3. பா⁴ரவக்³கோ³

1. பா⁴ரஸுத்தவண்ணனா

22. உபாதா³னானம் ஆரம்மணபூ⁴தா க²ந்தா⁴ உபாதா³னக்க²ந்தா⁴. பரிஹாரபா⁴ரியட்டே²னாதி பரிஹாரஸ்ஸ பா⁴ரியபா⁴வேன க³ருதரபா⁴வேன. வுத்தமேவ அத்த²ம் பாகடம் காதும் ‘‘ஏதேஸஞ்ஹீ’’திஆதி³மாஹ. தத்த² யஸ்மா ஏதானி டா²னக³மனாதீ³னி ரூபாரூபத⁴ம்மானம் பங்கு³லஜச்சந்தா⁴னம் விய அஞ்ஞமஞ்ஞூபஸ்ஸயவஸேன இஜ்ஜ²ந்தி, ந பச்சேகம், தஸ்மா ‘‘ஏதேஸ’’ந்தி அவிஸேஸவசனம் கதம். புக்³க³லந்தி க²ந்த⁴ஸந்தானம் வத³தி. க²ந்த⁴ஸந்தானோ ஹி அவிச்சே²தே³ன பவத்தமானோ யாவ பரினிப்³பா³னா க²ந்த⁴பா⁴ரம் வஹந்தோ விய லோகே கா²யதி தப்³பி³னிமுத்தஸ்ஸ ஸத்தஸ்ஸ அபா⁴வதோ. தேனாஹ ‘‘புக்³க³லோ’’திஆதி³. பா⁴ரஹாரோதி ஜாதோதி பா⁴ரஹாரோ நாம ஜாதோ.

புனப்³ப⁴வகரணம் புனப்³ப⁴வோ, தம் ப²லம் அரஹதி, தத்த² நியுத்தாதி வா போனோப⁴விகா. தப்³பா⁴வஸஹக³தம் யதா² ‘‘ஸனித³ஸ்ஸனா த⁴ம்மா’’தி, ந ஸம்ஸட்ட²ஸஹக³தம், நாபி ஆரம்மணஸஹக³தம். ‘‘தத்ர தத்ரா’’தி யம் யம் உப்பத்திட்டா²னம், ரூபாதி³ஆரம்மணம் வா பத்வா தத்ரதத்ராபி⁴னந்தி³னீ. தேனாஹ ‘‘உபபத்திட்டா²னே வா’’திஆதி³. பஞ்சகாமகு³ணிகோதி பஞ்சகாமகு³ணாரம்மணோ. ரூபாரூபூபபத்திப⁴வே ராகோ³ ரூபாரூபப⁴வராகோ³. ஜா²னனிகந்தி ஜா²னஸங்கா²தே கம்மப⁴வே ராகோ³. ஸஸ்ஸதாதி³ட்டீ²தி ப⁴வதி³ட்டி², தம்ஸஹக³தோ ராகோ³. அயந்தி ராகோ³ ப⁴வதண்ஹா நாம. உச்சே²த³தி³ட்டி² விப⁴வதி³ட்டி² நாம, தம்ஸஹக³தோ ச²ந்த³ராகோ³ விப⁴வதண்ஹா நாம. ஏஸ புக்³க³லோ க²ந்த⁴பா⁴ரம் ஆதி³யதி தண்ஹாவஸேன படிஸந்தி⁴க்³க³ஹணதோ. ‘‘அஸேஸமேத்த² தண்ஹா விரஜ்ஜதி பலுஜ்ஜதி நிருஜ்ஜ²தி பஹீயதீ’’திஆதி³னா ஸப்³ப³பதா³னி நிப்³பா³னவஸேனேவ வேதி³தப்³பா³னீதி ஆஹ ‘‘ஸப்³ப³ம் நிப்³பா³னஸ்ஸேவ வேவசன’’ந்தி.

பா⁴ரஸுத்தவண்ணனா நிட்டி²தா.

2. பரிஞ்ஞஸுத்தவண்ணனா

23. பரிஜானிதப்³பே³தி பஹானபரிஞ்ஞாய பரிஜானிதப்³பே³. ததா² பரிஜானனஞ்ச தத்த² ச²ந்த³ராக³ப்பஹானம், தேஸம் அதிக்கமோதி ஆஹ ‘‘ஸமதிக்கமிதப்³பே³தி அத்தோ²’’தி. அச்சந்தபரிஞ்ஞந்தி நிப்³பா³னம் வத³தி. தேனாஹ ‘‘ஸமதிக்கமந்தி அத்தோ²’’தி.

பரிஞ்ஞஸுத்தவண்ணனா நிட்டி²தா.

3. அபி⁴ஜானஸுத்தவண்ணனா

24. ஞாதபரிஞ்ஞா கதி²தா ‘‘அபி⁴விஸிட்டா²ய பஞ்ஞாய ஜானன’’ந்தி கத்வா. து³தியபதே³னாதி ‘‘பரிஜான’’ந்தி பதே³ன. ததியசதுத்தே²ஹீதி ‘‘விராஜயம் பஜஹ’’ந்தி பதே³ஹி.

அபி⁴ஜானஸுத்தவண்ணனா நிட்டி²தா.

4-9. ச²ந்த³ராக³ஸுத்தாதி³வண்ணனா

25-30. தா⁴துஸம்யுத்தே வுத்தனயேனேவ வேதி³தப்³பா³னி, கேவலஞ்ஹி ஏத்த² க²ந்த⁴வஸேன தே³ஸனா ஆக³தா, தத்த² தா⁴துவஸேனாதி அயமேவ விஸேஸோ. சத்தாரி ஸச்சானி கதி²தானி அஸ்ஸாதா³தீ³னவனிஸ்ஸரணவஸேன தே³ஸனாய பவத்தத்தா.

ச²ந்த³ராக³ஸுத்தாதி³வண்ணனா நிட்டி²தா.

10. அக⁴மூலஸுத்தவண்ணனா

31. அக⁴ம் வுச்சதி பாபம், அக⁴னிமித்ததாய அக⁴ம் து³க்க²ம். இத³ஞ்ஹி து³க்க²ம் நாம விஸேஸதோ பாபஹேதுகம் கம்மப²லஸஞ்ஞிதம். ததா² வட்டது³க்க²ம் அவிஜ்ஜாதண்ஹாமூலகத்தா. அக⁴ஸ்ஸ நிமித்ததாய அக⁴ம் து³க்க²ம். வட்டானுஸாரீ மஹாஜனோ ஹி து³க்கா²பி⁴பூ⁴தோ தஸ்ஸ பதிகாரம் மஞ்ஞமானோ தம் தம் கரோதீதி.

அக⁴மூலஸுத்தவண்ணனா நிட்டி²தா.

11. பப⁴ங்கு³ஸுத்தவண்ணனா

32. பபி⁴ஜ்ஜனஸபா⁴வந்தி க²ணே க²ணே பப⁴ங்கு³ஸபா⁴வம்.

பப⁴ங்கு³ஸுத்தவண்ணனா நிட்டி²தா.

பா⁴ரவக்³க³வண்ணனா நிட்டி²தா.