே³ஸந்தரம் ஸங்கந்தோபி அதிக்கந்தந்தி வுச்சதி, தஸ்மா ததா³பா⁴வம் த³ஸ்ஸேதும் ‘‘தே³ஸந்தரம் அஸங்கமித்வா’’தி வுத்தம். யத்த² யத்த² ஹி ஸங்கா²ரா உப்பஜ்ஜந்தி, தத்த² தத்தே²வ பி⁴ஜ்ஜந்தி நிருஜ்ஜ²ந்தி விபரிணமந்தி வினாஸம் ஆபஜ்ஜந்தி. தேனாஹ ‘‘விபரிணதந்தி…பே… நட்ட²’’ந்தி. அபாகடீபூ⁴தம் அஜாதத்தா ஏவ.

வஸப⁴ணகோ³த்ததாய வஸ்ஸப⁴ஞ்ஞா. மூலதி³ட்டி²க³திகாதி மூலபூ⁴தா தி³ட்டி²க³திகா, இமஸ்மிம் கப்பே ஸப்³ப³பட²மம் தாதி³ஸதி³ட்டி²ஸமுப்பாத³கா. புனப்புனம் ஆவஜ்ஜேந்தஸ்ஸாதி அஹேதுவாத³படிஸம்யுத்தக³ந்த²ம் உக்³க³ஹேத்வா பரியாபுணித்வா தத³த்த²ம் வீமம்ஸந்தஸ்ஸ ‘‘நத்தி² ஹேது, நத்தி² பச்சயோ ஸத்தானம் ஸம்கிலேஸாயா’’திஆதி³னயப்பவத்தாய லத்³தி⁴யா ஆரம்மணே மிச்சா²ஸதி ஸந்திட்ட²தி, ‘‘நத்தி² ஹேதூ’’திஆதி³வஸேன அனுஸ்ஸவூபலத்³தே⁴ அத்தே² ததா³காரபரிவிதக்கனேஹி ஸவிக்³க³ஹே விய ஸரூபதோ சித்தஸ்ஸ பச்சுபட்டி²தே சிரகாலபரிசயேன ‘‘ஏவமேத’’ந்தி நிஜ்ஜா²னக்க²மபா⁴வூபக³மனேன நிஜ்ஜா²னக்க²ந்தியா ததா²க³ஹிதே புனப்புனம் ததே²வ ஆஸேவந்தஸ்ஸ ப³ஹுலீகரோந்தஸ்ஸ மிச்சா²விதக்கேன ஸமாதி³யமானா மிச்சா²வாயாமூபத்த²ம்பி⁴தா அதம்ஸபா⁴வம் ‘‘தம்ஸபா⁴வ’’ந்தி க³ண்ஹந்தீ மிச்சா²ஸதீதி லத்³த⁴னாமா தம்லத்³தி⁴ஸஹக³தா தண்ஹா ஸந்திட்ட²தி. யதா²ஸகம் விதக்காதி³பச்சயலாபே⁴ன தஸ்மிம் ஆரம்மணே அதி⁴ட்டி²ததாய அனேகக்³க³தம் பஹாய சித்தம் ஏகக்³க³தம் அப்பிதம் விய ஹோதி மிச்சா²ஸமாதி⁴னா. ஸோபி ஹி பச்சயவிஸேஸேஹி லத்³த⁴பா⁴வனாப³லோ ஈதி³ஸே டா²னே ஸமாதா⁴னபதிரூபகிச்சகரோ ஹோதியேவ வாலவிஜ்ஜ²னாதீ³ஸு வியாதி த³ட்ட²ப்³ப³ம். ததா² ஹி அனேகக்க²த்தும் தேனாகாரேன புப்³ப³பா⁴கி³யேஸு ஜவனவாரேஸு பவத்தேஸு ஸப்³ப³பச்சி²மே ஜவனவாரே ஸத்த ஜவனானி ஜவந்தி. தத்த² பட²மே ஸதேகிச்சோ² ஹோதி, ததா² து³தியாதீ³ஸு. ஸத்தமே பன ஜவனே ஸம்பத்தே அதேகிச்சோ² ஹோதி. தேனாஹ ‘‘அஸ்ஸாதே³ந்தஸ்ஸா’’திஆதி³. இமேஸுபீதி த்³வீஸுபி டா²னேஸு.

பச்சுப்பன்னம் வாதி ஏத்த² இதி-ஸத்³தோ³ ஆதி³அத்தோ². தேன ‘‘யதே³தம் அனாக³தம் நாம, நயித³ம் அனாக³த’’ந்திஆதி³கம் ஸங்க³ண்ஹாதி. தேபீதி தே வஸ்ஸப⁴ஞ்ஞாபி ந மஞ்ஞிம்ஸு லோகஸமஞ்ஞாய அனதிக்கமனீயதோ. தேனாஹ ‘‘அதீதம் பனா’’திஆதி³. க²ந்தா⁴னம் உபரி நிருள்ஹா பண்ணத்தி.

நிருத்திபத²ஸுத்தவண்ணனா நிட்டி²தா.

உபயவக்³க³வண்ணனா நிட்டி²தா.